ATV

Blog

  • Parashikimi i motit me Diellza Dakën

    Parashikimi i motit me Diellza Dakën

    Dita e sotme në vendin tonë do të jetë kryesisht me intervale të lehta me diell.

    Temperaturën minimale do e mbajë Gjakova me 7 gradë Celsius, ndërsa atë maksimale Prizreni me 20 gradë Celsius.

    Edhe dita e nesërme në Kosovë do të jetë me kushte të njëjta atmosferike. Temperatura minimale do të shënohet në Gjakovë me 9 gradë Celsius, ndërsa ajo maksimale në Ferizaj me 20 gradë Celsius.

    Ndërkohë, në Shqipëri do të ketë mot kryesisht të kthjellët dhe me temperatura konstante. Temperaturën minimale do e ketë Korça me 8 gradë Celsius, ndërsa ajo maksimale do të jetë në Berat me 27 gradë Celsius. /atvlive.tv/

    Parashikimin e plotë të motit, për rajon dhe Evropë, mund ta gjeni në videon e mëposhtme:

     

     

  • Çfarë i ndodhë trupit kur pini ujë me limon çdo mëngjes

    Çfarë i ndodhë trupit kur pini ujë me limon çdo mëngjes

    Uji me limon është një nga pijet më të shëndetshme që mund t’i konsumoni në mëngjes.

    Kjo pije freskuese ofron shumë përfitime shëndetësore, dhe është shumë e thjeshtë për t’u përgatiturvetëm shtrydhni gjysmë limoni në një gotë me ujë të vakët.

    Limonët janë të mbushur me vitaminë C, magnez, kalium, etj., ndërkaq uji është kyç për të shmangur dehidratimin.

    Nëse filloni të pini ujë me limon çdo mëngjes, ju do t’i përjetoni këto përfitime shëndetësore:

    – Sistem më të fortë të imunitetit

    – Sistem më të mirë të tretjes

    – Aromë më të freskët të gojës

    – Funksion më të mirë të mëlçisë

    – Humbje të peshës

    – Lëkurë të pastër.

  • Mblidhet Kryesia e Kuvendit, në rend dite dhjetëra pika

    Mblidhet Kryesia e Kuvendit, në rend dite dhjetëra pika

    Sot do të mbahet mbledhja e Kryesisë së Kuvendit të Republikës së Kosovës, në të cilën në rend dite janë dhjetëra pika të seancave të kaluara.

    Pikë e rendit të ditës është interpelanca e Kryeministrit të Republikës së Kosovës, Albin Kurti, në lidhje me çështjen: ”Siguria juridike e grave në rastet e dhunës në familje dhe përgjegjësia e organeve shtetërore në parandalimin edhe luftimin e krimeve ndaj grave dhe vajzave”.

    Po ashtu do të bëhet shqyrtimi i Planit Hapësinor për Parkun Kombëtar “Bjeshkët e Nemuna”, shqyrtimi i Propozim-rezolutës për shpenzimet e parasë publike për dy vite mandat të Qeverisë së Republikës së Kosovë.

    Kryesia do të vendos edhe për propozimin e rendit të ditës për seancën plenare të radhës, ku në rend ditë është shqyrtimi i parë i Projektligjit nr.08/L-228 për Zgjedhjet e Përgjithshme në Republikën e Kosovës, etj.

  • Kurti: Objektivi i radhës, funksionalizimi i aseteve të trashëgimisë kulturore

    Kurti: Objektivi i radhës, funksionalizimi i aseteve të trashëgimisë kulturore

    Kryeministri i Kosovës, Albin Kurti në ditën ndërkombëtare të Diversitetit Kulturor për Dialog dhe Zhvillim, ka shkruar se njohin dhe vlerësojnë pasurinë e shumëllojshme të shtetit tonë, dhe rolin e saj në promovim të të drejtave dhe lirive themelore të njeriut.

