ATV

Blog

  • Projektligji i ri për Këshillin Prokurorial, shoqëria civile e quan politizim objektiv të KPK së

    Projektligji i ri për Këshillin Prokurorial, shoqëria civile e quan politizim objektiv të KPK së

    PËRGATITI: NORA LUTA

    Shoqëria civile ka kritikuar projektligjin e ri për Këshillin Prokurorial të Kosovës, duke vlerësuar se nëse ai miratohet në Kuvend rrezikon politizimin e KPK-së. Sipas Institutit të Kosovës për Drejtësi, KDI-së dhe Lëvizjes FOL, Ministria nuk i ka adresuar disa nga vërejtjet kryesore të Gjykatës Kushtetuese, e cila e kishte rrëzuar ligjin e kaluar. Sipas shoqërisë civile, me përbërjen prej 19 anëtarëve të KPK-së, 8 prej të cilëve do të jenë joprokurorë që do të zgjidhen me shumicë të thjeshtë të votave nga Kuvendi, rrezikohet skajshmërisht politizimi i Këshillit Prokurorial.

    Me projektligjin e ri për Këshillin Prokurorial, parashihet që deri në vitin 2026 ky institucion të përbëhet nga 19 anëtarë.

    Por kjo rritje e numrit të anëtarëve, tetë prej të cilëve do të zgjidhen me një shumicë të thjeshtë nga Kuvendi, po kritikohet nga shoqëria civile.

    Sipas Lëvizjes FOL dhe Institutit të Kosovës për Drejtësi, kjo përbërje dhe rregulla se kuorumi në KPK mund të krijohet vetëm edhe me pjesëmarrjen e anëtarëve të zgjedhur nga Kuvendi, paraqet politizim objektiv të këtij institucioni të drejtësisë.

    Sipas Vullnet Bugaqkut nga Instituti Demokratik i Kosovës, edhe dispozita që Avokati i Popullit t’i propozojë dy anëtarë joprokurorë është në kundërshtim me aktgjykimin e Kushtetueses.

    Monitorues të shoqërisë civile, të cilët kanë qenë pjesë e grupit punues, kanë thënë se Ministria e Drejtësisë nuk i ka marrë parasysh komentet e tyre. Për më tepër, sipas tyre, MD-ja nuk i adresoi as rekomandimet e Venecias.

    Rreth përmbajtjes së Projektligjit të ri për KPK-në, reagoi javën e kaluar edhe ky institucion, i cili theksoi se do t’i ndjekë të gjitha rrugët ligjore për ta kundërshtuar.

    Ligjin e kaluar për KPK-në, Gjykata Kushtetuese e kishte shpallur të pavlefshëm, duke gjetur vërejtje edhe në balancimin e anëtarëve prokurorë dhe joprokurorë.

  • Ia ktheu borxhin Shqipërisë, Kosova me më pak rezerva të energjisë për dimër

    Ia ktheu borxhin Shqipërisë, Kosova me më pak rezerva të energjisë për dimër

    PËRGATITI: FATLUM JASHARI

    Për shkak të sasisë së energjisë në formë obligimi për kthim, që e kishte marrë gjatë dimrit nga Shqipëria, Kosova këtë vit ka nisur me vonesë depozitat për dimër. Edhe pse është ende fillimi i sezonit kur Shqipëria ka nevojë për më shumë energji, sasia e depozitave nuk ka arritur as 10% të sasisë së përgjithshme, krahasuar me vitin e kaluar.

    Kthimi i energjisë që Kosova e kishte marrë gjatë dimrit nga Shqipëria, nëpërmjet marrëveshjes për shkëmbime, pritet të ndikojë që sasia e depozitave këtë vit të jetë dukshëm me e ulët – sesa vitin e kaluar.

    Si shkak i nevojës për import, dimrin që shkoi, Kosova harxhoi depozitat dhe u fut në obligime për kthim të energjisë ndaj Shqipërisë.

