ATV

Blog

  • Nis gjykimi ndaj ish nënkryetarit të Kllokotit, Sasha Mirkoviç

    Nis gjykimi ndaj ish nënkryetarit të Kllokotit, Sasha Mirkoviç

    Përgatiti: Nora Luta

    Ish-nënkryetari i Komunës së Kllokotit, Sasha Mirkoviq, është ulur sërish në bankën e të akuzuarit.

    I dënuar për keqpërdorim të detyrës zyrtare nga Gjykata e Gjilanit, Mirkoviq do të ketë një tjetër ballafaqim me drejtësinë, tani në Gjykatën e Prishtinës, për një tjetër vepër penale, cenim të përcaktimit të lirë të votuesve.

    Prokuroria Speciale e Kosovës e akuzon Mirkoviqin se kishte siguruar vota në mënyrë të kundërligjshme gjatë zgjedhjeve të 14 shkurtit të vitit 2021.

    Sipas aktakuzës, ai bashkë me kryetarin e Kllokotit, të dënuarin Bozhidar Dejanoviq, i kishin kërcënuar qytetarët serbë të kësaj komune se do t’i largonin nga puna, duke iu kërkuar që të votojnë Listën Serbe, dhe partinë e Ardiana Hoxhiqit.

    Por të hënën, në shqyrtimin fillestar Mirkoviq e ka mohuar fajësinë.

    Aktakuza ndaj Mirkoviqit është ngritur më 14 gusht të këtij viti.

    Sipas aktakuzës, në janar të vitit 2021, gjatë periudhës kohore të zgjedhjeve të parakohshme parlamentare të 14 shkurtit 2021, Mirkoviq në cilësinë e nënkryetarit të Komunës, bashkë me kryetarin dhe persona të tjerë, ndikuan në vullnetin zgjedhor të qytetarëve serbë të kësaj komune, duke i kërcënuar, duke i kanosur e duke ushtruar presion.

  • Sulmohet fizikisht shtëpiaku i shkollës “Enver Hadri”, në Vushtrri

    Sulmohet fizikisht shtëpiaku i shkollës “Enver Hadri”, në Vushtrri

    Përgatiti: Kastriot Tahiri

    Xhevdet Aliu, shtëpiak në shkollën fillore “Enver Hadri”, në Smrekonicë të Vushtrrisë, doli në punë edhe të dielën për t’i larguar mbeturinat që mbetën nga rinovimet që po kryhen aty.

    Por, mesdita e së dielës ishte krejt e pazakontë për të, pasi që thotë se u sulmua fizikisht nga njëri nga punëtorët e operatorit ekonomik që po kryen punimet.

    Menaxhmenti i shkollës e, po ashtu, edhe komuna e dënuan sulmin, derisa shpresojnë që raste të tilla të mos përsëriten më.

    Por, krejt këto akuza po i hedh poshtë pronari i kompanisë, që po i kryen punimet në shkollën e Smrekonicës. Madje, Isa Haxha krejt këtë situatë e quan inskenim.

    Ndërkaq, ATV-ja, gjatë ditës ka kontaktuar edhe zëdhënësin e policisë për rajonin e Mitrovicës Avni Zahiti, i cili përmes telefonit, tha se i dyshuari është marrë në pyetje në stacionin policor të Vushtrrisë, por ai pas intervistimit është liruar në procedurë të rregullt.

  • Të enjten dy seanca plenare, hidhen në votim marrëveshjet ndërkombëtare

    Të enjten dy seanca plenare, hidhen në votim marrëveshjet ndërkombëtare

    Përgatiti: Armand Hoti‘

    Të enjten do të mbahen dy seanca plenare, ku deputetët do të votojnë edhe për disa marrëveshje ndërkombëtare.

    “Marrëveshja ndërkombëtare që do të hidhet në votim është mirë që të kuptohet nga publiku. Janë dy marrëveshje të financuara nga qeveria gjermane, një marrëveshje për bujqësi për zonën malore me qeverinë gjermane, tjetra është për KOST-in, sa i përket riparimit të linjave të fuqisë 110 dhe 220. Një marrëveshje tjetër që hidhet në votim është me Qeverinë e Danimarkës sa i përket përdorimit të burgjeve të Kosovës, një marrëveshje tjetër është linja hekurudhore Prishtinë-Mitrovicë, një projekt jashtëzakonisht i rëndësishëm”, tha deputeti i LV-së, Armend Muja.

    Mirëpo, që sot PDK-ja ka treguar se si do të veprojë për votimin e marrëveshjeve ndërkombëtare.

