ATV

Blog

  • Sot mblidhet Kryesia e Kuvendit

    Sot mblidhet Kryesia e Kuvendit

    Kryesia e Kuvendit sot mban mbledhje, ku pritet të vendos për rendin e ditës për Seancën plenare të radhës.

    Sipas njoftimit, mbledhja pritet të fillojë nga ora 11:00.

    Ndërkaq përgjatë mbledhjes priten të diskutohen këto pika të rendit te ditës:

    Miratimi i procesverbalit të mbledhjes së mëparshme të Kryesisë së Kuvendit,

    Pika e papërfunduar nga Seanca e Jashtëzakonshme, e mbajtur më 18 janar 2024:

    Votimi i Propozim-rezolutës në lidhje me çmimin dhe faturimin aktual të energjisë elektrike për konsumatorët.

    III. Propozimi i rendit të ditës për Seancën plenare të radhës:

    Miratimi i procesverbaleve nga seancat e mëparshme,

    1. Deklarimet jashtë rendit të ditës,
    2. Pyetjet parlamentare,
    3. Votimi i Projektligjit nr.08/L-234 për ratifikimin e Marrëveshjes së kredisë për programin e financave publike dhe rritjes ekonomike ndërmjet Republikës së Kosovës dhe Fondit OPEC për Zhvillim Ndërkombëtar,
    4. Votimi i Projektligjit nr.08/L-236 për ratifikimin e Traktatit ndërmjet Republikës së Kosovës dhe Mbretërisë së Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze,
    5. Votimi i Projektligjit nr.08/L-253 për Aderimin e Republikës së Kosovës në Konventën për Importin e Përkohshëm,
    6. Votimi i Projektligjit nr.08/L-254 për ratifikimin e Marrëveshjes ndërkombëtare ndërmjet Kosovës nga njëra anë dhe Bashkimit Evropian nga ana tjetër për pjesëmarrjen e Kosovës në Programin e bashkimit programi i tregut të vetëm,
    7. Votimi i Projektligjit nr. 08/L-259 për Ratifikimin e Marrëveshjes së Financimit ndërmjet Republikës së Kosovës, e përfaqësuar nga Ministria e Financave, Punës dhe Transfereve, dhe Asociacionit Ndërkombëtar për Zhvillim për projektin “Projekti për forcimin e qeverisjes digjitale për ofrimin e shërbimeve”,
    8. Shqyrtimi i Projektligjit nr.08/L-263 për ratifikimin e Marrëveshjes për sigurime sociale ndërmjet Republikës së Kosovës dhe Mbretërisë së Holandës,
    9. Shqyrtimi i Projektligjit nr.08/L-271 për ratifikimin e Marrëveshjes ndërkombëtare ndërmjet Qeverisë së Kosovës, të përfaqësuar nga Ministria e Financave, Punës dhe Transfereve dhe Qeverisë së Konfederatës Zvicerane, të përfaqësuar nga Sekretariati shtetëror për çështje ekonomike për Projektin e “qëndrueshmërisë klimatike në sektorin e ujërave në Kosovë”,
    10. Shqyrtimi i Projektligjit nr.08/L-273 për ratifikimin e Marrëveshjes së financimit në mes të Republikës së Kosovës, përfaqësuar nga Ministria e Financave, Punës dhe Transfereve, Korporata Energjetike e Kosovës (KEK), dhe KFË, Frankfurt Am Main, për Programin e energjisë solare I (solar4kosovo I) Fotovoltaik,
    11. Votimi në lexim të dytë i Projekt Kodit doganor dhe të akcizave, nr. 08/L-247,
    12. Votimi në lexim të dytë i Projektligjit nr. 08/L-211 për Verëra,
    13. Shqyrtimi i dytë i Projektligjit nr.08/L-243 për ndryshimin dhe plotësimin e Ligjit nr.06/L–037 për metrologji,
    14. Shqyrtimi i dytë i Projektligjit nr.08/L-186 për rregullat e trafikut rrugor,
    15. Shqyrtimi i dytë i Projektligjit nr.08/L-212 për shëndetin riprodhues dhe fertilizim të asistuar mjekësor,
    16. Votimi në parim i Projektligjit nr.08/L-207 për tekstet shkollore,
    17. Shqyrtimi i parë i Projektligjit nr.08/L-262 për ndryshimin dhe plotësimin e ligjeve që përmbajnë procedura të veçanta administrative dhe harmonizimin e tyre me Ligjin nr.05/L-031 për procedurën e përgjithshme administrative faza e dytë,
    18. Shqyrtimi i parë i Projektligjit nr.08/L-265 për regjistrin e pronarëve përfitues,
    19. Shqyrtimi i parë i Projektligjit nr.08/L-264 për rininë,
    20. Shqyrtimi i parë i Projektligjit nr.08/L-268 për shpronësimin e pronës së paluajtshme,
    21. Shqyrtimi i parë Projektligjit nr.08/L-272 për ndryshimin dhe plotësimin e Ligjit nr. 06/L-010 për Noterinë, i ndryshuar dhe plotësuar me Ligjin nr.08/L-149,
    22. Shqyrtimi i parë i Projektligjit nr.08/L-266 për gjendjen civile,
    23. Shqyrtimi i parë i Projektligjit nr.08/L-267 për letërnjoftimin,
    24. Shqyrtimi i parë i Projektligjit nr.08/L-269 për kontrollin e kufirit shtetëror,
    25. Shqyrtimi i parë i Projektligjit nr.08/L-274 për Shërbimet Private të Sigurisë,
    26. Shqyrtimi i parë i Projektligjit nr.08/L-282 për statusin, qëndrimin e përkohshëm dhe kalimin transit të forcave të huaja të armatosura në territorin e Republikës së Kosovës,
    27. Shqyrtimi i parë i Projektligjit nr.08/L-286 për shtetësinë e Kosovës,
    28. Shqyrtimi i parë i Projektligjit nr.08/L-287 për Këshillin e Sigurisë së Kosovës,
    29. Shqyrtimi i parë i Projektligjit nr.08/L-275 për rrugët,
    30. Shqyrtimi i parë i Projektligjit nr.08/L-278 për faturat e kulturave bujqësore dhe fletëmagazinave,
    31. Votimi për emërimin e 3 (tre) anëtarëve vendorë të Këshillit Shtetëror të Cilësisë të Agjencisë së Kosovës për Akreditim,
    32. Propozimi për përzgjedhjen e një (1) kandidati për gjyqtar në Gjykatën Kushtetuese të Republikës së Kosovës,
    33. Zgjedhja e Komisionerit Parlamentar për Forcën e Sigurisë së Kosovës,
    34. Zgjedhja e një (1) anëtari të Këshillit Prokurorial të Kosovës nga radhët e fakulteteve juridike të Republikës se Kosovës,
    35. Votimi i Programit Kombëtar të Shkencës 2023/2028,
    36. Shqyrtimi i Projekt-Deklaratës për raportet e Republikës së Kosovës me Shtetet e Bashkuara të Amerikës,
    37. Shqyrtimi i Raportit vjetor të Fondit të Kursimeve Pensionale të Kosovës për vitin 2022,
    38. Shqyrtimi i Raportit vjetor për gjendjen e mjedisit në Kosovë për vitin 2022,
    39. Shqyrtimi i Projektrezolutës për vlerësimin e punës së Zyrës së Rregullatorit të Energjisë për vitin 2022,
    40. Shqyrtimi i Raportit me rekomandime nga mbikëqyrja e zbatimit të Ligjit nr.02/L-65 Civil Kundër Shpifjes dhe Fyerjes,
    41. Shqyrtimi i Rekomandimeve nga mbikëqyrja e zbatimit të Ligjit nr.2003/5 për farërat,
    42. Shqyrtimi i Rekomandimeve nga mbikëqyrja e zbatimit të Ligjit nr.04/L-114 për pasurimin e miellit,
    43. Shqyrtimi i Rekomandimeve për Raportin e auditimit të performancës “Të hyrat nga qiraja në Agjencinë Kosovare të Privatizimit për periudhën 2012 – 2021”,
    44. Themelimi i Komisionit Hetimor Parlamentar lidhur me nivelin e menaxhimit të marrëdhënies së punës të anëtarëve të Shërbimit të Jashtëm dhe zyrtarëve të Ministrisë së Punëve të Jashtme dhe Diasporës,
    45. Themelimi i Komisionit Hetimor Parlamentar mbi përgjegjësitë ekzekutive të Ministrisë së Drejtësisë në raport me zjarret e dyshimta në Institutin e Mjekësisë Ligjore, zhdukjen e mostrave në rastin e Astrit Deharit dhe çdo veprimi e mosveprimi të kësaj ministrie që ka cenuar pavarësinë dhe përgjegjësitë ligjore të këtij instituti,
    46. Miratimi i buxhetit të Komisionit Hetimor Parlamentar në lidhje me procedurat për furnizimin dhe menaxhimin me rezervat shtetërore, keqpërdorimet dhe abuzimet e mundshme me rezervat shtetërore nëpërmjet kualifikimit të procedurës si sekret shtetëror për furnizimet e tilla,
    47. Formimi i Komisionit Ad-hoc për përzgjedhjen e kandidatëve për katër (4) anëtarë të Bordit të Radiotelevizionit të Kosovës,
    48. Formimi i Komisionit Ad-Hoc për përzgjedhjen e kandidatëve për një (1) anëtar të Komisionit të Pavarur të Mediave, nga radhët e komuniteteve jo shumicë,
    49. Formimi i Komisionit Ad-Hoc për përzgjedhjen e kandidatëve për një (1) anëtar të Komisionit të Pavarur të Mediave, nga radhët e komunitetit shqiptar. IV. Shqyrtimi i propozimeve dhe i kërkesave.
  • Turqia arreston 25 persona lidhur me sulmin në një kishë në Stamboll

    Turqia arreston 25 persona lidhur me sulmin në një kishë në Stamboll

    Autoritetet turke zyrtarisht kanë arrestuar 25 të dyshuar lidhur me të shtënat gjatë një shërbese në një kishë në Stamboll fundjavën e kaluar, kur u vra një person.

    Sipas ministrit të Drejtësisë, Yilmaz Tunc, në mesin e të arrestuarve janë edhe dy sulmuesit e dyshuar, që paraprakisht ishin kapur nga policia. Dy sulmuesit e dyshuar besohet se kanë lidhje me grupin militant, Shteti Islamik, tha Tunc përmes një postimi në X, që më herët njihej si Twitter.

    Të dyshuarit kryesorë janë shtetas të huaj, njëri nga Taxhikistani dhe tjetri nga Rusia, ka deklaruar më herët ministri i Brendshëm turk, Ali Yerlikaya.

    Grupi militant, Shteti Islamik, ka marrë përgjegjësinë për këtë sulm, duke thënë se ai u krye në përgjigje të thirrjes së udhëheqësve të këtij grupi militant për të shënjestruar hebrenjtë dhe të krishterët.

    Tunc tha se 25 të dyshuarit po akuzohen për anëtarësim në një organizatë të paligjshme dhe për vrasje të rëndë të paramenduar. Ai shtoi se nëntë të dyshuar të tjerë janë liruar derisa të nisë gjykimi.

    Sulmi ndodhi të dielën në mëngjes në kishën katolike italiane, Santa Maria në Stamboll. Një shtetas turk i cili po merrte pjesë në shërbesë – dhe që u shënjestruar nga një sulmues i armatosur – u vra.

    Autoritetet kanë thënë se sulmi ka mundur të jetë më vdekjeprurës, por sulmuesve u është bllokuar arma.

    IS-i ka kryer një sërë sulmesh në mbarë Turqinë, përfshirë një më 2017 në një klub nate në Stamboll, kur u vranë 39 persona.

    Sipas ministrit Yerlikaya, që nga qershori i vitit 2023, autoritetet turke kanë arrestuar 2.086 të dyshuar se kanë lidhje me IS-in./REL

  • Gjashtë kompani të interesuara për projektin “Parku Solar”

    Gjashtë kompani të interesuara për projektin “Parku Solar”

    Përgatiti: Armand Hoti

    Gjashtë kompani, sipas Ministrisë së Ekonomisë, kanë dorëzuar ofertat për realizimin e projektit të Parkut Solar me kapacitet prodhues 100 megavat për orë.

    Ankandi i Parë ka qenë i hapur deri të mërkurën, ndërsa për ndërtimin e këtij parku solar është caktuar fshati Kramovik i Rahovecit.

    Implementimi i këtij projekti, sipas ekspertit të energjisë, Naim Bujupi, është hap pozitiv në procesin e tranzicionit energjetik të Kosovës.

    “Kosova tash ka vendosur edhe targetet e saj drejt tranzicionit të energjisë, që termocentralet ekzistuese të zëvendësohen me energji të ripërtërishme. Përkundër vonesave ne patëm diku katër shtyrje për këtë proces të ankandit dhe kemi tash gjashtë ofertues dhe kjo është lajm i mirë. Ofertat janë vetëm një fazë, mbetet të shihen fazat e tjera që përfshijnë vlerësimin e ofertave, pastaj marrëveshjet që duhet të nënshkruhen mes palëve dhe më pas ndërtimi”, tha Bujupi.

    Pavarësisht se vlerësohet si projekt i rëndësishëm për vendin, sipas Bujupit, kapacitetet prodhuese të parkut solar do të jenë të vogla krahasuar me termocentralet.

    “Diku 1300 orë në vit punojnë. Nëse i ekuivalentojmë me kapacitetet e termocentraleve i bie që 16 megavat të termocentraleve, zëvendësohen me 100 megavat të paneleve solare”, tha Bujupi.

    Ndërkaq, profesori i ekonomisë, Fidan Qerimi, thotë se Qeveria duhet të jetë e kujdesshme në përcaktimin e çmimit për blerje të energjisë nga kompania fituese.

    “Qeveria duhet të ketë kujdes në blerjen e energjisë për 15 vitet e ardhme, në përcaktimin e çmimit pasi siç e dimë vitin e kaluar kemi pasur humbje të mëdha për shkak të një marrëveshjeje të pakujdesshme në përcaktimin e çmimit sipas tregut”, tha Qerimi.

    Për realizimin e këtij projekti shteti ofron tokën publike me qira për 30 vjet, qasje të lehtë për automjete dhe pajisje, marrëveshje të garantuar për blerje të energjisë solare për 15 vjet, si dhe kyçje të afërt në rrjetin e transmisionit.

    Ndërkohë, deri në vitin 2031, referuar Strategjisë për Energjinë, Kosova synon që 35% e kërkesës për energji të mbulohet nga energjia e gjeneruar nga burimet e ripërtërishme.

    Aktualisht, rreth 82% e energjisë në Kosovë, prodhohet duke djegur thëngjill.

  • 1 muaj liberalizim, rritet numri i udhëtarëve

    1 muaj liberalizim, rritet numri i udhëtarëve

    Përgatiti: Benita Zeneli

    Është shënuar 1 muaj prej kur qytetarët tashmë po udhëtojnë lirshëm, pa viza, drejt vendeve evropiane.

    Numri i atyre që zgjodhën transportin ajror, vërehet të ketë shënuar ngritje brenda këtij muaji, në krahasim me periudhën e njëjtë të vitit të kaluar.

    Sipas të dhënave, në muajin Janar në Aeroportin “Adem Jashari” udhëtuan mbi 287 mijë udhëtarë.

    “Nr. i udhëtarëve dhe fluturimeve vazhdon me një trend të rritjes, ku në muajin Janar 2024 janë shërbyer 287 205 udhëtarë, apo 21,9 % më shumë sesa në muajin Janar 2023 dhe 996 fluturime apo 23,3% më shumë, krahasuar me Janar 2023. Muaji Janar 2023 kishte 235 576 udhëtarë dhe 808 fluturime të shërbyera”, thuhet në njoftimin e Aeroportit “Adem Jashari”.

    Ndërkohë, sipas statistikave zyrtare nga policia deri më 23 janar, në të gjitha pikat kufitare përfshirë atë edhe në aeroport, kanë dalë afro 846 mijë persona. Ndërkohë, në Kosovë kanë hyr mbi 695 mijë.

    Kjo duke bërë që të ketë afro 151 mijë dalje më shumë sesa hyrje.

    Ndërkohë, në vitin 2023 kishte afro 129 mijë më shumë dalje se hyrje.

    Si rezultat i kësaj, në krahasim me periudhën e njëjtë të vitit të kaluar, këtë vit kanë dalë mbi 22 mijë persona nëpër pikat kufitare.

    Qytetarët e Kosovës nga 1 janari i vitit 2024 udhëtojnë pa viza në shtetet e zonës Schengen.

    Liberalizimi u mundëson që të qëndrojnë deri në 90 ditë – brenda gjashtë muajsh në cilindo nga 27 shtetet anëtare.

  • Dënimi nga gjykata themelore nuk e përjashton Pal Lekajn nga kuvendi

    Dënimi nga gjykata themelore nuk e përjashton Pal Lekajn nga kuvendi

    Përgatiti: Driton Sadiku

    Një ditë më parë, gjykata themelore i shqiptoi dënim me 3 vjet e 8 muaj burgim.

    Por, Pal Lekaj mund ta vazhdojë funksionin e tij si deputet edhe për një kohë, meqë dënimi nuk është i formës së prerë.

    “Mandati i deputetit humbet me rastin kur vendimi bëhet i formës së prerë, dhe përderisa nuk ka ende një aktgjykim të formës së prerë, juridikisht nuk ka asnjë pengesë që i njëjti të mos e ushtrojë funksionin e deputetit”, tha Vullnet Bugaqku, hulumtues në KDI.

    E derisa gjykata e shkallës së dytë të dalë me një vendim, do të duhej kohë, por nuk ka afat të caktuar.

    Sidoqoftë, do të mbetet në dëshirën e deputetit nëse do të qëndrojë apo ta lirojë vendin.

    Vetë Lekaj nuk u përgjigj gjatë të enjtes për planet e tij të mëtejme, ndonëse njohës të fushës, si më të drejtë e shohin dorëheqjen.

    “Për ta ruajtur integritetin e institucionit të kuvendit dhe pozitës së deputetit do ishte e rrugës që paraprakisht të jepej dorëheqje dhe me vetë faktin që ka filluar procedura gjyqësore, ose që ka pasur edhe një aktakuzë për një vepër kaq të rëndësishme”, tha Bugaqku.

    Përtej dënimit me 3 vjet e 8 muaj burgim, Gjykata Themelore Lekajt i ka shqiptuar edhe dënim plotësues, prej 3 vjet e 6 muaj, i cili hyn në fuqi pasi ta përfundojë dënimin me burgim, e që nënkupton se Lekaj për kaq kohë nuk mund të ushtrojë asnjë funksion publik.

    Ndërsa, në rast se deputeti Lekaj humb mandatin, ai do të zëvendësohet nga kandidati më i votuar, i gjinisë së njëjtë, brenda listës së partisë së Aleancës për Ardhmërinë e Kosovës, që në këtë rast është Lahi Brahimaj.

  • Dyshimet për korrupsion, një muaj paraburgim për dy zyrtarët e gjykatës në Prishtinë

    Dyshimet për korrupsion, një muaj paraburgim për dy zyrtarët e gjykatës në Prishtinë

    Përgatiti: Nora Luta

    Njëri bashkëpunëtor profesional, e tjetri referent në Zyrën për ekzekutimin e sanksioneve penale në Gjykatën Themelore të Prishtinës, po hetohen rreth dyshimeve se në nëntë raste nuk i ekzekutuan vendimet për burgim.

    Deli Halili e Ismajil Ismajli, sipas Prokurorisë Themelore të Prishtinës, dyshohen se i mbajtën fshehtë urdhëresat e gjykatës për ekzekutimin e sanksioneve penale në një periudhë kohore prej afër dhjetë muajsh.

    Ismajli ishte akuzuar edhe më herët për veprën penale marrje ryshfeti.

    “Ekziston dyshimi i bazuar se nga data 4 prill 2022 e deri më 26 janar 2024, në zyrën për ekzekutimin e sanksioneve penale, në Gjykatën Themelore në Prishtinë, Deli Halili, në pozitën e bashkëpunëtorit profesional në këtë zyrë dhe Ismajl Ismajli në pozitën e referentit, në bashkëveprim, duke shfrytëzuar detyrën dhe autoritetin e tyre zyrtar, me qëllim të përfitimi të dobisë për të dënuarit, nuk i përmbushin detyrat e tyre zyrtare, duke i shkaktuar dëm sistemit gjyqësor”, thuhet në kërkesën e Prokurorisë.

    Kërkesën e Prokurorisë për caktimin e masës së paraburgimit, prokurori e ka arsyetuar ndër të tjera për pranimin e veprimeve inkriminuese nga njëri i dyshuar.

    “Provave që të njëjtit iu janë bashkangjitur, e posaçërisht, deklarata e të pandehurit Deli Halili, i cili pranon veprimet inkriminuese duke paraqitur edhe veprimet inkriminuese të pandehurit Ismajl Ismajli, janë siguruar prova materiale te dosjet e personave të dënuar, të cilat nuk janë ekzekutuar me kohë dhe janë mbajtur kundërligjshëm për një kohë të gjatë në zyrë” , thuhet më tej në kërkesën e Prokurorisë.

    Dy zyrtarët e Gjykatës u arrestuan dy ditë më parë, ndërsa të mërkurën pasdite Gjykata Themelore në Prishtinë e aprovoi kërkesën e Prokurorisë, duke ua caktuar një muaj paraburgim secilit veç e veç.

    Ndërkohë, avokati i Halilit, Berat Tmava, ka thënë për ATV-në se tashmë kanë shfrytëzuar të drejtën e ankesës në Apel, pasi, sipas tij, nuk janë plotësuar kushtet ligjore rreth masës së sigurisë, siç është ajo e paraburgimit, më e rënda që mund t’i caktohet një të dyshuari.

    “Tani për tani nuk kemi asnjë provë që mbështet këtë dyshim të bazuar, sipas prokurorisë. Karakteristikat personale të të pandehurit, sjellja e mëparshme në ambientin dhe kushtet të cilat ai jeton dhe të gjitha këto tregojnë se nuk ekziston rreziku që i pandehuri të përsëritë veprën penale”, tha Tmava.

    Në Apel është ankuar edhe avokati i Ismajlit, Driton Muharremi, i cili ka thënë për ATV-në se ndaj klientit të tij nuk ka asnjë provë, se ai ka kryer veprën penale për të cilën dyshohet.

    “E vetmja provë është deklarata e Halilit, i cili e involvon klientin tim e që sipas kodit të procedurës penale, e njëjta nuk është provë në të cilën mund të bazohet aktgjykimi eventual. Klienti im nuk është i ngarkuar me ekzekutime të dënimeve me burg dhe nuk ka qasje as vizuale e as fizike ne këto lëndë”, ka thënë Muharremi.

    Muharremi në ankesë ka theksuar se i njëjti më herët është liruar nga akuza për marrje ryshfeti, dhe se në procedurën kontestimore në shkallën e parë është obliguar Këshilli Gjyqësor të paguajë shumën prej 40 mijë eurosh.

  • Eshtrat iu gjetën vitin e kaluar, identifikohet trupi i një të zhdukuri gjatë luftës

    Eshtrat iu gjetën vitin e kaluar, identifikohet trupi i një të zhdukuri gjatë luftës

    Përgatiti: Kastriot Tahiri

    Më shumë se dy dekada pas luftës, janë identifikuar se eshtrat që u gjetën gjatë gërmimeve vitin e kaluar në lagjen Mati 1 të Prishtinës, janë të Behram Imerit.

    Për fatin e Imerit nga fshati Pantinë i Vushtrrisë, askush nuk diti gjë që nga koha kur ishte mbajtur në burgun e Dubravës.

    Kemi hasë në eshtrat e dy personave, ka zgjatur 5-6 muaj deri i kemi marrë analizat e ADN-së, e një nga ta është identifiku, një person që quhet Behram Imeri, nga Vushtrria, ai ka qenë burgosur në burgun e Dobravës, dhe që nga ajo kohë është kanë person i zhdukur”, tha Kryetari Komisioni Qeveritar për Personat e Zhdukur, Andin Hoti.

    Lajmi për identifikimin e trupit të tij ka gëzuar familjen e bashkëvendësit.

    “E kam taku në burgun e Dobravës, kur na qitshin në shëtitore, e kom thirrë me za e i kom tregu që jam djali i filanit, ja kom bo me dorë. Kanë qenë familjarë të mirë. Kanë menduar që është i humbur e kanë transferua diku, e kanë dërgu diku e s’gjendet kurrë veç shumë mirë që i kanë gjet tash, perime shumë mirë”, tha Sami Rexha, banor i fshatit Pantinë.

    “Ka qenë njeri i urtë dhe i disiplinuar. Është shumë mirë për të gjithë, viktimat kishim pas qejf që më u gjet eshtrat e tyre për shkak të familjarëve të tyre, që me pas një varr ku me shkua e me shpreh ngushëllime”, tha Shemsi Binaku, banor i fshatit Pantinë.

    Edhe disa rezultate të tjera po priten të dorëzohen te Këshilli i Familjarëve të Personave të Zhdukur.

    “Një numër i analizave ka mbërri nga Tuzlla, por për fat e kemi veç një rast që është idetifiku i cili do të varroset të shtunën”, tha Ahmet Grajqevci, kryetar i Këshillit të Familjarëve të Personave të Zhdukur.

    Sipas Komisionit Qeveritar për Persona e Zhdukur, gjatë vitit të kaluar janë kryer gërmime në mbi 15 lokacione, në të cilat janë gjetur 77 mbetje mortore, për rezultatet e të cilave janë ende në pritje.

  • AGIM DEVA MBETET YLL I PASHUAR I LETËRSISË PËR FËMIJË

    AGIM DEVA MBETET YLL I PASHUAR I LETËRSISË PËR FËMIJË

    Shkruan: Demir Reshiti

    Si sot, 15 vite më parë, pushoi së rrahuri zemra e shkrimtarit, profesorit dhe studiuesit të letërsisë, Agim Deva. Të gjithë fëmijët që ishin mësuar ta shohin në krye të Karvanit të Shkrimtarëve poetin me mjekër e me zemër të bardhë, atë të diel janë ndierë nga pak jetimë. Jetimë janë ndier edhe kolegët e Agimit, poetët për fëmijë për të cilët Agimi ishte si një çadër e madhe ku ata gjenin strehim. Ideatori dhe udhëheqësi i manifestimit më të madh letrar në botë (Karvanit të Shkrimtarëve për Fëmijë), Agim Deva është ndarë nga jeta, të dielën e parë të shkurtit në orët e mbrëmjes, pas një sëmundje të rëndë, në moshën 61-vjeçare.

    Ai ka kryer Fakultetin Filozofik, Degën e Gjuhës dhe Letërsisë Shqipe në Universitetin e Prishtinës, ku edhe ka magjistruar dhe doktoruar në fushën e letërsisë për fëmijë. Pas diplomimit në fakultet, ka punuar një kohë si gazetar në “Zërin e rinisë”, e me vonë si kryeredaktor i parë i “Gazetës së pionierëve”.

    Në vitin 1973, nisi punën në Fakultetin e Filologjisë, së pari – asistent në ‘Teorinë e letërsisë’, e pastaj, ligjërues në lëndën ‘Letërsia për fëmijë’, të cilën e ka mbajtur deri në maj të vitit 2008 kur iu dorëzua sëmundjes. Në këtë fakultet, Agim Deva, si profesor ordinar ka ligjëruar edhe: Fillet e gazetarisë, Kritikën letrare, ndërsa në Departamentin e Gazetarisë ka ligjëruar lëndën Zhanret e gazetarisë.

    Gjysmë shekulli krijimtari letrare

    Me krijime letrare ka filluar të merret shumë herët, qysh në moshën dhjetëvjeçare, pra që nga viti 1958. Librin e parë “Trumbeta e artë” e botoi më 1968, libër i cili zgjoi interesim të konsideruar si te lexuesit, po ashtu edhe te kritika letrare dhe ishte një sinjal se në letrat shqipe po vjen një shkrimtar i madh, i cili do të jetë i pranishëm përherë në skenën letrare duke mbajtur kontakt të vazhdueshëm me lexuesin, sidomos me lexuesit e vegjël.

    Ishte njëri ndër shkrimtarët më produktivë të letërsisë sonë, veçmas asaj për fëmijë. Për gjysmëshekulli të krijimtarisë letrare, Agimi i la letërsisë shqiptare një opus të madh veprash.

    Ka botuar një numër të konsideruar veprash letrare (prozë e poezi), antologji të ndryshme, panorama të poezisë botërore, vepra të ndryshme shkencore, monografi, kritika, recensione, ese, parathënie e pasthënie, një libër leximi për klasën e katërt fillore, një roman, dy pjese teatrore, dy libra për fëmijët e hendikepuar, libra ilustrativë për fëmijët e moshave parashkollore, libra me karakter ambiental e, së fundi, botoi edhe Abetaren me të cilën, që nga ky vit shkollor, i mësojnë shkronjat e bukura shqipe mijëra vogëlushë anekënd Kosovës.

    Opusi krijues i Agim Devës shtrihet në mbi 70 vëllime, të cilat janë botuar nga shumë shtëpi botuese e institucione të tjera prestigjioze si: “Rilindja”, “Flaka e vëllazërimit” në Shkup, “Pionieri”, “Libri shkollor”, “Rozafa”, “Zef Serembe”, “Kinderberg”, “UNICEF”-i, “SOROS”-i, “Sida”, “USAID”-i, “KCF”-ja, “REC”-i, “Save the childrens”, “Hendicap International”, “Oxfam”- etj.

    Disa nga veprat e veta, ky krijues i nxori nga shtypi si botime të autorit, ndërkohë që ka lënë në dorëshkrim edhe disa libra të tjerë.

    Agim Deva, për punën e tij letrare dhe arsimore, qe nderuar me shumë çmime prestigjioze si dhe me dhjetëra mirënjohje, pena të arta, falënderime e çmime të ndryshme për tekstet me të mira të interpretuara nëpër festivale e manifestime të tjera në Kosovë dhe jashtë saj.

    Ishte pjesëmarrës në Simpoziumin Ballkanik të Letërsisë për Fëmijë të mbajtur në Tiranë (në vitin 2000), si edhe në shumë takime letrare në Shqipëri, Austri, Belgjikë, Gjermani, Zvicër, Itali, Francë, Maqedoni, Mal të Zi etj.

    Poezitë e tij janë përkthyer në disa gjuhë të huaja, si në: anglisht, gjermanisht, arabisht, italisht, rusisht, sllovakisht, rumanisht, kroatisht, turqisht, sllovenisht, maqedonisht, serbisht etj.

    Cilësia dhe sasia e këtyre veprave flasin, gjithsesi, për një botë jashtëzakonisht të pasur krijuese dhe një qasje jashtëzakonisht të ndjeshme, të larmishme e interesante ndaj botës së fëmijës. Ai kurdoherë ka pasur se çka t`u thotë fëmijëve. Ai kurdoherë, me secilin libër, doli i ri, i freskët, me përmbajtje të reja.

    Agim Deva mbetet edhe studiuesi, kritiku dhe teoricieni i parë i letërsisë shqiptare për fëmijë në Kosovë i cili hodhi bazat e i dha shtysë zhvillimit të mendimit kritik letrar dhe historisë së kësaj letërsie.

    Ishte krijues shumë i lexuar e shumë i dashur dhe, njëkohësisht, krijues shumë i frytshëm. Me përvojën e tij të krijuesit dhe profesorit të letërsisë ndihmoi edhe një numër të konsideruar të shkrimtarëve tanë, duke ua redaktuar e recensionuar deri më tani mbi 300 libra.

    Mik i madh i fëmijëve dhe humanist shumëdimensional

    Agim Deva ishte mik i madh i fëmijëve, humanist shumëdimensional, i cili deri në ditët e fundit nuk reshti së dhëni kontributin e çmuar për të sotmen e për të ardhmen e tyre. Vepra e tij letrare e mbështetur në një spektër të pafund krijues e kënde të panumërta të interpretimit të dukurive e të botës së fëmijëve, do të jetojë për brezat e ardhshëm si një vlerë e madhe e kulturës sonë kombëtare.

    Si cilësia ashtu edhe numri i veprave të tij letrare e dëshmojnë të vërtetën se përkushtimi ndaj krijimtarisë artistike është përbërës i domosdoshëm i dhuntisë së madhe krijuese.

    Si themelues e drejtues i “Karvanit të Shkrimtarëve për Fëmijë” që nga viti 2000 e këtej, Agimi ka udhëhequr mbi 730 manifestime letrare në qindra mjedise anembanë Kosovës, por edhe me gjerë – në Maqedoni, Shqipëri, Mal të Zi, në Kosovën Lindore, etj. Ka organizuar disa simpoziume e sesione shkencore mbi çështjet e letërsisë për fëmijë e të rinj.

    Me kthjelltësi të rrallë mendimi, me një të folur të qartë e të shtruar, të rrjedhshëm e të këndshëm, shquhej në komunikimin me të gjithë, që nga kolegët e deri tek lexuesit e vegjël, fëmijët.

    Ai, tërë jetën, si mësues e si shkrimtar, me fjalën e tij ushqeu rritjen dhe lulëzimin e njeriut. Duke ia përkushtuar tërë jetën diturisë e artit, ai arriti që të krijonte mbretërinë e fjalës së vet, prej nga buronte humanizmi e çiltërsia. Me inteligjencën e veçantë në sytë e ëmbël e me fisnikëri të bukur në shpirt, ai ruante përfytyrimin e figurës që u takon të gjithëve.

    Me punën e tij të gjithanshme drejtuese e krijuese, ai ishte shembulli i një njeriu virtuoz, me një kapacitet të jashtëzakonshëm intelektual.

    Agimi nuk ishte vetëm letrar, shkencëtar dhe profesor. Ai njëherësh ka qenë qytetar me vlera dhe i spikatur. Ishte njeri me dinjitet, i fortë përballë dallgëve, burrëror dhe konstant në vlerat si qytetar.

    Ai do të rrojë mes nesh si model i Njeriut të Mirë, studiuesit e shkrimtarit, pedagogut, me vështrim përherë tek e ardhmja e shoqërisë.

    Agim Deva mbetet një yll i pashuar i letërsisë për fëmijë. Ai vazhdon të përhapë dhe të dërgojë dritë vezulluese, ngrohtësi, mirësi dhe dashuri njerëzore, mesazhe paqeje dhe humanizmi, veçanërisht te lexuesit e vegjël, që ai i donte aq shumë dhe që u kushtoi pjesën më të madhe të jetës dhe të energjisë së tij krijuese. Të tillë, do ta kujtojmë për jetë të jetëve.

    E ndiej vetën me fat që isha student, koleg, bashkëpunëtor dhe mik shumë i mirë i profesor Agimit.

     

    VEPRAT E BOTUARA:

    1. Trumbeta e artë, Rilindja, Prishtinë 1968
    2. Zonja e livadheve, Rilindja, Prishtinë 1969
    3. Midis yjeve, Pionieri, Prishtinë 1970
    4. Dhurata, Flaka e vëllazërimit, Shkup 1970
    5. Kali ynë lazdran, Rilindja, Prishtinë 1971
    6. Reja qe shet akullore, Rilindja, Prishtinë 1972
    7. Shoku im pa xhepa, Flaka e vëllazërimit, Shkup 1972
    8. Gishti ngjyrë vjollca, Rilindja, Prishtinë 1973
    9. Gjevrekët e liqenit, Rilindja, Prishtinë 1974
    10. Panushi (roman), Rilindja, Prishtinë 1974
    11. Merrja lojës vetëm zemrën, Rilindja, Prishtinë 1975
    12. Parada e luajve, Rilindja, Prishtinë 1977
    13. Antologji e poezisë shqipe për fëmijë, Prishtinë 1977
    14. Me temlik u nisa në botë, Rilindja, Prishtinë 1978
    15. Një mijë çerdhe, Rilindja, Prishtinë 1979
    16. Rrota e historisë, Rilindja, Prishtinë 1981
    17. Nëpër gurë e valë, Rilindja, Prishtinë 1982
    18. Tregu i xhinkave, Rilindja, Prishtinë 1 984
    19. Harta e zemrës, Flaka e vëllazërimit, Shkup 1984
    20. Letërsia shqipe për fëmijë në Jugosllavi, (studim i gjatë), Obzorja, Maribor 1985
    21. Kur qan e qesh Majliza, Rilindja, Prishtinë 1985
    22. Kënga e urimeve, Rilindja, Prishtinë 1986
    23. Njeriu i vjeshtës, Flaka e vëllazërimit, Shkup 1986
    24. Kapelat, Libri shkollor, Prishtinë 1986
    25. Çaste në trohallë, Rilindja, Prishtinë 1987
    26. Fjalim nga tavolina, Rilindja, Prishtinë 1989
    27. Xhela rritet një herë tjetër Rilindja, Prishtinë 1990
    28. Po ma vjedh dikush qytetin, botim i autorit, Prishtinë 1 994
    29. Poezi të zgjedhura për fëmijë, Shkup 1996
    30. Xhela me një rrotë, Enti i Teksteve, Prishtinë 1998
    31. Guri rrokulliset përpjetë, botim i autorit, Tetovë 1999
    32. Xhela gjet yllin e vet, botim i autorit, Prishtinë 2000
    33. Koha e luleve, botoi “Oxfam”, Prishtinë 2000
    34. Edhe rrugët udhëtojnë, botim autorit, Prishtinë 2000
    35. Vigani i Zanës, Prishtine 2000
    36. Gjuha e mureve, botim i autorit, Prishtinë 2000
    37. Qyteti i pikëpyetjeve, botoi “Kinderherg”u, 2001
    38. Fjala ruhet kur shkruhet, Hendicap international, 2002
    39. Natyreza, botoi “REC”u, Prishtinë 2002
    40. Pasaportë e jetës sime, KAC, Prishtinë 2003
    41. Unë jam unë, UNICEF-i, Prishtinë 2001
    42. Duart e arta, Soros, Unicef, 2001
    43. Shtrati i kaprollit, Save the childrens, Soros, 2001
    44. Sa me shumë drunj, Soros, Save the childrens, Prishtinë 2001
    45. Loni e Liraku në pyll, Sorosi, Prishtinë 2001
    46. Topi, Unicef, Prishtinë 2001
    47. Biçikleta prej çokolate, Oxfam, Soros, Prishtinë 2001
    48. Numëroj, Soros, Unicef, Prishtinë 2001
    49. Mali, Save the childrens Prishtinë 2001
    50. Ditët e javës sime, Prishtinë 2001
    51. Ora, Save the childrens, Prishtinë 2001
    52. Fëmijët, Unicef, Soros, Prishtinë 2001
    53. Kulmi i botës, antologji e poezisë botërore për fëmijë, Enti i teksteve, Prishtinë 1984
    54. Romani ynë për fëmijë (monografi) Rilindja, Prishtinë 1977
    55. Poezia shqipe për fëmijë (1872-1980) (studim monografik), Rilindja, Prishtinë 1982
    56. Fjala e përjetimi (studime e kritika), Rilindja, Prishtinë 1984
    57. Fjala bëhet lule (koautor), libër lex. për klasën IV fillore, Enti i teksteve, Prishtinë 1985
    58. Orët e duartrokitjeve (koautor), SBASHK-u, Prishtinë 2002
    59. Përse banka përsërit klasën, Prishtinë 1979
    60. Ankohet çanta e vogël, Naim Frashëri, Tiranë 1986
    61. Jeta jetohet me zemër, pjesë teatrore, Prishtinë 2003
    62. Në dhomën katër me tri, (pjesë teatrore), Prishtinë 1998
    63. Si shkruhet pa shkronja, Rozafa, Prishtinë 2003
    64. Shtatë mrekullitë e mia, botim i autorit, Prishtinë 2004
    65. Këtu dikush ka qenë, botim i autorit, Prishtinë 2005
    66. Shitet babi im, botim i autorit, Prishtinë 2006
    67. Poezi të zgjedhura për fëmijë, Libri shkollor, Prishtinë 2006
    68. Mungon një zemër, botim i autorit, Prishtinë 2007
    69. Unë dhe shokët e mi, botoi UNICEF-i, Prishtinë 2007
    70. Gurët fluturues, Zef Serembe, Prishtinë 2007 etj.
    71. Kush troket në mua, Zef Serembe, Prishtinë 2008
    72. Orët pa tregues. Zef Serembe, Prishtinë 2008
    73. Kërkoj orëndreqës, PEN, Prishtinë 2008
    74. Trahoma, Shkup 2008

     

    Shpërblimet:

    SHPËRBLIMI I DHJETORIT

    SHPËRBLIMI “NEVEN” (Novi Sad)

    SHPËRBLIMI I BV të INTERESIT (KK. i Prishtinës)

    SHPËRBLIMI “GANIMETE TERBESHI”

    SHPËRBLIMI “NAIM FRASHERI”

    SHPËRBLIMI “ADELINA MAMAQI” (Tiranë)

    SHPËRBLIMI “VEHBI KIKAJ”

    SHPËRBLIMI “YMER ELSHANI”

    SHPËRBLIMI I “PIONIERIT”

    SHPËRBLIMI “SOFRA POETIKE e Y. ELSHANIT”

    SHPËRBLIMI “AZEM SHKRELI” (nga Ministria e Kulturës)

  • Iu ndalohet puna bizneseve që funksionuan në pronën e Ministrisë së Bujqësisë

    Iu ndalohet puna bizneseve që funksionuan në pronën e Ministrisë së Bujqësisë

    Përgatiti: Arian Hajdaraj

    Fillimisht, policët ndaluan hyrjen e veturave në këtë pikë të karburanteve, që ndodhet në magjistrales Fushë Kosovë – Prishtinë, e që për shumë vite funksionon me qira në pronën e Ministrisë së Bujqësisë.

    Pastaj, inspektorët e komunës së Prishtinës takuan pronarin për t’ia kumtuar vendimin e Ministrisë për lirim të pronës, pasi kontrata i kishte skaduar që para një muaji.

    Por, argumentet e pronarit nuk ndryshuan gjë.

    Inspektorët, kësaj pike ia vendosën shiritat pasi i kishte skaduar kontrata për ta shfrytëzuar pronën e Ministrisë së Bujqësisë.

    Ndalimi i punës, sipas avokatit të kompanisë, tejkalon kompetencat e Ministrisë.

    “Nuk mundet ministria të lirojë prona, sepse kjo kompetencë i takon gjykatës…”, tha Naim Spahiu, avokat i kompanisë.

    Vendimin për mosvazhdim të kontratës, pronari e quan të padrejtë.

    “Është vendim i ministrit, ne do ngrisim padi ndaj tij…”, tha Habib Morina, pronar i pikës së derivateve.

    Përveç pompës, shiritat pastaj iu vendosën edhe kompanisë tjetër fare pranë, që prodhon material ndërtimor.

    Në vendimin e Ministrisë, thuhet se kompania është njoftuar me kohë, madje disa herë.

    “Pra, N.T.SH “LIRIA FC” NGA DATA 01.01.2024 është dashur ta lirojë pronën në fjalë nga njerëzit dhe sendet për shkak se i ka skaduar kontrata. Për lirimin e kësaj prone brenda afatit N.T.SH “LIRIA FC” është njoftuar disa 4 herë, madje përmes shkresës së datës 13.07.2023, 10.10.2023, 13.12.2023 dhe shkresës së datës 09.01.2024, mirëpo i njëjti nuk ka vepruar konform detyrimeve të tij kontaktuale dhe ligjore dhe nuk i ka marrë parasysh njoftimet-paralajmërimet e dhëna përmes këtyre shkresave:, thuhet në vendimin e Ministrisë së Bujqësisë.

    Për pronën rrëzë magjistrales Fushë Kosovë – Prishtinë, e krejt përballë Agjencisë së Inteligjencës, kompania paguante 500 euro qira mujore.

  • Rregullorja në fuqi, por pagesat në Mitrovicë të Veriut bëhen me dinarë

    Rregullorja në fuqi, por pagesat në Mitrovicë të Veriut bëhen me dinarë

    Përgatiti: Krenare Mulliqi

    Pa asnjë problem pagesën po e bën me dinarë.

    Qytetarët serbë të Mitrovicës së Veriut nuk e përfillën rregulloren e BQK-së, edhe pse ajo hyri në fuqi të enjten.

    Qytetarët e pronarë të bizneseve në Veri të vendit, thanë se mospërdorimi i dinarit është i pamundur, të paktën edhe për një periudhë kohore.

    Edhe pse Qeveria tha se në vend të gjobave do të ketë fushatë informuese në lidhje me rregulloren e re të BQK-së, në terren një gjë e tillë nuk u pa!

    Për mosshtyrjen e zbatueshmërisë së vendimit, ka folur përsëri ambasadori Amerikan në Kosovë. Pas takimit me kryeministrin Albin Kurti, Jeffrey Hovenier tha se vendimi mund të sjellë tensione të reja në veri.

    “Serbët do të ndihen të shkëputur nga benefitet që i përfitojnë. Askush nuk e dëshiron këtë. Ne mendojmë që kjo çështje meriton më shumë konsideratë dhe gjithashtu diskutime në tavolinën e dialogut. Shqetësimet tona janë që mund të ketë tensione etnike”, tha Hovenier.

    Të shqetësuar me pasojat që mund të ketë pas vendimit të BQK-së, janë shprehur edhe nga Bashkimi Evropian. Ata kanë kërkuar që kjo çështje të përfshihet në dialogun mes Prishtinës dhe Beogradit, si dhe të gjendet një zgjidhje që rregullorja e re të mos ua ndërlikojë jetën e qytetarëve të komunitetit serb.