Blog

Zëvendësshef i seksionit për bashkëpunim të BE-së në Kosovë, Alessandro Biancardi ka deklaruar se sanksionet e vendosura nga Bashkimi Evropian për Kosovën, do të largohen pasi qeveria të japë përshkallëzimin në përputhje me rekomandimin e BE-së.

Ai në konferecën e Ministrisë së Ekonomisë, me rastin e lansimit të “Thirrjes publike për subvencionim të pajisjeve efiçiente për ngrohje” të financuar nga Bashkimi Evropian (BE).

“Stabiliteti politik është kyç për të siguruar prosperitetin e Kosovës. Situata aktuale politike na bën thirrje të gjithëve që të fokusohemi në de-përshkallëzimin e tensionit në veri. Në këtë kontekst, BE-ja ka miratuar një sërë masash për të bërë të qartë një mesazh dhe ka pezulluar dispozitën për ndihmën e re financiare për Kosovën. Kjo është thënë, dua të theksoj sërish, se ky është një hap i kthyeshëm dhe shkalla jonë e plotë e ndihmës financiare dhe angazhimit politik do të rifillojë sapo qeveria të japë përshkallëzimin në përputhje me rekomandimin e BE-së. Ne sinqerisht shpresojmë se do të jemi në gjendje t’i lëmë pas shumë shpejt të gjitha këto dhe do të kthehemi në fokusin tonë, në reformat që janë kritike për afrimin e Kosovës drejt BE-së.”, u shpreh ai.

I dërguari i Shteteve të Bashkuara të Amerikës (SHBA) për Ballkanin Perëndimor, Gabriel Escobar shpreson se të paktën në mënyrë bilaterale, Shtetet e Bashkuara të mund të punojnë me Kosovën për të gjetur një mënyrë për t’i hequr ato masa në vitin 2024.

“Nuk do të thosha masa. Do të thosha pasoja. Tani, ju them se pasojat, me të cilat ballafaqohet Kosova, është se nëse ata refuzojnë të angazhohen me Bashkimin Evropian, Bashkimi Evropian nuk do të angazhohet për ndihmë shtesë dhe masa shtesë për integrim. Shikoni, unë mendoj se këto masa janë duke pasur ndikim në Kosovë dhe në ekonominë e Kosovës. Shpresoj që të paktën në mënyrë bilaterale, Shtetet e Bashkuara të mund të punojnë me Kosovën për të gjetur një mënyrë për t’i hequr ato masa në vitin 2024. Kështu që, ne do të vazhdojmë të punojmë me Kosovën për ta afruar me Bashkimin Evropian. Por, ne do të kishim dëshirë të shihnim një vullnet politik dhe lëvizje në atë drejtim, gjithashtu….Jo, jo… Kjo është për keqardhje. Pra, dua të them, këto masa janë të pacaktuara derisa të ketë një lëvizje drejt progresit si në [Marrëveshjen e] Ohrit, ashtu edhe në një plan shtensionimi”, ka thënë sot ai.

Përfaqësuesi i komunitetit egjiptian, ish-deputeti Veton Berisha po pretendon se në një libër shkollor në Kosovë ka përmbajtje ofenduese e raciste.

Reagimi i tij ka të bëjë me librin “Shoqëria dhe mjedisi” e klasës së katërt e botuar nga shtëpia botuese ‘Albas’, e cila, sipas tij, u referohet tri komuniteteve jo-shumicë në Kosovë, rom, ashkali dhe egjiptian, si komunitet RAE.

“Si ka mundësi një ministri siç është ajo e Arsimit, një shtëpi botuese sic është ajo ‘Albas’ dhe një autor sic është Vllaznim Balidemaj, mos me pas njohuri që termi famëkeq RAE që është ofendues kur i referohet edhe komunitetit egjiptian bashkë me ata rom dhe ashkali”, tha Berisha, njofton klankosova.tv.

Ai theksoi se “dihet shumë qartë se komuniteti egjiptian është komunitet i veçantë i cili jeton tradicionalisht në Kosovë, ka identitet të tij dhe është kategori kushtetuese dhe ligjore në Kosovë”.

Berisha kërkon nga Ministria e Arsimit, Shkencës, Teknologjisë dhe Inovacionit që deri në korrigjimin e tij, ta largojë atë libër nga përdorimi.

