Blog

Fushata për zgjedhjet e përgjithshme në Greqi ka filluar zyrtarisht të shtunën, me shpërndarjen e parlamentit që ishte zgjedhur në korrik të 2019-ës.

Kryeministri grek, Kyriakos Mitsotakis, u takua me presidenten Katerina Sakellaropoulou për të propozuar shpërbërjen e parlamentit, që është pranuar nga presidentja.

Mitsotakis tha se meqë kanë mbetur më pak se tre muaj deri në përfundimin mandatit katërvjeçar të ligjvënësve, votimi muajin tjetër nuk konsiderohet si zgjedhje e parakohshme.

Pas takimit me presidenten, Mitsotakis bëri një adresim televiziv gjatë të cilit përmendi të arriturat e qeverisë së tij dhe sfidat që e presin vendin.

Fushatat zgjedhore në Greqi veçse kishin filluar jozyrtarisht, derisa ato pauzuan për disa ditë në javën e Krishtlindjeve Ortodokse.

Votimi në zgjedhjet e reja do të bëhet sipas një sistemi të ri të përfaqësimit proporcional në Parlamentin grek me 300 ulëse, që vështirëson gjasat që ndonjë parti të sigurojë shumicën në rundin e parë të votimit.

Rundi i balotazhit pritet që të mbahet në muajin korrik.

Qeveria e udhëhequr nga Mitsotakis së fundmi është përballur me presion të shtuar, pas aksidentit tragjik me trena më 28 shkurt, ku vdiqën 57 persona dhe u lënduan 85 të tjerë.

Pas këtij aksidenti tragjik dha dorëheqje ministri i transportit, ndërsa ra dukshëm popullariteti i partisë së qendrës së djathtë të Mitsotakis, “Demokracia e Re”, megjithëse në sondazhe ajo renditet para partisë majtiste “Siriza” të ish-kryeministrit, Alexis Tsipras.

Qeverisja e Mitsotakis gjithashtu është përballur me probleme si inflacioni i lartë dhe çmimet e ushqimeve, një skandal përgjimi dhe çështje të tjera. /atvlive.tv

Bujqve do t’iu duhet të paguajnë taksë për tokën që e punojnë.

Në Kuvendin e Kosovës pritet të trajtohet shumë shpejt projektligji për ndryshimin dhe plotësimin e ligjit për tatimin në pronën e paluajtshme, me anë të të cilit pritet të rregullohet kjo çështje.

Ky ligj do t’i obligojë të gjithë qytetarët që e punojnë tokën, në vlerë mbi 50 mijë euro, të paguajnë tatim prej 0.10 deri në 1 për qind.

“Ideja ka qenë në atë kuptim që çdo pronë me pasë edhe vlerën e vet dhe në të njëjtën kohë prona si pronë të trajtohet me ligje që aplikohen…”, tha deputeti i VV-së, Visar Korenica.

Por kjo po kundërshtohet nga opozita, e cila thotë se do të jetë një barrë shtesë për bujqit.

“Ligji është pa analizë dhe do t’i ngarkojë përsëri kategori të caktuara, me ç’rast, në njërën anë, Qeveria pretendon që duhet t’i subvencionojë bujqit,
prodhimin vendor dhe, në anën tjetër, i ngarkon pikërisht këtë kategori”, tha anëtari i Komisionit për Buxhet, Ferat Shala.

Taksë do të paguajnë edhe pronarët të cilët nuk e punojnë tokën. Pagesa për këtë kategori, prej 0.15 deri në 1 për qind, do të vazhdojë të mbetet e njëjtë edhe me projektligjin e ri. /atvlive.tv

Çmimi i furnizimit nga importi për vaj ushqimor ka rënë në 1.05 euro për litër.

Rënie ka pësuar edhe gruri për 24 centë kilogrami.

Por qytetarët po vazhdojnë të paguajnë këto produkte me çmime më të larta.

Ekzekutivi po thotë se nuk kanë çfarë të bëjnë në këta aspekt pasi që Ligji që sipas tyre do ta rregullonte këtë çështje është dërguar nga opozita në Gjykatën Kushtetuese.

Megjithatë ekonomistët vlerësojnë se Ligji për vendosjen e çmimit tavan nuk përbën zgjidhje.

“Duhet të gjenden alternativa për monitorim se sa të tentohet me këto ligje siç është ky ligji tavan, është eksperiment I rrezikshëm duhet të shtohet inspektimi të tregut duhet të ketë kampanja vetëdijesuese, tha njohësi i çështjeve të ekonomisë, Safet Gërxhaliu”.

Madje sipas Gërxhaliut, duhet të ketë rritje të prodhimit vendor dhe rritje të eksportit.

“Në vitin 2022 kemi rekord ku kemi mbi 5 miliard import… duhet të kemi rritje të eksportit dhe prodhimit… por çmimi tavan nuk është garantues i uljeve të çmimit”, tha Gërxhaliu.

