Blog

Një skenë si në filmat aksion të Hollywood-it janë parë në një qytet në Turqi.

Një person i kërkuar nga policia turke në Hatay për mashtrim ishte në arrati për më shumë se tre vite, transmeton Telegrafi.

Megjithatë, pasi policia ia ra në gjurmë, vendosën ta kapin në një mënyrë shumë dinake.

Një prej policëve u vesh si dërgues i ushqimit, dhe mbante një helmetë në kokë derisa po qëndronte para derës së apartamentit.

Madje për të qenë sa më bindës i thotë nga jashtë se ia ka sjellë ushqimin e porositur.

Në momentin që e hap derën, policët tjerë të uniformuar që qëndronin anash i vërsulen për ta prangosur.

Ai kërkohej nga policia pasi ishte arritur nga burgu pas një dënimi prej 77 vitesh burgim për mashtrim. /Telegrafi/

Zyrtarët policorë nga Drejtoria për Hetimin e Trafikimit me Qenie Njerëzore, në bashkëpunim me Inspektoriatin Qendror të Mbikëqyrjes së Tregut, Inspektorët e Punës dhe Administratën Tatimore të Kosovës, kanë zhvilluar operacionin “Vjeshta 2025” nga 10 deri më 15 nëntor 2025, me qëllim identifikimin e hershëm të viktimave të trafikimit dhe parandalimin e veprave penale në të gjithë vendin.

Operacioni është zhvilluar në rrugë, sheshe dhe qendra tregtare për identifikim të fëmijëve në situatë rruge si viktima të mundshme të trafikimit, kontrollimin e lokaleve “Muzikë Live”, kontrollimin e “Qendrave të Masazhit”, dhe është zhvilluar plani taktik lidhur me “Eskorta”.

Gjatë operacionit, siç ka njoftuar Policia, janë inspektuar 50 lokale të “Muzikës Live”, ku janë hasur 449 persona, përfshirë 357 gra dhe 92 burra, prej të cilëve 168 qytetarë të Kosovës dhe 281 të huaj.

Gjithashtu, janë kontrolluar 73 qendra masazhi, ku janë identifikuar 201 persona, prej të cilëve 112 shtetase kosovare dhe 89 të huaja. Si rezultat i shkeljeve administrative, janë mbyllur 6 lokale muzike dhe 5 qendra masazhi.

Autoritetet kanë iniciuar 8 raste penale për “Keqtrajtim apo braktisje të fëmijës”, duke arrestuar 8 të dyshuara, ndërsa një rast për “Marrje me prostitucion” ka rezultuar me arrestimin e 4 personave, 3 burra dhe 1 grua. Gjithashtu, janë identifikuar 19 fëmijë lëmoshkërkues.

Një tjetër kontroll është zhvilluar në një objekt me 8 njësi banesore në Prishtinë, i cili përdorej për qira të paligjshme dhe nuk ishte i regjistruar si veprimtari biznesore. Objekti u mbyll nga IQMT dhe ndaj pronarit u iniciua procedurë nga ATK për shkelje administrative.

Zyrtarët theksuan se punëtorët e hasur në lokale dhe qendra masazhi u është dhënë mundësia të deklarojnë nëse janë viktima të trafikimit, por deri tani nuk janë raportuar raste konkrete.

Operacioni ‘Vjeshta 2025’ vjen si një ndërhyrje gjithëpërfshirëse për të forcuar mbrojtjen e qytetarëve dhe për të luftuar fenomenin e trafikimit në Kosovë.

Administrata Tatimore e Kosovës ka zbuluar 157 punëtorë të padeklaruar gjatë një aksioni të gjerë inspektues, i zhvilluar në kuadër të Planit të Përbashkët Operativ kundër trafikimit me qenie njerëzore.

Aksioni, i udhëhequr nga Policia e Kosovës përmes Drejtorisë Kundër Trafikimit me Njerëz, është fokusuar kryesisht në qendrat e masazhit dhe lokalet e natës me muzikë live, veprimtari të identifikuara me rrezik të shtuar për trafikim.

Gjatë datave 10–14 nëntor, 30 ekipe të ATK-së kanë kryer 106 kontrolle në të gjitha regjionet e Kosovës. Përveç punëtorëve të padeklaruar, inspektorët kanë konstatuar edhe 20 raste të mosfiskalizimit, 35 raste të moslëshimit të kuponëve fiskal dhe një rast me mall pa dokumentacion.

Aksioni është zhvilluar në bashkëpunim me Ministrinë e Industrisë, Ndërmarrësisë dhe Tregtisë dhe Inspektoratin e Punës, në kuadër të zbatimit të Strategjisë Kombëtare Kundër Trafikimit me Njerëz 2022–2026.

ATK ka njoftuar se do të vazhdojë kontrollet dhe koordinimin me institucionet tjera, me qëllim rritjen e ligjshmërisë dhe krijimin e një tregu më të sigurt dhe më të drejtë për të gjithë.

28 dhjetori është caktuar nga presidentja Vjosa Osmani për mbajtjen e zgjedhjeve të jashtëzakonshme parlamentare.

Menjëherë pas zyrtarizimit të kësaj date ka ardhur reagimi i parë nga Lëvizja Vetëvendosje.

Nënkryetarja e Kuvendit nga ky subjekt, Albulena Haxhiu ka shkruar se festë do të ketë me 28 nëntor dhe 28 dhjetor.

“Festë edhe më 28 nëntor, edhe më 28 dhjetor. Na priftë e mbara!”, ka shkruar Haxhiu.

Pas vendimit të Këshillit Prokurorial të Kosovës për shkarkimin e ushtruesit të detyrës së Kryeprokurorit të Shtetit, Besim Kelmendi, pesë anëtarë të KPK-së dolën në një konferencë për media për të kundërshtuar vendimin.

Ata thanë se propozimi për shkarkimin e Kelmendit ishte kundërshtuar nga disa anëtarë të Këshillit, të cilët edhe u larguan nga mbledhja në shenjë mospajtimi.

Visar Krasniqi e quajti vendimin “të jashtëligjshëm”, duke argumentuar se nuk mund të merren vendime pa njoftim të anëtarëve dhe pa respektuar procedurat ligjore.

Sipas deklaratës së anëtarëve, vendimi i sotëm për shkarkimin e Kelmendit është një tentativë për të imponuar pushtet institucional në mënyrë të jashtëligjshme.

Ndërsa ushtruesi i detyrës Besim Kelmendi tha se pas këtij organizimi qëndron Blerim Isufaj, kryeprokuror i Prokurorisë Speciale.

Ata ftojnë Policinë e Kosovës që të kujdeset për sigurinë e tyre dhe mediat të monitorojnë zhvillimet.

Sipas tyre, Besim Kelmendi vazhdon të ushtrojë detyrën, duke u bazuar në faktin se vendimi i sotëm nuk ka efekt juridik dhe është i papranueshëm.