Kryetari i Sindikatës së Bashkuar të Arsimit Shkencës dhe Kulturës (SBAShK), Rrahman Jashraj, ka thënë se ata arsyeshëm e me plot argumente i kanë kundërshtuar tendencat për testim të mësimdhënësve.

Sipas tij në vend të kësaj duhet të bëhet shtimi i inspektorëve të arsimit.

“SBASHK-u ka kundërshtuar arsyeshëm dhe fuqishëm e me plot argumente tendencat e individëve e institucioneve për organizimin e testitit me shkrim për njohuritë e punëtorëve të arsimit dhe ka kërkuar vazhdimisht që të shtohet numri i inspektorëve të arsimit, por jo me çfarëdo kuadrosh, po me individë me tituj të lartë arsimor dhe me një përvojë shumë vjeçare në arsim gjatë secilës ai është dëshmuar me arritje e suksese të larta në arsimimin dhe edukimin e brezave”, ka shkruar Jasharaj në një shkrim dërguar mediave.

Ai ka kritikuar Ministrinë e Arsimit Shkencës dhe Teknologjisë dhe Inovacionit (MASHTI), duke thënë se ajo dhe institucionet e tjera duhet ta dinë se detyrat e inspektorëve të arsimit dallojnë nga detyrat e inspektorëve në sektorë të tjerë

“Një konkurs i dështuar dhe një tjetër ‘i suksesshëm’ i MASHTI-t e i shpallur nga dikush tjetër, vështirë se do të ndihmojë në përmirësimin e cilësisë në arsim. MASHTI dhe institucionet tjera është dashur ta dinë se detyrat e inspektorit të arsimit dallojnë nga detyrat dhe kompetencat e inspektorit të tregut, atij sanitar apo të inspektorit të punës. Teksa këta kanë obligim të monitorojnë dhe të gjejnë lëshimet e shkeljet dhe t’i ndëshkojnë fajtorët. Inspektori i arsimit ka detyrë që të monitorojë punën e punëtorit arsimor dhe të shoh anët pozitive e t’i lavdërojë ato, por edhe të shoh nga afër të metat në punën arsimore të mësimdhënësit dhe pastaj t’i ofrojë atij këshilla konkrete nga përvoja e tij se si të tejkalohen ato të meta me qëllim që mësimdhënësi të jetë edhe më i suksesshëm në punën e përditshme arsimore e edukative me nxënësit”, ka shkruar Jasharaj.

Sipas tij për ta kryer këtë mision, inspektori arsimor, duhet të jetë me ngritje më të lartë profesionale se mësimdhënësi i monitoruar dhe duhet të ketë përvojë të gjatë në arsim.

“Ky inspektor nuk guxon të jetë afër ndonjë subjekti politik, por duhet të jetë i dëshmuar se për arsimimin e brezave ka dhënë gjithë kontributin e mundur. Të tillët na duhen në shkolla e në klasë dhe me të tillët do të përmirësohej në vazhdimësi cilësia në arsim sepse mësimdhënësit do të ndihmoheshin që të jenë edhe më të mirë nesër se sa janë sot”, ka shkruar Jasharaj. Në të kundërtën sipas tij, “inspektorë të rekrutuar me ngritje më të ulët arsimore dhe me përvojë e arritje më të vogla se mësimdhënësi që do ta monitorojnë, irriton dhe krijon situata debatesh e përplasjes mes mësimdhënësit dhe inspektorit apo ‘ekspertit të arsimit’, siç mundohet t’i quaj dikush”, ka shkruar Jasharaj.

Sipas tij me mësimdhënësit duhet komunikuar qetë.

“Nëse MASHTI ka pasur idenë se duke rekrutuar emra të caktuar individësh si inspektorë të krijojnë kontroll ndaj arsimit dhe t’ua sjellin diellin mbi kokë mësimdhënësve ka gabuar shumë. Me mësimdhënësit duhet komunikuar qetë, pa presione dhe me qëllimin më të mirë që ata të mobilizohen e ndihmohen që të jenë edhe më të mirë e më të suksesshëm në misionin e tyre të shenjtë për arsimimin e edukimin e brezave”, ka shkruar Jasharaj.