    “Gjatë vitit 2022, KEK-u ka depozituar në KESH 226,330 MW. Ndërsa, ka pranuar nga KESH-i sasinë prej 135,965 MW. Gjatë muajve të dimrit kur në Kosovë konsumi ka shënuar ngritje, diferenca nga viti 2022 i është kthyer KEK-ut, si dhe KESH-i ka depozituar sasinë prej 91.094 MW”.

    Pas kthimit të obligimeve, tashmë ka nisur depozitimi i energjisë në Shqipëri, që deri tani nuk arrin as 10% të vlerës së përgjithshme, krahasuar me vitin e kaluar.

    “Tani kur Shqipëria ka nevojë, KEK-u ka filluar të depozitojë energji elektrike drejt KESH-it dhe deri më tani ka depozituar sasinë prej 21,714 MW dhe do të vazhdojë të depozitojë sa herë që ka teprica dhe KESH-i ka nevojë. Keni parasysh se shifrat e paraqitura janë dinamike dhe mund të ndryshojnë nga dita në ditë, posaçërisht tani në muajt e verës kur në Shqipëri konsumi shënon ngritje”.

    Me sasinë aktuale të depozitave dhe me trendin aktual, pritet që Kosova të hyjë në dimër me ndjeshëm, më pak rezerva të energjisë dhe pa kapacitete të reja prodhuese të energjisë.

    Me sasinë e depozituar në Shqipëri vitin e kaluar, të shfrytëzuar gjatë muajve të dimrit, ministrja e Ekonomisë, Artane Rizvanolli, në raportimin e saj në Kuvend kishte thënë se janë kursyer rreth 50 milionë euro import.

    Sipas marrëveshjes për shkëmbime energjetike, KEK-u dhe KESH-i ofrojnë ose pranojnë energji, vetëm kur njëra ka teprica dhe tjetra nevojë – dhe anasjelltas.

  • Hapet konkurs për 25 inspektorë shëndetësorë

    Hapet konkurs për 25 inspektorë shëndetësorë

    PËRGATITI: PRANVERA KRASNIQI 

    Ministria e Shëndetësisë ka hapur konkurs për 25 inspektorë shëndetësorë. Por, sipas njohësve të kësaj fushe, ky konkurs do të hapej kohë më parë, pasi edhe numri i ankesave të pacientëve është i lartë.

    Pas rikthimit për të tretën herë si ministër i Shëndetësisë, Arben Vitia, gjatë takimit të parë, të mbajtur në fillim të këtij viti, me anëtarët e Komisionit parlamentar për shëndetësi, ka dhënë premtime, të cilat u zotua se do t’i realizojë brenda këtij viti.

    Vitia kishte thënë se brenda gjashtë muajve do të ketë rritje të numrit të inspektorëve shëndetësorë.

    “Ministria e Financave ka ndarë buxhetin edhe për 42 inspektorë të rinj. Shumë shpejt do të shpallet konkursi për rekrutimin e tyre, rritja e numrit nënkupton edhe rritjen e shërbimeve cilësore për qytetarët e vendit.“

    Ndonëse jo me shifrat e parapara si në premtime, disa ditë më parë u hap konkursi për 25 inspektorë të rinj.

    Për njohësit e këtij lëmi, kjo shifër është shumë e ulët duke marrë parasysh numrin aktual të inspektorëve dhe ankesat e mëdha të pacientëve.

    Besim Kodra nga Shoqata e Pacientëve, thotë se për shkak të mungesës së inspektorëve, shpeshherë ka pasur shkelje të të drejtave të pacientëve.

    “Ankesat e vazhdueshme që vijnë në shoqatë tregojnë për shkelje të të drejtave të pacientëve, si nga institucionet shëndetësore, por edhe nivel të ulët të vetëdijes rreth të drejtave dhe përgjegjësive që kanë kujdesi shëndetësor ministria të ketë më shumë fushata dhe t’i perceptojë më mirë”.

    Që të parandaloheshin shkeljet e tilla, gazetari i shëndetësisë, Bujar Vitia, thotë se numri i inspektorëve është dashur të rritej kohë më parë.

