ATV

Blog

  • ​Super derbi sot mes Holandës e Francës

    ​Super derbi sot mes Holandës e Francës

    Sonte me fillim nga ora 20:45 stadiumi “Johan Cruijff Arena” i Amsterdamit do të jetë nikoqir i super derbit mes Holandës e Francës, ndeshje kjo e vlefshme për xhiron e shtatë të fazës së grupeve të kualifikimeve drejt Kampionatit Evropian Euro 2024.

    Në xhiron e fundit të zhvilluar në kuadër të këtyre kualifikimeve, Holanda e mposhti Irlandën 2:1, kurse Franca u mposht në një miqësore nga Gjermania 2:1, raporton KosovaPress.

    Momentalisht, Franca kryeson Grupin B me 15 pikë pas pesë ndeshjeve të zhvilluara, krahas Holandës që ka nëntë pikë në vendin e dytë, por me një ndeshje më pak të zhvilluar.

    Takimi i fundit mes këtyre dy kombëtareve daton në muajin mars të këtij viti, ku asokohe Franca e deklasoi 4:0 Holandën.

    Sa i përket ndeshjes së sotme, të dy kombëtaret do të kenë mungesa të shumta, ku për Holandën nuk do të paraqiten Berghuis, Depay, Flekken, Gakpo, Koopmeiners, Lang, Malacia, Timber, De Jong dhe De Ligt, kurse te Franca mungojnë Disasi, Fofana, Kounde, Nkunku, Upamecano dhe Veretout.

    Formacionet e mundshme i gjeni më poshtë.

    Holanda (3-4-3): Verbruggen; De Vrij, Van Dijk, Ake; Dumfries, De Roon, Veerman, Blind; Simons, Weghorst, Malen

    Franca (4-2-3-1): Maignan; Pavard, Konate, L. Hernandez, T. Hernandez; Tchouameni, Rabiot; Dembele, Griezmann, Mbappe; Giroud

  • Dy shqiptarë padisin Google në SHBA për diskriminim të gjuhës shqipe

    Dy shqiptarë padisin Google në SHBA për diskriminim të gjuhës shqipe

    Gjiganti teknologjik Google është paditur në Gjykatën e Lartë të Kalifornisë për mospërfshirjen e gjuhës shqipe në gjuhët e mbështetura nga Google.

    Padia është bërë nga shtetasi amerikan Haki Dervishi, dhe Neshad Asllani, mjek kosovar, anëtar i bordit në organizatën “Dekada për të Drejtat e Njeriut” në New York.

    Ky diskriminim sipas tyre ka pasur pasoja të mëdha në media, marketing, investime të huaja, zhvillim ekonomik dhe teknologjik në Shqipëri, Kosovë dhe kudo që flitet gjuha shqipe.

    “Paditësit besojnë se diskriminimi i vazhdueshëm i gjuhës shqipe nga Google ka bërë që folësit e gjuhës shqipe të diskriminohen nga pjesa tjetër e Evropës dhe botës në zhvillimin e biznesit, në marketing dhe gazetari, pasi janë të përjashtuar nga platformat Google Ads, Google Adsense dhe Google Admob”, thuhet në njoftimin për media të dërguar nga Dervishi dhe Asllani.

  • Sandro Tonali dhe Nicolo Zaniola largohen nga kombëtarja e Italisë, arsyeja bastet

    Sandro Tonali dhe Nicolo Zaniola largohen nga kombëtarja e Italisë, arsyeja bastet

    Sandro Tonali i Newcastle United dhe Nicolo Zaniolo i Aston Villas janë marrë në pyetje nga policia në kampin stërvitore të Coverciano të Italisë, si pjesë e një hetimi për platformat e paligjshme të basteve dixhitale.

    Të dy lojtarët janë lejuar nga detyra ndërkombëtare teksa Italia përgatitet të përballet me Maltën në Bari nesër mbrëma dhe Anglinë në Wembley të martën e ardhshme.

    Në një deklaratë nga Shoqata Italiane e Futbollit (FICG) thuhet: “Federata njofton se sot pasdite Prokuroria Publike e Torinos ka kryer hetime për lojtarët Sandro Tonali dhe Nicolò Zaniolo, të cilët aktualisht po stërviten me kombëtaren në Qendrën Federale të Stërvitjes Coverciano.

