ATV

Blog

  • Një i plagosur nga të shtënat me armë në Prishtinë

    Një i plagosur nga të shtënat me armë në Prishtinë

    Një person është plagosur si pasojë e të shtënave me armë zjarri në rrugën “Ali Sokoli” në Prishtinë.

    Kjo është konfirmuar nga zëdhënësi i policisë së kryeqytetit, Enis Pllana i cili tha se i plagosuri është dëeguar për trajtim mjekësor.

    “Rreth orës 21:40 kemi marrë informatën për të shtëna me armë zjarri, në rrugën “Ali Sokoli” në Prishtinë. Njësitet policore menjëherë kanë dalë në vendin e ngjarjes, nga ku është raportuar se një person është plagosur”.

    “Personi i plagosur, (mashkull), është dërguar për trajtim mjekësor, ndërkohë policia ka nisur një hetim lidhur me rrethanat e këtij rasti”, thuhet në konfirmim.

  • Arrestohen dy persona për sulmin ndaj Mehanit, Sami Lushtaku nuk i përgjigjet ftesës së Prokurorisë

    Arrestohen dy persona për sulmin ndaj Mehanit, Sami Lushtaku nuk i përgjigjet ftesës së Prokurorisë

    Prokuroria Themelore në Mitrovicë ka njoftuar se kryetari i Komunës së Skenderajt, Sami Lushtaku, nuk i është përgjigjur ftesës për intervistim lidhur me një incident të raportuar që përfshin sulm ndaj zëvendësministrit Mehani.

    Sipas Prokurorisë, lidhur me këtë rast janë ndërmarrë veprimet e nevojshme hetimore, ndërsa dy persona janë ndaluar në lidhje me ngjarjen.

    Prokuroria ka bërë të ditur se prokurori kujdestar ka qëndruar gjatë gjithë ditës në vendin e ngjarjes në Skenderaj, në bashkëpunim me Policinë e Kosovës, ku janë mbledhur prova relevante për zbardhjen e rastit.

    “Lidhur me rastin e sotëm në Skenderaj, ku si pasojë e sulmit fizik, lëndime të lehta trupore kanë pësuar dy persona me iniciale H.M. dhe B.Z., prokurori kujdestar ka qëndruar gjatë tërë ditës në Skenderaj, ku së bashku me policinë janë mbledhur prova relevante lidhur me rastin,” thuhet në njoftim.

    Po ashtu, Prokuroria ka bërë të ditur se janë intervistuar viktimat dhe disa dëshmitarë të rastit.

    “Janë intervistuar në cilësinë e viktimave H.M. dhe B.Z., pesë (5) dëshmitarë si dhe dy (2) të dyshuar me iniciale E.L. dhe B.N., të cilët me vendim të prokurorit janë dërguar në mbajtje për 48 orë, me dyshimin për kryerjen e veprës penale ‘Lëndimi i lehtë trupor’,” thuhet më tej.

    Ndërkohë, dy persona të tjerë të dyshuar, me iniciale S.L. dhe K.H., ende nuk i janë përgjigjur ftesës për intervistim.

  • “Qeveria tentoi të vendosë pengesa për Bordin e Paqes”, Osmani: Qesharake, e paprecedentë

    “Qeveria tentoi të vendosë pengesa për Bordin e Paqes”, Osmani: Qesharake, e paprecedentë

    Kandidatja për presidente, Vjosa Osmani ka kritikuar ashpër qasjen e kryeministrit Albin Kurti, lidhur me pjesëmarrjen e saj në konferencën për Bordin e Paqes.

    Këto deklarata, Osmani i ka bërë në Rubikon të Klan Kosovës, e cila së bashku me kryetarin e LDK-së, Lumir Abdixhiku kanë bërë paraqitjen e tyre të parë pas bashkimit të tyre për zgjedhjet e 7 qershorit.

    Osmani ka thënë se ka qenë qesharake dhe e paparë në historinë e Kosovës, pengesa që i është bërë asaj lidhur me marrëveshjen për Bordin e Paqes, ku i pranishëm ka qenë edhe presidenti amerikan, Donald Trump.

    “Aty ka pasur tendenca për pengesa për marrëveshjen për Bordin e Paqes. Ka pasur një tendencë të paprecentë, të natyrës që donin në Kuvend ta ndryshonin tekstin e marrëveshjes e cila lëre që është në kundërshtim të plotë me të drejtën dhe praktikën ndërkombëtare dhe është e paprecendetë që nuk ka ndodhur asnjëherë në historinë e Kosovës. Është qesharake, është padituri e përmasave që unë nuk e kam parë, e as lexuar asnjëherë askund.”, ka thënë Osmani.

