Blog

Lëvizja Vetëvendosje ka bërë thirrje për arrestimin e kryetarit të Komunës së Skenderajt, Sami Lushtaku, pas sulmit të dyshuar brutal të tij ndaj zëvendësminsitrit Hysni Mehani.

Anëtarja e Kryesisë së LVV-së, Tinka Kurti, në një shkrim në rrjetin social Facebook, tha se është koha për arrestimin e Lushtakut.

“Koha për arrestimin e Sami Lushtakut”, ka shkruar Kurti.

Lëvizja Vetëvendosje e ka akuzuar Sami Lushtakun dhe truprojat e tij për sulm brutal ndaj kandidatit për deputet dhe zëvendësministrit Hysni Mehani. Sulmi ndaj Mehanit ndodhi të enjten në një lokal në qendër të Skenderajt.

Bashkësia Islame e Kosovës (BIK) është deklaruar lidhur me kandidaturën për deputet e hoxhës Osman Musliu në listën e Lëvizjes Vetëvendosje.

Zyrtari nga BIK Ramadan Shkodra ka konfirmuar se udhëzimi që ndalon kandidimin e imamëve në lista politike vazhdon të mbetet në fuqi, ndërsa çdo vendim eventual për masa ndaj hoxhës Osman Musliu do të jetë kompetencë e Kryesisë së BIK-ut.

”Udhëzimi është në fuqi. A do të merren masa, është kompetencë e Kryesisë. Kur të mblidhet Kryesia, del me qëndrim”, tha Shkodra për RTV21.

Mediumi kishte pyetur BIK-un nëse hoxha Osman Musliu është pjesë e këtij institucioni dhe nëse ndaj tij do të ketë masa disiplinore, duke iu referuar një vërejtjeje të vitit 2025 ku thuhet se ndalohet “Të qenët kandidat në ndonjë nga listat e partive politike për pozita të caktuara në nivel lokal ose qendror”.

Hysni Mehani u sulmua fizikisht sot në kafeterinë “Solo” në qendër të Skenderajt, ku sipas reagimit të Lëvizjes VETËVENDOSJE!, ai është sulmuar nga kryetari i Komunës së Skenderajt, Sami Lushtaku, së bashku me truprojat e tij.

Sipas VV-së, në momentin e incidentit Mehani ndodhej duke pirë kafe me deputeten Arjeta Fejza dhe disa aktivistë të partisë.

Në reagimin e tyre thuhet se fillimisht Hysni Mehani është goditur me grusht, ndërsa më pas edhe me gotë në kokë. Po ashtu, sipas VV-së, gjatë përpjekjes për të parandaluar përshkallëzimin e situatës, është sulmuar edhe Sekretari i Qendrës së LVV-së në Skenderaj, Bahri Zabeli, i cili ka pësuar goditje të rënda nga shoqëruesit e Lushtakut.

Lëvizja VETËVENDOSJE! ka bërë të ditur se Mehani aktualisht është duke marrë trajtim mjekësor, ndërsa e ka cilësuar rastin si “sulm fizik banditesk”, duke kërkuar nga organet kompetente që të trajtojnë rastin me urgjencë dhe të ndërmarrin veprimet e nevojshme ligjore ndaj përgjegjësve.

Në reagimin e saj, VV-ja ka kërkuar gjithashtu edhe nga Partia Demokratike e Kosovës që ta dënojë këtë akt dhune.

“Hysni Mehani u sulmua fizikisht nga Sami Lushtaku dhe shoqëruesit e tij, por askush nuk mund t’i frikësojë aktivistët dhe qytetarët e Republikës”, thuhet në reagimin e Lëvizjes VETËVENDOSJE!.

Nga ana tjetër, persona të afërt me Sami Lushtakun kanë deklaruar se incidenti ka ndodhur pasi, sipas tyre, Mehani iu drejtua kryetarit të Skenderajt me fjalën “kriminel”.

Vetë Hysni Mehani ka konfirmuar se është sulmuar fizikisht dhe i ka bërë thirrje Policisë së Kosovës që të “mbrojë familjen” e tij.

Qendra për Studime Universitare e Forcave të Sigurisë së Kosovës mori pjesë në forumin “International Humanitarian Law ” në Itali për herën e dytë me radhë.

“Ky aktivitet ndërkombëtar mbledh kadetë nga akademi ushtarake të ndryshme të botës për të shkëmbyer njohuritë dhe aftësitë e tyre në të Drejtën Ndërkombëtare Humanitare”, njofton FSK.

QSU premton se do të vazhdojë përkushtimin në mbështetjen e kadetëve për të qenë pjesë e iniciativave që avancojnë njohuritë, përvojën dhe përfaqësimin sa më dinjitoz të FSK-së në arenën ndërkombëtare.

Policia e Kosovës, respektivisht stacioni policor në Drenas, ka kërkuar ndihmën e qytetarëve për identifikimin e një personi të dyshuar.

Sipas njoftimit në Facebook policia ka shpërndarë edhe fotografi të personit në fjalë, duke bërë të ditur se ai kërkohet në lidhje me veprën penale “vjedhje”.

“Personi i dyshuar është shpallur në kërkim”, thuhet në njoftimin e policisë.

Policia u ka bërë thirrje qytetarëve që, në rast se posedojnë informata që mund të ndihmojnë në identifikimin apo lokalizimin e të dyshuarit, të kontaktojnë organet kompetente përmes numrave dhe adresave zyrtare të publikuara në njoftim.

Zyra e Kryeprokurorit të Shtetit ka dënuar ashpër kërcënimin e bërë ndaj prokurorit të Prokurorisë Themelore në Mitrovicë, Muharrem Prekazi gjatë zhvillimit të një seance gjyqësore.

Sipas një njoftimi për media thuhet se çdo tentativë për të frikësuar apo penguar prokurorët e shtetit në ushtrimin e detyrës së tyre zyrtare është e papranueshme dhe nuk do të tolerohet në asnjë formë.

“Lidhur me këtë rast, menjëherë janë ndërmarrë të gjitha veprimet e nevojshme ligjore ndaj personit përgjegjës, në mënyrë që ai të përballet me drejtësinë dhe të marrë dënimin e merituar”, thuhet në njoftim.

Zyra e Kryeprokurorit të Shtetit shpreh mbështetjen e plotë institucionale për prokurorin e Prokurorisë Themelore në Mitrovicë, z. Prekazi, si dhe për të gjithë prokurorët e shtetit, të cilët me integritet, profesionalizëm dhe pavarësi ushtrojnë detyrat e tyre ligjore dhe kushtetuese në funksion të forcimit të sundimit të ligjit.