Të dielën pritet të zhvillohen ndeshjet e xhiros së fundit në Albi Mall Super liga e Kosovës në Futboll, ku ndeshja mes Gjilanit dhe Ballkanit pritet të luhet në stadiumin e qytetit në Suharekë.
Sipas burimeve të Albanian News, klubi i Gjilanit ka pranuar kërkesën e klubit Ballkani që ndeshja e fundit kampionale mes dy skuadrave të luhet në stadiumin e kampionëve të këtij edicioni në super ligen e Kosovës.
Kujtojmë se këtë javë përmbyllet një kampionat mjaft interesant, ku akoma nuk është e vendosur emri I skuadrave që do vazhdojnë të qëndrojnë në Albi Mall Super liga dhe atyre që do të përshëndeten nga elita e futbollit vendor.
Sa I përket Gjilanit dhe Ballkanit, “Skifterat” ndodhën në pozitën e tretë me gjithsej 53-të pikë, në anën tjetër suharekasit pas fitores javën e kaluar ndaj Ferizajt kanë aktualisht 72-të sosh. /atvlive.tv
Prokuroria Themelore në Prishtinë, njoftoi se në kuadër të ndërmarrjes së veprimeve hetimore lidhur me rastin “VisaMetric”, i pandehuri S.O., (shtetas turk), drejtor i këtij subjekti, është ndaluar në kohëzgjatje prej 48 orësh, për shkak të veprës penale “Mosekzekutimi i vendimeve gjyqësore”, nga neni 394, paragrafi 2 lidhur me paragrafin 1 të KPRK-së.
Avokati Flamur Abdullahu, muaj më parë, kishte bërë ankesë në departamentin për mbrojtjen e konsumatorit dhe me pas edhe padi kolektive ndaj “VisaMetric”, pasi kjo e fundit kishte detyruar aplikuesit për viza që të paguajnë tarifën prej 30 eurosh.
Ai në një lidhje të drejtpërdrejt në emisionin DIREKT në ATV, tha se detyrimi “VisaMetric” që aplikantët e vizave të paguajnë tarifën e caktuar nga kjo kompani, përbënte shkelje të të drejtave të konsumatorit.
“Unë isha një prej personave që kur aplikova për vizë, u detyrova të paguaj tarifën e postës e cila në parim do të mund të ishte një shërbim që unë mund ta zgjidhja, nëse e dua atë shërbim apo nuk e dua. Në rastin e “VisaMetric”, ata na detyronin që të paguanim këtë tarifë dhe nuk ishte e mundur zgjedhja. Kjo përbënte shkelje të të drejtave të konsumatorit për arsye se ne uebfaqen e “VisaMetric’, ky shërbim reklamohej si i zgjedhshëm. Pastaj unë fillova ankesën në departamentin për mbrojtjen e konsumatorit, propozimin për masë sigurimi dhe padinë kolektive. Pas propozimit për masë sigurimi, Gjykata vendosi që kjo pagesë të mos i merret konsumatorëve dhe ne jemi në pritje të seancave për çështjen e padisë kolektive, me të cilën kemi kërkuar që të kthehen këto mjete të gjithë konsumatorëve që kanë paguar sikur unë”, tregoi Abdullahu.
Ai tha se ende nuk ka informata se deri ku ka shkuar kjo çështje në Gjykatë dhe për numrin e personave të afektuar, por pret që kur t’i vijë radha kësaj padie, pret që të ftohet nga Gjykata.
“Nuk kam informatë në lidhje me sa persona janë afektuar. Konsideroj që të afektuar janë të gjithë ata që kanë aplikuar nga shtatori i vitit të kaluar deri para disa ditëve kur “VisaMetric” ka filluar të zbatojë vendimin e Gjykatës. Të gjithë ata që kanë aplikuar, kanë paguar postën, pavarësisht se a merret apo jo viza, ajo është çështje tjetër, është vendim i ambasadës. Për kohën dhe veprimet tjera të cilat do të merren në Gjykatë, ne vetëm e kemi dorëzua padinë para disa muajve dhe presim që kur t’i vie radha, Gjyakata të na ftojë”, tha Abdullahu.
