Isidor Stefanoviq nga Nisma Liberale Demokratike në Vrajë ka akuzuar shërbimin sekret serb dhe rus se qëndrojnë prapa trazirave në Veri të Kosovës.
“E gjitha është skenar i BIA-së dhe FSB-së ruse” ka thënë Stefanoviq.
Stefanoviq thotë se Vuçiq po provokon luftë në Kosovë.
“Këta ( serbët e dhunshëm në veri) janë po të njëjtit që ushtruan dhunë kundër popullit në Beograd. Vuçiq po provokon luftë në Kosovë” ka shtuar Stefanoviq.
Ish-kryenegociatorja e Kosovës në dialogun Kosovë-Serbi, Edita Tahiri, ka reaguar pas zhvillimeve të ditës së hënë në veri.
Ajo tha se dhuna në veri e presidentit të Serbisë Aleksandar Vuçiq dhe njerëzve të tij, ka një skenar.
Sipas Tahirit, synimi i Vuçiqit janë Trepça dhe Ujmani.
“Skenari i tij është që asociacioni të ketë kompetenca ekzekutive mbi pasuritë minerale dhe ujin në veri”, tha ajo.
Ish-negociatorja theksoi se Serbia vazhdimisht ka pasur tendenca ndaj këtyre dy resurseve të Kosovës.
“Gjatë shtatë viteve të negociatave në Bruksel, kur isha kryenegociatore Serbia ka shfaqur vazhdimisht tendenca ndaj këtyre pasurive strategjike dhe gjeopolitike të Kosovës, por nuk i kam lënë ta hapin gojën!”, theksoi Tahiri.
Mediumi publik gjerman ka transmetuar një artikull për grupin e Veljko Belivuk nën titullin “Huliganë, klane droge dhe presidenti i Serbisë”.
Në artikull janë analizuar edhe lidhjet që grupi i Belivuk-ut ka pasur në vend dhe për këtë ka folur edhe redaktori i rrjetit serb të gazetarisë hulumtues, KRIK, Stevan Dojçinoviq me kolegët e tij nga Gjermania.
Teksti i plotë i mediumit publik gjerman, ARD:
Një gjyq në Beograd e mban publikun e Serbisë pezull: Bëhet fjalë për huliganë që punojnë për klane të fuqishme të drogës dhe kryejnë vrasje brutale. Lidhjet e tilla arrijnë deri në majat e shtetit serb.
Automjetet e zeza të policisë me drita ndezëse vërshojnë përpara Gjykatës së Krimit të Organizuar në Beograd. Të akuzuarit futen në ndërtesë përmes hyrjes së pasme. Janë 31 burra të akuzuar, ndër të tjera, për vrasje, posedim droge, rrëmbim dhe tregti armësh. Në sallën e gjyqit, ata ulen pas xhamit të sigurisë, vetëm sa një krah larg vizitorëve: trupa muskulore me qafë si demi, koka tullac, tatuazhe. Kreu i bandës është Veljko Belivuk, lider huligan i Partizanit të Beogradit, një klub i njohur për një bllok agresiv tifozësh me lidhje të thella me krimin e organizuar. Krimet për të cilat ata akuzohen dyshohet se janë bërë pjesë e një klani droge me rrënjë në Malin e Zi. Ky klan ka vite që bën një luftë të përgjakshme me klane të tjera – me një sërë vrasjesh jo vetëm në Serbi, por në disa vende evropiane.
Vrasje brutale
Huliganët e Partizanit janë ndër më brutalët në Europë. Stadiumi shërben si qendër droge dhe vend rekrutimi për anëtarët e rinj të bandës. Tani ata akuzohen për disa vrasje shtazore. Kur shërbimi i koduar i lajmeve Sky ECC u dekodua nga hetuesit ndërkombëtarë në fillim të vitit 2021, ata hasën në foto të tmerrshme të kufomave të gjymtuara. Gjurma të çon në një shtëpi në një fshat jashtë Beogradit me një dhomë të fshehur që mund të arrihet vetëm përmes një vrime në mur. Në të, ndër të tjera, një mulli mishi, përmes së cilës kriminelët kthenin kufomat për t’i asgjësuar më pas.
