Blog

UEFA edhe një herë ka vendosur t’ia besojë drejtësinë në fushë gjyqtarit kosovar Genc Nuza.

Ai do të jetë referi kryesor në përballjen e fazës së ligës në Ligën e Konferencës mes skuadrës zvicerane të Lozanës dhe asaj islandeze Breidablik.

Ky delegim është një tjetër dëshmi se shtëpia e futbollit evropian po e sheh shtatë herë gjyqtarin më të mirë në Kosovë si një gjyqtar konstant dhe të besueshëm në nivelet e larta.

Në krah të Nuzës do të jenë asistentët e tij të përhershëm, Bujar Selimaj dhe Fatlum Berisha.

Në dhomën e VAR-it është caktuar Dardan Çaka, ndërsa në AVAR do të jetë Visar Kastrati.

Gjyqtar i katërt është caktuar Erdall Zasella.

Ndeshja zhvillohet të enjten nga ora 18:45. /ATVLIVE.TV

Kampionati kroat i futbollit këtë javë ka pasur një prani të ndjeshme shqiptare, teksa dy lojtarë nga Shqipëria janë përfshirë në formacionin më të mirë të javës, falë paraqitjeve të shkëlqyera me ekipet e tyre përkatëse.

Arbër Hoxha, anësori i talentuar i Dinamos së Zagrebit dhe njëkohësisht pjesë e Kombëtares shqiptare, ishte një nga protagonistët kryesorë në fitoren bindëse 4-1 ndaj Slaven Belupos. Me një asist të saktë dhe një gol të realizuar, 26 vjeçari tregoi edhe një herë formën e tij të lartë dhe rëndësinë që ka për skuadrën kryeqytetase. Performanca e tij nuk kaloi pa u vlerësuar nga analistët sportivë në Kroaci, të cilët e përfshinë në formacionin e javës, duke i dhënë një notë të lartë, 8.6, që pasqyron ndikimin e tij në lojë.

Ndërkohë, edhe Adrion Pajaziti, një tjetër lojtar shqiptar që po shkëlqen në elitën e futbollit kroat, u dallua këtë javë me një paraqitje solide për Hajduk Split në ndeshjen kundër Lokomotivës së Zagrebit, e cila përfundoi me fitoren 2-0 për ekipin nga Spliti. 22 vjeçari u shqua për shpirtin luftarak dhe kontributin e tij në ndërtimin e aksioneve sulmuese, duke ndihmuar skuadrën që të sigurojë tri pikët e plota dhe të mbajë ritmin në garën për vendet e para në tabelë.

Prania e dy futbollistëve shqiptarë në formacionin e javës jo vetëm që është një tregues i rritjes së tyre si individë, por edhe një lajm pozitiv për përfaqësuesen shqiptare, e cila do të ketë në dispozicion lojtarë me eksperiencë ndërkombëtare dhe në formë të lartë për sfidat e ardhshme. /ATVLIVE.TV

Në vendin tonë për arsye të zgjedhjeve, qofshin ato nacionale apo lokale, palestrat sportive përdoren si qendra të votimit, krahas shkollave.

Për këtë arsye, klubi i hendbollit Rahoveci është i detyruar që ndeshjet ndërkombëtare t’i zhvillojë jashtë vendit.

Njoftimi i plotë i klubit:

Për shkak të zgjedhjeve, nga nesër Palestra Mizahir Isma kalon në menaxhim të KQZ-së, rrjedhimisht, nuk mund të zhvillohet asnjë ndeshje aty.

Për detajet tjera të ndeshjes, ju njoftojmë me kohë.

Këshilli i Qytetit të Milanos ka miratuar propozimin për shitjen e stadiumit San Siro dhe tokës përreth dy klubeve të qytetit, Milanit dhe Interit, duke i hapur rrugë projektit për ndërtimin e një stadiumi të ri modern.

Votimi u zhvillua në orët e para të mëngjesit të së martës, pas një seance maratonike që kishte nisur të hënën në mbrëmje. Vendimi kaloi me 24 vota pro dhe 20 kundër, ndërsa partia Forza Italia abstenoi, duke ulur pragun për shumicë të thjeshtë dhe duke mundësuar miratimin e propozimit.

Projekti, i vlerësuar në 1.2 miliardë euro, synon jo vetëm ndërtimin e një stadiumi të ri privat, por edhe rigjenerimin urban të zonës përreth, zhvillimin e infrastrukturës dhe krijimin e vendeve të reja të punës.

Debati ishte i ashpër, me ndarje brenda partive politike. Disa anëtarë të Partisë Demokratike votuan pro, ndërsa të tjerë kritikuan publikisht presidentët e dy klubeve, Beppe Marotta (Inter) dhe Paolo Scaroni (Milan). Një nga këshilltarët madje i cilësoi ata si “të lashtë”, duke reaguar ndaj deklaratave të tyre për politikën.

