Një person është gjetur pa shenja jete në një banesë të hënën rreth orës 09:18 të mëngjesit më Klinë.
Sipas policisë, njëstitet policore, së bashku me njësitin e Qendrës se Mjekësisë Familjare kanë dalur ne vendin e ngjarjes, ku ekipi mjekësor ka konstatuar se viktima femër kosovare ka vdekur.
Me vendim të prokurorit të shtetit trupi i pa jetë i viktimës është dërguar në IML për obduksio ndërkaq rasti vazhdon të hetohet.
Një grua dyshohet se është dhunuar në Gjilan.
Policia ka arritur që ta arrestojë të dyshuarin.
Me vendim të prokurorit ai është dërguar në mbajtje.
“Gjilan , 28.08.2023-12:13. Ankuesi mashkull kosovar ka raportuar se një i dyshuar mashkull kosovar dyshohet se e ka dhunuar viktimën femër kosovare. I dyshuari është arrestuar dhe pas intervistimit me vendim të prokurorit është dërguar në mbajtje”, thuhet në njoftimin e policisë.
Kryediplomatja kosovare, Donika Gërvalla do të marrë pjesë sot në Forumin Strategjik të Bledit në Slloveni.
Në panelin “Ballkani Perëndimor: Gjithçka po ndryshon, por gjithçka mbetet e njëjtë?”, ku do të diskutohen perspektivat e rajonit në kuadër të procesit të anëtarësimit në Bashkimin Evropian do të jetë i pranishëm edhe shefi i diplomacisë serbe, Ivica Daçiq.
Përpos Gërvallës e Daçiqit pjesë e kësaj tryeze që mbahet pasdite është edhe emisari i BE-së për dialogun Kosovë-Serbi, Miroslav Lajçak.
Pjesëmarrës në të do të jenë edhe kryediplomatja sllovene, Tanja Fajon, anëtari i Këshillit të Shtetit të Francës, Alexandre Adam, zëvendësministrja për Evropën dhe Punët e Jashtme të Shqipërisë, Megi Fino, ministri i Punëve të Jashtme të Maqedonisë së Veriut, Bujar Osmani dhe ai i Bosnjë dhe Hercegovinës, Elmedin Konakoviq.
Vazhdon sot procesi gjyqësor ndaj Thaçit dhe të tjerëve në Gjykatën Speciale.
Në njoftim, është bërë e ditur se seanca është paraparë të nisë në ora 09:00.
Aktakuza fillestare kundër katër të akuzuarve u konfirmua më 26 tetor 2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27 shkurt 2023.
Policia e Kosovës, në raportin 24 orësh ka bërë të ditur se dy persona janë plagosur rëndë në Prishtinë.
Në raport thuhet se të njëjtit kanë marrë plagë nga të shtënat me armë zjarri dhe kanë kërkuar tretman mjekësor.
Policia ka dalë në vendin e ngjarjes dhe kanë konfiskuar një veturë që dyshohet se është përdorur në rast.
Rasti është hapur si “Vrasje e rëndë në tentativë”, dhe vazhdon të hetohet.
Lideri i Koresë së Veriut, Kim Jong Un, i ka bërë thirrje ushtrisë së vet të jetë gjithmonë në gatishmëri për luftë, në mënyrë që t’i parandalojë komplotet e rivalëve për pushtimin e vendit të tyre, raportuan mediat shtetërore të martën.
Ai i bëri këto deklarata pasi Shtetet e Bashkuara, Koreja e Jugut dhe Japonia mbajtën ushtrime detare trepalëshe për t’u përballë me kërcënimet bërthamore në rritje të Koresë së Veriut.
Ushtria amerikane dhe ajo jugkoreane janë duke mbajtur stërvitje të ndara dypalëshe verore që nga java e kaluar.
Koreja e Veriut i sheh stërvitjet e tilla me përfshirjen e SHBA-së si përgatitje për pushtim, megjithëse Uashingtoni dhe partnerët e tij ngulin këmbë se stërvitjet e tyre janë mbrojtëse.
Kimi tha gjatë një fjalimi për shënimin e Ditës së Marinës së Koresë së Veriut të hënën se ujërat pranë Gadishullit Korean janë bërë jostabile “nga rreziku për luftë bërthamore”, për shkak të armiqësive të udhëhequra nga Shtetet e Bashkuara, sipas agjencisë shtetërore të lajmeve qendrore të Koresë Veriore.
Ai i përmendi stërvitjet e SHBA-së me aleatët e vet, vendosjen e armëve të fuqishme amerikane në ujërat afër Gadishullit Korean dhe një samit së fundmi mes SHBA-së, Koresë së Jugut dhe Japonisë, ku u arrit një marrëveshje për rritjen e bashkëpunimin për mbrojtje, si kundërpërgjigje ndaj programit bërthamor të Koresë së Veriut.
