Blog

Sekretari i Përgjithshëm i NATO-s, Mark Rutte, zhvilloi një takim në Bruksel me Këshilltarin Federal zviceran Martin Pfister nga Departamenti Federal për Mbrojtjen, Mbrojtjen e Popullsisë dhe Sportin (VBS/DDPS).

“Ishte mirë të takoja Këshilltarin Federal Martin Pfister dhe ta falënderoja për kontributin e Zvicrës në misionin paqeruajtës të NATO-s, KFOR, në Kosovë. Diskutuam gjithashtu mënyrat për të thelluar bashkëpunimin tonë me Zvicrën”, shkroi Rutte në X.

Që nga tetori i vitit 1999, Forcat e Armatosura Zvicerane kontribuojnë në misionin ndërkombëtar paqeruajtës të NATO-s, Kosovo Force (KFOR), përmes Kompanisë Zvicerane dhe kontingjenteve Swisscoy. Aktualisht, numri maksimal i personelit zviceran në mision është 215, ndërsa mandati aktual parashikohet të zgjasë deri në fund të vitit 2026.

Sot shënohet 81-vjetori i lindjes së ish-presidentit të Kosovës, Ibrahim Rugova.

Ibrahim Rugova është lindur më 2 dhjetor 1944 në fshatin Cercë, komuna e Istogut. Më 10 janar 1945 komunistët jugosllavë ia kanë pushkatuar të atin, Ukën dhe gjyshin Rrustë Rugova, që kishte qenë luftëtar i njohur kundër çetave çetnike që kishin depërtuar në Kosovë gjatë Luftës së Dytë Botërore.

Ibrahim Rugova shkollën fillore e ka kryer në Istog, të mesmen në Pejë, më 1967. Fakultetin Filozofik – Dega Gjuhë e Letërsi Shqipe e ka kryer në Prishtinë.

Gjatë vitit akademik 1976-77 ka qëndruar në Paris, në Ecole Pratique des Hautes Etudes, nën mbikëqyrjen e Prof. Roland Barthes-it, ku ka ndjekur interesimet e veta shkencore në studimin e letërsisë, me përqendrim në teorinë letrare. Ai ka doktoruar në fushën e letërsisë në Universitetin e Prishtinës, më 1984.

Në vitin 1996 Dr. Ibrahim Rugova është zgjedhur anëtar korrespondent i Akademisë së Arteve dhe Shkencave të Kosovës. Në fillim ishte redaktor në gazetën e studentëve Bota e re dhe në revistën shkencore Dituria (1971-72), që botoheshin në Prishtinë. Një kohë ka punuar edhe në revistën Fjala.

Mandej, për afro dy dekada, Dr. Ibrahim Rugova veprimtarinë e vet shkencore e ka zhvilluar në Institutin Albanologjik si hulumtues i letërsisë. Një kohë ishte kryeredaktor i revistës Gjurmime albanologjike të këtij Instituti. Me krijimtari letrare është mar rëqë nga fillimi i viteve gjashtëdhjetë.

Dr. Ibrahim Rugova më 1988 është zgjedhur kryetar i Shoqatës së Shkrimtarëve të Kosovës, që është bërë bërthamë e fuqishme e lëvizjes shqiptare, e cila ka kundërshtuar sundimin komunist serb dhe jugosllav në Kosovë.

Si intelektual me nam që i ka dhënë zë kësaj lëvizjeje intelektuale e politike, Dr. Ibrahim Rugova është zgjedhur, më 23 dhjetor 1989, nga themelimi kryetar i Lidhjes Demokratike të Kosovës, partisë së parë politike në Kosovë që ka sfiduar drejtpërdrejt regjimin komunist në fuqi. LDK, nën udhëheqjen e Dr. Ibrahim Rugovës,është bërë shpejt forca politike prijëse në Kosovë, duke mbledhur shumicën e popullit rreth vetes.

Në bashkëpunim me forcat e tjera politike shqiptare në Kosovë si dhe me Kuvendin e atëhershëm të Kosovës, Dr. Ibrahim Rugova dhe LDK-ja kanë përmbyllur kornizën ligjore për institucionalizimin e pavarësisë së Kosovës.

Deklarata e pavarësisë (2 korrik 1990), shpallja e Kosovës Republikë dhe miratimi i kushtetutës së saj (7 shtator 1990), referendumi popullor për pavarësinë dhe sovranitetin e Kosovës, mbajtur në fund të shtatorit 1991, kanë qenë prelud për zgjedhjet e para shumëpartiake për Kuvendin e Kosovës, mbajtur më 24 maj 1992.

Dr. Ibrahim Rugova është zgjedhur President i Republikës së Kosovës. Dr. Ibrahim Rugova është rizgjedhur President i Republikës së Kosovës në zgjedhjet e mbajtura në mars të vitit 1998.

