Ish drejtori sportiv i Ballkanit, Avni Bytyqi sonte është i ftuar në emisionin ‘EKIPI A’ në ATV.
Bytyqi ka thënë që trajneri Akis Vavalis më në fund e ka instaluar lojën e tij të skuadra e Dritës.
‘E kam parë komplet takimin Llapi – Drita, unë mendoj që meritat më të mëdha për këto fitore i takojnë trajnerit Akis Vavalis, mendoj që ai më në fund i ka instaluar idet e tij’ tha Bytyqi.
Për më shumë ndiqeni emisionin më poshtë./Atvlive.tv
Presidentja Vjosa Osmani në mbledhjen e Këshillit të Sigurimit të OKB-së e ka përmendur vrasjen e oficerit të Policisë së Kosovës, Afrim Bunjaku, më 24 shtator nga grupi i serbëve që kryen agresion në Banjskë të Zveçanit.
Ajo tha se i ndjeri Afrim Bunjaku e humbi jetën duke mbrojtur integritetin territorial të Kosovës.
“Më 24 shtator qytetarët e Kosovës u zgjuan me lajmin për vrasjen e një rreshteri të Republikës nga një akt i agresionit nga Serbia dhe grupet paramilitare. Dua të falënderoj heroin e Kosovës, Afrim Bunjakun, që e humbi jetën duke e mbrojtur integritetin territorial të Kosovës”.
“Pushoftë në paqe. Kjo duhet të na shërbejë të gjithëve si kujtim që u ngritë kundër forcave autoritare jo vetëm në Ballkanin Perëndimor, por edhe në gjithë botën”, ka thënë Osmani.
Përgatiti: Sara Shehu
Para katërve muajve, Ministri i Shëndetësisë, Arben Vitia, ishte deklaruar i sigurt se nga muaji shtator e tutje nuk do të ketë më mungesë të barnave, veçanërisht të insulinave.
“Në muajt shtator dhe tetor nuk do të ketë fjalë mungesë në terminologji, për barnat dhe materialet shpenzuese dhe insulina”, kishte thënë Vitia.
Megjithatë, derisa jemi në fund të muajit tetor, disa barna esenciale vazhdojnë të mungojnë në Qendrën Kryesore të Mjekësisë Familjare në Prishtinë. Pacientët thonë se nuk po arrijnë t’i sigurojnë barnat dhe insulinat në barnatoren qendrore pranë kësaj qendre.
“Shqetësuese se pensioni i vogël, po duhet me ble 100 euro për çdo muaj se s’ka këtu në barnatore në qendër, e po duhet në privat me i ble barnat ma të thjeshta”, thotë një pacient.
“Sigurisht që duhet me pas ma shumë barna se ka nevojë, Qeveria i ka fajet, qytetaret s’jemi tu pas mundësi me i ble ma, se s’po ka boll barna as sen”, tha një tjetër pacient.
Si pasojë e kësaj gjendjeje, pacientët detyrohen që barnat që do të duhej t’i merrnin falas, t’i blejnë ato në barnatore private.
“Bashkëshorti o me diabet e unë kam sëmundjen e harresës, e krejt këto barna po duhet me i ble me i siguru vetë nëpër barnatore private”, shprehet një pacient.
Pavarësisht tentimeve të televizionit për të kuptuar se si qëndron problemi me barnat, askush nga menaxhmenti i Barnatores qendrore dhe Qendrës Kryesore të Mjekësisë Familjare në Prishtinë, nuk u deklaruan.
Në anën tjetër, Ministria e Shëndetësisë ka mohuar mungesën e barnave në këtë qendër. Sipas tyre, furnizimi i fundit me barna esenciale dhe insulina është bërë para 12 dite.
“Ministria e Shëndetësisë ka në kompetencë furnizimin e QKMF-ve me barna, material shpenzues dhe disa programe specifike. Sipas kërkesës së tyre, përmes Sistemit të Menaxhimit të Stokut Farmaceutik (SMSF), QKMF në Prishtinë është furnizuar me barna dhe material shpenzues me datë 11.10.2023, po ashtu, furnizimi me Insulina është bërë në këtë datë”, thuhet në përgjigjen e MSH-së.
