ATV

Blog

  • Shkurti, periudhë tranzitore para ndalimit të tërësishëm të përdorimit të dinarit

    Shkurti, periudhë tranzitore para ndalimit të tërësishëm të përdorimit të dinarit

    Përgatiti: Krenare Mulliqi

    Institucionet kosovare u pajtuan që muaji shkurt të jetë si periudhë tranzitore para ndalimit të tërësishëm të përdorimit të dinarit në Kosovë.

    Ministri për Komunitete dhe Kthim në Qeverinë e Kosovës, Nenad Rashiq, tha se pas takimit me Kryeministrin Albin Kurti, u pajtuan për t’iu dhënë më shumë kohë përgatitjeve për zbatim të rregullores.

    Por Rashiq nuk dha detaje se si do të jetë kjo përudhë tranzitore.

    As Qeveria në një komunikata që lëshoi mbrëmë, në të cilën njoftoi për periudhën e tranzicionit, nuk dha detaje, por u tha se gjatë këtij muaji, do të sigurohemi që t’i japim të gjitha informacionet e nevojshme që ky tranzicion të jetë sa më i lehtë që të jetë e mundur dhe se do të promovojmë fushata të komunikimit.

    Rashiq, i cili takoi edhe guvernatorin e BQK-së, tha se propozoi dy mënyra të implementimit dhe funksionalizimit sa i përket përdorimit të dinarit.

    “BQK-ja e Kosovës dhe ajo e Serbisë të zhvillojnë mes vete një lloj transaksioni. Dje kam marrë konfirmimin nga guvernatori se ata sot do ta kontaktojnë bankën qendrore në Serbi. Është mënyra tjetër kur bankat kanë përfaqësi këtu dhe në Serbi ta bëjnë kthimin e dinarit në euro direkt dhe përdorimi të bëhet këtu. Të gjithë njerëzit që nuk kanë llogari bankare kjo do t’i mundësojë ta hapin një pa pagesë”, tha Rashiq.

    Ministri, po ashtu, tregoi se ka marrë premtim nga kryeministri Kurti që institucionet shkollore dhe mjekësore të Serbisë në komunat veriore të Kosovës nuk do të mbyllen, por funksionimi i tyre do të vazhdojë. Njëkohësisht këto institucione do të vazhdojnë të qarkullojnë dinarë.

    Rashiqi, po ashtu, tha se bankat komerciale në Veri kanë qenë të paralajmëruar për vendimin e BQK-së qysh në shtator të viti 2022, por nga atëherë nuk ka pasur asnjë vullnet nga ana e bankave për t’u pajisur me licencë.

  • Si u zhvilluan “negociatat” e komunës me pronarët e tokave

    Si u zhvilluan “negociatat” e komunës me pronarët e tokave

    Përgatiti: Leart Hoxha

    Kryetari i Komunës së Prishtinës, Përparim Rama, sqaroi të martën në emisionin Context, se kryeqyteti nuk ka nisur proces të ri të këmbimit të pronave.

    Sipas Ramës, ka vazhduar një proces të nisur më herët me pronarët e një toke në afërsi të Liqenit të Badocit, që ishte vlerësuar nga Ministria e Financave me vlerë 8 milionë Euro. Kjo tokë kishte kushte të ndërtimit, por ndërkohë u shpall zonë e mbrojtur dhe Komuna u detyrua të këmbejë tokë me pronarët.

    Sot, ATV-ja nga Komuna siguroi procesverbalet e takimeve të zyrtarëve të komunës me pronarët e tokës në Badoc.

    Në këto dokumente precizohet zyrtarisht se Komuna fillimisht iu kishte ofruar tokë në zonën e Matiqanit dhe kjo ofertë ishte refuzuar.

    Më pas, në një takim të tetorit 2023, pronarët e tokës në Badoc kishin kërkuar që këmbimi të bëhet me tokë në qendër të Prishtinës dhe kjo ishte refuzuar nga Komuna.

    Si përfundim ishte arritur pajtimi që kompensimi të bëhet me një pjesë të një parcele 80-hektarëshe tek Prishtina e Re, jo me krejt parcelën.
    Vendimi i Komunës së Prishtinës për këmbimin e tokës me pronarët Rrahman Haradini dhe Shaban Konxheli, është pezulluar nga Gjykata Themelore në Prishtinë, si masë sigurie, pas padisë së IKD-së ndaj Komunës së Prishtinës.

    Ndërkohë, të enjten është thirrur seancë e jashtëzakonshme e Asamblesë Komunale me pikë të rendit të ditës “tërheqja e këtij vendimi për këmbim të pronave”.

  • Tabelat e “mençura” lehtësojnë mësimin në shkolla

    Tabelat e “mençura” lehtësojnë mësimin në shkolla

    Përgatiti: Sara Shehu

    Anila Alija, nxënëse e klasës së katërt në shkollën fillore “Tefik Çanga”, punimet e saj po i prezanton në këtë tabelë digjitale.

    Por në fillim, përdorimi i tabelave digjitale nuk ka qenë i lehtë për nxënësit.

    “Ka qenë e vështirë shumë me përdorë në fillim, është dashur të na mësojë mësuesja me përdorë, por tani shumë më lehtë i kuptojmë procesin mësimor, lëndën të gjitha janë më atraktive”, tha nxënësja Anila Alija.

    Drejtori i shkollës, Ali Luzha, tha se as mësimdhënësit nuk kanë probleme sa i përket përdorimit të tabelave digjitale.

    “Nuk kanë vështirësi as mësimdhënësit e asnjërës moshë pasi që kanë mësuar nga profesionistët e teknologjisë nëse kanë pasur ngecje. Kemi pranuar donacione nga Gizzi gjerman e USAID nuk i kemi blerë ne, janë shumë të përshtatshme sidomos edhe për orën e informatikës, pa lënë anash lëndët e tjera”, tha Luzha.

    Por, Luzha thotë se 11 tabelat digjitale nuk janë të mjaftueshme për gjithë shkollën.

    “Kemi tabela digjitale por na vyn edhe 16 tabela digjitale që me u kompletu e gjithë shkolla por prapëseprapë nuk qëndrojmë keq”, tha Luzha.

    Ndryshe nga Lipjani, në Prishtinë më shumë shkolla janë të pajisura me tabela teknologjike, përfshirë edhe pajisje të tjera digjitale, të cilat nxënësit i shfrytëzojnë në klasat mësimore. Por zyrtarë të Komunës nuk kanë treguar nëse kanë në plan pajisjen e të gjitha shkollave me tabela të tilla.

    Ndërkohë, më së miri në këtë aspekt qëndron Komuna e Prizrenit, pasi në fund të vitit 2022 ka ndarë 40 tabela të mençura në 58 shkolla. Një tabelë e tillë kushton 1640 euro.

  • ZRRE-ja bën përshtatje, refuzon kërkesën e KESCO-s për ngritje tarifash

    ZRRE-ja bën përshtatje, refuzon kërkesën e KESCO-s për ngritje tarifash

    Përgatiti: Fatlum Jashari

    Në hapin e parë, Zyra e Rregullatorit për Energji ka hedhur poshtë propozimin e KESCO-s për ngritje të sërishme tarifave.

    Në raportin konsultativ si përgjigje ndaj aplikimit të KESCO-s për të hyrat e lejuara maksimale, Rregullatori refuzoi kërkesën rritjen e hyrave – e cila do të përbënte barrë të re për konsumatorët.

    Por kjo nuk është finale, pasi procesi vijon me hapjen e komenteve nga palët deri më 21 Shkurt.

    “Të hyrat e Lejuara Maksimale caktohen në nivelin që mundëson të licencuarit e rregulluar t’i mbulojnë kostot e arsyeshme operative dhe të mirëmbajtjes së aseteve të tyre dhe të realizojnë kthim të arsyeshëm në investimet e tyre”, thuhet në njoftimin e ZRRE-së.

    Referuar praktikave nga e kaluara, eksperti i energjisë, Naim Bujupi, nuk pret që raporti përfundimtar të ndryshojë.

    “Të hyrat maksimale në bazë të kërkesës së KESCO-s janë rreth 410 milionë euro, ndërsa ato të propozuara nga ZRRE-ja janë diku 401 milionë euro. Nëse i krahasojmë me të hyrat e lejuara maksimale të vitit të kaluar, kemi një diferencë diku 3 milionë euro, që i bie që praktikisht nuk do të ketë rritje ose një rritje shumë e vogël”, tha Bujupi.

    Referuar faktorit korrigjues nga viti paraprak në vlerë 25 milionë euro, Bujupi sqaroi se ZRRE-ja mund të përshtatë të hyrat e akterëve të sektorit për të mos lejuar ngritje tarifash.

    “Faktori korrigjues është bërë te furnizuesi i shërbimit universal për faktin se kemi rritje të vlerës së importit, pra në bazë të bilancit të energjisë janë lejuar 70 gigavatë orë, ndërsa të realizuara janë diku 212 gigavatë orë. Praktikisht, kjo kosto duhet të mbulohet nga tarifat, mirëpo përshtatja e kostove mund të bëhet nga rregullatori”, tha Bujupi.

    Në raportin konsultativ, ZRRE-ja refuzoi edhe kërkesën e KEK-ut për ngritje të çmimit të furnizimit me shumicë për KESCO-n, nga 29.5 në 31.5 euro.

    Dy herë radhazi, më 2022 dhe 2023, Kosova pati ngritje të tarifave të energjisë elektrike.

  • ​Gjermania njofton paketën e re të ndihmës ushtarake për Ukrainën

    ​Gjermania njofton paketën e re të ndihmës ushtarake për Ukrainën

    Qeveria gjermane njoftoi një paketë të re ndihme ushtarake për Ukrainën, duke përfshirë dorëzimin e 105 tankeve Leopard 1A5 dhe 30 automjeteve luftarake të këmbësorisë Marder, njoftuan mediat lokale të mërkurën.

    Gjermania i ka siguruar Ukrainës tashmë 30 Leopard 1, 90 automjete luftarake këmbësorie Marder dhe 18 tanke Leopard 2-A6 që nga pranvera e 2023.

    Shumica e këtyre të fundit janë aktualisht në një punëtori riparimi në Lituani, tha e përditshmja Frankfurter Rundschau.

    30 tanket e premtuara Leopard 1 vijnë nga stoqet e vjetra industriale dhe të Bundeswehr-it dhe aktualisht janë duke u riparuar plotësisht nga Rheinmetall, një kompani gjermane e armëve.

    Sipas faqes së internetit të qeverisë, Gjermania planifikon të dorëzojë edhe 15 tanke të tjera antiajrore Gepard dhe nëntë sisteme të mbrojtjes ajrore IRIS-T SLM për të mbrojtur qytetet ukrainase nga sulmet me raketa ruse.

    Që nga fillimi i luftës ruse, Gjermania ka dërguar armë me vlerë 17.13 miliardë euro (rreth 18.44 miliardë dollarë) në Ukrainë.

    Ndërkohë, SHBA ka siguruar armë dhe materiale të tjera me vlerë 43.86 miliardë euro dhe Britania e Madhe vjen në vendin e tretë me 6.57 miliardë euro armë të dërguara në Ukrainë.

    Muajin e kaluar, kancelari gjerman Olaf Scholz njoftoi planet për të përfunduar së shpejti një marrëveshje sigurie me Ukrainën, por nuk specifikoi një kornizë kohore.

    Gjermania gjithashtu ka bërë përparim në sigurimin e llojeve të reja të armëve. Muajin e kaluar, Ministria Gjermane e Mbrojtjes njoftoi se do t’i dorëzonte Ukrainës gjashtë helikopterë ushtarakë Sea King Mk41 të dekompozuar për herë të parë. /AA

  • Një grua goditet nga vetura në Prishtinë, i mbesin në rrugë çanta dhe këpuca

    Një grua goditet nga vetura në Prishtinë, i mbesin në rrugë çanta dhe këpuca

    Një grua dyshohet se është goditur nga një veturë në Prishtinë.

    Rasti ka ndodhur në lagjen “Dardania” në kryeqytet, derisa në pamjet e siguruara nga ATV-ja shihet se në rrugë ka mbetur një këpucë dhe një çantë dore.

    Ende nuk dihen rrethanat e aksidentit, teksa Policia e Kosovës kanë dal në vendin e ngjarjes./atvlive.tv/

    Lajmi në përditësim…

  • “Homofobët s’kanë vend n’Kuvend”, ndërpritet mbledhja e Komisionit për të drejta të njeriut

    “Homofobët s’kanë vend n’Kuvend”, ndërpritet mbledhja e Komisionit për të drejta të njeriut

    Nisma e të Rinjve për të Drejta të Njeriut (YIHR KS), nëpërmjet një aksioni ka ndërprerë mbledhjen e Komisionit për të drejta të njeriut në Kuvend duke kërkuar dorëheqjen e kryetares së këtij Komisioni deputetes Duda Balje dhe anëtares Labinotë Demi-Murtezi.

    Në një njoftim për media në të cilin ata kanë dërguar edhe një video të aksionit shihen duke mbajtur parullat ku shkruhej “Homofobët s’kanë vend n’Kuvend”. Ata gjithashtu kanë vendosur në tavolinën e Baljes një flamur të komunitetit LGBTIQ+ si dhe kanë fishkëllyer.

    “Duda Balje publikisht deklaroi përsëri që i qëndron prapa gjuhës së saj përjashtuese dhe diskriminuese ndaj personave LGBTIQ+ nën pretekstin klasik se ‘është mendimi im personal’. Këtë deklaratë e bëri sot në diskutimin që u mbajt në Kuvendin e Republikës së Kosovës me temën ‘Gjendja aktuale në mbrojtjen dhe promovimin e të drejtave të njeriut në Kosovë’”, thuhet në njoftimin e kësaj organizate për këtë aksion.

    Sipas tyre “është skandaloze dhe jashtëzakonisht shqetësuese që një deputete e Kuvendit, njëherit kryetare e Komisionit për të drejta të njeriut, nuk e kupton parimin bazë mbi të cilin duhet të funksionojnë këto pozita publike – të drejtat e njeriut janë universale dhe personat LGBTIQ+ meritojnë të drejta të barabarta”.

    Për këto deklarata publike sipas tyre Balje duhet të jep dorëheqje të menjëhershme nga pozita e kryetares.

    Ata kanë kërkuar që edhe deputetja Labinotë Demi-Murtezi të japë dorëheqje.

    “Diskriminimi vazhdon nga deputetja Labinotë Demi-Murtezi, prezente në këtë takim, që publikisht deklaroi që “personat LGBTIQ+ shpërndajnë sëmundje”, deklaratë të cilin e kemi dëgjuar nga ajo edhe në seancën e 16 marsit të vitit 2022”, thuhet në njoftim.

    Sipas tyre “kjo shpifje dhe gjuhë e urrejtjes ndaj personave LGBTIQ+ është e papranueshme dhe kërkon adresim të menjëhershëm nga Kryesia e Kuvendit të Kosovës”.

    “Aksioni i sotëm e detyroi Duda Baljen ta lëshoj takimin të cilin vetë e ka organizuar. Ne do të vazhdojmë të kërkojmë dorëheqjen e menjëhershme të Duda Balje nga Komisioni i Drejtave të Njeriut. Kërkesa është e njëjtë edhe për deputeten Labinota Demi-Murtezi”, thuhet në njoftim.

    Më herët Balje dhe Demi-Murtezi janë deklaruar kundër projektkodit civil i cili dështoi të miratohej në mars të vitit të kaluar. Si arsye u përmend pika e dytë e nenit 1138, që lejon bashkësitë civile mes personave të seksit të njëjtë.

  • Komisioni për sëmundje infektive shpall epideminë e kollës së keqe në Shkup

    Komisioni për sëmundje infektive shpall epideminë e kollës së keqe në Shkup

    Komisioni për sëmundje infektive në Maqedoninë e Veriut ka shpallur epideminë e kollës së keqe (pertusis) në Shkup për shkak të rritjes së rasteve me të prekur.

    Sipas të dhënave të Komisionit të publikuara të mërkurën, janë gjithsej 18 persona të prekur nga kolla e keqe dhe prej tyre, 14 raste janë regjistruar në Shkup.

    Vendimi i Komisionit duhet të miratohet nga Qeveria teknike e Maqedonisë së Veriut dhe shihet si “masë për të parandaluar përhapjen e infeksionit”.

    Kolla e keqe është paraqitur nga fundi i dhjetorit të vitit 2023 dhe në mesin e prekurve ishin dy foshnje në gjendje të rëndë shëndetësore.

    “Duke marrë parasysh shifrat e fundit, 18 raste të konfirmuara të kollës së madhe dhe duke pasur parasysh se ditëve të fundit ky numër është në rritje, veçanërisht në territorin e Shkupit, ku janë konfirmuar 14 raste, propozojmë që të rekomandohet shpallja e epidemisë në Shkup”, ka thënë të mërkurën, kryetari i Komisionit për sëmundje infektive, Aleksandar Petliçkovski.

    Komisioni ka kërkuar nga kopshtet dhe shkollat të mos pranojnë fëmijë të pavaksinuar me vaksinën DTP.“Kjo tingëllon paksa e frikshme, por në realitet duhet të na lehtësojë përballimin e rrezikut që vjen me kollën e keqe. Në atë drejtim ne jemi duke u përgatitur, gjegjësisht presim që të nxjerrim një udhëzim të përgatitur për trajtimin e gjendjeve epidemike nga Instituti i Shëndetit Publik dhe aktivitetet kyçe kanë për synim përfundimin e vaksinimit”, ka thënë Petliçkovski.

    Sipas tij, përhapja e kollës është pasojë e mosvaksinimit të popullatës.

    Nga Komisionit për sëmundje infektive thonë se “vaksina DTP mbron nga bakteret që shkaktojnë tri sëmundje ku bën pjesë edhe ‘pertusis’ ose kolla e keqe”.

    Sipas raportit vjetor të Institutit të Shëndetit Publik për vaksinimin e kryer në Maqedoninë e Veriut në vitin 2022, mbulimi me vaksinim primar me tri doza të vaksinës DTP është vetëm 83.9 për qind në nivel të shtetit./REL/

  • Banka Popullore e Serbisë thotë se Kosova nuk lejoi hyrjen e dinarëve

    Banka Popullore e Serbisë thotë se Kosova nuk lejoi hyrjen e dinarëve

    Banka Popullore e Serbisë tha se autoritetet në Kosovë më 7 shkurt nuk kanë lejuar që në territorin e këtij shteti të hyjnë fondet në dinarë.

    Pas këtij njoftimi të Bankës Popullore serbe, Radio Evropa e Lirë kontaktoi Doganën e Kosovës. Por, nga ky institucion thanë se nuk munden që menjëherë të deklarohen për këtë çështje.

    Sipas Bankës Popullore të Serbisë, fondet ishin të destinuara për të paguar pagat, pensionet, kontributet shoqërore dhe pagesat e tjera për serbët që jetojnë në Kosovë.

    “Në bazë të një praktike të kamotshme, automjeti i Bankës Popullore të Serbisë me mjete në dinarë, sot është dërguar në pikëkalimin në Jarinjë, ku paratë për transport të mëtejmë do të merreshin nga vetura e kompanisë ‘Henderson’, e cila ka licencë nga autoritetet e Prishtinës për transportin e parave. Por, ajo është kthyer pa asnjë shpjegim”, tha Banka Popullore e Serbisë përmes një njoftimi më 7 shkurt.

    Kjo bankë tha se paratë ishin të destinuara të shkonin në kasafortën që ajo ka në Leposaviq, një prej katër komunave në veri të Kosovës, ku serbët janë shumicë.

    “Banka Popullore e Serbisë dënon fuqishëm incidentin e sotëm dhe riktheson se është e nevojshme që menjëherë të shfuqizohen masat diskriminuese dhe të paligjshme të ndërmarra nga autoritetet e përkohshme në Prishtinë, për të mundësuar transportin dhe shpërndarjen pa telashe të dinarëve dhe për të parandaluar kufizimin e kushteve për jetë të popullatës serbe në ‘Kosovë dhe Metohi’”, u tha në njoftim.

    Që nga 1 shkurti, në Kosovë ka hyrë në fuqi një rregullore e Bankës Qendrore të Kosovës. Kjo rregullore parasheh që euro të jetë valuta e vetme për pagesa në Kosovë, duke ndaluar përdorimin e dinarit serb.

    Megjithatë, në këtë rregullore thuhet se institucionet e licencuara për operim në Kosovë mund të kryejnë importin dhe eksportin e valutave. Dogana dhe Policia e Kosovës janë autoritetet përgjegjëse që sigurohen që importi apo eksporti ndërkufitar i euros apo valutave të tjera nga dhe për në Kosovë mund të lejohet vetëm “përmes paraqitjes së dëshmisë së licencës dhe autorizimit të lëshuar nga BQK-ja”.

    Serbia ua paguan serbëve të Kosovës – përmes një sistemi paralel – pagat, pensionet, ndihmat sociale, dhe përfitimet tjera.

    Pensionet nga buxheti i Serbisë, zakonisht serbët në Kosovë i marrin në datën 10 të çdo muaji. Por, presidenti i Serbisë, Aleksandar Vuçiq, deklaroi më 2 shkurt se mjetet nga buxheti serb të dedikuara për serbët në Kosovë do të dërgohen më herët seç ishte planifikuar.

    “Sot filluam t’i paguajmë paraprakisht rrogat, pensionet dhe përfitimet sociale për njerëzit tanë në Kosovë. Shumë më herët se sa ishte paraparë”, deklaroi Vuçiq.

    Ndërkaq, punëtorët e arsimit dhe shëndetësisë, që punojnë në bazë të sistemit serb, e marrin pagën në dy pjesë, 6 dhe 21 shkurt, kurse të punësuar në vetëqeverisjen lokale në ditën e 10 të çdo muaji.

    Vuçiq ka treguar se shteti i tij i ka 31.831 të punësuar në Kosovë, 29.115 pensionistë – prej të cilëve 4.700 i marrin pensionet në dorë – si dhe 31.586 shfrytëzues të ndihmës sociale.

    Kryeministri i Kosovës, Albin Kurti, ka deklaruar se rregullorja e BQK-së për operacione me para të gatshme nuk është kundër dinarit serb dhe se serbët që pranojnë pensione dhe ndihmë tjetër nga Serbia me dinarë, mund të vazhdojnë t’i pranojnë ato, por ato pagesa duhet të deponohen në llogaritë bankare në Kosovë me euro.

    Kosova ka thënë se zbatimi i rregullores të BQK-së për operacione me para të gatshme do të bëhet përmes një periudhe të tranzicionit, duke mos specifikuar se sa do të zgjasë kjo periudhë.

    Komuniteti ndërkombëtar i ka bërë thirrje Kosovës që të shtyjë zbatimin e rregullores, pasi kanë argumentuar se ajo hyri në fuqi pa konsultime paraprake. Shtetet e Bashkuara dhe Bashkimi Evropian kanë shprehur drojën se rregullorja mund të ketë ndikim negativ në popullatën serbe që jeton në Kosovë.

    Lista Serbe, partia më e madhe e serbëve në Kosovë që gëzon mbështetjen e Beogradit zyrtar, ka kritikuar vendimin e BQK-së, dhe kreu i kësaj partie, Zllatan Ellek, më 3 shkurt tha se ndalimi i përdorimit të dinarit “nënkupton dëbimin të serbëve dhe të gjitha institucioneve serbe” nga territori i Kosovës.

    Sipas Ellekut, afër 100.000 serbë do të preken drejtpërdrejt nga vendimi i BQK-së për ndalimin e përdorimit të dinarit./REL/

  • Krasniqi: Përpjekja e Qeverisë për ta paraqitur Kushtetuesen si rivale e dëmton demokracinë në vend

    Krasniqi: Përpjekja e Qeverisë për ta paraqitur Kushtetuesen si rivale e dëmton demokracinë në vend

    Gjatë raportimit në Komisionin për Administratë Publike, numri dy i Qeverisë së Kosovës, Besnik Bislimi, ka reaguar ashpër kur nga deputetët e opozitës i është përmendur mundësia e çuarjes në Kushtetuese të Ligjit për KPM-në.

    Bislimi ka thënë se Gjykata Kushtetuese s’mund të shihet si një institucion paralel me Qeverinë dhe se dihet që rolet i kanë të ndara. Bislimi tutje ka thënë se Kushtetuesja për të marrë vendime sa i përket koeficientit të pagave dhe rreth asaj se sa anëtarë duhet t’i ketë KMP, atëherë duhet të dalë të kërkojë vota si Gjykatë Kushtetuese për ta bërë pastaj qeverinë.

    Ndaj kësaj gjuhet të zëvendëskryeministrit Bislimi ka reaguar anëtari i shoqërisë civile, Albert Krasniqi. Ai ka thënë se këto sulmet të zyrtarëve të Qeverisë ndaj Kushtetuese duhet të ndalen menjëherë.

    Sipas Krasniqit, përpjekja e Bislimit për ta paraqitur Kushtetuesen si një rival të Qeverisë është e dëmshme për demokracinë dhe për rendin kushtetues në vend.

    Ai në fund ka thënë se Kushtetuesja është institucion mbrojtës i Kushtetutës nga vendimet e gabuara të Qeverisë dhe nganjëherë edhe qëllimkëqija.

    “Sulmet e organizuara ndaj Gjykatës Kushtetuese nga zyrtarët e Qeverisë duhet të ndalen menjëherë!

    Përpjekjet për të dëmtuar kredibilitetin e Gjykatës Kushtetuese dhe për ta paraqitur atë si një rival të Qeverisë janë të dëmshme për demokracinë dhe për rendin kushtetues të Republikës. Gjykata nuk është parti politike opozitare që synon të fitojë vota, por është institucion mbrojtës i Kushtetutës nga vendimet e gabuara të Qeverisë dhe, ndonjëherë, qëllimkëqija”, ka shkruar Krasniqi.