Nën udhëheqjen e Dr. Ibrahim Rugovës LDK-ja ka fituar shumicën e votave në zgjedhjet e para lokale të sponsorizuara ndërkombëtarisht në Kosovën e pasluftës në tetor të vitit 2000 si dhe në zgjedhjet e para nacionale në vitin 2001 dhe në zgjedhjet e dyta lokale të vitit 2002. LDK ka fituar edhe zgjedhjet nacionale më 2004.

Dr. Ibrahim Rugova është zgjedhur President i Kosovës në mars të vitit 2002 dhe është rizgjedhur edhe më 2004.

Dr. Ibrahim Rugova ka vdekur më 21 janar 2006 në Prishtinë dhe është varros në Bregun e Diellit me nderimet më të mëdha të popullit të Kosovës.

Në përvjetorin e vdekjes së Ibrahim Rugovës, më 21 janar 2007, Presidenti i Kosovës, Dr. Fatmir Sejdiu e ka dekoruar Presidentin historik të Kosovës me Urdhrin “Hero i Kosovës”, titulli më i lartë në vendin tonë që u jepet figurave historike shqiptare dhe të Kosovës që kanë bërë “vepra trimërie për lirinë dhe pavarësinë e Kosovës”.

Nivelet e përgjithshme të varfërisë kanë rënë në të gjithë bllokun evropian, por jo kudo.

Franca është një nga vendet e pakta evropiane ku nivelet e varfërisë janë rritur gjatë dekadës së fundit.

Sipas të dhënave të fundit të Eurostat, Parisi ka raportuar një rritje prej gati 2% që nga viti 2014 në numrin e njerëzve që përjetojnë “vështirësi” ose “vështirësi të mëdha” për të siguruar jetesën, siç e quan instituti i statistikave, shkruan Euronews.

Përveç Francës, gjatë dhjetë viteve të fundit, nivelet e varfërisë janë rritur vetëm në Evropën Veriore: Danimarka (+2.4%), Finlanda (2%), Suedia (2.8%) dhe, jashtë BE-së, Norvegjia (+4.7%).

Cilat vende të BE-së kanë ulur më shumë nivelet e varfërisë?

Në të njëjtën kohë, shumë vende të Evropës Lindore dhe Jugore kanë ulur nivelet e tyre të varfërisë me dhjetëra pikë përqindjeje, me Qipron që kryeson në BE (-38%), e ndjekur nga Kroacia (34.6%), Hungaria (26.8%), Bullgaria (26.5%) dhe Rumania (21.8%).

Shkalla e përgjithshme e varfërisë në BE është tani 17.4%, që do të thotë se pothuajse dy nga dhjetë persona kanë probleme serioze për të mbijetuar.

Shkalla e fundit e raportuar nga Eurostat përfaqëson një përmirësim të lehtë krahasuar me vitin 2023, kur ishte 19.1%, dhe një përmirësim prej dhjetë pikësh krahasuar me vitin 2015 (27.1%).

Por disa vende ende kanë norma shumë më të larta.

Për shembull, në Greqi, përqindja aktuale është pothuajse 67% – shkalla më e lartë e njerëzve që jetojnë në varfëri midis të gjitha vendeve të BE-së. Bullgaria fqinje vjen pas me 37%, dhe Sllovakia me pothuajse 29%.

Shkalla e varfërisë midis jo të rriturve mbetet alarmante

Kur ndahet sipas moshës, brezi më i ri po vuan më shumë.

Shkalla e varfërisë midis të rinjve nën 18 vjeç është më e larta me 20.6%, ndërsa njerëzit e moshës 65 vjeç e lart raportuan shkallën më të ulët me 14.9%.

“Të gjitha grupmoshat panë një rënie në pjesën e përgjithshme nga viti 2023 në vitin 2024”, thotë Eurostat.

“Rënia më e madhe u gjet në grupmoshën 18-64 vjeç me 1.8 pikë përqindjeje (pp), ndërsa rënia si për grupmoshën më të re ashtu edhe për atë më të vjetër ishte 1.6 pp”.

Sot në Kosovë pritet të kemi intervale të gjata kohore me diell dhe vranësira lokale.

Temperaturat do të jenë mbi vlerat mesatare për këtë periudhë kohore, ndërsa intervale reshjesh e rrebesh afatshkurtra shiu priten në disa rajone. Në malet e larta priten reshje të dobëta bore.

Në mbrëmje vonë pritet të ketë shtim të vranësirave me rrebeshe lokale shiu por jo në të gjitha viset.

Temperaturat në mëngjes do të zbresin deri në -1 gradë Celsius, kurse gjatë ditës maksimalja pritet të arrijë deri në 10 gradë Celsius.

