Blog

Presidentja Vjosa Osmani ka njoftuar se sot në mëngjes është takuar me Dukën e Madh të Luksemburgut Henri dhe Dukeshën e Madhe Maria Teresa.

Temë bisede mes tyre ishte mbështetja për të mbijetuarit e dhunës seksuale gjatë luftës dhe bashkimi i zërave për këtë kauzë.

“Fuqizimi dhe mbështetja e të mbijetuarave të dhunës seksuale gjatë luftës ishte në fokus të diskutimeve tona në një mëngjes të përzemërt sot në Paris me Dukën e Madh të Luksemburgut Henri dhe Dukeshën e Madhe Maria Teresa. Bashkimi i forcave dhe zërave tanë për të fuqizuar zërin e të mbijetuarve, do të fuqizojë edhe kauzën tonë të përbashkët për drejtësi”, tha ajo.

Osmani po qëndron në Paris për Lojërat Olimpike e ftuar nga presidenti i Francës.

Dorëheqja e Lindita Nikollës nga pozita e kryetares së Kuvendit të Shqipërisë ka nxitur reagimin e kryetarit të Kuvendit të Kosovës, Glauk Konjufca.

Konjufca në një postim në Facebook shkruan se me Nikollën kanë pasur bashkëpunim të shkëlqyer.

“Si nga pikëpamja njerëzore e miqësore, ashtu edhe nga pikëpamja institucionale, shpreh keqardhje të thellë për dorëheqjen e papritur të znj. Lindita Nikolla nga funksioni i saj i Kryetares së Kuvendit të Shqipërisë.

Bashkëpunimi ynë i shkëlqyer do të shërbejë si referencë e një kriteri shumë të lartë të vendosur në lidhje me raportet tona institucionale. Ky kriter nuk do të mund të kthehet më pas, por vetëm të rritet dhe thellohet më shumë”, shkruan Konjufca.

Sipas tij, përvoja, komunikimi, profesionalizmi dhe korrektësia e znj. Lindita Nikolla ishin të dhëna të rëndësishme të cilat mundësuan një thellim të raporteve tona, ashtu siç i ka hije institucioneve legjislative të dy shteteve tona vëllazërore.

“Gjatë përpjekjeve tona të përbashkëta arritëm të organizojmë për herë të parë seancën e përbashkët mes parlamenteve tona, u rrit në mënyrë të shkëlqyeshme puna mes komisioneve parlamentare, e ngushtuam edhe më tej largësinë mes nesh përmes organizimeve të përbashkëta sportive dhe kulturore, patëm në nivel të lartë gatishmërinë për bashkëpunim shembullor në aspektet honorifike dhe solemne, ashtu siç edhe në ato të frymës së harmonizimit të kornizës legjislative në dobi të popullit tonë dhe qytetarëve tanë.

Homologes, mikes, motrës sime të dashur Lindita Nikolla, i uroj nga zemra shëndet dhe suksese në angazhimet e saj të mëpasshme, të cilat jam i bindur se do t’i vijojë me profesionalizëm të lartë dhe i uroj shëndet të plotë.

Jam i lumtur që pata mundësinë të punoj me znj. Nikolla dhe dua ta falënderoj që me punën dhe qasjen e saj vendosi një obligim të domosdoshëm për çdo kryetar kuvendi të ardhshëm në vendet tona, atë të bashkëpunimit të pakursyer, me dashamirësi, mirëbesim dhe angazhim maksimal”, shkruan ai. /Telegrafi/

Në kujtim dhe nderim të sakrificës së 23 pjesëtarëve të Policisë së Kosovës të rënë në kryerje të detyrës, objekti i Qeverisë së Kosovës mbrëmë është ndriçuar me emrat e tyre.

Kryeministri i vendit, Albin Kurti në një postim në Facebook shkruan se në shënim të Ditës Memoriale të Policëve të Rënë në Kryerje të Detyrës, të premten në mbrëmje ndërtesa e Qeverisë u ndriçua me emrat e 23 heronjve të ditëve tona, që dëshmuan përkushtimin për rend dhe ligj deri në sakrificë.

“Atyre u takon lavdia e përjetshme, neve shërbimi i përditshëm. Republika e Kosovës është gjithmonë krenare me ju”, shkruan Kurti.

Ndërkaq, për këtë ka shkruar edhe ministri i Punëve të Brendshme, Xhelal Sveçla.

“Republika e Kosovës është gjithmonë krenare me ju”, shkruan ai. /Telegrafi

Kamala Harris ka firmosur zyrtarisht deklaratën, për t’u shpallur kandidate për presidente në zgjedhjet që do të mbahen në nëntor.

Ajo përmes një postimi në rrjetet sociale ka thënë se do të luftoj për çdo votë.

“Sot firmosa formularët ku deklaroj zyrtarisht kandidaturën time për President të Shteteve të Bashkuara. Do të punoj shumë për të fituar çdo votë.

