ATV

Blog

  • OEK njofton: Më 5 nëntor mbahet seanca për padinë ndaj ZRrE-së

    OEK njofton: Më 5 nëntor mbahet seanca për padinë ndaj ZRrE-së

    Oda Ekonomike e Kosovës ka njoftuar se Gjykata Supreme e ka caktuar datën për mbajtjen e seancës gjyqësore lidhur me padinë e iniciuar nga ta kundër ZRrE-së.

    Në njoftimin për media OEK ka treguar se seanca që do të mbahet më 5 nëntor ka për qëllim shqyrtimin e ligjshmërisë së veprimit të ZRrE-së.

    “Seanca ka për qëllim shqyrtimin e ligjshmërisë së një akti nënligjor me të cilin, në mënyrë të padrejtë dhe në dëm të bizneseve dhe qytetarëve të Kosovës, është marr vendim që kompanitë të nxirren me dhunë në tregun e lirë të energjisë elektrike. Ftojmë ekspertët e fushës së energjisë, shoqërinë civile dhe të gjithë akterët relevantë të kontribuojnë me analizat dhe dëshmitë e tyre profesionale, me qëllim që para gjykatës të vërtetohet se ky vendim është i dëmshëm dhe i pajustifikueshëm”, është thënë në njoftimin e ZRrE-së.

  • Barron Trump mbylli një kat të tërë në Trump Tower për një takim romantik

    Barron Trump mbylli një kat të tërë në Trump Tower për një takim romantik

    Kur flitet për dashurinë, disa mjaftohen me lule apo qirinj… por Barron Trump vendosi të shkonte më larg.

    Sipas raportimeve, ai mbylli të gjithë një kat të Trump Tower, një ndërtesë shumë e madhe dhe luksoze në Nju Jork, e njohur për apartamente dhe zyra të njerëzve shumë të pasur, vetëm për një takim privat.

    Ky veprim shkaktoi diskutime online: disa e panë si një shfaqje privilegji, të tjerët si një gjest romantik madhështor dhe paksa ekstravagant.

    Një gjë është e sigurt: “nata e takimit” mund të duket shumë ndryshe, në varësi të mbiemrit që mban!

  • A është e rëndësishme miqësia në punë?

    A është e rëndësishme miqësia në punë?

    A jeni miqësor me njerëzit me të cilët punoni, apo jeni miq me ta? Dallimi është i rëndësishëm, lidhja e miqësisë me kolegët mund t’ju bëjë më të lumtur dhe produktivë.

    Shumë njerëz sot kalojnë gjithnjë e më shumë kohë me kolegët se me familjarët e tyre. Ajo çka mendojmë për njerëzit me të cilët punojmë dhe marrëdhënien tonë me ta ndikon në jetën tonë, edhe pasi ka përfunduar dita e punës. Një studim i kohëve të fundit të 3.000 punonjës amerikanë me kohë të plotë hedh dritë tek qëndrimi ndaj miqësive në vendin e punës.

    Studimi, i kryer nga kërkuesit e Olivet Nazarene University në Ilinois, gjeti se thuajse dy e treta e personave në punë konsiderohen si “të huaj” ose “kolegë”. Rreth 35% hyn në territorin e “miqve”, edhe pse vetëm 15% e këtyre miqësive vazhdon jashtë punës. 4 në 5 të intervistuar deklaruan se ata punojnë me të paktën një person të cilin e konsiderojnë mik.

    Miqësitë krijohen më lehtë në disa industri, si transportet, sektori financiar dhe ai i kontabilitetit. Në sektorin e pasurive të patundshme dhe atë ligjor, krijohen një numër më i ulët miqësish se mesatarja. Pjesa më e madhe e miqësive në vendin e punës krijohen shpejt, më shumë se gjysma disa javë pas takimit të kolegëve dhe 22% pas disa muajsh. Edhe pse sektori i pasurive të patundshme është një terren “shterpë” për njerëzit që ndajnë të njëjtat ide së bashku, është gjithashtu një nga sektorët ku miqësitë krijohen më shpejt, së bashku me sektorin e tregtisë me pakicë, atë të ushqimit dhe pijeve dhe sektorin e sigurimeve.

    Në anën tjetër, është më e vështirë të krijohen miqësi në sektorin qeveritar, në sektorin e shëndetësisë dhe atë të inxhinierisë.