Në Shqipëri, Maqedoninë e Veriut, Luginë të Preshevës dhe Mal të Zi e martja sjellë mot me vranësira e në disa rajone intervale kohore me diell.

Në shumë zona të Shqipërisë do të rifillojnë reshjet lokale të shiut, paksa më intensive në zonat bregdetare dhe përreth. Në viset tjera reshje të pakta lokale.

Në Maqedoninë Veriore sot nuk priten reshje dhe parashihet të ketë intervale kohore me diell dhe kalime vranësirash të herëpashershme ashtu siç pritet edhe në Luginë të Preshevës.

Mal i Zi më shumë vranësira e në mbrëmje reshje shiu.

EULEX-i ka monitoruar 25 raste ku ishin të përfshirë zyrtarët policorë dhe ka gjetur se në shumicën e rasteve dhuna ndaj viktimave ka ndodhur jashtë ambienteve të policisë. EULEX-i ka rekomanduar nisjen e përdorimit të kamerave në uniformat e zyrtarëve policorë. Rekomandimi është përkrahur edhe nga ekspertët e sigurisë

Rrahja me shqelma, shuplaka e goditje me shkopinj gome janë disa nga keqtrajtimet e pretenduara që zyrtarët policorë u kanë bërë të ndaluarve, ka konstatuar misioni i BE-së për sundimin e ligjit – EULEX.

Sipas një raporti të EULEX-it, bazuar në shqyrtimin e aktgjykimeve që lidheshin me këto keqtrajtime gjatë ushtrimit të detyrës zyrtare, ndaj 22 viktimave dhuna ka ndodhur jashtë ambienteve të policisë e për 11 të tjerë brenda ambienteve të policisë.

EULEX- i këto pretendime i ka nxjerrë nga monitorimi i 25 rasteve.

“Bazuar në shqyrtimin e aktgjykimeve është e qartë se nga 41 zyrtarë policorë të akuzuar në ato 24 raste, 18 ishin pjesë ‘e njësive speciale’ të ndryshme (44%), 15 u përkisnin njësive të rregullta ose njësia e tyre nuk ishte e specifikuar në aktgjykim (37%), pesë ishin hetues (12%) dhe tre ishin nga policia e trafikut (7%). Rastet përfshinin gjithsej 29 viktima, përfshirë tre të mitur”, thuhet në raportin e EULEX-it.

Në raport thuhet se në total janë 73 akuza të ngritura kundër 41 zyrtarëve policorë dhe se hapat hetimorë të ndërmarrë nuk ishin mjaftueshëm të shpejtë.

“Në raste të shumëfishta, hetimet fillestare u nisën disa javë pas akuzave publike, duke çuar në uljen e disponueshmërisë së provave. Intervistat me personat e përfshirë (zyrtarë policorë, viktima të dyshuara dhe dëshmitarë) ndonjëherë u mbajtën me vonesa, ndonjëherë disa muaj pas incidentit, edhe kur identiteti i tyre ishte i njohur; kjo qasje mund të rezultojë në uljen e vlerës së provave dhe të rrisë rrezikun e deklaratave të koordinuara. Ndërsa vonesat për mbajtjen e intervistave mund të arsyetohen me prioritete operative dhe mungesë të personelit, duhet të merret në konsideratë se mungesa e shpejtësisë mund të ndikojë në efektivitetin e përgjithshëm të hetimeve”, thuhet në raport.

Në rekomandimet e EULEX-it thuhet se përmes trajnimeve, zyrtarët policorë duhet të marrin mesazhin se çdo formë e keqtrajtimit është e paligjshme dhe duhet të ndëshkohet.

Kryetari i AAK-së Ramush Haradinaj, ka deklaruar se partia e tij nuk do e mbështesë një qeveri tjetër të udhëhequr nga Albin Kurti.

Haradinaj deklaroi se cilido nga opozita do ta ketë ndihmën e AAK-së, kur u pyet për Hamzën e Abdixhikun.

“Nuk kemi kushte. Unë e kam nderin të jem i kandiduar për kryeministër, por cilido që udhëheqë me qeverinë do ta ketë ndihmen time. Unë duhet të sqaroj që nuk mbështesim Kurti 3 ose 4”, theksoi ai.

Ai në t7 theksoi se edhe pas zgjedhjeve të 9 shkurtit ishte i hapur për bashkëpunim me partitë opozitare, mirëpo mungesa e numrave ia mundësoi VV-së zvarritjen e institucioneve dhe humbi pastaj edhe interesimi për qeveri të ish-opozitës.

Zgjedhjet e reja do të mbahen më 28 dhjetor, dhe kreu i pari i Aleancës për Ardhmërisë së Kosovës tha se beson se ish-opozitarët do të jenë fitues.