Ndryshime të rëndësishme u përfshinë në versionin përfundimtar të marrëveshjes, përfshirë kriteret e aksesueshmërisë dhe qëndrueshmërisë, për t’u përshtatur me standardet e projektit të ri.

Ky vendim përfundimisht i jep fund dekadave të pasigurisë mbi të ardhmen e San Siros, duke hapur rrugën që Milani dhe Interi të ndërtojnë një arenë moderne në vendin historik ku ndajnë shtëpinë e tyre prej më shumë se gjysmë shekulli. /ATVLIVE.TV

FIFA ka marrë vendimin përfundimtar sa i përket pranisë së tifozëve në ndeshjen mes Serbisë dhe Shqipërisë, e cila do të zhvillohet më 11 tetor në kuadër të kualifikimeve për Kupën e Botës 2026.

Komisioni Disiplinor i shtëpisë botërore të futbollit ka vendosur të ndëshkojë Federatën Serbe të Futbollit me mbylljen e pjesshme të stadiumit të Leskovcit, ku do të luhet kjo ndeshje. Vendimi vjen si pasojë e incidenteve dhe trazirave të ndodhura në Beograd muajin e kaluar, gjatë ndeshjes mes Serbisë dhe Anglisë.

Sipas raportimeve të mediumit serb “Sportklub”, në këtë përballje do të lejohen vetëm 6,500 tifozë, nga gjithsej 8,136 vende që ka stadiumi i Leskovcit – që do të thotë se 20% e kapacitetit do të mbetet i mbyllur për publikun.

Përveç këtij dënimi, Federata Serbe është gjobitur edhe me 80 mijë franga zvicerane.

Fillimisht, ishte vetë Federata Serbe ajo që kishte kërkuar zhvendosjen e ndeshjes nga Beogradi në Leskovc, për shkak të situatës së tensionuar politike dhe protestave të vazhdueshme në kryeqytet.

FIFA gjithashtu e ka paralajmëruar Serbinë për masa më të rënda në rast të ndonjë incidenti tjetër gjatë ndeshjes ndaj Shqipërisë.

Takimi në Leskovc shihet si një ndeshje vendimtare për fatin e të dyja kombëtareve në grup. Në sfidën e parë të zhvilluar në Tiranë, Shqipëria dhe Serbia u ndanë me barazim, ndërsa tani gara për vendin e dytë – që siguron një biletë për në fazën “play-off” – është më e hapur se kurrë. /ATVLIVE.TV

Xhiroja e dytë e fazës së grupeve sjell përballje të forta dhe emocione të garantuara në arenën më të madhe të futbollit evropian.

Real Madrid ka përshkuar një udhëtim të gjatë tetëorësh drejt Kazakistanit, ku do të përballet me Kairat Almaty. Pas humbjes së rëndë në derbi ndaj Atletico Madridit, “Los Blancos” kërkojnë rikthimin te fitorja në Evropë.

Në garë për pikët e plota është edhe Interi, që në “San Siro” pret Slavia Pragën. Nënkampionët e Evropës synojnë të vazhdojnë formën pozitive dhe të ruajnë pozitat në grup.

Në Stamboll, atmosfera pritet të jetë elektrizuese. Galatasaray pret Liverpoolin në një ndeshje që premton spektakël. Anglezët futen si favoritë, por nuk do ta kenë aspak të lehtë përballë turqve, të njohur për përkrahjen e zjarrtë të tifozëve të tyre.

Bayern Munich, nga ana tjetër, do të përballet me surprizën Pafos FC. Gjermanët, të udhëhequr nga Harry Kane, nuk pritet të kenë shumë probleme për të siguruar fitoren dhe për të vazhduar rrugëtimin e tyre në grup.

Një sfidë që ngjall shumë interes është edhe ajo mes Chelseat dhe Benficës. Jose Mourinho rikthehet në “Stamford Bridge”, këtë herë si trajner i ekipit portugez. Ndeshja mbart jo vetëm rivalitet sportiv, por edhe emocione të veçanta për portugezin që ka shkruar histori me Blutë e Londrës.

Në ndeshjet e mbetura, Marseille luan si nikoqir i Ajaxit, Atletiko Madrid pret Eintracht Frankfurt dhe Tottenham Hotspur luan në udhëtim te Bodo/Glimt.

Në total, sonte do të luhen nëntë ndeshje: dy prej tyre nisin në ora 18:45, Atalanta e pret Club Brugge dhe Kairat Almaty – Real Madridin, ndërsa të tjerat startojnë nga ora 21:00. /ATVLIVE.TV