Punojnë për Presidentin
Gjyqi në Beograd tani po nxjerr në dritë lidhjet e këtij grupi me politikën. Gazetari investigativ Stevan Dojçinoviq ka ndjekur gjyqin kundër klanit që në fillim. Belivuk shpjegoi në proces “se roli i tij ishte të mbështeste demonstratat për (presidentin serb Aleksandar) Vuçiq dhe të prishte protestat e opozitës,” thotë Dojçinoviq. Ai renditi favoret politike që Vuçiqi i kërkoi të bënte”.
Oficer policie si drejtues klani
Rolin kryesor ndoshta e ka luajtur edhe polici Nenad Vuçkoviq, një tjetër përfaqësues kryesor i huliganëve. Ai shihet në një foto me vrasësin e dyshuar të shumëfishtë Belivuk. Mirëpo polici nuk e ka kontrolluar vetëm grupin, gjithçka ka shkuar shumë më lart, sipas Dojçinoviqit. Në një komunikim të zbuluar mes Belivuk dhe policit, të cilin e disponon ARD, Belivuk shkruan se nuk ka frikë nga askush dhe është gati. Polici më pas përgjigjet se ai e di këtë, e di edhe “bosi”, siç e di edhe “bosi i madh”, Dojçinoviqit e ka të qartë se “boss” do të thotë ish-ministri i brendshëm dhe “boss i madh” do të thotë presidenti Vuçiq. Kërkimet e ARD-së drejtuar kreut të shtetit mbetën pa përgjigje. Vuçiq gjithashtu nuk ka dashur të komentojë mbi akuzat ndaj djalit të tij Danilo. Në një foto, Danilo Vuçiq pozon në një përqafim të ngushtë me një të besuar të Belivuk, të cilin policia e liston si anëtar të klanit.
Anëtarët e bandës kundër protestuesve
Gazetarja Brankica Stankoviq e njeh mirë skenën. Politikanët përfitojnë nga skena e huliganëve që funksionon mirë, ajo thotë: “Janë të organizuar dhe shumë të aftë për çdo abuzim. Ata kthehen në hordhi të zemëruara që i nënshtrohen çdo thirrjeje nga strukturat e pushtetit, pavarësisht se çfarë është në rendin e ditës.” Në inaugurimin e Vuçiqit në vitin 2017, për shembull, protestuesit u larguan nga personeli i dhunshëm i sigurisë. Njëri prej personave është identifikuar si pjesë e bandës Belivuk.
“Duhet të flas për përfshirjen me shtetin”
Stankoviq ka hulumtuar skenën e huliganit që nga viti 2009 dhe tregon lidhjet me krimin e organizuar. Në stadium, ajo bëhet një figurë e urrejtjes. Në një ndeshje të Partizanit kundër Shakhtar Donetsk, tifozët abuzuan me një kukull Brankica, duke brohoritur e quanin kurvë dhe e kërcënuan me vdekje. Që atëherë ajo ka jetuar nën mbrojtjen e policisë. Kjo i ndryshoi jetën në një mënyrë thuajse të paimagjinueshme, thotë Brankica: “Jeta e përditshme është tepër e ndërlikuar dhe e rëndë. Unë nuk dilja jashtë. Për një kohë, 70 policë u kujdesën për sigurinë time. Kjo ishte një herë kur policia gjoja zbuloi se një pushkë snajper ishte blerë në vendngjarje për të më vrarë mua.”
Ajo mendon se çështja e madhe gjyqësore kundër bandës së Belivuk është e rëndësishme.
Megjithatë, Stankoviq është i bindur se asgjë nuk do të ndryshojë nëse nuk zbulohen strukturat që qëndrojnë pas saj dhe në fund nuk flitet për ngatërresat me shtetin. Vrasjet shtazarake tani janë duke u proceduar. Të akuzuarit janë huliganë, bosët e botës së krimit serb.
Protestuesit serbë që janë mbledhur përpara komunës së Zubin Potokut kanë vendosur flamurin serb në një shtyllë pranë komunës.
