Blog

Kryetari i Prishtinës, Përparim Rama ka thënë nga ky fillimvit në kryeqytet do të vendosen kamerat e sigurisë të cilat do t’i monitorojë policia e vendit.

Ai ka shkruar në Facebook se këto kamera kanë një intelegjencë të lartë artificiale, prodhim amerikano – kanadez, e të cilat konsiderton se do të ndihmojnë që përmes policisë, të bëjnë identifikimin e personave të cilët hedhin mbeturina, parkojnë në trotuare apo vende ku nuk lejohet.

“Po ashtu, përmes këtij sistemi, do të identifikohen, në kohë rekord, personat e përfshirë në vjedhje, rrahje apo çfarëdo vepre të tillë, dhe besojmë se do të ulë numrin e këtyre rasteve dhe rrisë nivelin e sigurisë në kryeqytet”, ka shkruar ai.

I pari i kryeqytetit ka folur edhe për pritshmëritë tjera që ka nga vendosja e këtyre kamerave.

“Personat të cilët me makina hynë gabim në rrugë një kahëshe, bëjnë tejkalim në vi të plotë ndarëse, apo udhëtojnë me veturë të paregjistruar, do të identifikohen menjëherë nga këto kamera, të cilat do të japin sinjalet në qendrën e monitorimit në polici, duke ndikuar që shkelje të tilla të ndodhin sa më pak. Kryeqyteti do të jetë më i sigurt!”, përfundon ai.

Sipas Qendrës Kombëtare për Menaxhim Kufitar, qytetarët më së shumti po presin në pikën kufitare Jarinje për të dalë nga Kosova.

Kolona në këtë pikë është 100 metra, dhe pritja është deri në dy orë.

Pritje mbi një orë po ndodh në pikën kufitare Merdarë, ku në dalje kolona është 200 metra dhe njerëzit po presin deri në 70 minuta.

Sipas të dhënave, po në dalje te Dheu i Bardhë, kolona është deri në 150 metra dhe njerëzit po presin deri në 40 minuta.

Në pikat e tjera s’ka kolona as në hyrje e as në dalje dhe pritjet zgjasin vetëm tre deri në pesë minuta.

Një rreshter në prag pensioni ka ekzekutuar me armë zjarri bashkëshorten, dy djemtë të moshës 10 dhe 12 vjeç, dhe më pas veten në shtëpinë e tyre 600 mijë dollarëshe në New City, në New York.

Watson Morgan, 49-vjeç rreshter i Departamentit të Policisë në Bronxville, u gjet i vdekur nga oficerët nga Departamenti i Policisë në Clarkstown.Oficerët kryen një kontroll rutinë për mirëqenien e Watson në New City pasi ai nuk u paraqit në punë.

“Rreshteri Morgan nuk u paraqit për turnin e mbrëmjes, mbrëmë dhe Departamenti ynë i Policisë kontaktoi Departamentin e Policisë Clarkstown në qytetin e tij të lindjes, i cili bëri zbulimin”- tha Policia e Bronxville në një deklaratë për CBS News.

“Rreshteri Morgan iu bashkua Departamentit të Policisë së qytetit të Nju Jorkut në 2000 dhe Departamentit të Policisë Bronxville në 2007. Ai u caktua në divizionin e detektivëve në 2014 dhe u gradua në rreshter në 2016”.

News 12 Westchester raportoi se ai ishte një oficer i të rinjve dhe pritej të dilte në pension në mars.

Të katër anëtarët e familjes janë gjetur të vdekur me plagë me armë zjarri.

“Në këtë fazë të hetimit besohet se Watson vrau gruan dhe dy fëmijët e tij, përpara se të vriste veten me një plagë të vetëshkaktuar me armë zjarri”, tha policia.

Kenyatta Jones-Ariette, mikeshë e familjes Morgan, tha në Facebook: “Zemrat tona janë tepër të rënduara nga ajo që ndodhi sot. Lutemi që shpirtrat e Ornela, Watson, Gabe dhe Liam të prehen në paqe.’

