Blog

KRU “Hidroregjioni Jugor” ka njoftuar se ekipet e Inspektoriatit po vazhdojnë aksionin e shkyçjeve nga rrjeti i ujësjellësit për konsumatorët me borxhe të pashlyera, pavarësisht njoftimeve të mëhershme dhe mundësive të ofruara për pagesë.

Sipas njoftimit, vetëm gjatë ditës së djeshme (10/12/2025) janë realizuar 52 shkyçje për mospagesë, prej tyre 40 në Prizren dhe 12 në njësinë e Suharekës.

Kompania ka paralajmëruar se nuk do të ketë më tolerime për konsumatorët që nuk i përmbushin detyrimet financiare.

“Nuk do të ketë më falje apo tolerim për asnjë konsumator që nuk i përmbush obligimet financiare ndaj kompanisë”, thuhet në njoftim.

KRU “Hidroregjioni Jugor” u ka bërë thirrje të gjithë borxhlinjve që të kryejnë pagesat për të shmangur masat e mëtejshme.

Ish-kryetari i Zveçanit, Ilir Peci, ka folur pas betimit të kryetarëve të rinj në komunat veriore, përfshirë edhe kryetarin e ri të Zveçanit nga Lista Serbe. Ai ka thënë se, ndonëse betimi është kryer të premten, procesi i pranim-dorëzimit ende nuk ka ndodhur, ndërsa situata në komunë po shoqërohet me presion ndaj administratës lokale.

“Të premten është bërë betimi, pranim-dorëzim akoma s’ka. Nuk janë duke u sjellë mirë disa drejtorë të tij, sidomos shefi i kabinetit, sepse po i bëjnë presion të fortë administratës”, deklaroi Peci.

Ai ka theksuar se para zyrës së kryetarit janë vendosur sërish simbolet me katër S, të cilat përfaqësojnë simbole nacionaliste serbe.

“Para zyrës së kryetarit i kanë vendosur prapë simbolet me katër S. Unë i kam shkruar edhe pushtetit lokal, ministrisë, por s’ka ndonjë reagim nga ta,” u shpreh ai.

Peci tha se gjatë ceremonisë së betimit është zhvilluar një takim rreth 40 minuta, por çështja e presionit nuk është diskutuar. Ai është përpjekur të ndërmjetësojë komunikim institucional.

“Pak më parë i kam shënuar ish-nënkryetarit tim që ishte i komunitetit serb që me bisedu me kryetarin e ri, tash jemi në pritje”, shtoi ai për FrontOnline.

Ai konfirmoi se në hyrje të objektit të Kuvendit Komunal gjendet flamuri i Kosovës, por nuk ka informacione të plota për simbolikën brenda zyrës së kryetarit.

“Tek hyrja e Kuvendit është flamuri i Kosovës, e për brenda zyrës së kryetarit nuk e di a janë apo jo simbolet”, tha Peci.

Sipas tij, presioni mbi stafin komunal është serioz dhe kërkon reagim urgjent nga institucionet qendrore.

“Ka presion te zyrtarët komunal dhe duhet me u tërhiq, dhe këtu duhet me ndërhy shteti, veçmas Ministria e Pushtetit Lokal”, theksoi ai.

Peci paralajmëroi se nëse situata vazhdon kështu, mund të ketë rikthim të tensioneve në komunë.

“Kjo do të thotë se nëse kështu është situata, për një kohë të shkurtër do të kthehet në pikën zero,” deklaroi ai.

Ai shtoi se procesi i pagesës së energjisë ka nisur të stabilizohet, por nuk është përmbyllur.

“Faturat po paguhen, ka filluar një numër i mirë, por akoma s’ka përfundu kyçja nëpër orë”, përfundoi Peci.

Dy persona nga Siria kanë pësuar lëndime trupore nga mjeti i mprehtë.

Ngjarja ka ndodhur në fshatin Koshuticë të Leposaviqit më 10 dhjetor.

Fillimisht mesnatën e së martës, dy femra kanë raportuar në polici, se në oborrin e shtëpisë së tyre kanë vërejtur një person të shtrirë me plagë nëpër pjesë të ndryshme të trupit të shkaktuara nga mjeti i mprehtë.

“Viktima mashkull i moshës rreth 40 vjeçar, shtetas i Sirisë është dërguar për tretman mjekësor në Spitalin e Mitrovicës Veri dhe më pas është transferuar në Spitalin e Mitrovicës Jugu për trajtim të mëtutjeshëm”, thuhet në raportin 24 orësh të policisë.

Tutje në raport, theksohet se rreth orës 11:05 jemi njoftuar se njësiti nga policia kufitare në Jarinje gjatë patrullimit në fshatin Koshuticë ka vërejtur një person mashkull Sirian i moshës 27 vjeçar me lëndime në kokë dhe këmbë që dyshohet se plagët janë shkaktuar nga mjeti i mprehtë.

“Viktima ka njoftuar se rasti ka ndodhur mbrëmë dhe i dyshuari është larguar në drejtim të kufirit të Serbisë. Njësiti i emergjencës viktimën e kanë dërguar në Spitalin e Mitrovicës Jugu për tretman të mëtutjeshëm”, përfundon raporti.

