Blog

Presidenti francez Emmanuel Macron tha sot se Franca do t’i lejojë Ukrainës të prodhojë raketa franceze kruiz, bomba me precizion të lartë dhe raketa interceptuese për mbrojtjen ajrore, pasi Kievi porositi sisteme të reja të mbrojtjes ajrore franko-italiane dhe avionë luftarakë Rafale.

“Më herët sot, unë dhe Presidenti Zelensky ramë dakord për një plan veprimi midis dy vendeve tona, i cili zbaton atë që u ra dakord në parim nëntorin e kaluar në lidhje me bashkëpunimin tonë dypalësh në mbrojtje ”, tha Macron në një konferencë për shtyp pas një takimi me rreth 25 udhëheqës në Paris, raporton Reuters.

Prodhimi do të lidhet me bombat ajër-tokë me udhëzim preciz AASM, raketat interceptuese të mbrojtjes ajrore Aster dhe raketat kruz të lëshuara nga ajri me rreze të gjatë veprimi SCALP, të cilat prodhohen gjithashtu nga Britania e Madhe.

Macron tha gjithashtu se sistemet e radarëve do t’i jepen Ukrainës. Ai deklaroi se Zelensky urdhëroi gjithashtu dorëzimin e sistemeve të reja të mbrojtjes ajrore SAMP/T, të cilat do të shoqërojnë dorëzimin e versionit më të vjetër të atij sistemi dhe sasive shtesë të raketave.

Macron tha se 16 avionë luftarakë Rafale do t’i dorëzohen Ukrainës, të cilët duhet të jenë funksionalë në hapësirën ajrore të Ukrainës deri në vitin 2028-2029.

Macron njoftoi gjithashtu se aleatët e Ukrainës kanë rënë dakord të fillojnë stërvitje ushtarake në vendet që kufizohen me Ukrainën, si pjesë e një plani për të formuar forca shumëkombëshe që do të vendosen pas arritjes së një armëpushimi me Rusinë.

Piloti i kompanisë ajrore Ravenair tërhoqi vëmendjen e publikut pasi shkroi fjalinë “I’m bored” (Jam mërzitur) mbi qiejt e Anglisë dhe Uellsit në itinerarin e fluturimit.

Kjo lëvizje e pazakontë u regjistrua qartë në faqen e njohur të gjurmimit të fluturimeve Flightradar24.

Siç raportohet nga The Guardian, piloti, një instruktor fluturimi në të njëzetat e tij, fluturoi nga Liverpooli të shtunën me një aeroplan të vogël Piper Tomahawk.

Linja ajrore tha se ishte një fluturim rutinë testues dy-orësh, qëllimi i të cilit ishte testimi i avionit pas zëvendësimit të njërit prej cilindrave.

Gjatë fluturimit, pilotit iu deshën 20 minuta për të shkruar mesazhin e tij mbi grykëderdhjen e lumit Dee. Sipas të dhënave, ai ka fluturuar në një lartësi prej 335 metrash, me një shpejtësi prej rreth 100 nyjesh, duke bërë kthesa të ngushta dhe të sakta në mënyrë që shkronjat të dukeshin në radar.

Wayne Barrett, menaxheri i operacioneve të linjës ajrore, konfirmoi se avioni po funksiononte në mënyrë perfekte dhe theksoi se piloti i ri nuk do të përballet me asnjë sanksion. Për më tepër, ai vlerësoi aftësitë e tij.

“Unë mendoj se ai ishte fjalë për fjalë pak i mërzitur sepse ishte thjesht një fluturim provë. Ishte fluturim mjaft i aftë, megjithatë. Edhe pse mund të ishte mërzitur në fillim, ai ndoshta duhej të përqendrohej shumë për të nxjerrë fjalët,” tha Barrett.

Ai gjithashtu shtoi se avioni u kthye i sigurt në hangar, ndërsa pilotit iu dha një ditë pushimi.

Investimet e huaja në Ballkanin Perëndimor po bëhen gjithnjë e më intensive në kapital, ndërsa për çdo shumë të investuar po gjenerohen më pak vende pune se më parë.

