ATV

Blog

  • Babai i Triumf Rizës reagon pas verdiktit të Gjykatës ndaj Sekiraqës

    Babai i Triumf Rizës reagon pas verdiktit të Gjykatës ndaj Sekiraqës

    Gjykata Themelore e Prishtinës sot ka marrë vendim ndaj Enver Sekiraqës, i akuzuar për shtytje të vrasjes së policit të Kosovës, Triumf Riza, vrasje që ka ndodhur në vitin 2007.

    Në seancën e sotme, autoritetet e drejtësisë kanë vendosur që Sekiraqa të dënohet me 25 vjet burgim.

    Por me këtë dënim nuk është i kënaqur babai i policit të ndjerë Triumf Rizës. Ai ka thënë se nuk po mund të kuptoj se si në shoqërinë tonë janë më të vlefshëm kriminelet se sa një polic i cili ishte shpallur hero, pikërisht për luftën kundër bandave kriminale.

    “Është një gjykim që ka zgjatur më së shumti në historinë e Gjykatave të Kosovës për 17 vjet. Nuk po kuptoj qysh është e mundur me qenë në shoqërinë tonë me të vlefshëm kriminelet, se sa një polic që është në mbrotjen e ligjit dhe shtetit. Një polic që është shpallur hero pikërisht për luftën kundër bandave krininale. Denimi është i ulët. Se ky është vrasës kryesor. Nuk janë të tjerët, të tjerët i ka nxitur ky”, ka thënë ai.

  • Shenjat e çrregullimeve hormonale që nuk duhen injoruar

    Shenjat e çrregullimeve hormonale që nuk duhen injoruar

    Çdo mjek thotë se me hormonet nuk bën dot shaka, sepse janë ato që na rregullojnë humorin, emocionet, sjelljen, paraqitjen dhe marrëdhëniet me të tjerët.

    Kjo është arsyeja përse çrregullimet hormonale shkaktojnë një sërë ndryshimesh thelbësore në organizëm dhe në shëndetin tonë.

    Më poshtë do të gjeni 8 simptomat më të zakonshme të çrregullimeve hormonale dhe dëmit në shëndet:

    Shtimi në peshë
    Çrregullimet hormonale shkaktojnë shtim në peshë, pavarësisht përpjekjeve tuaja për t’u ushqyer shëndetshëm dhe për të kryer aktivitet të rregullt fizik.

    Rënie të flokëve
    Rënia e flokëve është një nga simptomat më të zakonta të çrregullimeve hormonale dhe nuk duhet injoruar.

    Djersitja e tepërt
    Nëse djersitni më tepër seç duhet, atëherë me siguri jeni të prekur nga çrregullimet hormonale dhe duhet të vizitoheni tek një mjek.

    Ndryshimet në përmasat e gjirit tek femrat.

    Niveli i pakët i estrogjenit, pakëson dendësinë e indeve të gjirit. Nivelet e rritura të estrogjenit mund të shkaktojnë gjendra ose ciste në gjoks.

    Lodhje dhe plogështi
    Kur hormonet nuk janë në nivelet e duhura, atëherë do të prekeni nga lodhja dhe plogështia kronike e pazakontë.

    Në këto raste duhet të konsultoheni me një mjek për të kontrolluar nivelet e progesteronit në gjak.

    Fytyrë me akne
    Kujdesi i mangët për lëkurën, ushqyerja e keqe dhe çrregullimet hormonale janë tre prej shkaktarëve të akneve në fytyrë.

    Nëse trajtimet kundër akneve nuk kanë rezultat, atëherë me siguri bëhet fjalë për çrregullim hormonal.

    Rrathët e zinj të syve
    Çrregullimet hormonale shkaktojnë pagjumësi dhe probleme me gjumin.

    Një gjë e tillë rezulton në rrathë të zinj të syve.

    Rrathët e zinj vijnë si pasojë e nivelit të ulët të testosteronit tek meshkujt dhe progesteronit tek femrat.

    Depresion dhe ankth
    Depresioni dhe ankthi janë rezultat i çrregullimeve hormonale.

    Ato janë të ndërlidhur me shtatzëninë, menopauzën dhe ciklin menstrual si pasojë e çrregullimeve hormonale.