Kështu tregojnë pamjet e publikuara nga Kontakt Plus.
Pak më herët, policia e Kosovës ka hequr flamurin e Kosovës nga hyrja e objektit të komunës dhe e ka vendosur një kat më lartë.
Në anën tjetër, protestat e qytetarëve serbë në komunat veriore po vazhdojnë edhe sot.
Ish-kryeministri suedez, Carl Bildt ka reaguar pas publikimit të pamjeve nga veriu, ku shihet derisa protestuesit serbë ushtrojnë dhunë mbi ushtarët e KFOR-it, duke lënë dhjetëra prej tyre të lënduar rëndë.
Bildt ka thënë se pamjet e djeshme janë më të rëndat për shumë vite.
“Kjo është më e rënda që është parë në Kosovë për shumë vite. Militantët serbë në veri të Kosovës sulmojnë forcat e NATO-s dhe lëndojnë dhjetë prej tyre. Cikli i eskalimit duhet të ndërpritet me shpejtësi”, ka thënë Bildt.
This is the worst that’s been seen in 🇽🇰 for many years. Serb militants in northern 🇽🇰 attack Nato forces and wound eleven of them. The cycle of escalation must be broken quickly! pic.twitter.com/JltZXL4k6Y
— Carl Bildt (@carlbildt) May 29, 2023
Ngjarjet e djeshme në Kosovë, të cilat u paralajmëruan disa orë më parë, janë pa dyshim, si shumë herë më parë, plotësisht në përputhje me skenarin propagandistik ruso-serb.
Kush i hapi titujt e portaleve ruse mëngjesin e djeshëm, të cilat u raportuan me nxitim nga mediat serbe të afërt Aleksandar Vuçiqit, mund t’i kishte marrë me mend ngjarjet e pasdites, shkruan Geopost.
Duke folur nga Afrika e Largët në Kenia, ministri i Jashtëm rus, Sergei Lavrov paralajmëroi se për shkak të situatës në Kosovë po përgatitet një “Shpërthim i madh ” në Evropë.
“Situata rreth përshkallëzimit të fundit të konfliktit mes Serbisë dhe Kosovës është alarmante, duket se në qendër të Evropës është duke u përgatitur një ‘Shpërthim i madh’”, tha Lavrov nga Nairobi.
Por Perëndimi, vazhdoi Lavrov, është angazhuar në vartësi të plotë të të gjithë atyre që shprehin disi mendimin e tyre.
“Kjo nënvizon edhe një herë nevojën për një zgjidhje gjeopolitike që do të siguronte, nëse po flasim për Evropën, siguri të barabartë të pandashme për të gjitha shtetet dhe që do të thoshte se asnjë bllok, përfshirë NATO-n, nuk ka të drejtë të kërkojë dominim në këtë pjesë të planetit,” tha Lavrov.
Ministri serb i Mbrojtjes, Millosh Vuçeviq, raportoi të dielën se tensionet në Kosovë kishin arritur maksimumin dhe mund të rezultojnë në një konflikt të armatosur.
Një agjenci e afërt me Kremlinin përsëriti se “Këshilli i Sigurisë Kombëtare i Serbisë njoftoi të shtunën se kontingjenti i NATO-s në Kosovë, KFOR, nuk ka vepruar në përputhje me autoritetin e tij të përcaktuar në Rezolutën 1244 të Këshillit të Sigurimit” dhe se të premten presidenti serb e vendosi ushtrinë në gjendjen e gatishmërisë maksimale luftarake për shkak të situatës në Kosovë dhe për shkak “hapave të njëanshëm të ndërmarrë nga Prishtina”.
Që nga e premtja, serbët në veri të Kosovës janë duke protestuar kundër kryetarëve të rinj të dalë nga zgjedhjet e 23 prillit.
Dje (e hënë), protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve. Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave, duke e djegur tërësisht veturën e një televizioni.
Si pasojë e protestave të dhunshme një ditë më parë, u plagosën 30 ushtarë të KFOR-it.