    Kurti ka shkruar Facebook, se Kosova ka një pasuri të jashtëzakonshme kulturore, llojllojshmëria e së cilës sot shprehet në formë të krijimtarisë materiale dhe shpirtërore, e trashëguar nga e kaluara jonë.

    “Përfitimet për shoqërinë nga mbrojta e trashëgimisë kulturore janë të shumta. Kemi restauruar dhe vazhdojmë të restaurojmë xhami, hamame, teqe, kisha katolike, kisha ortodokse, zona historike, kulla e shtëpi tradicionale, mulli, ndërtesa historike e publike për të promovuar harmoninë ndër-fetare si vlerë universale të shoqërisë sonë dhe historinë tonë të pasur kombëtare e shoqërore. Shumë punë janë bërë dhe akoma më shumë punë na presin në fuqizimin e muzeve publik ku ruhen dëshmitë materiale të lashtësisë, dhe pasqyrohen traditat e vlerat e trashëgimisë shpirtërore kulturore të popullit tonë. Vazhdojmë me gërmime profesionale në lokalitetet tona arkeologjike, ndërsa ato po i bëjmë edhe me plane e njësi menaxhimi për t’i pritur më mirë vizitorët dhe edukuar më drejt fëmijët e të rinjtë tanë. Kemi bërë hapa të mëdhenj për të dalë nga periudha e emergjencave. Objektivi ynë i radhës është menaxhimi dhe funksionalizimi i aseteve të trashëgimisë kulturore. Bashkë do të sigurohemi që pasuria jonë kulturore të përkthehet në mirëqenie për qytetarët tanë”, ka shkruar ai.

  • Lëngjet dhe pijet e gazuara rrisin rrezikun nga kanceri

    Lëngjet dhe pijet e gazuara rrisin rrezikun nga kanceri

    Edhe më shumë lajme të këqija për adhuruesit e pijeve me sheqer, si ato me gaz dhe të pemëve. Një studim i ri e ka ndërlidhur konsumimin e një gote të vogël me pije me sheqer për ditë – pra rreth 100ml, rreth një e treta e një kanaçeje tipike të pijeve të gazuara – me rritjen prej 18 për qind të rrezikut nga të gjitha llojet e kancereve dhe 22 për qind të kancerit në gji, shkruan CNN. 

    Studimi, i cili ka analizuar më shumë se 100.000 të rritur francezë, ka ndërlidhur konsumimin e pijeve me sheqer me rritjen e rrezikut nga prekja prej disa kancereve. Ky studim është realizuar pas një studimi tjetër të kohëve të fundit, i cili ka lidhur konsumimin e pijeve me sheqer me rrezikun më të madh nga vdekja e parakohshme.

    “Rezultatet i dëshmojnë statistikisht lidhjet e caktuara mes konsumimit të pijeve të ëmbla dhe rrezikut nga kanceret, dhe specifikisht rrezikut nga kanceri i gjirit”, ka thënë Ian Johnson, studiues i nutricionit dhe anëtar i institutit “Quadram” për bioshkencë, i cili nuk ishte i përfshirë në studim.

    “Ndoshta është e çuditshme, por rreziku i rritur nga kanceri tek konsumuesit më të mëdhenj të pijeve me sheqer ishte vërejtur madje edhe në mesin e konsumuesve të lëngut të pemëve – dhe kjo gjë kërkon më shumë hulumtime”, ka thënë Johnson për Qendrën Mediale të Shkencës në Britaninë e Madhe. Mathilde Touvier, autore kryesore e studimit, i cili ishte publikuar të mërkurën në revistën mjekësore BMJ, ka thënë se gjetjet e hulumtimit tregojnë se konsumimi më i paktë i pijeve me sheqer mund të jetë i dobishëm për shëndetin.

