ATV

Blog

  • Çeku: Artistët e Kosovës promovojnë shtetin në Vjenë

    Çeku: Artistët e Kosovës promovojnë shtetin në Vjenë

    Ministri i Kulturës, Hajrulla Çeku ka theksuar se artistët e Kosovës vazhdojnë me paraqitje në skena të njohura botërore.

    Ai ka shkruar në Facebook se koristët e Siparantum Choir gjatë festave të fundvitit ndanë skenën me Orkestrën Simfonike të Vjenës dhe Korin Wiener Singakademie.

    “Artistët e Kosovës vazhdojnë me paraqitje në skena të njohura botërore. Koristët e Siparantum Choir gjatë festave të fundvitit ndanë skenën me Orkestrën Simfonike të Vjenës dhe Korin Wiener Singakademie. Përgëzime udhëheqësit të korit, dirigjentit Memli Kelmendi – Composer/Conductor dhe gjithë ekipit të Siparantum për këtë arritje. Faleminderit që po e promovoni shtetin tuaj në mënyrë të shkëlqyeshme nëpër botë”, ka shkruar Çeku në Facebook.

  • Liberalizimi i vizave, Rafuna: Në gjashtëmujorin e parë bizneset do të përballen me mungesë të punëtorëve

    Liberalizimi i vizave, Rafuna: Në gjashtëmujorin e parë bizneset do të përballen me mungesë të punëtorëve

    Kosova rrezikon të mbetet pa fuqi punëtore nga muaji janar 2024 si rrjedhojë e liberalizimit të vizave, ngase shumë të rinj planifikojnë që të largohen për në shtetet e Bashkimit Evropian.

    Kështu ka vlerësuar kryetari i Odës Ekonomike të Kosovës, Lulzim Rafuna, i cili kërkon nga Qeveria e Kosovës të krijojë një strategji që të parandalojë ikjen e të rinjve nga vendi.

    Kreu i Odës Ekonomike, Rafuna thotë në një intervistë për KosovaPress, se edhe viti 2023 ishte sfidues për bizneset, kjo për shkak të ngecjes së investimeve kapitale nga ana e qeverisë, duke mos realizuar projektet me infrastrukturë të mirëfilltë për investime.

    Teksa flet për ikjen e të rinjve, ai konsideron se gjashtëmujori i parë i këtij viti do të jetë mjaft sfidues në aspektin e fuqisë punëtore për bizneset.

    Sipas Rafunës, faktori parë që ka ndikuar të ikin të rinjtë nga vendi është çështja e mos lidhjes së arsimit me kërkesat e tregut.

    Ai bënë thirrje Qeverisë që të krijojë një strategji që parandalon ikjen e të rinjve nga vendi.

    Kreu i Odës Ekonomike, Rafuna thotë se edhe gjatë vitit të kaluar sektori privat ka pasur sfida të shumta, me theks mungesën e fuqisë punëtore që ka shtyrë të investojë më shumë në pajisje.

    Derisa në vitin 2022, qeveria fajin ia hodhi Organit Shqyrtues të Prokurimit (OSHP) për ngecjen e investimeve, Rafuna thotë se tani kjo e fundit ka qenë e kompletuar dhe pushteti duhet të gjejë arsyet pse ka pasur ngecje të investimeve kapitale.

    Duke folur për faktorët që kanë goditur ekonominë e vendit, Rafuna shprehet i pakënaqur edhe me rritjen ekonomike përgjatë vitit 2023, për të cilën thotë se parashikimet kanë qenë 3.7 për qind.

    Ai derisa shton që në vend kanë munguar shumë investime të huaja, thotë se Qeveria duhet të punojë që t’i heq masat e BE-së.

    Në fund, Rafuna kërkon nga qeveria që të krijojë më shumë pako stimuluese për bizneset dhe të bëjë një reformë të thellë të Tatimit të Vlerës së Shtuar dhe jo të paguhet si tani.