Edhe pse Komuna e Prishtinës kishte paralajmëruar që sot ne “Dita pa Makina” për 5 orë, sheshi i kryeqytetit do të zgjatej deri tek rrethi me flamur, duke ndaluar qarkullimin e veturave deri në orën 15:00, megjithatë biçikletat dhe trotinetet filluan të largohen nga ora 12:00.

ATV ka siguruar pamjet nga vendi i ngjarjes ku po hiqeshin biçikletat dhe trotinetet, të destinuara për t’u përdorur pa pagesë nga qytetarët me rastin e shënimit të “Ditës Pa Makina”.

Deri më tani, nuk është bërë asnjë njoftim zyrtar lidhur me arsyen e largimit të tyre të parakohshëm. /atvlive.tv

Ka vdekur luftëtari i Ushtrisë Çlirimtare të Kosovës, Daut Rexha, në moshën 60 vjeçare.

Kjo është bërë e ditur nga familjarët, teksa varrimi do të bëhet gjatë ditës së shtune në orën 16:00.

“Me dhimbje të thellë ju njoftojmë se baba jonë, bashkëshorti, familjari, dhe luftëtari i orëve të para të UÇK-së DAUT REXHA, sot ndërroj jetë, në moshën 60 vjeçare”, thuhet në njoftim.

“Varrimi bëhet nesër (e Shtunë) me datën 23.09.2023 në ora 16:00 me Ikindi në varrezat e Dragodanit. I lehtë të qoftë dheu i Kosovës!”.

Me aktivitete të ndryshme po shënohet “Dita Ndërkombëtare Pa Makina”, në Prishtinë, ditë kjo e cila synon sensibilizimin e njerëzve që të shmangin makinat e tyre.

Në kuadër të kësaj dite Ministria e Mjedisit, Planifikimit Hapësinor dhe Infrastrukturës në bashkë organizim me Ministrinë e Arsimit, Shkencës, Teknologjisë dhe Inovacionit, Policinë e Kosovës, Komunën e Prishtinës, OJQ-në “Marakli t’biçiklave”, kanë shënuar këtë ditë duke bërë thirrje sa më shumë qytetarëve që të përdorin mjete që nuk e ndotin ambientin. Me ç ‘rast në kryeqytet nga ora 10:00 deri në orën 15:00, është mbyllur edhe rruga për qarkullim të veturave rruga “Dëshmorët e kombit”, nga bulevardi “Xhorxh Bush”, deri te Rrethi i Flamurit.

Ndërkaq, qytetarët kanë mundësi të marrin pa pagesë, njërën nga 160 biçikletat ose 60 trotinetet për qarkullim nga fillimi i kësaj rruge deri në fund rrethi i Flamurit.

Besmir Kokollari nga Ministria e Mjedisit, Planifikimit Hapësinor dhe Infrastrukturës, derisa ka treguar qëllimin e këtij aktiviteti, bëri kërkesë gjithë qytetarëve që të shfrytëzojnë sa më shumë mjete që nuk e ndotin ambientin.

“Qëllimi i kësaj dite botërore është që të ulim ndotjen që shkaktohet nga makinat duke përdorur biçikletat, trotinetet elektrik, duke përdorur makinat elektrike, gjithashtu duke e promovuar përdorimin e transportit publik i cili e ofron ndjenjën e komunitetit por të njëjtën kohë edhe shkakton sa më pak ndotje dhe një ashtu si ministri kemi bërë kërkesë për çdo vit edhe këtë vit të përdorim sa më pak makinën, të përdorim biçikletat, të përdorim trotinetet elektrik dhe mjetet tjera alternative të cilat shkaktojnë sa më pak ndotje në mënyrë që të kemi ajër sa më të pastër për qytetarët e Kosovës”, tha Kokollari.

Pëllumb Bajqinofci, përfaqësues nga Komuna e Prishtinës, tha se nuk mjafton një ditë në vit për promovimin e lëvizjes alternative në kryeqytet. Ai ka shtuar se komuna është duke punuar që të rregullojë infrastrukturën e nevojshme për biçikleta dhe trotinet.