    “Ajo që kemi vërejtur është se faktor kyç në këtë lidhje duket se është vërtet sheqeri, të cilin e përmbajnë këto pije të ëmbla”, ka thënë Touvier, i cili është drejtori i studimit të Ekipit Hulumtues për Epidemiologjinë Nutrocioniste nga Instituti për Hulumtime Kombëtare Mjekësore dhe Shëndetësore në Universitetin 13 të Parisit. Touvier ka thënë, po ashtu, se ekipi i saj ka vërejtur se sheqeri ka dalë të jetë faktori kryesor i lidhjes.

    “Konsumimi i madh i pijeve me sheqer është një faktor rreziku për shtim peshe dhe për obezitet”, ka thënë ajo, ndërsa ka shtuar se “obeziteti është në vetvete një faktor rreziku për kancer”, Një tjetër mundësi janë se aditivët, 4-metilimidazole, që gjenden në pijet që përmbajnë ngjyra karameli, dhe që mund të luajnë një rol të rëndësishëm për formimin e kancerit. Touvier ka sugjeruar që njerëzit duhet t’u përmbahen udhëzimeve të shëndetit publik, të cilat këshillojnë të konsumohen pije me sheqer të kufizuar dhe më së shumti një gotë në ditë. Si përgjigje ndaj këtij studimi, Asociacioni amerikan i Pijeve ka vënë në pah sigurinë e pijeve me sheqer.

    “Është e rëndësishme që njerëzit ta dinë se të gjitha pijet – qofshin ato me apo pa sheqer – janë të sigurta për t’u konsumuar si pjesë e një diete të baraspeshuar”, ka thënë zëdhënësja e Asociacionit amerikan të Pijeve, Danielle Smotkin.

    “Por edhe kompanitë kryesore të pijeve në Shtetet e Bashkuara të Amerikës janë duke punuar bashkërisht për t’i përkrahur përpjekjet e konsumatorëve për ta ulur konsumimin e sheqerit nga pijet, duke prodhuar më shumë alternativa me më pak sheqer apo me zero sheqer, pako me masë më të paktë dhe duke ofruar informata të qarta për kalori përpara paketimit”.

  • 24 vjet nga masakra e 22 Majit në Vushtrri

    24 vjet nga masakra e 22 Majit në Vushtrri

    Krahas fshatrave, ushtarët dhe policët serbë gjatë luftës në Kosovë, kanë masakruar shumë shqiptarë civil edhe në qytete. Njëra nga këto masakra është edhe ajo e kryer në Vushtrri më 22 maj 1999.

    Gjatë kësaj dite (22 maj), qytetarët e Vushtrrisë, kanë përjetuar tmerr të rënd nga makineria vrastare e Sllobodan Millosheviqit dhe njësitë e Arkanit. Në këtë ditë, shumicën e qytetarëve i kanë larguar me forcë nga shtëpitë e tyre, dhe i kanë detyruar të grumbullohen te vendi i njohur “Te varrezat” në qytetin e Vushtrrisë.

    Familjet në ish rrugën “Abdullah Shabani”, tani rruga “22 Maji”, janë larguar nga shtëpitë e tyre. Mirëpo, një grup shqiptarësh prej 68 vetash, i kanë detyruar të ndalen në shtëpinë e Kahriman Pasomës. Ndërsa, të tjerët e kësaj lagjeje i kanë detyruar të shkojnë te vendi i quajtur “Te varrezat” në Vushtrri.

    Gjatë kësaj kohe, janë plaçkitur dhe u janë marrë para e gjësende me vlerë, si ari etj. “Te varrezat”, të grumbulluarit i kanë ndarë në tri grupe: Gratë me fëmijë deri në moshën 15 vjet, Të moshës së re dhe mesatare dhe Të moshuarit.

    Disa nga të grumbulluarit, rreth 1000 veta, i dërguan në sallën e sportit, ku i kanë torturuar në forma të ndryshme, dhe pastaj, disa i kanë dërguar në burgun e Smrekonicës (fshat në veri të Vushtrrisë) dhe disa të tjerë për në Shqipëri.

