ATV

Blog

  • Asamblistët e PDK-së në Vushtrri i kërkojnë kryetarit kthimin e Limajt

    Asamblistët e PDK-së në Vushtrri i kërkojnë kryetarit kthimin e Limajt

    Asamblistët e Partisë Demokratike të Kosovës në Kuvendin Komunal në Vushtrri kanë kërkuar zyrtarisht rikthimin e Fatmir Limajt.

    Në një letër drejtuar kreut të subjektit politik, Bedri Hamza dhe kryesisë së PDK-së, tetë të zgjedhurit nga qytetarët e Vushtrrisë janë shprehur të bindur se bashkimi me Limajn do t’i forconte.

    Kjo kërkesë të cilën e ka siguruar gazetarja e Klan Kosovës, Qëndresa Tërshani, është dërguar sot në Partinë Demokratike, raporton Klankosova.tv

    Ky grup i asamblistëve konsideron se përfshirja e Limajt në listën e PDK-së për zgjedhjet e 7 qershorit, është domosdoshmëri politike dhe jo çështje individuale.

    Ndryshe, kryesia e kësaj partie, pritet të mblidhet sot, ku do të diskutojë rreth përgatitjeve për procesin zgjedhor.

    Takimi do të nisë me fillim nga ora 16:00 dhe pritet të ngritet si çështje diskutimi edhe kthimi i Limajt, por nuk dihet nëse do të shqyrtohet kjo temë.

  • Nesër varroset Rifat Stojkaj, sekretari i AAK-së në Deçan

    Nesër varroset Rifat Stojkaj, sekretari i AAK-së në Deçan

    Nesër do të varroset Rifat Stojkaj, drejtori i Bujqësisë në komunën e Deçan.

    35-vjeçari vdiq pas një aksidenti të trafikut, duke lënë të pikëlluar përgjithmonë familjarët e tij.

    Sipas njoftimit të familjarëve, ceremonia e varrimit do të mbahet të martën nga ora 17:00 në varrezat e Lloqan.

    Ndërsa komuna e Deçan do të organizojë mbledhje komemorative nga ora 15:00 në sallën e Kuvendit të Komunës.

  • Alvaro Arbeloa në qendër të kritikave pas statistikave të dobëta te Real Madrid

    Alvaro Arbeloa në qendër të kritikave pas statistikave të dobëta te Real Madrid

    Trajneri Alvaro Arbeloa është vënë në qendër të vëmendjes pas një serie rezultatesh zhgënjyese në stolin e Real Madridit, duke ndezur debat te tifozët dhe analistët.

    Ish-mbrojtësi legjendar, tashmë trajner, ka regjistruar raportin më të lartë të humbjeve për çdo trajner të Real Madridit në shekullin 21, për sa kohë që ka drejtuar të paktën 20 ndeshje. Arbeloa ka humbur 8 ndeshje nga 25, ose 32% të takimeve zyrtare, një shifër që e vendos atë në një pozitë të vështirë krahasuar me paraardhësit e tij modernë.

    Edhe pse shumë trajnerë të tjerë kanë kaluar periudha të vështira nën presionin e madh të “Santiago Bernabeu”, askush nuk ka arritur këtë nivel humbjesh kaq shpejt në karrierën e tij si trajner i ekipit të parë. Për një klub që kërkon fitore të vazhdueshme, këto shifra kanë hapur diskutime të ashpra mbi qasjen taktike të Arbeloas dhe përshtatshmërinë e tij afatgjatë për këtë rol.

    Sipas raporteve, Arbeloa pritet të shkarkohet sapo të përfundojë sezoni, ndërsa rikthimi i Jose Mourinhos shihet si gjasa më e mundshme për stolin e Real Madridit.

  • Përgatitjet për zgjedhje: PDK mblidhet sot

    Përgatitjet për zgjedhje: PDK mblidhet sot

    Zgjedhjet e jashtëzakonshme po afrohen, ndërsa Partia Demokratike e Kosovës pritet të mblidhet sot për të diskutuar përgatitjet për to.

    Takimi është planifikuar të nisë në orën 16:00, dhe në të pritet të trajtohet edhe çështja e mundshme e rikthimit të Fatmir Limajt në këtë subjekt politik.

    Kthimi i “Çelikut” në Partinë Demokratike po konsiderohet ndër çështjet kryesore politike brenda PDK-së.