    Ushqimet e shpejta nxisin çrregullime hormonale
    Një raport i fundit, të cilit i referohet AgroWeb.org, njerëzit që konsumojnë ushqime të shpejta kanë në trupin e tyre një nivel më të lartë kimikatesh të rrezikshme.

    Këto kimikate kanë pasoja të rënda dhe afatgjata tek njeriu.

    Tek meshkujt ato rrisin nivelin e estrogjenit që sigurisht është shumë i dëmshëm.

    Për femrat, konsumimi i tyre çon në rritjen e mundësisë së zhvillimit të qelizave të dëmshme.

    Përveç konsultave me mjekun, ekspertët këshillojnë konsumin e më shumë frutave dhe perimeve dhe sa më pak ushqime të shpejta dhe të paketuara./AgroWeb.org

  • Dua Lipa publikon albumin e tretë në karrierë “Radical Optimism”

    Dua Lipa publikon albumin e tretë në karrierë “Radical Optimism”

    Ylli i muzikës me famë ndërkombëtare, Dua Lipa, ka shënuar sot (e premte) një tjetër kapitull të rëndësishëm në karrierën e saj muzikore me lansimin e albumit të saj më të ri me titull “Radical Optimism”.

    Ky album vazhdon rrugëtimin e saj të mbresëlënëshëm pas suksesit të jashtëzakonshëm të dy albumeve të para, “Future Nostalgia” (2020) dhe albumit debutues të saj në vitin 2017, me titull “Dua Lipa”.

    “Radical Optimism” përmban një koleksion prej 11 këngësh, përfshirë edhe hitet që tashmë kanë bërë jehonë si “Houdini”, “Training Season” dhe “Illusion”, të cilat janë të njohura nga publiku pasi u publikuan disa muaj më parë.

    Në një postim në llogarinë e saj zyrtare në Instagram, Dua Lipa ka shpërndarë disa fotografi ekskluzive nga prapaskenat e përgatitjes së albumit, duke ndarë emocionet e saj me ndjekësit.

    Ajo shprehu ndjenjat e saj në mbishkrimin e fotografive duke shkruar: “RADICAL OPTIMISM ËSHTË I JUAJI! Shumë e mirënjohur për atë që ky album më ka dhuruar gjatë kohës së shkrimit dhe jam kaq e lumtur/e lehtësuar/e entuziazmuar/e trembur/po qaj/po vërshëlloj që më në fund është i juaji. Ju dua dhe faleminderit për gjithë mbështetjen në çdo hap të rrugës”.

    Me këto fjalë, Dua Lipa thekson lidhjen e saj të ngushtë me fansat dhe falënderon secilin prej tyre për mbështetjen e pandërprerë. Albumi i ri “Radical Optimism” pritet të sjellë një përmbledhje të mahnitshme të zërave dhe tekstshkrimit të Dua Lipës dhe të vazhdojë të forcojë praninë e saj në skenën botërore të muzikës pop. /Telegrafi/

     

  • Demi Moore po përgatitet për t’i dhënë lamtumirën Bruce Willis

    Demi Moore po përgatitet për t’i dhënë lamtumirën Bruce Willis

    Kanë kaluar muaj pas lajmit se aktori Bruce Willis është diagnostikuar me demencë frontotemporale, e cila po ndikon në jetën e yllit të Hollivudit.

    Prej të paktën dy vjetësh ai ndodhet nën kujdesin e familjarëve që s’e kanë lënë për asnjë moment vetëm gjatë kësaj periudhe të vështirë.

    Gruaja dhe fëmijët e tij përditësojnë herë pas here fansat përmes rrjeteve sociale, por edhe ish-bashkëshortja e tij, Demi Moore që pavarësisht se është divorcuar prej aktorit mbi 30 vjet më parë, vazhdon të qëndrojë pranë tij.

    Ata kanë tre vajza dhe kanë qenë të martuar për 13 vite. Por Moore po përpiqet të përshtatet me “një perspektivë të re për jetën”, thonë disa burime për mediat e huaja. Ajo po ndryshon qasjen e saj me përkeqësimin e sëmundjes së Willis.