    Nga gjithë kjo katrahurë e dhimbshme, më së rëndi dhe më së keqi kanë pësuar 68 shqiptarët që kishin mbetur në shtëpinë e Kahriman Pasomës. Pengmarrësit shqiptarë janë torturuar në forma çnjerëzore, pastaj janë ekzekutuar të gjithë, shumica me një plumb në kokë – në ballë. Në mesin e të ekzekutuarve kishte femra dhe fëmijë të moshës 15 vjeçare, si dhe pleq e plaka.

    Të vrarët në këtë masakër janë:

    1. Ali (Ibrahim) Melenica (58 vjeç)

    2. Hasan (Ibrahim) Melenica (51 vjeç)

    3. Shaban (Ibrahim) Melenica (49 vjeç)

    4. Nistret (Ali) Melenica (31 vjeç)

    5. Shefki (Musli) Melenica (22 vjeç)

    6. Ibrahim (Bajram) Zeqiri (36 vjeç)

    7. Driton (Rifat) Murseli (27 vjeç)

    8. Rafet (Qazim) Behrami (53 vjeç)

    9. Burim (Rafet) Behrami (17 vjeç)

    10. Kemajl (Tefik) Tërnava (41 vjeç)

    11. Isak (Sylë) Maçastena (33 vjeç)

    12. Fehmi (Ukshin) Musa (37 vjeç)

    13. Arsim (Ismajl) Musa (20 vjeç)

    14. Xhafer (Ramadan) Shaqiri (18 vjeç)

    15. Rrahim (Ali) Shatrolli (43 vjeç)

    16. Muharrem (Hamdi) Bajrami(32 vjeç)

    17. Lulzim (Hamdi) Bajrami (27 vjeç)

    18. Naim (Osman) Bajrami (37 vjeç)

    19. Afrim (Osman) Bajrami (31 vjeç)

    20. Hamit (Adem) Halili (60 vjeç)

    21. Hilmi (Hamit) Halili (27 vjeç)

    22. Hamdi (Ragip) Dallku (62 vjeç)

    23. Agim (Hamdi) Dallku (26 vjeç)

    24. Bashkim (Hamdi) Dallku (23 vjeç)

    25. Jeton (Rifat) Vërbovci (33 vjeç)

    26. Arsim (Hazir) Sejdiu (33 vjeç)

    27. Zeqir (Rexhep) Kadriu (46 vjeç)

    28. Ferki (Zeqir) Kadriu (58 vjeç)

    29. Haki (Zeqir) Kadriu (16 vjeç)

    30. Shahin (Xhevat) Feka (40 vjeç)

    31. Ekrem (Jahir) Feka (30 vjeç)

    32. Miradie (Hajzer) Feka (62 vjeç)

    33. Bedri (Ramadan) Kutllovci (38 vjeç)

    34. Bujar (Dibran) Krasniqi (19 vjeç)

    35. Faik (Raif) Mulaku (57 vjeç)

    36. Driton (Shaban) Merovci (31 vjeç)

    37. Mensur (Ferat) Gërguri (35 vjeç)

    38. Brahim (Rrahim) Maloku (48 vjeç)

    39. Arian (Emurullah) Prokupla(30 vjeç)

    40. Shahidin (Shefqet) Maxhuni(20 vjeç)

    41. Murat (Ferat) Tiriqi (24 vjeç)

    42. Serhat (Ferat) Tiriqi (22 vjeç)

    43. Ahmet (Qazim ) Uka (35 vjeç)

    44. Sekine (Qazim) Uka (24 vjeç)

    45. Ajshe (Azem) Uka (31 vjeç)

    46. Rrahim (Hasan) Shkreli (19 vjeç)

    47. Bukurie (Hasan) Shkreli (16 vjeç)

    48. Fatmir (Halim) Keqolli (26 vjeç)

    49. Fazli (Zenel) Shabani (56 vjeç)

    50. Idriz (Ragip) Hasani (21 vjeç)

    51. Ramadan (Sefë) Shaqiri (50 vjeç)

    52. Hajdin (Ramadan) Shaqiri (19 vjeç)