Nuk bëhet e ditur se nëse rasti ka të bëjë me ndonjë konflikt eventual mes këtyre dy personave apo diçka tjetër.

Rasti po hetohet si “Vrasje në tentativë”.

Policia e Kosovës ka njoftuar për një rast të sulmit ndaj personit zyrtar.

Rasti ka ndodhur në auto-udhë në Suharekë, dje në ora 19:00.

“Auto udhë, Suharekë. Viktima mashkull kosovar, zyrtar policor i cili ishte jashtë detyrës zyrtare dhe ishte duke lëvizur në auto udhë, ka hasur në dy mjete të ndaluara në shirit rrugor në auto udhë. Viktima është ndaluar dhe ka biseduar me vozitësit për arsyen e ndaljes ku i njëjti ka kërkuar që të marrin masa për siguri për shkak të kushteve atmosferike-mjegullës pasi mund të shkaktohet ndonjë aksident, pas bisedës me ta, i dyshuar e ka sulmuar fizikisht viktimën”, thuhet në raport.

Viktima ka pranuar tretman mjekësor në QKMF Suharekë. Njësitet policore janë në kërkim të dyshuarit.

Një femër nga fshati Ratkoc i komunës së Rahovecit, është dërguar pa shenja jete në spitalin e Gjakovës.

Ngjarja e rëndë ka ndodhur dje rreth orës 11:00, njofton raporti 24 orësh i policisë.

Siç thuhet në këtë raport, vdekjen e viktimës e ka konstatuar mjeku kujdestar.

Me vendim të prokurorit trupi i pa jetë është dërguar në IML për obduksion.

Rasti po hetohet nga organet e rendit dhe po cilësohet si “Hetim i vdekjes”.

Komuna e Istogut ka ndarë 14 mijë e 920 euro për të dekoruar qytetin, me rastin e festave të fundvitit.

Kontrata u dha dje, teksa pritet të nënshkruhet nesër.

Në thirrjen e prokurimit, Komuna parashikoi vlerën prej 15 mijë eurosh për këtë kontratë.

Më pas, u shqyrtuan dy tenderët e pranuar, më ç’rast ai me çmimin me të lartë ishte në vlerë prej 22 mijë e 222 eurosh.

Tenderi iu nda ofertuesit me çmimin më të ulët – AEM ELECTRIC – teksa në përshkrim bëhet me dije se nuk lejohet nënkontraktimi i kontratës.

Më poshtë detaje:

Një e mitur ka raportuar se ishte abuzuar seksualisht nga një person.

Sipas raportit 24 orësh të Policisë së Kosovës bëhet e ditur se rasti ka ndodhur të mërkurën rreth orës 10:30, në Fushë Kosovë.

Tutje bëhet e ditur se me vendim të prokurorit i dyshuari është arrestuar dhe dërgohet në mbajtje.

“Fushë Kosovë 10.12.2025-10:30. Viktima e mitur femër kosovare ka raportuar se ishte abuzuar seksualisht nga i dyshuari mashkull kosovar. Me vendim të prokurorit i dyshuari është arrestuar dhe dërgohet në mbajtje”, thuhet në raport.

Kongresisti republikan Thomas Massie, përfaqësues i Kentakit, njoftoi të martën se ka paraqitur në Kongres një projektligj që synon të tërheqë Shtetet e Bashkuara nga NATO-ja.

Ai argumenton se aleanca e krijuar dekada më parë ka humbur funksionin e saj, i kushton shumë taksapaguesve amerikanë dhe e rrezikon vendin për t’u përfshirë në luftëra të huaja.

“NATO është një relike e Luftës së Ftohtë. Shtetet e Bashkuara duhet të tërhiqen dhe t’i përdorin këto fonde për mbrojtjen e vendit tonë, jo të shteteve socialiste. Sot paraqita HR 6508 për t’i dhënë fund anëtarësimit tonë në NATO”, shkroi Massie në platformën X, raporton “FoxNews”, transmeton Klankosova.

Kolegia e tij republikane, Anna Paulina Luna nga Florida, njoftoi se e ka bashkësponsorizuar nismën.

Në një komunikatë për media, Massie theksoi se ShBA-ja ka shpenzuar “triliona dollarë” për pjesëmarrjen në NATO, ndërsa rrezikon përfshirjen në konflikte të jashtme. “Kushtetuta jonë nuk autorizon angazhime të përhershme të huaja. Amerika nuk duhet të jetë mburojë sigurie për botën -veçanërisht kur vendet e pasura refuzojnë të paguajnë për mbrojtjen e tyre”, tha ai.

Më herët gjatë vitit, senatori republikan Mike Lee nga Utah kishte prezantuar në Senat projektligjin e quajtur “Not A Trusted Organization Act” (“NATO Act”). Nisma e Massiet në Dhomën e Përfaqësuesve është versioni shoqërues i kësaj nisme.

Projektligji mbështetet në Nenin 13 të Traktatit të Atlantikut të Veriut, i cili lejon një vend anëtar të tërhiqet një vit pasi të njoftojë zyrtarisht Qeverinë e ShBA-së, e cila më pas njofton aleatët e tjerë.

Ky zhvillim pritet të shkaktojë debat të gjerë në skenën politike amerikane dhe brenda vetë aleancës.