Blog

Gjatë kësaj jave, Kryeministri i vendit, z. Albin Kurti, bashkë me ambasadorin e Zvicrës, z. Kolly, ambasadorin e Gjermanisë në Prishtinë dhe disa investitorë nga Zvicra morën pjesë në inaugurimin e Impiantit për Trajtimin e Ujërave të Ndotura në Gjakovë, siç njofton gazeta zvicerane në shqip Le Canton27.ch.

Ky projekt është zbatuar përmes Bankës për Zhvilli dhe Konfederatës Zvicerane përmes Sekretariatit Shtetëror për Çështje Ekonomike (SECO), si dhe me kontributin vetanak të Komunës së Gjakovës.

Në këtë takim morën pjesë gjithashtu ministri i ambientit dhe infrastrukturës, Liburn Aliu, kryetari i Gjakovës, Ardian Gjini, si dhe Fjolla Lasku, drejtoresha e Impiantit në Gjakovë, dhe Ilmi Cakolli, veprimtar i njohur në Zvicër.

Nga takimi i mëparshëm me z. Lajçak, Kryeministri shkoi drejt Gjakovës për të përuruar impiantin e tretë të ujërave të ndotura, në dy vitet e fundit.

Impianti i ri në Gjakovë vjen pas atyre në Prizren dhe Pejë, dhe i paraprin atyre në Gjilan, Mitrovicë, Ferizaj dhe Prishtinë. Së bashku me partnerët ndërkombëtarë, synohet që brenda pesë viteve të ardhshme t’i kenë impiantet e tyre në shtatë qytetet kryesore, ndërsa në vetëm në dy vite janë siguruar mbi 100 milionë euro grante për trajtimin e ujërave të zeza dhe menaxhimin e mbeturinave.

Nga shuma totale prej 16.8 milionë eurosh që ka kushtuar ky projekt i rëndësishëm, 6 milionë euro janë kontribut i Bankës Zhvillimore Gjermane, 7.6 milionë euro vijnë nga Qeveria Zvicerane dhe 3.2 milionë euro janë shtuar nga Komuna e Gjakovës.

Zvicra deri tani ka dhënë mbi 600 milionë CHF për demokracinë, integrimin dhe zhvillimin e Kosovës.

Zvicra ka dhënë 86 milionë euro për Kosovën me qëllim të mbështetjes së projekteve ekonomike, zhvillimit të demokracisë dhe kapaciteteve ujore. Këtë e ka bërë të ditur ambasadori zviceran, Thomas Kolly.

Ky program i bashkëpunimit zviceran me Kosovën ishte paraparë të realizohej për vitet 2022-2025 me investime në vlerë prej 86 milionë eurosh në fushat e “Qeverisjes demokratike dhe paqes”, “zhvillimit ekonomik të qëndrueshëm” dhe “fushën e klimës dhe ujit”.

Në një intervistë të fundit për gazetën zvicerane Le Canton27.ch, ambasadori zviceran në Prishtinë, z. Thomas Kolly, tha: “Rreth 200,000 persona me origjinë kosovare jetojnë në Zvicër dhe kontribuojnë aktivisht në ekonominë, kulturën dhe politikën tonë vendase. Zvicra është investitori i dytë më i madh në Kosovë, me mbi 480 milionë euro. Zvicra ka ofruar ndihmë të rëndësishme për Kosovën që nga viti 1998. Deri tani, ajo ka ofruar më shumë se 500 milionë CHF për Kosovën dhe mbetet partneri bilateral i tretë në zhvillimin e Kosovës. Ne jemi të bindur se ndihma zvicerane mbështet me efektivitet synimet e Kosovës për integrimin evropian dhe kontribuon në përmirësimin e jetës së qytetarëve kosovarë.”

Zëdhënësja e Kompanisë Rajonale të Ujësjellësit (KRU) “Prishtina”, Arjeta Mjeku, në një prononcim për EO ka thënë se borxhi i konsumatorëve në këtë kompani, që nga paslufta, kap vlerën prej 45 milionë eurosh.

Siç tha Mjeku, 80 për qind e ujit shfrytëzohet nga amvisëria, ndërsa borxhi i kësaj kategorie të konsumatorëve përbën shumicën e borxhit, saktësisht 40 milionë euro. Ndërsa, bizneset dhe institucionet kanë borxh prej 5 milionë eurosh.

