Blog

Dhomat e Specializuara kanë njoftuar se procesi gjyqësor ndaj ish-krerëve të UÇK-së, do të pauzojë për kohën e datave të përmendura për pushim veror.

Sipas DHSK-së, pushimi veror fillon nga sot 29 korrik dhe përfundon më 16 gusht, ndaj gjatë kësaj periudhe nuk do të mbahen seanca dhe disa nga shërbimet jothelbësore do jenë të minimizuara.

”Siç është njoftuar në kalendarin tonë, pushimi veror në DHSK fillon të hënën, më 29 korrik, dhe përfundon më 16 gusht 2024. Gjatë kësaj periudhe nuk mbahen seanca dhe disa nga shërbimet jothelbësore do të jenë në minimum. Megjithatë, gjykata mbetet plotësisht funksionale dhe puna vazhdon në të gjitha seksionet e DHSK-së. Gjatë pushimit mund të paraqiten parashtrime dhe përveç nëse gjykatësit kanë urdhëruar ndryshe, afatet gjyqësore vazhdojnë të jenë në fuqi”, thuhet në njoftim.

Ambasadori i Shteteve të Bashkuara të Amerikës në Kosovë, Jeffrey Hovenier e ka prezantuar Anu Prattipatin, duke publikuar një fotografi me të.

Hovenier shkroi se ajo do të jetë Zëvendës Shefe e Misionit në Ambasadën Amerikane.

“Kënaqësi ta mirëpres Anu Prattipatin në Kosovë si Zëvendës Shefe e re e Misionit në Ambasadën e SHBA-së. Mezi pres të punojmë së bashku për t’i avancuar marrëdhëniet e Kosovës dhe SHBA-së”, shkroi ambasadori amerikan në X.

Pleased to welcome Anu Prattipati to Kosovo as the new Deputy Chief of Mission at the U.S. Embassy. Looking forward to working together to advance 🇽🇰 and 🇺🇸 relations. pic.twitter.com/vlc8wb2EsE

— Ambassador Jeff Hovenier (@USAmbKosovo) July 29, 2024

Pas ministrit Murati, edhe ministrja e Drejtësisë, Albulena Haxhiu është ankuar që Gjykata Kushtetuese nuk e ka publikuar ende aktgjykimin e plotë për Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme.

Ajo ka pyetur se “edhe sa ditë të tjera i duhen Gjykatës Kushtetuese?”.

“Kanë kaluar më shumë se një muaj nga njoftimi i Gjykatës Kushtetuese për Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme por ende nuk është publikuar Aktgjykimi i plotë. Rrjedhimisht, po bëhen 518 ditë prej kur Gjykata e ka në trajtim këtë reformë të rëndësishme.”

Haxhiu ka thënë se “vonesat e tilla vazhdojnë të jenë goditja e radhës ndaj reformës dhe qytetarëve”.

Ndërkaq ministri i Financave, Hekuran Murati, pak më parë ka thënë se aktgjykimi i plotë për Ligjin për Pagën Minimale ende nuk është publikuar.

“Aktgjykimi i plotë për Ligjin për Pagën Minimale ende nuk është publikuar, megjithëse ka kaluar më shumë se një muaj që nga publikimi i njoftimit nga Gjykata Kushtetuese që konstaton se Ligji për Pagën Minimale nuk bie ndesh me Kushtetutën.”

Murati ka thënë se “janë me dhjetëra mijëra të punësuar që po e presin tash e një vit hyrjen në fuqi të këtij ligji, e me të edhe rritjen e pagës së tyre”.

“Sikur të mos mjaftonte vonesa prej 11 muajsh përgjatë shqyrtimit, ligji ende nuk është në fuqi për shkak të mos-publikimit të aktgjykimit të plotë”, ka shkruar ai.

Avokati Tomë Gashi ka bërë të ditur se sot nga ora 13:00 do të vazhdojë seanca ndaj dy të miturve për vrasjen e 18-vjeçarit nga Podujeva, Lulzim Fejzullahu.

Në një postim në Facebook, Gashi ka bërë të ditur se familja e tij janë në gjendje të rëndë emocionale.

