Në emisionin CONTEXT në ATV, sonte u diskutua për takimin e djeshëm në Bruksel si dhe draft-statutin për themelimin e Asociacionit, u zhvillua një debat i ashpër mes analistit Artan Behrami dhe deputetit të LV-së, Visar Korenica.
Behrami akuzoi Qeverinë se përkundër që qeverisë me 51 për qind të votave, nuk po bën hapa për të ndaluar Asociacionin.
“I ka 51 për qind dhe qeverisë si minoritet. Një fuqi e madhe është duke na pengu neve”, tha Behrami.
Ndaj kësaj deklarata reagoi deputeti i LV-së, Visar Korenica, ku ky i fundit e pyeti analistin Behrami se për cilën fuqi e ka fjalën.
“As një fuqi nuk ju pengon. Është veç një fuqi që ju pengon, paranojat e liderit të juaj”, ia ktheu Behrami. /atvlive.tv
Emisionin e plotë CONTEXT në ATV e gjeni në videon më poshtë:
Shkelja e të drejtave të gazetarëve, si dhe shtimi i rasteve të sulmeve ndaj tyre janë dy prej shqetësimeve kryesore të gazetarëve.
Me rastin e shënimit të 3 majit, Ditës Ndërkombëtare të Lirisë së Shtypit, Kryetari i AGK-së, Xhemajl Rexha, tha se rritja e sulmeve ndaj gazetarëve kërkon reagim urgjent nga institucionet.
“Në vitin 2022, në data-bazën e AGK-së janë regjistruar 33 raste të sulmeve të ndryshme ndaj gazetarëve dhe deri në momentin që po flasim, 11 të tilla në vitin 2023. Në fund të vitit të kaluar, mediet në gjuhën shqipe kanë hasur në vështirësi në raportimet e tyre nga veriu i Kosovës, në kohën e vendosjes së barrikadave. Së paku 6 sulme serioze kanë ndodhur ndaj ekipeve të televizioneve nga Prishtina, dhe të tjera pengesa në performimin e punës së tyre kanë ndodhur”, tha kryetari i AGK-së, Xhemajl Rexha.
Në mesin e gazetarëve të ekspozuar, në situata ku punonjësve të mediave iu cenohej siguria, është edhe Qëndresa Bellagoshi.
“Grupi i sulmuesve ishte në pritje tonën dhe ne po i shihnim ata të bëheshin gati për të na gjuajtur me gurë”, tha Qëndresa Bellagoshi, gazetare.
Përfaqësuese të institucioneve të drejtësisë pohuan të jenë të vetëdijshëm për sfidat e gazetarëve teksa ushtrojnë detyrën e tyre.
“Ne jemi të vendosur për t’i ushtruar mjetet juridike në bazë të legjislacionit që e kemi në dispozicion dhe konsideroj që politika ndëshkimore duhet të jetë më e ashpër”, tha Jehona Grantolli, prokurore.
Një diskutim me panelistë gazetarë iu dedikua edhe pozicionit të gazetarëve brenda redaksive.
“Mendoj që për këto vite sa jam në gazetari, nuk është se ka pasur shumë ndryshime, vazhdojmë të përballemi me sfida të njëjta, me kushte të njëjta të punës”, tha Teuta Arifaj, redaktore në ATV.
“Pozicioni i gazetarit në redaksi varet i gjithi nga mediumi në të cilin punon dhe profesionistët me të cilët punon. Ka vështirësi nëpër mediume”, tha Valbona Bytyqi, gazetare.
“Ka gjetje që tregojnë për diskriminim gjinor në redaksi dhe ngacmime seksuale”, tha Dafina Halili, gazetare.
Me rastin e ditës së Lirisë së Shtypit, duke iu referuar statistikave të organizatës “Reporterët pa Kufij”, kryeministri Kurti përmendi se Kosova është përmirësuar për 22 vende, për dy vite në këtë drejtim.