Banka Botërore në raportin e fundit Rajonal vuri në dukje se investimet e huaja direkte për çdo vend pune janë rritur në pjesën më të madhe të vendeve të rajonit gjatë periudhës 2021–2025, krahasuar me vitet 2016–2020. Treguesi mat raportin ndërmjet vlerës së investimit dhe numrit të vendeve të punës që krijohen. Rritja e tij do të thotë se projektet e reja kërkojnë më shumë kapital për çdo vend pune të hapur, duke sinjalizuar një zhvendosje drejt investimeve më të mëdha, më të kushtueshme dhe më pak intensive në punësim.

Shuma e investuar për një vend pune pas pandemisë shënoi rritjen më të fortë në Shqipëri me mbi 300% në krahasim me periudhën 2016-2020, ndërsa Serbia u rendit e dyta, me rreth 190%. Mali i Zi dhe Maqedonia e Veriut shënuan rritje më të moderuara, në intervalin rreth 80–90%.

Në Bosnjë-Hercegovinë, shpenzimi kapital për vend pune mbeti pothuajse i pandryshuar, duke treguar se struktura e projekteve të investimeve nuk ka ndryshuar ndjeshëm krahasuar me periudhën e mëparshme. Kosova paraqiti një ecuri të ndryshme, pasi në periudhën 2021–2025 investimet e huaja për një vend pune u ngadalësuan.

Madhësia e projekteve të investimeve u rrit në shumicën e vendeve të Ballkanit Perëndimor ndërmjet viteve 2010 dhe 2025, me përjashtim të Bosnjë-Hercegovinës dhe Malit të Zi.

Rritja u bë më e dukshme në Shqipëri pas vitit 2020, ndërsa në Maqedoninë e Veriut dhe Kosovë kishte nisur që prej vitit 2018. Në vlerë absolute, projektet më të mëdha u regjistruan në Mal të Zi, e ndjekur nga Serbia.

Kjo prirje tregon se investimet e huaja po orientohen më shumë drejt projekteve që kërkojnë shuma të mëdha për ndërtesa, pajisje, teknologji dhe infrastrukturë, por që nuk po krijojnë një numër të lartë vendesh pune. Për rrjedhojë kapitali i investuar po rritet më shpejt se punësimi i gjeneruar prej tij.

Rritja e shpenzimeve kapitale për vend pune mund të ketë edhe efekte pozitive, nëse lidhet me teknologji më të avancuar, automatizim dhe rritje të produktivitetit. Por në rastin e vendeve të Ballkanit treguesi nuk provon se projektet janë më produktive apo se po krijojnë vende pune më cilësore. Investimet në sektorin e energjisë sidomos parqet fotovoltaike, prodhim energjie apo në pasuri të paluajtshme, gjenerojnë kapital por jo punësim.

Të martën parashikohet të mbajë mot me diell dhe vranësira të pakta.

Era do të fryjë kryesisht nga drejtimi i veriut, me shpejtësi prej 12-35 km/h.

Temperaturat minimale do të lëvizin prej 12 deri në 16°C, ndërsa ato maksimale prej 27 deri në 31°C. /MeteoKosova/

Ministrja në Qeverinë e Serbisë, Snežana Paunović, ka shkaktuar reagime me një deklaratë të bërë gjatë një interviste për mediat serbe, ku ka folur për ish-presidentin serb, Sllobodan Millosheviq, dhe luftën në Kosovë.

“Po të isha unë Sllobodan Millosheviq do ta kisha spastruar etnikisht Kosovën në vitin 1998”, një deklaratë skandaloze për shkak të referimit ndaj spastrimit etnik të shqiptarëve të Kosovës gjatë periudhës së luftës së viteve 1998–1999.

Për deklaratën skandalzoe ka pasur shumë reagime.

Presidenti turk, Recep Tayyip Erdogan, ka thënë se Turqia po bën dhe do të bëjë gjithçka që është e nevojshme për të parandaluar përsëritjen e vuajtjeve si gjenocidi i Srebrenicës.

Duke folur pas kryesimit të një mbledhjeje të kabinetit në kryeqytetin Ankara të hënën, Erdogan tha se Turqia do të vazhdojë të punojë për “një Bosnjë dhe Hercegovinë të qëndrueshme dhe të begatë, ku njerëz me besime, kultura dhe identitete etnike të ndryshme jetojnë së bashku në paqe”.

