ATV

Blog

  • Gift: Gara mes Trumpit dhe Harrisit do të ishte e ngushtë

    Gift: Gara mes Trumpit dhe Harrisit do të ishte e ngushtë

    Gara presidenciale në SHBA mes republikanit Donald Trump dhe demokrates Kamala Harris – nëse kjo e fundit konfirmohet – do të jetë e ngushtë, thotë Thomas Gift, drejtor i Qendrës për politikat amerikane në Kolegjin Universitar të Londrës.

    Në një intervistë dhënë Radios Evropa e Lirë, ai thotë se rezultati do të varet nga një përqindje e vogël votash në shtetet si: Ohajo, Pensilvania, Miçigeni, Uiskonsini, Xhorxhia dhe Arizona.

    Presidenti aktual, Joe Biden, njoftoi më 21 korrik se tërhiqet nga gara e nëntorit, duke i dhënë mbështetje zëvendëses së tij, Kamala Harris.

    Nga tabori republikan, ish-presidenti Donald Trump pranoi nominimin javën e kaluar, ndërsa Konventa e Partisë Demokratike, ku do të konfirmohet kandidati/ja demokrat/e, do të mbahet në gusht.

  • ​Shpërthimi në afërsi të Ujmanit, policia kryen një bastisje në Zubim Potok

    ​Shpërthimi në afërsi të Ujmanit, policia kryen një bastisje në Zubim Potok

    Policia e Kosovës ka njoftuar se në vazhdën e hetimeve në lidhje me rastin shpërthimit në afërsi të Ujmanit, rreth orës 21.00 ka bastisur një shtëpi në zonën e Zubin Potokut.

    Zëvendësdrejtori i Policisë së Kosovës për rajonin e veriut, Veton Elshani i ka thënë KosovaPress-it se gjatë bastisjes policia ka has dhe ka sekuestruar në mes tjerash edhe tri radiolidhje dhe një veturë.

    “Nuk kemi persona të arrestuar, ndërsa policia ka identifikuar një person i cili për neve është me interes për intervistim”, tha ai.

    Dje në orët e pasdites është hedhur një mjet shpërthyes afër Liqenit të Ujmanit.

    Zëvendësdrejtori i Policisë së Kosovës për rajonin e veriut të Mitrovicës Veton Elshani ka konfirmuar për KosovaPress se rasti ka ndodhur rreth orës 14:30.

    “Nga ky shpërthim janë dëmtuar së paku dy vetura, por ende nuk dihet lloji i mjetit shpërthyes. Nuk ka të lënduar. Policia ka dalë në vendi e ngjarjes për hetime”, ka thënë ai.

    Ndwkrohw, ka reaguar edhe kryeministri Albin Kurti, duke thënë se institucionet e sigurisë do të zbulojnë aktorin apo aktorët e këtij sulmi kriminal dhe do t’i sjellin para drejtësisë.

  • ​14 vjet nga vendimi i Gjykatës Ndërkombëtare pro pavarësisë së Kosovës

    ​14 vjet nga vendimi i Gjykatës Ndërkombëtare pro pavarësisë së Kosovës

    Sot mbushen 14 vjet kur Gjykata Ndërkombëtare e Drejtësisë në Hagë ka shpallur vendimin këshillëdhënës, sipas të cilit deklarata e shpalljes së pavarësisë së Kosovës nuk ka shkelur të drejtën ndërkombëtare.

    Me 10 vota pro dhe 4 kundër anëtarët e Gjykatës Ndërkombëtare të Hagës kishin vendosur në favor të Kosovës, duke refuzuar kështu kërkesën e Serbisë për shkelje të së drejtës ndërkombëtare.

    Vendimi ishte lexuar nga Presidenti i Gjykatës Ndërkombëtare të Drejtësisë në atë kohë, Hiasashio Ovada.

    Kosova shpalli pavarësinë më 17 shkurt të vitit 2008.

  • ​18 vjet nga vdekja e Shuteriqit

    ​18 vjet nga vdekja e Shuteriqit

    Dhimitër Shuteriqi është një nga prozatorët, poetët dhe studiuesit më produktiv të letërsisë shqipe. Lindi në Elbasan më 1915 dhe ka vdekur më 22 korrik të vitit 2003.

    Ishte nga një familje intelektuale, i biri i Simon Shuteriqit, pjesëmarrës në Kongresin e Manastirit dhe atë të Elbasanit, si dhe një ndër themeluesit e Normales.

    Mori pjesë në Luftën Antifashiste Nacionalçlirimtare dhe pas Çlirimit në jetën kulturore dhe letrare të vendit.

