Blog

Zyra Kombëtare e Auditimit ka evidentuar disa parregullsi në Ministrinë e Arsimit, në veçanti për proceset e vlerësimit të tenderëve. Sipas Auditorit, në aktivitetin e prokurimit “Projektimi i çerdhes tipike të parafabrikuar për 80 fëmijë’’, vlerësimi i ofertave ishte kryer me 16 ditë vonesë përtej afateve ligjore duke i marrë për bazë edhe afatet shtesë.

“Procesi i hapjes së ofertave u zhvillua më 17.07.2023, ndërsa vlerësimi u përfundua me 21.09.2023”, thuhet në Raportin e Auditimit për Pasqayrat Financiare Vjetore të Ministrisë së Arsimit, Shkencës, Teknologjisë dhe Inovacionit për vitin 2023.

Po ashtu në dosjen e tenderit “Furnizimin me lëndë të parë dhe paisje të profilit të floktarisë, estetikës për kryerjen e praktikës profesionale”, te kapacitetet teknike dhe profesionale është kërkuar që operatorët ekonomik pjesëmarrës të kenë kontrata për furnizime të ngjashme, në tri vitet e shkuara.

“Nga lista e kontratave të realizuara që kishte ofruar operatori fitues vërehet që furnizimet nuk e kishin natyrën e ngjashme (aktivitet kryesor kishin botimin dhe shtypjen e materialeve). Komisioni i vlerësimit nuk e kishte parandaluar këtë mangësi dhe këtë kriter e kishte konsideruar si të përmbushur. Kontrata ishte lidhur me datë 09.08.2023 në vlerë 117,000 euro”, thuhet në raport.

Sipas ZKA-së shkaku kryesor i këtyre mangësive ishte mosfunksionimi i kontrolleve të brendshme dhe mungesa e kujdesit të duhur gjatë procesit të vlerësimit dhe dhënies së kontratës.

Ndikimi vonesat në vlerësim të tenderëve përveç anashkalimit të rregullave kanë ndikuar edhe në vonesat në lidhje të kontratave e rrjedhimisht në shtyrjen e furnizimeve dhe marrjen e shërbimeve.

“Po ashtu, vlerësimi jo në përputhje të plotë me kriteret në dosje mund të rezultojë në zgjedhjen e ofertuesve të cilët më pas mund të mos jenë në gjendje të përmbushin detyrimet e kontratës në kohën e duhur dhe me cilësinë e pritur”, thuhet më tej në raport.

Në rekomandimin e ZKA-së thuhet se ‘Ministrja duhet të sigurojë një monitorim efektiv përmes menaxherit të prokurimit se vlerësimi i ofertave përfundohet brenda afateve të përcaktuara duke mundësuar që furnizimet të merren në kohën e paraparë. Po ashtu, vlerësimet e ofertave duhet që të realizohen në përputhje të plotë me kriteret për kapacitetet teknike dhe profesionale të kërkuara në dosjen e tenderit”.

Ky raport ka rezultuar me nëntë rekomandime, prej tyre pesë janë rekomandime të reja, tri të përsëritura dhe një pjesërisht të përsëritur.

Kryetari i Kuvendit të Kosovës, Glauk Konjufca, po pret në takim homologen e saj nga Sllovenia, Urška Klakočar Zupančič.

Pas takimit, Konjufca dhe kryetarja e Kuvendit të Sllovenisë, Zupančič do të mbajnë konferencë për media.

Kryeparlamentarja sllovene do të takohet edhe me presidenten, Vjosa Osmani.

Kryeministri i Shqipërisë, Edi Rama ka shkruar se vdekja e shkrimtarit Ismail Kadare është lajm i trishtueshëm, pasi që nga mesi ynë u largua monumenti më i madh i kulturës shqiptare.

Rama, përmes një postimi në profilin e tij në rrjetin social Facebook ka shkruar se Kadare tanimë u ngjit në piedestalin e përjetësisë.

Kryeministri Rama, ka thënë se tanimë nuk i vjen asnjë fjalë në mend, por ribotimi i mesazhit qe ia ka publikuar për ditëlindjen e tij.

Postimi i tij i plotë:

Sapo mësova lajmin e trishtueshëm të largimit nga mesi ynë të monumentit më të madh të kulturës shqiptare, i cili tanimë u ngjit në piedestalin e përjetësisë dhe asnjë fjalë s’më vjen në këtë moment, po vetëm ideja e ribotimit të këtij mesazhi të publikuar për ditëlindjen e tij.

“Duke shkruar për të këtë urim, më erdhi në mend se sa shumë njerëz kanë marrë penën që të bëjnë libra, dizertacione, mastera, doktoratura, referate, artikuj, shkrime, jetëshkrime e shkarrashkrime, me ditirambe, vlerësime e deri edhe ofendime, për librat e tij e për të vetë dhe se sa pak gjasë ka, që vargmalet e letrave të tyre të kenë një fat më të mirë se sa kështjellat e rërës, që kalamajtë ngrenë buzë detit, duke parafytyruar heronjtë e përrallave e të balladave apo bajlozët e gogolët e kërcënimeve të dëgjuara përpara gjumit.