Ajo ka sqaruar se i kanë dërguar dhjetëra lëndë te përmbaruesi, duke shtuar se më ketë formë kanë arritur që të inkasojnë një shumë të madhe të madhe të borxheve.

“Borxhi i konsumatorëve të amvisërisë, institucioneve, bizneseve të vogla dhe të mëdha, ndaj shërbimeve të ujësjellësit dhe kanalizimit, po flasim që nga paslufta deri më sot është mbi 45 milionë euro. 80 për qind e sasisë së ujit shpenzohet nga amvisëria, ndërkaq borxhi, vetëm i konsumatorëve të amvisërisë, është rreth 40 milionë euro. 5 milionë euro janë borxhe të bizneseve të vogla e të mëdha dhe të institucioneve”.

“Në përmbarim dërgohen ata konsumatorë që kanë borxhe mbi 100 euro. Kemi dërguar me dhjetëra lëndë, jemi duke përgatitur çdo ditë nga zyra ligjore lëndë të tjera. Pikërisht për këtë arsye u kemi bërë apel edhe qytetarëve që t’i shmangin taksat ndaj përmbaruesve. Pra, ta paguajnë borxhin para se lënda e tyre të shkojnë te përmbaruesi privat. Me përmbarim kemi arritur qe ta marrim një shumë të konsiderueshme të parave nga borxhlinjtë”.

Mjeku ka bërë të ditur se çdo të mërkurë dhe premte, me asistencë të Policisë së Kosovës, bëjnë çkyqjen e tri llojeve të konsumatorëve.

Sipas saj, ata që kyçen në mënyrë ilegale, përveç që kyçen nga furnizimi me ujë, ushtrohet edhe kallëzim penal.

“Veç kemi filluar me çkyqje intensive nga sistemi i rrjetit te furnizimit me ujë të pijshëm. Fillimisht jemi duke aplikuar çkyqje te ata konsumatorë që kanë borxhe të grumbulluara ndaj shërbimeve të ujësjellësit dhe ndaj atyre konsumatorëve që janë të kyçur ilegalisht në sistem. Si konsumatorë ilegalë përfshihen të gjithë ata që kanë marrë pëlqimin për kyçje, kanë plotësuar kushtet teknike, mirëpo nuk i kanë dërguar ende listat e konsumatorëve në K.R.U Prishtina”.

“Çdo të mërkurë dhe premte, me asistencë të Policisë së Kosovës, dalim që t’i çkyqim tri lloje të konsumatorëve, ata që kanë borxhe të mëdha, ata që janë të kyçur ilegalisht, por edhe një kategori e konsumatorëve të cilët pas çkyqjes nga ana jonë, kyçen në mënyrë ilegale. Këta të fundit, përveç që kyçen nga furnizimi me ujë, ushtrojmë edhe kallëzim penal”.

Ministri i Bujqësisë, Pylltarisë dhe Zhvillimit Rural, Faton Peci, ka parë nga afër ecurinë e inspektimeve për kulturat bujqësore dhe aplikuesit në Programin për Pagesa Direkte/Subvencione 2023, raporton Ekonomia Online.

Vizita e inspektimit u bë në fshatin Cërnillë të Ferizajt, ku fermeri Jeton Statovci tregoi për të mbjellat që i posedon. Tha se aktualisht i ka afër tetë hektarë me grurë.

I shoqëruar nga inspektoret e AZHB-së në komunën e Ferizajt, Peci tha se duke marr parasysh se këtë vit ka ndryshime në aspektin e kritereve të aplikimit dhe vlerësimit, kanë marrë vendim që inspektimi të bëhet në shtatë komuna të Kosovës.

“Arsyeja e vizitës sime në Ferizaj është për të parë nga afër inspektimet që po realizohen nga inspektorë të Agjencionit Zhvillimor të Bujqësisë. Viti 2023 është viti rekord i të mbjellave në territorin e Kosovës dhe ky rekord i të mbjellave duhet të shoqërohet edhe me rekordin e inspektimeve. Ne e kemi zgjedh inspektimin përveç formës sesi ka qenë herëve të kaluara, ne kemi përzgjedh shtatë komuna në shtatë regjione të Kosovës, në të cilat inspektimi për të gjitha kulturat bujqësore do të jetë 100 për qind”, tha Peci, teksa shtoi se dikasteri që ai e drejton do të kërkojë korrektësi edhe nga ana e fermerit.

