Rezultatet e testit “PISA 2022” u publikuan të martën. Këtë vit nxënësit që përfaqësuan Kosovën performuan edhe më dobët se herën fundit, në vitin 2018.
Nga 80 vende pjesëmarrëse, Kosova u rendit e 77-a në shkencë, në lexim e 76-a por pak më mirë u performua në matematikë, duke u renditur e 73-ta.
Për ministren e Arsimit rezultatet ishin të pritshme derisa fajin, Arbërie Nagavci ia la pandemisë.
Por pohimet e ministres i kundërshtojnë ekspertët e arsimit.
Megjithatë, në këtë test vajzat kanë performuar më mirë se djemtë.
Programi për Vlerësimin Ndërkombëtar të nxënësve është vlerësim ndërkombëtar i aftësive dhe njohurive të 15-vjeçarëve. Për herë të parë, në testin PISA Kosova mori pjesë në vitin 2015. Ndërkaq, në vitin 2018 Kosova u rendit në vendin e 76-të nga 79 vende.
Më shumë detaje gjeni në Edicionin Qendror të lajmeve në ATV, në videon më poshtë:
Akt të drejtë e ka quajtur kryeministri i Kosovës, Albin Kurti, rivarrimin e Liridona Ademajt. Në nderim të gruas, e cila dyshohet se u vra me kërkesë të bashkëshortit të saj, Naim Murseli, me një minutë heshtje, filloi konferenca e cila u thirr si pjesë e angazhimit për luftimin dhe trajtimin e rasteve të dhunës në baza gjinore.
Sipas kryeministrit, është duke u punuar në krijimin e një mjedisi ligjor të fuqishëm.
Për udhëheqësen e dikasterit të drejtësisë, Albulena Haxhiu, e cila bëri bashkë në një diskutim homologët e saj nga Shqipëria, Maqedonia e Veriut dhe përfaqësues nga Ministria e Kroacisë, krimi mbi Liridonën është alarm që nuk duhet të pushojë.
Me Kodin e ri Penal, i cili pritet të miratohet në Maqedoninë e Veriut, femicidi do përfshihet si term i veçantë teksa ministri i Shqipërisë bëri thirrje që të ndërtohet raporti i besimit mes institucioneve dhe qytetarëve.
Gjatë kësaj konference, e cila do t’i vazhdojë punimet edhe të mërkurën, u tha ndër të tjera se ashpërsimi i masave ndëshkuese do të ndikojë në adresimin dhe parandalimin e vrasjes së grave.
Me ndryshimet në Kodin Penal, secili person që dënohet për dhunë seksuale i ndalohet ndër të tjera punësimi në institucionet publike, një deri në dhjetë vjet.
Më shumë detaje gjeni në Edicionin Qendror të lajmeve në ATV, në videon më poshtë:
Me arsyetimin se është jotransparent dhe jo i strukturuar mirë, Ministria e Industrisë, Ndërmarrësisë dhe Tregtisë synon të ndryshojë Ligjin për Rezervat Shtetërore të Mallrave.
Krahas këtij konstatimi, koncept-dokumenti i kësaj ministrie, i nxjerrë në diskutim publik javën e kaluar, në krye të përkufizimit të problemit përmend, siç thuhet, paqartësinë në disa nga termat dhe përkufizimet në ligjin aktual.
Por, emri i parë në grupin punues për hartimin e këtij dokumenti është Hafiz Gara, i cili ishte një nga tre të arrestuarit në muajin Gusht, nën dyshimet për keqpërdorime në rezervat shtetërore.
Ai ishte liruar pas dy javësh dhe është duke vazhduar punën në Ministri, ndërsa është konfirmuar se ndaj tij po vazhdojnë hetimet për keqpërdorim të detyrës apo autoritetit zyrtar.
Teksa konstatoi se propozimi është në kundërshtim me veprimet e Qeverisë, e cila kishte vendosur për blerje konfidenciale, drejtori i IKD-së, Ehat Miftaraj, ngre dyshime për mënyrën dhe kohën kur është nxjerrë koncept-dokumenti.
“Ky ligj nuk është paraparë fare për plotësim-ndryshim apo ligj të ri në programin e LV-së, që është miratuar në Kuvend. Po ashtu, nuk është paraparë në agjendën legjislative për vitin 2023 apo vitet e mëhershme, kjo është diçka e re, që duket se është si rezultat i ngjarjeve të fundit, kur patëm arrestime në këtë ministri”, tha Miftaraj.