“Tani pa Lulin gjendja e vëllait dhe motrës së tij është shumë e rënduar emocionalisht – shpirtnisht e që të jetë keq edhe ekonomikisht. Vëlla e motër ma nuk e kanë Lulin që me punë fizike i mbante gjallë”, ka shkruar Gashi.

Më tej, ai ka shtuar se është hapur një fond për t’i dalë në ndihmë familjes së Lulzimit, ndihma këto, sipas tij, i dedikohen vetëm motrës dhe vëllait të tij.

Në korrik të këtij viti, Gjykata e Apelit e ka kthyer për rigjykim çështjen e vrasjes së 18-vjeçarit. Ky vendim anulon aktgjykimin e Gjykatës Themelore në Prishtinë, me të cilin i mituri i parë ishte dënuar me 10 vjet burgim dhe i mituri i dytë me 9 vjet burgim.

Aktgjykimi i Apelit është marrë më 17 korrik 2024, me të cilin ka aprovuar si të bazuara ankesën e mbrojtësit të të miturit të parë, avokatit Skender Musa dhe mbrojtësit të të miturit të dytë, avokatit Florent Latifaj.

Sipas vlerësimit të kolegjit të gjyqtarëve të Gjykatës së Apelit, qëndron pretendimi i avokatit Musa se kryetarja e trupit gjykues, Lumnije Krasniqi ka qenë gjyqtare e procedurës paraprake në të njëjtin rast penal. Apeli vlerëson se gjyqtarja Krasniqi është dashur të përjashtohet nga gjykimi i kësaj çështjeje penale.

Në vendimin e Apelit theksohet se gjykatësja për të mitur në fazat paraprake ka marrë pjesë në këtë cështje penale në procedurën përgatitore, duke ua caktuar dhe vazhduar masën e paraburgimit dy të miturve. Aty thuhet se e njëjta me rastin e vendosjes në këtë cështje penale ka marrë pjesë dhe ka vendosur në cilësinë e kryetares së trupit gjykues.

Ministri i Jashtëm i Shqipërisë, Igli Hasani, e ka pritur të hënën homologun e Bosnje-Hercegovinës, Elmedin Konakoviq.

Në një konferencë për media që ata kanë mbajtur sot Hasani ka bërë të ditur se kanë diskutuar për Kosovën, sigurinë rajonale dhe Bashkimin Evropian.

Ai ka thënë se ka kërkuar një rivlerësim të qëndrimit lidhur me anëtarësimin e Kosovës në nismat rajonale apo edhe nismat që kanë të bëjnë me shkëmbimet ndërnjerëzore mes Bosnjë-Hercegovinës dhe Kosovës.

“Shqipëria dhe Bosnjë-Hercegovina ndajnë një qasje të njëjtë në drejtim të forcimit të bashkëpunimit rajonal dhe në këtë kuadër i shpreha mikut tonë boshnjak kërkesën për një rivlerësim të qëndrimit lidhur me anëtarësimin e Kosovës në nismat rajonale apo edhe nismat që kanë të bëjnë me shkëmbimet ndërnjerëzore mes Bosnjë-Hercegovinës dhe Kosovës, si dy vende fqinje, por edhe si realitete gjeopolitike të shekullit të ri në funksion të paqes dhe stabilitetit në hapësirën tonë të përbashkët”, ka thënë Hasani.

“Kosova lypset të këqyret nga një pikë bashkëkohore, realiste dhe pragmatike. Prekëm edhe çështjet e sigurisë në rajon e më gjerë. Pata rastin t’i përsëris kolegut dhe mikut tim boshnjak mbështetjen e plotë për tërësinë territoriale dhe sovranitetin e Bosnjë-Hercegovinës,” u shpreh ministri Hasani në konferencën e përbashkët për shtyp”.

Ministri i Financave, Hekuran Murati, ka thënë se edhe pas më shumë se një muaji që nga njoftimi i Gjykatës Kushtetuese ku konstatohet se Ligji për Pagën Minimale nuk bie ndesh me Kushtetutën, aktgjykimi i plotë ende nuk është publikuar.

Murati ka thënë se janë dhjetëra-mijëra punëtorë që po e presin hyrjen në fuqi të këtij ligji.