    “Pavarësisht natyrës së ngjarjeve, duke pasur parasysh se dy lojtarët nuk janë në gjendjen e nevojshme për t’u përballur me ndeshjet e planifikuara për ditët në vijim, Federata ka vendosur që edhe për mbrojtjen e tyre t’i lejojë ata të kthehen në klubet e tyre përkatëse.”- ka shkruajtur FICG.

    Mesfushori i Juventusit, Nicolo Fagioli, ishte i pari që u përfshi në hetim, ku dhe pranoi përfshirjen gjatë dëshmisë me prokurorët në Torino, duke dorëzuar me vetdëshirë telefonin e tij celular.

    Skandali i basteve në Serie A është ende në fazat e para dhe raportet sot sugjerojnë se të paktën 10 lojtarë të tjerë janë të përfshirë.

    Kujtojmë që neni 24 i kodit të drejtësisë sportive të FIGC-së ndalon vendosjen ose marrjen e basteve, drejtpërdrejt ose tërthorazi në ngjarjet e organizuara nga FIGC, FIFA dhe UEFA. Kushdo që e bën këtë rrezikon një ndalim tre-vjeçar nga sporti dhe një gjobë prej të paktën 25,000 €.

  • Kurti: Terroristët e Banjskës kanë pasur plane për sulme në 37 pika

    Kurti: Terroristët e Banjskës kanë pasur plane për sulme në 37 pika

    Kryeministri i Kosovës, Albin Kurti, në një intervistë për gazetën franceze “Liberation” ka folur për sulmin e 24 shtatorit në Banjskë ku mbeti i vrarë polici kosovar, Afrim Bunjaku.

    Kurti ka thënë se synimi i grupit të Banjskës ka qenë aneksimi i pjesës Veriore dhe e ka cilësuar akt agresioni të shtetit serb që ka shkelur sovranitetin dhe sigurinë kombëtare të Kosovës.

    Kreu i Qeverisë ka thënë se vlera e armëve të kapura shkon më shumë se 5 milionë euro vlerë.

    Ai ka zbuluar se sipas hartave që janë gjetur, grupi terrorist ka pasur plane për të sulmuar në 37 pika,

    “Po sigurisht. Ky është një akt agresioni i Serbisë, i cili cenoi sovranitetin dhe sigurinë tonë kombëtare. Vlera e armëve dhe pajisjeve të sekuestruara arrin në më shumë se 5 milionë euro. Terroristët kishin harta dhe plane për të sulmuar në 37 pika“, ka thënë Kurti.

    I pyetur nëse i beson Milan Radojçiqit që doli dhe mori përgjegjësinë për sulmin, Kurti ka thënë se “sigurisht nuk i beson”.

  • Shitën bileta të falsifikuara deri në 400 euro, arrestohen 2 persona

    Shitën bileta të falsifikuara deri në 400 euro, arrestohen 2 persona

    Kërkesa për bileta në ndeshjen Shqipëri-Çeki ishte shumë e lartë. Kjo bëri që shumë tifozë të ofronin çmime të larta për ta blerë një të tillë.

    Megjithatë ka patur edhe shumë raste mashtrimi. Policia njoftoi këtë të premte se janë vënë në pranga 2 persona, njëri 35 vjeç dhe tjetri 31 vjeç. Ata falsifikuan të paktën 60 bileta dhe i shitën për çmime deri në 400 Euro.

    “Specialistët për Hetimin e Krimeve Ekonomike dhe Financiare të DVP Tiranë, në vijim të veprimeve të thelluara hetimore për dokumentimin e plotë ligjor të rastit të shitjes së biletave për ndeshjen Shqipëri-Çeki, me çmime shumë të larta, me anë të mashtrimit, që u godit ditën e djeshme, kanë vënë në pranga 2 nga shtetasit që ishin në hetim për këtë rast, konkretisht: A. O. dhe S. A., të dy banues në Tiranë. Nga veprimet e thelluara hetimore ka rezultuar se këta shtetas, në bashkëpunim me njëri-tjetrin, kanë falsifikuar biletat për ndeshjen Shqipëri-Çeki dhe i kanë shitur ato me çmime deri në 400 Euro”, njoftoi policia.

    Pasi qytetarët kanë paraqitur këto bileta, për të hyrë në stadium, janë krijuar probleme teknike sepse biletat ishin të dubluara.

    Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme./tvklan.al

  • Escobar: Marrëveshja e Ohrit të zbatohet sa më shpejt nga Kosova dhe Serbia

    Escobar: Marrëveshja e Ohrit të zbatohet sa më shpejt nga Kosova dhe Serbia

    Zëvendësndihmës sekretarit amerikan, Gabriel Escobar ka theksuar rëndësinë e marrëveshjes së Ohrit dhe bëri thirrje për zbatimin e saj të shpejtë si nga Kosova ashtu edhe nga Serbia.

