Blog

Analistët në Beograd e vlerësojnë të rëndësishëm takimin e 2 majit mes kryeministrit të Kosovës, Albin Kurti dhe presidentit të Serbisë, Aleksandar Vuçiq në Bruksel. Derisa thonë se temë diskutimi do të jetë Asociacioni, analistët serbë vlerësojnë se Serbia ka qasje zhgënjyese ndaj Kosovës, duke përmendur edhe shkeljen e marrëveshjes së Ohrit.

Takimi në nivelin më të lartë politik Kosovë-Serbi mund të jetë një pikë boshte, pas një periudhe tensionesh. Kështu vlerësojnë njohësit e zhvillimeve në Beograd.

“Pas të gjitha këtyre ngjarje të javëve të fundit, do të ishte mirë që ai takim të përdorej për qetësimin e situatës, dhe mendoj se një gjë të tillë do ta bëjnë ndërmjetësuesit”, thotë diplomati Sreqko Gjukiq.

“Tema është formimi i Asociacionin, qoftë me atë emër apo me një emër tjetër, por tema është shumë e rëndësishme, dhe mund të jetë një pikë me rëndësi të veçantë për rrjedhën e ardhshme të realizimit të marrëveshjes së Ohrit”.

Në prag të takimit të presidentit Vuçiq dhe kryeministrit Kurti më 2 maj në Bruksel, Beogradi zyrtar pret marrëveshje konkrete për Asociacionin. Mirëpo, një pjesë e opinionit mendon se marrëveshja e Ohrit po përjeton momentet kritike, dhe përgjegjësia e veçantë i takon Beogradit.

“Qëndrimi i Serbisë ndaj Kosovës është zhgënjyes. Kemi një situatë ku Serbia e ka shkelur marrëveshjen në pikën 4 me votën kundër Kosovës në Këshillin e Evropës”, thotë Zlatoje Martinov, publicist dhe gazetar. “Prandaj, për këtë unë jam skeptik dhe besoj se Serbia me Vuçiqin nuk është e gatshme ta zbatojë Marrëveshjen e Ohrit. Mbetet të shihet se çfarë do të ndodhë më 2 maj në Bruksel”.

Ndërsa ka shumë të panjohura lidhur me Asociacionin, ka pritje që të ketë progres dhe hapa konkretë në lidhje me çështjen e personave të zhdukur, pasi teksti i deklaratës për personat e zhdukur është dakorduar më parë, dhe pritet të miratohet në nivelin politik.

Shef i kabinetit të presidentes së Kosovës, Vjosa Osmani, Blerim Vela, ka reaguar ndaj shtetit serb pas ndaljes dhe intervistimit të dy policëve kosovarë, të cilët po kalonin transit nëpër Serbi.

Me anë të një postimi në Twitter, Vela këtë veprim e ka konsideruar dëshmi të veprimeve ilegale të Serbisë për ta penguar lirinë e lëvizjes.

“Në javën e kaluar, Policia e Serbia dhe BIA, ndaluan dhe intervistuan 2 policë të Kosovës në kufi, të cilët po kalonin transit. Kjo është dëshmi e veprimeve ilegale të Serbisë për ta penguar lirinë e lëvizjes. Në vend që të bashkojë forcat me Kosovën për të luftuar krimin ndër-kufitar, Serbia bën të kundërtën”, ka shkruar Vela.

Last week, Serbia’s police & BIA stopped/interviewed 2 Kosovo
Police officers at the border as they were transiting.

This is evidence of SRB’s illegal actions that hinders freedom of movement.

Instead of joining forces with 🇽🇰 to fight cross-border crime, SRB does the opposite!

— Blerim Vela (@Blerim_Vela) May 1, 2023

Këshilltari i Lartë në Departamentin Amerikan të Shtetit, Derek Chollet, ka njoftuar në Twitter se ka biseduar me kryeministrin e Kosovës, Albin Kurti, lidhur me takimin 2 majit në Bruksel.

Chollet tha se temë diskutimi me kreun e ekzekutivit kosovar ishte ndër të tjera edhe themelimi i Asociacionit të Komunave me shumicë serbe dhe partneriteti i fortë mes SHBA-së dhe Kosovës.

“Bisedë shumë e mirë me kryeministrin Albin Kurtin për takimin e liderëve të 2 majit për normalizimin e marrëdhënieve me Serbinë përmes Dialogut të Lehtësuar nga BE-ja, rëndësinë e zbatimit të menjëhershëm të Asociacionit për Komunat me shumicë Serbe dhe partneritetin e fortë SHBA-Kosovë”. – tha ai.

Very good conversation with PM @albinkurti about the May 2 leaders’ meeting on normalizing relations w/ Serbia through the EU-Facilitated Dialogue, the importance of implementing the Association for Serb-majority Municipalities immediately, and strong U.S.-Kosovo partnership.

— Derek Chollet (@CounselorDOS) May 1, 2023

Për bisdën telefonike me këshilltarin e lartë të Departamentit amerikan të Shtetit, ka njoftuar edhe kryeministri Kurti i cili e cilësoi një bisedë të mirë.

Më tej Kurti shtoi të ketë theksuar rëndësinë e zbatimit “në tërësi dhe në mirëbesim” të Marrëveshjës Themelore dhe Aneksit të saj.

“Patëm një telefonatë të mirë me Chollet, ku diskutuam axhendën e takimit të nesërm. Theksova rëndësinë që Marrëveshja Themelore dhe Aneksi i saj duhet të zbatohen në tërësi dhe në mirëbesim. E falënderova gjithashtu për mbështetjen e SHBA-së.” – shkroi Kurti.

Had a good phone call with @CounselorDOS Derek Chollet today, where we discussed the agenda for tomorrow's meeting. I emphasized the importance that the Basic Agreement & its Annex must be implemented in its entirety and in good faith. I also thanked him for the U.S. support.

— Albin Kurti (@albinkurti) May 1, 2023

Kryeministri i Kosovës, Albin Kurti, ka thënë se tërë ditën e ka shpenzuar duke u përgatitur për takimin e 2 majit me presidentin e Serbisë, Aleksandar Vuçiqin në Bruksel.

Kurti thotë se përgatitja për negociata është komplekse dhe e thjeshtë, por që sipas tij, dëshirat e Kosovës janë të qarta, të ndershme dhe fisnike.

“Mbërrita në Bruksel dhe kalova ditën duke u përgatitur për takimin. Përgatitja për negociata është komplekse dhe e thjeshtë: komplekse sepse ka shumë informacione dhe detaje të përfshira, ndër të tjera, por e thjeshtë sepse dëshirat e Kosovës janë të qarta, të ndershme dhe fisnike”, ka shkruar Kurti.

Kurti dje tregoi se ka biseduar me këshilltarin e lartë amerikan Derek Chollet në lidhje me këtë takim dhe se i ka treguar se marrëveshja bazë dhe aneksi i saj duhet të zbatohet tërësisht.

Ndërsa Chollet tha se pikë e bisedës me kryeministrin kosovar ishte themelimi i menjëhershëm i Asociacionit të komunave me shumicë serbe.