Madje, ky dikaster ka bërë të ditur se këtë vit asnjë tender nuk ka dështuar, sa i përket furnizimit me insulina në të gjitha Qendrat e Mjekësisë.
Ndryshe, Qeveria ka ndarë 60 milionë euro për mbulimin e listës së barnave esenciale.
Përgatiti: Jeta Selmanaj
Disa shoferë të transportuesve të mallrave, këtë të hënë u gjobitën nga Inspektorati i Prishtinës.
Ndëshkimi i tyre u bë, pasi që ata nuk e respektuarin orarin e ri përcaktues të Komunës.
Pavarësisht që ky orar është në fuqi tash e disa muaj, shoferët thonë se nuk kanë qenë në dijeni.
Aksione si këto, inspektorati i kryeqytetit do t’i vazhdojë edhe ditëve në vijim.
Sipas Vendimit të kryetarit të Prishtinës, qarkullimi i të gjithë transportuesve të mallrave në kryeqytet do të lejohet sipas këtij orari:
Zonën e I-rë, që përfshin pjesën qendrore të kryeqytetit, nga ora 19:00 deri të nesërmen në orën 07:00 në mëngjes;
Zonën e II-të, që përfshin pjesën përtej qendrës së kryeqytetit, nga ora 18:00 deri të nesërmen në orën 07:00 në mëngjes;
Bulevard/Sheshi i Kryeqytetit, nga ora 23:00 deri të nesërmen në 07:00 në mëngjes, për mjetet deri në 3.5 tonë.
Përgatiti: Fatlum Jashari
Kosova është në pritje të përmbylljes së raportit fillestar nga ana e Këshillit të Evropës, që do të derivojë nga vizita e ekspertëve ligjorë të kësaj organizate në Prishtinë, në fund të muajit të kaluar.
Pa dhënë një afat të prerë për finalizimin e raportit, në një përgjigje për ATV-në, Këshilli i Evropës konfirmoi se së shpejti raportuesja Dora Bakoyannis, do të zhvillojë një vizitë në Kosovë – lidhur me procesin e anëtarësimit.
“Raporti i juristëve eminentë do të shqyrtohet nga Byroja e Asamblesë në kohën e duhur, pas procedurave të zakonshme, dhe në fund do të bëhet publik. Sa i përket vizitës së raportueses, ajo duhet të zhvillohet në javët në vijim”, thuhet në përgjigjen nga Këshilli i Evropës.
Drejtori i IKD-së, Ehat Miftaraj, i cili mori pjesë në diskutimet me ekspertët e Këshillit, tha se, në plan të parë, pritet një vlerësim i përputhshmërisë së legjislacionit me konventën për të drejtat e njeriut dhe liritë e njeriut, si dhe me nivelin praktik të zbatimit.
“Primare është analiza, vlerësimi i kornizës ligjore në Kosovë, nëse Kushtetuta, ligjet përcjellëse janë në harmoni me praktikat, standardet që i promovojnë të drejtat dhe liritë e njeriut. Në këtë drejtim nuk ka dyshim që Kosova i ka, jo vetëm në harmoni, por ka diskriminim pozitiv, të të drejtave dhe lirive të njeriut, të komuniteteve apo grupeve të margjinalizuara, që në këtë pjesë është kampion dhe ndoshta është më e zhvilluar se shtetet e Bashkimit Evropian”, tha Miftaraj.
Miftaraj nuk e përjashtoi mundësinë që ekspertët të kenë përfshirë në raport edhe moszbatimin e disa prej vendimeve të Gjykatës Kushtetuese, si dhe mosmiratimin e Projekt-Kodit Civil.
“Është fakt që ky grup punues në nivel teknik mund t’i identifikojë këto si mangësi, sepse në një shtet që aspiron bëhet pjesë e Këshillit të Evropës, ose që aspiron të bëhet pjesë e BE-së, nuk ka logjikë që të mos zbatohen vendimet e Gjykatës Kushtetuese dhe në rastet kur ka kontekst politik, në këtë rast raportet Kosovë-Serbi. Kështu që e përsëris dua të besoj që, mund të japin vërejtje grupi teknik, por do të japin dritë jeshile për të vazhduar në nivelin politik”, tha Miftaraj.