    “Ministria e Shëndetësisë të ketë më shumë prioritet inspektimin, të kërkojë llogaridhënie, sepse kohëve të fundit është në gjumë, të ketë më shumë vëmendje për shërbimet që kryhen dhe të inspektimeve që neglizhohen nga inspektorati shëndetësor”.

    Aktualisht në sistemin shëndetësor të vendit janë vetëm 12 inspektorë.

  • Gjendja me rriqra në Kosovë mbetet stabile, mbi 200 të prekur në Prishtinë

    Gjendja me rriqra në Kosovë mbetet stabile, mbi 200 të prekur në Prishtinë

    PËRGATITI: SARA SHEHU

    Vetëm për 6 muaj në rajonin e Prishtinës janë regjistruar më shumë se 200 raste të pickimit nga rriqrat. Por, Qendra Kryesore e Mjekësisë Familjare thotë se nuk ka rritje të numrit të rasteve, krahasuar me vitin e kaluar.

    Ndonëse gjatë verës, rastet nga thumbimi i rriqrave janë më të përhapura, këtë vit numri i tyre nuk ka shënuar rritje të lartë.

    Në regjionin e Prishtinës në 6 muajt e parë të këtij viti, janë regjistruar 7 raste më shumë krahasuar me periudhën e njëjtë të vitit të kaluar.

    “Në të gjitha QMF-të e Prishtinës trajtohen këto raste për rajonin e Prishtinës përfshirë zonat rurale të Prishtinës. Këtë 6 mujor i kemi 7 raste më tepër se vitin paraprak. Domethënë në 2022 kemi paurs 200 raste për 6 muaj. Kurse në këto 6 muaj 2023, kemi 207 një rritje e lehtë. Gjendja me rriqra është e menaxhueshme, nuk është shqetësuese”.

    Qytetarët thonë se largimin e rriqrave e bëjnë në kushte shtëpiake.

    “I hekmi gjithmonë me dorë në shtëpi se nuk ka paraqitë naj problem asnjëherë”.

    “Paj vallai gjithë me dorë i kom hek e i heki nuk është bo kurrgjo”.

    Por për infektologun Hasan Gashi është shqetësues fakti që qytetarët e neglizhojnë shërimin në mënyrë profesionale.

    “Edhe pse numri i të prekurve nga rriqrat është ulur, qytetarët nuk duhet me tentu me i hekë vetë rriqrat. Për shkak se largimi i rriqrës nuk bëhet si duhet. Sepse nëse mbetet rriqra në trup, do të sillte një infeksion të rëndë. Duhet të shkohet tek mjeku për me u shëru”.

    Ndërsa, nga menaxhmenti drejtues i klinikës së Infektivit në QKUK, kanë bërë të ditur se prej muajit prill deri në fund të muajit qershor, 250 qytetarë nga komuna të ndryshme të vendit janë shëruar nga pickimi i rriqrave.

    Në Institutin Kombëtar të Shëndetit Publik nuk kanë treguar për ATV-në se cila komunë vazhdon të jetë më e rrezikuar nga rriqrat.

  • Gjakova, qyteti ku po “lulëzon” turizmi

    Gjakova, qyteti ku po “lulëzon” turizmi

    PËRGATITI: PRANVERA KRASNIQI

    Numri i turistëve të huaj që po e vizitojnë qytetin e Gjakovës ka shënuar ngritje. Përveç atyre që vijnë për ta parë trashëgimisë kulturore ka edhe të tjerë që gjatë sezonit të verës zhvillojnë biznes në këtë qytet.

    Martine De Bias ka ardhur nga Italia për ta vizituar qytetin e Gjakovës.

    Sipas saj, gjithë çfarë e bën Gjakovën të jetë vend atraktiv, janë trashëgimia kulturore e pozita e përshtatshme gjeografike.

    “Kemi zgjedhur pikërisht Gjakovën sepse ndihemi shumë të sigurt, është e pasur me shumë bukuri natyrore, monumente historike dhe kjo është shumë e mirë për Kosovën, me një fjalë qytet i vogël por me plot begati”.

    Numri i turistëve në këtë qytet, sipas statistikave zyrtare, ka shënuar rritje.