Në takimin e NATO-s të 7-8 korrikut në kryeqytetin turk, Erdogan tha se Ankaraja kishte rritur dukshmërinë e saj ndërkombëtare “më shumë se kurrë më parë” duke pritur me sukses një “samit historik”, transmeton Telegrafi.

Erdogani tha se samiti ishte “një nga samitet e NATO-s më të ndjekura nga media” krahasuar me takimet e mëparshme të aleancës në të cilat ai kishte marrë pjesë, duke shtuar se ai shfaqi “madhështinë e plotë të traditës shtetërore të rrënjosur thellë të Turqisë”.

Ai tha se në një kohë kur “rendi i vjetër është në kujdes intensiv dhe sistemi i ri po përjeton dhembje lindjeje”, kompleksi presidencial ishte bërë qendra e diplomacisë globale.

Koalicioni i OJQ-ve për Mbrojtjen e Fëmijëve (KOMF) ka ngritur shqetësime për sfidat me të cilat përballen fëmijët në qasjen dhe cilësinë e shërbimeve shëndetësore në Kosovë, kjo pasi një nënë në Klinikën e Pediatrisë tregoi për kushtet e rënda në këtë klinikë.

KOMF ka theksuar se ndonëse kujdesi shëndetësor falas për fëmijët garantohet me Ligjin për Mbrojtjen e Fëmijës, mungesa e personelit, kushtet infrastrukturore, furnizimi i pamjaftueshëm me barna dhe material shpenzues vazhdojnë të ndikojnë në cilësinë e trajtimit.

KOMF ka kërkuar masa urgjente për përmirësimin e kushteve, rritjen e kapaciteteve njerëzore dhe krijimin e një sistemi të rregullt për monitorimin e përvojës së pacientëve, duke theksuar se zëri i prindërve duhet të jetë pjesë e vendimmarrjes në shëndetësi.

Reagimi i plotë:

E drejta e fëmijës për kujdes shëndetësor është e garantuar me Konventën për të Drejtat e Fëmijës, Ligjin për Shëndetësi dhe Ligjin për Mbrojtjen e Fëmijës. Neni 42 i Ligjit për Mbrojtjen e Fëmijës garanton kujdes shëndetësor falas për fëmijët, duke u mundësuar atyre qasje në shërbime të trajtimit dhe rehabilitimit sipas standardeve të larta. Për garantimin e kësaj të drejte është përgjegjëse Ministria e Shëndetësisë.

Megjithatë, fëmijët vazhdojnë të përballen me sfida në qasjen dhe cilësinë e shërbimeve shëndetësore. Sipas hulumtimit të realizuar nga Shoqata për të Drejtat e Pacientëve, organizatë anëtare e KOMF, në Spitalin e Përgjithshëm të Prizrenit dhe Spitalin e Përgjithshëm të Gjilanit për matjen e kënaqshmërisë dhe përvojave të pacientëve, janë evidentuar mangësi të shumta, veçanërisht në shërbimet shëndetësore për fëmijët. Pacientët e Repartit të Pediatrisë renditen ndër repartet me nivelin më të ulët të kënaqshmërisë krahasuar me pacientët e reparteve të tjera. Në këtë kanë ndikuar faktorë të ndryshëm, si qasja ndaj pacientëve, cilësia e shërbimeve mjekësore, infermierore dhe diagnostike, kushtet infrastrukturore dhe higjiena, furnizimi me barna, cilësia e ushqimit, etj. Të dhënat po ashtu tregojnë se niveli i higjienës në repartet e pediatrisë është më i ulët krahasuar me repartet e tjera, duke ngritur shqetësime serioze për cilësinë dhe sigurinë e kujdesit që u ofrohet fëmijëve.

Sipas Kartës së Vlerësimit të publikuar nga KOMF, një nga sfidat kryesore në kujdesin sekondar dhe terciar mbetet mungesa e personelit shëndetësorë dhe mbingarkesa e klinikave të pediatrisë. Klinika e Pediatrisë në Qendrën Klinike Universitare të Kosovës vazhdon të punojë me kapacitete të kufizuara dhe me mbingarkesë të vazhdueshme. Numri i personelit shëndetësor mbetet i pamjaftueshëm në raport me numrin e pacientëve fëmijë, duke ndikuar drejtpërdrejt në cilësinë e ofrimit të shërbimeve.