Ai theksoi se në një fazë të mëvonshme, kur përfshihet niveli politik dhe shtetet anëtare, mund të priten kushtëzime të caktuara në raport me legjislacionin apo zbatueshmërinë e vendimeve të gjykatave.
Në maj të vitit 2022, Kosova aplikoi për anëtarësim në Këshillin e Evropës, ndërsa në prill të këtij viti e përmbylli fazën e parë të procesit, nga tri gjithsej.
Përgatiti: Nora Luta
Zoran Radunoviq, ish-pjesëtar i Policisë së Kosovës, sa ishte në uniformë punonte kryesisht në Zubin Potok e pjesët kufitare me Serbinë, në veri të vendit.
Ai nga viti 2020 akuzohet për keqpërdorim të detyrës zyrtare dhe marrje ryshfeti, por nga kjo vepër penale u tërhoq Prokuroria Speciale, ndaj tij dhe 19 të tjerëve që akuzohen në këtë rast për kontrabandë në pjesën veriore.
Në fjalën përfundimtare, të hënën, Radunoviq ka thënë se është penguar gjatë punës së tij në luftimin e kontrabandës, e është kërcënuar nga ish-mbikëqyrësi i tij, i akuzuari tjetër në këtë rast Zvezdan Spasojeviq.
Por në fjalën e tij ai e ka përmendur edhe zëvendësministrin për komunitete dhe kthim në Qeverinë e Kosovës, Radoica Radomiroviq, duke i dhënë epitetin si kontrabandisti më i madh.
“Tabelat kur i janë hequr vajzës së të tani zv.ministrit për Komunitete dhe Kthim, Radoica Radomirovic, i cili është kontrabandist i njohur dhe është urdhërdhënës I djegies së veturës sime të parë, vetura e dytë është djegur në vitin 2015, kur e kam kapur një kamion me pije të kontrabaduara, dhe i gjithë faji më është hedhur mua, dhe ish-udhëheqësi im në atë kohë ka shkuar te kontrabandisti dhe i ka kërkuar falje që ia kemi kapur kamionin”, tha Radunoviç.
Ndaj deklaratave të Radunoviqit reagoi prokurori special, në këtë rast Burim Qerkini.
Në këtë seancë, fjalën përfundimtare e kanë dhënë edhe mbrojtësit e ish-policëve të tjerë duke kërkuar aktgjykim lirues pasi sipas tyre Prokuroria nuk ka arritur ta vërtetoj se të njëjtit kanë kryer veprën penale për të cilën akuzohen.
Aktgjykimi ndaj njëzetë policëve që punonin në veri, përfshirë komandantin e stacionit policor Zvezdan Spasojeviq do të shpallet të premten.
Sipas aktakuzës, ata mundësuan kontrabandë me mallra të ndryshme nga Serbia në Kosovë dhe anasjelltas, gjatë vitit 2017 deri në vitin 2019.
Në një ceremoni madhështore në sallën “1 Tetori” në Prishtinë, u mbajt ceremonia e Diplomimit të studentëve të nivelit Bachelor dhe Master të Kolegjit AAB.
Në këtë ceremoni kanë diplomuar mbi 700 studentë që vinë nga 12 Fakultete, të cilët kanë studiuar në mbi 50 programe të përfshira të Kolegjit AAB.
Pos drejtuesve të Kolegjit AAB, me kryetarin e Këshillit Drejtues, z.Ilir Tafa dhe rektorin z.Lulzim Tafa, në këtë ceremoni diplomimi morën pjesë edhe Rifat Jashari nga familja Jashari, filantropi Lazim Destani, e shumë personalitete të tjera.
Prorektorja për Marrëdhënie Ndërkombëtare dhe Bashkëpunim në Kolegjin AAB, Venera Lluni, në një prononcim për ATV-në, tha se tha se studentët të cilët po diplomojnë janë nga gjenerata e vitit 2019-2020 nga 12 Fakultete, të cilët kanë studiuar në mbi 50 programe të përfshira të Kolegjit AAB.