    Miqtë në punë janë të rëndësishëm

    A është e rëndësishme të krijosh miqësi në punë? Kërkimet e Gallup pas viteve ‘90 thonë po. Shoqëria e sondazheve i pyet shpesh punonjësit e klientëve të saj: “A keni një mik të ngushtë në punë?”. Rezultatet e sondazheve kanë treguar se të intervistuarit që u përgjigjën “po” kishin 43% më shumë mundësi të përgëzoheshin për punën e kryer javën e kaluar.

    Një studim i LinkedIn mbi marrëdhëniet në vendin e punës gjeti se 46% e punonjësve në të gjithë botën besojnë se të pasurit e miqve në vendin e punës rrit lumturinë e përgjithshme. Krijimi i marrëdhënieve me të tjerët mund t’ju bëjë të ndiheni më të lidhur, gjë që mund të rrisë produktivitetin dhe angazhimin në punë.

    “Njerëzit janë më krijues dhe produktivë kur ata e përjetojnë pozitivisht jetën profesionale, duke përfshirë më shumë emocione të bukura, më shumë motivim drejt vetë punës dhe një perceptim më pozitiv karshi kompanisë”, shpjegon profesori Teresa Amabile nga Harvard Business School, bashkautor i “The Progress Principle”.

    Miqësia, shpërqendrim ndaj punës?

    Por përpara se të nisni socializimin me të gjithë kolegët, një studim nga Rutgers University thotë se krijimi i miqësive në vendin e punës mund të jetë një ndërthurje ndjesish. Një studim te 168 punonjës në një kompani sigurimesh gjeti se të pasurit e shumë kolegëve që bëhen miq rrit performancën e punonjësve. Krijimi i miqësive në punë largon barrierat, i bën punonjësit të ndihen më rehat kur kërkojnë ndihmë, duke mos e pasur frikën e paragjykimit.

    Megjithatë, miqtë në punë mund t’ju krijojnë shpërqendrime me biseda spontane dhe pauza për socializim, duke ju shkëputur nga puna që keni në dorë. Studimi zbuloi edhe se krijimi dhe ruajtja e marrëdhënieve miqësore ne punë mund të bëhet disi rraskapitëse në rastin e promovimit të njërit prej kolegëve si shef i tjetrit. Megjithatë, ka më shumë anë pozitive se negative në krijimin e miqësive në vendin e punës.

    Ndërkohë që disa drejtues mund të jenë kundër bisedave dhe të qeshurave në vendin e punës, duket se edhe një miqësi e vogël mund të ndihmojë në përmirësimin e vendit të punës.

  • Qeveri e përkohshme para zgjedhjeve? Kusari-Lila del me propozimin e ri politik

    Qeveri e përkohshme para zgjedhjeve? Kusari-Lila del me propozimin e ri politik

    Kryetarja e Alternativës, Mimoza Kusari-Lila, e cila është pjesë e Grupit Parlamentar të Lëvizjes Vetëvendosje, ka deklaruar se mbajtja e zgjedhjeve të reja parlamentare është bërë e domosdoshme, pasi Kosova tashmë ka hyrë në muajin e tetë pa institucione të reja pas zgjedhjeve të 9 shkurtit. Megjithatë, ajo vlerëson se para shpalljes së zgjedhjeve duhet të arrihet një marrëveshje politike për formimin e një qeverie të përkohshme, me mandat vetëm legjislativ.

    Në një intervistë për KosovaPress, Kusari-Lila tha se një qeveri e tillë do të kishte për detyrë miratimin e projektbuxhetit për vitin 2026 dhe disa marrëveshje ndërkombëtare që lidhen me fondet e Bashkimit Evropian për Kosovën.

    “Zgjedhjet janë të domosdoshme, sepse kanë kaluar tetë muaj prej mbajtjes së tyre dhe ende nuk kemi Kuvend të konstituuar. Në një situatë të tillë, vendimi më demokratik është t’i kthehemi qytetarëve. Megjithatë, përpara se të shkohet në zgjedhje, duhet të sigurohemi që buxheti dhe marrëveshjet e BE-së të mos bllokohen”, tha ajo.

    Pa numra për qeverinë “Kurti III”

    Deputetja e Grupit Parlamentar të Vetëvendosjes pranoi se shumica aktuale nuk i ka numrat për formimin e qeverisë së re, edhe nëse rikthehen negociatat me Nismën Socialdemokrate.

