Blog

Ministria e Shëndetësisë ka konfirmuar se në mostrat e marra nga pacientët që dyshohet se u helmuan pas konsumimit të ushqimit në “Sach Pizza” është identifikuar bakteri Salmonella, ndërsa në mostrate të marra më pas nga ambientet e restoranteve nuk është gjetur prania e këtij bakteri.

“Në mostrat e pacientëve është konfirmuar bakteria Salmonella Enteritidis. Mostrat e ushqimit dhe strishot e ambientit kanë rezultuar negative”, thuhet në përgjigjen e Ministrisë së Shëndetësisë.

Megjithatë, MSH thekson se mungesa e Salmonellës në mostrat e ushqimit të marra gjatë kontrollit nuk e përjashton mundësinë që burimi i infeksionit të ketë qenë ushqimi i kontaminuar më herët.

“Mungesa e Salmonellës në mostra në momentin e kontrollit nuk e përjashton mundësinë që burimi i infeksionit të ketë qenë ushqimi i kontaminuar më herët. Të dhënat epidemiologjike tregojnë lidhje të fortë me këtë operator”, thuhet në përgjigjen për Insajderin.

Sipas Institutit Kombëtar të Shëndetësisë Publike të Kosovës deri më 14 korrik janë identifikuar 74 raste helmimi të lidhura epidemiologjikisht me konsumimin e ushqimit në disa pika të “Sach Pizza’s”.

Nga këto raste, 29 pacientë janë hospitalizuar, ndërsa 45 janë trajtuar në mënyrë ambulatore. Pacientët kanë shfaqur simptoma si barkqitje, të vjella, ethe, temperaturë dhe plogështi.

Nga ana tjetër, Sach Pizza ka kundërshtuar pretendimet se ushqimi i saj ka qenë i kontaminuar. Në një deklaratë për media, kompania ka bërë të ditur se në mostrat ushqimore të analizuara nga institucionet kompetente nuk është identifikuar Salmonella.

Ky rast është duke u hetuar nga Prokuroria dhe Policia.

Komisionarja për zgjerim e Bashkimit Evropian, Marta Kos, përsëriti dënimin e saj ndaj deklaratës së ministres të Qeverisë serbe, Snezhana Paunoviq, lidhur me “spastrimin etnik” në Kosovë dhe shprehu habinë që ajo vazhdon të mbetet ministre.

Kos u bëri thirrje politikanëve në vendet kandidate për anëtarësim në BE që të kenë parasysh se çdo fjalë e thënë ka peshë.

“Ishte tronditëse të dëgjonim diçka të tillë në vitin 2026. Nuk do ta përsëris as atë që ajo tha. Ishte vërtet tronditëse të dëgjohej një deklaratë e tillë. Nuk mund ta imagjinoj që një ministre, pas një deklarate të tillë publike, të mund të vazhdojë të ushtrojë detyrën e saj”, deklaroi komisionarja Kos, gjatë fjalimit të saj në Komitetin e Posaçëm për Mburojën e Demokracisë Evropiane të Parlamentit Evropian.

Ministrja e Administratës Shtetërore dhe Vetëqeverisjes Lokale në Qeverinë serbe, Snezhana Paunoviq, duke folur për jetën në Kosovë dhe largimin e saj nga Peja gjatë luftës, ajo deklaroi më 11 korrik se “nuk do t’i kishte likuiduar shqiptarët ashtu siç ata po përpiqen ta pastrojnë etnikisht Kosovën, por në atë mënyrë që secili që ndihej më pak qytetar i Republikës Federale të Jugosllavisë, të largohej dhe të shkonte në shtetin e vet amë”.

Kjo deklaratë u dënua edhe nga Mbretëria e Bashkuar. Sipas Londrës, gjuha e përdorur nga Paunoviq është “e neveritshme” dhe referencat për spastrim etnik s’kanë vend në shoqërinë e sotme.

Zyra Kombëtare e Auditimit ka evidentuar një sërë mangësish në menaxhimin e pasurive të Ndërmarrjes Publike “Trepça” Sh.A., duke ngritur shqetësime për administrimin dhe regjistrimin e aseteve të kompanisë.

Sipas raportit të auditimit, ndërmarrja nuk ka dokumentacion mbështetës për 59 pasuri me vlerë mbi 24.7 milionë euro, ndërsa kjo situatë ka ndikuar që pasuritë të mos paraqiten në mënyrë të plotë dhe të saktë në pasqyrat financiare.

Auditorët kanë konstatuar gjithashtu se qindra parcela nuk janë regjistruar në regjistrat përkatës të pasurive, pavarësisht se figurojnë në evidencat e komisioneve të inventarizimit ose në dokumentacionin kadastral.

Raporti vë në pah edhe mungesën e një databaze të plotë për banesat e dhëna në shfrytëzim punonjësve, si dhe paqartësi pronësore për dhjetëra parcela që në regjistrat e Trepçës paraqiten si pronë e ndërmarrjes, ndërsa në evidencat kadastrale figurojnë si bashkëpronësi ose pronë shoqërore.

Zyra Kombëtare e Auditimit ka rekomanduar që ndërmarrja të ndërmarrë masa për kompletimin e dokumentacionit, regjistrimin e saktë të pasurive dhe harmonizimin e evidencave me të dhënat zyrtare, në mënyrë që të sigurohet raportim financiar i besueshëm dhe administrim më efikas i aseteve publike.