“Synimi dhe ambicia jonë është që të rrisim meritokracinë dhe për të instaluar meritokracinë nuk mjafton vetëm vullneti politik i ministrit apo zyrtarëve në Ministrinë e Bujqësisë. Meritokracia duhet me u jetësu edhe nga ana e fermerëve. Ne po duam që të shohim në aspektin e dyanshëm korrektësinë edhe aplikimin korrekt edhe nga ana e fermerëve, jo si në formë të kërcënimit por çdo cent i taksapaguesve të shkojë në adresë të duhur dhe në këtë rast angazhimi jonë është që buxheti i Ministrisë së Bujqësisë ta ketë adresën e vetëm 100 për qind fermeri dhe për këtë arsye ne kemi përzgjedhur shtatë komuna në të cilat do të inspektohen të gjitha të mbjellat por edhe nga sektori i blegtorisë”, tha tutje Peci.

Ndërsa fermeri Jeton Statovci, tha se është i kënaqur me përkrahjen që ka marrë nga Ministria e Bujqësisë. Tha se falë kësaj mbështetje, ka arrit t’i mbjellë afër tetë hektarë grurë.

Kontesti ndërmjet Kishës Ortodokse Serbe (KOS) dhe Kishës Ortodokse Maqedonase (KOM) që nga e shtuna e 20 majit është zyrtarisht një gjë e së kaluarës.

Kryepeshkopata Ortodokse e Ohrit iu bashkua Sinodit të Kishës Ortodokse Maqedonase-Kryepeshkopatës së Ohrit, që është faza përfundimtare në tejkalimin e mosmarrëveshjeve në mes të KOS-it dhe KOM-it.

Kuvendi i Kishës Ortodokse Serbe njoftoi të shtunën, në fund të seancës së tij, se ka marrë vendim për integrimin e Kryepeshkopatës Ortodokse të Ohrit në Sinodin e Kishës Ortodokse Maqedonase – Kryepeshkopata e Ohrit.

Mosmarrëveshja mes dy kishave ndodhi kur Kisha Ortodokse Maqedonase u nda në mënyrë jokanonike nga Kisha Ortodokse Serbe, duke u deklaruar plotësisht e pavarur, gjë të cilin Kisha Ortodokse Serbe dhe kishat e tjera ortodokse nuk e njohën, transmeton Beta.

Pas një refuzimi afatgjatë të Kishës Ortodokse Maqedonase për t’u kthyer në statusin e mëparshëm, Kryepeshkopata Ortodokse e Ohrit u formua si autonome brenda Kishës Ortodokse Serbe.

Nga kuvendi i vitit të kaluar, Kisha Ortodokse Serbe i dha Tomos (akt kishtar i nxjerrë nga patriarku dhe sinodi) me të cilin e njohu autoqefalin për Kishën Ortodokse Maqedonase, por mbeti për t’u shpallur është statusi i Kryepeshkopatës Ortodokse të Ohrit.

Për këtë arsye, siç thuhet në njoftim, “Kuvendi mori një vendim për dhënien e lirimit kanonik të hierarkisë së kësaj kishe autonome nga Kisha Ortodokse Serbe dhe integrimin e saj në Sinodin e Kishës Ortodokse Maqedonase, në përputhje me kanonet e shenjta dhe kushtetutat e të dy kishave tona vendore, si dhe marrëveshjen e arritur më parë nga Sinodet e të tre strukturave kishtare”.

Në qarqet kishtare, në prag të këtij kuvendi, integrimi i Kryepeshkopatës Ortodokse të Ohrit në Kishën Ortodokse Maqedonase, u përmend si zgjidhja më e mundshme me ndarjen e dioqezave në Maqedoninë e Veriut, në mënyrë që peshkopët e Kryepeshkopatës Ortodokse të Ohrit të kenë dioqezat e tyre.

Në njoftim thuhet se në Kuvend kanë qenë të pranishëm kryepeshkopët e Kryepeshkopatës Ortodokse të Ohrit. Në prag të kuvendit, siç u mësua, mësojmë, në Patrikanë janë takuar delegacioni i Kishës Ortodokse Maqedonase me kreun e Kishës Ortodokse Serbe, Porfirije. /REL