ATV

Blog

  • Jude Bellingham gati për Botërorin: “Asnjë ftesë me Anglinë nuk e marr si të mirëqenë”

    Jude Bellingham gati për Botërorin: “Asnjë ftesë me Anglinë nuk e marr si të mirëqenë”

    Jude Bellingham do të jetë një nga figurat kryesore të Anglisë në Kupën e Botës, pasi mesfushori i Real Madridit është përfshirë në listën e Thomas Tuchel për turneun që do të zhvillohet në Shtetet e Bashkuara.

    Për 22-vjeçarin, ky do të jetë Botërori i dytë në karrierë, pas eksperiencës së parë në Katar në vitin 2022, por këtë herë roli dhe pesha e tij në skuadër pritet të jenë shumë më të mëdha.

    Menjëherë pas publikimit të listës, Bellingham reagoi në rrjetet sociale me një mesazh emocional, duke treguar se për të fanella e Anglisë mbetet privilegji më i madh.

    “Turneu i katërt madhor, Kupa e Botës numër dy. Fëmija në fotografinë e fundit nuk do ta kishte besuar kurrë këtë. Pikërisht për këtë arsye nuk e marr asnjë ftesë si të mirëqenë. Aq më pak një ftesë që më jep mundësinë të përfaqësoj vendin dhe familjen time në skenën më të madhe”, shkroi ai.

    Mesfushori anglez pranoi gjithashtu se sezoni nuk ka qenë i lehtë, por theksoi se ndihet gati për sfidën më të madhe me kombëtaren.

    “Ka qenë një vit i vështirë, por ndiej se jam në një moment të mirë dhe gati të jap gjithçka për Anglinë edhe një herë. Tifozë të Anglisë, mezi pres t’ju shoh në SHBA”, shtoi Bellingham.

    Ylli i Real Madridit vjen në këtë Botëror pas një sezoni solid në “Santiago Bernabéu”, ku gjatë edicionit 2025/26 ka regjistruar 39 paraqitje, pesë gola dhe shtatë asistime.

    Në një Angli që synon t’i japë fund pritjes së gjatë për një trofe madhor, Jude Bellingham shihet si lideri i brezit të ri dhe një nga armët më të forta të Thomas Tuchel në misionin për të rikthyer “Tre Luanët” në majën e futbollit botëror.

  • Bajrami: Mbrëmë paralajmërova, sot Kurti po tenton t’i blejë votat me para të shtetit

    Bajrami: Mbrëmë paralajmërova, sot Kurti po tenton t’i blejë votat me para të shtetit

    Kandidatja për deputete nga radhët e LDK-së, Hykmete Bajrami, ka hedhur kritika të forta ndaj vendimit të qeverisë në detyrë për shpërndarjen e mjeteve monetare te qytetarët, në prag të zgjedhjeve të parakohshme të 7 qershorit.

    Në një postim në Facebook, Bajrami tha se këtë e kishte paralajmëruar mbrëmë dhe theksoi se kjo është tentativë e kryeministrit në detyrë, Albin Kurti, për të blerë vota me para të buxhetit të shtetit.

    “Që 6 vjet: çmimet janë dyfishuar, arsimi është lënë pas dore, spitalet janë pa barna e me lista të gjata të pritjes për trajtim, të gjitha rrugët janë pa përfunduar dhe asnjë investim i madh nuk ka ndodhë. Tash 100 euro/votë”, shkroi Bajrami.

    Ajo ua rikujtoi qytetarëve që “këto janë paratë e juaja që ua ka marrë përmes inflacionit dhe meqë nuk i ka investu as në arsim, as në shëndetësi, as në infrastrukturë dhe as në ekonomi po u a kthen në këmbim të votës”.

    “Kjo nuk është ndihmë. Kjo është skemë e korrupsionit publik”, deklaroi kandidatja për deputete, Hykmete Bajrami.

    Qeveria në detyrë e Kosovës, paraditen e së premtes mori vendim për rritjen e shtesave për lehona, si dhe për ndarjen e shtesave nga 100 euro për studentët, pensionistët, punëtorët e sektorit jopublik dhe fëmijët.

