Blog

Kryetari i Aleancës, Ardian Gjini, ka zhvilluar sot një takim me kryetarin e Odës Amerikane në Kosovë, Arian Zeka.

Në këtë takim është theksuar se zhvillimi ekonomik mbetet esencial për të ardhmen e Kosovës, ndërsa politikat shtetërore duhet të garantojnë siguri afatgjatë energjetike, furnizim të qëndrueshëm me energji elektrike dhe krijim të kushteve që çlirojnë potencialin e plotë ekonomik të vendit.

Gjithashtu, është vënë theksi te rëndësia strategjike e përfshirjes së Kosovës në rrjetin e gazit amerikan, si një hap i konsideruar jetik për fuqizimin e sigurisë energjetike dhe stabilitetit ekonomik në të ardhmen.

Në takim u vlerësua edhe bashkëpunimi me Odën Amerikane dhe organizatat e tjera biznesore, duke e konsideruar sektorin privat si motorin kryesor të ekonomisë së Kosovës.

“Bashkëpunimi ndërinstitucional me komunitetin e biznesit u theksua si element kyç për nxitjen e investimeve dhe rritjen ekonomike të qëndrueshme në vend”, thuhet në njoftim.

Policia dhe ekipet e emergjencës janë angazhuar në një operacion të madh këtë të hënë në Stade të Gjermanisë, pasi organet e rendit konfirmuan se pesë persona u vranë nga të shtënat me armë.

Sipas informacioneve të para nga policia dhe raportimeve të Bild, në zonën e rrugës Dankersstrase në Stade (Saksonia e Poshtme) janë dëgjuar të shtëna me armë zjarri. Forcat e rendit kanë arrestuar dy persona të dyshuar, mes tyre edhe autorin e dyshuar të sulmit. Situata vazhdon të jetë dinamike.

“Ju lutemi, shmangni këtë zonë!”, ka njoftuar Drejtoria e Policisë së Luneburgut në platformën X.

Rreth orës 13:45, policia konfirmoi se pesë persona kanë humbur jetën si pasojë e të shtënave në qendrën e këtij qyteti hanseatik me rreth 50 mijë banorë. Sipas policisë, të gjithë viktimat janë të rritur, ndërsa disa persona të tjerë kanë mbetur të plagosur.

Sipas informacioneve të gazetës BILD, vendi ku ndodhi ngjarja është një institucion i ndihmës për të rinjtë. Hetuesit kanë nisur sigurimin e provave në vendngjarje dhe marrjen në pyetje të dëshmitarëve.

Rrethanat dhe motivet e kësaj ngjarjeje të rëndë mbeten ende plotësisht të paqarta.

Instituti GAP ka publikuar analizën “Numri i mësimdhënësve në komuna: tepricë apo nevojë?”, e cila trajton ndikimin e zbatimit më strikt të formulës për buxhetimin e mësimdhënësve në kuadër të grantit të arsimit.

Sipas një njoftimi për media bëhet e ditur se analiza tregon se nga viti 2026, Ministria e Financave, bazuar në rekomandimet dhe normat e Ministrisë së Arsimit, e ka bazuar financimin e pagave të mësimdhënësve në numrin aktual të nxënësve dhe raportin nxënës–mësimdhënës.

“Kjo ka nxjerrë në pah mospërputhje të theksuara ndërmjet numrit të mësimdhënësve të paraqitur nga komunat dhe numrit të aprovuar për financim përmes grantit të arsimit”, thuhet në njoftim.

Tutje siç thuhet në njoftim të dhënat tregojnë, se për gjitha komunat e Kosovës, për vitin 2026, Ministria e Financave ka larguar nga granti i arsimit gjithsej 3,101 mësimdhënës.

“Ky vendim pritet të krijojë një ngarkesë të konsiderueshme financiare për buxhetet e komunale, ku vetëm në vitin 2026, kostoja e vlerësuar për gjitha komunat tejkalon 24 milionë euro. Për 25 komunat e trajtuara në këtë analizë, komunat kanë paraqitur 27,282 mësimdhënës për vitin 2026, ndërsa janë aprovuar 24,200. Si rezultat, 3,082 mësimdhënës, apo rreth 11.3% e numrit të paraqitur, kanë mbetur jashtë financimit të grantit”.

Po ashtu siç thuhet në njoftim për vitin pasues, 2027, është paraparë që numri i përgjithshëm i mësimdhënësve të ulet edhe për 263.

“Konkretisht, disa komuna do të kenë rreth 463 mësimdhënës më pak në kuadër të grantit të arsimit, përderisa për të njëjtin vit për disa komuna tjera, së bashku, numri i mësimdhënësve planifikohet të rritet për 200”.