    Situata është nxitur pas një letre që Fatmir Limaj i ka dërguar kryetarit të kësaj partie, Bedri Hamza, të premten, ku ai ka kërkuar që të përfshihet në listën e kandidatëve për deputetë pa kushte.

    Kthimin e tij në këtë parti e kanë kërkuar edhe disa figura të njohura të këtij subjekti.

    Ish-deputeti i PDK-së, Mërgim Lushtaku përmes një postimi sot në Facebook, tha se po të varej nga ai, Fatmir Limaj do të duhej të ishte pjesë e kësaj partie, megjithatë kjo, siç tha ai, pritet të vendoset në mbledhjen e kryesisë së këtij subjekti politik.

  • Kosova zhvillon dy ndeshje miqësore përgatitore para Ligës së Kombeve kundër Çekisë dhe Andorrës

    Kosova zhvillon dy ndeshje miqësore përgatitore para Ligës së Kombeve kundër Çekisë dhe Andorrës

    Kombëtarja e Kosovës do të zhvillojë dy ndeshje miqësore gjatë muajit qershor, si përgatitje për edicionin e ri të Ligës së Kombeve, ku do të garojë në Ligën B.

    Dardanët do të përballen fillimisht me Kombëtaren e Çekisë, më 31 maj, në stadiumin “Epet Arena” në Pragë. Kjo ndeshje pritet të jetë një test i rëndësishëm për ekipin e drejtuar nga përzgjedhësi Franco Foda, përballë një kundërshtari cilësor evropian. Çekia siguroi pjesëmarrjen në Botërorin 2026, duke mposhtur Danimarkën pas penalltive në play-off-in evropian, dhe aktualisht renditet e 41-ta në ranglistën e FIFA-s.

    Kosova dhe Çekia janë përballur dy herë më parë në kuadër të kualifikimeve për Euro 2020: më 7 shtator 2019, Kosova fitoi 2:1 në “Fadil Vokrri”, ndërsa më 14 nëntor 2019, në Plzen, humbi po 2:1.

    Ndeshja e dytë miqësore e Dardanëve do të zhvillohet më 7 qershor kundër Andorrës, në stadiumin “Fadil Vokrri” në Prishtinë. Kosova dhe Andorra janë përballur dy herë në kualifikimet për Euro 2024, duke barazuar 1:1 në Prishtinë dhe duke fituar 3:0 në Andorra La Vella.

    Këto dy ndeshje do t’i shërbejnë stafit teknik për të vazhduar ndërtimin e skuadrës për takimet garuese të Ligës B, ku Kosova bën pjesë në Grupin B3 me Austrinë, Izraelin dhe Irlandën. Dardanët do të grumbullohen në hotel “Emerald” më 27 maj.

  • E tmerrshme: Nxënësit shkatërrojnë klasën në një shkollë në Bulqizë

    E tmerrshme: Nxënësit shkatërrojnë klasën në një shkollë në Bulqizë

    Një ngjarje e rëndë është regjistruar në ambientet e Shkollës së Mesme të Bashkuar “Asllan Keta” në Bulqizë, ku gjatë natës është shkatërruar klasa e katërt e kësaj shkolle.

    Ngjarja është konstatuar mëngjesin e sotëm, në momentin kur stafi pedagogjik dhe nxënësit janë paraqitur për të nisur procesin mësimor.

    Sipas burimeve të Top Channel pranë drejtorisë së shkollës, pamjet e para kanë qenë tronditëse. Bankat dhe karriget janë gjetur të dëmtuara, materialet mësimore të shpërndara në dysheme, ndërsa muret dhe pajisjet e klasës kanë pësuar dëmtime të konsiderueshme.

    Menjëherë pas konstatimit të ngjarjes, drejtoria ka njoftuar Policinë, e cila ka mbërritur në vendngjarje për të kryer veprimet e para hetimore.

    Nga verifikimet paraprake dhe këqyrja e kamerave të sigurisë, mësohet se në ambientet e shkollës janë futur disa fëmijë, aktualisht nxënës të kësaj shkolle.

    Ata dyshohet se kanë hyrë nga pjesa e pasme e godinës, duke shmangur hyrjen kryesore. Pamjet filmike janë sekuestruar nga grupi hetimor dhe po analizohen për të zbardhur plotësisht dinamikën e ngjarjes dhe përgjegjësit konkretë.

    Ndërkohë, Policia ka shoqëruar disa nxënës dhe prindër të tyre për t’i marrë në pyetje lidhur me këtë akt vandalizmi.