  • Gjini pret në takim ambasadorin italian: Në këtë udhëkryq politik, mbështetja e aleatëve tanë perëndimorë është jetike

    Gjini pret në takim ambasadorin italian: Në këtë udhëkryq politik, mbështetja e aleatëve tanë perëndimorë është jetike

    Nënkryetari i Aleancës për Ardhmërinë e Kosovës, Ardian Gjini, ka pritur sot në takim ambasadorin e Italisë në Kosovë, Maurizio Antonini.

    Aleanca tha se gjatë këtij takimi “u bashkëbisedua hapur për zhvillimet e fundit politike dhe sfidat nëpër të cilat po kalon vendi ynë”.

    “Shteti mik italian ndër vite ka treguar kujdes e mbështetje të veçantë për Republikën e Kosovës. Italia mbetet një ndër kontribuuesit kryesorë për paqen dhe sigurinë në vend përmes misionit të KFOR-it, por edhe një partner strategjik përmes projekteve të shumta në fushën e zhvillimit ekonomik”.

    AAK tha se ky takim “miqësor dhe me rëndësi të veçantë” zhvillohet në prag të zgjedhjeve, një periudhë vendimtare ku përcaktohet drejtimi i ardhshëm i Kosovës.

    “Në këtë udhëkryq politik, mbështetja e aleatëve tanë perëndimorë është jetike për të garantuar procese demokratike, stabilitet dhe një rrugëtim të sigurt drejt integrimeve euroatlantike. Jemi jashtëzakonisht mirënjohës për rolin e paluajtshëm të Italisë, si në të kaluarën, ashtu edhe në këtë moment dinamik dhe të rëndësishëm për të ardhmen e vendit tonë”.

  • Rama fton kryeministren e Japonisë në Shqipëri për Samitin e NATO-s

    Rama fton kryeministren e Japonisë në Shqipëri për Samitin e NATO-s

    Kryeministri shqiptar Edi Rama ka ftuar kryeministren e Japonisë, Sanae Takaichi, në Samitin e NATO-s që do të zhvillohet vitin e ardhshëm në Shqipëri.

    Vitin e ardhshëm, Samiti i NATO-s do të zhvillohet në Shqipëri dhe si vend organizator kam kënaqësinë t’iu ftoj të merrni pjesë në të”, i tha Rama homologes japoneze gjatë takimit në Tokio. Do të jeni gjithashtu kryeministri apo kryeministrja e parë e Japonisë që viziton vendin tonë”, thai ai, shkruan A2.

    Vizita në Japoni vjen pas asaj në Korenë e Jugut, ku mori pjesë në Samitin e Lidershipit Aziatik.

    Kryeministri Rama u prit me ceremoni të lartë shtetërore në Tokio.

  • BE-ja u njoftua nga mediat për krijimin e xhandarmërisë në Kosovë, thonë se kërkuan informata shtesë nga MPB-ja

    BE-ja u njoftua nga mediat për krijimin e xhandarmërisë në Kosovë, thonë se kërkuan informata shtesë nga MPB-ja

    Ministri në detyrë i Punëve të Brendshme të Kosovës, Xhelal Sveçla, njoftoi se janë ndërmarrë hapat e parë drejt themelimit të Xhandarmërisë së Kosovës.

    Ky paralajmërim i Sveçlës erdhi një ditë pasi kryeministri në detyrë, shefi i tij, Albin Kurti e tha këtë në një intervistë televizive.

    E duke mos pritur gjatë, Sveçla të nesërmen veçse shkroi në rrjetet sociale se ka nënshkruar themelimin e grupit punues, që sipas tij, do të bëjë analizimin dhe propozimin e modaliteteteve për funksionimin e Xhandarmërisë, si Agjencion i MPB-së.

    “Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufijve, integritetit dhe sovranitetit tonë territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike”, shkroi ai në Facebook.

    Sipas Sveçlës, krijimi i Xhandarmërisë do të forcojë kapacitetet shtetërore për parandalimin, menaxhimin dhe neutralizimin e kërcënimeve “që cenojnë sigurinë e qytetarëve dhe integritetin territorial të vendit tonë.

    E në dijeni për këtë çështje tanimë janë edhe nga Bashkimi Evropian. Por të njëjtit në dijeni mbi këtë zhvillim janë përmes raportimit në media.