“Është një atmosferë e këndshme, e bukur sepse të rinjtë janë këtu. Kolegji AAB po e organizon ceremoninë e diplomimit të studentëve, janë gjenerata e vitit 2019/2020 dhe të gjithë këta studentë, të cilët janë mbi 700 të diplomuar janë nga 12 Fakultete, dhe kanë studiuar në mbi 50 programe të përfshira të Kolegjit AAB. Është një ndjenjë e jashtëzakonshme, është një kënaqësi e madhe sepse është edhe rezultat i punës së gjithë stafit akademik, profesorëve, asistentëve, por edhe kuptohet që punën kryesore e bëjnë edhe vetë studentët”, tha Llunji.
Mesazhi i saj për studentët e diplomuar ishte që asgjë të mos i ndalë në rrugën e tyre të përparimit.
“Nuk ka ndjenjë më të bukur se sa t’i hedhësh kapelat pasi që të diplomosh. Mesazhi i im do të ishte që asgjë të mos i ndalë në rrugën e tyre të përparimit, që të jenë gjithmonë të vetëdijshëm për atë çfarë i pret, gjithmonë të jenë të gatshëm të ecin përpara, ta sfidojnë jetën me të gjitha që munden dhe njëkohësisht ta bëjnë krenar edhe Kolegjin AAB ku kanë qenë studentë”, u shpreh Llunji. /atvlive.tv
Ceremonia e diplomimit të studentëve të Kolegjit AAB u transmetuar drejtpërdrejt në faqen zyrtare të këtij kolegji në facebook, të cilën ta shikoni duke Klikuar KËTU.
Përgatiti: Driton Sadiku
Mbi 400 milionë euro po i humb Kosova, sipas partisë në pushtet, shkaku i mosvotimit të disa marrëveshjeve ndërkombëtare, nga dy subjekte politike opozitare.
Ato do të procedohen sërish këtë javë në Kuvend, pasi shefat e grupeve parlamentare u morën vesh për mbajtjen e tri seancave, dy nga to të enjten e një tjetër të premten.
Megjithatë, Partia Demokratike e Aleanca për Ardhmërinë e Kosovës nuk e kanë ndërmend ta ndërrojnë qëndrimin, ndonëse arsyetimet për mosvotimin e tyre i kanë të ndryshme.
“Ndryshimi i qëndrimit në votimin e këtyre marrëveshjeve do të ishte gabim fatal. Është interes nacional që sa ma pak me i dhanë kësaj qeverie mundësi me pas fonde, nëse i japim qasje në këto fonde, e rrisim borxhin publik, nuk përmirësohet jeta e qytetarëve, d.m.th. na po kontribuojmë me vetëdije në degradim”, tha shefi i GP të PDK-së, Abelard Tahiri.
“Neglizhimi që kjo qeveri e ka bërë, sidomos në ligjin e pagave, është i papranueshëm. Nuk mundemi ne me u sjell sikur nuk ka ndodhur asgjë. Ne jemi parti që kemi qëndrime politike. Në qoftë se kërkesat tona për rritjen e koeficientit të pagave nuk do të realizohen, atëherë nuk do të ketë mbështetje”, tha tha shefi i GP të AAK-së, Abelard Tahiri.
Por, për rezolutën e fundit që e propozoi opozita, atë për rritjen e koeficientit për paga, shumica parlamentare do të marrë pjesë, edhe pse nuk dihet nëse do ta përkrahë me votim.
“Sa i përket pjesëmarrjes në rezolutën e ftuar nga opozita, ne do të marrim pjesë në seancën e jashtëzakonshme të enjten, dhe kjo e tregon edhe vullnetin tonë politik për t’u ulur dhe diskutuar çështje të cilat konsiderohen me rëndësi e mbi të gjitha kthimin e opozitës në votimin e marrëveshjeve ndërkombëtare”, tha shefja e GP të KV-së, Mimoza Kusari-Lila.
