Blog

Më 30 nëntor 2005, Gjykata e Hagës e shpalli të pafajshëm ish-luftëtarin e UÇK-së, Fatmir Limaj-Çeliku, lidhur me akuzat për krime lufte.

Sot, në 20-vjetorin e atij vendimi, Limaj ka reaguar me një postim të gjatë në Facebook.

Ai shkroi se aktgjykimi lirues i Gjykatës Ndërkombëtare të Hagës e vërtetoi edhe një herë drejtësinë e luftës së Ushtrisë Çlirimtare të Kosovës.

“Sot bëhen 20 vjet nga aktgjykimi lirues i Gjykatës Ndërkombëtare të Hagës, e cila foli qartë: lufta e Ushtrisë Çlirimtare të Kosovës ishte e drejtë, e pastër dhe në mbrojtje të një populli që luftoi për të jetuar i lirë.

Gjykimi ndaj meje dhe dy bashkëluftëtarëve të mi, Isakut dhe Haredinit, fatkeqësisht doli të jetë aktakuza e parë gjyqësore në Hagë kundër pjesëtarëve të UÇK-së”, shkroi Limaj.

Ai u shpreh i zhgënjyer që edhe sot, pas dy dekadash, lufta çlirimtare vazhdon të vihet në pikëpyetje në Hagë, ndërsa bashkëluftëtarët e tjerë po përballen me procese të reja.

“Ballafaqimi ynë gjyqësor në Hagë ishte i gjatë dhe sfidues. Në atë kohë Kosova nuk ishte shtet dhe ne ishim pa asnjë përkujdesje institucionale, pa mbrojtje të organizuar, ashtu siç do të duhej ta kishim në një proces të tillë gjyqësor.

Edhe ne si individë, edhe e vërteta e luftës sonë çlirimtare, për herë të parë po sfidoheshin në nivelet e drejtësisë ndërkombëtare në Hagë.

Në gjithë këtë proces e kishim të vërtetën e UÇK-së dhe mbështetjen e popullit.

Është trishtuese që edhe sot, pas 20 viteve, lufta jonë çlirimtare vazhdon të testohet e sfidohet po në Hagë, në gjykimin e bashkëluftëtarëve tanë.

Akuzat, shpifjet dhe fabrikimet kundër UÇK-së nuk kanë të ndalur edhe pas 20 viteve”, u shpreh ish-komandanti i UÇK-së.

Limaj u shpreh njëherësh kritik ndaj institucioneve të Kosovës, duke thënë se shteti po bën shumë pak për mbrojtjen e historisë dhe së vërtetës mbi të cilën është ndërtuar.

“Po ashtu, është trishtuese kur sheh tani që Kosova, edhe pse është shtet, po bën fare pak në mbrojtje të historisë dhe së vërtetës së vet, mbi të cilën është ndërtuar ky shtet.

Përjetësisht krenar me luftën tonë çlirimtare; ajo nuk mund të njolloset; ajo është e pastër si loti.

Rroftë UÇK-ja!

Lavdi dëshmorëve të kombit!”, shkroi ish-komandant Çeliku.

Partia e Drejtësisë ka njoftuar se kandidatët e saj do të jenë pjesë e listës së kandidatëve për deputetë nga radhët e LDK-së.

Përmes një njoftimi kjo parti ka treguar se kjo marrëveshje është miratuar edhe nga kryesia e partisë.

“Zgjidhjen më të përshtatshme për përfaqësimin dinjitoz të vlerave, programit dhe përvojës shtetëndërtuese të Partisë së Drejtësisë në këto zgjedhje, duke siguruar qasje të përbashkët drejt përgjegjësisë publike dhe qeverisjes qendrore cilësore”, është thënë në njoftim, duke dhënë detaje tjera.

“ Partia e Drejtësisë thekson se ky vendim reflekton orientimin tonë të qartë drejt unitetit e bashkëpunimit politik, stabilitetit institucional dhe rritjes së mundësive për përfaqësim të vlerave të mirëfillta qytetare me profesionalizëm dhe integritet”, është thënë në njoftim.