    Ajo ka thënë se lidhur me këtë marrëveshje ka ftuar në takim Kurtin.

    “Përkundër faktit që unë e kam ftuar në takime Kurtin që të bisedojmë për një gjë të tillë. Unë jam informuar nga grupi parlamentar i GUXO-s dhe ata kanë thënë se ai ka thënë se ka qenë i gabim madh që Vjosa Osmani është ulur në atë tryezë me Donald Trump. Sepse sipas tyre qenka dashur që ne mos të dukemi aty dhe që të jemi komplet jashtë radarit të SHBA-së.”, ka thënë tutje kandidatja për president.

    Ajo ka thënë se kjo administratë e SHBA-së është më pro Kosovës që vendi ka pasur të paktën që nga viti 2008 e tutje.

  • Kos dhe Kurti mbajnë konferencë të përbashkët nesër në Prishtinë

    Kos dhe Kurti mbajnë konferencë të përbashkët nesër në Prishtinë

    Komisionerja për zgjerim e BE-së, Marta Kos, do të qëndrojë në Kosovë të premten. Zyra e Kurtit njofton për takimin Kurti-Kos, të premtën (nesër), në orën 10:30.

    Pas takimit, në orën 10:45 do të ketë konferencë të përbashkët për media.

    Njoftimi i plotë i ZKM-së:

    Kryeministri në detyrë i Republikës së Kosovës, Albin Kurti, pret në takim Komisioneren e Bashkimit Evropian për Zgjerim, Marta Kos.

    Mediat mund të marrin pamje në oborrin e Qeverisë dhe ato duhet të jenë të pranishme më së largu deri në orën 10:30, si dhe mund ta përcjellin konferencën e përbashkët për media.

    Pas takimit do të ketë konferencë të përbashkët për media.

    KOHA: 10:45

    VENDI: Ndërtesa e Qeverisë

  • Kurti shkon edhe me një emërim – Bedrija Ejupagić zëvendësministri më i ri

    Kurti shkon edhe me një emërim – Bedrija Ejupagić zëvendësministri më i ri

    Kryeministri në detyrë, Albin Kurti, ka emëruar Bedrija Ejupagić në pozitën e zëvendësministrit në Ministrinë e Infrastrukturës dhe Transportit.

    Në njoftimin e ZKM-së theksohet se “Kryeministri në detyrë Kurti e uroi z. Ejupagić për detyrën e re dhe i dëshiroi suksese në përmbushjen e përgjegjësive të reja”.

  • Hoxha dorën e mbështjellur me fashë, Ramush Haradinaj e ngacmon pak: A gruaja a kojshia…

    Hoxha dorën e mbështjellur me fashë, Ramush Haradinaj e ngacmon pak: A gruaja a kojshia…

    Kryetari i Aleancës për Ardhmërinë e Kosovës (AAK), gjatë aktiviteteve të sotme ka takuar edhe një hoxhë.

    Imami që takoi Haradinaj kishte dorën e mbështjellur me fashë.

    Haradinaj me humor i drejtua a “gruaja a kojshia”, ndërkohë që përgjigja e hoxhës ishte “një taksirat”.

  • “Poshtë Sami Serbia”, çka kishte shkruar Hysni Mehani më 10 prill në Facebook për Sami Lushtakun

    “Poshtë Sami Serbia”, çka kishte shkruar Hysni Mehani më 10 prill në Facebook për Sami Lushtakun

    Kryetari i degës së Vetëvendosjes në Skenderaj, Hysni Mehani, më 10 prill të këtij viti i ishte referuar kryetarit të Skenderajt, Sami Lushtaku, si “Sami Serbia” në një postim në Facebook.

    Duke tentuar të ironizojë për kritikat që kishte marrë pushteti për raportet me SHBA’në, Mehani kishte shkruar: Poshtë Sami Serbia.

    “Sami serbia po na prish me Ameriken duke i mshele strukturat paralele pa koordim me miqte tane amerikane. Rrnofte Amerika dhe miqte tane, poshte Sami serbia”, kishte shkruar ai, një postim që është ende publik në profilin e tij në Facebook.

    Lëvizja Vetëvendosje tha sot se Mehani është sulmuar fizikisht nga kryetari i Skenderajt, Sami Lushtaku, në një kafene të këtij qyteti.

    Por, Lushtaku kishte mohuar se ai ka sulmuar duke thënë se kanë reaguar qytetarët pasi Mehani e kishte thirrur atë “Sami Serbia”.

    Këtë e mohoi ish-deputetja e Vetëvendosjes, Arjeta Fejza, e cila tha se kishte qenë duke pirë kafe me Mehanin në momentin kur, sipas saj, Lushtaku ishte afruar dhe e kishte sulmuar.