    “Demi ndihet shumë mirënjohëse dhe e prekur. Ajo e ka kaluar jetën me të dhe është mirënjohëse për të gjitha gjërat që kanë përjetuar”.

    Aktorja beson se kjo situatë e ka mësuar si të jetë një luftëtare.

    “Ta shohë Bruce-n që të kalojë kaq shumë vështirësi e ka mësuar Demi-n si të luftojë. Është paksa e hidhur, por edhe frymëzuese. Ajo e admiron shumë Bruce-n dhe po e përgatit veten për lamtumirën emocionale”.

  • ​Dëgjimi publik për Projektligjin për Rini, deputetja Fejza: Ka komuna që nuk kanë zyrtar për rini

    ​Dëgjimi publik për Projektligjin për Rini, deputetja Fejza: Ka komuna që nuk kanë zyrtar për rini

    Komisioni për Arsim ka mbajtur dëgjim publik për Projektligjin pёr Rini. Në Kuvendin Komunal të Mitrovicës së Jugut, të rinjtë që morën pjesë në këtë dëgjim publik kanë shprehur shqetësimet e tyre nëse do të ketë politizime apo edhe mos aktivizim të Këshillit të Veprimit Rinor Lokal.

    Deputetja e Lëvizjes Vetëvendosje, Arjeta Fejza tha se ka komuna që nuk kanë zyrtarë për rini dhe nuk kanë parasysh politikat rinore.

    “Unë po e mirëpres edhe Agjencinë edhe Këshillin Shtetëror, sepse fatkeqësisht ka akoma komuna që nuk e kanë asnjë zyrtar për rini edhe ka akoma komuna të cilat nuk e kanë të përfshirë fare dikasterin e rinisë në qeverisje lokale. Do të thotë nuk e ka fare të përfshirë rininë si divizion në kuadër të politikave lokale. Kemi punë në këtë drejtim si aktivistë që merremi me çështje të rinisë por edhe si institucione, duke tentuar që të bëjmë sa më shumë mekanizma, të cilët përveç që obligojnë komunat që të kenë parasysh dhe institucionet tjera, jo vetëm komunat, që të kenë parasysh politikat rinore i obligojnë edhe që të kenë mbështetje për ta, siç është në rastin konkret mbështetja financiare”, deklaroi ajo.

    Studenti Burim Zasella përmendi keqpërdorimin e Këshillit të Veprimit Rinor Lokal.

    “A ka ndonjë mekanizëm që i ndëshkon këto drejtori njëjtë edhe tek qendrat rinore. Çka nëse nuk i mbulon? Çka nëse Këshillat Rinore Lokale dhe qendrat rinore keqpërdoren, a duhet të presim ne tri vjet që t’i kalojë mandati atij personi apo ka ndonjë mekanizëm që ai të shkarkohet”, ka pyetur ai.

    Edhe Drita Dibrani e cila mori pjesë në këtë dëgjim publik shprehi dilemat e saj, teksa theksoi se një nga pikat kanë të bëjnë me politizim.

    “Për mua ende është mjegull mënyra se si do të konceptohet pika e 3. ‘Drejtoria komunale e rinisë funksionon si sekretariat i këshillit lokal’. Tek kjo është mirë të shikohet për tu ndryshuar…. konkretisht ne dimë qysh kanë funksionuar Këshillat e Veprimit Rinor Lokal më herët. Mirëpo sekretariati i ka pasur organizatat qeveritare”, tha ajo.

  • Dënohet me 24 vjet burgim i akuzuari për dhunimin e dy vajzave të mitura në Prizren

    Dënohet me 24 vjet burgim i akuzuari për dhunimin e dy vajzave të mitura në Prizren

    Gjykata Themelore në Prizren, Departamenti për të Mitur, ka shpallur aktgjykim dënues ndaj E.G., i akuzuar për veprën penale “Dhunimi”, duke e dënuar me burgim unik në kohëzgjatje prej 24 vitesh, raporton Gazeta Sinjali.

    Në njoftim e gjykatës bëhet e ditur se i njëjti akuzohej se i ka dhunuar dy vajza, nën moshën 14-vjeçare, njërën nga muaji nëntor 2023 e deri në mars 2024, kurse tjetrën nga një kohë e pacaktuar e deri në mars.