E një thirrje të tillë opozitës i erdhi edhe nga jashtë.
Ambasadori gjerman në Kosovë, Jorn Rohde, përmes një postimi në platformën X, kërkoi nga opozita që të jetë më konstruktive dhe t’i votojë marrëveshjet pasi po humben shumë para për projekte me rëndësi për qytetarët.
Përgatiti: Fatlum Jashari
Raportet Kosovë-Serbi ishin temë në takimin e Këshillit për Punë të Jashtme të Bashkimit Evropian, krahas konfliktit Izral-Gaza dhe luftës në Ukrainë.
Në nisje të takimit, ministri Jashtëm i Kroacicë, Gordan Grlic Radman, kërkoi përgjigje ndërkombëtare për sulmin terrorist-paramilitar ndaj Kosovës.
“Kontakti diplomatik me partnerët tanë rajonal mbetet i rëndësishëm. Do të përmend, gjithashtu, sulmin e fundit të armatosur nga paramilitarët serbë në Kosovë, të cilin duhet ta marrim shumë seriozisht. Ky është një akt serioz i destabilizimit të rajonit dhe ne duhet të përgjigjemi”, tha Grlic Radman.
Përfaqësuesi i Lartë për Politikë të Jashtme dhe Siguri i BE-së, Josep Borrell, nuk përmendi Kosovën, as në deklarimin e tij në mëngjes e as në konferencën gjysmë orëshe pas takimit.
Megjithatë, Radio Evropa e Lirë raporton se Këshilli për Punë të Jashtme, përfshiu Kosovën në draftin e konkluzioneve që do t’i paraqitet liderëve në fund të javës.
Mes tjerash, në draft dënohen sulmet e dhunshme ndaj Policisë së Kosovës, kërkohet që përgjegjësit të vihen para drejtësisë dhe që “Serbia të bashkëpunojë plotësisht”.
Në draft-dokument kërkohet shtensionim i plotë i gjendjes në veri, organizim i zgjedhjeve të reja dhe pjesëmarrje e aktive e komunitetit serb në to – ndërsa theksohet se dështimi për diçka të tillë do të përcillet me pasoja.
Këshilli Evropian, po ashtu, shpreh keqardhje për mungesën e vullnetit nga Serbia dhe Kosova për zbatimin e marrëveshjes së Brukselit dhe shtojcës së Ohrit.
Përgatiti: Kastriot Tahiri
Diskriminimi gjatë shkollimit, në konkurse të punës, por edhe në marrjen e shërbimeve mjekësore, janë disa nga arsyet që bashkuan banorët e Medvegjës, Bujanocit e Preshevës, në një protestë në Prishtinë.
“Po për shkak të pasivizimit të adresave, kemi probleme edhe në shkollim, edhe me marr shërbime mjekësore edhe krejt. Andaj u bëj thirrje Presidentes edhe Kryeministrit që të bëjnë diçka”, tha Selman Rexhepi, kryetari i shoqatës “Shqiponja”.
Sipas përfaqësuesve të Këshillit organizativ të Kuvendit Kombëtar Shqiptar për Kosovën dhe Unionit Shqiptar të Shoqërisë Civile, për të drejtat dhe liritë themelore të shqiptarëve në Kosovën Lindore, duhet të flitet në çdo tryezë dialogu ndërmjet Kosovës dhe Serbisë.
“Problemi kryesor qëndron te trajtimi i shqiptarëve në Serbi, në të gjitha fushat. Në sektorin e shëndetësisë situata është shumë e rëndë, në Preshevë, ku jetojnë 90% shqiptarë, drejtori i shtëpisë së shëndetit është serb, në spitalin rajonal të Vrajës ku rreth 40% të pacientëve janë shqiptarë nuk ka mjekë, motër medicinale e as mirëmbajtëse shqiptare. Në doganë janë vetëm 13 shqiptarë. Të ketë reciprocitet, nëse serbët duan asociacion, edhe ne duhet të kemi”, tha Dashamir Uruqi, kryetar i Unionit Shqiptar.
Një protestë si kjo e të hënës do të organizohet edhe në Shqipëri.