“Ndonjëherë ndodhin gjëra që janë të vështira për t’u kuptuar. Ju pyesni veten nëse kishte ndonjë gjë që mund të kishit bërë për të ndryshuar rezultatin. A ka diçka që mund të kishit thënë për të ndryshuar trajektoren? Ne të gjithë kemi udhëtimet tona individuale edhe pse zëmë këtë hapësirë ​​që e quajmë “tokë” së bashku. Asnjëherë nuk e dini se çfarë po ndodh brenda kokës së dikujt”, tha Jones-Arietta.

Në vendngjarje u sekuestrua një pistoletë dhe policia tha se qytetarët nuk janë në rrezik.

Familja Morgan blenë shtëpinë në New City në 2016 për 577,000 dollarë. Sipas faqes online të Educators of NYC në platformën “X”, Ornela ishte mësuese në një shkollë publike të qytetit të Nju Jorkut. Djemtë ndoqën shkollën në Distriktin Shkollor Qendror të Clarkstown.

10-vjeçari shkoi në shkollën fillore Laurel Plains dhe 12-vjeçari shkoi në shkollën e mesme Felix Festa.

Biznesmeni Ramiz Kelmendi ngre alarmin se me liberalizimin e vizave nga ky muaj shumë qytetarë do të ikin nga vendi dhe pretendimet e tij janë që do të krijohet një vakum në shoqërinë tonë. Kelmendi përmend dy çështje elementare që do të kenë impakt nga liberalizimi i vizave. Ai përmend se do të ketë ulje të prodhimit, duke filluar me bukën e përditshme për qytetarët.

Përveç kësaj pronari i Elkos Group, Ramiz Kelmendi thotë se nga ky muaj bizneset do të vuajnë nga mungesa e fuqisë punëtore.

Afaristi Kelmendi në një intervistë për KosovaPress fajëson qeverinë për ikjen e të rinjve nga vendi, sipas tij është një dështim politik që duhet të turpërohen të gjithë.

“Ikja e të rinjve është një dështim i fuqishëm politik, d.m.th. është një dështim për të cilin duhet të turpërohen që të gjithë, për arsyeje se në botën e jashtme po dalin gjithë të rinjtë e moshës së mirë që faktikisht janë një strukturë intelektuale që fare nuk kanë kontakt me alkoolin ose me gjëra tjera të cilat në perëndim është në mbisundim, këta janë të gjithë që punojnë, janë të përkushtuar, nuk janë njerëz që janë nën presionin dhe depresionet e ndryshme dhe duhet të gjithë të turpërohen si të lejojnë me dalë të gjithë këta përnjëherë. Kjo është njëlloj sikur me qenë këta qytetarë të okupuar dhe është krijuar liria e lëvizjes dhe liria për ta lëshuar këtë vend. Nuk kisha pas qejf të shoh një numër kaq të madh të të rinjve që për interesa dhe për një jetë më të mirë ekonomike që është shumë e domosdoshme për ta, keq për t’i penguar që të shkojnë… Këtu do të krijohet një vakum i jashtëzakonshëm, do të mungojnë me qindra e mijëra bukë në ditë që nuk do të shiten, do të mungojnë qindra e mijëra kafe që nuk do të pihen dhe buxheti do të varfërohet, për shkak se shumicën e rasteve është konsumues dhe mungesa e tyre do të ndikojë jashtëzakonisht shumë. Por, kthimi tyre është i pamundur, ata më nuk do të kthehen, përveç se do të kemi raste sporadike por që nuk janë masovike”, thotë Kelmendi.

Si biznesmen, Kelmendi shprehet i shqetësuar edhe me mungesën e komunikimit me institucionet shtetërore, derisa shton se shteti nuk ka ofruar as mbështetje për këtë sektor.

Ai iu bënë thirrje institucioneve shtetërore që të ndryshojnë qasjen ndaj bizneseve.