    “Nga muaji nëntor 2023, deri në 1 mars 2024, e detyron personin tjetër për të kryer aktin seksual të dëmtuarën (I) – nën moshën 14 vjeç,

    Me këto veprime kryen veprën penale dhunimi nga neni 227 paragrafi 8 dhe 7 lidhur me paragrafin 4 pika 4.9 lidhur me nenin 77 të KP-së.

    Nga koha e pavërtetuar deri në 1 mars 2024, e detyron personin tjetër për të kryer aktin seksual të dëmtuarën (II) – nën moshën 14 vjeç.

    Me këto veprime kryen veprën penale dhunimi nga neni 227 paragrafi 8 dhe 7 lidhur me paragrafin 4 pika 4.9 lidhur me nenin 77 të KP-së.”

    Andaj Gjykata, në kuptim të Kodit Penal dhe Kodit të Procedurës Penale, të akuzuarit E.G., e GJYKON:

    – DENIM UNIK ME BURGIM në kohëzgjatje prej 24 vitesh (në të cilin dënim do ti llogaritet koha e kaluar në paraburgim nga data 01 mars 2024.

    – Të njëjtit i vazhdohet masa e paraburgimit deri në plotfuqishmërinë e Aktgjykimit.

    Pas shpalljes së aktgjykimit, kryetarja e trupit gjykues ka njoftuar palët që brenda afatit ligjor të gjithë palët në procedurë do të pranojnë aktgjykimin e plotë në formë të shkruar dhe të arsyetuar.” – thuhet në njoftim.

    Kundër këtij aktgjykimi, pala e pakënaqur ka të drejtë ankese në Gjykatën e Apelit.

  • AGK fajëson Qeverinë se bëri fushatë denigruese kundër medieve në Kosovë

    AGK fajëson Qeverinë se bëri fushatë denigruese kundër medieve në Kosovë

    Kryetari i Asociacionit të Gazetarëve të Kosovës (AGK), Xhemajl Rexha, ka deklaruar se Qeveria e Kosovës ka ndikuar që raporti i “Reporterëve pa Kufij”, ta renditë Kosovën 19 pozita më poshtë sa i përket lirisë së medieve.

    Në një konferencë për media, Rexha tha se raporti në fjalë e identifikon fushatën denigruese të Qeverisë kundër medieve dhe gazetarëve.

    Kjo fushatë sipas tij është bërë për ta ulur nivelin e besimit të publikut në media.

    “Në vitet e fundit tregon regresin më të madh, për 19 pozita. Kjo renditje mund të mos jetë befasi për gazetarët e media për atë çka kemi përjetuar në vitin e fundit, por duhet të jetë alarm për ata që kanë ndikuar. Më së shumti e kam fjalën për Qeverinë e Kosovës. Raporti i reporterëve pa kufi, identifikon fushatën denigruese të Qeverisë kundër medieve dhe gazetarëve për ta minimizuar efektin e punës së tyre dhe për ta ulur nivelin e besimit të publikut në media”, tha ai.

    Rexhaj tha se një nga arsyet e regresit është edhe përpjekja e Qeverisë së Kosovës për ta mbyllur mediumin Klan Kosova. Ai u shpreh se është në dorën e Qeverisë që të bëjë përpjekje ta përmirësojë këtë renditje.

    “Siguria e gazetarëve ka qenë shqetësim dhe këtë vit. Ka pasur 30 sulme ndaj gazetarëve në veri, ka cenu integritetin fizik të gazetarëve. Kemi pasur sulme fizike edhe në Prishtinë ndaj gazetarëve gra… Është në dorë të qeverisë ta përmirësojë këtë renditje duke mos e dërguar në miratim ligjin e ri të KPM-së, por duke u angazhuar në një angazhim serioz, me shoqërinë civile duke marrë parasysh vërejtjet”, tha ai.

  • Petkoviq thotë se iu ndalua vizita në Kosovë

    Petkoviq thotë se iu ndalua vizita në Kosovë

    Shefi i Zyrës për Kosovën në Qeverinë serbe, Petar Petkoviq, tha se autoritetet në Kosovë ia kanë refuzuar kërkesën që të zhvillojë një vizitë në Kosovë për Pashkët Ortodokse gjatë fundjavës.