    “Edhe nëse ka pajtim me Nismën, nuk arrihen 61 vota. Kjo nënkupton që funksionimi i qeverisë do të ishte i brishtë. Prandaj, një marrëveshje politike për kalimin e buxhetit dhe disa projektligjeve jetike është më e arsyeshme”, theksoi ajo.

    Vendimi i Kushtetueses, në pritje të aktgjykimit të plotë

    Kusari-Lila tha se është e rezervuar për të komentuar vendimin e Gjykatës Kushtetuese, e cila ka konstatuar se Kuvendi nuk është konstituuar, për shkak se nuk është zgjedhur nënkryetari nga komuniteti serb. Ajo pret publikimin e aktgjykimit të plotë për të parë nëse ai do të specifikojë të drejtën ekskluzive të Listës Serbe për ta nominuar kandidatin.

    “Nëse Kushtetuesja nuk e lidh këtë pozitë vetëm me Listën Serbe, atëherë kjo do të mund të hapte rrugë për një pluralizëm më të madh politik brenda komunitetit serb”, shtoi ajo, duke theksuar se nuk do të votojë asnjë kandidat të Listës Serbe për nënkryetar të Kuvendit.

    Koalicioni me Vetëvendosjen

    Duke folur për raportet e Alternativës me Lëvizjen Vetëvendosje, Kusari-Lila tha se do të kërkojë që bashkëpunimi të formalizohet në formën e një koalicioni zyrtar, për të siguruar stabilitet dhe qartësi politike.

    “Kërkojmë që të jemi zyrtarisht në koalicion me LVV-në. Nuk kemi pasur kërkesa për poste apo kushte, por mendojmë se një marrëdhënie e qartë politike është e nevojshme për mbarëvajtjen e jetës institucionale dhe për identitetin tonë politik”, përfundoi ajo.

  • Sekreti që pak e dinë: Si ta lash rrobën e errët pa e humbur ngjyrën kurrë!

    Sekreti që pak e dinë: Si ta lash rrobën e errët pa e humbur ngjyrën kurrë!

    Ekziston një “shkencë e vogël” për ruajtjen e bardhësisë së rrobave të bardha, por çfarë ndodh me ato të errëta?

    Sa herë keni veshur xhinset tuaja të preferuara apo një bluzë të zezë dhe pas vetëm disa larjesh keni vënë re se kanë humbur atë intensitet të përsosur ngjyre që ju kishte magjepsur fillimisht?

    Nuancat e errëta, qoftë e zezë, blu e errët apo kafe, kërkojnë kujdes të veçantë nëse dëshironi t’u ruani thellësinë dhe elegancën.

    Veshjet e errëta janë shpesh pjesë bazike e gardërobës sonë. Qoftë për një kombinim pune, një dalje në mbrëmje apo xhinset e përditshme, ato janë universale dhe gjithmonë japin një dozë sofistikimi.

    Megjithatë, larja e pasaktë dhe pakujdesia mund t’i bëjnë copat që dikur dukeshin të reja dhe të shtrenjta, të duken të përdorura dhe pa jetë.

    Ndajini ngjyrat e errëta nga të tjerat

    Ndarja e rrobave nuk është vetëm zakon, por një hap kyç për ruajtjen e ngjyrës. Ndërsa shumica prej nesh e dinë që rrobat e bardha nuk duhen larë me ato shumëngjyrëshe, pak kush mendon se edhe nuancat e errëta kërkojnë ndarje të kujdesshme.

    E zeza, bluja e errët dhe e kuqja e errët mund të lahen bashkë, pasi i përkasin spektrit të ftohtë të ngjyrave, ndërsa kafeja, ulliri dhe tonet tokësore duhet të lahen veçmas. Kështu parandalohet përzierja e pigmenteve dhe humbja e intensitetit. Me ndarjen e duhur, rrobat e errëta e ruajnë më gjatë atë ton të thellë e të pasur që i bën elegante, transmeton Telegrafi.