“Nuk mjafton një ditë në vit për promovimin e lëvizjes alternative në kryeqytet. Kryeqyteti përkundër vështirësive që i ka më rritjen e banoreve edhe përkundër asaj se biçikleta për para ka qenë një mjetë i cili më shumë është shfrytëzuat për rekreacion. Kemi filluar me vetëdijesim që disa vite në promovimin e biçikletës si formë e transportit. Andaj sigurisht që me ndihmën e gjitha organeve të tjera, kryeqyteti është duke tentuar të rregullojë edhe atë pjesën e shtegut për biçikleta. Jemi afër rregullimit edhe të aprovimit të rregullores për trotinet, lirimin e hapësirave publike para se të dalim në lëvizje motorike, lirimin e trotuareve për këmbësor”, tha Bajqinofci.

Berat Rakovica nga OJQ-në “Marakli t’biçiklave”, shprehet se më mirë do të ishte që të mos mbyllen rrugët, por që të krijohet infrastruktura e duhur që rrugët të jenë të shfrytëzuat edhe nga makinat edhe nga biçikletat.

“Krejt çka kisha pas dëshirë si përfaqësues i komunitetit të çiklisteve Merakli t’biçikletave, është që kjo ditë mos të shënohet vetëm një herë në vit, mos me pas nevojë më i mbyll rrugët, por t’i shfrytëzojmë ato se bashku me makinat. Pra të përdorën rrugët e njëjta apo me shenjëzime adekuat edhe nga çiklistë apo dhe trotinetet”, tha ai.

Drejtori i drejtorisë regjionale të Prishtinës nga Policia e Kosovës, Basri Shabani, tha se PK-ja, ka marrë të gjitha masat operative që të sigurohen qytetarët gjatë këtij aktiviteti.

“Ne kemi qenë si PK në kontakt të vazhdueshme me këshillin organizativ dhe të gjitha kërkesat që kanë dalë nga këshilli organizativ, ne i kemi përkrahë. I kemi marrë masat operative që sot t’i sigurojmë edhe qytetar edhe pjesëmarrësit në këtë aktivitet”, tha ai.

Mes tjerash, përfaqësuesi nga komuna, Bajqinofci i pyetur se nëse mbyllja e kësaj rruge është një testim, që kjo të bëhet në të ardhmen, siç është premtuar nga kryetari Përparim Rama, tha se ky nuk është një test por që ka lidhje vetëm me promovimin e lëvizjes së lirë.

“Sigurisht jo nuk e shohim si test, nuk ka lidhje. Realisht ka lidhje me premtimin e kryetarit Rama gjatë fushatës elektorale, ju e dini shumë mirë se kryetari Rama është duke qëndruar parapa premtimi të tij. Synimi i tij, ka qenë se do të jetë këmbësori i para e pastaj format e tjera të lëvizjes dhe automjete dhe format e tjera të fundit. Dita e sotme kalimi nëpër këtë bulevardin Dëshmoret e Kombit ka lidhje vetëm me promovimin e asaj lëvizje së lirë. Pajtohem plotësisht me Beratin Marakli t’biçiklave, ku thotë se nuk mjafton vetëm një ditë edhe nuk kemi nevojë me mbyll rrugë për lëvizjen e biçikletave, po tentojmë të krijojmë shtigje të reja ku biçikleta do të jetë pjesë e komunikacionit dhe nuk do ti pengoj të tjerët”, shtoi Bajqinofci.

Po ashtu, në shënim të kësaj dite nga ora 19:30 do të shfaqet filmi “Bike on Cinema” në Parkun e Tokbashqës. /KP

Zëvendësndihmës Sekretari i Mbrojtjes për Politikat Evropiane dhe të NATO-s, Spencer Boyer bashkëkryesoi konsultimet dypalëshe në fushën e Mbrojtjes SHBA-Shqipëri në Tiranë, me Sekretaren e Përgjithshme të Ministrisë së Mbrojtjes, Gelardina Prodani, njoftoi sot ambasada e SHBA në Tiranë.

Ministri shqiptar i Mbrojtjes, Niko Peleshi mbajti fjalën e hapjes.

Delegacionet ndanë këndvështrimet mbi klimën e sigurisë në Ballkanin Perëndimor, veçanërisht pas pushtimit të pajustifikuar dhe brutal të Ukrainës nga Rusia.

Palët diskutuan gjithashtu bashkëpunimin e vazhdueshëm dypalësh në fushën e sigurisë, i cili synon zhvillimin e aftësive të ushtrisë shqiptare për këmbësorinë, forcat ajrore dhe kontrollin e municioneve shpërthyese, si dhe mbrojtjen kibernetike.