Një person është lënduar dje nga të shtënat me armë zjarri në rrugën “Dardania” në Fushë Kosovë.

E gjithë ngjarja kishte nisur pasi që viktima nuk i kishte dhënë përparësi kalimi në sefamorë të dyshuarit, bëhet e ditur në raportin 24-orësh të Policisë.

I dyshuari kishte dalë nga vetura e tij e tipit Audi A3, duke e ofenduar viktimën verbalisht e më pas duke shtënë me armë zjarri në tokë ku plumbi e ka goditur në këmbë.

I dyshuari është larguar në drejtim të panjohur, ndërsa viktima ka pranuar tretman mjekësor.

Sipas Policisë, në vendngjarje janë gjetur dhe konfiskuar predha dhe gëzhoja.

Kryeministri izraelit Benjamin Netanyahu, i cili po përballet me një gjyq të gjatë për korrupsion, i ka paraqitur një kërkesë zyrtare presidentit të vendit për ta falur atë.

Netanyahu , i cili është i vetmi kryeministër në detyrë në historinë e Izraelit që del në gjyq, tha se çështja e kishte ndarë vendin dhe një falje do të ndihmonte në rivendosjen e unitetit kombëtar.

Ai tha gjithashtu se kërkesa për t’u paraqitur në gjykatë tri herë në javë është një shpërqendrim që ia vështirëson atij udhëheqjen e vendit.

Zyra e Presidentit Isaac Herzog tha se ishte “një kërkesë e jashtëzakonshme” që mbart “implikime të rëndësishme”.

Por, presidenti do ta “shqyrtojë me përgjegjësi dhe sinqeritet kërkesën” pas konsultimit me “autoritetet përkatëse” në ministrinë e drejtësisë dhe departamentet ligjore, sipas zyrës së tij, shkruan skynews.

Kjo vjen pasi presidenti amerikan Donald Trump i dërgoi një letër Herzog duke i kërkuar atij që ta “falte plotësisht” Netanyahun në fillim të këtij muaji.

Ndryshe, gjyqi i Netanyahut, i cili filloi në vitin 2020, nuk ka përfunduar ende.

Ai është deklaruar i pafajshëm për të gjitha akuzat, të cilat përfshijnë ryshfet dhe mashtrim.

Netanyahu u padit në vitin 2019 në tre raste, duke përfshirë akuzat për marrjen e dhuratave nga përfaqësuesit e biznesit.

Benjamin Netanyahu këmbëngul se do të lirohet nga akuzat, edhe nëse gjyqi përfundon.

Argumenti i tij, i paraqitur në 111 faqe, është se gjyqi është një shpërqendrim i tillë saqë po dëmton interesin kombëtar dhe po ndikon në aftësinë e tij për të qeverisur.

Ai gjithashtu pretendon se hetimi u nxit nga qëllimi keqdashës për ta inkriminuar atë “me çdo kusht”, pavarësisht dekadave të tij në shërbim publik.

Të dielën, në fshatin Gllanasellë të Drenasit, është varrosur Behar Topilla, i mbijetuari i vetëm i masakrës së Shavarinës, i cili ndërroi jetë të martën.

Topilla ishte i vetmi që i kishte shpëtuar masakrës së 1 majit 1999, në të cilën u vranë mbi 40 civilë shqiptarë.

Historia e tij u bë e njohur në mbarë botën përmes gazetës amerikane The Salt Lake Tribune, e cila në atë kohë botoi artikullin me titullin “Sole Survivor” – “I mbijetuari i vetëm”.

Ai kishte mbetur i plagosur dhe i fshehur nën trupat e viktimave, derisa arriti të shpëtonte.

Behar Topilla mbeti dëshmitar kyç i një prej krimeve më të rënda të luftës së fundit në Kosovë.