    Në një përgjigje të dhënë për lajmi.net, nga Zyra e BE-së në Kosovë është thënë se “jemi në dijeni të raportimeve të mediave në lidhje me këtë çështje”.

    Përpos kësaj, zëdhënësja për media e kësaj zyre, Nikola Gaon, deklaroi se tanimë e kanë kontaktuar ministrinë e Punëve të Brendshme të drejtuar nga Xhelal Sveçla për të marrë më tepër informacione në lidhje me këtë zhvillim.

    “I kemi kontaktuar Ministrisë së Brendshme për të marrë më shumë informacion.”

    Por në lidhje me krijimin e Xhandarmërisë në Kosovë, kanë folur edhe nga KFOR-i.

    Nga KFOR-i u tha se po i ndjekin nga afër deklaratat e vazhdueshme nga institucionet në Kosovë në lidhje me këtë temë, ndërsa për detaje kanë thënë se u takon institucioneve në Kosovë të japin.

    “NATO vazhdon të bashkëpunojë me të gjitha organizatat e sigurisë në Kosovë dhe të japë kontributin e vet për siguri të qëndrueshme në Kosovë, në dobi të të gjithëve. Në bazë të Rezolutës 1244 të Këshillit të Sigurimit të OKB-së të vitit 1999, KFOR-i siguron një mjedis të qetë dhe të sigurt për të gjithë njerëzit që jetojnë në Kosovë, si dhe lirinë e lëvizjes. Në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), sipas roleve të tyre përkatëse si reagues të sigurisë. Ekipi Këshillues dhe Ndërlidhës i NATO-s (NALT) ka mbështetur zhvillimin e Forcës së Sigurisë së Kosovës (FSK), në përputhje me mandatin e saj fillestar për mbrojtje civile, përmes ngritjes së kapaciteteve, arsimit dhe koordinimit të trajnimeve”, kanë thënë nga KFOR-i

    Gjithashtu u tha se presin nga organizatat e sigurisë në Kosovë që të vazhdojnë të bashkëpunojnë dhe të koordinohen me KFOR-in për të kontribuar në sigurinë në Kosovë dhe stabilitetin rajonal, në dobi të të gjitha komuniteteve që jetojnë në Kosovë.

    Për themelimin e Xhandarmërisë, fillimisht ka folur kryeministri në detyrë i Kosovës, Albin Kurti. Pasi fillimisht e përfoli si ide, dje u rezervua të jepte detaje pasi i pranishëm nuk ishte edhe Sveçla. Ai tha se Xhandarmëria parashihet të jetë mes policisë e ushtrisë.

    “Sa i përket koncept-dokumentit dhe grupit punues dhe hollësive për Xhandarmërinë do t’iu njoftojmë shumë shpejtë bashkë me ministrin e Punëve të Brendshme. Ka kohë që ne e kemi menduar këtë gjë sepse një aspekt tjetër i sigurisë së Kosovës ka të bëj me një zonë e cila është më shumë se Policia e më pak se Ushtria, prej ruajtjes së kufirit, te luftimi i terrorizmit, te mbyllja e çfarë do shtegu të kontrabandës e deri te mbrojtja e infrastrukturës jetike. Të gjitha detajet lidhur me këtë idetë tonë që tani po bëhet edhe koncept-dokument do t’i trajtojmë me ministrin e Punëve të Brendshme”, ka thënë Kurti.

    Xhandarmëria është një forcë e sigurisë me karakter ushtarak që kryen detyra policore. Në disa shtete mund të jetë pjesë e Ministrisë së Brendshme, në të tjera pjesë e forcave të armatosura.

    Shumë shtete kanë xhandarmërinë e tyre, përfshirë edhe fqinji verior i Kosovës, Serbia, xhandarmëria e së cilës funksionon në kuadër të policisë.

    Xhandarmëri kanë edhe shtete të tjera, sikurse Franca, shtet anëtar i NATO-s. Zakonisht xhandarmëria merret me sigurinë e kufijve dhe luftimin e terrorizmit.

    Shembull, Xhandarmëria e Francës është forcë ushtarake që ka për detyrë sundimin e ligjit, ka juridiksion të plotë mbi popullatën civile dhe është përgjegjëse për sigurinë publike, rendit publik dhe ndërvepron me forcat policore dhe ushtarake brenda dhe jashtë vendit. Ajo luan rol në menaxhimin e krizave dhe merr pjesë edhe në misione paqësore jashtë vendit, por edhe në operacione luftarake.