Dhe me këtë mendim po e le këtë shënim (që të njëjtin fat me ato kështjella do të ketë) me një falenderim të thjeshtë, pa pretenduar asgjë më shumë se sa shprehjen e mirënjohjes së madhe ndaj Ismailit për monumentin fantastik që i ka ngritur gjuhës shqipe, duke ma bërë edhe më të madhe dashurinë për këtë gjuhë të hatashme, të cilën ne shqiptarët kemi fatin të flasim e të shkruajmë si gjuhë amtare; për kënaqësinë e jashtëzakonshme të udhëtimeve në botën e ngjarjeve, personazheve, emocioneve që ai ka jetësuar me lehtësinë e një magjistari, nxjerrë në dritë fuqinë e një ekzorcisti dhe magazinuar me saktësinë e një gjirokastriti; për hidhërimet që u ka shkaktuar mediokërve e për buzëplasjen që u ka provokuar xhelozëve me suksesin e tij jehues në dhjetra gjuhë të kësaj bote, e patjetër edhe për debatin e pambarimtë mes barrikadave, ku janë rreshtuar përballë tash 30 vjet, admiruesit e shkrimtarit dhe gjykatësit e qytetarit a thjesht njeriut Ismail Kadare – ku unë vetë kam mësuar e kuptuar jo pak me kalimin e viteve…

Ah, krejt personale kjo, po edhe për Vladimir Majakovskin, gjeniun vullkanik të poezisë ruse, që po të mos ekzistonte Ismail Kadareja nuk do ta kisha njohur kurrën e kurrës dot, në një prej takimeve më të mahnitshme të jetës sime me letërsinë!

Po ndalem këtu dhe duke uruar sot bashkë me ditëlindjen e tij edhe që gojëdhana se Ismaili nuk shkruan më, të jetë vetëm një lojë e tij e radhës me personazhet e jetës reale, ku ai gjithnjë ka qenë si një i huaj me prejardhje e me pashaportë shqiptare, fjalën e fundit të këtij urimi ia le Majakovksit të shqipëruar prej Kadaresë:

“Mendimin tuaj,

që ëndërron në trurin e butë,

si lakeu i dhjamur në kanapenë me zdral,

do ta tall me zhelen e përgjakur të zemrës;

gjersa të ngopem, idhnak e brutal.”

Tani nuk është më gojëdhanë, Ismaili nuk shkruan më💔

Agjencia e Statistikave të Kosovës (ASK) ka njoftuar të gjithë regjistruesit e angazhuar gjatë Regjistrimit të Popullsisë (ReKos2024) se ka formuar një Komision që do të merret me shqyrtimin e të gjitha ankesave rreth pagesave për periudhën e angazhimit për punën në terren.

Sipas njoftimit, meqenëse ASK-ja ka pranuar disa ankesa rreth mënyrës së pagesave, Komisioni do të merret me verifikimin në sistem të secilit regjistrues dhe pyetësorëve të aprovuar nga sistemi, në mënyrë që të vërtetohet ndonjë lëshim teknik që ka mund të ndodhë.

“Në bazë të ankesave të pranuara deri më tani, shihet se ka një keqkuptim nga regjistruesit rreth mënyrës së kompensimit ndërmjet pagës bruto dhe neto, mënyrës së përllogaritjes së pyetëosrëve të plotësuar, si dhe në disa raste për ato intervista që sistemi i ka klasifikuar si intervista jo të rregullta. Sidoqoftë, ASK-ja do të veprojë sipas të gjitha procedurave dhe në bazë kontratës. Nëse verifikohet ndonjë lëshim teknik eventual, kompensimi i mjeteve do të kryhet menjëherë. Të gjitha ankesat mund të parashtrohen te Departamenti i Administratës së ASK-së në email: [email protected]”, thuhet në njoftim.

Policia ka njoftuar se janë hequr posterët dedikuar Vuçiqit që ishin vendosur në Zveçan të shtunën në mesnatë.

Ato do të përdoren si prova materiale derisa rasti po hetohet.

“Është raportuar se persona të panjohur nëpër mure të ndërtesave kanë vendosur pamflete me mbishkrime. Pamfletet janë tërhequr nga vendet ku janë vendosur si provë materiale. Rasti nën hetime.”

Në mbishkrimin e posterëve shkruhej se mezi po pritej ardhja e presidentit serb në Kosovë.

Për këto banderola reagoi të dielën ministri i Brendshëm i Kosovës, Xhelal Sveçla, i cili tha se nëse Vuçiq është nisur drejt Kosovës pa kërkesë te Ministria e Jashtme, do të arrestohet.

“I paskan ngjitur tinëz gjatë natës disa postera në veri të Kosovës. Aty thonë që po e presin presidentin e Serbisë të vijë duke e quajtur atë ‘komandant’. Nëse është nisur pa kërkesë te Ministria jonë e Punëve të Jashtme dhe Diasporës, edhe ne po e presim të vijë dhe mandej mund ta vizitoni në burg, ku ai i ka tashmë disa miq të tij”, ka shkruar ministri në profilin e tij në Facebook të dielën.

Shkrimtari Ismail Kadare ka vdekur sot në mëngjes, në moshën 88-vjeçare.

Burime pranë Qendrës Spitalore Universitare “Nënë Tereza” në Tiranë i thanë Radios Evropa e Lirë se Kadare “pësoi arrest kardio-respirator”.

Kadare lindi në vitin 1936 në Gjirokastër – një qytet i vogël në malet e jugut të Shqipërisë.

Qyteti i tij, për të cilin shkroi romanin “Kronikë në Gur”, bën pjesë në trashëgiminë botërore që mbron UNESCO-ja.

Tridhjetë vjet të karrierës së shkrimtarit, Kadare i jetoi në Shqipërinë komuniste, ku edhe shkroi kryeveprat: “Gjenerali i ushtrisë së vdekur”, “Prilli i thyer”, “Dimri i madh” e “Ura me tri harqe”.

“Gjeneralin e ushtrisë së vdekur”, gazeta amerikane Boston Globe e përshkroi si “roman të fuqishëm dhe prekës”.

Ai, gjithashtu, hyri në 100 librat e shekullit të gazetës Le Monde.

Bën fjalë për historinë e një gjenerali italian, i cili shkon në Shqipëri pas Luftës së Dytë Botërore për të marrë trupat e ushtarëve italianë.

Kadare është “një nga romancierët më bindës që shkruan në çdo gjuhë”, shkroi Wall Street Journal për të.

Kryetari i Prishtinës, Përparim Rama pas vdekjes së shkrimtarit Ismail Kadare, ka shkruar se fjalët e këtij të fundit i kapërcyen kufijtë gjuhësorë dhe folën me vetë shpirtin e njerëzimit.

Rama përmes një postimi në profilin e tij në rrjetin social Facebook, ka shkruar se zotësia e pashoq e Kadaresë për t’i ndërthurë historinë, kulturën dhe identitetin shqiptar në veprat e veta, bënë që bota mbarë ta njohë palcën e njeriut tonë

“Me hidhërim të thellë shënojmë ndarjen nga jeta të Ismail Kadaresë, të këtij kolosi letrar, fjalët e të cilit i kapërcyen kufijtë gjuhësorë dhe folën me vetë shpirtin e njerëzimit. Zotësia e pashoq e Kadaresë për t’i ndërthurë historinë, kulturën dhe identitetin shqiptar në veprat e veta, bënë që bota mbarë ta njohë palcën e njeriut tonë. Pena e tij na udhëhoqi nëpër kapitujt më të errët të jetës sonë, duke na u bërë jo vetëm pasqyrë e vuajtjeve, por dhe dritë drejt synimit tonë kolektiv”, ka shkruar Rama.

Sipas Ramës, me vdekjen e Kadaresë sot bota është me zymtë.

“Ndërsa vajtojmë humbjen e njeriut, njohim trashëgiminë e gjeniut, që do të vazhdojë të na frymëzojë për shumë breza me radhë. Sot, bota është më e zymtë, por ylli i rrëfimeve të Kadaresë do të ndriçojë përgjithmonë në zemrat tona”, ka shkruar ndër të tjera kryetari Rama.

“Prehu në paqe, i dashur Kadare, zëri yt do të jehojë përjetësisht”, përfundon ai.

Dhjetra punonjës të aeroportit të Melburnit janë akuzuar se kanë punuar për kriminelët e organizuar që përpiqeshin të kontrabandonin drogë në Australi. Punëtorët e aviacionit ishin subjekt i një hetimi të Forcave Kufitare që synonte kriminelët në zinxhirët e furnizimit të aeroportit.

Hetimi zbuloi se 70 punonjës në aeroportin e Melburnit kishin shkelur kontrollet e sigurisë gjatë 12 muajve të fundit, me disa të dyshuar se punonin brenda krimit të organizuar.

Sipas Forcave Kufitare, ekuipazhi i linjës ajrore u angazhua në përdorimin e paligjshëm të drogës, si dhe në shpërndarjen e drogave të paligjshme në Australi.

Anëtarët e ekuipazhit të linjës ajrore ndërkombëtare u zbuluan gjithashtu se kishin fshehur cigare dhe produkte duhani ilegale në valixhe. Kjo dyshohet se është bërë në përpjekje për të shmangur pagesën e shumave të konsiderueshme të tatimit doganor.

Dy anëtarë të ekuipazhit ndërkombëtar u zbuluan se ishin nën ndikimin e substancave të paligjshme gjatë detyrës./The Guardian