Blog

Në Shqipëri janë konfirmuar rastet e para me grip për këtë sezon.

Instituti i Shëndetit Publik deklaron se gripi i tipit A dhe nën tipi AH1N1 është në qarkullim këtë periudhë, ashtu si në shumë vende të Evropës.

Rastet e para raportohen me shenja klasike të gripit: rrufë, temperaturë të lartë dhe bllokim të rrugëve të sipërme të frymëmarrjes.

Aktualisht dominojnë rastet me Covid dhe virozat e tjera. Me fillimin e stinës së ftohtë pritet të shtohet intensiteti i rasteve me grip në bashkëqarkullim me Covid.

Ekspertët e Institutit të Shëndetit Publik flasin për rëndësinë e vaksinimit ndaj gripit për të moshuarit dhe të sëmurët kronikë.

Sezoni i gripit nis në fund të nëntorit dhe mbyllet kryesisht në fund të muajit mars. Piku i qarkullimit të tij shënohet në muajt më të ftohtë, janar-shkurt.

Sindikata e Punëtorëve të RTK-së (SPERTK) ka bërë të ditur se nga e hëna (24 nëntor) do të fillojë greva e përgjithshme e punëtorëve të televizionit publik e cila do të mbahet çdo ditë nga ora 11:00 deri në orën 13:00.

“Gjatë këtyre dy orëve ndalet çdo punë, në çdo sektor të RTK-së: redaksi, administratë, financa, arkiv, kamera, galeri, master, teknikë, produksion, regjisorë, montazh, audio, si dhe të gjitha njësitë tjera mbështetëse. Greva vlen për të gjithë, pa përjashtim”, thuhet në komunikatën e SPERTK-së, njërës prej tri sindikatave në RTK.

Sipas kësaj sindikate, kjo masë vjen pas një periudhe të gjatë kërkesash të injoruara dhe një gjendjeje që është bërë e paqëndrueshme si për stafin ashtu edhe për funksionimin e institucionit, e ku pagat janë të bllokuara dhe rrezikohet seriozisht vazhdimësia e RTK-së.

“Kërkojmë nga menaxhmenti i RTK-së të marrë vendim të qartë për mosmbulim të fushatës zgjedhore. Pa një vendim të tillë, stafi rrezikon të përfshihet në situata të padrejta dhe të ekspozohet ndaj presioneve të jashtme. Nëse menaxhmenti nuk del me qëndrim, SPERTK do të thërrasë bojkotin e plotë të zgjedhjeve nga ana e gjithë kolegëve”, thuhet tutje në komunikatë.

Sipas SPERTK-së, greva do të shoqërohet shumë shpejt edhe me protestë në shesh, para Qeverisë, për të cilën do të njoftohet me kohë.

“Kjo protestë është e domosdoshme, sepse gjendja në RTK ka kaluar çdo kufi të durimit. Ftojmë të gjithë punonjësit të qëndrojnë të bashkuar dhe t’i përmbahen vendimeve të Sindikatës. Bashkimi ynë është i vetmi mjet për të mbrojtur punën, dinjitetin dhe shërbimin publik që i ofrojmë vendit. Qëllimi ynë është i vetëm: zgjidhja urgjente e çështjes së pagave dhe garantimi i funksionimit normal të RTK-së. Pasi nuk ka Kuvend aktiv, kërkojmë që Qeveria, përkatësisht Ministria e Financave, të marrë vendimin e nevojshëm pa asnjë vonesë. Nëse për zgjedhje gjenden mjete, atëherë duhet të gjenden edhe për RTK-në. Media publike nuk mund të lihet në kolaps”, thekson në fund SPERTK.

Tre persona kanë pësuar lëndime trupore si pasojë e një aksidenti që ka ndodhur mes dy veturave në Gllarevë të Klinës.

Rastin e ka konfirmuar zëdhënësi i policisë për rajonin e Pejës Fadil Gashi.

Gashi deklaroi se në aksident ishin të përfshirë dy vetura.

“Të lënduarit janë dërguar për trajtim në Qendrën Kryesore të Mjekësisë Familjare. Sipas informacioneve janë jashtë rrezikut për jetën. Në vendin e ngjarjes ka dal policia dhe po e heton rastin”, theksoi ai.

Një 30-vjeçar shqiptar, i identifikuar si Sajmir Beca, ka vdekur tragjikisht pasi u shtyp nga një kamion mbeturinash në Northampton të Anglisë.

The Sun raporton se 30-vjeçari po flinte brenda një koshi plehrash. Ngjarja e rëndë ndodhi më 31 tetor në Rrugën Wellington, ku fqinjët raportuan se u zgjuan nga britma të forta në orët e para të mëngjesit.

Shërbimet e urgjencës mbërritën menjëherë në vendin e ngjarjes dhe e transportuan me urgjencë Sajmirin drejt Spitalit të Coventry-t. Pavarësisht ndërhyrjeve mjekësore, i riu nuk arriti t’u mbijetonte plagëve të marra dhe ndërroi jetë më 6 nëntor.

Miqtë e tij, të tronditur nga humbja, treguan se Sajmiri kishte kërkuar më herët strehë tek persona të ndryshëm, por pasi nuk gjeti një vend ku të qëndronte, përfundoi duke fjetur në rrugë.

Autoritetet britanike po vijojnë hetimet për të sqaruar rrethanat e plota të ngjarjes.

Tre fëmijë nga Ferizaj, të mërkurën e gjetën një portofol me para dhe dokumente e të njëjtin e dorëzuan në polici.

Ndërkaq, sot në Ditën Botërore të Fëmijëve presidentja e Kosovës Vjosa Osmani, i priti ata në takim.

Ajo tha se Diar, Anik dhe Rajana Terziu dhanë një shembull të jashtëzakonshëm ndershmërie.

“Ata gjetën një portofol me para dhe e dorëzuan në polici, duke treguar vlera të larta morale. Atyre ju ndava mirënjohje për aktin e ndershmërisë dhe përgjegjësisë qytetare, duke u shndërruar në shembull frymëzues për të gjithë fëmijët e vendit”, tha Osmani.

Ushtruesi i detyrës së kryetarit të AKR-së, Vesel Makolli, ka deklaruar se partia e tij do të marrë pjesë në zgjedhjet e ardhshme, duke bërë të ditur se përgatitjet tashmë kanë nisur brenda strukturave të partisë.

“Po do të marrim pjesë në zgjedhje”, tha Makolli.

Ai ka bërë të ditur se ka pasur të planifikuar një mbledhje të kryesisë.

“Sot kam pasur një ftesë dhe e kemi mbledhjen e kryesisë në ora 17:30, por e shtyva për nesër”, tha ai.

Ai mohoi se ftesa e fundit ka ardhur nga kreu i LVV-së, Albin Kurti.

“Ftesa nuk është nga Kurti, ka qenë nga ai për zgjedhjet lokale, por unë s’kam pranuar e këtë rast prej tij nuk është”, theksoi Makolli.

Makolli, foli edhe për raportet me Lidhjen Demokratike të Kosovës, duke theksuar afërsinë natyrale mes dy subjekteve.

“Po, është afërsia me LDK-në sepse gjeneza jonë aty lidhet. Një pjesë e mirë e elektoratit të AKR-së ka qenë anëtarësi e LDK-së”, u shpreh ai.