Ndryshe, kompania “VisaMetric”, ka pranuar ditë më parë vendimin e Gjykatës Komerciale të Kosovës, ku i ndalohej që të marrin nga 30 euro për shërbime postare qytetarëve që aplikojnë për viza gjermane. /atvlive.tv
Juventus është gati të bëjë një ofertë zyrtare për transferimin e Kalidou Koulibaly në afatin kalimtar të verës.
Qendërmbrojtësi senegalez nuk është se është përshtatur mjaftueshëm me futbollin anglez dhe dëshira e tij është të largohet nga Stamford Bridge.
Vlen të përmendet se 31-vjeçari ka kontratë me Blutë e Londrës deri në verën e vitin 2026, megjithatë sipas asaj që raporton ‘’Tutto Mercato’’, thuhet se Zonja e Vjetër tanimë ka kontaktuar londinezët për senegalezin.
Kujtojmë se nëse Juventus dëshiron shërbimet e Koulibaly, “Bianconerët” duhet të paguaj një shumë prej 25 milion eurosh. /atvlive.tv
Ministri i Ekonomisë dhe Industrisë së Bullgarisë, Nikolla Stojanov, u bëri thirrje kompanive dhe organizatave shkencore bullgare që të jenë aktive dhe të përfitojnë nga mundësitë e ofruara nga Fondi Evropian i Mbrojtjes.
Të martën, Stojanov hapi një ditë kombëtare informimi kushtuar Fondit Evropian të Mbrojtjes në Parkun Teknik të Sofjes.
Gjatë forumit u diskutuan kushtet për paraqitjen e projekt propozimeve nga ndërmarrjet bullgare.
Në forum morën pjesë përfaqësues të Komisionit Evropian, organizata kërkimore dhe industriale, akademi dhe biznese.
Ministri Stojanov shpjegoi se mundësitë që ofron Fondi janë shumë domethënëse dhe dha shembull me buxhetin e tij, i cili vetëm për periudhën 2021-2027 arrin në 8 miliardë euro. Gjithsej 2.7 miliardë euro nga shuma janë për kërkime shkencore, 5.3 miliardë euro janë të destinuara për produkte dhe teknologji në fushën e mbrojtjes. Vetëm për këtë vit, Fondi ka një buxhet prej 1.2 miliardë euro, ku 72 milionë euro nga fondet i drejtohen drejtpërdrejt vetëm ndërmarrjeve të vogla dhe të mesme, dhe 41 milionë euro të caktuara për financimin e zhvillimit të të ashtuquajturave “teknologji revolucionare”. “.
Stojanov tha se kompanitë bullgare kanë marrë pjesë në projekte për zhvillimin e produkteve dhe teknologjive të mbrojtjes që nga viti 2018, kur u themelua Fondi. Në periudhën 2019-2021 janë financuar 11 kompani bullgare me afro 130 milionë leva, që e vendos Bullgarinë në vendin e 14-të mes anëtarëve të tjerë të Bashkimit Evropian. Rezultatet për vitin e kaluar janë ende pezull, tha ministri i Ekonomisë, por vuri në dukje se 25 kompani dhe organizata shkencore kanë aplikuar për financim.
“Ne duam t’ju inkurajojmë dhe jemi të gatshëm të bëjmë gjithçka nga ana jonë për t’ju ndihmuar në këtë proces që të jeni më konkurrues kur aplikoni për financim”, tha ministri bullgar.
Fondi Evropian i Mbrojtjes është një instrument financiar i Komisionit Evropian për të nxitur bashkëpunimin midis kompanive të BE-së në fushën e mbrojtjes, universiteteve, instituteve shkencore e tjera, për të rritur kapacitetet e industrisë së mbrojtjes.