Lidhja Demokratike e Kosovës ka zhvilluar një takim të brendshëm në selinë e partisë, në mes të zhvillimeve të fundit që lidhen me nismën për thirrjen e Kuvendit të Jashtëzakonshëm.

Në mbledhje janë parë duke hyrë disa prej zyrtarëve të lartë të partisë, përfshirë Xhafer Tahirin dhe Sokol Halitin, ndërsa para mediave është deklaruar edhe Shkëmb Manaj.

Ai ka bërë të ditur se aktualisht po zhvillohet një takim i brendshëm i strukturave të LDK-së dhe se vendimi për thirrjen e Kuvendit do të merret vetëm pasi të përfundojë procesi i verifikimit të nënshkrimeve të delegatëve.

Sipas Manajt, procedura do të trajtohet me prioritet, duke pasur parasysh situatën politike në vend dhe procesin e formimit të institucioneve të reja.

Nisma për mbajtjen e Kuvendit të Jashtëzakonshëm vjen në një periudhë të ndjeshme për LDK-në, ndërsa pritet që pas përfundimit të verifikimeve partia të dalë me një vendim zyrtar për hapat e mëtejshëm.

Zyra e Kryeministrit izraelit deklaroi se Netanyahu anuloi vizitën e tij në SHBA sepse funerali i senatorit amerikan Lindsey Graham ishte shtyrë për në fund të muajit.

Netanyahu pritej të largohej nga Izraeli të shtunën në mbrëmje për një vizitë në Shtetet e Bashkuara, raporton Anadolu.

Gazeta Israel Hayom raportoi se pala izraelite ishte e angazhuar në një aktivitet të dendur diplomatik për të organizuar një takim midis Netanyahut dhe Presidentit të SHBA-së Donald Trump gjatë vizitës.

Drejtori i KDI-së, Ismet Kryeziu, ka thënë se mosthirrja e seancës konstituive të Kuvendit dhe arsyetimi i presidentes në detyrë, Albulena Haxhiu, se partive politike duhet t’u lihet edhe më shumë kohë për negociata është sa qesharak, aq edhe i papërgjegjshëm ndaj qytetarëve.

“Për më tepër, partitë kanë pasur kohë sa të duash për të negociuar dhe mund të vazhdojnë të negociojnë edhe pas konstituimit të Kuvendit. Nuk mund të mbahet peng përmbushja e një detyrimi kushtetues me arsyetimin se duhen edhe më shumë bisedime. Ndërkohë, vendi vazhdon, prej afro dy vitesh, të funksionojë me institucione në detyrë dhe me zgjidhje të improvizuara. Nëse gati dy vjet, së bashku me tri palë zgjedhje të mbajtura, nuk po mjaftojnë për të arritur qoftë edhe një marrëveshje minimale, sa kohë tjetër u duhet? Dhe me çfarë arsyetimi?”, ka shkruar ai në “Facebook”.

Kryeziu ka thënë se po aq e papërgjegjshme është edhe qasja e partive opozitare. “Deri më tani, ato nuk kanë bërë asnjë kërkesë publike dhe asnjë veprim konkret për konstituimin sa më të shpejtë të Kuvendit. Kjo situatë, së bashku me paaftësinë për të tejkaluar interesat partiake dhe individuale, po e normalizon një perceptim, se kjo klasë politike, këta akterë aktual, nuk kanë as kapacitetin dhe as përgjegjësinë për të ndërtuar, funksionalizuar dhe mirëmbajtur institucionet e një shteti demokratik. Shkalla e zhvillimit demokratik nuk matet vetëm me organizimin e zgjedhjeve, por edhe me aftësinë për ta shndërruar vullnetin e qytetarëve në institucione funksionale, efektive dhe llogaridhënëse”, ka thënë Kryeziu.

Anëtari i Lidhjes Demokratike të Kosovës, Shkëmb Manaj, ka deklaruar se takimi që po mbahet në selinë e partisë është një takim i brendshëm, ndërsa procesi i verifikimit të nënshkrimeve për thirrjen e Kuvendit të Jashtëzakonshëm ende është në zhvillim, raporton Ekonomia Online.

“Është takim i brendshëm. Është çështje e vendimit tash deri sa të verifikohen (nënshkrimet)”, tha Manaj.

I pyetur nëse ekziston urgjencë për thirrjen e Kuvendit të Jashtëzakonshëm të LDK-së, për shkak të situatës politike në vend dhe zhvillimeve brenda partisë, Manaj u përgjigj shkurt: “Po”, tha ai.

Administrata e presidentit amerikan Donald Trump ka njoftuar vendosjen e një tarife prej 25% për shumicën e importeve nga Brazili, masë që pritet të hyjë në fuqi më 22 korrik.

Ky është veprimi i parë i madh i strategjisë së re tarifore të Trumpit, pas vendimit të Gjykatës së Lartë amerikane që rrëzoi tarifat e mëparshme të administratës së tij.

Kjo gjithashtu vjen në mes të tensioneve midis administratës së Trumpit dhe presidentit të Brazilit, Luiz Inácio ‘Lula’ da Silva, jo vetëm për shkak të lidhjeve të Trumpit me ish-presidentin e ekstremit të djathtë të Brazilit, Jair Bolsonaro, dhe familjen e tij.

Brazili pritet të mbajë zgjedhjet e përgjithshme në tetor, duke e bërë këtë masë edhe më të ndjeshme në skenën politike të vendit, shkruan DW.