    “Në fillim të sezonit veror, qyteti i Gjakovës po shihet të jetë epiqendër për turistët nga e mbarë bota, e gjitha kjo për shkak të potencialit të mirë në fushën e turizmit”.

    Përveç vizitave turistike, begatitë që ofron ky qytet po i shtyn disa turistë të bëjnë plane më afatgjate.

    “Gjakovën nuk e ndërroj me asnjë qytet tjetër, si rrjedhojë kemi kafenenë këtu me disa shokë që punojmë mundohemi të jemi sa më shpesh këtu”.

    “Përveç kafenesë e cila na obligon të vijmë më shpesh këtu, edhe festivalet e ndryshme e bëjnë më të veçantë këtë qytet”.

    Numrit të lartë të turistëve i gëzohen edhe qytetarët e Gjakovës.

    “Janë të mirëseardhur dhe ne iu ndihmojmë me shumë kënaqësi në prezantimin e vendeve”.

    Dalon Kulludra nga Zyra e Informimit në Gjakovë, përmend disa nga monumentet që turistët po i vizitojnë më së shumti.

    “Kulla e Abdullah Pashë Drenit, hani i Haraçisë, Muzeu Etnografik, Çarshia e Madhe janë vetëm disa nga monumentet kulturore e historike që i shtojnë bukurinë qytetit të Gjakovës”.

    Brenda një viti, mesatarisht Gjakova vizitohet nga 10 mijë turistë.

     

  • 17 komuna pa noterë, Ministria e Drejtësisë ende pa konkurs

    17 komuna pa noterë, Ministria e Drejtësisë ende pa konkurs

    PËRGATITI: DRITON SADIKU  

    2 vjet e 4 muaj në pushtet, Qeveria e kryeministrit Kurti nuk ka hapur asnjë konkurs për noter të rinj. Në mandatin e parë, Ministria e Drejtësisë kishte anuluar një konkurs nën dyshime për parregullsi. Ministria e Drejtësisë nuk ka treguar se çfarëdo të bëhet me konkursin e fundit që ishte anuluar, vendim të cilin e kishte rrëzuar pastaj edhe Gjykata Kushtetuese. Juristët thotë se Ministria duhet t’i përfillë vendimet e gjykatës.

    Që nga ardhja në pushtet, Ministria e Drejtësisë nuk ka hapur konkurse për noter të rinj, ndonëse janë plot 17 komuna që nuk e kanë asnjë noter.

    Madje, janë bërë rreth 3 vjet e gjysmë nga kur ministrja Albulena Haxhiu, gjatë mandatit të parë në Qeverinë Kurti 1, kishte anuluar konkursin për noter nën dyshimet për parregullsi, nuk ka pasur lëvizje në shtimin e numrit të noterëve.

    Megjithatë, Ministria e Drejtësisë tha për ATV-në se në vjeshtën e këtij viti do të mbahet provimi i noterisë që do t’i hapë rrugë konkursit për noter të rinj.

    “Ministrja e Drejtësisë ka emëruar Komisionin për Dhënien e Provimit të Noterisë. Ky Komision është duke punuar në krijimin e parakushteve të nevojshme për mbarëvajtjen e Provimit të Noterisë dhe, së shpejti, do të organizojë provimin që ka për qëllim rritjen e konkurrencës dhe cilësisë. Pas Provimit të Noterisë, Ministria e Drejtësisë do të shpallë konkurs për emërimin e noterëve, me të cilin do t’u jepet mundësia kandidatëve që kanë dhënë Provimin e Noterisë të kandidojnë për t’u emëruar noterë. Përmes këtij procesi, Ministria e Drejtësisë do të zgjidhë problemin e mungesës së numrit të nevojshëm të noterëve dhe, sidomos, komunave pa noterë.”

    Mirëpo, nuk treguan se çfarë do të bëhet me konkursin që e kishin anuluar në shkurt të 2020-tës, vendim ky i cili ishte anuluar më pas nga gjykata, me arsyetimin se nuk ka gjetur prova se e paditura, qoftë në procedurë administrative ose edhe para gjykatës ka vërtetuar se Komisioni për Dhënien e Provimit për Noterinë ka cenuar parimin e ligjshmërisë.