    Stabiliteti në Ballkan dhe paqja më e gjerë rajonale ishin temat kryesore gjatë takimit të Odës Ekonomike Amerikane në Kosovë dhe Escobar.

    Në njoftimin e OEAK-së thuhet se gjatë diskutimit në Departamentin e Shtetit të SHBA-së, zëvendësndihmës sekretari Escobar nënvizoi lidhjen e rrënjosur thellë ndërmjet Shteteve të Bashkuara dhe popullit të Kosovës.

    “Ai më tej theksoi rëndësinë e marrëveshjes së Ohrit dhe bëri thirrje për zbatimin e saj të shpejtë si nga Kosova ashtu edhe nga Serbia”, citohet Escobar në komunikatë.

    Delegacioni i Odës Amerikane, i udhëhequr nga drejtori ekzekutiv, Arian Zeka, foli për raste të mundësive të humbura të biznesit në Kosovë për shkak të tensioneve në rajon. Në përgjigje të kësaj, zëvendësndihmës sekretari Escobar theksoi se normalizimi i marrëdhënieve do të zhbllokonte rritjen signifikante ekonomike për Kosovën dhe rajonin më të gjerë.

    Në komunikatë thuhet po ashtu se të dyja palët ranë dakord për rëndësinë e madhe të stabilitetit dhe paqes në Ballkan, si elemente themelore për prosperitet.

    “Më tej, u diskutua për ndërlidhjen midis marrëdhënieve të normalizuara ndërmjet Kosovës dhe Serbisë dhe stabilitetit të përgjithshëm rajonal”, thuhet në njoftim.

    Duke theksuar vizionin e përbashkët për të ardhmen, Escobar dhe përfaqësuesit e Odës Amerikane u pajtuan se rruga përpara për Kosovën dhe vendet e tjera të Ballkanit varet nga hyrja e tyre në Bashkimin Evropian. Po ashtu në njoftim thuhet se ata u pajtuan se një integrim i tillë do të sillte një epokë të mundësive të shtuara ekonomike, si dhe do të forconte harmoninë rajonale.

  • Pamje nga festa e “çmendur” e futbollistëve shqiptarë

    Pamje nga festa e “çmendur” e futbollistëve shqiptarë

    Shqipëria triumfoi ndaj Republikës Çeke gjatë së enjtes, duke bërë një hap të madh drejt kualifikimit në Kampionatin Evropian që do të mbahet në Gjermani, në vitin e ardhshëm.

    Kombëtarja shqiptare renditet e para në grupin E, me 13 pikë të grumbulluara nga gjashtë ndeshje, me katër fitore, një barazim dhe asnjë humbje.

    Pas ndeshjes festa ishte e madhe si tek tifozët, njashtu edhe te lojtarët në dhomën e zhveshjes.

    Përndryshe, Shqipëria do ta luajë edhe një ndeshje gjatë këtij, muaji miqësoren ndaj Bullgarisë.

  • Kurti: Pas sulmit terrorist të 24 shtatorit, dialogu me Serbinë s’mund të vazhdojë sikur s’ka ndodhur asgjë

    Kurti: Pas sulmit terrorist të 24 shtatorit, dialogu me Serbinë s’mund të vazhdojë sikur s’ka ndodhur asgjë

    Kryeministri i vendit, Albin Kurti, tha se me senatorët amerikanë Jeanne Shaheen dhe Peter Welch është diskutuar për agresionin e 24 shtatorit.

    Kurti shtoi se dialogu me Serbinë nuk mund të vazhdojë sikur nuk ka ndodhur asgjë.

    “Mbi të gjitha dëshiroj të falënderoj ata për mbështetjen e fortë ndaj Kosovës, veçanërisht pas sulmit të 24 shtatorit. Siguria në Kosovë ishte pika kryesore e temës sonë dhe ua prezantova senatorëve të dhënat e freskëta pas sulmit të 24 shtatorit”.

    “Përfshirja e Serbisë ka ndodhur të paktën në katër shtresa për mbështetjen e sulmeve terroriste në Banjskë. Kemi dëshmi se sulmi ka qenë pjesë e një plani më të gjerë për aneksimin e veriut të Kosovës përmes sulmeve të koordinuara, përmes një themelimi të një korridori për furnizim të armëve në veriun e Kosovës”.