    Zgjidhni larje në temperatura të ulëta

    Uji me temperaturë të lartë ndikon më shpejt në zbehjen e ngjyrave, pasi hap fijet e pëlhurës dhe lejon pigmentit të dalë më lehtë. Veshjet e errëta është më mirë të lahen në temperatura të ulëta, deri në 30°C, që është më se e mjaftueshme për t’i pastruar dhe freskuar. Përveçse ruan ngjyrën, ky lloj larjeje zgjat edhe jetën e pëlhurës, sepse fijet mbeten elastike dhe konsumohen më pak.

    Një përfitim shtesë: larja me ujë të ftohtë kursen energji, pra është e mirë si për rrobat, ashtu edhe për faturën e dritave.

    Kujdesi gjatë tharjes është po aq i rëndësishëm

    Tharësja mund të jetë e përshtatshme, por temperatura e lartë dëmton ngjyrat e errëta. Kur rrobat thahen në programe të forta, fijet bëhen të thata e të brishta, dhe ngjyra humbet shkëlqimin. Nëse duhet të përdorni tharësen, zgjidhni temperaturën më të ulët dhe një program të shkurtër.

    Zgjidhja më e mirë është tharja natyrale në ajër, por jo në diell të drejtpërdrejtë. Rrezet e diellit, njësoj si nxehtësia, përshpejtojnë zbehjen e ngjyrës, ndaj është më mirë t’i varni në hije ose brenda. Kështu pëlhura ruan butësinë dhe ngjyrën origjinale.

    Mos e mbushni tej mase makinën e larjes

    Dëshira për të larë sa më shumë rroba përnjëherësh shpesh na shtyn ta mbushim makinën deri në maksimum. Por kjo jep efektin e kundërt, rrobat lahen më pak, nuk shpëlahen mirë dhe fijet konsumohen më shpejt.

    Kur veshjet e errëta nuk kanë hapësirë të mjaftueshme për t’u lëvizur lirshëm, fërkimi midis tyre bëhet më i fortë dhe ngjyra zbehet më shpejt. Lër të paktën një të tretën e hapësirës bosh, që uji dhe detergjenti të qarkullojnë siç duhet. Kështu rrobat pastrohen në mënyrë të barabartë dhe ngjyra mbetet më e thellë e më e freskët për më gjatë.

    Respektoni udhëzimet në etiketë – janë aty për një arsye

    Shkronjat e vogla në etiketa nuk janë për t’ju hutuar, ato janë udhëzuesi më i mirë për ta ruajtur veshjen në gjendje perfekte. Ato tregojnë temperaturën e lejuar të larjes, nëse pëlhura mund të thahet në tharëse apo kërkon pastrim kimik.

    Ne shpesh i injorojmë këto udhëzime dhe përfundojmë me dëmtime të parikuperueshme të materialit ose humbje të ngjyrës. Respektimi i etiketave – zbulon mënyrën më të mirë për të ruajtur intensitetin dhe jetëgjatësinë e ngjyrës. /Telegrafi/

  • Aro Muric më meritori për fitoren e Sassuolos kundër Hellas Veronës

    Aro Muric më meritori për fitoren e Sassuolos kundër Hellas Veronës

    Portieri i Kombëtares së Kosovës Aro Muric,ka qenë një ndër meritorët për fitoren e Sassuolos kundër Hellas Veronës në Serie A.

    Muric pati paraqitje fantastike duke ndalur dy gola të sigurt,dhe për më tepër nga faqja e njohur Sofa Score u vlerësua me notën 10.

    Përndryshe Muric kontribuoi edhe me 18 pasime të sakta gjatë ndeshjes nga 28 tentime,dhe kjo paraqitje e mirë e gardianit do t’ia shtonte vetëbesimin para ndeshjeve të Kombëtares së Kosovës kundër Sllovenisë dhe Suedisë.

    Kujtojmë që Aro Muric është i huazuar tek ekipi italian Sassuolo nga skuadra angleze Ipswich Town,ku ka bërë 5 paraqitje duke mbajtur dy herë portën të paprekur.

  • Hamasi pranon planin e Trump, liderët ndërkombëtarë reagojnë

    Hamasi pranon planin e Trump, liderët ndërkombëtarë reagojnë

    Pas përgjigjes pozitive të grupit palestinez Hamas ndaj dokumentit për armëpushimin në Gazë të propozuar nga SHBA-ja, kanë reaguar edhe liderët botërorë.

    Liderët botërorë kanë mirëpritur deklaratën e Hamasit se pranon disa pjesë të planit prej 20 pikësh për paqe të propozuar nga Trump, ndërsa disa pika të tjera kërkojnë rinegocim.