  • Gjykata Speciale: 7 të akuzuar kanë pranuar ndihmë financiare nga ne për të paguar avokatët e tyre

    Gjykata Speciale: 7 të akuzuar kanë pranuar ndihmë financiare nga ne për të paguar avokatët e tyre

    Gjykata Speciale përmes një postimi në faqen zyrtare në “X” kanë shkruar rreth ndihmës financiare që ofrojnë për pagesën e ekipeve mbrojtëse të të akuzuarave në rastet kur ata s’mund t’i mbulojnë shpenzimet, shkruan Express.

    Haga ka bërë të ditur se shtatë nga të akuzuarit kanë pranuar një ndihmë të tillë nga Gjykata, por s’kanë treguar emrat.

    “Neni 21 i Ligjit të Gjykatës së Lartë të KSK-së garanton prezumimin e pafajësisë për një të pandehur dhe rendit të drejtat e tjera që i ofrohen një të pandehuri gjatë gjithë procesit gjyqësor. Kjo përfshin të drejtën për t’u përfaqësuar nga një avokat i zgjedhur prej jush gjatë gjyqit. Gjykata e Lartë e KSK-së ka një skemë ndihme ligjore nëse një i pandehur nuk ka mundësi të paguajë për mbrojtjen e tij”, thuhet në njoftim.

  • Blerta Deliu për incidentin në Skenderaj: Dhuna s’është zgjidhje, por as provokimet e linçimet sistematike

    Blerta Deliu për incidentin në Skenderaj: Dhuna s’është zgjidhje, por as provokimet e linçimet sistematike

    Blerta Deliu e PDK’së ka reaguar për incidentin në Skenderaj ku u sulmua kryetari i degës së Vetëvendosjes në këtë komunë, Hysni Mehani, partia e të cilit tha se kryetari i Skenderajt, Sami Lushtaku, e ka sulmuar fizikisht atë.

    Deliu thotë se “dhuna nuk është zgjidhje”, por “as provokimet, linçimet dhe akuzat sistematike nuk janë”.

    “Sepse kur për vite të tëra instalohet gjuha e urrejtjes, e përçarjes dhe e dehumanizimit, pasojat nuk vonojnë. Njëra e sjell tjetrën. Gjithmonë kështu ka qenë. Prandaj, sot më shumë se kurrë, kemi nevojë për përmbajtje dhe respekt në diskursin publik. Për ndalim të gjuhës që prodhon konflikt, e jo për ushqim të saj”, ka shkruar ajo.

    Ndërkaq, vetë Lushtaku në një reagim ka mohuar se ka sulmuar Mehanin, duke thënë se qytetarët kanë reaguar pasi ai e kishte etiketuar atë si “Sami Serbia”.

  • Qeveria miraton rialokimin e mjeteve për rikonstruktimin e Xhamisë së Ibrit

    Qeveria miraton rialokimin e mjeteve për rikonstruktimin e Xhamisë së Ibrit

    Qeveria në detyrë e Kosovës ka miratuar vendimin për rialokimin e mjeteve në Ministrinë e Kulturës dhe Turizmit për zbatimin e programit “Masat preventive – intervenime emergjente nëpër komuna të ndryshme”.

    Kurti e quajti të rëndësishëm rikonstruktimin e xhamisë së Ibrit në kuadër të ruajtjes së trashëgimisë kulturore dhe fetare të Kosovës.

    Kryeministri në detyrë i Kosovës, Albin Kurti, tha se rikonstruktimi i xhamisë së Ibrit është i rëndësishëm për ruajtjen e trashëgimisë kulturore dhe fetare të Kosovës.

    “Rikonstruktimi i Xhamisë së djegur të Ibrit, Xhamia e Boshnjakëve në Mitrovicën e Veriut, paraqet një hap me rëndësi për ruajtjen e trashëgimisë kulturore dhe fetare, si pjesë e identitetit historik dhe diversitetit kulturor të Kosovës”, deklaroi Kurti në mbledhjen e Qeverisë.

    “Kjo xhami ka vlerë të veçantë për komunitetin lokal dhe përfaqëson një simbol të bashkëjetesës, kujtesës dhe trashëgimisë së qytetit të Mitrovicës. Në këtë kuadër, Ministria e Kulturës, Rinisë dhe Sportit ka propozuar rialokimin e 50 mijë eurove për realizimin e projektit të rikonstruktimit të saj, në përputhje me programin për mbrojtjen dhe ruajtjen e trashëgimisë kulturore”.

    “Përmes këtij investimi, synohet ruajtja dhe restaurimi i një objekti me rëndësi historike, kulturore dhe shoqërore për qytetarët dhe komunitetin lokal, por i cili natyrisht së pari ka nevojë për rindërtim”.