Organizata Gazetarët Pa Kufij publikoi të mërkurën Indeksin Botëror të Lirisë së Shtypit, ku Kosovën e radhiti në mesin e “vendeve problematike”, përkundër që vendi shënoi përmirësim në pozitë në krahasim me vitin e kaluar. /atvlive.tv
Banorët e fshatit Stankaj të Komunës së Pejës, qysh në orët e hershme erdhën t’i ankohen ministrit të Mjedisit, Planifikimit Hapësinor dhe infrastrukturës, Liburn Aliu, për një problem që kanë me ujin e pijshëm.
Ata janë kundër nismës së Komunës që t’ua marrë burimin e ujit nga i cili furnizohen rreth 200 shtëpi të fshatit të tyre, për t’i furnizuar fshatrat e tjera.
“Burimin e vetëm që e kemi në fshat, kryetari i Komunës me do bashkëpunëtorë të vet për interesa të ngushta të vetat, gjysma e fshatit nuk ka furnizim prej atij burimi. Jemi pa ujë. Ai do me e çua për biznese të vetat”, tha Isuf Lulaj, përfaqësues i fshatit.
Banoret thonë se do të pajtoheshin me vendimin e Komunës nëse fillimisht zgjidhet problemi i ujit të pijshëm për fshatin Stankaj.
“Këta janë ka dojnë me na marrë ne e me na lonë. Na jemi katund bukur i madh e le t’na furnizon neve, nuk jemi kundra, tepricën ta çojnë kah të dojë, nuk jemi kundër kurkujt mos me ia dhanë ujin”, tha Bal Hysnikaj, banor.
“Nuk jemi kundër me u dhanë ujin, por nuk kemi për vete na. Qata ujë me u furnizua, jemi shumë shtëpi, na nuk jemi kundër, ata po mendojnë me e ndalë ujin e me ua dhanë tri katundeve. Le t’na jep ujë neve sa na duhet neve, nuk jemi kundra”, tha Musë Lulaj, banor.
Kërkesa për një takim me ministrin Liburn Aliu, kishin bërë edhe më herët. Por, nuk ishin pranuar para kësaj proteste.
Megjithatë, as sot ministri nuk ishte në zyrë.
“Tash ishim në një takim, po u dashke dhe u bindëm që po u dashka me e bon një protestë për me u taku me pushtetarët. Edhe pse i kemi dy kërkesa që i kemi bo dhe nuk na kanë kthye përgjigje, sot na pranun, ky Zogiani. Na premtuan që kanë me u marrë me këtë problem, na i morën edhe numrat e telefonit dhe ata morën përsipër gjithçka, për mos me na lanë me shkua te një e keqe. Tash po e shohim se çka po bojnë. Këta na premtuan që kanë me bo çmos mos me na lanë me shkua te ndonjë ngatërresë”, tha Isuf Lulaj.
Gjatë ditës, ATV-ja ka provuar të marrë përgjigje nga Komuna e Pejës, lidhur me kërkesat e banorëve të fshatit Stankaj dhe për projektin e komunës, por askush nga ky institucion nuk është përgjigjur. /atvlive.tv
Edicionin Qendror të lajmeve në ATV e gjeni në videon më poshtë:
Në vend të draft-statutit të Asociacionit të komunave me shumicë serbe, kryeministri Albin Kurti në Bruksel prezantoi një dokument dhjetëpikësh për zbatimin e nenit 7 të marrëveshjes bazë Kosovë-Serbi, për vetëmenaxhimin.
Përfaqësuesi i Lartë i Bashkimit Evropian, Josep Borrell, konfirmoi se pas prezantimit të draftit fillestar nga Ekipi Menaxhues, kryeministri kosovar tregoi vizionin e tij në raport me këtë nen.
“Kryeministri ndau pikëpamjet e tij për mbrojtjen e të drejtave të komunitetit serb në Kosovë. Dhe siç prisnim, pikëpamjet e palëve, për natyrën e këtij Asociacioni apo Bashkësie, janë shumë larg”, tha Borrell.
Drafti i prezantuar nga kryeministri Kurti ka në preambulë tri kushtet e shpalosura paraprakisht dhe flet për një kornizë vetëmenaxhimi të komunitetit serb si një projekt joterritorial, në kuadër të ligjeve dhe Kushtetutës së Kosovës.
