Kandidati i PDK-së për Zubin Potokun, Izmir Zeqiri, ka thënë se ka fituar në zgjedhjet e jashtëzakonshme në komunat veriore të vendit.
Ai, në një konferencë për media, i ka falënderuar të gjithë qytetarët për mbështetjen e dhënë.
“Fitorja ime do të jetë fitore e të gjithë qytetarëve. Unë do të jem kryetar i të gjithë qytetarëve, do të jem i hapur për të gjithë qytetarët”, ka thënë Zeqiri.
Policia e Kosovës, ka vlerësuar si të qeta dhe pa asnjë incident, zgjedhjet e mbajtura sot në katër komunat veriore.
Kështu është deklaruar nga PK’ja përmes një komunikate për media, ku është shtuar edhe se, PK’ja ka realizuar me sukses planin e saj operativ për mbarëvajtjen e zgjedhjeve në këto komuna.
Po ashtu, në komunikatë shtohet se, plani operativ ka paraparë edhe inicimin e çdo vepre penale kundër të drejtës së votimit dhe ndërmarrjen e të gjitha masave procedurale dhe penale ndaj çdokujt që bie ndesh me ligjet e vendit, në bashkëpunim dhe koordinim me KQZ-në dhe Prokurorinë e Shtetit.
Megjithatë, siç njofton PK’ja, deri më tani nuk ka pasur ndonjë rast të raportuar.
Komunikata e plotë:
Zgjedhjet e mbajtura sot në katër komunat veriore, në aspektin e sigurisë vlerësohen të qeta dhe pa asnjë incident
Prishtinë, 23 prill 2021
Policia e Kosovës (PK), deri në këtë fazë realizoi me sukses planin operativ për mbarëvajtjen e zgjedhjeve në katër komunat veriore të Kosovës, proces ky i cili në aspektin e sigurisë vlerësohet se ka kaluar i qetë dhe pa asnjë incident
Përveç ofrimit të sigurisë gjatë procesit zgjedhor, plani operativ ka paraparë inicimin dhe procedimin e çdo vepre penale kundër të drejtës së votimit dhe ndërmarrjen e të gjitha masave procedurale/penale ndaj çdokujt që bie ndesh me ligjet e vendit, në bashkëpunim dhe koordinim me KQZ-në dhe Prokurorinë e Shtetit, por që deri më tani nuk ka pasur ndonjë rast të raportuar.
Policia e Kosovës mbetet e përkushtuar në garantimin e rendit kushtetues, krijimin e një ambienti të qetë dhe të sigurt për të gjithë qytetarët, përcjelljen e materialit sensitiv e deri në përfundim të gjithë procesit zgjedhor.
Prokuroria e Shtetit tha se gjatë votimeve për zgjedhjet lokale në veri të Kosovës nuk është evidentuar ndonjë rast për vepra penale kundër të drejtave të votimit.
“Prokurori i Shtetit do të vazhdojë të mbikëqyrë procesin e numërimit të votave deri në përfundimin e këtij procesi”, u tha në njoftim.
Edhe Komisioni Qendror i Zgjedhjeve tha se procesi zgjedhor është zhvilluar pa asnjë problem.
Mbi 1.500 qytetarë votuan për zgjedhjet e jashtëzakonshme lokale për zgjedhjen e kryetarëve të rinj në Mitrovicë të Veriut, Leposaviq, Zubin Potok dhe Zveçan.
Po ashtu u votua edhe për përbërjet e reja të asambleve komunale në Leposaviq dhe Zveçan.
Lista Serbe – partia kryesore e serbëve në Kosovë – nuk garoi në zgjedhje dhe bëri thirrje për bojkotim të tyre.
Kandidati i Lëvizjes Vetëvendosje për kryetar të Mitrovicës së Veriut, Erden Atiq, ka thënë se ai ka fituar zgjedhjet në këtë komunë.