Pa paragjykuar verdiktin për dyshimet dhe hetimet ndaj Garës, Miftaraj vlerëson se përfshirja e tij në procesin e hartimit të dokumentit, nga i cili mund të burojë një ligj, cenon integritetin e procesit.
“Edhe përkundër se zotëria në fjalë është në proces hetimor, nuk kemi ende as aktakuzë dhe nuk mund të themi se ai është ose jo fajtor, prapëseprapë, në sytë e publikut ngjall reagime, ngjall dyshime, që ky proces të udhëhiqet ose të marrë pjesë një person, i cili gjatë këtij viti është arrestuar nga institucionet e drejtësisë”, tha Miftaraj.
Nën dyshime për keqpërdorime me rezervat shtetërore, krahas Garës, në muajin Gusht ishin arrestuar Irfat Lipovica, po ashtu, zyrtar i MINT-it, dhe biznesmeni Ridvan Muharremi.
Më shumë detaje gjeni në Edicionin Qendror të lajmeve në ATV, në videon më poshtë:
Tre muaj pas hartimit të Udhëzimit Administrativ, banorët serbë në katër komunat veriore kanë dorëzuar në Komisionin Qendror të Zgjedhjeve kërkesat për shkarkimin e kryetarëve shqiptarë përmes peticionit.
“Mund të konfirmoj se gjatë ditës, kemi pranuar katër e-maile, tri prej të cilave kanë të bashkëngjitur, të plotësuar formularin për inicimin e kërkesës për largimin e kryetarit të Komunës nga funksioni”, i ka thënë ATV-së zëdhënësi i KQZ-së, Valmir Elezi.
Grupe të qytetarëve serbë, fillimisht kërkesat për peticion tentuan t’i dorëzojnë në Kuvendet Komunale përkatëse, por siç pretendojnë ata, autoritetet lokale kanë refuzuar “iniciativën” e tyre.
“Ne erdhëm në cilësinë e qytetarëve për të dorëzuar iniciativën për shkarkimin e kryetarit të Komunës së Mitrovicës Veriore. Njësoj ndodhi edhe në Zveçan, Zubin Potok dhe Leposaviq. Pas disa orësh, negociatash me organet e komunës nuk ia dolëm të dorëzojmë këtë peticion. Iniciativa jonë u refuzua”, tha Sanja Krtinic, qytetare .
“Kjo çfarë ndodhi është shkelje brutale e të drejtave të njeriut. Ne nuk ia dolëm të paraqesim një kërkesë të thjeshtë në recepsionin e komunës si përfaqësues të qytetarëve serbë në veri”, tha Milan Milosavljevic, qytetar.
Megjithatë, ky pretendim u mohua nga Kryetari i Kuvendit komunal në Mitrovicë të Veriut, Nexhat Uglanin.
Ndërkohë, kryetari i Zubin Potokut më shumë preferon një marrëveshje politike sesa shkarkimin përmes peticionit.
Sidoqoftë, ministri i Administrimit të Pushtetit Lokal tha se nuk është në dijeni për kërkesat që kanë paraqitur serbët në veri të Kosovës për inicimin e peticionit.
Ministria e Administrimit dhe Pushtetit Lokal qysh në muajin shtator publikoi udhëzimin administrativ, i cili u mundësonte qytetarëve të dorëzojnë peticion për shkarkim të kryetarëve të komunave në veri.
Ndryshe, faktori ndërkombëtar, dorëheqjen e kryetarëve shqiptarë e kishte theksuar si rrugë më të shpejtë, për mbajtjen e zgjedhjeve në veri.
Më shumë detaje gjeni në Edicionin Qendror të lajmeve në ATV, në videon më poshtë:
Sonte para objektit të Shtëpisë së Kulturës “Xheladin Kurtaj” në Kaçanik, janë ndezur qirinj në kujtim të Liridona Ademajt, e vrarë në Sinidoll të Prishtinës, më 29 nëntor.
Aktiviteti u organizua nga Grupi Joformal i Grave Asambleiste të Komunës së Kaçanikut, ndërsa morën pjesë edhe anëtare nga ekzekutivi komunal dhe qytetarë të tjerë.