Presidentja e Republikës së Kosovës, Vjosa Osmani, ka pritur sot në takim Ministrin e Shtetit për Forcat e Armatosura të Mbretërisë së Bashkuar, James Heappey, ku u diskutua për bashkëpunimin në mes të Kosovës dhe Mbretërisë së Bashkuar në fushën e mbrojtjes dhe sigurisë, si dhe forcimin e mëtejmë të marrëdhënieve bilaterale dhe bashkëpunimit në mes të dy shteteve tona.
Presidentja Osmani ka theksuar përkushtimin e popullit dhe institucioneve të Republikës së Kosovës për integrim në institucionet euroatlantike, me ç’rast ka falënderuar Mbretërinë e Bashkuar për mbështetjen përgjatë viteve, duke theksuar se Kosova tanimë ka dëshmuar se është partner jo vetëm kredibil dhe i besueshëm, por i përkushtuar për të bashkëpunuar me aleatë për të kontribuar për paqe afatgjate në vend, rajon dhe kudo në botë.
Sipas një komunikate të Presidencës, Osmani vuri theksin në vazhdimin e mbështetjes së Mbretërisë së Bashkuar për Forcën tonë të Sigurisë, e cila po forcohet me standardet më të larta të NATO-s, përmes trajnimeve të ndryshme në rritje të kapaciteteve të përbashkëta.
Në këtë frymë, Presidentja potencoi edhe gatishmërinë e Kosovës që t’i bashkohet forcave britanike në misione paqeruajtëse në vende të tjera të botës.
Presidentja Osmani ka përmendur edhe nevojën e forcimit të bashkëpunimit të ndërsjellë që të ecet përpara me hyrjen e Republikës sonë në Programin e Partneritetit për Paqe, e deri tek anëtarësimi në NATO.
“Osmani dhe ministri i Shtetit Heappey, shprehën vullnetin e përbashkët për vazhdim të bashkëpunimit të shkëlqyer në mes të Kosovës dhe Mbretërisë së Bashkuar në fushën e mbrojtjes dhe sigurisë, si dhe forcimin e mëtutjeshëm të partneritetit në mes të dy vendeve, në frymë të vlerave dhe qëllimeve të përbashkëta”, thuhet në komunikatë.
Presidenti I Federatës së Futbollit të Kosovës Agim Ademi, ka pritur në takim kryetarin e Komunës së Prishtinës, Përparim Rama. Në këtë takim ata kanë diskutuar rreth projektit për ndërtimin e stadiumit të ri në kryeqytet. Ky takim kishte për qëllim koordinimin ndërinstitucional për ndërtimin e këtij stadiumi të rëndësishëm për futbollin kosovar dhe komunitetin e Prishtinës në përgjithësi.
Presidenti Ademi dhe i pari i kryeqytetit u dakorduan për të bashkëpunuar në realizimin e këtij projekti të rëndësishëm për sportin kryeqytetas dhe jo vetëm. Stadiumi i ri, i cili do të ndërtohet në Bërnicë, do të jetë i kategorisë së katërt dhe do t’i plotësojë të gjitha standardet dhe kushtet e nevojshme për organizimin e ndeshjeve ndërkombëtare, përkatësisht të ndeshjeve të ekipit kombëtar dhe klubeve në garat evropiane, njofton KP.
Ky stadium gjithashtu do të jetë një vend i përshtatshëm për organizimin e aktiviteteve tjera sportive dhe eventeve të ndryshme.
Ademi dhe Rama kanë rënë dakord që Federata e Futbollit e Kosovës të ketë përgjegjësinë për menaxhimin e stadiumit të ri, në të njëjtën mënyrë siç ndodh me stadiumin “Fadil Vokrri”. Ata diskutuan po ashtu edhe për mirëmbajtjen e stadiumit ekzistues, gjendjen e fushës dhe organizimin e ndeshjeve kombëtare dhe të ekipeve që garojnë në Evropë.