Nga Steve Taylor/ “Psychology Today”
Disa vite më parë shkrova një artikull me titull “Sindroma e Abdikimit”, në të cilin u përpoqa të shpjegoja fuqinë e disa udhëheqësve të kulteve fetare, guru-ve të korruptuar dhe udhëheqësve politikë mbi ndjekësit e tyre, shkruan Steve Taylog për “Psychology Today”.
Këta të fundit heqin dorë nga përgjegjësia për jetën e tyre, nga vullneti i tyre, dhe ofrojnë njëpërkushtim të pakushtëzuar ndaj udhëheqësve. Ata u binden urdhrave të tyre, pa e vrarëmendjen mbi pasojat, sikur të jenë gati të hipnotizuar.
Pavarësisht se sa keq sillen liderët, ndjekësit e tyre gjithmonë gjejnë një justifikim, për të ruajtur imazhin e pagabueshmërisë që kanë ndaj tyre. Unë argumentoj se kjo “Sindromë e Abdikimit” buron nga dëshira e pavetëdijshme e disa njerëzve për t’u rikthyer në gjendjen e fëmijërisë së hershme, kur prindërit e tyre ishin figura të pagabueshme, të plotfuqishëm, që e kontrollonin jetën e tyre dhe i mbronin nga bota.
Ata po përpiqen që ta ringjallin atë gjendje fëmijërie të përkushtimit dhe papërgjegjshmërisë së pakushtëzuar. Për ta nuk ka nevojë që të mendojnë vetë, sepse udhëheqësi i tyre i di të gjitha përgjigjet. Nuk ka nevojë që të shqetësohen për asgjë, sepse mësuesi do të sigurojë gjithçka që u nevojitet.
Ata nuk ndihen më të pasigurt, të paplotë apo të hutuar. Ata thjesht shijojnë dashurinë dhe mbrojtjen e mësuesit, siç bënin dikur me prindërit e tyre. Në librin tim të ri “DisConnected”, e përshkruaj me detaje të reja “Sindromën e Abdikimit”. Ndër të tjera shpjegoj se sindroma është aq shumë e fuqishme, sa që çon në një gjendje specifike të ndryshuar të ndërgjegjes, ose siç mund ta quajmë ne, në një gjendje të abdikuar të vetëdijes.
Një herë bisedova me një mësues shpirtëror (guru) të njohur. Meqë mbërrita më herët sesa orari i takimit, u enda nëpër selinë e tij duke parë librat dhe objektet e tjera të qendrës. Bisedova edhe me një nga ndjekësit e mësuesit, i cili më shqetësoi paksa me shikimin e tij të zbrazët dhe admirimin fëmijëror që kishte ndaj mësuesit të tij.
“Ai është njësh! Është gjithçka që kam kërkuar. Që kur e ndjek atë gjithçka ka shkuar shumë mirë në jetën time”- më tha plot entuziazëm. M’u kujtua se e kisha ndeshur edhe më herët atëlloj shikimi të zbrazët. Disa vite më parë, një e njohura ime më ftoi mua dhe të dashurën time të merrnim pjesë në një seminar të grupit të saj shpirtëror.
E kuptova menjëherë se ajo gjë nuk ishte për mua. U zhgënjeva nga nderimi i madh që ata treguan për mësuesin e tyre (që në fakt nuk ishte i pranishëm). Sa herë që përmendnin emrin e tij, një buzëqeshje e madhe shfaqej në fytyrat e tyre, tamam si adoleshentë të dashuruar.
Po ashtu, unë u habita jo pak nga cilësia e dobët e mësimeve, të cilat ishin kryesisht jo koherente dhe plot klishe. Por ajo që më shqetësoi më shumë, ishte shikimi i zbrazët i secilit prej tyre. Çdokush, miqtë apo të afërmit e atij që i është bashkuar një kulti, do ta njohë këtë shikim të ngjashëm me ekstazën.
Siç vuri në dukje një ish–pjesëtar i Kishës së Unifikimit për anëtarët e grupit:”Ata të gjithë kishin sy të qelqtë, si dy vezë, që hapeshin aq shumë saqë dukej sikur bebëzat do u pëlcisnin”. Në fakt, ky shikim “me sy të qelqtë” është investiguar nga studiuesit.
