Blog

Zyra Ndërlidhëse e Misionit Ushtarak të NATO-s në Beograd tha se çështja e rikthimit të shërbimit të detyrueshëm ushtarak në Serbi është çështje e autoriteteve shtetërore serbe.

Aleanca ushtarake perëndimore e NATO-s tha po ashtu se respekton plotësisht neutralitetin ushtarak të Serbisë.

“NATO do të vazhdojë të mbështesë përpjekjet e Serbisë për të modernizuar forcat e saj të armatosura brenda kornizës së zhvillimit dhe partneritetit dypalësh”, tha NATO.

“Gjithçka që Serbia dhe NATO-ja bëjnë së bashku është e përshtatur që të plotësojë nevojat e Serbisë dhe të ndihmojë atë të përmirësojë forcat e saj të armatosura në bazë të kornizës së Partneritetit për Paqe”, u tha në përgjigjen e Zyrës Ndërlidhëse të aleancës në Beograd, raporton REL.

Nisma për rikthimin e shërbimit të detyrueshëm ushtarak u iniciua nga Shtabi i Përgjithshëm i Ushtrisë serbe dhe propozimi i është dërguar presidentit serb, Aleksandar Vuçiq, më 4 janar.

Në çështjen gjyqësore ndaj Pjetër Shalës, janë anuluar dy seanca të cilat janë paraparë të mbahen për këtë javë.

Sipas njoftimit të Dhomave të Specializuara të Kosovës (DhSK) në Hagë, seancat e parapara për 11 dhe 12 janar 2024, janë anuluar, raporton “Betimi për Drejtësi”.

Sipas DhSK-së, seancat e ardhshme janë planifikuar më 19 dhe 22 janar, por trupi gjykues do të konfirmojë në kohën e duhur nëse ato do të mbahen apo jo.

Trupi gjykues gjatë seancës së së mërkurës në çështjen gjyqësore ndaj Shalës, dha disa urdhra me gojë duke përfshirë edhe urdhrin për kërkesën e mbrojtjes së Pjetër Shalës për të shtuar psikologen Vanessa Milazzo në listën e dëshmitarëve, si dhe për të përfshirë akt-ekspertizën e saj në listën e provave materiale.

Si rrjedhojë, trupi gjykues e miratoi pjesërisht kërkesën dhe urdhëroi që dëshmitarja dhe raporti i saj t’i shtohen listës së dëshmitarëve dhe listës së provave materiale të mbrojtjes.

Megjithatë, trupi gjykues refuzoi pjesën e kërkesës së mbrojtjes për dëshminë e kësaj dëshmitareje në gjykatë.

Ndërsa pas kësaj, seanca e sotme ka përfunduar në të cilën mbaroi dëshminë dëshmitari i 10-të i mbrojtjes, Safet Gashi.

Sulmet ruse ndaj popullatës civile dhe infrastrukturës jetike të Ukrainës janë “të neveritshme dhe të papranueshme”, tha Papa Françesku në një letër drejtuar kryepeshkopit të Kievit Sviatoslav Shevchuk më 3 janar, përmbajtja e së cilës u bë e ditur sot.

Sulmet “nuk mund të justifikohen në asnjë mënyrë”, shtoi Papa Françesku.

Mesazhi thuhet se erdhi si përgjigje ndaj një letre të dërguar nga kreu i Kishës Katolike greke të Ukrainës më 29 dhjetor, kur Rusia kreu sulmin më të madh raketor në territorin ukrainas që nga fillimi i luftës. /ANSA

Kryetari i SBASHK-ut Rrahman Jasharaj ka reaguar pas deklarimeve të ministres së Arsimit Arbërie Nagavci, se mësimdhënësit që do të aplikojnë për t’u pajisur me licencë të avancuar do t’i nënshtrohen testit me shkrim.

Ai në një deklaratë për media ka thënë se ministrja Nagavaci nuk është zëri i mësimdhënësve në Qeveri pasi ajo asnjëherë nuk ka pranuar kërkesat e SBASHK-ut për mbajtjen e një takimi të përbashkët në të cilin do të diskutohej mbi kushtet në të cilat punojnë aktualisht mësimdhënësit në Kosovë.

“Punëtorët e arsimit duhet të dinë edhe ca të vërteta të tjera nga “miqësia” për ta e ministres Nagavci. Ajo kurrë, edhe pse e kishim lutur të bëhet zë i arsimit në Qeveri, nuk e tha as edhe një fjalë për kushtet e punës me shkumës e shpuzë. Ajo kurrë nuk e kundërshtoi ngritjen ironike të koeficientit nga 105 në 110 euro, që në arsim shton zhgënjimin dhe arsye për ta lënë këtë profesion, ngase rritja është nënçmuese për vetëm 28 euro”, ka thënë Jasharaj.

Ai ka përkujtuar se sa të ketë SBASHK, nuk do të ketë test me shkrim për njohuritë e mësimdhënësve.