Përmes këtij aktiviteti, u shpreh solidarizimi me familjen Ademaj dhe me të gjithë qytetarët e vendit, të cilët u tronditën nga kjo ngjarje e rëndë.
Misioni paqeruajtës i NATO-s në Kosovë, KFOR, ka bërë të ditur se Italia ka dislokuar trupa shtesë të tyre në Kosovë.
KFOR-i bëri të ditur se trupat shtesë i përkasin batalionit italian të Forcave Rezervë Operacionale të NATO-s.
“Batalioni italian nga Forca Rezervë Operacionale e NATO-s është dislokuar në Kosovë, si pjesë e misionit paqeruajtës të NATO-s – KFOR”, thuhet në njoftim.
Ata nuk kanë bërë të ditur numrin e saktë të ushtarëve italianë që janë dislokuar në Kosovë, teksa Zvicra ishte shteti i fundit që e ka shtuar numrin e pjesëtarëve të KFOR-it në vend.
Protesta e nisur në sheshin ‘Zahir Pajaziti’ në Prishtinë, e organizuar nga Kolektivi për Veprim Feminist, kundër vrasjes së grave, është zhvendosur tani përballë stacionit policor “Qendra”. Protestuesit kanë hedhur ngjyrë të kuqe para kordonit të policisë teksa kanë kërkuar drejtësi për vrasjen e Liridonës.
Protesta deri tani ka kaluar pa incidente ndërsa policia ka bllokuar edhe qarkullimin e automjeteve ne rrugën “Luan Haradinaj”.
Protesta e nxitur nga vrasja e 30-vjeçares Liridona Ademaj me porosi të bashkëshortit të saj, Naim Murselit, nisi me thirrjet “Liri, barazi, solidaritet”.
Në Dhomat e Specializuara në Hagë ka përfunduar dëshmia e dëshmitarit të 36-të të Zyrës së Prokurorit të Specializuar (ZPS), në çështjen ndaj ish-krerëve të Ushtrisë Çlirimtare të Kosovës (UÇK). Sadik Halitjaha është dëgjuar edhe sot nga trupi gjykues, derisa është marrë në pyetje nga trupi gjykues dhe mbrojtja.
Ish-oficeri i Ushtrisë Çlirimtare të Kosovës pas përfundimit të dëshmisë së tij uroi lirinë e ish-krerëve që po mbahen në Hagë.
“Uroj që kam dhënë një kontribut sado pak modest. Besoj që kanë qenë korrekte dëshmitë e mia dhe i uroj sukses këtij procesi. Liri çlirimtarëve”, përfundoi ai.
Dëshmitari gjatë pyetjes së mbrojtjes Gregory Kehoe tha se gjatë luftës është takuar vetëm dy herë me Hashim Thaçin.
Kehoe: Dëshmitar, pra ju asnjëherë nuk e keni parë Hashim Thaçin në Shtabin e Përgjithshëm, apo jo?
Halitjaha: Budakovë edhe njëherë rastësisht e kam taku, nuk më kujtohet data në oborr të Shtabit tek çezma, tek kroni. Më larg, nga distanca, më larg se me juve. Dy herë e kam parë krejt gjatë luftës”, tha dëshmitari.
Kehoe pyeti edhe për Blerim Kuçin, për të cilin Halitjaha tha se ka ikur rreth datës 22 apo 34 gusht 1998 nga Kosova.
Kehoe: Fakti qëndron që Blerim Kuçi e dezertoi pozitën, i gjendur përballë sulmit serb në shtator të vitit 1998, apo nuk është kështu?
Salitjaha: Data nuk mund të jetë 11 shtator, por ofensiva e madhe serbe ka qenë me 22 gusht 23, 24 dhe 25 gusht. Në këtë ofensivë ata kanë dezertuar, ata që përmendet. 11 shtatori është vonë, nuk e di ku kanë qëndruar deri më 11 shtator. Unë me sa e di në gusht, më së largu 24 gusht, ai nuk ka qenë më në Kosovë. Ai ka qenë komandant brigade, unë kam qenë komandant batalioni. Bile porosia e tij e fundit ka qenë ‘kujdes për civilët na kanë mbetur pa mbrojtje, nëse mundesh me ndërkombëtarët diku me Kryqin e Kuq. Nuk e kam dëgjuar kurrë më radiolidhjen e tij prej 24 gushtit”, u përgjigj ai.