Kujtojmë se Harris u shpall kandidate nga Joe Biden, i cili u tërhoq nga gara për një mandat të dytë si president në krye të SHBA-ve.

Harris do të garojë përballë Donald Trump i cili po lufton të fitojë sërish presidencën.

Një qytetar nga Kosova dyshohet se ka humbur jetën në vendin e quajtur “Maja e Thatë” në Valbonë, raporton Sinjali.

Ai dyshohet se ra në greminë nga një lartësi për shkak të terrenit të thepisur malor.

Në ndihmë u ka dalë edhe Shërbimi i Kërkim-Shpëtimit Malor të Kosovës.

ShKShMK ka njoftuar pak më parë se së bashku me autoritetet shqiptare po vazhdojnë kërkimin për gjetjen e alpinistit kosovar.

“ShKShMK së bashku me autoritetet Shqiptare vazhdon me operacionin e Kerkim-Shpetimit në majën e Thatë”, thuhet në njoftim.

Policia e Kosovës ka dhënë detaje lidhur me rastin e gjetjes së eshtrave të një njeriu në Podujevë, e që dyshohet të jenë nga lufta e fundit.

Gjetjet eshtërore janë tërhequr nga zyrtarët e Instituti të Mjekësisë Ligjore dhe janë dërguar për obduksion dhe identifikim.

“Podujevë Viti 1999. Drejtoria për Hetimin e Krimeve të Luftës, në bashkëpunim me Institutin e Mjekësisë Ligjore, kanë realizuar urdhëresën për ekshumim në një lokacion në komunën e Podujevës, ku janë hasur gjetje eshtërore që besohet se janë të trupit të njeriut dhe i përkasin periudhës së luftës së fundit”, thuhet në raportin e policisë.

Është ministrja e Drejtësisë, Albulena Haxhiu, e cila dje njoftoi se janë gjetur mbetje mortore në varrezat afër Tjegullores në Podujevë.

Ajo në një postim në Facebook, ka thënë se mbetjet dyshohet se i përkasin një individi që mund të jetë në listën e personave të zhdukur me dhunë nga lufta e fundit.

Sipas saj, gërmimet janë duke vazhduar ende në kërkim edhe të individëve të tjerë.

“Sot (dje), në varrezat afër Tjegullores në Podujevë, ekipet mjeko ligjore nga IML, me mbështetje nga EULEX, në bashkëpunim me Policinë e Kosovës dhe KQPZH, kanë arritur të lokalizojnë mbetjet mortore të një individi që dyshohet të jetë nga lista e personave të zhdukur me dhunë nga lufta e fundit. Gërmimet janë duke vazhduar ende në kërkim edhe të individëve të tjerë”, shkroi Haxhiu.

Presidenti turk, Recep Tayyip Erdogan dënoi Kongresin e Shteteve të Bashkuara për duartrokitjen e fjalimit të kryeministrit izraelit, Benjamin Netanyahu, të cilin ai e përshkroi si “plot delirium”.

“E gjithë bota shikoi dhe pa se si një vrasës gjenocidal u duartrokit në Kongresin amerikan. Mendoni për ata që vranë pothuajse 40 mijë fëmijë, gra dhe të moshuar. Dhoma e Përfaqësuesve i duartroket”, tha Erdogan.

Ai shtoi se bota po përballet me një humbje të arsyes pasi Kongresi pret një “kasap” që ka gjakun e 150 mijë banorëve të Gazës në duart e tij.

Izraeli është akuzuar për gjenocid përpara Gjykatës Ndërkombëtare të Drejtësisë (ICJ).

Kjo e fundit urdhëroi Tel Avivin të ndalonte menjëherë ofensivën ushtarake në Rafah në Gazën jugore, ku më parë kishin kërkuar strehim më shumë se një milion palestinezë.

Ndryshe, Netanyahu gjatë qëndrimit në SHBA ka takuar presidentin aktual, Joe Biden, ish-presidentin, Donald Trump si dhe kandidaten demokrate për president, Kamala Harris. /Telegrafi/

Policia ka njoftuar se një grua ka raportuar se kur është zgjuar nga gjumi ka vërejtur se vajza e saj shtatë muajshe ishte pa shenja jete.

Rasti ka ndodhur në Fushë Kosovë.

Në raportin 24 orësh të Policisë, thuhet se me urdhër të prokurorit trupi i pajetë është dërguar në Institutin e Mjekësisë Ligjore për obduksion.

“Një femër kosovare ka njoftuar se pasi është zgjuar nga gjumi ka vërejtur se vajza e saj 7 muajsh ishte pa shenja jete. Me urdhër të prokurorit trupi i pajetë është dërguar në IML për obduksion. Rasti në hetime”, thuhet në raportin 24 orësh të Policisë.