Kimi i quajti presidentin e SHBA-së, Joe Biden, presidentin e Koresë së Jugut, Yoon Suk Yeol, dhe kryeministrin e Japonisë, Fumio Kishida, “shefa të bandës” së tri shteteve
“Kjo gjendje mbizotëruese i kërkon marinës sonë t’i përqendrojë të gjitha përpjekjet për t’u bërë gati për luftë, ta ketë vëmendjen e vazhdueshme për luftë, në mënyrë që të jetë e gatshme për t’ia thyer armikut vullnetin për luftë”, tha Kim.
Në stërvitjet mes tri vendeve të martën në ujërat ndërkombëtare pranë ishullit të Koresë së Jugut, Jeju, pati shkatërrues detarë nga të tri vendet.
Ndërkohë, që nga viti 2022, Koreja e Veriut i ka kryer më shumë se 100 testime të armëve, shumica e të cilave përfshinin raketa bërthamore të ndërtuara për ta goditur SHBA-në dhe aleatët e saj Korenë e Jugut dhe Japoninë.
Kjo i ka shtyrë Shtetet e Bashkuara dhe Korenë e Jugut t’i rrisin stërvitjet e tyre dhe t’i rinisin stërvitjet trepalëshe duke e përfshirë edhe Japoninë në to.
Kimi ka bërë përpjekje të mëdha për ta rritur arsenalin e vet bërthamor dhe për të krijuar sisteme të armëve të sofistikuara.
Gjatë fjalimit të tij, Kim shtoi se njësitë ushtarake të çdo shërbimi do të marrin armë të reja në përputhje me vendimin e Qeverisë për zgjerimin e përdorimit të armëve taktike bërthamore. /rel
Rita Ora ka qenë shumë e kritikuar në rrjete sociale që pas performancës së saj në Hungari, ku mbajti flamur serb.
Sulmet ndaj Ritës nuk kanë pushuar dhe komentet në fotot e saj janë të shumta.
Mes kësaj situate, ish-futbollisti i njohur i kombëtares shqiptare, Lorik Cana i ka dalë në mbrojtje.
Ai ka postuar një foto ku shfaqet Rita e vogël me veshje tradicionale shqiptare, për të treguar se ajo e do atdheun e saj.
FIFA do të bëjë presion që Luis Rubiales të përjashtohet nga futbolli për 15 vjet pasi vetë federata spanjolle tërhoqi mbështetjen e saj për të.
Drejtuesit e federatës spanjolle i kërkuan Rubiales të jep dorëheqjen me efekt të menjëhershëm, duke thënë se sjellja e tij e papranueshme kishte shkaktuar dëm të rëndë në imazhin e futbollit spanjoll.
Ky zhvillim pasoi me një kërcënim nga FIFA për të ndaluar ekipet kombëtare dhe klubet elitare të Spanjës nga garat ndërkombëtare nëse federata spanjolle refuzon të pranonojë dënimin e tyre për Rubiales, përcjellë KosovaPress.
Burime të përfshira në procesin disiplinor kanë thënë për “Mail Sport” se FIFA po shtyn për një pezullim të Rubiales deri në 15 vjet, maksimumi i lejuar nga statutet e tyre. Kjo do t’i kishte lejuar ata të ndërmarrin veprime kundër kombëtareve dhe klubeve spanjolle nëse gjykimi kundërshtohet.
Rubiales javën e kaluar iu dha një pezullim i përkohshëm 90-ditor nga FIFA, por mbajti kishte e federatës spanjolle, në pritje të rezultatit të një hetimi të brendshëm për sjelljen e tij me puthjen e Jenni Hermoso pas fitores së Spanjës në finale të Kupës së Botës ndaj Anglisë.
Qendra Kombëtare të Kosovës për Transfuzionin e Gjakut, ka arritur ta stabilizojë gjendjen me rezerva të gjakut, pasi kohë më parë u paralajmërua mungesë e madhe, raporton EO.
Se gjendja në këtë institucion është e mirë, e tha Safete Maliqi-Qorrmemeti, kryeudhëheqëse e departamentit për dhurim të gjakut në QKKTGj.
Ajo ka deklaruar për Ekonomia Online se është rritur edhe shkalla e ndërgjegjësimit të vullnetarëve, për të cilën i falënderon.
Ajo ka treguar për grupet që kanë pasur mungesë por që thotë se falë njerëzve vullnetmirë, kanë arritur ta rregullojnë gjendjen me gjak.
“Për momentin janë përmirësuar rezervat e gjakut, kishim kohët e fundit një mungesë të disa grupeve të caktuara mirëpo kemi arrit me angazhim të përgjithshëm me stabilizuar gjendjen. Tani për momentin kemi rezerva jo te mjaftueshme, po vazhdojmë të krijojmë rezerve për t’i trajtuar pacientët me gjak dhe produkte të gjakut. Është normale grupet RH negative janë më pak edhe në popullatë, mirëpo tani kemi krijua rezerva të mjaftueshme, ka qenë mungesë e gjakut 0 negativ dhe B negativ, mirëpo tani kemi krijuar rezerva dhe nuk kanë nevojë të shqetësohen pacientet, mund të trajtohen të gjitha operacionet që janë të planifikuara”, thotë ajo për EO.