    Kësisoj nga Instituti i Kosovës për Drejtësi, thonë se Ministria nuk mund të mos i përfillë vendimet e Kushtetueses.

    “Gjykata në rastin konkret e ka anuluar vendimin e Ministrisë së Drejtësisë për anulimin e konkursit në fjalë dhe në këtë drejtim ajo çfarë mund të themi është se është obligative për Ministrinë e Drejtësisë, që të zbatohet vendimi i gjykatës pa marrë parasysh se cilat janë veprimet e tjera në drejtim të zgjedhjes së noterëve të rinj, asnjë proces i ri, qoftë proces brenda ministrisë së drejtësisë, qoftë ndonjë proces plotësues apo diçka tjetër, nuk mund të shkojë në dëm dhe ta amnistojë Ministrinë e Drejtësisë nga obligimi për ta zbatuar vendimin e gjykatës”.  

    Në fakt, në tërë vendin aktualisht aktiv janë vetëm 50 noterë. Përveç 17 komunave që s’e kanë asnjë, 10 të tjera operojnë me vetëm nga një noter.

    Përveç kryeqytetit që numëron 13 dhe Prizreni e Gjilani nga 4, komunat e tjera operojnë me më pak se 3 noterë.

     

  • ​Përfundon takimi i Ramës me udhëheqësit e vendeve të Ballkanit Perëndimor

    ​Përfundon takimi i Ramës me udhëheqësit e vendeve të Ballkanit Perëndimor

    Ka përfunduar takimi informal i kryeministrit të Shqipërisë, Edi Rama me krerët e vendeve të Ballkanit Perëndimor. Takimi i cili u zhvillua në Vilën 30 në Tiranë është mbajtur në kuadër të Samitit të Procesit të Berlinit që do të zhvillohet në Shqipëri më 16 tetor.

    Radio Televizioni Shqiptar raportoi se të pranishëm në takim ishin kryeministri i Malit të Zi, Dritan Abazoviç, kryeministri i Maqedonisë se Veriut, Dimitar Kovaçevski, kryeministrja e Serbisë, Ana Brnabiç si dhe kryetarja e Këshillit të Ministrave të Bosnje Hercegovinës, Borjana Kristo.

    Në takim mungoi kryeministri i Kosovës, Albin Kurti, i cili ndodhet në një aktivitet tjetër në Greqi. Megjithatë, Kurti do të marrë pjesë në samitin e Tetorit.

    Zëdhënësi i Qeverisë së Kosovës, Përparim Kryeziu ka sqaruar se kryeministri Albin Kurti e kishte njoftuar kryeministrin e Shqipërisë, Edi Rama se nuk do të mund të shkojë në takimin joformal të liderëve të rajonit në Tiranë, meqë muaj më parë e ka konfirmuar pjesëmarrjen në një konferencë në Kretë të Greqisë e ku paneli për Ballkanin Perëndimor, është saktësisht në ditën e njëjtë e në kohën e njëjtë.

    “Kryeministri Kurti e ka njoftuar Kryeministrin Rama që nuk do të mund të shkojë kësaj radhe meqë muaj më parë e ka konfirmuar pjesëmarrjen në një konferencë në Kretë të Greqisë e ku paneli për Ballkanin Perëndimor është saktësisht në ditën e njëjtë e në kohën e njëjtë. Natyrisht Kryeministri Kurti do të marrë pjesë në Samitin e Procesit të Berlinit që do të mbahet në Tiranë, data e të cilit dihet: 16 tetor 2023”, ka shkruar ai.

    Ndërsa Klisman Kadiu, këshilltar për media i Besnik Bislimit, ka mohuar lajmin se zëvendëskryeministrit iu është refuzuar pjesëmarrja në takimin joformal të liderëve të Ballkanit Perendimor, pasi sipas tij, pjesëmarrja në këtë takim nuk ka qenë e planifikuar nga vet Bislimi.