“Ministrja Nagavci duke e parë se në Këshillin Shtetëror për Licencim nuk mund t’i kalojë planet e saj kundër mësuesve të Kosovës, pa u bërë publike e pa u zhvilluar debate, udhëzoi bashkëpunëtorët e saj dhe disa të tjerë dhe e hoqën nga përbërja e Këshillit Shtetëror të Licencimit të Mësimdhënëse përfaqësuesin e vetëm të tyre – SBASHK-un. Pse? Për të bërë eksperimente e për të vendosur çdo gjë kundër punëtorëve të arsimit, pa pasur kush të kundërshtojë e të bëjë publike këto angazhime të saj”, ka theksuar Jasharaj.

Ai ka përmendur se në prillin e kaluar ishte vendosur të shpallej ftesa për trajnime dhe ishte vendosur që deri atëherë trajnimet që janë në proces të vazhdonin, por ministrja Nagavci kishte ndalur këtë mundësi.

“Një vit e më shumë kaluan dhe ende nuk është saktësuar, se cilat trajnime do të licencohen dhe nuk dihet se cilat do të licencohen sepse përfaqësuesi i punëtorëve të arsimit nuk është në Këshillin Shtetëror të Licencimit të Mësimdhënësve. Nuk është në këtë Këshill, sepse i ka penguar Nagavcit e të tjerëve që kanë dashur ta nënçmojnë mësuesin e ta mbajnë nën tensionin e të ashtuquajtur test”, ka shtuar Jasharaj.

Ai ka thënë se Nagavci, duke joshur me gradimin, e ka plan për t’i dërguar e degraduar të gjithë mësimdhënësit në testin me shkrim, andaj duhet pasur kujdes në këtë drejtim.

“Ajo po vendos vetë pa përfaqësues të SBASHK-ut, prindërve, kolegjiumit të drejtorëve, Asociacionit të Komunave. Kujdes! Duam avancim, por me marrëveshje dhe pa degradim e nënçmim të gjithë arritjeve tona në gjithë ato vite të studimeve”, ka përfunduar Jasharaj.

Ndryshe, ministrja Nagavci, ka shprehur bindjen se mësimdhënësit do të aplikojnë për t’u pajisur me licencë të avancuar që nënkupton nënshtrimin e testit me shkrim. Ajo ka deklaruar se kanë miratuar udhëzimet administrative, të cilat rregullojnë procesin e licencimit dhe avancimit në karrierë të mësimdhënësve, si dhe vlerësimin e performancës së tyre.

Nga data 10 deri më 11 janar 2024, në Republikën e Kosovës do të qëndrojë për vizitë zyrtare kryeministri i Irlandës, Leo Varadkar së bashku me një delegacion shoqërues.

Në një komunikatë për media nga Policia e Kosovës thuhet se gjatë kësaj vizite, Policia do të kujdeset për ofrimin e sigurisë dhe mirëmbajtjen e rendit e qetësisë publike gjatë kohës së lëvizjes së eskortës dhe qëndrimit të delegacionit shtetëror në Kosovë.

“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes si dhe zhvillimin e aktiviteteve sipas agjendës së vizitës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore) nga aeroporti ndërkombëtar në drejtim të kryeqytetit, afër objekteve shtetërore si dhe të disa segmenteve rrugore ku pritet të kalojë eskorta, ku do të ketë riorientim të trafikut në rrugë alternative, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”, thuhet në njoftim.

Gjatë mbledhjes së sotme, Qeveria ka miratuar inicimin e procedurës për shpronësimin e pronës së paluajtshme për realizimin e Projektit për konservimin dhe restaurimin e shtëpisë së Kompleksit Memorial “Masakra e Reçakut”.

Ky kompleks Memorial përfshin varrezat e martirëve, murin përkujtimor, shtatoren e ‘William Walkerit’, zyrat administrative, dhe në kuadër të zonës së veçantë janë edhe dy shtëpitë ku kanë ndodhur masakrat.

Pas miratimit në Qeveri, tani Departamenti i shpronësimit do të mbajë dëgjim publik lidhur me shpronësimin e kërkuar me pronarët e tokave që preken nga procesi.

Nё Klinikën e Nefrologjisё tё Qendrës Klinike Universitare të Kosovës, gjatë vitit 2023, janё hospitalizuar 758 pacientё, ndërsa janё realizuar gjithsej 37 mijë 431 seanca tё hemodializës.

Gjithashtu, janё realizuar 4.242 vizita ambulantore, 685 plasime tё katetrit venoz qendror, 4.509 vizita brenda-hospitalore, 1.196 pacientё kanё marrё terapi imunosupresive, 44 janё trajtuar me terapi biologjike dhe shumë shërbime të tjera.

Janë ofruar 60.367 shërbime, duke përfshirё edhe shërbimet e tjera (ekosonografi, EKG, transfuzione, largim i Katerave Venoz Qendror (KVQ), pastrimi i fistulave, largim penjve nga AV- fistula, analiza gazore tё gjakut, plasim i KVQ permanent.

Ndryshe, Klinika e Nefrologjisë ofron shërbim 24-orёsh dhe nuk ka listё tё pritjes.