“Jo, nuk ekzistojnë. Momentalisht e kemi një institucion të organizuar të tillë që të gjithë ata emra politikë që kanë dalë në publik dhe kanë premtuar sot nuk i shihni, për arsyeje se nuk kanë të drejtë të dalin e të flasin, as të shprehin mendimin, as veprimin dhe as të shprehin ndonjë premtim të ri. Pra, institucionet janë kthyer në institucion mbrojtës jo në një institucion avancues… 01:43 Shteti realisht kurrë nuk është për mbështetje, është gjithmonë për ta mbushur buxhetin e vet maksimalisht dhe për të marrë prej bizneseve sa më shumë, andaj ndihma nuk ka ekzistuar asnjëherë, e as tash, por ndihma më e madhe është nganjëherë kur komunikimi mes bizneseve dhe institucioneve të qeverisë të bëhet në vazhdimësi, dhe bizneset kanë nevojë për t’u shprehur, sepse i suksesshmi mund të bëhet edhe më i suksesshëm. Andaj, çdo sukses i biznesit është përfitim për institucionet, më mirë është me qenë qeveri e qytetarëve dhe bizneseve të zhvilluara, se me qenë qeveri e qytetarëve të bizneseve të varfëruara. Prandaj, këtë rol që ne e kemi si biznese, realisht e kemi rolin e zhvillimit dhe punësimit”, thotë Kelmendi.

Ai konsideron se shteti duhet të përmirësojë politikat e të bërit biznes në mënyrë që të vijnë sa më shumë investitorë të huaj në vend.

“Taksat që vendosin institucionet ne kemi obligim t’i implementojmë, por nëse shohim që kemi mungesë të investitorëve të jashtëm, atëherë duhet shikuar çfarë është duke e penguar këtë, sepse në momentin që askush nuk vjen të investojë, ne duhet ta pyesim veten çka po ndodhë. Pse nuk po vijnë, çfarë dëshiron një investitor. Një investitor duhet të krijojë profit, nëse ne kujtojmë që ai vjen të na japë pagat neve, është gabim, pse të na falë neve pagat, ai ka për të ardhur këtu për të nxjerrë profit. Ne jemi një qytet i vogël i botës, dhe neve na nevojiten investitorë që kanë euro, që bëjnë investime, që i paguajnë punëtorët më mirë siç i kemi paguar ne si punëdhënës dhe që edhe neve na nxit dhe na qet në një kthjellim që si të punojmë ne më shumë, të angazhohemi e avancohemi me infrastruktura tjera që edhe neve të na dalin punëtorët më të pakët, por më të fuqishëm e më të shpejtë, por edhe më paga më të mira”, shton Kelmendi.

I pyetur nëse kanë pasur probleme me import dhe eksport, Kelmendi thotë se problemet janë të shumta, mirëpo dëgjueshmëria e tyre nga institucionet përgjegjëse është e vogël.

“Problemet janë të shumta, dëgjueshmëria e problemeve është shumë e vogël, takimet institucionale dhe afarizëm nuk ekzistojnë fare, nuk ekzistojnë as takimet mes institucioneve dhe prodhueseve për të cilat të gjithë ne kemi qenë dhe jemi që ta ndërtojmë prodhimtarinë vendore, por asnjë takim nuk e kemi pas me ata, që d.m.th. si duam të bëjmë prodhimtarinë vendore më të fuqishme duke qëndruar ndaras, jo, duke pas kontakt. Kontakti mes prodhimtarisë ekzistuese dhe kërkesat e tyre të shumta çfarëdo të jenë gjithmonë duhet me qenë obligimin për qeverinë dhe institucionet. Sa më shumë të jenë kontaktet, aq më shumë kemi edhe zhvillim të prodhimtarisë. Nuk është zhvillim i prodhimtarisë vendore ftesa ‘mos konsumoni prodhime të të tjerëve’, jo, ftesa është ‘unë do ju mbështes juve që ju të nxirrni produkte sa më shumë’ dhe konsumatorit t’i shtohet oferta dhe më nuk ka nevojë të qesin barriera për të tjerët”, thotë Kelmendi.