    “Qëndrimi ynë është debati rreth marrëveshjeve ndërkombëtare, nuk është një debat doktrinar, por problemi me marrëveshje ndërkombëtare, është që nuk ka të bëjë as a e votojnë apo nuk e votojnë, problemi është që Kosova është nën sanksione. Dhe meqë Kosova është nën sanksione, ato të holla nuk vijnë fare në Kuvend të Kosovës. Dhe kjo është e vërteta që Qeveria do të duhej që t’ua thotë qytetarëve të Kosovës. Ky vend vazhdon të mbetet nën sanksione edhe pas 24 shtatorit, andaj ne kemi pritur që Qeveria të kryejë punën e saj dhe është gjendje që të bindë partnerët tanë që t’i vendosin sanksione Serbisë, pas një akti të agresionit dhe sulmit terrorist”, tha deputeti i PDK-së, Enver Hoxhaj.

    Ndërsa, shefi i Grupit parlamentar të AAK-së, Besnik Tahiri, duke kritikuar Qeverinë, përmendi se 2024-ta do të jetë vit i eksodit.

    “24 shtatori ka qenë një sulm terrorist ndaj Kosovës, sovranitetit tonë, i sponsorizuar nga Serbia. Këtë as nuk duhet ta përdorë Qeveria, as nuk duhet ta përdorim ne. Sepse është detyrë e jona, është detyrë e një deputeti që ta mbrojë sovranitetin. Ajo që ne si Aleancë na dhemb, është totalisht neglizhenca e Qeverisë, në raport me temat që janë kruciale për vendin tonë. Ekonomia e Kosovës është para një bllokade, nuk është vështirë për ta kuptuar. Humbja e shpresës në sektorin publik kurrë s’ka qenë më e madhe, duke u nisur prej policëve dhe gjithë të tjerëve. Jemi të brengosur për janarin e vitit 2024 që do të jetë vit i eksodit”, tha Tahiri.

    Në seancën e fundit, marrëveshjet ndërkombëtare nuk kanë arritur të votohen në mungesë të kuorumit.

  • Vdekja e ‘’arkitektit’’ të Pavarësisë së Kosovës, Sejdiu: Ahtisaari dhe ne mbështesnim vetëm një formulë

    Vdekja e ‘’arkitektit’’ të Pavarësisë së Kosovës, Sejdiu: Ahtisaari dhe ne mbështesnim vetëm një formulë

    Përgatiti: Armand Hoti

    Martti Ahtisaari politikani shumë vjeçar dhe Presidenti i Finlandës në periudhën 1994 – 2000, i cili qe edhe ndërmjetësuesi kryesor i Kombeve të Bashkuara për zgjidhjen e statusit të Kosovës, vdiq në moshën 86 vjeçare.

    Presidenti aktual i Finlandës, Sauli Niinistö, e cilësoi Ahtisaarin si President i kohëve të ndryshimit dhe njeriu që shpiu Finlandën në epokën globale dhe atë të BE-së.

    “Me pikëllim të thellë morëm lajmin për vdekjen e presidentit Martti Ahtisaari. Marti Ahtisaari besonte në njerëzit, qytetërimin dhe mirësinë, dhe ai jetoi një jetë të mrekullueshme, të jashtëzakonshme. Ai ishte presidenti i kohëve të ndryshimit, i cili e çoi Finlandën në epokën globale të BE-së”, tha Niinistö.

    Dokumenti i njohur si Pakoja e Ahtisarit, ishte bazë për zgjedhjen e statusit të Kosovës, pasi Kosova, duke qenë protektorat ndërkombëtar që nga viti 1999, paraprakisht kishe plotësuar disa standarde të funksionimit demokratik dhe të drejtave të komuniteteve.

    Dokumenti në fjalë është po thuajse në tërësi i adoptuar në Kushtetutën e Kosovës përfshi pjesën e garancive dhe privilegjeve për komunitetin serb në Kosovë.
    Ish-Presidenti i Kosovës, Fatmir Sejdiu shpreh dhimbjen e tij për ndarjen nga jeta të Martti Ahtisaarit dhe e kujton një moment vendimtar.

    “Kur ai ka qenë afër përfundimit të projektit të tij, pra afër propozimiz gjithëpërfshirës më ka pyetur se ‘’a do të pranonit që Kosova të jetë e pavarur por e mbikëqyrur ndërkombëtarisht për një periudhë të caktuar?’’. Nuk kam hezituar të shkojë në të gjitha shkronjat për të dhënë përgjigjen. Menjëherë kam thënë po”, tha Sejdiu.