    Burime pranë hetuesve bëjnë me dije se po punohet për të kuptuar motivet e kësaj ngjarjeje, si dhe nëse kanë qenë të përfshirë edhe persona të tjerë.

    Ngjarja ka shkaktuar reagime të shumta në qytet. Jashtë kamerave, nxënës, prindër dhe banorë të zonës e kanë dënuar ashpër këtë veprim, duke e cilësuar si një akt të papranueshëm që dëmton jo vetëm ambientet shkollore, por edhe vetë komunitetin.

    Ata kanë kërkuar më shumë kujdes dhe përgjegjësi nga të rinjtë, si dhe forcim të masave të sigurisë në institucionet arsimore.

    Drejtoria e shkollës pritet të marrë masa për rikthimin sa më të shpejtë të normalitetit në klasën e dëmtuar, ndërsa hetimet e Policisë vijojnë për dokumentimin e plotë të kësaj ngjarjeje.

  • Hansi Flick: “Jam jashtëzakonisht krenar pas fitores historike ndaj Real Madrid”

    Hansi Flick: “Jam jashtëzakonisht krenar pas fitores historike ndaj Real Madrid”

    Trajneri i Barcelonës, Hansi Flick, ka shprehur emocionin dhe krenarinë e tij pas triumfit të madh të skuadrës në La Liga, të siguruar me fitoren ndaj Real Madrid në El Clasico në Camp Nou.

    “Nuk do ta harroj kurrë këtë moment. Ekipi im është fantastik dhe jam shumë i kënaqur. Jam jashtëzakonisht krenar për lojtarët e mi”, tha Flick pas vërshëllimës së fundit. Ai vlerësoi edhe atmosferën e krijuar nga tifozët dhe rëndësinë e fitores ndaj rivalit historik:

    “Është emocionuese të luash me tifozët në një El Clasico dhe të mposhtësh Real Madridin”, shtoi trajneri gjerman.

    Flick theksoi edhe paraqitjen taktike dhe disiplinën e skuadrës gjatë ndeshjes: “Luajtëm shumë mirë, u mbrojtëm shumë mirë dhe shënuam dy gola të mrekullueshëm.”

    Ai nuk harroi të falënderojë të gjithë ata që kontribuan në suksesin e klubit: “Dua të falënderoj skuadrën, presidentin dhe të gjithë njerëzit që na kanë mbështetur. Jam shumë krenar që kam një ekip kaq të mirë. Faleminderit për gatishmërinë për të luftuar në çdo ndeshje. E vlerësoj shumë. Duhet të festojmë. Visca el Barça dhe Visca Catalunya.”

  • Mikel Arteta lavdëron gjyqtarin pas anulimit të golit të West Hamit: “Vendim i guximshëm”

    Mikel Arteta lavdëron gjyqtarin pas anulimit të golit të West Hamit: “Vendim i guximshëm”

    Trajneri i Arsenalit, Mikel Arteta, ka lavdëruar gjyqtarin Chris Kavanagh për vendimin “të guximshëm” që mori duke anuluar golin e vonshëm të West Hamit në fitoren 1-0 të ekipit të tij të dielën.

    Arsenali mori kryesimin me pesë pikë në Ligën Premier pas triumfit minimal në “London Stadium”, ku Leandro Trossard shënoi golin vendimtar ndaj “Çekanëve”, të cilët po luftojnë për mbijetesë. Ndeshja u tensionua në minutat e fundit, kur Callum Wilson mendoi se kishte barazuar rezultatin në minutën e 95-të. Pas një kontrolli të gjatë nga VAR-i, goli u anulua për shkak të një faulli ndaj portierit David Raya nga Pablo gjatë krosimit nga këndi.

    “Me siguri do ta kujtoj këtë ditë. E dinim që do të ishte një ditë e vështirë, ata po luftojnë për mbijetesë, ndërsa ne po përpiqemi të fitojmë Ligën Premier”, tha Arteta.

    Trajneri shtoi: “E nisëm ndeshjen shumë mirë dhe patëm tri raste të mëdha. Pastaj erdhi lëndimi i Ben White, u desh të bënim një ndryshim dhe të përshtatemi. Hodhëm gjithçka që kishim për ta fituar. U shpërblyem për atë guxim. Pastaj janë dy aksione, një me David Raya. Ai bën një pritje të pabesueshme, dhe pastaj polemika rreth golit të anuluar, që padyshim është një vendim i madh.”