Në këto rrethana, siç thuhet në njoftim komunat përballen me dy alternativa: të harmonizojnë numrin e mësimdhënësve me normativat e Ministrisë së Arsimit ose t’i mbajnë në punë mësimdhënësit shtesë duke i financuar nga burime vetanake apo nga granti i përgjithshëm.

“Zgjedhja e alternativës së dytë mund të kufizojë investimet në sektorin e arsimit dhe zhvillimin komunal. Në vlerë absolute, presioni më i madh për mbulimin e pagave të mësimdhënësve “tepricë” apo “mbi normë” bie mbi Gjilanin me mbi 2.5 milionë euro, Gjakovën me mbi 2.3 milionë euro, pasuar nga Peja, Malisheva, Podujeva, Rahoveci, Suhareka, Skenderaj dhe Mitrovica e Jugut”.

Analiza thekson se kjo situatë nuk është vetëm pasojë e formulës së financimit, por reflekton një problem më të thellë strukturor në arsimin parauniversitar. Për më shumë se një dekadë, numri i nxënësve në Kosovë ka rënë vazhdimisht, ndërsa numri i mësimdhënësve dhe i shkollave nuk është përshtatur me të njëjtin ritëm. Vetëm në 25 komunat e analizuara, numri i nxënësve ka rënë nga 300,429 në vitin shkollor 2023/2024 në 279,465 në vitin 2026/2027, apo për afro 21 mijë nxënës.

Prandaj, Instituti GAP vlerëson se komunat duhet të nisin një proces të mirë planifikuar të riorganizimit të rrjetit shkollor dhe menaxhimit të stafit në arsim, të bazuar në të dhëna të sakta për numrin e nxënësve, paralelet, nevojat për kuadro, shpërndarjen gjeografike të shkollave dhe kostot reale të funksionimit. Ky proces duhet të jetë pjesë e një reforme të qëndrueshme për përshtatjen e sistemit arsimor me ndryshimet demografike dhe financiare.

Analizën e plotë mund ta gjeni të bashkëngjitur në këtë email ose duke klikuar këtu.

Të paktën pesë persona u vranë në të shtëna me armë në qytetin verior gjerman Stade.

Një zëdhënës i policisë tha se një person ishte arrestuar, por nuk dha numër të saktë të të vdekurve apo detaje të mëtejshme.

+++ACHTUNG – Polizeieinsatz in der Dankersstraße in Stade+++
Derzeit kommt es in Stade zu einer polizeilichen Einsatzlage. Meidet den Bereich weiträumig!
Einsatzbegleitende Informationen erhaltet ihr auf dem WhatsApp-Kanal der Polizei Stade unter:https://t.co/LeoOTiCZOz pic.twitter.com/12fvSVxH8I

— Polizeidirektion Lüneburg (@Polizei_LG) June 29, 2026

Selia e policisë së Lüneburgut i bëri thirrje publikut të shmangte zonën.

Hetuesit fillimisht nuk dhanë asnjë informacion në lidhje me sulmin.

Një numër i madh i shërbimeve të emergjencës janë aktualisht në vendngjarje.

Kryetari i Organizatës së Veteranëve të Luftës së Ushtrisë Çlirimtare të Kosovës (OVL-UÇK), Hysni Gucati në konferencë për media ka thënë se nuk ka shqiptarë mercenarë, raporton Ekonomia Online.

Këto komente Gucati, i bëri pasi u pyet në lidhje me gjuhën e përdorur nga kryeministri i Shqipërisë, Edi Rama dhe Taulant Balla, ku pretendohet se të njëjtit kanë thënë se ish-luftëtarët e UÇK-së janë mercenar.

“Unë Edi Ramën s’e kam dëgjuar që ka thënë mercenar. Një listë e kam parë, do të jemi i sinqertë, nëpër portale të ndryshme që e ka bërë publike Taulant Balla nëse s’gaboj, tani ndërkohë edhe Edi Rama. Mercenarë shqiptarë s’ka pasur. Një ngatërresë është bërë, Tahir Sinanaj është nga Kukësi, Tahir Sinani është nga Tropoja, ta bëjmë dallimin. Janë dy Tahira. Se nëse e ke fjalën për Tahir Sinanin, Tahir Sinani s’ka marrë lekë, as s’ka marrë para, është dëshmor i kombit. Është luftëtar i tri luftërave. Unë kam folur me vëllain e tij, me Skënderin, e kemi sqaruar, është edhe dokumenti që ekziston. Tahir Sinanaj është i Kukësit. Tahir Sinani, veç ta bëjmë dallimin te mbiemri, aty është ngatërruar. E Taulant Ballën jo që dua ta mbroj unë, po atij i ka mbetur patatja në dorë, është diçka tjetër. Tahir Sinani s’ka qenë dëshmor i paguar me para, është dëshmor i kombit, është dëshmor i tri luftërave. Respekt, përkulje, për punën dhe veprën e tij edhe familjen e tij, kështu që ta bëjmë këtë sqarim”, tha ai.