  • Konfirmohet lëndimi i rëndë për Albion Rrahmanin, i futet operimit

    Konfirmohet lëndimi i rëndë për Albion Rrahmanin, i futet operimit

    Në ndeshjen e mbrëmshme Andorrë – Kosovë, në kuadër të kualifikimeve për Euro 2024, sulmuesi ynë Albion Rrahmani ka pësuar lëndim, me ç’rast menjëherë është dërguar për ekzaminime mjekësore në spitalin e qytetit në Andorra La Vella. Pas këtyre ekzaminimeve ka rezultuar se ai ka pësuar frakturë në kyçin e këmbës së djathtë dhe do t’i nënshtrohet operimit.

    Të gjithë bashkëlojtarët dhe stafi i Kombëtares kanë qenë të prekur nga lëndimi i Albionit, por presin që ai ta kalojë sa më shpejtë periudhën e rehabilimit dhe të kthehet edhe më fuqishëm për ta treguar talentin e tij në skenën ndërkombëtare.

    FFK është e përkushtuar që të kujdeset për shëndetin dhe mirëqenien e Albionit dhe do të bashkëpunojë ngushtë me klubin e tij Rapid Bukuresht dhe ekspertët mjekësorë për të siguruar që operacioni dhe rehabilitimi i tij të jetë sa më i suksesshëm.

  • ​Osmani kërkon garanci për sigurinë e Kosovës: Të mbrohen kufiri me Serbinë

    ​Osmani kërkon garanci për sigurinë e Kosovës: Të mbrohen kufiri me Serbinë

    Presidentja e Kosovës, Vjosa Osmani, ka kërkuar nga ShBA-ja të mbajë përgjegjëse Serbinë për aktin e agresionit ndaj Kosovës.

    Pas takimit me senatorët amerikanë të premten, Osmani nënvizoi nevojën për të rritur garancitë e sigurisë për Kosovën, sidomos për mbrojtjen e kufirit me Serbinë.

    Osmani po ashtu kërkoi nga Serbia që t’i dorëzojë institucioneve kosovare të gjithë terroristët që morën pjesë në sulmin e 24 shtatorit në Banjskë të Zveçanit, ku mbeti i vrarë rreshteri policor, Afrim Bunjaku.

    Ndërkaq, potencoi se Kosova do të vazhdojë të jetë e përkushtuar për të punuar ngushtë me aleatët ndërkombëtar, veçmas ShBA-në.

    “Gjëja më e rëndësishme në këtë moment në mënyrë që të parandalohen akte të tilla agresioni në të ardhmen, që do të destabilizonin tërë rajonin tonë, është që Serbia të mbahet përgjegjëse për aktin e agresionit. Po ashtu, t’i dorëzojë terroristët në Republikën e Kosovës që të përballen me sistemin tonë të drejtësisë, si dhe të rriten garancitë e sigurisë në raport me Kosovën, që të mbrohen kufiri Kosovë-Serbi nga sulmet e tilla në të ardhmen”, tha ajo.

    Në anën tjetër, senatorja amerikane, Jeanne Shaheen, shprehu mbështetjen ndaj Kosovës për sulmin terrorist të 24 shtatorit.

    Ajo theksoi se të gjithë përgjegjësit duhet të japin llogari para sistemit të drejtësisë, derisa shtoi se Serbia duhet të bashkëpunojë në këtë drejtim.

    “Është shumë e rëndësishme, siç e përmendi presidentja Osmani që përgjegjësit për ngjarjen e 24 shtatorit të japin llogari. Shpresoj që Serbia do të bashkëpunojë për këtë çështje dhe të gjithë përgjegjësit të dalin para drejtësisë dhe sundimit të ligjit. Kjo na tregon se për një stabilitet dhe paqe afatgjate në Kosovë, ka mundësi për të vazhduar me mbështetjen e BE-së dhe ShBA-së, që të gjendet një bashkëjetesë afatgjate dhe paqësore me Serbinë. Kjo është shumë e rëndësishme për qytetarët e Kosovës”, tha ajo.

    Pas takimit me Osmanin, senatorja Jeanne Shaheen bashkë me senatorin Peter Welch, u takuan me kryeministrin Albin Kurti.

    Kjo është vizita e parë e përfaqësuesve të lartë të ShBA-së në Kosovë, pas aktit të agresionit të Serbisë në Kosovë më 24 shtator./KP