    Në NATO, forcat e llojit të xhandarmërisë përmenden në kuadër të asaj që njihet si policia për stabilitet.

  • “Qesharake dhe jonjerëzore”, Azemi thotë se vendimi prej 100 eurosh ndaj punëtorëve privatë është diskriminues

    “Qesharake dhe jonjerëzore”, Azemi thotë se vendimi prej 100 eurosh ndaj punëtorëve privatë është diskriminues

    Kryetari i Sindikatës së Punëtorëve të Sektorit Privat, Jusuf Azemi, ka reaguar ndaj vendimit të sotëm të Qeverisë së Kosovës për ndarjen e nga 100 eurove për studentët, pensionistët, fëmijët dhe punëtorët e sektorit privat në kuadër të pakos “Inflacioni 2.0”.

    Në një konferencë për media, Azemi tha se punëtorët e sektorit privat janë diskriminuar në raport me ata të sektorit publik, duke theksuar se dallimi në mbështetje financiare është i madh dhe i padrejtë.

    “Sot këtë konferencë për shtyp e kemi sjellur lidhur me vendimin e Qeverisë së Kosovës lidhur me pakon e Inflacionit 2.0. Realisht ne mendojmë që sa herë që merr veprime Qeveria e Kosovës, që të stimulojë punëtorët, edhe publik, edhe privat, krijon një ndasi aq të madhe saqë është diçka e paparashikueshme”, deklaroi Azemi.

    Ai tha se derisa punëtorët e sektorit publik kanë përfituar paga të 13-ta në vlerë prej rreth 65 milionë eurosh, sektori privat sipas tij do të përfitojë vetëm rreth 20 milionë euro në total.

    “Punëtorët e sektorit publik morën rreth 65 milionë euro, përderisa për punëtorët e sektorit privat, në bazë të një llogaritmi që unë e kam bërë, diku do t’i kushtojë kjo pako rreth 20 milionë euro. Punëtorët e sektorit publik kanë marrë mesatarisht 750 euro për pagën e 13-të, ndërsa punëtorët e sektorit privat do të marrin vetëm nga 100 euro për një punëtor”, tha ai.

    Sipas Azemit, diskriminimi thellohet edhe më shumë me kriteret e vendosura për përfitim.

    “Në një farë forme degradimi tjetër është që na e kanë bërë, sepse punëtorët e sektorit publik kanë marrë edhe ata që kanë pagë mbi 1000 euro, kurse tek punëtorët e sektorit privat ky vendim nuk vlen dhe punëtorët e sektorit privat do të marrin vetëm ata të cilët e kanë pagën nën 1000 euro”, u shpreh Azemi.

    Ai akuzoi Qeverinë se vendimi është marrë për arsye elektorale dhe jo për mbështetje reale të punëtorëve.

    “Qeveria nuk e ka bërë nga vullneti, po e ka bërë nga përfitimet e saj personale, sepse ju e dini që jemi në prag të zgjedhjeve. Unë kam menduar që minimumi çka do të bëhej do të ishte së paku ndarja e një gjysmë page për punëtorët e sektorit privat, por të bien në nivelin e 100 eurove, kjo me të vërtetë është qesharake dhe jo njerëzore”, deklaroi ai.

    Azemi tha se shumica e punëtorëve privatë mund të mbesin jashtë kësaj skeme për shkak të mungesës së kontratave dhe problemeve me kontributet pensionale.

    “Jemi të bindur që nuk do të arrijnë as shifra 100 mijë punëtorë që do ta marrin këtë stimulim qesharak, sepse pjesa dërrmuese e punëtorëve të sektorit privat nuk kanë fare kontrata pune. Një pjesë e madhe e tyre nuk kanë njohuri se si t’i mbushin aplikacionet dhe unë mendoj që edhe këtu është bërë një dredhi”, tha ai.

    Në fund, ai theksoi se sektori privat vazhdon të mbetet më i dëmtuari në vend.

