Blog

Britania e Madhe është e gatshme për ta njohur formalisht një shtet palestinez, ka lënë të kuptohet të martën sekretari i Jashtëm David Cameron.

Cameron theksoi se palestinezëve duhet t’u jepet një horizont politik për ta nxitur arritjen e paqes në Lindjen e Mesme.

Britania e Madhe e ka përgjegjësi ta paraqesë se si do të dukej një shtet palestinez, sipas tij.

Popullit palestinez duhet t’i shfaqet “përparim i pakthyeshëm” drejt një zgjidhje me dy shtete, shtoi ai.

“Derisa kjo ndodh, ne – bashkë me aleatët – do ta konsiderojmë njohjen e një shteti palestinez, përfshirë edhe në Kombet e Bashkuara”, tha ai i Këshillin Konservator për Lindjen e Mesme.

“Kjo mund të jetë njëra nga gjërat që ndihmojnë ta bëjë këtë proces të pakthyeshëm”, tha i.

Ai i bëri thirrje Izraelit të lejojë më shumë ndihma ndërkombëtare në Rripin e Gazës dhe e cilësoi “qesharake” kthimin mbrapsht të ndihmave jetike britanike dhe ndihmave të tjera në kufi.

Cameron theksoi se 30 vjetët e fundit kanë qenë histori dështimi për Izraelin për shkak se ka dështuar të ofrojë siguri për qytetarët e vet.

Vetëm duke e pranuar këtë dështim, shtoi ai, do të ketë paqe dhe përparim.

Britania ka kohë të gjatë që e mbështet një zgjidhje me dy shtete, ku izraelitët dhe palestinezët mund të jetojnë krah për krah në vende të ndara.

Por, Cameron sugjeroi se Britania mund t’i ofrojë njohje formale dhe diplomatike një shteti palestinez, jo si pjesë e një marrëveshjeje finale për paqe, por më herët, gjatë bisedimeve.

Në të njëjtën kohë, duhet të ketë edhe një autoritetet të ri palestinez me “liderë të mirë dhe teknokratikë” që janë në gjendje ta udhëheqin Gazën, nënvizoi ai.

Në lidhje me përpjekjet për t’i dhënë fund luftës së Izraelit në Gazë, Cameron tha se ndërprerja e luftimeve është e nevojshme tani dhe se ka “shenja shpresëdhënëse” për bisedimet që po zhvillohen.

“Tani po shohim hapjen e një rruge ku ne mund të shënojmë përparim vërtet, jo vetëm për t’i dhënë fund konfliktit, por përparim në gjetjen e një zgjidhjeje politike, e cila mund të nënkuptojë paqe për vite, e jo për muaj”, tha ai.

Lufta e Izraelit në Rripin e Gazës e ka shkatërruar shumicën e territorit të vogël dhe i ka vrarë mbi 26.000 palestinezë, sipas Ministrisë palestineze të Shëndetësisë.

Kjo luftë u nxit nga një valë sulmesh të luftëtarëve të Hamasit në Izrael më 7 tetor, ku u vranë rreth 1.300 njerëz dhe u rrëmbyen mbi 250 të tjerë, sipas autoriteteve izraelite. /rel

Ish-sekretari i Ministrisë së Drejtësisë, Ardian Bajraktari, tani avokat ka thënë për Ekonomia Online se dikasteri i udhëhequr nga Albulena Haxhiu ka ndryshuar udhëzimin administrativ që cakton limite për kompensim të avokatëve për ish-krerët e UÇK-së që po gjykohen në Hagë.

Gjatë së martës, avokatë kryesor të mbrojtjes së Hashim Thaçit, pranë Dhomave të Specializuara në Hagë, Gregory Kehoe, Joe Reeder, “Greenberg Legal Associates” dhe anëtarët e kësaj kompanie, kanë kërkuar të tërhiqen në rastin e tij në Gjykatën Speciale në Hagë

Në kërkesën e tyre ndaj Dhomave të Specializuara të Kosovës në Hagë thuhet se moskryerja e obligimeve ndaj tyre është arsyeja e kësaj kërkese.