Sociologu Benjamin Zablocki e përshkroi këtë “vështrim të zymtë, të tërhequr” – së bashku me një buzëqeshje të frikshme të ngrirë – si një shenjë klasike të shpëlarjes së trurit apo “nënshtrimit konjitiv ekstrem”. Sociologu tjetër Mark Galanter, besonte se “vështrimi i qelqtë” ka një efekt izolues. Ai përcakton kufijtë e grupit dhe i largon të huajt.
Por nga këndvështrimi im, shikimi me “sy të qelqtë” është një shenjë e sigurt e “Sindromës së Abdikimit”. Ai është vështrimi i njerëzve që kanë hequr dorë nga përgjegjësia për jetën e tyre dhe janë kthyer në gjendjen e përkushtimit si fëmijë ndaj një figure atërore.
Kjo gjendje e abdikuar e ndërgjegjes është e ngjashme me hipnozën. Tek e fundit, tipari thelbësor i hipnozës, është se një person heq dorë nga vullneti i tij dhe e lejon hipnotizuesin të marrë përsipër “funksionet ekzekutive” të mendjes, të cilat menaxhojnë sjelljen tonë dhe kontrollojnë vendimet dhe emocionet tona.
Unë jam pak ngurrues për të përdorur termin “shpëlarje truri” në këtë kontekst, pasi kjo nënkupton se anëtarët e kultit janë viktima të pafajshme të liderëve keqdashës. Në librin tim të ri, unë sugjeroj që udhëheqësit e kultit, gurutë e korruptuar dhe udhëheqësit politikë autoritarë janë personalitete “që nxitin një shkëputje të madhe nga bota” dhe që dëshirojnë pushtet dhe admirim.
Ashtu si me hipnozën – kur një subjekt e lejon hipnotizuesin të marrë përsipër vullnetin e tij Sindroma e Abdikimit është (të paktën në fillim) një marrëveshje midis ndjekësit dhe udhëheqësit. Ndjekësi ka një nevojë psikologjike për të adhuruar dikë, ndërsa udhëheqësi ka nevojë psikologjike për t’u adhuruar.
Është një marrëveshje midis një personi që dëshiron të marrë rolin e fëmijës dhe një personi që dëshiron të marrë rolin e prindit. Sindroma e Abdikimit nuk sjell një përfundim të mirë. Ashtu si të gjitha marrëdhëniet toksike, marrëdhënia midis liderëve autoritarë dhe ndjekësve të tyre të nënshtruar, është e dënuar të shkojë keq që në fillim.
Sepse ajo bazohet në patologji nga të dyja anët:hiper–ndikim e liderëve, dhe pasiguria dhe papjekuri psikologjike e ndjekësve të tyre. Po ashtu, është një marrëdhënie shumë e paqëndrueshme, për shkak të hendekut gjigant midis liderit (me bashkëpunëtorët e tij) dhe ndjekësve të tij të nënshtruar. Çdo patokraci – në formën e një kulti ose një qeverisje – çon në mënyrë të pashmangshme drejt konfliktit, kaosit dhe vetë-shkatërrimit.
Situata e sigurisë në Zveçan, Leposaviq dhe Zubin Potok mëngjesin e së martës është e qetë, thanë nga Policia e Kosovës.
Edhe sot serbët lokalë kanë vazhduar me protesta.
Situata është e qetë dhe aktualisht nuk ka ndonjë incident të shënuar.
“Nuk kemi ndonjë incident që e kemi regjistruar. Policia është duke i kryer detyrat e veta sipas angazhimeve që i ka”, tha për REL, Veton Elshani nga Policia e Kosovës.
Ai tha se zyrtarët policorë po vazhdojnë të qëndrojnë pranë tri ndërtesave komunale në veri të Kosovës.
Më 29 maj, protestuesit serbë u përleshën në Zveçan me forcat paqeruajtëse të KFOR-it.
Si pasojë e përleshjeve, të paktën 25 pjesëtarë të KFOR-it janë lënduar, sikurse edhe disa protestues.