    “Kur e rrumbullaksojmë të gjithë këtë, 300 mijë punëtorë të sektorit privat të Kosovës po marrin 20 milionë euro, përderisa tek punëtorët e sektorit publik, 85 mijë kanë marrë 65 milionë euro”, përfundoi Azemi./EO/

  • Supremja ia hedh poshtë ankesën e Listës Serbe se 10 kandidatët e partisë së Rashiqit s’i përkasin komunitetit serb

    Supremja ia hedh poshtë ankesën e Listës Serbe se 10 kandidatët e partisë së Rashiqit s’i përkasin komunitetit serb

    Refuzohet ankesa e “Listës Serbe”, e paraqitur kundër vendimit të PZAP-së

    Gjykata Supreme ka hedhur poshtë ankesën e Listës Serbe kundër vendimit të Panelit Zgjedhor për Ankesa dhe Parashtresa, i cili e kishte refuzuar si të pabazuar ankesën e saj të paraqitur kundër vendimit të Komisionit Qendror të Zgjedhjeve lidhur me certifikimin e dhjetë kandidatëve të Partisë për Liri, Drejtësi dhe Mbijetesë që e udhëheq Nenad Rashiq, për zgjedhjet e 7 qershorit.

    “Kundër vendimit të PZAP-së, subjekti politik “Lista Serbe” ka ushtruar ankesë në Gjykatë Supreme, duke pretenduar shkelje të Kushtetutës së Republikës së Kosovës, shkelje të dispozitave të Ligjit për Zgjedhjet e Përgjithshme, si dhe vërtetim të gabuar të gjendjes faktike. Ankuesi ka propozuar anulimin e vendimit të PZAP-së dhe të vendimit të KQZ-së, si dhe detyrimin e KQZ-së për nxjerrjen e një vendimi të ri. Pas shqyrtimit të pretendimeve ankimore, përgjigjes në ankesë dhe shkresave të lëndës, Gjykata Supreme e Kosovës gjeti se ankesa është e pabazuar”, njoftoi gjykata.

    Gjykata Supreme vlerësoi se ankuesi nuk ka ofruar prova konkrete, të besueshme dhe bindëse për të mbështetur pretendimet se kandidatët e certifikuar nga KQZ-ja nuk i përkasin komunitetit serb.

    Gjykata Supreme thekson se publikimet në portale elektronike apo artikujt medialë nuk përbëjnë prova juridikisht relevante për të vërtetuar përkatësinë etnike të kandidatëve.

    Në arsyetimin e saj, Gjykata Supreme thekson se barra e të provuarit bie mbi ankuesin dhe se pretendimet për shkelje kushtetuese apo ligjore nuk mund të mbështeten vetëm në supozime apo interpretime subjektive.

    Gjykata Supreme gjithashtu vlerëson se vendimi i PZAP-së është në përputhje me Kushtetutën e Republikës së Kosovës dhe Ligjin nr. 08/L-228 për Zgjedhjet e Përgjithshme në Republikën e Kosovës, duke respektuar parimet e barazisë, të drejtave zgjedhore dhe mbrojtjes së komuniteteve.

  • “Ti prej Prishtine po do me ruajt tokën tem”, protestuesit përplasen me Fitore Pacollin – Pamje

    “Ti prej Prishtine po do me ruajt tokën tem”, protestuesit përplasen me Fitore Pacollin – Pamje

    Ministrja në detyrë e Mjedisit dhe Planifikimit Hapësinor, Fitore Pacolli, doli para protestuesve të cilët e nisën protestën para kësaj Ministrie në shenjë kundërshtimi ndaj vendimit për pezullimin e mallrave dhe shërbimeve ndërtimore në Rugovë.

    “Ti prej Prishtine po do me ruajt tokën tem…marre duhet me të ardhë, nuk munesh me ma rujt token teme ma fort se unë”, tha njëri nga ta.

    Disa prej tyre folën nën tensione me të duke i kërkuar anulimin e menjëhershëm të vendimit e më pastaj të ulen e të bisedojnë.

    Protesta po organizohet organizohet nën moton “Rugova nuk hesht – Rugova kërkon drejtësi!”.

  • Andy Robertson – Fundi i një epoke të artë në “Anfield”

    Andy Robertson – Fundi i një epoke të artë në “Anfield”

    Liverpool po i afrohet një tjetër ndryshimi të madh në strukturën e tij, ndërsa Andy Robertson përgatitet të mbyllë kapitullin e tij në “Anfield” si një nga historitë më të jashtëzakonshme të suksesit në epokën moderne të klubit.