Zgjedhjet e sotme janë karakterizuar me pjesëmarrje të ulët të qytetarëve.
Por Atiq thotë se ai do të jetë kryetar i të gjithëve, pa dallim.
”Kemi dalë si votues i këtyre zgjedhjeve. Faleminderit të gjithë qytetarët. Do të jem kryetar i të gjithë qytetarëve pa dallim”, ka thënë ai.
I pyetur për sfidat që do të përballen me Listën Serbe pasi këta të fundit bojkotuan zgjedhjet, Atiq tha se ”për të gjitha sfidat jemi të vetëdijshëm dhe të përgatitur”.
Sipas rezultateve preliminare në komunën e Zubin Potokut, Partia Demokratike e Kosovës raportohet t’i prijë garës.
Izmir Zeqir, kandidati i PDK-së për të parin e kësaj komune raportohet të ketë mbledhur gjithsej 196 vota duke lënë pas kandidatin nga LVV-ja Flatron Hasanin me 180 vota.
Ndryshe, Komisioni Qendror i Zgjedhjeve bëri të ditur se është përmbyllur procesi zgjedhor në katër komunat në veri të Kosovës.
Në këto zgjedhje votuan 1.567 qytetarë apo 3.47 për qind e trupit votues.
Drejtori i të ashtuquajturës Zyre për Kosovë në Qeverinë e Serbisë, Petar Petkoviq, ka thënë se në zgjedhjet për katër komunat në veri të Kosovës të dielën kanë votuar vetëm 13 qytetarë të nacionalitetit serb.
Sipas Petkoviqit, dy kanë votuar në Mitrovicë të Veriut, shtatë në Leposaviq, katër në Zveçan. Nuk ka pasur asnjë votues serb në Zubin-Potok. Petkoviq tha se votuan 1566 shqiptarë në total, duke shtuar se kishte 499 shqiptarë më pak se zgjedhjet e kaluara.
“Ishin 499 shqiptarë më pak krahasuar me zgjedhjet e kaluara. Është e qartë se edhe shqiptarët bojkotuan këto zgjedhje”, tha Petkoviq në konferencë për media, transmeton “RTS”. “Fituesit e vërtetë janë serbët, që totalisht bojkotuan zgjedhjet, pasi nuk duan okupimin e veriut. Kjo është humbje për komunitetin ndërkombëtar, që përkrahu Kurtin. Tash dua të shohë përfaqësuesit e komunitetit ndërkombëtar që urojnë ata që votuan në kontejnerë”.
Petkoviq ka shtuar se “pa formimin e Asociacionit nuk ecet tutje”.
Deputeti i LVV-së Armend Muja ka shpallur fitoren e LVV-së në dy komuna të veriut të Kosovës.
“Lëvizja Vetëvendosje, kandidati Lulzim Hetemi fiton mbi 70% të votave në Komunen e Leposaviqit”.
“Lëvizja Vetëvendosje, kandidati Erden Atiq fiton mbi 65% të votave në Komunen Veriore të Mitrovices!”.
Ndryshe, në zgjedhjet e sotme në katër komunat veriore kanë votuar 1557 qytetarë nga gjithsej 45 mijë qytetarë me të drejtë vote.
Kjo u bë e ditur në konferencën e Komisionit Qendror Zgjedhor.
Komisioni Qendror i Zgjedhjeve bëri të ditur se është përmbyllur procesi zgjedhor në katër komunat në veri të Kosovës.
Në këto zgjedhje votuan 1.567 qytetarë apo 3.47 për qind e trupit votues.
Ata votuan për të zgjedhur katër kryetarë të rinj në Mitrovicë të Veriut, Zveçan, Leposaviq dhe Zubin Potok dhe dy përbërje të reja të asambleve komunale në Leposaviq dhe Zveçan.
Kreu i KQZ-së, Kreshnik Radoniqi, tha se procesi është zhvilluar pa asnjë problem dhe se rezultatet e para preliminare pritet të publikohen në ueb-faqen e saj pas orës 20:00.