Kelmendi thotë se derisa s’ka rritje ekonomike, nuk mund të ketë as rritje të numrit të punëtorëve.

“Rritja shkon në kuadrin e zhvillimeve dhe rritjeve ekonomike, derisa s’ka rritje ekonomike, nuk ka as rritje të të punësuarve, derisa ne presim që një pjesë e madhe e qytetarëve do ta lëshojnë vendin, ekziston frika si me mbajt gjendjen ekzistuese me numër të qytetarëve më të vogël”, shton Kelmendi.

Në fund, Kelmendi kërkon nga qeveria që të mos ndërhyjë në të bërit biznes tek bizneset, pasi që sipas tij, kjo po i dëmton ato.

Kelmendi: Në momentin që politika nuk përzihet në ekonomi, gjithmonë bërja e biznesit është e suksesshme

“Në momentin që politika nuk përzihet në ekonomi, gjithmonë bërja e biznesit është e suksesshme. Neve nuk na pengon edhe kjo qeveri që ekziston, në asnjë moment nuk është ankesa tek pengesa, është ankesa tek avancimi. Neve na nevojiten institucione që na bëjnë më të avancune, që i bëjnë qytetarët më të pasur, jo që i bënë qytetarët të japin ndihma sociale, qytetarëve ju duhet me pas kapital, për arsyeje se vendin nuk po e lëshojnë vetëm për vend pune, po e lëshojnë edhe për një punë për të qenë më i pasur, për me pas një jetë më të mirë, jo vetëm sa për të punësuar”, përfundon Kelmendi.

Gjykata Komerciale i ka hapur rrugë punimeve në Rrugën A, rreth tre muaj pas pezullimit të tyre.

Dhoma e Shkallës së Dytë e ka rrëzuar vendimin e Shkallës së Parë të gjykatës, në një vendim të shpallur të premten e javës së kaluar.

Në aktvendimin e Dhomës së Shkallës së Dytë të cilin e ka siguruar Paparaci, thuhet se janë aprovuar si të bazuara ankesat e të paditurës Organi Shqyrtues i Prokurimit dhe palëve të interesuara: Komuna e Prishtinës dhe operatori ekonomik “Sallahu”.

Kolegji i Gjykatës Komerciale ka vlerësuar se pikërisht shtyrja e vendimit jo vetëm se është në kundërshtim me interesin publik, por rrezikon që të dëmtojë më shumë palët e përfshira në raport me paditësin.

Sipas aktvendimit është refuzuar si e pabazuar ankesa e “Pro & CO Group” sh.p.k. për shtyrjen e ekzekutimit të vendimit që lejoi rinisjen e punëve në rrugën A.

Paditësi “Pro & Co Group” sh.p.k. ushtroi padi në Dhomat e Shkallës së Parë të Gjykatës Komerciale, me të cilën ka iniciuar konfliktin administrative si dhe ka paraqitur kërkesë për shtyrjen e ekzekutimit të vendimit të paditurës Organi Shqyrtues të Prokurirmit me nr.144/23 të datës 19.04.2023.

Kolegji i Gjykatës Komerciale – Dhomat e Shkallës së Dytë vlerëson se përfundimi dhe qëndrimi i Gjykatës së Shkallës së Parë nuk është i drejtë dhe si i tillë nuk mund të pranohet, pasi që aktvendimi i ataktuar është i përshirë me shkelje të dispozitave të procedures kontestimore për shkak se aktvendimi i atakuar përmban të meta pasi që arsyet për faktet vendimtare janë të paqarta dhe kontradiktore.

“Duke i marrë parasysh pretendimet ankimore, Dhomat e Shkallës së Dytë vlerësojnë se me rastin e shtyrjes së ekzekutimit të vendimit, gjykata shqyrton dhe kufizohet vetëm në kushtet ligjore nga Neni 22 par.2 i Ligjit për Konfliktet Administrative, të cilat duhet të plotësohen në mënyrë kumulative në mënyrë të që shtyhet ekzekutimi i aktit administrative”, thuhet në aktvendim.