    Nga një transferim prej vetëm rreth 8 milionë eurosh nga Hull City në vitin 2017, skocezi u shndërrua në një nga mbrojtësit e majtë më të mirë në botë dhe në një figurë kyçe të periudhës më të lavdishme të Liverpoolit në dekadat e fundit.

    377 paraqitje, Ligë e Kampionëve, dy tituj të Ligës Premier dhe një seri trofesh të tjerë – Robertson nuk ishte thjesht pjesë e suksesit, ai ishte një nga shtyllat e tij.

    Në fjalët e tij të fundit para lamtumirës së mundshme ndaj Brentfordit, ai riktheu emocionet e kulmit të karrierës: triumfin në Ligën e Kampionëve 2019, një moment që ai vetë e përshkruan si ndër më të bukurit e jetës së tij.

    Por historia e tij nuk është vetëm trofe dhe festa. Robertson foli gjithashtu për momentet e vështira që skuadra ka kaluar, përfshirë periudhat emocionale dhe humbjet që kanë lënë gjurmë të thella në dhomën e zhveshjes, duke treguar anën njerëzore të një skuadre shpesh të idealizuar nga jashtë.

    Megjithatë, edhe në përfundim të këtij cikli, mesazhi i tij mbetet i qartë: Liverpooli nuk ka mbaruar.

    “Liverpooli ka mjaftueshëm cilësi për të fituar sërish trofe”, është deklarata që tingëllon si një dorëzim i shpresës, por edhe si një kujtesë për standardin që ai vetë ndihmoi të ndërtonte.

    Ndërkohë, në prapaskenë flitet për një lëvizje të re të madhe. Sipas raportimeve, përfshirë ato të Fabrizio Romano, Robertson ka arritur një marrëveshje paraprake për t’iu bashkuar Tottenham Hotspur si lojtar i lirë – një transferim që ende mbetet i kushtëzuar nga zhvillimet e klubit londinez.

    Nëse ky hap finalizohet, do të shënonte jo vetëm fundin e një epoke në Liverpool, por edhe nisjen e një kapitulli të ri për një futbollist që tashmë ka hyrë në historinë e Premier League si një nga “blerjet perfekte”.

    Para çdo vendimi përfundimtar, Robertson mbetet i fokusuar te momentet e fundit me fanellën e Skocisë, duke u përgatitur për një tjetër skenë të madhe – Kupën e Botës, ku ai do të kërkojë të lërë gjurmën e tij edhe në arenën ndërkombëtare.

  • Në Shqipëri temperaturat pritet të shkojnë deri në 33 gradë në fundjavë e javën e ardhshme

    Në Shqipëri temperaturat pritet të shkojnë deri në 33 gradë në fundjavë e javën e ardhshme

    Masat ajrore me origjinë nga Afrika e Veriut, të cilat po furnizohen me lagështi nga Deti Mesdhe, kanë sjellë kushte atmosferike relativisht të paqëndrueshme në territorin e Shqipërisë.

    Sinoptikanja Elida Maloçali në Top Channel tregoi se si do të jetë moti edhe në javën e ardhshme.

    Sipas parashikimeve meteorologjike, gjatë fundjavës vendi do të jetë me mot të ndryshueshëm, ku alternohen kthjellime dhe vranësira. Në orët e mesditës, vranësirat pritet të shoqërohen me reshje shiu dhe rrebeshe kryesisht në zonat malore, ndërsa vija bregdetare mbetet kryesisht pa reshje.

    Era do të fryjë me shpejtësi nga 7 deri në 14 m/s, duke sjellë kushte lokale të ndryshueshme në disa zona.

    Sa i përket temperaturave, vendi ndodhet në kushte tipike subtropikale, me vlera që pritet të arrijnë deri në 33-34°C gjatë fundjavës.

    Edhe gjatë javës së ardhshme, moti do të mbetet i ngjashëm, me kthjellime në pjesën më të madhe të territorit dhe reshje të izoluara në relievet malore. Temperaturat pritet të rriten më tej, duke arritur deri në 34-35°C, ndërsa era do të jetë më e lehtë, rreth 5 m/s./TCh/