Kjo është dalja në zgjedhje, sipas komunave:
Leposaviq: 141 votues apo 1.06 për qind
Zubin Potok: 385 votues apo 5.78 për qind
Zveçan: 204 votues apo 2.92 për qind
Mitrovicë e Veriut: 837 votues apo 4.62 për qind
Në përcjelljen e Policisë, kandidatja e vetme për kryetare të Zveçanit nga komuniteti serb, Sladjana Pantovic, u paraqit në vendvotim.
Pasi hodhi votën e saj, Pantovic tha se shpreson në më shumë siguri për qytetarët e katër komunave në veri.
“Pres për qytetarët e Zveçanit se do të jetë më mirë se sa që ka qenë deri më tani, që zgjedhjet do të mbahen të qeta, në mënyrë të qetë dhe pa incidente, sepse mendoj se zgjedhjet po mbahen dhe duhet të mbahen në paqe, në dashuri dhe respekt për popullin dhe jo me urrejtje, kërcënime dhe shantazhe”, tha Pantovic.
Ndërhyrja e Policisë nuk ishte e nevojshme në asnjë moment – pasi procesi i jashtëzakonshëm zgjedhor në Mitrovicë e Veriut, Zveçan, Leposaviq e Zubin Potok vijoi pa incidente.
Megjithatë, për të siguruar mbarëvajtjen e procesit që u parapri me djegie veturash, Policia shtoi prezencën në afërsi të qendrave të votimit me njësitë e zakonshme patrulluese dhe të trafikut – pa angazhimin e specialëve.
“Synimi i PK-së si çdo herë mbetet, që përmes realizimit të detyrave në mënyrë profesionale të garantojë ushtrimin e lirë të së drejtës së votës, të ndërmarrë veprime parandaluese ndaj dukurive negative dhe aktiviteteve kriminale që në çfarëdo mase do të rrezikonin sigurinë, qetësinë dhe stabilitetin në vend”, thotë Policia.
Pos qendrave të votimit, njësi statike e patrulluese u panë edhe rrugëve përgjatë kryesore.
Në gjendje gatishmërie ishte edhe Prokuroria.
“Që nga ora shtatë e mëngjesit të ditës së sotme, prokurorët së bashku me Policinë e Kosovës janë të angazhuar, në stacione policore të katër komunave gjegjëse, për të mbikëqyr për së afërmi mbarëvajtjen e procesit zgjedhor, të cilët janë në gjendje gatishmërie që të reagojnë në çdo rast ku ka pengim të procesit të votimit. Gjithashtu, në këtë proces zgjedhor janë të angazhuar edhe gjyqtarët kujdestarë të cilët janë në gatishmëri për çdo eventualitet”, thuhet në përgjigjen e Prokurorisë.
Në afërsi të vendvotimeve u panë edhe ekipe të KFOR-it dhe EULEX-it. /atvlive.tv
Kryetari i Komisionit Qendror Zgjedhor, Kreshnik Radoniqi, ka treguar në një konferencë për media pas përfundimit të procesit zgjedhor në katër komunat në veri ka kalaur pa incidente dhe se dalja ka qenë e ulët.
Ai ka treguar numrin e votuesve dhe ka treguar kur përafërsisht mund të priten rezultatet preliminare.
“Procesi zgjedhor është zhvilluar pa problem. Komisionerët janë duke bërë numërimin e fletëvotimeve”
“Dua të ju njuftoj se pas numërimit në katër komuna rezutlatet preliminare do të publikohen në faqen zyrtare të KQZ-së përfaërsisht diku rreth orës 20:00”, ka thënë ai.
Siç ka njoftuar KQZ deri në ora 19:00 në Mitrovicën e Veriut ka pasur 837 vota, në Leposaviq 141 votues, në Zubin Potok 385, ndërkaq në Zveçan gjithsej 204 votues.