    Sekretari i Përgjithshëm i OKB-së, António Guterres, tha: “I bëj thirrje të gjitha palëve të shfrytëzojnë këtë mundësi për t’i dhënë fund këtij konflikti tragjik në Gaza”.

    Presidenti turk, Recep Tayyip Erdogan, shtoi: “Përgjigjja e Hamasit ndaj planit për vendosjen e një armëpushimi në Gaza përbën një hap konstruktiv dhe të rëndësishëm drejt arritjes së paqes së qëndrueshme”.

    Kancelari gjerman, Friedrich Merz, theksoi: “Lirimi i pengjeve dhe paqja për Gazën janë tashmë të arritshme… Pas gati dy vitesh, kjo është mundësia më e mirë për paqe”.

    Presidenti francez, Emmanuel Macron, deklaroi: “Lirimi i të gjithë pengjeve dhe një armëpushim në Gaza janë brenda mundësive! Angazhimi i Hamasit duhet të pasohet menjëherë me veprime”, raporton BBC.

    Kryeministrja italiane, Giorgia Meloni, tha: “Prioriteti i të gjithëve tani duhet të jetë arritja e një armëpushimi që çon në lirimin e menjëhershëm të të gjithë pengjeve. Italia mbetet e gatshme të japë kontributin e saj.”

    Kryeministri kanadez, Mark Carney, shtoi: “Inkurajojmë të gjitha palët që menjëherë të punojnë për ta kthyer këtë angazhim në realitet”.

    Sir Keir Starmer vlerësoi pranimin e pjesshëm të planit të paqes nga Hamasi si një “hap i rëndësishëm përpara” dhe bëri thirrje për një “marrëveshje pa vonesë. Tani ekziston një mundësi për t’i dhënë fund luftimeve, që pengjet të kthehen në shtëpi dhe që ndihma humanitare të arrijë tek ata që kanë kaq shumë nevojë për të. U bëjmë thirrje të gjitha palëve që ta zbatojnë marrëveshjen pa vonesë”.

    Ndërkohë, presidenti amerikan, Donald Trump, përmes rrjeteve sociale deklaroi se kjo është një ditë e madhe për Lindjen e Mesme:

    “Bazuar në deklaratën e publikuar nga Hamasi, besoj se ata janë të gatshëm për paqe të përhershme. Izraeli duhet menjëherë të ndalojë bombardimet në Gazë, në mënyrë që të mund të shpëtojmë pengjet në mënyrë të sigurt dhe të shpejtë! Aktualisht është shumë e rrezikshme për ta bërë këtë. Ne tashmë jemi në bisedime për detajet që duhen përpunuar. Kjo nuk ka të bëjë vetëm me Gazën, por me paqen e shumëkërkuar në Lindjen e Mesme”, deklaroi lideri amerikan.

    Lëvizja Hamas publikoi të premten në mbrëmje përgjigjen zyrtare për përfundimin e luftës në Gazë, disa orë pasi ai dha një ultimatum që deri të dielën në orën 18:00, sipas kohës së Uashingtonit, të pranohet plani i paqes, përndryshe do të pasojë “ferri që bota nuk ka parë ndonjëherë”.

    Në deklaratë, Hamasi bëri të ditur se, pas konsultimeve të gjera me udhëheqësinë e tij, fraksionet palestineze, ndërmjetësuesit dhe “shtetet mike”, ka vendosur t’i përgjigjet pozitivisht pikave kyçe të propozimit.

    Militantët theksuan se vlerësojnë përpjekjet e bashkësisë ndërkombëtare, përfshirë iniciativën e presidentit Trump, me synimin për përfundimin e luftës, shkëmbimin e të burgosurve, hyrjen urgjente të ndihmës humanitare, ndalimin e okupimit dhe ndalimin e zhvendosjes së popullit palestinez.

  • Rama njofton rritje pagash për zjarrfikësit me të njëjtën formulë si për Forcat e Armatosura

    Rama njofton rritje pagash për zjarrfikësit me të njëjtën formulë si për Forcat e Armatosura

    Në prezantimin e strategjisë së re të Mbrojtjes Civile, kryeministri Edi Rama njoftoi rritje të pagave të zjarrfikësve me të njëjtën formulë si për Forcat e Armatosura. Sipas kreut të qeverisë pagat e zjarrfikësve nuk i përgjigjen lartësisë së detyrës së tyre, prandaj do t’i nënshtrohen rritjes së vazhdueshme të pagave.