Drafti saktëson Këshillin Konsultativ për Komunitete si kanal zyrtar komunikimi, e po ashtu parasheh mundësinë e financimit nga Qeveria e Kosovës, por edhe ajo e Serbisë, sipas rregullave dhe procedurave të Ministrisë së Financave të Kosovës.
Drafti përmend lirinë e asocimit dhe bashkëpunimin institucional, përfshirë komunat, por jo emërtimin Asociacion i komunave.
Për këtë draft-vizion, kryeministri Albin Kurti tha se është inspiruar nga modeli kroat i adresimit të të drejtave të komunitetit serb.
Në Kroaci ka një Këshill Koordinues Kombëtar të Serbëve që ka për qëllim realizimin dhe mbrojtjen e të drejtave të pjesëtarëve të pakicës serbe, sipas ligjeve dhe kushtetutës kroate – që vepron si formë e vetëqeverisjes dhe institucion autonom kulturor.
Ky Këshill me karakter afirmues, bashkëpunues dhe organizativ në disa fusha dhe me seli në Zagreb, ka Asamblenë, Presidencën dhe Bordin Mbikëqyrës.
Megjithatë, Kroacia ka një organizim tjetër me më shumë nivele pushtetesh: atë qendror – Qeverinë; nivelin regjional me 21 qarqe; atë të ndërmjetëm me 128 qytete; dhe nivelin lokal me 428 komuna. /atvlive.tv
Edicionin Qendror të lajmeve në ATV e gjeni në videon më poshtë:
Ekipi Menaxhues, i thirrur për hartimin e draft-statutit të Asociacionit të komunave me shumicë serbe, i përbërë nga katër pjesëtarë të komunitetit serb është liruar nga detyra.
Vendimi për lirimin nga detyra u mor nga Ministri i Administrimit të Pushtetit Lokal, Elbert Krasniqi, pasi, sipas tij, ky ekip mbeti pa status.
“Pas prezantimit të djeshëm në Bruksel të draft-statutit të Asociacionit të Komunave me Shumicë Serbe, sipas përgjegjësive që i ishin dhënë Ekipit Menaxhues në marrëveshjet e Brukselit të vitit 2013 dhe 2015, ky ekip tash edhe vetë është pa status. Andaj, sot me datë 03 maj 2023, kam marrë vendim për lirimin nga detyra të anëtarëve të këtij ekipi menaxhues”, tha Krasniqi.
Për kryeparlamentarin, Glauk Konjufca, ajo çka prezantoi ekipi menaxhues ishte tronditëse për Kosovën. Ai akuzoi qeveritë e mëparshme se emëruan njerëz që nuk i përfaqësojnë interesat e Kosovës
“Meqenëse atje i prezantojnë interesat e Republikës së Serbisë, jo interesat e Republikës së Kosovës. Pra po e shihni edhe vetë se çfarë ekip menaxhues edhe çfarë institucione kanë vendosur qeveritë e mëparshme. Kanë vendosur zyrtarë të cilët absolutisht nuk kanë lidhje me interesat e Kosovës, bile-bile njëra prej tyre, me sa dëgjova, ishte bërë deputete në Parlament të Serbisë dhe ishte deputete e partisë së Aleksandar Vuçiqit”, tha Konjufca.
I menjëhershëm ishte reagimi në Beograd.
“Mandati i Ekipit Menaxhues nuk përfundon me prezantimin e draft-statutit të Asociacionit. Ekipi Menaxhues ka një rol të rëndësishëm në vetë procesin e formimit të Asociacionit, deri në krijimin e tij”, tha Petar Petkoviç.
Pasi refuzoi draft-statutin, kryeministri Albin Kurti nga Brukseli tha se ekipi menaxhues u dekomisionua.