    Sipas një njoftimi të kësaj zyreje, Petkoviq gjatë kësaj vizite ishte parparë të merrte pjesë në liturgjinë e mesnatës për Pashkët në Manastirin e Deçanit, pastaj në shërbesën në Manastirin e Graçanicës në mëngjesin e Pashkëve dhe në një takim me të rinjtë në Manastirin e Draganacit.

    “Ndonëse vizita ishte ekskluzivisht e karakterit fetar dhe përfshinte ekskluzivisht vizita në manastire dhe në vendet e shenjta të Kishës Ortodokse Serbe, në frymën e festës më të madhe për serbët, pa qëllime politike, autoritetet në Prishtinë e ndaluan vizitën e tij pa asnjë shpjegim”, tha Zyra për Kosovën në Qeverinë serbe.

    Kjo zyrë tha se për më shumë se një vit, Qeveria e kryeministrit të Kosovës, Albin Kurti, po e pengon Petkoviqin që të vizitojë serbët në Kosovë.

    “Këto ndalime [të vizitave] jo që janë të pabaza, por paraqesin edhe shkelje të drejtpërdrejtë të Marrëveshjes për lëvizjen e lirë dhe atë për vizita zyrtare, veçmas kur bëhet fjalë për kryenegociatorin në dialog nga pala serbe”.

    Në të kaluarën, Kosova ka refuzuar kërkesat e parashtruara nga Petkoviq për të zhvilluar vizita, duke thënë se refuzimi ishte për shkak të “deklaratave provokuese”, raporton rel.

  • Enver Sekiraqa dënohet me 25 vite burgim

    Enver Sekiraqa dënohet me 25 vite burgim

    Gjykata e ka dënuar Enver Sekiraqën me 25 vite burgim për nxitje në vrasjen e policit Triumf Riza, , por ai lihet ne liri deri ne plotfuqishmërinë e vendimit. Gjykata ia ndërprenë masën e arrestit shtëpiak.

    Në seancën e fundit, më 29 prill, Prokuroria kishte kërkuar dënimin e Sekiraqës derisa ky i fundit kishte deklaruar se me ish-policin s’kishte pasur probleme më herët.

    Gjykata Themelore në Prishtinë, për herë të dytë më 16 shtator 2019, e kishte shpallur fajtor Enver Sekiraqën për nxitje në vrasjen e ish-policit Triumf Riza dhe i kishte shqiptuar dënim në kohëzgjatje prej 30 vitesh.

    Mirëpo, Gjykata e Apelit më 6 mars 2020, kishte vendosur të aprovojë ankesën e mbrojtjes së Sekiraqës duke e kthyer rastin për të dytën herë në rigjykim, pasi sipas Apelit aktgjykimi i shkallës së parë ishte marrë me shkelje të dispozitave të procedurës penale.

    Sekiraqa për të njëjtin rast ishte dënuar edhe më 17 maj 2016, për dy vepra penale për “nxitje në kryerje të vrasjes së rëndë” dhe për veprën “detyrimi” me dënim unik prej 37 viteve burgim, kurse ishte liruar për veprën penale “dhunimi”.

    Gjykata e Apelit, më 24 tetor 2017, kishte mbajtur një seancë dëgjimore lidhur me caktimin e masës së sigurisë ndaj Enver Sekiraqës, pasi e njëjta gjykatë më 19 tetor, në orët e mbrëmjes, e kishte liruar nga paraburgimi atë dhe ndaj tij kishte shqiptuar masën e arrestit shtëpiak.

    Për ndryshimin e masës së sigurisë ndaj tij, kishin votuar tri gjykatëset e Apelit, dy nga radhët e EULEX-it, Elka Ermenkova dhe Anna Adamska-Gallant, si dhe gjykatësja vendore Mejreme Memaj.

    Por, kjo gjykatë, pas vetëm dy ditësh, kishte vendosur që sërish ta rikthejë në paraburgim Enver Sekiraqën dhe për këtë, shkak ishte bërë një fotografi e publikuar në rrjetin social, nga miqtë që e kishin vizituar atë pas lirimit nga paraburgimi.