Kryetari Rama ka shfaqur interesimin e tij për zhvillimin e sportit, veçanërisht futbollit, në kryeqytet, duke e parë atë si sportin më të popullarizuar në Kosovë. Të dy krerët e institucioneve janë zotuar që të krijojnë kushte sa më të mira për sportin në kryeqytet dhe të përkushtohen bashkërisht në organizimin sa më të mirë të klubeve të kryeqytetit.
Gjatë takimit, presidenti Ademi i ka dhuruar kryetarit Rama fanellën e kombëtares së Kosovës dhe e ka falënderuar për gatishmërinë e tij për të kontribuar në zhvillimin e futbollit kosovar. Ata kanë shprehur vullnetin për të nënshkruar Memorandum të Bashkëpunimit në përputhje me praktikën e krijuar me komunat e tjera të Kosovës. Kjo do të ndihmojë në përmirësimin e futbollit kosovar dhe në ngritjen e nivelit të klubeve në kryeqytet.
Në muajin dhjetor të këtij viti në Kosovë do të organizohet për herë të parë Kampionati Evropian i Xhudos.
Në kuadër të këtij organizimi, sot në Kosovë për vizitë qëndroi Preidenti i Federatës Evropiane të Xhudos, Lazlo Toth me ç’rast u nënshkrua edhe memorandumi i bashkëpunimit mes MKRS-së, Federatës Evropiane të Xhudos dhe Federatës së Xhudos të Kosovës.
Më këtë rast ministri i Ministrisë së Kulturës, Rinisë dhe Sportit Hajrulla Çeku tha se përmes këtij kampionati, Kosova do të ketë përfitime direkte në përmirësimin e infrastruktuës dhe përmirësimin e imazhit ndërkombëtar të shtetit të Kosovës.
“Sukseset e xhudistëve të Kosovës nëpër botë janë të mëdha dhe emocionet që na i dhurojnë nëpër gara ka ardhur koha që edhe në shtetin tonë. Më 16 dhjetor sivjet Prishtina për herë të parë do të jetë nikoqire e kampionatit të hapur evropian të xhudos. Pra shteti ynë do ta pres një ngjarje shumë të madhe sportive në bashkëpunim me Federatën e Xhudos së Kosovës dhe me Federatën Evropiane të Xhudos…Përfitimet e Kosovës përmes këtij organizimi do të jenë direkte dhe në shumë aspekte. Përmes kësaj gare po i sjellim të paktën 40 shtete evropiane në Kosovë, po e konsolidojmë imazhin shtetëror në arenën ndërkombëtare, po e përforcojmë përkatësinë dhe identitetin shtetëror dhe po besojmë shumë që kjo ngjarje do të ketë ndikim edhe në përmirësimin e infrastrukturës fizike”, tha Çeku, transmeton KP.
Kryetari i Federatës së Xhudos së Kosovës Agron Kuka tha se kjo do të jetë ngjarja më e madhe që do të zhvillohet në Kosovë në këtë vit, derisa shprehu gatishmërinë që ngjarje të tilla të organizohen edhe viteve të ardhshme në Kosovë.
“Fundi i vitit dhe ngjarja e këtij kampionati do të jetë si një ngjarje më e rëndësishme e vitit 2023 dhe shpresoj 2024 dh vitet në vijim do të jenë vite që do të organizojmë gara të tjera të rëndësishme në kuadër të Federatës Evropiane të Xhudos, por pse jo edhe Federatës Ndërkombëtare të Xhudos,”, tha Kuka.
Presidenti i Federatës Evropianë të Xhudos Lazlo Toth tha se ndihet krenar që Kosova do të jetë organizatore ë këtij kampionati derisa ka lavdëruar xhudistët e Kosovës për sukseset e arritura në garat ndërkombëtare.