    Përkundër modaliteteve për statusin e Kosovës që pala serbe pat ofruar në kuadër të procesit të Vjenës, sipas presidentit Sejdiu, ato nuk ishin opsion për ish-diplomatin Ahtisaari.

    “Në përplasjet që kem pas me ta është thënë që Kosova nuk mundë të pavarësohet Kosova është pjesë e Serbisë…pastaj kanë qenë shumë formula që kanë dhënë edhe të tjerë çështja Honkongut e të tjera, modele të llojllojta por ne kemi pasur një formulë, Ahtisari ka pasur një formulë”, tha Sejdiu.

    Disa muaj pas shpalljes së pavarësisë së Kosovës Martti Ahtisaari u nderua me çmimin Nobel për paqe.

    Për këto 15 vjet, disa herë janë dhënë ide që Pakoja e Ahtisaarit të hapet, ose që të negociohet zgjidhje e tipit Ahtisaari+, mirëpo, sipas ish Presidentit Sejdiu, Kushtetuta e Kosovës mund të ndryshohet për shkak të dinamikave të brendshme politike, po assesi jo si pasojë e dialogut ose negociatave me akterë të jashtëm!

    Gjatë angazhimit të tij diplomatik, Marti Ahtisari kontribuoi në zgjidhjen e konflikteve në Evropë, Afrik dhe Azi. Ai qe personalitet i rëndësishëm edhe në bisedimet për paqe në Bosnje dhe Hercegovinë.

  • Në aksionin e inspektimeve në regjionin e Prizrenit, AUV mbyll 5 lokale ‘Fast Food’ dhe inicion 6 kundërvajtjeje

    Në aksionin e inspektimeve në regjionin e Prizrenit, AUV mbyll 5 lokale ‘Fast Food’ dhe inicion 6 kundërvajtjeje

    Agjencia e Ushqimit dhe Veterinarisë sot me date 16.10.2023, në regjionin e Prizrenit ka zhvilluar aksion kontrolli mbi lokalet e gastronomisë qe shërbejnë ushqime të shpejta ( Fast Food).

    Në këtë aksion janë përfshirë komuna e Prizrenit dhe Malishevës, përmes 6 ekipeve inspektuese të udhëhequra nga Koordinatori i zyrës regjionale të AUV-së në Prizren, kanë arritur të realizojnë 28 inspektime të detajuara sipas urdhrit të Ministrit të MBPZHR-së dhe Drejtorit Ekzekutivë të AUV-së.

    Nga 19 inspektimet në Prizren dhe 9 inspektimet në Malishevë janë mbyllur 5 lokale, ndërsa janë iniciuar 6 lëndë kundervajtëse. Në dy raste janë shqiptuar gjoba mandatorë.

    Po ashtu, janë asgjësuar 4 kg mish produkte mishi, 33 kokrra vezë dhe 1 kg salcë (sosë).

    Aksionet do të vazhdojnë në gjithë territorin e vendit.

    Secili subjekt qe vendos ne treg produkte ushqimore në kundërshtim me rregullat ligjore do të sanksionohet.

  • Mungoi në samitin e Procesit të Berlinit, Macron shkon nesër në Tiranë

    Mungoi në samitin e Procesit të Berlinit, Macron shkon nesër në Tiranë

    Presidenti i Francës, Emmanuel Macron, do të zhvillojë një vizitë zyrtare në Shqipëri të martën më 17 tetor. Presidenti francez do të takohet me Presidentin e Republikës së Shqipërisë, Bajram Begaj.

    Presidenca e Shqipërisë e publikoi agjendën e vizitës së Macron:

    08:25 -Mbërritja e Presidentit të Republikës Franceze në Institucionin e Presidentit të Republikës. Presidenti i Republikës franceze do të pritet nga Presidenti i Republikës, Bajram Begaj. Interpretohet himni kombëtar francez; Interpretohet himni kombëtar shqiptar; Kryhet kalimi para truprojës së nderit;

    Dy krerët e shteteve prezantojnë ekipet e tyre respektive. Presidenti i Republikës së Francës ftohet të nënshkruajë në librin e të ftuarve. Në hollin ”Nënë Tereza” do të bëhet fotoja zyrtare. 08:35 – 09:05 – Takim kokë më kokë mes dy presidentëve.

    Presidenti Emmanuel Macron shtyu ardhjen e tij në Tiranë, dhe shkak të për këtë është bërë një sulm terrorist në Arras (Francë) ku mbeti i vrarë një mësues dhe nga situata në Lindjen e Mesme,

    Presidenti francez pritej të mbërrinte në Shqipëri për të marrë pjesë në samitin e 9-të të procesit të Berlinit, i cili mbledh së bashku liderët e Ballkanit Perëndimor dhe disa vendeve evropiane për të nxitur dialogun politik, bashkëpunimin dhe pajtimin në rajon, si dhe afrimin me Bashkimin Evropian.

  • Blinken rikthehet në Izrael në përpjekje për të shmangur zgjerimin e konfliktit

    Blinken rikthehet në Izrael në përpjekje për të shmangur zgjerimin e konfliktit

    Shtetet e Bashkuara thonë se presin rihapjen e një pikë kalimi kufitar mes Rripit të Gazës dhe Egjiptit për të mundësuar dërgimin e ndihmave humanitare, por nuk dihet ende se kur do të ndodhë kjo.

    Sekretari Amerikan i Shtetit Antony Blinken, u rikthye sot në Izrael, në kuadër të përpjekjeve për të shmangur zgjerimin e konfliktit në rajon.

    Sekretari amerikan i Shtetit, Antony Blinken po qëndron sërish në Izrael, për herë të dytë brenda 4 ditësh, pas një turi takimesh me udhëheqësit arabë të rajonit në përpjekje për të parandaluar shndërrimin e luftës në një konflikt më të gjerë në rajon.

    Ai tha se Shtetet e Bashkuara po bashkëpunonin me Egjiptin, Izraelin dhe Kombet e Bashkuara për t’u siguruar që ndihmat të mbërrijnë në Gazë, në mbështetje të atyre që kanë nevojë, raporton VOA.

    “Gjatë ditëve te fundit kam udhëtuar në Izrael, Jordani, Bahren, Katar, Emiratet e Bashkuara Arave dhe Egjipt. Secili prej këtyre partnerëvë ndan të njëjtën pikëpamje për të parandaluar zgjerimin e konfliktit, ruajtjen e jetëve të pafajshme dhe për t’u ofruar ndihmë atyre që kanë nevojë në Gazë”, shkroi zoti Blinken përmes një postimi në rrjetin social “X”.

    Blinken u takua këtë të hënë me Presidentin e Izraelit Isaac Herzog. Sipas zëdhënësit të Departamentit të Shtetit, Mathew Miller, Sekretari Blinken i rikonfirmoi angazhimin e Shteteve të Bashkuara për t’i ofruar Izraelit ndihmën e nevojshme për mbrojtjen e qytetarëve të saj.

    Një ditë më parë, duke folur në Kajro, pas takimit me presidentin e Egjipitit, Sekretari Blinken tha se është me shumë rëndësi mënyra se si Izraeli ushtron të drejtën për t’u mbrojtur.

    “Izraeli ka të drejtën dhe detyrimin për t’u mbrojtur ndaj sulmeve të Hamasit dhe të sigurohet, që kjo të mos ndodhë më kurrë. Por siç e thashë në Tel Aviv dhe siç e ka thëne edhe Presidenti Biden, mënyra se si Izraeli e bën këtë ka shumë rëndësi. Duhet të jetë një mënyrë që përputhet me parimet tona të përbashkëta për jetën dhe dinjitetin njerëzor dhe duke marrë të gjitha masat paraprake për të shmangur lëndimin e civilëve”, tha zoti Blinken.

    Ndërsa më shumë se 1 milionë palestinezë mund të largohen për shkak të rrezikut nga konfliktit, Shtetet e Bashkuara kanë shtuar thirrjet për mbrojtjen e të pafajshmëve.

    “Ne jemi në komunikim me parterët izraelitë. Jemi në kontakt me Kombet e Bashkuara për të ndihmuar në furnizimin me ushqim, ujë dhe mjekime për qytetarët në Gaza, për ata palestinezë që nuk kanë lidhje me terroristët barbarë që kryen sulmet”, tha për rrjetin “ABC”, Jake Sullivan, Këshilltari i Shtëpisë së Bardhë për Sigurinë Kombëtare.

    Sulmet e ndërsjella vazhduan edhe gjatë fundjavës në kufirin e Izraelit me Libanin, ku vepron grupi militant Hezbollah, që mbështetet ng Irani.

    Sentaroti republikan Lindsey Graham, që pritet të vizitojë rajonin në ditët në vazhdim se bashku me një grup senatorësh demokratë dhe republikanë, lëshoi një paralajmërim ndaj Teheranit dhe aleatëve të tij, që synojnë të luajnë një rol më aktiv në konflikt.

    “Nëse Hezbollahu, që bën lojën e Iranit, kryen sulme masive ndaj Izraelit, do ta konsideroja si kërcënim ekzistencial për Shtetin e Izraelit. Do të paraqisja një rezolutë në Senat për të autorizuar veprime ushtarake nga Shtetet e Bashkuara në të njëjtën kohë me Izraelin për ta nxjerrë Iranin jashtë nga biznesi i naftës. Iranit i them, nëse e përshkallëzon këtë luftë, aty do të na kesh”.

    Si pasojë e sulmeve në zonat kufitare në veri të Izraelit, nga grupi militant i Hezbollahut, që vepron nga Libani, autoritetet izraelite njoftuan evakuimin e banorëvë nga 28 fshtatra.

  • AUV: Helmimi i 30 personave në Mitrovicë u shkaktua nga majoneza

    AUV: Helmimi i 30 personave në Mitrovicë u shkaktua nga majoneza

    Agjencia e Ushqimit dhe Veterinarisë ka njoftuar se pas hulumtimeve që kanë bërë ka rezultuar se majonezi ka qenë shkaku që disa persona janë helmuar në Mitrovicë para disa ditësh.

    AUV thotë se lokali vazhdon të jetë i mbyllur dhe se kanë iniciuar procedurë kundërvajtëse ndaj personit përgjegjës të biznesit, transmeton Telegrafi.

    “Në bazë të hulumtimit epidemiologjik dhe rezultateve mikrobiologjike vlerësohet Epidemi kolektive e shkaktuar nga Salmonella Enteritidis. Salmonella Enteritidis u izolua në mostra të ushqimit (majonez dhe majonez me përshutë) dhe në mostra humane. Staphylococcus aureus u izolua në strishot e marra nga duart e personit që ka përgatitur dhe shërbyer ushqimin si dhe nga kapësja e ushqimit”, thuhet në njoftm.

    AUV thotë se “më datë 6 tetor 2023 pas orës 18:00, kanë kërkuar ndihmë mjekësore në urgjencën e QKMF në Mitrovicë, pacient si raste të dyshimta në helmim me ushqim me shfaqje të simptomave: temperaturë, ethe, dhimbje barku, mundim, vjellje, dhembje të muskujve dhe kokëdhimbje. Kryesisht persona (nxënës të shkollave fillore, gjimnazit, shkollës ekonomike dhe shkollës së mesme të muzikës e cila gjendet afër lokalit “Fast Food On Top”).

    Në mesin e të helmuarve në një lokal të ushqimit në Mitrovicë edhe 10 nxënës, policia jep detaje
    “Të gjithë pacientët kishin konsumuar ushqim në “Fast Food On Top” më datë 5 dhe 6 Tetor, 2023 para dite dhe pasdite (hamburgerë me pleskavicë, dyner, chicken burger, majonez, ketchup dhe sallatë ruse). Pas njoftimit, Inspektorët Sanitarë të AUV-së në Mitrovicë menjëherë kanë dalë në vend ngjarje bashkë me ekipin e QRSHP-ës dhe Policisë”, thekson AUV.

    Tutje, në njoftim thuhet se inspektorët bashkë me Policë kanë nisur inspektimin në lokalin gastronomik të ushqimeve të shpejta “Fast Food On Top”, Rr. Skënderbeu, Mitrovicë. Fillimisht është ndaluar puna e lokalit sipas legjislacionit në fuqi.

    “Janë marrë katër (4) mostra të ushqimit (hamburger, mishi i pulës, dyner, majonez dhe sallatë ruse) Ato janë dërguar për ekzaminim mikrobiologjik në QLT – IKShPK. Janë marrë katër (4) strisho të mjeteve të punës: nga pjata e servimit të ushqimit, nga shkopi i dynerit, nga tavolina para frigoriferit, nga kapësja e ushqimit. Një strisho nga duart e personit që ka përgatitur dhe shërbyer ushqimin”.

    AUV thotë se “në bazë të hulumtimit epidemiologjik dhe rezultateve mikrobiologjike vlerësohet Epidemi kolektive e shkaktuar nga Salmonella Enteritidis. Salmonella Enteritidis u izolua në mostra të ushqimit (majonez dhe majonez me përshutë) dhe në mostra humane. Staphylococcus aureus u izolua në strishot e marra nga duart e personit që ka përgatitur dhe shërbyer ushqimin si dhe nga kapësja e ushqimit”.

    “Është iniciuar procedurë kundërvajtëse ndaj personit përgjegjës të biznesit individual (ka kryer kundërvajtje nga neni 16, paragrafi 1 nënpagrafi 1.1 që sanksionohen sipas nenit 40 paragrafi 1.3, të Ligjit Nr. 08/120 për Ushqimin). Subjekti afarist vazhdon te jete i mbyllur deri ne eliminimin e te gjitha mangësive të evidentuara në urdhëresat me proces inspektues”, njofton AUV.

  • Kurti në Samitin e Procesit të Berlinit: Kosova ende kërcënohet me invazion nga Serbia

    Kurti në Samitin e Procesit të Berlinit: Kosova ende kërcënohet me invazion nga Serbia

    Kryeministri Albin Kurti të hënën në Samitin e Procesit të Berlinit ka thënë se Kosova ende vazhdon të kërcënohet me invazion nga Serbia.

    Kurti në fjalën e tij, ka thënë se aktet e tilla nuk duhet të kalojnë pa u ndëshkuar.

    “Edhe njëzet e pesë vite pas fushatës gjenocidale, dhe pas kaq shumë raundeve të dialogut, Kosova ende kërcënohet me invazion nga Serbia. Ky moment na kërkon të reflektojmë dhe të mos e vazhdojmë punën si zakonisht. Një akt i tillë nuk duhet të kalojë pa u ndëshkuar”, ka thënë ai.

    Siç është bërë e ditur në njoftimin e lëshuar nga Zyra e Kryeministrit, Kurti ka thënë se qytetarët në Ballkanin Perëndimor nuk duhet të jetojnë nën frikën e një konflikti.

    “Ne si udhëheqës të tyre kemi përgjegjësinë për të ndërtuar atë të ardhme të përbashkët. Dhe si udhëheqës, ne duhet të përfshihemi në atë proces me mirëbesim. Kërkohet një angazhim me mirëbesim për të garantuar efektivitetin afatgjatë të marrëveshjeve tona dhe respektimin e të gjitha palëve të investuara në proces”, thuhet të është shprehur më tej Kurti.

  • Apeli lë në paraburgim tre të dyshuarit për sulmin terrorist në Banjskë

    Apeli lë në paraburgim tre të dyshuarit për sulmin terrorist në Banjskë

    Gjykata e Apelit i ka refuzuar si të pabazuara ankesat e mbrojtësve të të dyshuarve për sulmin terrorist ndaj Policisë së Kosovës në Banjskë, Vladimir Toliq, Blagoje Spasojeviq dhe Dushan Maksimoviq, duke vërtetuar vendimet e Gjykatës Themelore në Prishtinë, me të cilat secilit prej të dyshuarve iu kishte caktuar masa e paraburgimit në kohëzgjatje prej 30 ditësh.

    Vendimin të cilin e ka siguruar “Betimi për Drejtësi”, rezulton se është marrë më 3 tetor 2023.

    “Refuzohen si të pabazuara ankesat e mbrojtësve të pandehurve, Vladimir Tolic avokat Milos Delevic, Blagoje Spasojevic avokat Ljubomir Pantovic, Dushan Maksimovic avokat Dejan Vasic, ndërsa aktvendimet e Gjykatës Themelore në Prishtinë – Departamenti Special PPPS.nr.44/2023 të datës 25.09.2023 dhe të datës 26.09.2023, Vërtetohen”, thuhet në vendimin e Apelit.

    Gjykata Themelore në Prishtinë, më 25 shtator 2023 të dyshuarit Vladimir Toliq ia kishte caktuar paraburgimin.

    Ndërsa, më 26 shtator 2023, kjo gjykatë ua kishte caktuar paraburgimin edhe dy të dyshuarve tjerë Blagoje Spasojeviq dhe Dushan Maksimoviq.

    Aksioni në Bajsnkë të Zveçanit kishte nisur në orët e hershme të së dielës (24 shtator 2023) ku ishte vrarë rreshteri Afrim Bunjaku si dhe ishin plagosur dy të tjerë. Pastaj, Policia kishte vrarë tre terrorist ndërsa sulmuesit tjerë kishin arritur të largoheshin pasi ishin strehuar për disa orë në Manastirin e Bajnskës.

    Ministri i Punëve të Brendshme, Xhelal Sveçla kishte publikuar pamje të Milan Radojiçiq, ku kishte theksuar se Radojiçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku.