Arti shqiptar është në zi. Është ndarë nga jeta në moshën 78-vjeçare aktori dhe humoristi i njohur Todi Llupi, një prej figurave më të spikatura të Estradës Profesioniste të Fierit dhe një ikonë e humorit shqiptar.
Me një karrierë artistike që zgjati më shumë se pesë dekada, Todi Llupi u bë pjesë e Estradës së Fierit në vitin 1971, duke dhënë një kontribut të jashtëzakonshëm në ngritjen e saj ndër më të mirat në vend. Me talentin e tij të veçantë, interpretimin plot finesë dhe përdorimin mjeshtëror të dialektit myzeqar, ai fitoi zemrat e publikut dhe u kthye në një nga artistët më të dashur për breza të tërë.
Përveç dhjetëra roleve në skenën e estradës, Llupi interpretoi edhe në disa filma artistikë, duke lënë gjurmë të pashlyeshme në historinë e kinematografisë dhe humorit shqiptar.
Në vitin 1989 ai u vlerësua me titullin “Artist i Merituar”, si mirënjohje për kontributin e tij të çmuar në artin dhe kulturën shqiptare.
Ndarja nga jeta e Todi Llupit përbën një humbje të madhe jo vetëm për qytetin e Fierit, por për gjithë artin shqiptar. Trashëgimia e tij artistike do të mbetet e gjallë përmes roleve dhe kujtimeve që ka lënë tek publiku.
Një person është arrestuar pasi i njëjti kishte tentuar që ta kryente grabitjen në një argjendari.
Sipas raportit 24 orësh të Policisë së Kosovës bëhet e ditur se rasti ka ndodhur të hënën rreth orës 14:09 në rrugën “Shatërvani”, në Gjilani.
Tutje thuhet se nga i dyshuari janë konfiskuar: një revole, një kapelë e zezë, një skuter dhe një çantë krahu.
“Raportohet se është arrestuar i dyshuari mashkull kosovar, pasi që i njëjti kishte tentuar që ta kryente grabitjen në një argjendari. Nga i dyshuari janë konfiskuar: një revole, një kapelë e zezë, një skuter dhe një çantë krahu. Me vendim të prokurorit, i dyshuari pas intervistimit dërgohet në mbajtje”, thuhet në njoftim. /Telegrafi/
Hoxhaj: Shqipëria dhe Mali i Zi po ecin përpara, Kosova qe 3 vjet në sirtarët e BE-së, s’po merret askush me të
Ish-ministri i jashtëm i Kosovës, Enver Hoxhaj, ka reaguar pas avancimit të Shqipërisë dhe Malit të Zi në procesin e integrimit evropian, duke thënë se zhvillimet e sotme duhet të shërbejnë si një thirrje për reflektim për Kosovën.
Hoxhaj ka uruar Shqipërinë për avancimin në negociatat e anëtarësimit me Bashkimin Evropian dhe Malin e Zi për mbylljen e dy kapitujve të tjerë negociues, duke vlerësuar se të dy shtetet po e shndërrojnë vizionin e tyre evropian në realitet.
“Sot është një ditë e rëndësishme për Ballkanin. Shqipëria po avancon në negociatat e anëtarësimit me Bashkimin Evropian, ndërsa Mali i Zi po mbyll edhe dy kapituj të tjerë në rrugën e tij drejt anëtarësimit. Urime të dy shteteve për këtë sukses dhe për vizionin evropian që po e shndërrojnë në realitet”, ka shkruar Hoxhaj.
Duke folur për pozitën e Kosovës, ai ka theksuar se vendi ka humbur ritmin në procesin e integrimit evropian.
“Deri para 7 vitesh, vendi ynë kishte një perspektivë shumë më të besueshme evropiane dhe gëzonte një mbështetje më të madhe nga partnerët tanë. Ndërkaq, qe 3 vjet Kosova pret që statusin e vendit kandidat ta shqyrtojë dikush, por ai ka mbetur në sirtarët e Bashkimit Evropian dhe askush nuk po merret me të”, ka deklaruar Hoxhaj.
Sipas tij, ndërsa vendet e tjera të rajonit po afrohen gjithnjë e më shumë me Bashkimin Evropian, Kosova rrezikon të mbetet prapa në procesin e integrimit.
“Sot, ndërsa Shqipëria dhe Mali i Zi po afrohen çdo ditë e më shumë me Bashkimin Evropian, Kosova rrezikon të mbetet e fundit në rajon në rrugën drejt anëtarësimit. Kosova meriton ta rikthejë vendin e saj në agjendën evropiane dhe të ecë përpara me besueshmëri e vizion”, ka përfunduar Hoxhaj.
Kryetari i Komunës së Prizrenit, Shaqir Totaj, ka vazhduar kritikat ndaj Qeverisë Kurti.
Ai ka numëruar disa vendime të Qeverisë që kanë ndikuar drejtpërdrejtë në financat e pushtetit lokal.
Në profilin e tij në Facebook, ai ka shkruar se njëra nder këto vendime është edhe shkurtimi i Grantit të Performancës Komunale.
“Përveç barrës së vazhdueshme financiare që komunat po përballojnë nga zbatimi i Kontratës Kolektive, e cila vetëm gjatë këtij viti arrin në dhjetëra milionë euro, gjatë periudhës së fundit janë ndërmarrë edhe disa vendime të tjera me ndikim të drejtpërdrejtë dhe të konsiderueshëm në financat e pushtetit lokal. Shqetësuese është se të gjitha këto vendime janë marrë pa asnjë konsultim me komunat, ndonëse pasojat financiare bien drejtpërdrejt mbi buxhetet komunale dhe ndikojnë në cilësinë e shërbimeve për qytetarët”, ka shkruara ai, duke përmendur vendime me radhë.
“1. Shkurtimi i Grantit të Performancës Komunale
Ligji për Ndarjet Buxhetore për vitin 2026 ka paraparë 4 milionë euro nga buxheti i shtetit për Skemën e Grantit të Performancës. Megjithatë, janë ndarë vetëm 2 milionë euro, duke e përgjysmuar fondin qeveritar në kundërshtim me ligjin dhe duke dëmtuar komunat që kanë përmbushur kriteret ligjore për përfitim. Për më tepër, edhe këto mjete ende nuk janë shpërndarë te komunat dhe nuk dihet se kur do të realizohet shpërndarja e tyre, duke krijuar pasiguri të mëtejshme për komunat përfituese. 2. Moszbatimi i aktgjykimit të Gjykatës Kushtetuese për përvojën e punës Moszbatimi nga Ministria e Financave i aktgjykimit të Gjykatës Kushtetuese lidhur me kompensimin e përvojës së punës (0.5% në vend të 0.25%) për periudhën nga fillimi i vitit 2023, gjatë vitit 2024 dhe vitit 2025 krijon obligime të konsiderueshme financiare. Si pasojë, barra financiare për zyrtarët publikë të nivelit lokal pritet t’u bartet komunave, duke rrezikuar seriozisht stabilitetin e financave komunale”, ka shkruar Totaj.
Festivali Sunny Hill është shndërruar në një nga atraksionet më tërheqëse verore të Evropës Juglindore, duke tërhequr adhurues të muzikës nga rreth 60 shtete, në Prishtinë për edicionin e vitit 2026, që mbahet nga 31 korriku deri më 2 gusht. Një qytet që dikur njihej kryesisht për historinë e vet të pasluftës, tashmë çdo verë mbushet plot, pasi vizitorët ndërkombëtarë planifikojnë udhëtimet e tyre rreth datave të festivalit.
Gjatë festivalit, hotelet në të gjithë Prishtinën mbushen rreth 99–100% të kapacitetit që kanë, ndërsa në pjesën tjetër të Kosovës rezervimet arrijnë rreth 96%. Akomodimet afatshkurtra, restorantet, kafenetë dhe shërbimet e taksive funksionojnë me kapacitet të plotë, ndërsa shumë vizitorë ndërkombëtarë e zgjasin qëndrimin e tyre deri në dy javë për të eksploruar rajonin më gjerë – duke e kthyer një ngjarje treditore në një sezon turistik që zgjat disa javë.
Mediat e pavarura kanë bërë krahasimin e qartë: Sunny Hill po bën për një shtet atë që “Coachella” bëri për një qytet shkretinor. Gjatë tri ditëve, me programin që shtrihet në katër skena, festivali mirëpret mbi 100,000 vizitorë dhe po ndihmon që Prishtina të njihet si një kryeqytet evropian, i përballueshëm dhe me një mikpritje të ngrohtë e autentike, një përvojë e veçantë për udhëtarët që zgjedhin të dalin përtej kornizave të destinacioneve të zakonshme.
Edicioni i vitit 2026 sjell një kombinim të emrave më të mëdhenj globalë – Katy Perry, Keinemusik, Martin Garrix dhe një listë të pasur artistësh të muzikës elektronike, përfshirë Seth Troxler, Carlita dhe Pawsa – së bashku me artistë lokalë për një përvojë vendase. Për shumicën e vizitorëve, festivali është arsye për të vizituar Kosovën, ndërsa vetë vendi arsye për të qëndruar më gjatë.
“Ne gjithmonë kemi dashur që Sunny Hill të jetë një arsye që bota të vijë dhe ta vizitojë Kosovën,” thotë bashkëthemeluesi i festivalit, Dukagjin Lipa. “Njerëzit vijnë për muzikën dhe largohen duke rënë në dashuri me vendin, me ushqimin, me energjinë dhe mikpritjen. Kjo është gjëja më e vlefshme që një festival mund t’i dhurojë një vendi”.
Biletat treditore të rregullta dhe ato VIP janë tashmë në shitje. Duke pasur parasysh kërkesën e lartë ndërkombëtare dhe kapacitetet akomoduese, organizatorët rekomandojnë që të bëhet sa më herët rezervimi i biletës e akomodimit.
Për bileta, ose për paketën e plotë të udhëtimit si dhe për më shumë informacione, ju lutem vizitoni www.sunnyhillfestival.com.
Deputetja e LDK-së, Hykmete Bajrami, ka reaguar lidhur me situatën në sistemin shëndetësor në Kosovë, duke adresuar kritika ndaj qeverisë aktuale për mënyrën e menaxhimit të këtij sektori.
Bajrami ka deklaruar se problemet në shëndetësi janë pasojë e keqmenaxhimit dhe mungesës së përgjegjësisë institucionale. Ajo ka kërkuar që gjendja reale të shihet përmes përvojës së pacientëve në klinika, listave të pritjes dhe mungesave me të cilat përballen institucionet shëndetësore.
Sipas saj, mjekët dhe infermierët nuk duhet të fajësohen për vështirësitë në sistem, pasi ata punojnë në kushte të rënda dhe vazhdojnë të ofrojnë shërbime pavarësisht mungesave.
Deputetja opozitare ka ngritur shqetësime edhe për proceset e tenderimit në shëndetësi, duke pretenduar se fondet e mëdha nuk po përkthehen në përmirësim të shërbimeve për qytetarët. Ajo ka përmendur mungesa të barnave, pajisjeve dhe materialeve të nevojshme në klinika.
“Gjendja në shëndetësi ka emër: emri i saj është korrupsion”, ka shkruar Bajrami në reagimin e saj, duke e bërë përgjegjës pushtetin për situatën aktuale.
Ajo ka theksuar se pas disa vitesh qeverisje dhe me buxhete të mëdha në dispozicion, gjendja në këtë sektor mbetet shqetësuese dhe ka kërkuar përgjegjësi institucionale për problemet e vazhdueshme.
Deri tani, nga institucionet qeveritare nuk ka pasur një reagim ndaj deklaratave të deputetes së LDK-së.
Oficerët e FSK-së, major Afrim Xhelili dhe major Besnik Thaqi, kanë përfunduar me sukses të lartë Kursin e Avancuar të Komandës dhe Shtabit (ACSC) në Akademinë e Mbrojtjes të Mbretërisë së Bashkuar në Shrivenham. Ata gjithashtu morën titullin Master në Studimet e Mbrojtjes nga King’s College në Londër.
Bazuar në njoftimin e FSK-së, kursi i Avancuar i Komandës dhe Shtabit ka për qëllim edukimin dhe zhvillimin e udhëheqësve të mesëm dhe të lartë për detyra komanduese dhe shtabore të nivelit strategjik dhe operacional, ky program përgatit oficerët për planifikimin dhe drejtimin e operacioneve ushtarake komplekse, bashkëpunimin me agjenci qeveritare dhe partnerë ndërkombëtarë, si dhe aplikimin efektiv të instrumenteve të fuqisë kombëtare në ruajtje të paqes dhe sigurisë në botë.
Në këtë program morën pjesë mbi 240 pjesëmarrës nga Britania e Madhe dhe nga 47 shtete të tjera nga e mbarë bota.
“Pjesëmarrja dhe diplomimi i oficerëve tanë në Akademinë e Mbrojtjes të Mbretërisë së Bashkuar dëshmon profesionalizmin dhe përkushtimin e vazhdueshëm të Kosovës për të ndërtuar një ushtri moderne dhe të përgatitur sipas standardeve më të larta ndërkombëtare”, thuhet në njoftim.
Nga spitalet e largëta deri te fushëbetejat dhe hapësira, një teknologji e re po tregon se ku mund të shkojë mjekësia nesër
Një robot humanoid ka kryer operacion për herë të parë, duke shënuar një moment të rëndësishëm për robotikën dhe kujdesin kritik shëndetësor.
Në bashkëpunim me kirurgët nga Universiteti i Kalifornisë në San Diego, një robot humanoid kreu me sukses heqjen e fshikëzës së tëmthit.
Në një operacion të dytë, dy robotë humanoidë, duke punuar krah për krah, kryen një heqje laparoskopike të fshikëzës së tëmthit. Të dyja procedurat, të realizuara si pjesë e një eksperimenti për dëshmimin e konceptit, u kryen te gjitarë jo-primatë.
“Ky studim tregon se robotët humanoidë kanë një të ardhme të mundshme në fushën e kirurgjisë”, tha Michael Yip, anëtar i fakultetit në Departamentin e Inxhinierisë Elektrike dhe Kompjuterike në UC San Diego dhe një nga autorët kryesorë të punimit.
“Robotët humanoidë të komanduar nga distanca dhe ata autonomë kanë potencial real për të zgjeruar qasjen në operacione kritike, të cilave pacientët përndryshe nuk do të mund t’u qaseshin. Kjo mund të ndihmojë në adresimin e krizës së kujdesit shëndetësor, jo vetëm në Shtetet e Bashkuara, por edhe në mbarë botën.”
Studiuesit që qëndrojnë pas këtij zhvillimi thonë se robotët humanoidë ofrojnë disa përparësi krahasuar me sistemet e specializuara robotike kirurgjikale që përdoren aktualisht.
Humanoidët zakonisht kushtojnë më pak për t’u prodhuar, janë më të lehtë për t’u vendosur në zona të largëta dhe janë shumë më të gjithanshëm sa i përket llojit të procedurave dhe detyrave që mund të kryejnë.
“Kushton shumë më pak dhe zë shumë më pak hapësirë në sallën e operacionit”, tha Shanglei Liu, mjek dhe asistent profesor i kirurgjisë në Shkollën e Mjekësisë të UC San Diego, një nga autorët kryesorë të punimit, i cili e komandoi robotin nga distanca gjatë studimit.
“Prandaj është i lehtë për t’u vendosur kudo: nga zonat rurale, në fushëbetejë, madje edhe në hapësirë.”
Një ekip njeri-robot, i përbërë nga një robot humanoid dhe një kirurg njerëzor në rolin e asistentit, kreu me sukses heqjen e fshikëzës së tëmthit.
Robotët, të quajtur me nofkën Surgie, u komanduan nga distanca nga kirurgë të trajnuar, megjithëse studiuesit shpresojnë se zhvillimet në inteligjencën artificiale do t’u mundësojnë atyre të operojnë në mënyrë autonome në të ardhmen.
“Një nga synimet tona është të zhvillojmë asistentin kirurgjik autonom”, tha dr. Yip.
“Shumë komunitete përballen me mungesë të personelit të mjaftueshëm në ekipet kirurgjikale, që do të thotë se pacientët nuk po marrin trajtimin e nevojshëm.
Synimi ynë është një sallë operacioni e së ardhmes, ku robotët humanoidë dhe njerëzit punojnë krah për krah si një ekip i integruar për t’u ofruar procedura atyre që kanë nevojë, si në mjedise tradicionale spitalore, ashtu edhe në skenarë jo tradicionalë të mjekësisë në terren.”
Operacionet janë përshkruar në një punim me titull “Studim i fizibilitetit in vivo për përdorimin e robotëve humanoidë në kirurgji”, i publikuar të mërkurën në revistën Nature.
Detaje të reja janë zbardhur për vrasjen e Edmond Sulës, 50 vjeç i cili u vra të dielën pak pas mesnatën në fshatin Bërxullë të Vorës. Burime nga grupi hetimore bëjnë të ditur se ka dyshime se autorët kanë qenë vrasës me pagesë.
Sipas asaj që është parë edhe në pamjet filmike të kamerave të sigurisë autori e ka pritur 50- vjeçarin pranë banesës së tij deri në momentin që ka zbritur nga automjeti i tij dhe është drejtuar për të hyrë në banesën e tij.
Më pas e ka qëlluar me një plumb në kokë duke i marr jetën.
Autori është larguar në këmbë nga vendi i ngjarjes deri në momentin që është marr nga një makinë që dyshohet se kanë qenë bashkëpunëtorët e tij.
Pavarësisht se në deklarimet para uniformave blu familjarët e viktimës janë shprehur që nuk kanë informacion për ndonjë konflikt që mund të ketë pasur, grupi hetimorë dyshon se ngjarja të këtë ndodhur për një konflikt pronësie pasi Edmond Sula merrej me shit-blerje pronash.
Ai nuk ishte i panjohur për policinë pasi në të kaluarën ishte proceduar për disa vepra penale si rrahje, grabitje dhe konflikte të tjera. 50-vjeçari njihej si person me influencë nga komuniteti ku jetonte pasi qëndronte gjithmonë në të njëjtën kafe ku bënte edhe takime që lidheshim më shitblerjen e pronave.
Madje ai kishte në emrin e tij të regjistruar edhe një kompani për shitblerje dhe dhënie me qira makinash.
Deri tani nuk ka persona të ndaluar, ndërsa autoritetet po punojnë për identifikimin dhe kapjen e autorëve./RTSH
Inspektorati Qëndror i Punës ka sqaruar rrethanat se personit i cili ka ndërruar jetë pasi ra nga lartësia e një shtëpie në Prizren.
Sipas njoftimit thuhet se nga të dhënat fillestare rezulton se viktima nuk ka qenë punëtor.
“Sqarim lidhur me rastin e ndodhur në Prizren. Mbrëmë, rreth orës 19:00, pas njoftimit nga Policia e Kosovës, Inspektorati Qendror i Punës (IQP) ka dalë në vendin e ngjarjes së bashku me Policinë e Kosovës. Nga të dhënat fillestare rezulton se viktima nuk ka qenë punëtor”, thuhet në njoftim.
Po ashtu siç thuhet në njoftim aksidenti ka ndodhur në një shtëpi private, ku po kryheshin punime për renovimin e kulmit “ndërsa viktima nuk ishte i angazhuar në procesin e punës, por ishte vëllai i pronarit të shtëpisë”.
Po ashtu në njoftim thuhet se IQP ka konstatuar se nuk ka ekzistuar marrëdhënie kontraktuale investitor–punëkryes, si dhe nuk ka pasur marrëdhënie pune, sipas përcaktimeve ligjore.