Ajo shtoi se kërkesat më të mëdha të gjakut janë në Kirurgji, Gjinekologji, Hematologji, Dializa e njësi tjera.
Ajo po ashtu theksoi se, shkallë e rritjes së dhuruesve vullnetar të gjakut dëshmon për një shkallë të lartë ndërgjegjësimi të popullatës.
“Numri i dhuruesve kohëve të fundit është rritur mirëpo përkundër rritjes së numri është shtuar edhe numri i rasteve të cilat kanë nevojë për gjak dhe kërkuesit më të mëdhenj të gjakut janë rastet në Kirurgji, Gjinekologji, Hematollogji, sëmundjet e gjakut dializë e të tjera. Kjo shkallë e rritjes së dhuruesve vullnetar të gjakut dëshmon për një shkallë të lartë ndërgjegjësimi të popullatës dhe përgjegjësisë dhe shifrat e larta të dhurimit të gjakut tregojnë për nivelin e dhurimit vullnetar për ti krijuar rezervat e mjaftueshëm në nivel kombëtar”, u shpreh ajo.
Ajo tha se janë duke vazhduar edhe një aksion me FSK-në për dhurim të gjakut, teksa bëri thirrje qytetarëve të dhurojnë gjak.
“Është një sfidë e theksuar për të siguruar doza të gjakut mjaftueshëm për të pasur rezerva mirëpo në bashkëpunim me strukturat shëndetësore, me organizatat e ndryshme shtetërore, private me qytetarët kemi arritur me ndihmën e medieve me bë promovimin e dhurimit të gjakut dhe me shpreh një apel tekë qytetarët për tu paraqit për të dhuruar gjak këtë kohë verë kur kemi pasur mungesë të disa grupeve. Është duke u përmirësuar gjendja, tani jemi duke vazhduar aksionet e dhurimit të gjakut në FSK-në prej 21 gusht dhe vazhdojmë deri me 18 shtator. Gjatë këtyre aksioneve kemi numër të konsiderueshëm të cilët pjesëtarët e FSK-së i përgjigjen dhurimit në mënyrë pozitive”, tha ajo.
Komuna e Prishtinës ditë më parë ka nënshkruar kontratën për blerjen e biçikletave në vlerë 500 mijë euro. Sipas kontratës, një biçikletë ka vlerë prej 2,744 euro, raporton EO.
Ekonomia Online i ka pyetur disa qytetarë lidhur me këtë kontratë. Disa prej tyre u shprehën të pakënaqur me investimin e komunës së Prishtinës.
Bislim Ademit, qytetar i Prishtinës kjo blerje nuk iu duk e arsyeshme.
“Po më doket që s’osht e rrugës sepse ka ma prioritare tjera punë më kry se me ble biçikleta por ata vendosin vet fundi i fundit, s’po e shoh të arsyeshme kurrgjo këtë punë”.
Një qytetar tjeter i quajti këto eksperimente.
Sipas Fetah Dragushës, Prishtina nuk ka infrastrukturë që i përshtatet ngasjes së biçikletave.
“Nuk di, është e çuditshme, këtu udhëheqësia tek ne si në nivelin qendër ashtu edhe lokal, që cili vjen bënë eksperimente, herë ia qëllojnë e më shumë nuk ia qëllojnë hiq, sepse Prishtina ka njëfarë infrastrukture që nuk mund t’i përshtatet biçikletave, për kundër asaj që është e dëshirueshme”.
Rrahim Gashi, u shpreh se duhet të investohet në pensione e arsim.
Ndërkaq, Avdullah Parduzi tha se ky investim është shumë i shtrejtë për komunën e Prishtinës.
“Mendimi im është ndoshta kishin pas nevojë popullata, me e marrë ndonjë biçikletë gratis por si do qoftë, por sa i përket çështjes ka nevojë paratë të shkojnë për shembull drejtë nga pensionet e pleqërisë edhe për shkollimin e fëmijëve, vetëm kisha me iu thanë për të pas kujdes, sidomos me punu me popull jashtëzakonisht, në qoftë se punon me popull atëherë edhe ka prosperitet”.
“Mendoj që është një shumë e shtrenjtë në këtë kohë me u bo investime komuna e Prishtinës 3 000 mijë euro një biçikletë, në këtë varfëri, mendoj se ato janë të mira për me i hjek automjetet sado pak me e mirëmbajte ambientin, sepse ambienti është shumë i ndotur, vetëm në këtë kohë po më duket shumë i shtrenjtë 3 000 euro një biçikletë në këtë kohë, në këtë krizë, për mu është shumë e shtrenjtë se nuk është gjë e keqe por e shtrenjtë”.