    53. Besnik (Ramadan) Shaqiri (15 vjeç)

    54. Naser (Arif) Zeka (25 vjeç)

    55. Nexhmedin (Arif) Zeka (22 vjeç)

    56. Agim (Arif) Zeka (20 vjeç)

    57. Bajram (Ramadan) Meha (46 vjeç)

    58. Ramadan (Bajram) Meha (15 vjeç)

    59. Avdi (Hamit) Bardiqi (56 vjeç)

    60. Rrahman (Idriz) Ferati (18 vjeç)

    61. Zeqir (Rrahman) Zeqiri (45 vjeç)

    62. Irfan (Ilaz) Zhilivoda (38 vjeç)

    63. Muhamet (Ahmet) Kadriu (56 vjeç)

    64. Muzafer (Avdulla ) Muhaxheri (42 vjeç)

    65. Agim (Islam) Shaqiri (17 vjeç)

    66. Bajram (Habib) Islami (38 vjeç)

    67. Ibrahim (Habib) Islami (49 vjeç)

    68. Bahri (Mahmut) Syla (24 vjeç)

    Pas ekzekutimit, kufomat janë bartur me një kamion dhe janë dërguar në Serbi, përkatësisht në Batajnicë, me qëllim që të humbin gjurmët e krimit.

    Dëshmitarët që kanë shkuar në shtëpinë ku është kryer krimi, kuptohet pasi janë larguar forcat pushtuese serbe dhe kufomat e të ekzekutuarve shqiptarë, tregojnë se kishte shumë gjurmë të gjakut nëpër mure, në dysheme dhe vende të tjera të shtëpisë së krimit.

    Pas luftës së vitit 1999, përkatësisht deri më 2015, janë kthyer eshtrat e 67 shqiptarëve të vrarë më 22 maj 1999, dhe ka mbetur edhe një, Bukurie Shkreli, që nuk iu kanë gjetur eshtrat.

  • Escobar: Ka rrezik që Rusia të ndikojë në zgjedhjet në Mal të Zi

    Escobar: Ka rrezik që Rusia të ndikojë në zgjedhjet në Mal të Zi

    I dërguari special i Shteteve të Bashkuara të Amerikës për Ballkanin Perëndimor, Gabriel Escobar, ka paralajmëruar se ekziston rreziku i ndërhyrjes ruse në zgjedhjet parlamentare në Mal të Zi.

    Në një intervistë për agjencinë malazeze të lajmeve, MINA, Escobar tha se ky rrezik ka ekzistuar gjithmonë edhe në zgjedhjet në SHBA.

    “Të jeni të sigurt se ata do të përpiqen të përdorin të gjitha dallimet dhe të gjitha metodat e vendosura – bots dhe dezinformata në përpjekje për ta devijuar Malin e Zi nga rruga e tij europiane. Prandaj, po, më shqetësojnë zgjedhjet jo vetëm në Mal të Zi por edhe në rajon”, tha Escobar.

    Ai tha se nga ana tjetër qytetarët e Malit të Zi kanë bërë zgjedhjen e duhur.

    “Sa herë që qytetarët duhej të bënin zgjedhje, ata zgjodhën të vetmen rrugë reale përpara Malit të Zi – integrimin euroatlantik”, shtoi Escobar.

    Escobar tha se “kushdo që e mban Malin e Zi në kursin e tij europian, kushdo që mbetet i përkushtuar ndaj detyrimeve të Malit të Zi nga anëtarësimi në NATO dhe që është aleat në luftën kundër korrupsionit, mund të presë mbështetjen e SHBA-së”.

    Për këtë ai i dha merita ish-presidentit të Malit të Zi, Milo Gjukanoviq, për të cilin tha se e udhëhoqi vendin në një rrugë shumë të mirë përmes pavarësisë kombëtare përmes anëtarësimit në NATO dhe përmes afirmimit të anëtarësimit të vendit në BE.

    “Mendoj se ajo që kemi parë është vazhdimi i praktikës që Mali i Zi të zgjedhë njerëz që duan të shkojnë në Europë. Dhe ne (SHBA) duam t’ju ndihmojmë në këtë”, tha Escobar.

  • Jo vetëm nga Ballkani, Gjermania po kërkon punëtorë edhe nga këto vende

    Jo vetëm nga Ballkani, Gjermania po kërkon punëtorë edhe nga këto vende

    Në kërkimin e saj për fuqi punëtore, Gjermania synon të fokusohet në vende jashtë Evropës, si Brazili, Meksika dhe Indonezia, tha Ministri i Punës Hubertus Heil.

    “Së bashku me përfaqësuesit e ekonomisë, ne po punojmë për një strategji në vendet ku ka shumë më shumë punëtorë të rinj dhe të kualifikuar në tregun e punës sesa mund të thithin tregjet vendase të punës,” tha Ministri Heil (Partia Social Demokrate e Gjermanisë, SPD) në një intervistë me të përditshmen Neue Osnabruecker Zeitung.

    Heil tha se do t’i kushtohet vëmendje që të mos privohet tregu i brendshëm i punës nga ekspertët e nevojshëm. Ai tha se ishte një situatë “win-win”.

    “Ne përfitojmë, por edhe vendet e origjinës. Do të investojmë në formimin profesional të të rinjve aty për aty dhe personat që do të vijnë në Gjermani do të përfitojnë nga një punë e mirëpaguar që u jep mundësinë të financojnë familjet e tyre në shtëpi”, tha Heil.

    Marrëveshjet me një sërë vendesh

    Heil duhet të udhëtojë në Brazil me ministren e Jashtme Annalena Baerbock në qershor për të diskutuar mundësinë e sjelljes së më shumë infermierëve, të cilët janë shumë të nevojshëm nga tregu gjerman i punës.

    Marrëveshje të ngjashme duhet të lidhen me Meksikën dhe Indonezinë, dhe Heil tashmë vizitoi Ganën në shkurt me të njëjtin qëllim.

    Siç raporton shërbimi publik ARD, qeveria gjermane po zhvillon gjithashtu diskutime për tërheqjen e fuqisë punëtore me Kolumbinë, Tunizinë, Marokun, Egjiptin, Indinë, Filipinet dhe Vietnamin.

    Përveç fuqisë punëtore të kualifikuar në fushën e kujdesit, nga vendet e përmendura duhet të vijnë edhe punëtorë të tjerë të nevojshëm për tregun gjerman të punës.

    Siç njoftoi Instituti për Ekonominë Gjermane (IW), në fund të vitit 2022, më shumë se 630,000 vende pune u raportuan në agjencitë e punësimit në Gjermani, të cilat nuk mund të plotësoheshin për shkak të mungesës së një fuqie të caktuar punëtore.

    Kushte më të mira pune

    Vetëm 33 punëtorë të kualifikuar janë në dispozicion për 100 vende pune të hapura në sektorin e kujdesit të huaj.

    Presidenti i Fondacionit për Mbrojtjen e Pacientëve, Eugen Brysch, kritikoi njëkohësisht importimin masiv të infermierëve dhe vuri në dukje se potenciali për plotësimin më të lehtë të pozitave të hapura në sektorin e kujdesit ekziston edhe tani në Gjermani, por se kushtet e punës duhet të përmirësohen në mënyrë që për të përdorur këtë potencial dhe vendet e punës u bënë më tërheqëse.

    “Disa qindra infermierë nga Brazili nuk do t’i zgjidhin këto probleme. Është e nevojshme të përmirësohen kushtet në këtë sektor”, tha Brysch. Ai paralajmëroi se shumë ish-kujdestarë janë ritrajnuar për profesione më pak stresuese dhe më të paguara.