  • Rama: Banorët rezidentë s’do të paguajnë parkimin për veturën e parë, çmim më të lirë për veturën e dytë

    Rama: Banorët rezidentë s’do të paguajnë parkimin për veturën e parë, çmim më të lirë për veturën e dytë

    Kryetari i Prishtinës, Përparim Rama, ka vizituar të martën Ndërmarrjen “Prishtina Parking”, e cila së fundmi ka ndryshuar rregulloren për parkingje publike në Kryeqytet.

    Rama ka thënë se banorët rezidentë nuk do të paguajnë parkimin për veturën e parë, ndërsa çmim më të lirë do të kenë për veturën e dytë.

    “Pas miratimit të rregullores për organizmin e parkingjeve publike në Prishtinë, zhvillimit të procedurave të nevojshme ligjore, fillon zbatimi i saj. Banorët rezidentë nuk do të paguajnë parkimin për veturën e parë, çmim më të lirë për veturën e dytë, kufizim i qasjes së vizitorëve në lagje në orët e pasdites, sepse vendet e parkingut u takojnë banorëve rezidentë. Të gjitha këto do të nisin të realizohen nga ‘Prishtina Parking’ që nga ky fillim vit, për t’ju ofruar qytetarëve rregull e siguri në parkingje publike”, ka shkruar Rama, teksa është njoftuar nga kryeshefi i kësaj ndërmarrjeje, Sokol Havolli për projektin e digjitalizimit.

    “Kryeshefi Ekzekutiv i Prishtina Parking, Sokol Havolli, na njoftoi se këtë vit do të realizohet projekti i digjitalizimit. Projekt shumë i rëndësishëm. Po ashtu në bashkëpunim me ndërmarrjet tjera publike, do të vazhdojë mirëmbajtja e parkingjeve, ku përfshihet pastrimi, larja dhe shtimi i gjelbërimit. Gjatë 2024-ës do të ketë edhe investime tjera në e nga ‘Prishtina Parking’”, ka shkruar Rama në Facebook.

    “Falënderoj punëtorët e palodhshëm të ndërmarrjes të cilët angazhohen që gjithçka të funksionojë si duhet. Ndërsa të gjitha projektet presim të realizohen si duhet fal angazhimit të anëtarëve të Bordit dhe ata të Komisionit të Aksionarëve, Sami Salihu, Fadil Hertica dhe Lindita Rexhepi”, ka shkruar tutje ai.

  • Deri në 30 minuta pritje në Merdarë për të dalë nga Kosova

    Deri në 30 minuta pritje në Merdarë për të dalë nga Kosova

    Sipas Qendrës Kombëtare për Menaxhim Kufitar, pritjet më të gjata për të dalë nga Kosova mesditën e sotme janë në Merdarë.

    Sipas kësaj qendre, më së shumti pritje ka në dalje në pikën kufitare me Serbinë, në Merdarë, ku pritjet, mesditën e sotme, zgjasin nga 25 deri në 30 minuta dhe kolona e makinave është rreth 300 metra e gjatë.

    Ndryshe, sipas Qendrës Kombëtare për Menaxhim Kufitar, pritjet më të gjata, mëngjesin e së martës, për të dalë nga Kosova ishin te Dheu i Bardhë, ku pritja ishte po ashtu deri në 30 minuta, por që tanimë atje nuk ka kolonë të gjatë automjetesh e as pritje.

    Në pikat e tjera s’ka kolona as në hyrje e as në dalje dhe pritjet zgjasin vetëm tre deri në pesë minuta.

  • Kosovës i shtohen pensionistët: 33 mijë përfitues të rinj u regjistruan vitin që lamë pas

    Kosovës i shtohen pensionistët: 33 mijë përfitues të rinj u regjistruan vitin që lamë pas

    Gjatë vitit 2023 janë regjistruar 33 mijë e 158 persona për të përfituar pension nga shteti.

    Nga numri total, 18 mijë e 887 qytetarë u regjistruan për të përfituar nga pensioni bazë.

    1 mijë e 104 ish-mësimdhënës u regjistruan për të përfituar nga pensioni që u takon, për arsye se kanë punuar gjatë periudhës së viteve 1990-1999, në kuadër të procesit të njohur si sistemi paralel i arsimit në Kosovë.