    “Lajmi i djeshëm për pjesëmarrjen e zëvendëskryeministrit Bislimi në takimin joformal në Tiranë nuk është i vërtetë. Nuk ka qenë i planifikuar e aq më pak i konfirmuar. Meqë nuk ka patur asnjë konfirmim nga zëvendëskryeministri Bislimi, atëherë nuk ka mundur as t’i refuzohej pjesëmarrja apo prania e tij. Prandaj edhe raportimet nga disa media shqiptare në lidhje me refuzimin nuk janë gjë tjetër veçse spekulim dhe duke qenë i tillë veç mund të spekulojmë për origjinën e tij”, ka shkruar ai.

    Ndërkohë, mediat në Shqipëri raportuan se në takimin e liderëve rajonit në Tiranë nga Qeveria e Kosovës ishte konfirmuar ardhja e zëvendëskryeministrit Besnik Bislimi. Por ky takim i Bislimit me krerët e rajonit nuk do të jetë i mundur për shkak të protokollit.

    Mediat atje theksuan se zëvendëskryeministrit të Kosovës i është komunikuar nga organizatorët e takimit se niveli i tij është dytësor dhe jo i përshtatshëm dhe se dosja e takimit do t’i dërgohet me poste të sigurt Qeverisë së Kosovës, përkatësisht zyrës së kryeministrit.

  • BE-ja s’tregon nëse do t’i largoj masat ndëshkuese ndaj Kosovës – këtë javë pritet takim në Bruksel

    BE-ja s’tregon nëse do t’i largoj masat ndëshkuese ndaj Kosovës – këtë javë pritet takim në Bruksel

    Bashkimi Evropian ende nuk ka vendosur nëse do t’i largojë masat ndëshkuese që i ka vendosur Kosovës për shkak të situatës që ishte krijuar në veri të vendit, ani pse Qeveria ndërmori hapa për de-përshkallëzim të situatës.

    Nga BE-ja kanë thënë se presin që Kosova të ndërmarrë hapa të tjerë në këtë drejtim.

    “Ne mirëpresim përkushtimin e Kosovës ndaj marrëveshjes së arritur dhe presim që Kosova të ndërmarrë hapa të mëtejshëm pozitivë dhe të vazhdojë të përparojë në këtë drejtim”, thuhet në përgjigjen e BE-së.

    Më tej BE-ja përmend këtu edhe takimin që pati në Bratislavë, emisari i BE-së, Mirsolav Lajçak me zëvendëskryeministrin Besnik Bislimi.

    “Ata diskutuan përgjigjen e Kosovës ndaj kërkesave të BE-së për de-përshkallëzimin e situatës në veri të Kosovës, organizimin e zgjedhjeve të parakohshme lokale në 4 komunat veriore dhe kthimin në zbatimin e Marrëveshjeve të Dialogut, sipas deklaratës së 27 vendeve të BE-së të lëshuar më 3 qershor”, thuhet në përgjigjen e tyre.

    Sa i përket një takimi të mundshëm gjatë kësaj jave në kuadër të dialogut, nga BE-ja i thanë Telegrafit se Lajçak tashmë ka ftuar dy kryenegociatorët për takim.

    “Emisari ka ftuar kryenegociatorët në Bruksel këtë javë për të vazhduar diskutimet mbi zbatimin e Marrëveshjes së re për Rrugën drejt Normalizimit dhe Aneksin e zbatimit të saj, me shpresën që palët të bien dakord për hapat e ardhshëm që mundësojnë zbatimin e plotë të Marrëveshjes”, deklaruan nga Bashkimi Evropian.

    Masat që po zbaton BE-ja ndaj Kosovës përfshijnë: pezullimin e përkohshëm të punës së trupave të krijuara në bazë të Marrëveshjes së Stabilizim Asociimit (MSA), mosftesën e Kosovës në takime të nivelit të lartë dhe pezullimin e vizitave dypalëshe, përveç atyre që përqendrohen në adresimin e krizës në veri të Kosovës në kuadër të kornizës së dialogut të lehtësuar nga BE-ja.