“Në emër të Unionit Evropian të Xhudos, fillimisht dëshiroj të përgëzoj Federatën e Xhudos së Kosovës për rezultatet e suksesshme në Olimpiadën e fundit. Ne jemi shumë krenarë për vendin tuaj, një anëtar i Unionit Evropian të Xhudos i suksesshëm në garat ndërkombëtare. Ky është një nënshkrim për organizimin e kampionatit të parë evropian në Kosovë, nën 70 kilogramë dhe nën 57 kilogramë, që do të mbahet më 16 dhjetor. Ky është një nder dhe respekt i madh për Federatën e Xhudos së Kosovës. Jemi shumë të lumtur që mund ta mbajmë këtë garë. Jemi shumë të lumtur që do të përgatitemi bashkërisht për këtë garë, me Federatën e Xhudos së Kosovës, dhe do të doja një falënderim të veçantë për qeverinë dhe një falënderim të veçantë për Ministrinë për mbështetjen.”, tha Toth.
Në Gjykatën Speciale në Hagë ka përfunduar dëgjimi i dëshmitarit të shtatë të Zyrës së Prokurorit të Specializuar(ZPS), në gjykimin ndaj ish-krerëve të Ushtrisë Çlirimtare të Kosovës(UÇK).
Hashim Thaçi, Kadri Veseli, Jakup Krasniqi e Rexhep Selimi, do të dalin para turpit gjykues përsëri më 12 qershor kur pritet të vazhdojë paraqitja e provave nga ana e Prokurorisë, transmeton KP.
Dëshmitari i shtatë i cili mban kodin W-01236, ka dëshmuar nën masa mbrojtëse.
Intervistimi nga prokurori Nathan Quick është bërë në seancë të mbyllur meqë sipas ZPS-së pyetjet lidheshin me një incident të veçantë përmes së cilit mund të identifikohet dëshmitari.
Por, një pjesë e dëshmisë së dhënë për avokatin e viktimave është zhvilluar në seancë të hapur për publikun.
Ndërsa gjatë paradites ka përfunduar dëshmia e dëshmitarit të gjashtë, i cili sikur pesë të tjerë që dëshmuan në këtë çështje, kishte masa mbrojtëse.
Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.
Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.
Situata e favorshme me reshje shiu ka bërë që në tre muajt e parë të vitit, Shqipëria të rrisë prodhimin e energjisë elektrike dhe të shesë 2.4 herë më shumë se në të njëjtën periudhë të vitit të shkuar.
Sipas të dhënave të INSTAT, në muajt Janar-Mars, prodhimi vendas i energjisë elektrike është rritur me 38%, duke arritur vlerën 2.787 GWh nga 2.016 GWh në tremujorin e parë të vitit 2022. Kjo është shoqëruar me rritje të eksportit të energjisë. Gjatë kesaj periudhe, Shqipëria ka shitur 904 GWh nga 373 GWh që eksportoi vjet në po të njëjtën periudhë.
Sa i përket konsumit, nga të dhënat e INSTAT, rezulton se shqiptarët kanë kursyer më shumë energji këtë vit. Përdorimi i energjisë elektrike nga konsumatorët, në tremujorin e parë të vitit 2023, u ul me 10%, shkruan Tv Klan.
Ndikimin më të madh në rënien e përdorimit të energjisë elektrike, e kanë dhënë konsumatorët jo familjarë, ku përfshihen institucionet publike dhe bizneset. 57,9 % e energjisë në vend prodhohet nga hidrocentralet publike, 41,5 % nga hidrocentralet private dhe koncensionare, ndërsa 0,6% nga fotovoltaikët.
Fshati Leskovec gjendet vetëm 15 minuta larg Prizrenit, pranë kufirit me Shqipërinë, e që dikur ishte fshati i vetëm i banuar me shqiptarë në atë anë.
Ky fshat numëronte rreth 30 shtëpi, ndërsa braktisja e tij kishte filluar qysh prej vitit 1990. Ndërsa sot, vetëm cicërimat e zogjve i japin pakëz jetë këtij fshati të lënë në harresë.
Disa shtëpi të ndërtuara prej guri dhe balte, e të cilat e i rezistuan kohës, e karakterizojnë më së miri fshatin Leskovec.
Lekovec mbetet një vend tjetër i Kosovës i rrethuar me bukuri të pashfrytëzuara natyrore. /atvlive.tv