Tutje, theksohet se “Kolegji ka vlerësuar se Gjykata e Shkallës së Parë nuk ka arritur të jep arsye bindëse për faktet vendimtare të cilat ndikojnë në zbatimin e drejtë të dispozitës së Nenit 22 par.2 të LKA-së, duke mos balancuar drejtë kërkesën e palëve në raport me kriteret ligjore”.

“Bazuar në vlerësimin e Kolegjit, Gjykata e Shkallës së Parë nuk ka arritur që të përcaktojë drejtë interesin publik, i cili në rastin konkret është i kufizar në interesin për të vazhduar ose jo projektin që është object i procedures së prokurimit, në raport me kërkesat e paditësit”, thuhet në aktvendim.

Ministrja e Drejtësisë, Albulena Haxhiu deklaron se reformat në drejtësi po kundërshtohen nga sistemi i drejtësisë dhe opozita. Aleate të Gjykatës Kushtetuese, i konsideron partitë opozitare, për të cilat thotë se po ruajnë interesat e tyre.

Sipas saj, konkurset e fundit në Këshillin Prokurorial të Kosovës shpërfaqin pazaret brenda këtij sistemi.

Në intervistën për KosovaPress, Haxhiu flet edhe për kundërshtimet e disa deputetëve të pushtetit për Kodin Civil. Ajo thotë se gjatë vitit do të procedohet në Kuvend dhe se pret që të miratohet.

Optimiste nuk është edhe për zbardhjen e rastit të Astrit Deharit, për çka deklaron se vetëm ekipet profesionale mund ta trajtojnë këtë rast.

Sistemi i drejtësisë është i pavarur vetëm në letër, thotë ministrja e Drejtësisë, Albulena Haxhiu.

Teksa komenton raportet me Këshillin Prokurorial dhe Këshillin Gjyqësor, ajo konsideron se kjo po ndodhë për shkak të reformave.

“Po vazhdon kjo nga viti në vit, unë besoj që kështu do të përfundoj mandati im si ministre e Drejtësisë, për faktin se reformat, të cilat ne i kemi nisur si Ministri e Drejtësisë, duket që për të njëjtat nuk ka mbështetje nga Këshilli Gjyqësor dhe Këshilli Prokurorial i Kosovës, me theks nga Këshilli Prokurorial i Kosovës…”, deklaron Haxhiu për KosovaPress.

Problemet më të theksuara, siç thekson Haxhiu, janë brenda sistemit prokurorial të Kosovës. Ajo konsideron se në konkurset e fundit janë shpërfaqur haptazi pazaret.

Në intervistën për KosovaPress, ministrja Haxhiu shton se Ligji për Këshillin Prokurorial të Kosovës është reformë e rëndësishme.

“Opozita ka zgjedhur që ta pengojë reformën në drejtësi”, thotë Haxhiu mes tjerash.

Madje, Haxhiu konsideron që opozita është bërë aleate e Gjykatës Kushtetuese.

Tutje, shton se Kushtetuesja nuk duhet të marrë një vit kohë për reforma të rëndësishme, por të trajtohen këto raste me prioritet. Jo vetëm nga opozita, por Kodi Civil nuk po gjen mbështetjen e as të deputetëve të shumicës.

“Është e rëndësishme që të kalojë (Kodi Civil), sidomos kur ne jemi në prag, gjegjësisht në fazat e anëtarësimit në Këshillin e Evropës. Madje edhe në një prej raporteve të ekspertëve të Këshillit të Evropës të cilët e kanë vlerësuar gjendjen në Kosovë që është një fazë që bëhet para anëtarësimit, është përmendur rëndësia e kalimit të Kodit Civil. Ne nuk e kemi proceduar, gjegjësisht e kemi shtyrë për këtë vit, e kemi pasur plan që në vitin 2023 ta procedojmë, por nuk i kemi pasur votat në Kuvend. Gjegjësisht, ideja është që të mos shkojë sërish në Kuvend dhe të dështojë sërish, sepse do të jetë goditje për Kosovën, sikurse edhe goditje edhe për qeverinë, sepse një çështje që është e rëndësishme për qeverinë që ndërlidhet me të drejtat e njeriut… Nuk kemi nevojë ta procedojmë pa u siguruar që kalon. Por unë jam e bindur që shumë shpejt do ta procedojmë dhe mund të kemi sukses në përpjekjen tonë”, shprehet Haxhiu.