Gjatë pasdites ka nisur dëshmia e ish-zyrtares së OSBE-së në Kosovë, Sandra Mitchell.
Gjykimi ndaj ish-krerëve të UÇK-së ka filluar më 3 prill me deklaratat hyrëse të palëve. Hashim Thaçi, Kadri Veseli, Jakup Krasniqi e Rexhep Selimi janë deklaruar të pafajshëm për të gjitha pikat e aktakuzës.
Ish-krerët e UÇK-së po gjykohen për krime të pretenduara të luftës dhe po mbahen në qendrën e paraburgimit në Hagë prej nëntorit të vitit 2020. /kp
Në kuadër të programit “Kosova, shtet i xhudos”, Federata e Xhudos e Kosovës do ta organizojë për herë të parë Kampionatin e Hapur Evropian të Xhudos “European Judo Championships Open Prishtina 2023”.
Finalet e këtij Evropianit do të organizohen në Prishtinë më datën 16 dhjetor, raporton KosovaPress.
E me këtë rast, ka folur presidenti i Federatës së Xhudos së Kosovës, Agron Kuka i cili organizimin e këtij Evropiani në Prishtinë e cilësoi si një epokë të re për shtetin tonë.
“Kampionati Evropian paralajmëron një epokë të re për ne në disa aspekte: për herë të parë në Kosovë do të organizohet një turne ndërkombëtar i xhudos të klasës së përgjithshme. Xhudo ka qenë prej kohësh një sport kombëtar. Ajo që na ka munguar deri më tani është një turne në vendin tonë ku yjet tanë mund të shfaqen para publikut vendas. Është koha ta ndryshojmë këtë”, tha Agron Kuka.
Kampionati i Hapur Evropian i Xhudos, “European Championships Open”, organizohet në kuadër të programit shtetëror, “Kosova, shtet i xhudos” nga Federata e Xhudos e Kosovës, dhe mbështetet nga Ministria e Kulturës, Rinisë dhe Sportit dhe Federatës Evropiane të Xhudos.
Ministrja e Arsimit, Arbërie Nagavci, ka thënë se shkaktar i rezultateve të dobëta të vendit tonë në testin PISA, janë kryesisht për shkak të problemeve që ka shkaktuar pandemia në mësimdhënie dhe mësim nxënie, por shtoi se janë edhe shumë faktor të tjerë që do të mundësonte rezultate të dëshiruara.
Kosova është renditur pothuajse në vendet e fundit në rezultatet e testit të PISA-s për vitin 2022. Kosova ka zënë vendin e 76-të nga 80 shtete pjesëmarrëse për lexim, vendin e 77-të nga 80 për shkencë dhe më së miri ka performuar në matematikë, duke u renditur e 74-ta nga 80 vende. Matematika llogaritet si lënda kryesore në renditje.
Rezultatet e testit “PISA 2022” u publikuan të martën, në të cilat Kosova ka shënuar rënie në krahasim me vitin 2018, kur edhe ky test u mbajt për herë të fundit.
“Në vitin 2022 kemi pas një situatë pas pandemisë me një adaptim dy vjeçare ku mësimi zhvillohej me vështirësi të mëdha nga distanca me ndërprerje jo të vogla dhe kjo ka ndikuar që për shkak të situatës me pandeminë, nxënësit kanë pësuar rënie në mësim nxënie dhe këto janë dëshmuar në studime të ndryshme. Kjo është treguar edhe në rezultatet e testit Pisa në përgjithësi, jo vetëm në vendet e rajonit por edhe te ne…në të gjitha vendet që kanë qenë pjesëmarrëse këtu, kanë pas rënie në krahasim me vetveten dhe përgjithësisht dhe beso se nëse i shmangim faktorët vendor në Kosovë që mund të kenë ndikuar, pandemia është faktori i përbashkët për të gjitha këto vende që ka ndikuar te këto rezultate që u prezantuan tashmë. Gjithsesi me politikat tona ne synojmë që të sjellim deri te përmirësimi i rezultateve dhe nuk mund të them se është një faktor por mendoj se ka më shumë se një faktor që ka ndikuar në këto rezultate”, ka thënë Nagavci.
Ajo ka përmendur ndryshimet në legjislativ dhe mbështetjen që kanë bërë për shkollat dhe presin që të shohin rezultatet e para në vitin 2025.
Kosova nuk ka regjistruar rezultate të mira në testin PISA ndër vite.