    Masat tjera përfshijnë edhe ndaljen e programimit të fondeve për Kosovën nga IPA 2024 (Instrumentet e Para-Anëtarësimit) si dhe propozimet e Kosovës në kuadër të Kornizës së Investimeve në Ballkanin Perëndimor nuk janë dorëzuar për shqyrtim nga bordi më 29 dhe 30 qershor.

    Megjithatë, më 10 korrik, Kosova dhe BE-ja kanë arritur pajtim për hapat e parë drejt shtensionimit të situatës në veriun e Kosovës, të banuar me shumicë serbe.

    Pikat e marrëveshjes Kosovë-BE për shtensionimin e situatës në veri:

    1.Qeveria e Kosovës publikisht shpall përkushtimin e saj për të punuar në depërshkallëzimin e situatës dhe se nuk do të ndërmarrë asnjë masë për përshkallëzimin e situatës në veri të Kosovës. Kjo përfshin një ulje të menjëhershme për 25% të gjithë pranisë së policisë brenda dhe përreth ndërtesave komunale.

    2.Policia e Kosovës kryen rregullisht vlerësime të përbashkëta të sigurisë me EULEX-in dhe me KFOR-in sipas nevojës, për të vlerësuar mundësinë e zvogëlimit të mëtejshëm të gjithë pranisë së policisë brenda dhe përreth ndërtesave komunale.

    3.Qeveria e Kosovës bën një deklaratë publike duke inkurajuar mbajtjen e zgjedhjeve të reja pas verës në katër komunar në veri. Kosova angazhohet që të ketë bazën e nevojshme ligjore për të mundësuar organizimin e zgjedhjeve.

    4.BE-ja do të ftojë dy kryenegociatorët në Bruksel për të finalizuar Marrëveshjen për Rrugën e Normalizimit, pas së cilës do të fillojë zbatimi i të gjitha dispozitave të marrëveshjes.

  • Në 25-vjetorin e rënies heroike, përkujtohet dëshmori i parë i Rahovecit – Abdullah Bugari

    Në 25-vjetorin e rënies heroike, përkujtohet dëshmori i parë i Rahovecit – Abdullah Bugari

    Sot, janë bërë 25 vite nga rënia heroike e dëshmorit të parë të Epopesë së Rahovecit, Abdullah Bugari,

    Në këtë përvjetor ai është përkujtuar nga kryetari i komunës së Rahovecit, Smajl Latifi, bashkëluftëtarët dhe familjarët e tij.

    Latifi ka vlerësuar lart figurën e Bugarit për të cilin ka thënë se ai mbetet i gjallë, i buzëqeshur dhe i pavdekshëm në kujtesën e tij dhe bashkëveprimtarëve të organizuar në lëvizjen atdhetare ilegale të kohës, gjithashtu, edhe si një bashkëluftëtar i shquar i UÇK-së.

  • ​Lukaku refuzon kalimin në Al Hilal

    ​Lukaku refuzon kalimin në Al Hilal

    Al-Hilal thuhet se e ka tejkaluar Juventusin me ofertë për Romelu Lukakun, por sulmuesi i Chelseat dëshiron të mbetet në Evropë.

    Interi ka vendosur të heq dorë nga reprezentuesi belg pasi ai nuk iu përgjigj drejtorëve dhe shokëve të skuadrës javën e kaluar, duke hapur bisedimet me Juventusin.

    “Bianconerët” janë gati të ofrojnë 40 milionë euro për 30-vjeçarin, por ata duhet të shesin Dusan Vlahovic përpara se të bëjnë një ofertë zyrtare drejt Chelseat..

    “Sky Sports UK” pretendon se Chelsea ka një ofertë më serioze për Lukakun, që vjen nga klubi saudit Al-Hilal. Megjithatë, belgu nuk është i gatshëm të largohet nga Evropa, kështu që ai nuk pritet të pranojë ofertën e tyre, përcjellë KosovaPress.

    Oferta e Al-Hilal vlen më shumë se 50 milionë euro, por Lukaku nuk dëshiron t’i bashkohet atyre.

    Lukaku do të rifillojë stërvitjet me Chelsean sot, por nuk pritet të bashkohet me skuadrën e Mauricio Pochettinos për turneun e tyre parasezonal në SHBA.