Blog

Dy personat që morën lëndime serioze si pasojë e një aksidenti të rëndë që ndodhi mbrëmjen e sotme në fshatin Krushevë të Klinës, ku u përfshinë treni dhe një furgon, kanë humbur jetën në spital.

Këtë e ka konfirmuar zëdhënësi i Policisë së Kosovës për Rajonin e Pejës, Fadil Gashi.

“Mjeku kujdestar në Emergjencën e Spitalit Rajonal të Pejës e ka konfirmuar vdekjen e dy të lënduarve në aksidentin që ndodhi në Krushevë”, ka thënë Gashi.
Aksidenti ka ndodhur rreth orës 18:10 dhe në të janë përfshirë një tren dhe një kombibus.

“Sot rreth orës 18:10, policia është njoftuar për një aksident në fshatin Krushevë e Madhe, Klinë. Në aksident është i përfshirë treni i udhëtarëve dhe një kombibus. Dy persona janë dërguar me Emergjencë për në Spitalin Rajonal në Pejë”, ka njoftuar paraprakisht Gashi.

Pesë persona me origjinë nga Gjermania dhe Kosova janë arrestuar nga Policia e Spanjës, pasi të njëjtit dyshohet se janë përfshirë në një sulm seksual ndaj një gruaje 26-vjeçare.

Siç raporton El Mundo, ngjarja dyshohet se ka ndodhur të martën në një hotel luksoz në Marbella të Spanjës, teksa viktima është me origjinë nga Mongolia.

Grupi që ra na pranga, dyshohet se kishin planifikuar që viktimën ta dërgojnë në hotelin ku qëndronin e më pas të abuzojnë me të seksualisht.

Vajza kishte dalë nga dhoma e shqetësuar dhe duke qarë, gjë që ra menjëherë në sy te një punëtore e hotelit e cila denoncoi rastin.

Siç shkruan gazeta spanjolle, hetimi mbetet i hapur dhe të arrestuarit janë vënë në dispozicion të Gjykatës Hetimore numër 1 në Marbella.

Tashmë hetuesit, të cilët kanë biseduar me dëshmitarët dhe kanë kërkuar pamje nga kamerat e hotelit – po fokusohen në përcaktimin e shkallës së pjesëmarrjes në ngjarjet që mund të ketë pasur secili prej të dyshuarve.

Këta persona janë liruar me dakordim të prokurorisë dhe mbrojtjes dhe të gjithë ata hetohen lidhur me dyshimet e sulmit seksual dhe dy kanë detyrimin të paraqiten periodikisht përpara konsullatës spanjolle të qytetit gjerman ku banojnë.

Një aksident trafiku me një të lënduar ka ndodhur sot në fshatin Bishtazhin të Gjakovës.

Zëdhënësi i policisë, Sheremet Elezaj ka thënë, se në këtë aksident kanë qenë të përfshirë një kamion dhe një veturë.

Rasti është duke u hetuar nga policia.

“Në fshatin Bishtazhin-Gjakovë (rruga Gjakovë-Prizren) rreth orës 12:50 dy automjete (një kamion dhe një veturë) janë përfshirë në aksident trafiku. Përveç dëmeve materiale deri më tani është raportuar për një person të lënduar. Njësia e trafikut rajonal është duke trajtuar rastin”, ka thënë Elezaj.

Specialistët për Hetimin e Krimeve të Rënda në policinë e Gjirokastrës arrestuan të miturin, 15- vjeçar si autor të dyshuar të plagosjes së djeshme në qytetin e Gjirokastrës ku rreth orës 08:05 në lagjen “18 shtatori”, gjatë një konflikti të çastit ka goditur me mjet prerës bashkëmoshatarin e tij.

Pas ngjarjes i lënduari është transportuar për në spitalin e Gjirokastrës ku i është nënshtruar një ndërhyrje kirurgjikale dhe është jashtë rrezikut për jetën.

Sipas policisë veprimet procedurale me të miturin e ndaluar vijojnë të kryhen në praninë e prindit, mbrojtësit ligjor dhe psikologut. /euronews.al/

I dërguari i Bashkimit Evropian për Dialogun Kosovë-Serbi, Miroslav Lajçak, do të qëndrojë në Beograd të premten e javës së ardhshme.

Është presidenti serb, Aleksandar Vuçiq, që ka treguar se “Lajcak do ta vizitojë Serbinë më 15 mars.