Ndërkohë në Planin e Zbatimit të marrëveshjes së 2013-s, theksohet se Grupi Menaxhues do ta ketë për detyrë të merret me të gjitha çështjet relevante për themelimin e Asociacionit dhe për një periudhë të përkohshme do të ushtrojë kompetencat e parapara me Nenin 4 dhe 6 të marrëveshjes së parë. /atvlive.tv
Edicionin Qendror të lajmeve në ATV e gjeni në videon më poshtë:
I dërguari i posaçëm SHBA-së për Ballkanin Perëndimor, Gabriel Escobar në një takim virtual me gazetarë të Ballkanit, tha se nuk ka presione për njërën palë që në mënyrë të njëanshme ta pranojë propozimin e palës tjetër për statutin e marrëveshjes për normalizim të marrëdhënieve Kosovë-Serbi, transmeton atvlive.tv.
“Nuk ka presion në njërën palë që në mënyrë të njëanshme ta pranojë tjetrën. Ky duhet të jetë një statut i negociuar, duhet të jetë një që mbron të drejtat e minoriteteve, veçanërisht të pakicës serbe në Kosovë, ky është synimi ynë. Objektivi ynë është që ta përdorim asociacionin si platformë për serbët etnikë që të kenë jetë qytetare dhe demokratike në Kosovë dhe që të adresojmë disa prej shqetësimeve, dhe mendoj se disa prej tyre janë mjaft të justifikuara, sa i përket marrëdhënies së tyre me qeverinë qendrore në Kosovë. Andaj, pritjet tona janë shumë të qarta, aspiratat tona janë shumë të larta, dhe mbështetja ynë për të dyja palët që të arrijnë deri te një pozicion reciprokisht i favorshëm, është gjithashtu e qartë”, tha Escobar. /atvlive.tv
Arta Hoxha është zgjedhur anëtare joekzekutive e Bordit të Bankës Qendrore të Kosovës nga deputetët e Kuvendit të Kosovës.
Hoxha për këtë pozitë mori 47 vota, ndërsa u zgjodh në rundin e dytë të votimit nga deputetët e Kuvendit, teksa ishte në garë me Valdrin Kasumaj, i cili në rundin e parë kishte 46 vota.
Përveç kësaj, në seancë u diskutua edhe për raportin hetimor për krizën energjetike, parqet industriale, e investimet e qëndrueshme.
Pasi sqaroi rëndësinë e këtyre projektligjeve, ministrja e Industrisë e Ndërmarrësisë, Rozeta Hajdari, mori kritika nga opozita për mostransparencë, madje u kërkua edhe shkarkimi i saj.
As kjo seancë nuk kaloi pa përplasje.
Si jo rrallë deputetët u kthyen nga pauza me vonesë, teksa më pas vazhduan diskutimin për ndërmarrjet publike ku ministrja Artane Rizvanolli tha se ato në vitin 2021 kanë operuar me fitim. /atvlive.tv
Edicionin Qendror të lajmeve në ATV e gjeni në videon më poshtë:
Shtesat e premtuara nga Qeveria, punëtorët e sektorit publik nuk i morën as me pagat e muajit prill.
Por, Sindikata e Shërbyesve Civilë thotë se shtesat të cilat nuk i morën tash e tre muaj, nuk presin të ekzekutohen deri në muajin shtator, për disa arsye.
Të revoltuar për mosekzekutim të shtesave janë punonjësit shëndetësorë, të cilët pas protestës që organizuan muajin e kaluar, paralajmërojnë edhe grevë.
Pas miratimi të ligjit, pagat e muajit shkurt u ekzekutuan pa shtesa, derisa nga Ministria e Punëve të Brendshme deklaruan se punonjësit do të paguhen në mënyrë retroaktive në pagën e muajit mars.
As kësaj radhe, Ministria e Punëve të Brendshme nuk ka kthyer përgjigje në pyetjet e ATV-së e as nuk ka sqaruar se pse shtesat nuk u ekzekutuan as këtë muaj. /atvlive.tv
Edicionin Qendror të lajmeve në ATV e gjeni në videon më poshtë:
I dërguari i posaçëm SHBA-së për Ballkanin Perëndimor, Gabriel Escobar në një takim virtual me gazetarë të Ballkanit, tha se në takimin e djeshëm mes Kosovës dhe Serbisë të ndërmjetësuar nga BE-ja, elementet e rëndësishme u diskutuan dhe tani i përket kryenegociatorëve që të lëvizin para dhe të fillojnë të krijojnë një statut të zbatueshëm, transmeton atvlive.tv.