    Dhimitri ndoqi mësimet në Liceun e Korçës dhe më pas shkollimin e lartë e ndoqi në Universitetin e Grenoblit dhe Lionit, në Francë. Më 1942-1943 jepte mësim në Elbasan, më 12 maj 1943 u zgjodh sekretar i këshillit krahinor nacionalçlirimtar për komitetin qarkor të Elbasanit.

    Më 2 mars 1946 në Drejtorinë e Shtypit dhe Propagandës pranë Ministrisë së Shtypit, Propagandës e Kulturës Popullore, u krijua një komision që ngarkohej për t’u dhënë liri qarkullimi librave të botuar deri në atë kohë në Shqipëri, pjesë e të cilit ishte edhe Shuteriqi si punonjës i Lidhjes së Shkrimtarëve.

    Në vitet 1950-1974 ishte kryetar i Lidhjes së Shkrimtarëve dhe Artistëve. Ka filluar të shkruajë që në vitet ’30.

    Fusha kryesore e veprimtarisë së tij krijuese është proza, romani, por sidomos tregimi, ku shquhet si një nga lëvruesit më të mirë të tij.

    Si studiues ka punuar sidomos në fushën e historiografisë letrare, si një ndër autorët krye­sore të teksteve e të veprave përgjithësuese për historinë e letërsisë shqiptare, i monografive të veçanta si dhe i punimeve për historinë e kulturës shqiptare, për folklorin e filologjinë. Veç kësaj Dhimitër Shuteriqi është marrë edhe me publicistikë.

    Dhimitër Shuteriqi ka lënë në dorëshkrim një varg veprash të përfunduara. Është dekoruar me “Urdhrin e Flamurit”; ka marrë Çmimin e Republikës së Shkallës së Parë.

  • ​Wiley Post, aviatori që bëri fluturimin e parë vetëm rreth botës

    ​Wiley Post, aviatori që bëri fluturimin e parë vetëm rreth botës

    Aviatori amerikan Wiley Post më 22 korrik 1933, përmbushi fluturimin e parë vetëm rreth botës.

    Fluturimi në avionin me një motor mbuloi një itinerar prej 25 mijë kilometrash dhe zgjati 7 ditë, 18 orë dhe 45 minuta.

    Historiani i aeronautikës Robert van der Linden, thotë se gjatësia e fluturimit të Post nuk ishte e vetmja arritje

    “Më e rëndësishmja, të paktën e parë nga këndvështrimi ynë, ishte aftësia e tij për të përdorur aparaturat në avion, veçanërisht, drejtuesin automatik, si dhe pajisjen radiofonike për orientim, e cila e ndihmonte shumë në drejtimin e avionit. Pa dyshim, përdorimi i drejtuesit automatik ia lehtësonte së tepërmi punën gjatë fluturimit”.

    Wiley Post humbi jetën në një përplasje avioni pranë Barrow, Alaska, më 15 gusht 1935.

  • ​Gara e parë me motor para 130 vjetësh

    ​Gara e parë me motor para 130 vjetësh

    Gara e parë motor është zhvilluar në Francë më 22 korrik të vitit 1894, mes qyteteve Paris dhe Rouen.

    Shpejtësia maksimale e garës arriti 25 km në orë. Ishte një kohë kur nuk kishte shumë makina, dhe ata që i zotëronin ishin amatorë të pasur që konkurronin me makinat më të reja dhe më të shpejta në planet.

    Në vitin 1900, Franca kishte më shumë makina, makinat më të shpejta dhe shoferët më të shpejtë. Si vend sapo kishte fituar kampionatin e parë ndërkombëtar të garave me makina, Kupën inauguruese Gordon Bennet, jo se kishte shumë konkurrencë. Hynë pesë ekipe. Tre ishin francezë. Sa i përket Lojërave Olimpike 1900, pati një garë të madhe automobilistike dhe ajo u fitua nga një shofer francez me një makinë franceze.

    Makinat ishin një punë e madhe dhe praktikisht i nisën lojërat në maj, e vetmja ngjarje para tyre ishte gardh. Salla të shumta të mëdha të Exposition Universelle, e njohur gjithashtu si Ekspozita e Parisit 1900, ose panairi botëror, ishin të mbushura plot me makina, kryesisht franceze, duke tërhequr shumë vizitorë. /KP/

  • ​Tërheqja e Bidenit pritet të dominojë takimin e BE-së

    ​Tërheqja e Bidenit pritet të dominojë takimin e BE-së

    Njoftimi i presidentit të Shteteve të Bashkuara, Joe Biden, për tërheqjen nga gara presidenciale pritet të dominojë një takim të ministrave të Jashtëm të Bashkimit Evropian, që mbahet sot.