    Për të përfituar nga pensioni për të verbër u regjistruan 128 persona, kurse për pensionin paraplegjikë (personat të cilët si shkak i sëmundjes apo dëmtimit të sistemit nervor qendror apo periferik kanë humbur në formë të përhershme mundësinë e zhvendosjes dhe lëvizjes së ekstremiteteve të poshtme) dhe tetraplegjikë (personat të cilët si shkak i sëmundjes apo dëmtimit të sistemit nervor qendror apo periferik kanë humbur në formë të përhershme mundësinë e zhvendosjes dhe lëvizjes të ekstremiteteve të sipërme dhe të poshtme), u regjistruan 588 vetë.

    Kjo është lista me të gjitha kategoritë dhe qytetarët që u regjistruan deri më 15 dhjetor, për të përfituar pensione nga secila kategori veç e veç./FrontOnline

  • Mbi 100 të vdekur dhe mijëra të lënduar, bilanci i aksidenteve gjatë 2023-ës në Kosovë

    Mbi 100 të vdekur dhe mijëra të lënduar, bilanci i aksidenteve gjatë 2023-ës në Kosovë

    Të paktën 104 të vdekur dhe mijëra të lënduar, është bilanci i aksidenteve rrugore për vitin 2023.

    Sipas të dhënave të Policisë, gjatë këtij viti janë shënuar mbi 22 mijë aksidente në total. Krahasuar me vitin e kaluar, numri i aksidenteve vitit 2023 është rritur mbi një mijë sosh, raporton “Betimi për Drejtësi.

    Sipas statistikave të policisë, dërguar për “Betimi për Drejtësi”, shihet se gjatë 2023-ës ka rritje edhe të aksidenteve me persona të lënduar.

    Gjatë vitit 2023, 8 mijë e 833 persona u lënduan në aksidente komunikacioni, ndërsa në vitin 2022 kishte 7 mijë e 748 persona me lëndime trupore.

    Ndërsa, aksidente me dëme gjatë këtij viti janë regjistruar 13 mijë e 294, kurse vitin e kaluar ishin 12 mijë e 951.
    Në total, gjatë këtij viti në Kosovë kanë ndodhur 22 mijë e 370 aksidente, ndërsa vitin e kaluar kishte 20 mijë e 794.

    Nga aksidentet me fatalitet, të vdekur gjatë këtij viti kanë mbetur 46 shoferë, 28 këmbësorë, si dhe 28 pasagjerë, ndërsa vitin e kaluar janë regjistruar 106 persona të vdekur.

    Sipas raportimeve të Policisë së Kosovës që publikohen pas aksidenteve, shkaqet më të shpeshta që çojnë në aksidente, janë mosrespektimi i shenjave të komunikacionit, mospërshtatja e ngasjes së makinave me kushtet në rrugë dhe kushtet atmosferike, si dhe përdorimi i telefonit gjatë ngasjes.

    Përgjatë 21 viteve, në Kosovë janë shënuar 2 mijë e 573 aksidente dhe si pasojë e kësaj kanë vdekur 2 mijë e 930 persona.

    Gara automobilistike që përfundoi me tragjedi

    Dy javë më parë, në natën e 16 dhjetorit, mbetën të vdekur tre të rinj si pasojë e një aksidenti të shkaktuar në autostradën “Ibrahim Rugova” në Prizren.

    Tre të vdekurit ishin pjesë e organizimit të garës automobilistike e cila nuk nxori fitues, por Kosova humbi tre qytetarë. Në momentin e aksidentit, viktimat kanë qenë duke e shikuar garën.

    Pas aksidentit, Policia e Kosovës ka arrestuar dy të dyshuarit për shkaktim të aksidentit, të cilët aktualisht gjenden në paraburgim.

    Lidhur me këtë aksident tragjik, drejtori i Policisë së Kosovës, Gazmend Hoxha, gjatë konferencës së fundvitit tha se Njësia për Kontrollin e Autostradave gjatë këtij vitit ka parandaluar 50 gara ilegale në të gjithë rajonin e Kosovës si dhe kanë shqiptuar 193 gjoba për pjesëmarrësit në gara.

    Ai ka folur edhe për shkaktarët më të shpeshtë të aksidenteve.

    “Shkaktarët me të shpeshtë sipas analizave të policisë janë mosmbajtja e distancës së sigurisë mes mjeteve, manipulimi i pasigurt me automjet, mospërshtatja e shpejtësisë ndaj kushteve të rrugës, mosrespektimi i përparësisë së kalimit, kyçja e pasigurt në rrugë, radhitja e parregullt apo ndërrimi i shiritave e kthimrrotullimi-lëvizja prapa”, ka deklaruar Hoxha.

    Paralajmërohet ashpërsim të masave për shkelësit e rregullave të trafikut

    Ministri i Brendshëm i Kosovës, Xhelal Sveçla, gjatë konferencës së fundvitit, ka paralajmëruar ashpërsim të masave për shkelësit e rregullave në trafik.

    Sveçla ka thënë se përmes masave që do të merren ndaj shkelësve, masa do të ketë edhe ndaj, siç ka thënë ai, neglizhencës së zyrtarëve policorë për trajtim me prioritet të garave të paligjshme.

    Ai ka thënë se tashmë është miratuar në lexim të parë në Kuvendin e Kosovës, Ligji për ashpërsim të masave për shkelësit e rregullave në trafik dhe aktualisht është duke u shqyrtuar nëpër komisionet e përhershme, para se të miratohet në lexim të dytë.

    Ministri ka thënë se Ligji i ri, nëse miratohet, parasheh dyfishim të gjobave, konfiskim të patentë-shofërëve dhe dyfishim të pikëve, dhe se barra kryesore do të rëndojë mbi pronarin e makinës.

    “Përmes teknologjisë do të penalizojmë pronarët veturave, atyre veturave që bëjnë shkelje në trafik, e dënimet do të dërgohen në mënyrë të automatizuar te pronarët”, ka thënë Sveçla.

    Trefishohet numri i automjeteve qarkulluese në Kosovë

    Të dhënat e Policisë, tregojnë se këtë vit është trefishuar numri i automjeteve qarkulluese në Kosovë.

    Në vitin 2011 kanë qenë të regjistruar 189 mijë e 143 automjete në qarkullim. Por, në vitin 2022 ky numër është rritur në 420 mijë e 960 mjete në qarkullim. Ndërsa, këtë vit kanë qenë në qarkullim 442 mijë automjete.

    Ndërkaq, gjatë këtij viti sipas statistikave të Policisë 3 milionë e 500 mijë vetura kanë hyrë dhe dalë nga Kosova.

    Gjykimi i rasteve të aksidenteve gjatë vitit 2023

    Më 24 tetor 2023, Gjykata Themelore në Prishtinë e ka dënuar me 200 euro gjobë ministren e Industrisë, Ndërmarrësisë dhe Tregtisë, Rozeta Hajdarit për akuzën lidhur me aksidentin ku goditi një fëmijë.

    Aktgjykimi i Themelores po ashtu kishte obliguar Hajdarin që të paguajë shumën prej 100 euro për mendimin e ekspertit të komunikacionit dhe 900 euro për super-ekspertizë, ndërsa 50 euro për ekspertizë mjeko-ligjore

    Me aktgjykimin e Themelores nuk ishte pajtuar ministrja Hajdari, e cila përmes avokatit të saj, kishte ushtruar ankesë në Gjykatën e Apelit me pretendimet për shkelje esenciale të dispozitave të procedurës së kundërvajtjes, aplikimit të gabuar të ligjit material, vërtetim të gabuar dhe jo të plotë të gjendjes faktike, si dhe vendimit për shpenzimet e procedurës kundërvajtëse.

    Por, Apeli sipas aktgjykimit të 15 dhjetorit 2023 të siguruar nga “Betimi për Drejtësi“, refuzoi si të pabazuar ankesën e ministres Hajdari të paraqitur ndaj vendimit të shkallës së parë.