“Pritjet tona janë që brenda dy javëve të ardhshme, kryenegociatorët do të takohen për të diskutuar përsëri këtë proces. Ky proces është shumë i rëndësishëm, është shumë e rëndësishme që të dyja palët, posaçërisht Kosova, ta trajtojë këtë proces seriozisht dhe që në mënyrë të përshpejtuar ta kryejë këtë proces, që të ketë pajtim ndërmjet dy palëve, që ta dërgojë për shqyrtim në parlament dhe për shqyrtim ligjor në mënyrë që të sigurohet që të jetë i pakthyeshëm dhe pjesë qendrore e normalizimit”, tha Escobar.
Ai e ri përsëriti se marrëveshja e arritur për normalizim ndërmjet Kosovës dhe Serbisë është ligjërisht e obligueshme për të dyja vendet, ndërsa zbatimi i saj fillon me asociacionin.
“E përsërisim se kemi një marrëveshje ligjërisht të obligueshme ndërmjet Serbisë dhe Kosovës për normalizimin, dhe diskutimi dje ishte për zbatimin e kësaj marrëveshjeje. Zbatimi fillon me formimin e asociacionit të komunave me shumicë serbe”, tha Escobar.
Ai tha se është i lumtur që palët janë pajtuar për marrëveshjen lidhur me personat e zhdukur nga një pikëpamje humanitare, dhe se në vazhdim pret progres edhe në sfera të tjera. /atvlive.tv
I dërguari i posaçëm SHBA-së për Ballkanin Perëndimor, Gabriel Escobar në një takim virtual me gazetarë të Ballkanit, tha se një muaj pas marrëveshjes për normalizim të marrëdhënieve Kosovë-Serbi, ka pasur një nivel të vogël të progresit në prezentimin e propozimeve të shkruara të të dyja palëve, lidhur me atë se si duhet të duket asociacioni, transmeton atvlive.tv.
“Fillimisht, të dy qeveritë e pranuan [marrëveshjen], ishte dhe është, ashtu siç tha z. Borrell, ligjërisht e obligueshme për të gjitha palët. Ka kaluar vetëm një muaj, dhe tani po e diskutojmë zbatimin. Do të thosha se kemi pasur nivel të vogël të progresit në prezantimin e propozimeve të shkruara të të dyja palëve, lidhur me atë se si duhet të duket asociacioni”, tha Escobar.
Duke folur për takimin e mbrëmshëm në Bruksel, Escobar tha se është një prej herëve të para që kanë dëgjuar drejtpërdrejt nga Qeveria e Kosovës se cili është versioni i tyre për Asociacionin.
“Kjo është një prej herëve të para që kemi dëgjuar drejtpërdrejt nga qeveria e Kosovës se çfarë është version i tyre për asociacionin, dhe ata e kanë një. Serbia natyrisht se e ka versionin e saj, dhe përgjigja tani është që të dyja palët të takohen në dy javët e ardhshme, për të prezantuar përsosje të mëtejshme të pozicioneve të tyre dhe që Bashkimi Evropian të vazhdojë të ndikimin dhe kapacitetet mbresëlënëse të saj për t’i bërë bashkë dy palët që të fillojë të shikojë për zgjidhje kompromisi”, tha Escobar.
Ai tha se propozimi i mbrëmshëm i Kurtit është serioz, por edhe ai i ekipit drejtues të BE-së është serioz.
“Tani nuk më takon mua të vendos se çfarë është serioze. Nuk është një proces i ndërmjetësuar nga SHBA-ja por nga Evropa, dhe çfarë është e rëndësishme këtu është se teksa dy palët normalizojnë marrëdhënien e tyre, ata po ashtu harmonizojnë strukturat e tyre me Bashkimin Evropian, në përgatitje për anëtarësim eventual në BE. Andaj, duhet të gjejmë gjuhë të përbashkët lidhur me këtë që është në përputhje me principet dhe kërkesat e BE-së, lidhur me procesin e anëtarësimit”, u shprej Escobar. /atvlive.tv
Emisionin e plotë CONTEXT në ATV e gjeni në videon më poshtë:
