Presidenti i Republikës, Bajram Begaj, ka autorizuar sot Kryeministrin Edi Rama për të nënshkruar marrëveshjen e aderimit të Shqipërisë në Kartën e Bordit të Paqes, një iniciativë ndërkombëtare për promovimin e stabilitetit dhe paqes në zonat e konfliktit.
Bordi ndërkombëtar synon të promovojë stabilitetin, rivendosjen e qeverisjes së ligjshme dhe sigurimin e paqes së qëndrueshme në territore të prekura nga konflikti.
Cleveland Cavaliers kanë shënuar një fitore të rëndësishme në transfertë ndaj Charlotte Hornets, duke triumfuar me rezultatin 94:87 në ndeshjen e zhvilluar në Spectrum Center. Takimi u karakterizua nga një paraqitje tejet zhgënjyese e yllit vendas, LaMelo Ball.
Basketbollisti 24-vjeçar qëndroi 22 minuta në parket, ku regjistroi shtatë asistime dhe pesë ribaunde, por arriti të shënojë vetëm dy pikë, në një mbrëmje për t’u harruar sa i përket efikasitetit në gjuajtje.
Ball ishte i pasaktë në të gjitha 10 tentativat për tri pikë, ndërsa nga distanca për dy pikë realizoi vetëm një gjuajtje nga 14 përpjekje, duke dështuar në plot 24 gjuajtje nga loja.
Me një saktësi alarmante prej vetëm 6.7 për qind, LaMelo Ball hyri në mënyrë negative në historinë e NBA-së, pasi një statistikë e tillë nuk ishte regjistruar më parë nga asnjë lojtar në ligë.
Cavaliers e kontrolluan ndeshjen që në pjesën e parë, duke ndërtuar një avantazh të ndjeshëm, ndërsa Hornets reaguan vetëm në minutat e fundit, duke e ngushtuar diferencën në shtatë pikë deri në fund të takimit.
Donovan Mitchell ishte më i dalluari për Cleveland me 24 pikë të realizuara, po aq sa shënoi edhe lojtari më efikas i Charlotte, Brandon Miller.
Pas kësaj fitoreje, Cleveland Cavaliers renditen në vendin e pestë të Konferencës Lindore me bilanc 25 fitore dhe 20 humbje, ndërsa Charlotte Hornets mbeten në pozitën e 12-të me 16 fitore dhe 28 humbje.
Kampioni në fuqi, si dhe lideri i Konferencës së Perëndimit, Oklahoma City Thunder, ka vazhduar me fitore, pasi mposhti kësaj radhe Milwakuee Bucks me rezultat 122-102.
Si gjithmonë, ylli I skuadrës së Thunder, Shai Gilgeous-Alexander, shkëlqeu me 40 pikë e 11 asistime për në këtë fitore te rëndësishme.
Nga ana tjetër, Cole Anthony, u dallua me 17 pikë, por që nuk mjaftuan për fitore.
E derisa Lideri I Konferencës së Lindjes, Detroit Pistons, ka realizuar fitoren e katërt radhazi, duke mundur kësaj radhe New Orleans Pelicans me shifrat 112-104.
Jalen Duren udhëhoqi skuadrën e tijë drejt fitores me 20 pikë e 15 kërcime.
Derisa te skuadra humbëse, u dallua Saddiq Bey me 20 sosh.
Kujtojmë që Pelicanes renditen në vendin e e fundit të Konferencës së Perëndimit.
Është përmbyllur programi pesëvjeçar për menaxhimin e qëndrueshëm të pyjeve në Kosovë, i zbatuar nga FAO dhe i financuar nga Bashkimi Evropian dhe Ambasada e Suedisë. Në ceremoninë përmbyllëse u vlerësuan arritjet kryesore të programit në ruajtjen e burimeve natyrore dhe zhvillimin e zonave rurale.
Përfaqësuesja e FAO-s, Daniela Mangione, theksoi se programi ka ndihmuar në përmirësimin e koordinimit institucional, ngritjen e kapaciteteve profesionale dhe përfshirjen e komuniteteve rurale. Sipas saj, mbi 500 persona kanë përfituar drejtpërdrejt nga projektet, ndërsa barazia gjinore dhe ndërgjegjësimi mjedisor kanë qenë pjesë e rëndësishme e ndërhyrjeve.
Ministri në detyrë i Bujqësisë, Imri Demelezi, vlerësoi kontributin e projektit në funksionalizimin e sistemit informativ pyjor dhe në forcimin e kapaciteteve institucionale. Ai theksoi se në kuadër të programit janë siguruar pajisje moderne për monitorimin e pyjeve, përfshirë automjete dhe dronë.
Nga ana tjetër, përfaqësuesja e Bashkimit Evropian, Eva Palatova, tha se pyjet janë thelbësore për ekosistemin dhe stabilitetin ekonomik.
Ambasadori i Suedisë, Jonas Westerlund, e cilësoi projektin si një histori suksesi të bashkëpunimit ndërkombëtar, duke theksuar se gjatë zbatimit janë mbështetur reformat ligjore, është përmirësuar sistemi informativ pyjor dhe është funksionalizuar qendra trajnuese në Blinajë.
Ndërkohë, nga Agjencia Pyjore e Kosovës u theksua se projekti ka sjellë përmirësime konkrete në aspektin operacional, përfshirë pajisje teknologjike, trajnime profesionale dhe forcim të kapaciteteve për mbrojtjen e pyjeve nga zjarret dhe prerjet ilegale.