    Ndryshe, kërkesa ndaj të pandehurës Hajdari për inicim të procedurës së kundërvajtjes është bërë nga stacioni policor, Policia e Kosovës – Njësia Rajonale e Komunikacionit Rrugor, për aksidentin e ndodhur më 10 prill 2022, rreth orës 12:25 në rrugën “Vicianum”, në lagjen “Arbëria” në Prishtinë.

    Me të njëjtën kërkesë, Hajdari ngarkohej me “mospërshtatje të shpejtësisë” dhe “aksident komunikacioni me lëndime trupore”.

    Po ashtu në Gjykatën Themelore në Prishtinë, gjatë 2023-ës ka vazhduar gjykimi në rastin ku B.H po akuzohet se në shtator të 2020-ës ka shkaktuar aksident duke goditur me veturën e tij motoçiklistin, i cili më pas ka ndërruar jetë.

    Më 16 prill 2023, Gjykata Themelore në Pejë, kishte shpallur aktgjykim dënues ndaj të akuzuarve Arton dhe Nezir Duraku, duke i dënuar me 15 vite burgim (së bashku), pasi pranuan fajësinë se si pasojë e aksidentit të trafikut që shkaktuan, vdiq kadeti policor F.Sh, dhe se të njëjtit nuk i ofruan ndihmë pas aksidentit.

    Aktgjykimi i Themelores për këtë rast është vërtetuar edhe nga Gjykata e Apelit.

    Gjatë këtij viti, në Gjykatën Themelore të Pejë ka vazhduar procesi gjyqësor ndaj të pandehurit Eraj Temaj, i cili akuzohet për rrezikim të trafikut publik, ku si pasojë e aksidentit të shkaktuar kishte vdekur 22-vjeçari J.T.

  • Ndalimi i tifozëve në palestra, vendimi mbetet në fuqi

    Ndalimi i tifozëve në palestra, vendimi mbetet në fuqi

    Vendimi i Federatës së Basketbollit të Kosovës për mos lejimin e tifozëve mysafirë në palestra në ndeshjet e basketbollit mbetet në fuqi edhe gjatë këtij edicioni.

    Ky vendim erdhi për shkak të disa incidenteve gjatë vitit 2023 në palestra, ku nuk mungoi edhe dhuna fizike ndërmjet tifozëve.

    Përfaqësuesit e klubeve të basketbollit shprehen të ndarë për mos lejimin e tifozëve mysafirë në palestra.

    Arbnor Rifati nga klubi i basketbollit Prizreni, thotë për KosovaPress se vendimi i FBK-së është njëri nga më të mirë që ka mund të merret karshi kësaj situate.

    ”Për mua ky definitivisht është vendimi më i mirë ndonjëherë që është marrë. Do të thotë unë mendoj që masivizimi dhe zhvillimi i basketbollit është që t’i shmangim fyerjet, huliganizmin dhe vandalizmin nëpër palestra, pasi që 200 apo 300 vetë mund të sjellin disa të ardhura, por në të njëjtën kohë do t’i largojnë nënat dhe fëmijët, pasi që sporti është definicion që bën thirrje për edukim dhe ofrim të njerëzve e jo për urrejtje. Mendoj që derisa ne do të vetëdijesohemi si popull, sportin ta kuptojmë si kulturë e jo si vend shënjestër për sharje e fyerje, e të tjera. Unë jam pro këtij vendimi”, bëri të ditur Rifati.

    Ndryshe nga Rifati, zëdhënësi i klubit të basketbollit Peja, Ardit Lipa thotë se pavarësisht se respektojnë vendimin e federatës, ndalimi i tifozëve po u shkakton dëme financiare pasi mungesa e tifozëve mysafirë është e rëndësishme në aspektin e shitjes së biletave.

    Kryetari i Federatës së Basketbollit të Kosovës, Arben Fetahu, ka shuar të gjitha shpresat që ky vendim mund të ndryshohet. Sipas tij, aktet e dhunës në palestrat sportive po dëmtojnë rëndë imazhin e basketbollit kosovar.

    I pari i FBK-së ka kritikuar edhe organet e drejtësisë për mos efikasitet ndaj akteve të huliganizmit dhe kjo, sipas tij, po ndikon që ato vazhdimisht të përsëriten.