“Aktgjykimi i plotë për Ligjin për Pagën Minimale ende nuk është publikuar, megjithëse ka kaluar më shumë se një muaj që nga publikimi i njoftimit nga Gjykata Kushtetuese që konstaton se Ligji për Pagën Minimale nuk bie ndesh me Kushtetutën. Janë me dhjetëra mijëra të punësuar që po e presin tash e një vit hyrjen në fuqi të këtij ligji, e me të edhe rritjen e pagës së tyre”, ka shkruar Murati në Facebook.

Sipas Muratit, ky ligj nuk mund të hyjë në fuqi për shkak të mospublikimit të aktgjykimit të plotë.

Presidenti turk, Rexhep Taip Ergodan, ka thënë të dielën që Turqia mund të futet në Izrael siç ka bërë më parë në Libi dhe Nagorno-Karabakh.

Sidoqoftë, ai nuk e ka qartësuar se për çfarë lloji të intervenimit po sugjeronte, shkruan Reutersi.

Kritiku i madh i ofensivës izraelite në Gaza e diskutoi këtë gjatë një fjalimi ku po e lavdëronte industrinë turke të mbrojtjes.

“Ne duhet të jemi të fuqishëm asisoj që Izraeli të mund të mos i bëjë këto gjëra absurde ndaj Palestinës”, ka thënë Erdogani.

“Ashtu sikur qemë futur në Karabakh, ashtu si qemë futur në Libi, mund t’ua bëjmë edhe atyre ngjashëm”.

Shef i Zyrës së BE-së në Kosovë, Tomas Szunyog, ka vizituar të hënë kantierin e objekteve të reja për Fakultetin e Matematikës dhe Shkencave Natyrore të Universitetit të Prishtinës, në të cilën ka parë nga afër punimet që po bëhen në këtë objekt.

Ambasadori Szunyog derisa është shprehur i lumtur me ndërtimin e këtij objekti, shpreson se studentët e rinj të mund të vijnë në ndërtesë për të studiuar tashmë në vitin akademik duke filluar nga tetori i 2025-ës. Në këtë drejtim, ai nënvizoi se në një mënyrë përmes këtyre nismave po ndihmohen të rinjtë kosovarë që të hyjnë në ambientet që janë me standardet evropiane.

Pas vizitës me rektorin aktual të UP-së, Qerim Qerimi, Szunyog shton se BE mbetet donatori më i madh për Kosovën, dhe ka theksuar se ky është rezultat i prekshëm, jo vetëm për këtë punë ndërtimore, por edhe për të ardhmen e Kosovës, në këtë rast studentët.

“Mbaj mend, mendoj se ishte më pak se dy vjet më parë në kohën e dimrit, kur ne në fakt hodhëm hapat e parë këtu dhe nuk kishte asgjë, kështu që pas 18 muajsh tashmë mund të shihen ndërtesat e përfunduara. Çfarë kam kuptuar unë duke folur me kolegët tanë është se ndërtesa do të përfundonte brenda një viti dhe shpresojmë që studentët e rinj të mund të vijnë në ndërtesë për të studiuar tashmë në vitin akademik duke filluar nga tetori 2025. Pra, është me të vërtetë një kënaqësi të shoh diçka që është bërë së bashku nga BE-ja dhe gjithashtu Universiteti i Prishtinës dhe Ministria e Arsimit, dhe sigurisht, do të vlerësoja gjithashtu punën e mirë të partnerit tonë zbatues UNOPS”, tha Szunyog.

Ambasadori Szunyog tha se kjo nismë është veçanërisht interesante për ata që duan të punojnë në fushën e IT-së ose TIK-ut.

“Është një shembull i ndihmës së BE-së për Kosovën, BE-ja është donatori më i madh për Kosovën. Ky është një rezultat i prekshëm, jo vetëm për këtë punë ndërtimore, por edhe për të ardhmen e Kosovës për studentët. Pra, kuptoni se kjo është veçanërisht interesante për ata që duan të punojnë në fushën e IT ose TIK. Mendoj se në njëfarë mënyrë po i ndihmojmë të rinjtë kosovarë që të hyjnë në ambientet që janë me standardet evropiane dhe mund t’u mundësojmë të studiojnë më mirë”, ka shtuar Szunyog.

Ndërsa, falënderues ndaj ndihmës së BE-së janë shprehur edhe rektori, Qerim Qerimi bashkë me punëtorët që po kryenin punën në këtë objekt.