    Vlerësohet se sektori privat i kujdesit të huaj tashmë do të shembet pa punëtorët e shumtë nga Evropa Lindore që janë të punësuar në familje. Paga mesatare vjetore bruto në sektorin e kujdesit është afro 40,000 euro.

  • Lajçak thotë se u arrit “njëfarë progresi” në dialog, paralajmëron takime të ardhshme

    Lajçak thotë se u arrit “njëfarë progresi” në dialog, paralajmëron takime të ardhshme

    Emisari i Bashkimit Evropian për Dialogun Kosovë-Serbi Miroslav Lajçak, ka paralajmëruar diskutime mes ekipeve të negociatorëve të Kosovës dhe të Serbisë për javët në vazhdim.

    Ai, me anë të një postimi në rrjetin social Facebook, ka deklaruar se javën e kaluar në bisedimet që i pati me kryenegociatorët e Kosovës dhe të Serbisë për dialogun arritën njëfarë progresi.

    “Përderisa kjo javë nis me pikat e tjera të mandatit tim, java e kaluar ishte tërësisht e fokusuar në atë kryesoren – dialogun për normalizim. E nisa duke pritur kryenegociatorët për një raund tjetër të negociatave të dialogut në Bruksel”.

    “Ne diskutuam rrugën përpara për zbatimin e marrëveshjes së 27 shkurtit dhe synuam t’i qartësojmë çështjet që kanë mbetur të hapura. Ndërsa gjetja e bazës së përbashkët mund të jetë sfiduese, ne arritëm njëfarë progresi. Diskutimet tona do të vazhdojnë sërish në javët në vijim”, ka thënë Lajçak.

    “Përderisa kjo javë nis me pikat e tjera të mandatit tim, java e kaluar ishte tërësisht e fokusuar në atë kryesoren – dialogun për normalizim. E nisa duke pritur kryenegociatorët për një raund tjetër të negociatave të dialogut në Bruksel”.

    “Ne diskutuam rrugën përpara për zbatimin e marrëveshjes së 27 shkurtit dhe synuam t’i qartësojmë çështjet që kanë mbetur të hapura. Ndërsa gjetja e bazës së përbashkët mund të jetë sfiduese, ne arritëm njëfarë progresi. Diskutimet tona do të vazhdojnë sërish në javët në vijim”, ka thënë Lajçak.

  • Kosova do të përfshihet në një raport të NATO-s

    Kosova do të përfshihet në një raport të NATO-s

    Kuvendi i Kosovës bën të ditur se një delegacion i kryesuar deputeti Driton Hyseni është duke qëndruar në ditën e dytë të punimeve të sesionit pranveror të Asamblesë së Parlamentare të NATO-s.

    Në njoftimin e lëshuar thuhet se delegacioni i Kosovës se kishin takime me delegacionin e Kanadasë, SHBA-së, Danimarkës, Gjermanisë, Sllovakisë, si dhe me delegacionet e Holandës e Finlandës.

    “Temat e diskutimit përfshinin kërkim-mbështetjen e Kosovës në proceset e përfshirjes sa më të madhe të delegacionit te Kuvendit të Republikës se Kosovës në AP të NATO-s, si dhe ne institucionet e organizatat tjera ndërkombëtare”.

    “Gjithashtu, në sesionin e Komisionit për Politikë, Driton Hyseni ngriti çështjen e përfshirjes në mënyrë specifike të Kosovës në raportin e Audronius Azubalis ‘E ardhmja e politikës së dyerve të hapura të NATO-s’, ku përfshihen vendet tjera të Ballkanit Perëndimor”.

    “Pas diskutimit të kryetarit të delegacionit të Kuvendit të Kosovës, raportuesi e pranoi se do të bëjë përfshirjen e Kosovës në raportin e këtij viti”, thuhet në njoftim.