    “Dua të nënvizoj që siç e kam thënë edhe më parë, por edhe e kam shpjeguar në përcaktimin e prioriteteve të ministrisë së Brendshme, zjarrfikësit do të kalojnë në një nivel tërësisht tjetër vëmendjeje, trajtimi dhe mbështetjeje. Do të thotë që ndër të tjera, zjarrfikësit do të përfshihen në formulën e rritjes së pagave të FA, që sot janë dëshmitare të një rritjeje të vazhdueshme dhe të qëndrueshme të pagave me synimin që në Shqipërinë 2030, ne të kemi një forcë të armatosur të Shqipërisë në mesataren e pagave të NATO-s. Synim ambicioz për të realizueshëm, sot kemi FA më të mirëpaguara të rajonit. Në këtë formulë do të fusim edhe zjarrfikësit, që do të bëjmë rritje të vazhdueshme të pagës, shumë e rëndësishme dhe të domosdoshme. Çdo stinë vere, pagat e tyre nuk i përgjigjen lartësisë së kësaj sfide. Është një plan i tërë për modernizimin e mëtejshëm dhe rritjen e kapaciteteve të gjithë trupës tonë të zjarrfikësve. Për këtë arsye, unë kam shumë besim që ky vit, deri në përballjen e ardhshme, do të jetë kyç për një performancë më të mirë në territor, ku jo vetëm shpirti i sakrificës, ndjenja e fuqishme e shërbimit që i kanë karakterizuar për hir të së vërtetës të gjithë djemtë, edhe ndonjë vajzë, në këtë përballje, por edhe aftësitë teknike, mbështetja me teknologji, mjete që të jenë në një nivel që rritet vit pas viti”, tha Rama.

    Rama theksoi se masat e reja kundër zjarrvënësve janë gati dhe pritet të hidhen për konsultim publik.

    “Te zjarret klima ka ndikimin e vet të madh. Por ana tjetër e medaljes janë zjarrvënësit, të cilët do të kemi shtrëngim të ri në Kodin Penal. Është përgatitur dhe do të kalojë për konsultim publik bashkë me masat e tjera që lidhen me aktivitetet e paligjshme në dëm të territorit e pronës publike dhe ndërtimet e paligjshme”.

  • Nina Dobrev shfaqet e shkëlqyer në Paris pas ndarjes nga Shaun White dhe thashethemeve me Zac Efron

    Nina Dobrev shfaqet e shkëlqyer në Paris pas ndarjes nga Shaun White dhe thashethemeve me Zac Efron

    Nina Dobrev, 36 vjeçe, tregoi se është në një fazë të re pas ndarjes nga Shaun White, teksa u pa e mahnitshme në një mbrëmje vajzash gjatë Javës së Modës në Paris.

    Ajo mbërriti në eventin ekskluziv në hotelin luksoz The Costes, e veshur me një xhaketë të zezë të thellë dhe një fund midi të ngushtë, duke i kombinuar me stileto të zeza dhe aksesorë të thjeshtë, duke lënë të kuptohet eleganca e saj e natyrshme.

    Ish-çifti, që kishte qenë bashkë për pesë vjet dhe u fejua në tetor 2024, i dha fund marrëdhënies muajin e kaluar, sipas burimeve me respekt dhe mirëkuptim të ndërsjellë, shkruan DailyMail.

    Ndërsa Shaun po përqendrohet në jetën private dhe planet për familje, Nina po shijon kohën e saj në Paris dhe duket se po rikthehet fuqishëm në fokusin profesional dhe personal.

    Që nga ndarja, aktorja është fotografuar disa herë me Zac Efron, duke nxitur spekulime për një lidhje romantike.

    Megjithatë, ajo i përmbajti komentet dhe thjesht theksoi: “Po, jemi shokë”. Në javët e fundit, dyshja është parë duke kaluar kohë së bashku në Itali dhe në një jaht luksoz në Sardenjë, gjithmonë në shoqërinë e miqve të përbashkët të famshëm.

    Nina shprehu optimizëm për të ardhmen dhe theksoi rëndësinë e karrierës së saj: “Jam e entuziazmuar për të ardhmen dhe e vetmja gjë e garantuar është ndryshimi”, tha ajo, duke treguar qartazi se po përqendrohet në veten dhe në projektet e reja profesionale.

  • Takaichi pritet të bëhet kryeministrja e parë femër në histori në Japoni

    Takaichi pritet të bëhet kryeministrja e parë femër në histori në Japoni

    Partia në pushtet në Japoni ka zgjedhur Sanae Takaichi si udhëheqësen e saj të re, e cila pritet të bëhet kryeministrja e parë femër në historinë e vendit.

    Partia Liberale Demokratike (LDP) zgjodhi Takaichi-n, 64 vjeç, për të rifituar besimin e publikut të zemëruar nga rritja e çmimeve dhe për t’u përballur me sfidat që sjellin grupet e opozitës, të cilat premtojnë masa stimuluese dhe politika kundër të huajve.

    Një votim parlamentar për zgjedhjen e kryeministrit që do të zëvendësojë Shigeru Ishibën pritet më 15 tetor.

    Sfidat e udhëheqëses së re

    Presidentja e re e LDP-së ka të ngjarë të pasojë Ishibën si drejtuesja e ekonomisë së katërt më të madhe në botë, pasi partia, e cila ka qeverisur Japoninë për pjesën më të madhe të periudhës së pasluftës, është më e madhja në parlament. Megjithatë, kjo nuk është një garanci absolute, pasi partia dhe partneri i saj i koalicionit kanë humbur shumicën në të dyja dhomat gjatë vitit të kaluar.

    Takaichi, e vetmja grua midis pesë kandidatëve të LDP-së, mundi Shinjiro Koizumi-n, 44 vjeç, më të moderuar, në raundin e fundit të votimit për t’u bërë udhëheqësja më e re e vendit në kohët moderne. Ish-ministrja e Brendshme pason partinë në një periudhë krize.

    Parti të tjera, përfshirë Partinë Demokratike Popullore dhe Sanseiton anti-imigracionit, kanë tërhequr vazhdimisht votues, veçanërisht të rinjtë, larg LDP-së.

    “Kohët e fundit, kam dëgjuar zëra të ashpër nga e gjithë vendi që thonë se nuk e dinë më se çfarë përfaqëson LDP-ja”, tha Takaichi në fjalimin e saj para raundit të dytë të votimit.
    “Më motivon kjo ndjenjë urgjence. Doja ta shndërroja ankthin e njerëzve për jetën e tyre të përditshme dhe të ardhmen në shpresë”, shtoi ajo.

    Qëndrimet politike dhe vizioni ekonomik

    Takaichi, e cila thotë se heroi i saj politik është kryeministrja e parë e Britanisë, Margaret Thatcher, ofroi një vizion më të qartë ndryshimi sesa Koizumi.

    Mbështetëse e strategjisë “Abenomics” të kryeministrit të ndjerë Shinzo Abe për stimulimin e ekonomisë përmes shpenzimeve agresive dhe politikës monetare liruese, ajo më parë kritikoi rritjen e normave të interesit nga Banka e Japonisë. Një ndryshim i mundshëm politikash mund t’i trembë investitorët, të shqetësuar për borxhin e lartë të vendit.

    Takaichi përmendi gjithashtu mundësinë e rinegocimit të një marrëveshjeje investimi me presidentin amerikan Donald Trump, e cila uli tarifat ndëshkuese në këmbim të investimeve japoneze të mbështetura nga taksapaguesit.

    Qëndrimet nacionaliste dhe politika e jashtme

    Pikëpamjet e saj nacionaliste, si vizitat e rregullta në Faltoren Yasukuni kushtuar të rënëve japonezë të luftës, të cilën disa fqinjë aziatikë e shohin si simbol të militarizmit, mund të tensionojnë Korenë e Jugut dhe Kinën.

    Ajo gjithashtu mbështet rishikimin e kushtetutës pacifiste të Japonisë pas luftës dhe këtë vit propozoi që Japonia të formojë një “aleancë sigurie” me Tajvanin, një ishull demokratikisht të qeverisur i pretenduar nga Kina.

    Nëse zgjidhet, Takaichi tha se do të udhëtojë jashtë vendit më rregullisht për të përhapur mesazhin se “Japonia është kthyer!”.