Serbët lokalë po kundërshtojnë hyrjen në komuna të kryetarëve të rinj shqiptarë të zgjedhur në zgjedhjet e 23 prillit. Ata po ashtu po kërkojnë që njësitë speciale të Policisë së Kosovës të tërhiqen nga veriu i banuar me shumicë serbe.
Bashkësia ndërkombëtare ka dënuar ashpër vendimin e Qeverisë së Kosovës që kryetarët e rinj të shkonin në zyrat komunale më 26 maj, kur dhe u ngritën tensionet.
Kosovës i është kërkuar që të heqë dorë nga “masat e dhunshme” dhe “veprimet e njëanshme”. Por, autoritetet në Prishtinë i kanë cilësuar si legjitime veprimet e tyre në veri.
Zgjedhjet në veri u mbajtën pas dorëheqjes së kryetarëve të mëparshëm në nëntorin e kaluar – që të gjithë nga Lista Serbe – për shkak të kundërshtimit të një vendimi të Qeverisë së Kosovës për riregjistrimin e makinave me targa RKS – Republika e Kosovës.
Lista Serbe – partia më e madhe e serbëve në Kosovë – nuk mori pjesë në zgjedhje dhe serbët gjerësisht bojkotuan procesin e votimit./REL
Xhiro e fundit e Superligës së Kosovës në futboll ngjalli reagime të shumta nga opinioni sportdashës në Kosovë për shkak të dyshimeve se mund të jenë kurdisur ndeshjet Trepça ‘-Prishtina dhe Ferizaj-Dukagjini.
Në këtë të fundit, portieri i Dukagjinit pranoi një gol që po konsiderohet si pranim i qëllimshëm duke ia dhënë fitoren Ferizajt që rrjedhimisht solli edhe sigurimin e barazhit të kësaj skuadre për mbetje në Superligën e Kosovës, ndërsa nga ana tjetër e pësoi Trepça ‘89 që ka rënë tashmë në Ligën e Parë, raporton KP.
Në lidhje me këto dyshime, ka reaguar edhe Komiteti Olimpik i Kosovës. Presidenti i shtëpisë më të madhe të sportit në Kosovë, Ismet Krasniqi, ka thënë për KosovaPress se janë fuqishëm kundër këtyre dukurive negative që e dëmtojnë imazhin ndërkombëtar të sportit kosovar, në këtë rast të futbollit. Ai ka shtuar se beson tek organet kompetente brenda Federatës së Futbollit të Kosovës se do të marr masat e duhura nëse dyshimet e tilla konfirmohen.
“KOK është fuqishëm kundër dukurive të tilla negative që dëmtojnë imazhin e mirë që sporti dhe në këtë rast futbolli kanë krijuar në arenën ndërkombëtare.
Ne besojmë fuqishëm tek organet kompetente të FFK-së, që të marrin masat e duhura, në rast se vërtetohet që ka pasur dukuri të tilla.”, ka thënë Krasniqi për KosovaPress.
Ndërkohë, Këshilli për Sport dhe Ministria e Sportit tashmë kanë konformuar se kanë kërkuar nga prokuroria që të nis hetimet për këto dy ndeshje.
Kompania izraelite “Terror Alarm”, në një cicërimë të saj, mbrëmë ka thënë se “Grupi terrorist Wagner është nisur për në Kosovë”, raporton KosovaPress.
Kompania që lëshoi njoftimin është e njohur për paralajmërimet e autoriteteve për sulmet terroriste dhe parandalimin e shumë prej tyre në kulmin e sulmeve të ISIS në Evropë të viteve 2014-2017.
Sipas “Terror Alarm”, informacioni është siguruar nga OpenSource Intelligence, përkatësisht nga monitorimi i kanalit të PMC Wagner në Telegram.
Postimi në llogarinë e twitterit, “Terror Alarm” e bëri mbrëmë, pas eskalimit të situatës në Zveçan, ku grupe kriminale serbe sulmuan KFOR-in dhe Policinë e Kosovës, me ç’rast mbetën të plagosur dhjetëra pjesëtarë të KFOR-it.
Që nga e premtja, serbët në veri të Kosovës janë duke protestuar kundër kryetarëve të rinj të dalë nga zgjedhjet e 23 prillit.