    “Kur kam pasur nevojë të jem kritik, kam qenë. Por duhet t’i përgëzoj ata (gjyqtarët). Duhet shumë guxim për të dalë dhe për t’i dhënë mundësinë gjyqtarit ta shikojë aksionin. Kur e sheh pamjen, nuk ka asnjë dyshim, është faull i pastër. Ata ishin shumë të guximshëm. Aksioni e meritonte këtë. Sipas mendimit tim, është shumë e qartë. Këto janë rregullat dhe ne kërkojmë vazhdimësi.”

  • Galatasaray befasoi Arsenalin dhe Evropën me transferimin e Victor Osimhenit

    Galatasaray befasoi Arsenalin dhe Evropën me transferimin e Victor Osimhenit

    Nënpresidenti i Galatasarayt, Abdullah Kavukcu, ka zbuluar se drejtori sportiv i Arsenalit, Andrea Berta, mbeti i “habitur” nga përmasat financiare të transferimit të përhershëm të Victor Osimhenit në Stamboll.

    Kampionët e Turqisë siguruan sulmuesin pas aktivizimit të klauzolës së lirimit prej 75 milionë eurosh nga Napoli, ndërsa paketa totale e marrëveshjes arrin rreth 159 milionë euro për katër vite. Kavukcu theksoi se ambiciet e klubit janë në nivel me elitën evropiane, duke nënvizuar se edhe me buxhetin prej 800 milionë eurosh të Arsenalit, londinezët u befasuan nga aftësia e Galatasarayt për të financuar pagën vjetore prej 15 milionë eurosh të Osimhenit dhe të drejtat fitimprurëse të imazhit.

    “Nuk do ta shisja për 150 milionë euro. Transferimi i Osimhenit na ka sjellë shumë; kemi korrur frytet e ambicies sonë”, u shpreh Kavukcu.

    Investimi po jep rezultate si jashtë, ashtu edhe brenda fushës. Në aspektin komercial, sulmuesi pritet të gjenerojë rreth 22 milionë euro të ardhura, përfshirë 6 milionë euro vetëm nga marrëveshjet e reklamimit.

    Ndërkohë, në fushë ndikimi i Osimhenit po mbetet vendimtar: dopieta e tij të shtunën udhëhoqi Galatasarayn drejt një fitoreje me përmbysje 4-2 ndaj Antalyasporit, duke siguruar titullin e katërt radhazi në Superligën Turke.

  • Helen Fraser dëshmon në gjykimin ndaj Thaçit dhe tjerëve kundër administrimit të drejtësisë

    Helen Fraser dëshmon në gjykimin ndaj Thaçit dhe tjerëve kundër administrimit të drejtësisë

    Në gjykimin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të cilët akuzohen për vepra penale kundër administrimit të drejtësisë, të hënën po dëgjohet dëshmitarja Helen Fraser.

    Fraser tha se është kërkuese në linguistikën forenzike dhe se aktualisht punon në Universitetin e Melbournit në Australi, raporton “Betimi për Drejtësi“.

    Dëshmitarja tha se në fushën e transkripteve forenzike punon tash e reth 23 vite.

    Me pyetje për dëshmitaren po vazhdon mbrojtësja e Thaçit, Sophie Menegon.

    Fraser konfirmoi se ajo ka shkruar raportin e 27 marsit 2026.

    Si eksperte, tha se ka dhënë akt-ekspertiza në çështje penale, veçanërisht në Australi. Tha se ka shkruar raporte për shumë vite, për rreth 100 çështje gjyqësore.

    Ajo shtoi se ka dhënë disa herë dëshmi në gjykatë, duke shtuar se konstatimet e saj janë marrë për bazë në gjykatat.

    Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që iu vihen në barrë.

    Po atë ditë (27 shkurt 2026), nisi dëshminë edhe dëshmitari i parë në këtë çështje gjyqësore, i cili ishte me masa mbrojtëse. Dëshmia e tij përfundoi më 2 mars 2026.

    Më 3 dhe 4 mars 2026 dëshmoi dëshmitari i dytë Koen Herlaar- ekspert i kriminalistikës në Institutin e Kriminalistikës së Holandës. Po më 4 mars nisi dëshminë dëshmitari i tretë, Chrisopher Kelly- hetues i forenzikës digjitale. Ky dëshmitar e përfundoi dëshminë më 5 mars.

    Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.

    Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

    Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

    Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.

    Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe FahriFazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

    Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

    Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

    Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.

    Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.

    Nis seanca ndaj Thaçit dhe të tjerëve kundër administrimit të drejtësisë