Sa i përket përdorimit të flamurit të UÇK-së në protestat në Shqipëri, Gucati u shpreh se ka bërë kërkesë të mos përdoret.

“Kam bërë kërkesë që mos të përdoret edhe me shkrim e kam, edhe këto dokumente kur të duash t’i jap, që kam bërë kërkesë. Ju lutem mos e përdorni flamurin dhe stemën e UÇK-së nëpër fushata politike sepse UÇK-ja nuk është e një partie, UÇK-ja është e gjithë kombit shqiptar”, tha ai.

Duke folur për këtë, Gucati deklaroi se do të kishte hapur padi nëse do të ekzistonte ligji për vlerat e luftës,

“Po të kishte ligj për vlerat e luftës, se ne pikën tetë e kemi ligjin, e kemi stemën e flamurin në ligj, që kemi bërë kërkesë në Qeveri, e din edhe Albini edhe anëtarët në qeveri. Tetë herë ka dalë ligji, tetë herë na kanë refuzuar. Për shkak të pikës së nëntë me heq, ne s’kemi pranuar me heq. Po sikur të kishte ligj për vlerat e luftës, edhe partive politike ju kisha bërë padi nëpër gjykata që s’kanë të drejtë me përdor”, tha ai.

Kurse, i pyetur se pse nuk mori pjesë në protestën për ish-luftëtarin, Bekim Metaj, sikurse mori pjesë në Skënderaj për Sami Lushtakun, Gucati tha se nuk ishte në Kosovë.

“Kam qenë në Shqipëri, isha. Se unë jam me kontrollë, kam një infeksion që s’dihet nga po më vjen ende. Edhe kam thirrë në telefon Besim Isufin, mundeni ta pyesni, mbi gjashtë herë prej territorit Shqipërisë, kam qenë në vizitë atë ditën e shtunë. Isha në vizitë te Bekimi. Bekimin e njoh personalisht, është jo tash, po e njoh më herët. Po më vjen keq si ka ndodhur rasti, si rast më vjen shumë keq. Po shteti është mirë me u marrë shumë me këtë rast, me sqaruar deri në fund çka ka ndodhur dhe pse ka ardhur deri te ai moment i Bekimit dhe i të tjerëve qytetarëve”, tha ai.

Deputeti i Lidhjes Demokratike të Kosovës (LDK) dhe ish-kryeministri, Avdullah Hoti, ka kritikuar qasjen e Qeverisë së Kosovës në raport me marrëveshjet ndërkombëtare, duke e cilësuar atë si “degradim diplomatik” gjatë pesë viteve të fundit.

Përmes një postimi në Facebook, Hoti tha se Qeveria ka refuzuar zbatimin e Marrëveshjes së Uashingtonit, ndërsa, sipas tij, ka pranuar Marrëveshjen e Ohrit, e cila tashmë po konsiderohet obligim ndërkombëtar për Kosovën.

Ai theksoi se Marrëveshja e Uashingtonit nuk është zbatuar as gjashtë vjet pas nënshkrimit të saj, duke përmendur edhe projektin për gazin amerikan.

“Marrëveshja e Uashingtonit nuk u zbatua tash e gjashtë vite. Edhe sot, kur gjithë Evropa është zgjuar në këmbë për të eliminuar plotësisht çdo varësi nga gazi rus, Kurti dhe sejmenët e tij e refuzojnë projektin e gazit amerikan duke përrallisur për alternativa të tjera të furnizimit me energji”, ka shkruar ai.

Sipas Hotit, ndryshe ka ndodhur me Marrëveshjen e Ohrit.

“Por nuk kanë hezituar të pranojnë Marrëveshjen e Ohrit, e cila sipas Sorensenit tani përbën obligim ndërkombëtar të Kosovës”, ka shtuar ai.

Postimit të tij, Hoti i ka bashkëngjitur edhe një fotografi nga deklarata e djeshme e emisarit të Bashkimit Evropian për dialogun Kosovë–Serbi, Peter Sorensen, i cili gjatë Forumit të Dubrovnikut tha se Marrëveshja e Ohrit është zotim ndërkombëtar dhe mbetet e vlefshme edhe pse nuk është nënshkruar.

Partitë e ish-opozitës kanë kritikuar partinë fituese të zgjedhjeve të 7 qershorit, LVV-në, për mos nisjen e bisedimeve me partitë e tjera për formimin e institucioneve.