    Temat kryesore të planifikuara janë konfliktet e vazhdueshme në Ukrainë dhe në Lindjen e Mesme, por vendimi i Bidenit ka të ngjarë t’i lërë ato nën hije.

    Biden i dha mbështetje zëvendëses së tij, Kamala Harris, për të garuar në zgjedhjet e nëntorit kundër rivalit republikan dhe ish-presidentit, Donald Trump.

    Megjithatë, vendimin përfundimtar për kandidatin do ta marrë Partia e tij Demokratike.

    Marrëdhëniet midis Bashkimit Evropian dhe Shteteve të Bashkuara u përkeqësuan gjatë mandatit të parë të Trumpit si president, i cili zgjati nga viti 2017 deri më 2021.

    Në një pjesë të madhe të BE-së tani ka frikë se një mandat i dytë i tij do të mund të ketë pasoja të gjera për luftën në Ukrainë, për tregtinë globale dhe për sigurinë evropiane në përgjithësi.

    Megjithatë, jo të gjitha kryeqytetet e BE-së i ndajnë këto shqetësime.

    Kryeministri polak, Donald Tusk, e lavdëroi Bidenin për, siç shkroi në X, “vendimet e shumta të vështira, falë të cilave Polonia, Amerika dhe bota janë më të sigurta dhe demokracia është më e fortë”.

    Por, Geert Wilders, udhëheqës i ekstremit të djathtë në Holandë, postoi një fotografi që e tregonte Trumpin me grusht të ngritur, pas atentatit kundër tij, së bashku me fjalët “President Trump”.

    Vëmendja ka të ngjarë të përqendrohet edhe te kryeministri hungarez, Viktor Orban, i cili u takua me Trumpin këtë muaj./REL/

  • ​Moti sot me diell dhe pjesërisht i vranët

    ​Moti sot me diell dhe pjesërisht i vranët

    Instituti Hidrometeorologjik i Kosovës ka njoftuar se të hënën do të mbajë mot me diell dhe pjesërisht i vranët.

    Sipas IHMK temperaturat minimale do të lëvizin ndërmjet 15-19 gradë Celsius, ndërsa maksimalet e ditës 29-33 gradë Celsius.

    “Do të fryjë erë e lehtë deri mesatare nga drejtimi i veriperëndimit”, thuhet në njoftim.

  • ​Policia jep detaje nga aksidenti me fatalitet në Podujevë

    ​Policia jep detaje nga aksidenti me fatalitet në Podujevë

    Policia e Kosovës ka njoftuar se të dielën në Podujevë një person i cili ishte duke vozitur, dyshohet se nga pakujdesia e ka goditur biçikletën me vozitës.

    Si pasojë viktima ka ndërruar jetë.

    “Është raportuar se i dyshuari mashkull kosovar derisa ishte duke ngarë veturën e tij, dyshohet se nga pakujdesia e godet biçikletën me vozitës mashkull kosovar. Si pasojë viktima ka ndërruar jetë në vendin e ngjarjes”, thuhet në raportin e policisë.

    Lidhur me rastin i dyshuari sipas policisë është arrestuar dhe pas intervistimit me vendim të prokurorit është dërguar në mbajtje.

  • Tetë të lënduar në aksidentin në autostradën “Ibrahim Rugova”

    Tetë të lënduar në aksidentin në autostradën “Ibrahim Rugova”

    Një aksident trafiku mes katër veturave ka ndodhur pasditen e së dielës në autostradën ‘Dr.Ibrahim Rugova’. Sipas zëdhënësit të policisë, Daut Hoxha, aksidenti ka rezultuar me tetë persona të lënduar.

    “Aksidenti ndodhi rreth orës 18:40 në kilometrin e 40-të të autostradës ‘Dr. Ibrahim Rugova’. Katër automjete me targa vendore janë përfshirë në këtë aksident. Sipas informatave fillestare, tetë persona janë raportuar të lënduar”, tha Hoxha.

    Hoxha theksoi se aksidente të tilla shpesh kanë pasoja të rënda, duke apeluar për kujdes të shtuar nga drejtuesit e automjeteve.

    “Rastet të tilla të aksidenteve shpesh po rezultojnë me fatalitet, andaj apelojmë tek drejtuesit e automjeteve të jenë më të kujdesshëm dhe të respektojnë rregullat në trafik. Policia me njësitë e saj po ndërmerr dhe do të ndërmarrë masa rigoroze ndaj kundërvajtësve që shkelin rregullat në trafik”, shtoi ai.

    Njësitë policore kanë qenë në vendin e ngjarjes dhe po hetojnë shkaqet e aksidentit, ndërkohë që personat e lënduar janë dërguar për trajtim mjekësor.