Teksa flet për opozitën përmend edhe rastin e Astrit Deharit, ku thotë se përgjegjës, siç shprehet ajo, të vrasjes më të rëndë në Kosovë, janë të gjithë ata që kanë qenë para shtatë vitesh në qeveri.

Haxhiu përmend prioritetet dhe planet për vitin 2024, ku shprehet se do të vazhdohet me procedimin e ligjeve që ndërlidhen me reformë në drejtësi.

Ministrja e Drejtësisë, Albulena Haxhiu zotohet se brenda mandatit të saj do të jetësohen premtimet e qeverisë për sistemin e drejtësisë.

Numri i bizneseve vendore, të cilat u regjistruan si tatimpagues në Administratën Tatimore të Kosovës gjatë vitit 2023, është 11 mijë e 431.

Këto të dhëna janë bërë të ditura nga ATK.

Nga ky institucion kanë bërë të ditur se gjatë këtij viti, inspektorët e ATK-së kanë mbylllur 18 biznese.

“Numri i bizneseve të regjistruara prej 01.01.2023 – 18.12.2023 është 11,431, ndërsa numri i biznese të mbyllura është 18”, ka thënë për lajmi.net Valentina Bytyqi-Sefa, zëdhënëse e ATK-së.

Avokati Ardian Bajraktari, ka thënë se sulmi terrorist në Banjskë të Zveçanit dhe vrasja Liridona Ademaj, janë ndër ngjarjet më të rënda që ndodhën gjatë vitit 2023 në Kosovë, raporton Ekonomia Online.

Në një intervistë për Ekonomia Online, Bajraktari vlerëson se sistemi i drejtësisë në vend është i brishtë, për faktin se kryerësit e veprave penale janë recidivistë.

“Po në bindjen time dy ishin ngjarjet të cilat natyrisht që bëjnë vitin ngjarjet më të rënda më tragjike është padyshim sulmi i datës 24 shtator sulmi terrorist në përmasat e mija, agresioni në Banjskë të Zveçanit por natyrisht edhe vrasja e të ndjerës Liridona Ademaj për nga mënyra e bindjes përfshirja siç ndryshohet tek bashkëshorti i saj sjellja e tij para e pas vrasjes përfshirë edhe faktin që aty ishin fëmijët në bindjen time e bënë prej ngjarjeve të themi më hatashme jo vetëm të vitit 2023 por edhe më gjatë”, ka thënë Bajraktari.

Ai pati kritika edhe ndaj sistemit të drejtësisë për mosashpërsim të dënimeve të kryerësve të veprave penale. Ai kërkon që organet ligjzbatuese t’i ashpërsojnë dënimet.

“Fakti që një pjesë bukur e madhe kryerës të këtyre vepra penale përfshirë vrasjet grabitjet por edhe jo  vetëm që ishin përsëritës të veprave penale përkatësisht recidivistë kjo në bindjen time dëshmon se politika ndëshkimore nuk e ka kryer rolin e misionit e saj përkatësisht kryerës së veprave penale të cilët janë ballafaquar me ligin nuk kanë arritur mjaftueshëm të risocializohen e të rehabilitohen që në të ardhmen të jenë persona të dobishëm për shoqërinë, andaj rrjedhimisht ju mbetet organeve ligjzbatuese që politikën ndëshkimore ta rishikojmë në drejtim të ashpërsimit të dënimeve për kategori të caktuara të veprave penale”, u shpreh ai.

Një nënë dhe një fëmijë i mitur janë zënë nga orteku. Ata ishin emigrantë finlandezë dhe ishin në një shëtitje me ski në zonën e Pallastunturi në Muonio.