    Sipas Fetahut, ky është vendimi më i vështirë nga ana e FBK-së, por që alternativa tjetër do të ishte vetëm ndalimi i garës dhe kjo do të ishte me pasoja shumë më të rënda.

  • SHBA, rreth 43 mijë njerëz humbën jetën nga dhuna me armë në vitin 2023

    SHBA, rreth 43 mijë njerëz humbën jetën nga dhuna me armë në vitin 2023

    Pothuajse 43 mijë njerëz u vranë në sulmet e armatosura në Shtetet e Bashkuara të Amerikës(SHBA) vitin e kaluar, ndërsa janë regjistruar 654 të shtëna masive, raporton Anadolu.

    Sipas Arkivit të Dhunës me Armë, një faqe interneti që gjurmon vdekjet e dhunshme dhe shkaqet e tyre në SHBA, 42.888 amerikanë humbën jetën nga dhuna me armë deri më 31 dhjetor 2023. Kjo mesatarisht është rreth 117 vdekje çdo ditë.

    Pothuajse 1.700 viktima ishin fëmijë dhe adoleshentë, nga të cilët 1.381 nga mosha 12 deri në 17-vjeç që humbën jetën nga armët e zjarrit.

    Mes viktimave ishin 295 fëmijë, të moshës deri në 11 vjeç.

    Të shtënat më vdekjeprurëse në vitin 2023 u regjistruan në Lewiston, Maine më 25 tetor, kur një person i armatosur hapi zjarr me një pushkë snajper në një lokal boulingu, duke vrarë 18 persona dhe duke plagosur 13 të tjerë.

    Pas ndjekjes intensive dyditore, policia e gjeti sulmuesin të vdekur në një fabrikë riciklimi aty pranë, ku kishte kryer vetëvrasje.

    Masakra në Maine ishte një nga të shtënat masive më vdekjeprurëse në SHBA në dekada, duke bërë që presidenti Joe Biden t’i kërkonte Kongresit të miratonte ligje më të rrepta për armët.

    “Armët janë vrasësi numër një i fëmijëve në Amerikë, më shumë se aksidentet e trafikut, më shumë se kanceri, më shumë se çdo sëmundje tjetër”, tha presidenti amerikan.

    Të shtënat më vdekjeprurëse

    Të shtënat në Maine ishin më vdekjeprurëset e vitit 2023, ndërsa gjithashtu janë regjistruar edhe disa të shtëna të tjera masive vdekjeprurëse.

    Më 21 janar, një person i armatosur hapi zjarr gjatë festës së Vitit të Ri Kinez në Monterey Park, California, duke vrarë 11 persona dhe duke plagosur 9 të tjerë. Policia ra në gjurmët e të dyshuarit në furgon, ku kishte kryer vetëvrasje.

    Qindra blerës në një qendër tregtare në periferi të Dallasit në Allen, Teksas, filluan të ikin më 6 maj pasi një person i armatosur hapi zjarr, duke vrarë tetë dhe duke plagosur shtatë të tjerë. I dyshuari u qëllua dhe u vra nga policia.

    Në Enoch, Juta, më 4 janar, një burrë vrau shtatë anëtarë të familjes, duke përfshirë gruan, pesë fëmijët dhe vjehrrën, përpara se të bënte vetëvrasje. Policia tha se i dyshuari ishte nën hetim për dhunë në familje dhe se gruaja e tij sapo kishte bërë kërkesë për divorc.

    Në fund të marsit, pati edhe të shtëna në një shkollë private në Nashville. Gjashtë persona u vranë, tre nxënës dhe tre të rritur. I dyshuari, i cili ishte një ish-nxënës i shkollës, u vra nga oficerët e policisë.

    Shifrat tregojnë se në vitin 2023, nga të shtënat ku ishte përfshira edhe policia u vranë 1.438 persona, si dhe 50 oficerë policie u vranë në krye të detyrës.

    Gjithashtu janë regjistruar 1.563 të shtëna aksidentale dhe 673 vrasje dhe vetëvrasje.