Ndërkohë Ministrja e Industrisë, Ndërmarrësisë dhe Tregtisë, Rozeta Hajdari ka thënë se ka rritje të eksportit për 22 për qind rritje krahasuar me vitin 2021.

“Bilanci tregtar fal rritjes së eksporteve, ne kemi pasur një bilanc tregtar 1 me 10, ndërsa tani duke iu falënderuar rritjes së prodhimit vendor, rritjes së eksportit kemi zvogëluar bilancin tregtar, dhe tani e kemi 1 me 6. Pra po eksportojmë 1 po marrim afër 6, dhe kjo është falë rritjes së kapacitetit të prodhimit vendor, por edhe zëvendësimit të produkteve të importit me prodhimin vendor”, tha ministrja e MINT, Rozeta Hajdari.

Ndërkaq sipas Agjencisë së statistikave Brenda kësaj jave, 5 kilogramë miell janë shitur rreth 3 euro e 43 centë. Çmimi mesatar për 30 copë vezë ishte nga 3 euro e 59 deri në 3 euro e 93 centë e vaji nga 1 euro e 80 centë deri në 1 euro e 85. /atvlive.tv

Në këtë hapësirë e larg familjeve, i kalojnë ditët rreth 1 mijë e 800 pacientë me probleme mendore.

Qendra e Shëndetit mendor, e vetmja në kryeqytet, përpos që ka pak metra katrorë dhe nuk i plotëson nevojat e pacientëve, ballafaqohet edhe me mungesë stafi.

“Hapësirat janë shumë të vogla për t’i mbuluar këta 1 mijë e 800 pacientë, për shkak se e kemi vetëm një dhomë për qëndrim ditor, nuk mjafton për të organizuar aktivitete të ndryshe, të cilat janë pjesë e rehabilitimit. P.sh. nuk kemi hapësira ku kishim mundur ta bëjmë një terapi të punës. Kemi mungesë edhe të infermierëve”, tha Sami Rexhepi, drejtor dhe neuropsikiatër në Qendrën e Shëndetit Mendor në Prishtinë.

Rexhepi shtoi se viteve të fundit është rritur numri i pacientëve, megjithatë, pavarësisht sfidave të gjitha shërbimet që pacientët i marrin janë pa pagesë.

“Është institucion publik, ne kemi edhe terapi edhe ato janë pa pagesë”, tha Rexhepi.

Qendra e shëndetit mendor është institucion rajonal, i cili përveç Prishtinës, përfshin edhe Podujevën, Obiliqin, Drenasin, Lipjanin e Fushë-Kosovën. /atvlive.tv

Që nga viti 2019, Forca e Sigurisë së Kosovës e ka në dispozicion Aeroportin e Gjakovës, derisa ndër vite i ka shkolluar edhe 3 pilotë.

Megjithatë, në aeroportin ushtarak i cili u funksionalizua muajin e kaluar e që poashtu, iu shtuan edhe disa hektarë tokë, ende nuk ka ateruar asnjë helikopter i ushtrisë së Kosovës.

“Aktualisht FSK nuk posedon helikopter. Por, FSK e ka në strukturë njësinë e helikopterëve, e cila në planin e zhvillimit afatgjatë, parashihet që të funksionalizohet”, thuhet në përgjigjen e MPB-së.

Pikërisht funksionalizimi i kësaj njësie, nga ekspertë të fushës po konsiderohet shumë i nevojshëm.

“Kjo njësi do t’i kontribuonte ministrisë së punëve të brendshme, FKS-së por edhe spitalit të QKUK-së. Pra mungesa po I atakon tre sektorë”, tha eksperti i sigurisë, Drizan Shala.

“Për fat të mirë FSK po punon në drejtim të themelimit të kësaj njësie. Kur dihet që kemi edhe oficerë të gatshëm, tha Avdni ISLAMI, Dr. i shkencave të sigurisë.

Por, çfarë helikopterë vlerësohet se i duhen Kosovës?

“FSK-së i duhen minimalisht tre helikopterë të karakterit transportues, dhe një tjetër që transporton 3 persona për raste”, tha Drizan Shala.

Aeroporti që gjendet rreth 5 kilometra në veri të qytetit të Gjakovës, ka një sistem të vetëm piste me një rrugë paralele për taksim, të gjatë 1.799 metra dhe 30 metra e gjerë. /atvlive.tv

KQZ-ja zëvendëson komisionerët e partisë së Jabllanoviqit të tërhequr nga gara
Komisioni Qendror i Zgjedhjeve ka marrë vendim për të zëvendësuar komisionerët e nominuar nga partia politike, Partia Kosovskih Srba (PDK), të cilët kanë njoftuar këtë institucion se nuk do të dalin në ditën e zgjedhjeve në vendvotime.

Njoftimi i tyre ka ardhur pas tërheqjes së kreut të kësaj partie, Aleksandër Jabllanoviq nga kandidimi i tij për kryetar të komunës së Leposaviqit.

Zëvendësimi i tyre do të bëhet me staf lokal nga administrata e Agjencionit për Regjistrim Civil.