Deputeti i PDK-së, Elmi Reçica, në një përgjigje për RTV21, tha se varet dhe është përgjegjësi e Albin Kurtit që të gjejë zgjidhje duke u koordinuar edhe me partitë e tjera për formimin e institucioneve, përfshirë edhe zgjedhjen e presidentit të ri.

“Patjetër që varet, sepse LVV-ja e ka në dorë gjithë procesin. Partia e parë mund t’i krijojë institucionet, mund ta zgjedhë kryetarin e Kuvendit dhe, në koordinim me partitë e tjera, mund ta zgjedhë edhe presidentin. Më pas mund ta zgjedhë edhe Qeverinë, ashtu siç e parasheh edhe aktgjykimi i Gjykatës Kushtetuese. Pra, këtë situatë e ka në dorë Albin Kurti.”, tha ai.

Agjencia e Statistikave të Kosovës (ASK) ka publikuar Repertorin Statistikor mbi Ndërmarrjet Ekonomike për muajin maj 2026, i cili tregon rënie të numrit të ndërmarrjeve të regjistruara si në baza mujore, ashtu edhe vjetore.

Sipas ASK-së, në maj 2026 janë regjistruar 1.108 ndërmarrje, që paraqet rënie prej 1,4 për qind krahasuar me prillin 2026 dhe 16,9 për qind më pak krahasuar me muajin maj të vitit 2025.

Sa i përket aktiviteteve ekonomike, sektori më i preferuar për regjistrimin e bizneseve të reja mbetet tregtia me shumicë dhe pakicë, si dhe riparimi i automjeteve dhe motoçikletave, me 278 ndërmarrje ose 25,1 për qind të totalit.

Pas këtij sektori renditen akomodimi dhe aktivitetet e shërbimeve me ushqim me 126 ndërmarrje (11,4 për qind), ndërtimtaria me 119 ndërmarrje (10,7 për qind) dhe prodhimi me 105 ndërmarrje (9,5 për qind).

Sipas kategorisë së madhësisë, pothuajse të gjitha bizneset e regjistruara janë mikro-ndërmarrje. Gjatë majit janë regjistruar 1.101 mikro-ndërmarrje me deri në nëntë të punësuar dhe shtatë ndërmarrje të vogla me 10 deri në 49 të punësuar. ASK nuk ka regjistruar asnjë ndërmarrje të mesme apo të madhe gjatë këtij muaji.

Në aspektin gjeografik, Rajoni i Prishtinës prin me 523 ndërmarrje të regjistruara, pasuar nga Rajoni i Prizrenit me 130, Ferizaj me 110, Mitrovica me 100, Gjilani me 86, Gjakova me 83 dhe Peja me 76 ndërmarrje të reja.

Ministri në detyrë i Punëve të Brendshme, Xhelal Sveçla, ka reaguar pas vdekjes tragjike të zyrtarit policor Rexhep Gashi, i cili humbi jetën gjatë kryerjes së detyrës zyrtare në Pikën e Kalimit Kufitar në Vërmicë.

Përmes një postimi në rrjetet sociale, Sveçla shprehu ngushëllimet për familjen e të ndjerit, kolegët e tij dhe të gjithë pjesëtarët e Policisë së Kosovës.

“Me pikëllim të thellë mora lajmin për ndarjen nga jeta të zyrtarit policor Rexhep Gashi, i cili humbi jetën tragjikisht gjatë kryerjes së detyrës zyrtare në pikën e kalimit kufitar në Vërmicë”, ka shkruar Sveçla.

Ai tha se në këto momente të vështira institucionet qëndrojnë pranë familjes së policit për të ndarë dhimbjen e humbjes.

“Shpreh ngushëllimet e mia më të sinqerta për familjen Gashi, kolegët e të ndjerit dhe të gjithë pjesëtarët e Policisë së Kosovës. Në këto momente të rënda qëndrojmë pranë familjes për të ndarë dhimbjen e kësaj humbjeje të madhe”, u shpreh ai.

Sveçla u bëri thirrje edhe të gjithë pjesëmarrësve në komunikacion që të tregojnë kujdes dhe përgjegjësi maksimale për të parandaluar raste tragjike.

“U bëj thirrje të gjithë pjesëmarrësve në komunikacion për kujdes dhe përgjegjësi maksimale, që të parandalohen tragjedi të tilla. Qoftë i përjetshëm kujtimi për zyrtarin policor Rexhep Gashi, i cili deri në çastet e fundit të jetës së tij i shërbeu me përkushtim Republikës së Kosovës”, ka përfunduar Sveçla.

Rexhep Gashi humbi jetën pasi, sipas informacioneve të para, u godit nga një veturë në afërsi të Pikës së Kalimit Kufitar në Vërmicë, derisa ishte në kryerje të detyrës zyrtare. Rrethanat e plota të rastit janë duke u hetuar nga organet kompetente.