    Shumica e vdekjeve ndodhën në Teksas, Luiziana, Florida, Georgia, Carolina e Jugut, Illinois dhe California.

  • Serbët pa pasaporta s’munden në Schengen, diplomati kosovar: Marrim përgjegjësi veç për shtetasit me dokumente të Kosovës

    Serbët pa pasaporta s’munden në Schengen, diplomati kosovar: Marrim përgjegjësi veç për shtetasit me dokumente të Kosovës

    Nga 1 janari qytetarët e Kosovës do të mund të lëvizin pa viza në zonën Shengen. Por kjo nuk do të vlejë për serbët e Kosovës që nuk janë të pajisur me pasaportë të Kosovës.

    Për këtë çështje ka shkruar edhe gazeta Frankfurter Allgemeine Zeitung . Gazeta thekson se kjo nuk vlen për një grup njerëzish.

    “Nëse ky përjashtim mbetet, atëherë serbët e Kosovës do të jenë të vetmit evropianë – pa llogaritur qytetarët e Rusisë dhe Bjellorusisë – të cilëve ende u mohohet liria e udhëtimit në BE,” tha gazeta.

    Siç kujtohet, kjo “situatë e veçantë” u krijua në vitin 2009, kur qytetarëve serbë iu dha mundësia e udhëtimit pa viza.

    Në atë kohë, Komisioni Evropian insistonte që të mos bëhet dallimi mes banorëve të Kosovës, kështu që serbët e atjeshëm, edhe pse qytetarë serbë, mund të merrnin pasaporta vetëm përmes Administratës Koordinuese. Me pasaporta të tilla ende nuk është e mundur të udhëtosh pa vizë.

    “Tani Komisioni Evropian propozon të shfuqizojë atë rregull special nga viti 2009. Ai u tejkalua nga koha me vendosjen e lirisë së vizave për Kosovën, thonë në Bruksel”, shkruan Frankfurter Algemaine .

    Sipas gazetës, këtë e kundërshton qeveria e Albin Kurtit, e cila pretendon se tani e më shumë serbët e Kosovës po kërkojnë pasaportat e Kosovës, gjë që, siç thonë në Prishtinë, i kontribuon integrimit.

    Gazeta e Frankfurtit, nga ana tjetër, thekson se ende është një numër i vogël i serbëve që janë në kërkim të pasaportës së Kosovës. Vitin e kaluar, sipas të dhënave nga Prishtina, ishin 4350, ndërsa një vit më parë 3400.

    Kjo të kujton letrën që zëvendëskryeministri i Kosovës Besnik Bislimi i shkroi Brukselit në nëntor, duke kërkuar që serbët e Kosovës ende nuk mund të udhëtojnë në BE me pasaportë serbe dhe duke u kujtuar atyre se ata gjithmonë mund të kërkojnë pasaportë të Kosovës.

    Gazeta citon gjithashtu fjalët e një diplomati të paidentifikuar kosovar, i cili thotë se Kosova nuk duhet të marrë përgjegjësi për banorët që udhëtojnë me pasaporta serbe dhe kryejnë kundërvajtje – të themi qëndrimin më shumë se 90 ditë – apo vepër penale. “Ne mund të marrim përgjegjësi vetëm për qytetarët që udhëtojnë me pasaportë të rregullt të Kosovës”, tha diplomati.

  • Aksident trafiku në një fshat të Prishtinës, shtatë të lënduar

    Aksident trafiku në një fshat të Prishtinës, shtatë të lënduar

    Një aksident trafiku ka ndodhur në fshatin Llukar të Prishtinës, ku ishin përfshirë dy veturave, ku përveç dëmeve materiale lëndime trupore kanë pësuar tre meshkuj dhe katër femra.

    Sipas Policisë, aksidenti ka ndodhur dje në mesditë, ku të lënduarit janë dërguar në tretman mjekësor. Një person i cili dyshohet se mund se është shkaktar i aksidentit pas trajtimit mjekësor, është arrestuar dhe pas intervistimit me vendim të prokurorit është dërguar në mbajtje.