    Me këtë, gjykata e shkallës së dytë, kishte vlerësuar se Enver Sekiraqa ka shkelur masën e arrestit shtëpiak, që i ishte caktuar.

    Ndryshe, në seancën e Gjykatës së Apelit, e cila ishte mbajtur më 6 shtator 2017, ku ishin shqyrtuar pretendimet ankimore të palëve, Enver Sekiraqa, kishte kërkuar që të lirohet nga paraburgimi dhe të mbrohet në liri.

    E si garancion për lirimin e tij, Sekiraqa kishte ofruar pasurinë e tij, përfshirë shtëpinë, lokalin dhe një shumë parash, të cilat kishte thënë se do t’i mblidhte me ndihmën e familjes.

    Prokurorja ndërkombëtare e Prokurorisë së Apelit, Anca Stan, në seancën e 6 shtatorit të kolegjit të Apelit, kishte deklaruar se përveç pretendimeve në ankesë nuk kishte çfarë të shtonte tjetër, por e njëjta kishte thënë se kërkesa e palës mbrojtëse që të përjashtohen disa nga provat kruciale janë të gabuara.

    Në prill të vitit 2014, Prokuroria Speciale e Republikës së Kosovës kishte ngritur aktakuzë ndaj Enver Sekiraqës për tri vepra penale, për nxitje në vrasjen e Triumf Rizës, “detyrim” dhe “dhunim”, ku për këtë të fundit, gjykata e shkallës së parë e kishte shpallur të pafajshëm.

    Prokuroria pretendon se incidenti i ndodhur në “Swiss Casino” në mes të Sekiraqës dhe Rizës ishte njëri nga motivet që çuan në vrasjen e Triumf Rizës.

    Incidenti në “Swiss Casino”, kishte ndodhur në dhjetorin e vitit 2006, ndërsa në të ishin të përfshirë Enver Sekiraqa dhe disa shoqërues të tij në njërën anë, dhe i ndjeri Triumf Riza e Arben Selmani në anën tjetër. Në këtë incident i plagosur rëndë kishte mbetur Arben Selmani.

    Triumf Riza u vra më 30 gusht të vitit 2007, vrasje për të cilën Arben Berisha është dënuar me 35 vjet burg, ndërsa Enver Sekiraqa ishte dënuar me 37 vjet burgim. /BetimipërDrejtësi

  • ​Hoti: Në tri vitet e fundit shënohet regres në zhvillimin ekonomik e social

    ​Hoti: Në tri vitet e fundit shënohet regres në zhvillimin ekonomik e social

    Deputeti i Lidhjes Demokratike të Kosovës, Avdullah Hoti, tha se lufta e Qeverisë në tri vitet e fundit ndaj mediave, sindikatave, bizneseve dhe ndaj çdokujt që ka qenë kritik ka degraduar demokracinë në vend, zhvillimin ekonomik dhe për barazinë sociale.

    Reagimi i Hotit, vjen pasi Organizata “Reporterët Pa Kufij” ka publikuar Indeksin Botëror të Lirisë së Shtypit me ç’rast Kosova ka zënë vendin e 75 për dallim nga viti i kaluar që ishte në të 56-të, duke shënuar kështu rënie për 19 vende.

    “E kemi ngritur këtë shqetësim në vazhdimësi. Tani po dëshmohet nga tri raporte ndërkombëtare, të cilat i pranuam këto ditë: nga Departamenti Amerikan i Shtetit, nga Freedom House dhe së fundmi nga “Reporterët pa Kufij”. Secili raport më negativ se tjetri. Ky i fundit, që merret me lirinë e mediave, na rendit për 19 pozita më poshtë. E vërteta është se që nga shpallja e pavarësisë, Kosova është ballafaquar me sfida në ndërtimin e institucioneve të qëndrueshme, në luftimin e korrupsionit, në fuqizimin e mediave dhe shoqërisë civile dhe në avancimin e dialogut social”, ka shkruar Hoti.

    Sipas tij nga viti në vit është shënuar progres dhe Kosova ka qenë e renditur ndër vendet me demokracinë më funksionale në rajon. Derisa sipas Hotit në tri vitet e fundit, është shënuar regres në çdo dimension të zhvillimit ekonomik e social.