Ai ka thënë se me të do të flasë për procesin e largimit të kryetarëve të katër komunave veriore të Kosovës, Leposaviq, Zveçan, Zubin Potok dhe Mitrovicë e Veriut.

Lajçak më 5 mars ka vizituar Kosovën, ku është takuar me zëvendëskryeministrin Besnik Bislimi dhe temë e diskutimit mes tyre ka qenë vendimi i Bankës Qendrore të Kosovës për dinarin serb që të mos përdoret si mjet pagese.

Për dallim prej shumë rasteve të tjera, Lajçak ka kryer takimit në Prishtinë dhe është kthyer direkt në Bruksel, pa bërë ndalesë në Beograd.

Ministria e Punëve të Brendshme të Maqedonisë së Veriut ka njoftuar se gjatë orëve të para të mëngjesit në rrugën kryesore Shkup – vendkalimi kufitar Bllacë, ka ndodhur një aksident trafiku.

Një kamion i mbushur me rreth 25 tonë plastikë PVC është rrotulluar në rrugë, duke bllokuar dy shiritat dhe si rrjedhojë është ndërprerë qarkullimi në të dy drejtimet.

Nuk raportohet për të lënduar.

“Më datë 09.03.2024 në ora 06:50 në rrugën kryesore Shkup – vendkalimi kufitar Bllacë, ka ndodhur një aksident trafiku në të cilin TMV MAN ka humbur kontrollin dhe është përmbysur në rrugë, duke i zënë të dy shiritat, nuk ka të lënduar. Policia është njoftuar për vendkalimin kufitar Bllacë dhe komunikacioni do të jetë i ndërprerë në të dy drejtimet. Nga kamioni me rreth 25 tonë plastikë PVC po shkarkohet në vend malli, i pranishëm është edhe shërbimi doganor”, thuhet në njoftim.

Dogana e Kosovës ka shpallur konkurs për oficerë doganor. Konkursi do të jetë i hapur deri më 22 mars të këtij viti.

Ajo çka bie në sy në këtë konkurs, është kriteri i moshës që është vendosur, ku aplikantët duhet të jenë nga 18 deri në 30 vjet.

“Të jetë i moshës tetëmbëdhjetë (18) deri tridhjetë (30) vjeç”, është një nga kriteret e aplikimit. Nëse nuk e përmbushni këtë kriter, s’mund të vazhdoni fare me aplikimin.

Kritere tjera për aplikim janë: Të jetë shtetas i Republikës së Kosovës; Të ketë zotësi të plotë për të vepruar; Të jetë në gjendje të mirë shëndetësore dhe i aftë fizikisht për t’i kryer detyrat e dhëna; Të ketë diplomë universitare të kualifikimit bachelor ose kualifikim të barasvlershëm- preferohet në drejtësi, ekonomi, kimi, farmaci, biologji, teknologji dhe doganë; Të japë informacionin e kërkuar në lidhje me punën e tij të mëpërashme ose ndonjë çështje tjetër që lidhet me pranimin e tij në Doganë; Dëshmi nga organet kompetente (Gjykata) se personi nuk është i dënuar ose ndaj saj/tij nuk është duke u zhvilluar procedurë penale e cila ndiqet sipas detyrës zyrtare, si dhe Të ketë reputacion të lartë professional dhe integritet personal.

Në fazën e parë do të bëhet përzgjedhja në bazë të dokumenteve të paraqitura dhe aplikacioneve, njoftimi i kandidatëve të diskualifikuar si dhe atyre të cilët do t’i nënshtrohen procedurave tjera të testimit.

Në fazën e dytë, procedurat e testimit, testi me shkrim dhe intervista me gojë.

“Dogana e Kosovës gëzon të drejtën ligjore për prerjen e listës së kandidatëve dhe krijimin e listës më të ngushtë që do t’i nënshtrohen testit me shkrim dhe intervistës me gojë, duke u bazuar në lartësinë e pikëve të marra nga procesi i vlerësimit të aplikacioneve dhe testit me shkrim, në rastet kur numri i aplikantëve që kanë përmbushur kërkesat e konkursit, respektivisht kanë kaluar pragun e kalueshmërisë nga procesi i vlerësimit të aplikacioneve dhe testit me shkrim, është më i lartë se dhjetë (10) kandidatë të përshtatshëm për një pozitë të lirë.

Njoftimi i kandidatëve për orarin, vendin dhe procedurat e testimit do të bëhet së paku dhjetë (10) ditë kalendarike para datës së testit me shkrim, respektivisht intervistës me gojë”, thuhet në konkurs.