Gjithashtu, u diskutuan përpjekjet për të rritur kapacitetin institucional të Ministrisë së Mbrojtjes të Shqipërisë për menaxhimin e efektshëm të logjistikës dhe burimeve, si dhe rekrutimin dhe mbajtjen e personelit.

Aktiviteti kulmoi me nënshkrimin nga bashkëkryesuesit të një dokumenti kuadër, i cili synon të drejtojë zbatimin e vazhdueshëm të nismave dypalëshe të bashkëpunimit për sigurinë.

Udhëheqësit ripohuan rëndësinë e partneritetit strategjik SHBA-Shqipëri për të mbrojtur vlerat e përbashkëta dhe çuar përpara të interesave të përbashkëta në fushën e sigurisë.

Komisioni për Mbikëqyrjen e Financave Publike ka shqyrtuar raportin e auditimit për pasqyrat financiare vjetore të Zyrës së Rregullatorit të Energjisë (ZRrE) për vitin 2022.Në raportin e auditimit të paraqitur nga deputetja e AAK-së, Albana Bytyçi doli më pah tri parregullsi në ZRrE.

Sipas saj, në raport potencohet se ZRrE-ja nuk ka inkasuar taksat vjetore për disa vite nga ndërmarrja publike në Prishtinë, Termokos, nuk e ka bërë regjistrimin e pasurisë për vitin 2022 dhe po ashtu nuk është përdorur sistemi E-pasuria.

“Sipas konkluzionit tonë transaksionet e kryera në procesin e ekzekutimit të buxhetit të ZRrE-së kanë qenë në të gjitha aspektet materiale në pajtueshmëri me kriteret e përcaktuara të auditimit që burojnë nga legjislacioni i zbatueshëm për subjektin e audituar në kontekstin e përdorimit të burimeve financiare”, tha ajo.

Në arsyetimin e tij, drejtori i bordit të ZRrE-së, Ymer Fejzullahu, tha se borxhi i Termokosit është gjatë viteve 2009-2012, që sipas tij në atë periudhë gjendja financiare e ngrohtores së kryeqytetit ka qenë e keqe.

Ai arsyetoi edhe mos regjistrimin e pasurisë për vitin 2022 të ZRrE-së dhe po ashtu mospërdorimin e sistemit “E-pasuria” që është theksuar në raportin e auditorit.

“Gjatë vitit 2022, ZRrE-ja ka pasur të hyra rreth 1 milion e 174 mijë euro, prej të cilave vetëm 708 mijë euro janë shpenzuar nga ana e ZRrE-së, ndërsa mbi 400 mijë euro janë kthyer në buxhetin e Kosovës. Për me përshkruar shumë shkurt ky buxhet 700 mijë euro ka pasur paga dhe mëditje në 92 për qind, pasi dihet që ZRrE-ja ka qenë më dy anëtarë të bordit jo të kompletuar. Mallra dhe shërbime janë 97 për qind, ndërsa shpenzimet komunale varet nga taksat komunale…Ne kemi pranuar këto tri gjetje të cilat kanë qenë nga ana e auditorit. Një prej gjetjeve ka qenë mos regjistrimi i pasurisë. Pasi investimet që janë realizuar 99 për qind janë në IT dhe arsyeja kryesore që s’janë regjistruar është se ju e dini që ka pasur një keqpërdorim në Ministrinë e Financave dhe ajo shtrënguar procesin e qasjes”, tha ai.

Megjithatë, deputetja e LVV-së, Mirlinda Tishukaj-Sadiku, tha se ZRrE-ja është dashur të merr veprime ligjore për inkasimin e borxhit nga Termokos.

“Tash kompania është në gjendje më të mirë financiare, pasi këtë vit po i shtohen edhe 40 mijë konsumatorë dhe të hyrat do të jenë më të larta. Borxhi është borxh, pavarësisht rënies dhe ngritjes financiare. Besoj se ligjërisht jeni të obliguar për të çuar rastin në gjykatë apo tek përmbaruesi privat”, tha ajo.

Në anën tjetër, deputetë të tjerë nga mazhoranca i dhanë mbështetje bordit të ZRrE-së, derisa potencuan se disa nga parregullsitë e paraqitura nga auditori janë më shumë teknike./KosovaPress/