Avokati Bajraktari ka thënë se ndryshimet janë bërë me rekomandim të Zyrës Kombëtare të Auditimit dhe se limiti më i lartë i lejuar është deri në 110 mijë euro në muaj.

“Sa i përket ndryshimeve, dua të them se në dhjetor të vitit 2022 është ndryshuar Udhëzimi Administrativ që përcakton çështjen e mbështetjes financiare të personave të akuzuar potencial në kuadër të kësaj, pas një procesi që është bërë vlerësim nga ana e Zyrës Kombëtare të Auditimit, që është konstatuar e nevojshme që të përcaktohen disa pragje dhe në rrjedh të kësaj udhëzimi aktual administrativ, ka përcaktuar që katër lloje përkatësisht katër nivele të kompleksitetit të çështjeve që trajtohen nga ana e dhomave të specializuara, duke filluar nga niveli  më  i lehtë kompleksiteti 1, pastaj është standard kompleksiteti 2, është i vështir kompleksiteti i nivelit 3, dhe është shumë i veshtirë niveli më i lartë më Kompleks në kuadër të cilit natyrisht që hyn edhe ish-krerët e UÇK-së dhe në kuadër të kësaj varësisht prej stadit të procedurës janë ndarë në katër stade”, deklaroi Bajraktari për EO.

“Procedura paraprake e shqyrtimit gjyqësorë faza e apelit dhe mjeteve të jashtëzakonshme janë përcaktuar edhe limitet brenda secilave që do të mund bëheshin kompensime, dhe kur jemi tek limitet sa i përket shqyrtimit gjyqësorë, për shembull niveli më i lehtë është 50 mijë euro, vlera më e lartë në muaj ndërsa te komplesiteti më i lartë është deri në 110 mijë euro maksimumi që mund të kompensohet një ekip mbrojtës nga ana e personave të cilët po ballafaqohen me drejtësinë në Hagë”, deklaroi tutje ai.

Ndonëse e konsideron të mangët Ligjin aktual, Bajraktari që dikur ka udhëhequr me Komisionin për shqyrtim dhe vendosje për kërkesat, ka thënë se aspekti financiar nuk duhet të jetë problem. Për këtë, kërkon gatishmëri edhe të Kuvendit.

“Në bindjen time është relativisht i mangët (Ligji) mirëpo megjithatë ka dhënë një bazë të mirë ligjore për rregullimin e kësaj çështje, dhe në  rrjedhë të kësaj pas një procesi të mirë sfidues, janë miratuar edhe aktet jo ligjore që e rregullojnë këtë çështje. Sa i përket mbrojtjes juridike dhe mbështetjes financiare, unë vlerësoj që aspekti financiar nuk duhet me qenë problem për faktin që është obligim ligjor edhe në vlerë të kësaj edhe ligji përkatës përcakton që në momentin që nuk ka mjete të mjaftueshme buxhetore është Kuvendi i Republikës së Kosovës ai i cili duhet të ndaj mjete për mbulime për shpenzime”, ka thënë ai, teksa e konsideron atë sfiduese atë kohë

“Sa i përket çështjes të akteve nën ligjore kanë qenë jo pak sfidues vet për faktin që jemi ballafaquar le të themi asaj kohe me mungesë të theksuar të akteve të ngjashme. Edhe në praktikën vendore por edhe vendet e rajonit. Kroacia ka pasur afërsisht një praktik të ngjashme, mirëpo nuk është që kanë ofruar ndonjë gatishmëri për të bashkëpunuar”, u shpreh Bajraktari.

Presidentja Osmani priti në takim përfaqësuesin Special të BE-së, Miroslav Lajčák

Presidentja e Republikës së Kosovës Vjosa Osmani ka pritur sot në takim Përfaqësuesin Special të Bashkimit Evropian, Miroslav Lajčák.

Në takim u diskutua për zhvillimet e fundit në procesin e dialogut me Serbinë, me ç’rast Presidentja Osmani ritheksoi përkushtimin e Kosovës si palë konstruktive në këtë proces. Presidentja theksoi se marrëveshja e Brukselit e 27 shkurtit 2023 dhe aneksi i Ohrit i 18 marsit 2023 duhet të zbatohen në plotni.

Presidentja Osmani ritheksoi nevojën e heqjes së masave të Bashkimit Evropian ndaj Kosovës, të cilat janë të padrejta dhe krijojnë mungesë ekuilibri në dialog. Në këtë drejtim, ajo përsëriti se Kosova ka ofruar organizimin e zgjedhjeve të reja në veri të vendit në përputhje me kornizën ligjore të Kosovës, duke miratuar edhe udhëzimin administrativ, ndërkaq theksoi pritjet e saj që kjo e drejtë e qytetarëve të realizohet pa vonesa e në përputhje me procedurat dhe legjislacionin në fuqi.

Në këtë takim u përshëndetën të arriturat e fundit sa i përket zbatimit të marrëveshjes për energji si dhe asaj për targa, si hapa drejt normalizimit të raporteve ndërmjet Kosovës e Serbisë.

Sa i përket draftit të statutit të Asociacionit, Presidentja ritheksoi se institucioni i vetëm që mund ta interpretojë përfundimisht përputhshmërinë e këtij akti me Kushtetutën është Gjykata Kushtetuese e Kosovës, gjersa poashtu i shprehu shqetësimet e saj lidhur me disa dispozita të këtij drafti, të cilat mund të jenë sfiduese gjatë zbatimit në praktikë.

Aktivistë rusë në Mal të Zi organizuan mbledhjen e nënshkrimeve për kandidaturën e politikanit opozitar rus, Boris Nadezhdin, në zgjedhjet presidenciale në Rusi, të cilat do të mbahen në mars.

Sipas tyre, ai është i vetmi kandidat që e kundërshton luftën e Rusisë në Ukrainë.

“Kjo është një mënyrë për të treguar qëndrimin tonë kundër luftës, duke e mbështetur atë”, tha për Radion Evropa e Lirë Olga Stepanova, e cila u zhvendos në Budvë të Malit të Zi pas fillimit të agresionit rus kundër Ukrainës, gati dy vjet më parë.

Deri më tani, për Nadezhdinin janë mbledhur rreth 1.700 nënshkrime.

Njëri prej organizatorëve, Illija Gureviç, beson se mesazhi që dërgohet, është më i rëndësishëm se numri.

“Të gjithë këta njerëz i kanë lënë shtëpitë e tyre dhe kanë ardhur në Mal të Zi, për shkak të regjimit rus dhe luftës. Mesazhi i tyre është se ata duan ndryshime”, tha Gureviç për Radion Evropa e Lirë dhe shtoi se rusët po mbledhin mbështetje për Nadezhdinin edhe në disa vende të tjera evropiane.

Një pjesë e aktivistëve rusë kundër luftës që mblodhën nënshkrime për të mbështetur politikanin opozitar, Boris Nadezhdin. Budva, 26 janar 2024.
Zgjedhjet presidenciale në Rusi do të mbahen nga data 15 deri më 17 mars dhe kandidat kryesor në to është presidenti aktual, Vladimir Putin.

Ministria e Punëve të Jashtme e Malit të Zi i tha REL-it se Ambasada e Federatës Ruse e ka njoftuar se, në mes të marsit, do të organizojë votime për zgjedhjet presidenciale ruse në ndërtesën e ambasadës në Podgoricë.
Në Mal të Zi banojnë zyrtarisht rreth 27.000 rusë.

Më 26 janar, Ministria e Punëve të Jashtme e Rusisë njoftoi se rusët jashtë vendit do të mund të votojnë në zgjedhjet presidenciale edhe në vendet “armiqësore”.

Mali i Zi është në listën e vendeve “armiqësore” të Rusisë që nga marsi i vitit 2022, kur u është bashkuar sanksioneve të Perëndimit kundër Rusisë, për shkak të agresionit në Ukrainë.

REL-i konfirmoi më herët se votimet në vendet e rajonit do të organizohen në Shqipëri, Maqedoni të Veriut dhe Kosovë. Në Serbi nuk konfirmuan ende, ndërsa në Bosnje dhe Hercegovinë thanë se nuk do ta pengojnë mbajtjen e zgjedhjeve nëse ato janë në përputhje me ligjet e tyre.

Nënshkrime për Nadezhdinin kanë nisur të mblidhen edhe në vende të tjera të rajonit, përfshirë Serbinë.

Kush është Boris Nadezhdin?

Boris Nadezhdin, 60 vjeç, angazhohet për fundin e luftës në Ukrainë dhe fundin e mobilizimit ushtarak, si dhe për dialog me Perëndimin.

“Njerëzit nënshkruajnë për mua, jo sepse u pëlqej në mënyrë të veçantë, por sepse është një shans për të bërë diçka për paqen, për t’i dhënë fund gjithë kësaj historie dhe për t’i ndalur vrasjet e njerëzve”, tha Nadezhdin për agjencinë e lajmeve Reuters, më 24 janar.

Afati i fundit për dorëzimin e nënshkrimeve të mbështetjes në Komisionin Qendror të Zgjedhjeve në Rusi është data 31 janar. Ato, pastaj, kontrollohen dhe kandidatura ose miratohet, ose refuzohet.

Bashkëbiseduesit e REL-it nuk deshën të thonë publikisht se si do t’ua dorëzojnë nënshkrimet nga Mali i Zi autoriteteve në Rusi, sepse dyshojnë se mund të pengohen.

Rusët i ndjek frika edhe kur janë jashtë Rusisë

Pavarësisht faktit se vetëm pak më shumë se 6 për qind e rusëve në Mal të Zi e nënshkruan mbështetjen e tyre për Nadezhdinin, organizatorët janë të kënaqur me pjesëmarrjen në peticion, sepse, siç thonë, shumë rusë hezitojnë t’i shprehin publikisht pikëpamjet e tyre politike.

Në Rusi është e ndaluar që lufta kundër Ukrainës të quhet luftë. Në vitin 2022, Putin nënshkroi një ligj që përcakton se kundërshtimi publik ndaj luftës, mund të rezultojë me 15 vjet burgim.

“…prandaj, edhe kur janë në një vend tjetër, shumë rusë nuk duan të ekspozohen, sepse kanë frikë për të afërmit e tyre në Rusi, të cilët mund të vuajnë nga qëndrimet e tyre”, tha Gureviç.

Ai kujton se në Bullgari ka pasur raste të ekstradimit të aktivistëve kundër luftës në Rusi.

“Autoritetet në Rusi mashtrojnë dhe mund të trillojnë një rast, mbi bazën e të cilit mund të kërkojnë ekstradimin e një rusi nga jashtë. Dhe shumë mendojnë se është më mirë të heshtin”, sipas tij.

Kjo është një nga arsyet përse ky tridhjetëvjeçar nuk është shumë optimist kur flet për të ardhmen e vendit të tij.

Ai beson se nuk do të ketë ndryshime rrënjësore për së paku dhjetë vjetët e ardhshëm.

“Ata që janë larguar nga Rusia, do të kenë gjithnjë e më pak shanse për t’u kthyer. Hapësira e opozitës është boshe dhe duhet të mbushet nga disa politikanë të rinj. Detyra e atyre që janë larguar, është t’i mbështesin ata dhe kjo është ajo që po ndodh tani”, tha Gureviç.

Megjithatë, sipas tij, për opozitën në Rusi nuk ka shpresë nëse nuk ndryshon diçka brenda vendit.

“Ne mund të ndihmojmë, por ndryshimi mund të ndodhë vetëm nga brenda”, u shpreh ai.

Stepanova beson se mbështetja për Nadezhdinin është njëkohësisht mesazh i qartë edhe për Putinin.

“Në këtë mënyrë, qytetarët i thonë: Jemi lodhur me këtë që po bëni”, u shpreh Stepanova.

Edhe pse dyshohet për krime lufte, Putin në garë për mandat të ri

Siç ka raportuar deri më tash Radio Evropa e Lirë, për shumicën e analistëve, fitorja e Putinit nuk është në dyshim, sepse figurat kryesore të opozitës ruse, si Aleksei Navalny, janë në burg ose jashtë vendit, për shkak të rrezikut të arrestimit.

Putin, 71 vjeç, i cili do të garojë si kandidat i pavarur, ka në duart e tij të gjitha levat e pushtetit.

Ai garon për mandatin e tij të pestë. Këtë ia kanë mundësuar ndryshimet në Kushtetutën ruse, të bëra në vitin 2020, të cilat e kanë shfuqizuar dispozitën se posti i presidentit nuk mund të mbahet për më shumë se dy mandate radhazi.

Paraprakisht, mandati presidencial është zgjatur nga katër në gjashtë vjet.

Nëse e përfundon mandatin e ri gjashtëvjeçar, Putin do të ishte sundimtari më jetëgjatë rus që nga shekulli XVIII.

Perëndimi e konsideron Putinin diktator dhe për shkak të dyshimeve për përfshirje në krime lufte në Ukrainë, Gjykata Penale Ndërkombëtare ka lëshuar një urdhër arresti për të në mars të vitit 2023. /REL

Shërbimi korrektues i Kosovës ka njoftuar se sot në një aksident trafiku ka humbur jetën një i burgosur.

Në njoftim bëhet e ditur se i njëjti po mbahej në Qendrën Korrektuese të Smrekonicës, nga ku dhe kishte dalë dal në mëngjes për të shkuar në vendin e punës.

Njoftim nga SHKK:

Shërbimi Korrektues i Kosovës njofton opinionin publik, se sot në një aksident trafiku ka ndërruar jetë i burgosuri, F.A.

I njëjti po mbahej në Qendrën Korrektuese të Smrekonicës, nga ku kishe dalë sot rreth orë 06:35 për të shkuar në vendin e punës, ku sipas Udhëzimit Administrativ për punë jashtë institucioneve korrektuese, MD-nr. 04/2023, po punonte jashtë në një biznes privat.

Shërbimi Korrektues i Kosovës u shprehë ngushëllime familjes dhe gjithë të të afërmve.

Pothuajse 100 emigrantë kanë vdekur tashmë në përpjekje për të kaluar Mesdheun Qendror dhe Lindor këtë vit, pothuajse dy herë më shumë se në të njëjtën periudhë të vitit 2023, tha drejtoresha e Organizatës Ndërkombëtare për Migracionin (IOM), Amy Pope, në faqen e internetit të agjencisë së OKB-së, të martën.

Viti i kaluar mbetet një rekord për vdekje që nga viti 2016, tha ajo.

Shumica e vdekjeve kanë ndodhur gjatë rrugës për në Itali. /ANSA/

Organizata Botërore Meteorologjike (WMO) konfirmoi të martën se në Evropën kontinentale u regjistrua një temperaturë rekord prej 48.8 C (119.8 F) në vitin 2021.

Sipas gjetjeve të publikuara në Gazetën Ndërkombëtare të Klimatologjisë, temperatura u regjistrua në ishullin e Siçilisë të Italisë më 11 gusht 2021, tha zyrtarja për media e WMO, Clare Nullis në një konferencë për shtyp të OKB-së në Gjenevë.

Nullis deklaroi se rekordi i mëparshëm për Evropën kontinentale prej 48.0 C u mbajt nga qytetet greke të Athinës dhe Elefsinës më 10 korrik 1977 bazuar në burimet zyrtare të qeverisë.

Në një deklaratë për shtyp, raportuesi i WMO Randall Cerveny tha: “Ekstremet e paraqitura përpara WMO për gjykim janë “fotografi” të klimës sonë aktuale. Është e mundur, me të vërtetë e mundshme, që ekstreme më të mëdha të ndodhin në të gjithë Evropën në të ardhmen.”

“Ky studim tregon tendencën alarmante për vazhdimin e rekordeve të temperaturave të larta që do të vendosen në rajone të veçanta të botës,” tha Cerveny. /AA/