Funksionalizimi i Spitalit të ri Kirurgjik Pediatrik ka përmirësuar përkujdesjen shëndetësore për fëmijët në nivel terciar, duke integruar shërbimet e emergjencës pediatrike, traumës, rikuperimit, si dhe ambulancat specialistike pediatrike dhe kirurgjike. Megjithatë, një pjesë e madhe e shërbimeve pediatrike vazhdon të operojë në “objektin e vjetër të Klinikës së Pediatrisë, në kushte infrastrukturore absolutisht të pa pranueshme që nuk përmbushin standardet për ofrimin e shërbimeve cilësore dhe dinjitoze për fëmijët.

Edhe pse Ligji për Mbrojtjen e Fëmijës garanton kujdes shëndetësor falas, në vazhdimësi raportohet nga prindërit dhe mediat për mungesë të barnave dhe materialeve shpenzuese në kujdesin parësor shëndetësor, spitalet rajonale dhe Qendrën Klinike Universitare të Kosovës. Mungesa e barnave dhe terapisë së nevojshme mund të ketë pasoja serioze për shëndetin e fëmijëve, ndërsa në mungesë të tyre, prindërit detyrohen t’i sigurojnë ato me shpenzimet e tyre, edhe kur bëhet fjalë për barna nga Lista Esenciale. Kjo cenon parimin e qasjes së barabartë në kujdesin shëndetësor dhe krijon barrë financiare për familjet.

Aktualisht institucionet nuk disponojnë të dhëna për nivelin e kënaqshmërisë së pacientëve me shërbimet shëndetësore, pasi nuk ekziston një sistem monitorimi për matjen e përvojës dhe kënaqshmërisë së pacientëve. Përvojat e pacientëve duhet të shërbejne si një burim i rëndësishëm për identifikimin e mangësive dhe përmirësimin e cilësisë së shërbimeve, ndërsa përjashtimi i tyre nga procesi i vlerësimit është i pa paranueshëm dhe rrezikon që problemet reale të mbeten të padukshme dhe të paadresuara.

Është e domosdoshme që institucionet shëndetësore të ndërmarrin masa urgjente për përmirësimin e kushteve, rritjen e kapaciteteve njerëzore dhe garantimin e shërbimeve cilësore me në qendër fëmijën. Zëri i prindërve duhet të jetë pjesë e pandashme e çdo vendimmarrjeje për shëndetësinë.

Qendra Klinike Universitare e Kosovës (QKUK) ka njoftuar se ka formuar një komision ad-hoc për të zhvilluar hetim administrativ lidhur me rastin e raportuar në Klinikën e Pediatrisë, pas shqetësimeve të ngritura publikisht nga një familje për trajtimin e fëmijës së tyre.

“Drejtori i QKUK-së ka marrë vendim për formimin e një komisioni ad-hoc, i cili po zhvillon një hetim të plotë administrativ për të verifikuar të gjitha rrethanat e rastit. Hetimi do të përfshijë shqyrtimin e pretendimeve lidhur me trajtimin e pacientit, komunikimin dhe sjelljen e stafit, si dhe çdo lëshim eventual, nga ato menaxheriale deri te ato teknike”, thuhet në njoftimin e QKUK-së.

QKUK bën të ditur se gjatë verifikimeve fillestare janë konstatuar disa parregullsi, përfshirë edhe ato të pasqyruara në fotografitë e publikuara.

Për këtë arsye, janë dhënë vërejtje ndaj personave përgjegjës në zinxhirin hierarkik menaxherial, ndërsa është suspenduar përkohësisht një punëtor i shërbimeve teknike.

“Për të mundësuar zhvillimin e paanshëm të hetimit administrativ lidhur me pretendimet për trajtimin e pacientit, komunikimin dhe sjelljen e stafit, janë ndërmarrë masa të përkohshme administrative ndaj katër (4) infermierëve”, thuhet tutje në njoftim.

QKUK ka bërë të ditur se, pas përfundimit të hetimit administrativ, do ta njoftojë publikun për gjetjet e komisionit dhe masat që do të ndërmerren, me synim ruajtjen dhe forcimin e besimit të qytetarëve në institucionet publike shëndetësore.