Me përmbylljen e këtij programi, partnerët ndërkombëtarë dhe institucionet vendore shprehën gatishmërinë për të vazhduar bashkëpunimin në të ardhmen, me synim ruajtjen e pyjeve dhe zhvillimin e qëndrueshëm të zonave rurale në Kosovë.
Presidenti i SHBA-së, Donald Trump, ka folur në ditën e dytë në Davos në Forumin e Ekonomisë.
Ai u shpreh se si president i SHBA-së, i ka dhënë fund 8 luftërave në botë dhe se po bën më mirë, se çdokush para tij.
“Si President i kam dhënë fund 8 luftërave. Një vit më parë, bota ishte në flakë. Në Nigeri të krishterët po vriteshin. Një nga sukseset më të mëdha është që kemi rindërtuar ushtrinë. Vendi ynë s’ka bërë ndonjëherë më mirë. Në punën tonë, çdo gjë është më mirë se kurrë më parë. Po shohim numra që s’i kemi parë kurrë më parë. Kam ndaluar pushtimet dhe kartelet e drogës.
Kemi padyshim ushtrinë më të fuqishme në botë. Kemi kapur diktatorin Nicolas Maduro dhe njerëzit në Venezuelë janë shumë të lumtur. Kemi një marrëdhënie shumë të mirë me lideren e re të Venezuelës. Po shkon çdo gjë shumë mirë”, tha ndër të tjera Trump.
Ceremonia e nënshkrimit të “Bordit të Paqes” nga presidenti Donald Trump ka paraqitur përfaqësues nga më pak se 20 vende, dhe asnjë nga aleatët tradicionalë të Evropës Perëndimore të SHBA-së.
Kombet e përfaqësuara në skenë në Davos anojnë shumë nga Lindja e Mesme dhe Amerika e Jugut, me udhëheqës nga Arabia Saudite, Katari, Emiratet e Bashkuara Arabe, Argjentina dhe Paraguai midis atyre që morën pjesë.
“Jemi vërtet të nderuar nga prania juaj sot”, ka thënë Trumpi, duke iu referuar atyre si “në shumicën e rasteve udhëheqës shumë të popullarizuar, në disa raste jo aq të popullarizuar”.
Numri i përgjithshëm i pjesëmarrësve është më pak se afërsisht 35 që një zyrtar i lartë i administratës parashikoi për gazetarët në fillim të kësaj jave.
Dhe nuk përfshinte asnjë komb të Evropës Perëndimore, disa prej të cilëve kanë ngritur shqetësime mbi idenë e një bordi të dedikuar për paqen që mund të përfshijë kundërshtarë si Rusia aktualisht në luftë me një nga aleatët e tyre.
Komisioni Qendror i Zgjedhjeve ka njoftuar se procesi i rinumërimit të votave është përmbyllur plotësisht në 9 komuna.
Rrjedhimisht, në QNR tashmë janë rinumëruar 1,029 nga 2,557 vendvotime.
Në këtë qendër po vazhdon ky proces i verifikimit të tërësishëm të të gjitha vendvotimeve, pas vendimit të KQZ-së që i gjithë vendi të shkojë në rinumërim.
Rezultatet e paraqitura mund t’i shihni në këtë LINK.
Prokuroria Themelore në Ferizaj ka thënë se ka autorizuar ndërmarrjen e veprimeve hetimore që lidhen me dyshimet për manipulim të votave për kandidatë të zgjedhjeve të 28 dhjetorit.
Kjo Prokurori ka thënë se veprat penale që cenojnë të drejtën e votës përbëjnë shkelje serioze të ligjit dhe do të trajtohen me përkushtim maksimal, pa asnjë kompromis.
“Prokuroria Themelore në Ferizaj, njofton opinionin publik se në kuadër të kompetencave të saj ligjore dhe si institucion i Prokurorit të Shtetit, është duke monitoruar nga jashtë procesin e rinumërimit të rezultateve zgjedhore.”
“Në këtë drejtim, Prokuroria Themelore në Ferizaj ka autorizuar ndërmarrjen e të gjitha veprimeve hetimore që lidhen me dyshimet për manipulim të votave për kandidatë, me qëllim të sigurimit të provave relevante, identifikimit të personave përgjegjës dhe administrimit të të gjithë materialit zgjedhor në përputhje me ligjin.”
“Veprat penale që cenojnë të drejtën e votës përbëjnë shkelje serioze të ligjit dhe do të trajtohen me përkushtim maksimal, pa asnjë kompromis. Prokuroria Themelore në Ferizaj do të mbetet e angazhuar për ta mbrojtur votën e lirë të qytetarëve, dhe do të hetojë çdo rast të dyshuar, me synimin e ruajtjes së integritetit të procesit zgjedhor dhe sundimit të ligjit”, thuhet në njoftimin e lëshuar sot.
Ditë më parë edhe Prokuroria Themelore në Prizren ka autorizuar Policinë e Kosovës që të identifikojë personat përgjegjës dhe të sigurojë prova, përfshirë procesverbalet dhe nënshkrimet.
KQZ-ja ka marrë vendim që në rinumërim të shkojnë të gjitha kutitë e votimit.
Në Davos ka nisur takimi mes të ftuarve nga presidenti Donald Trump, për të qenë pjesë e nisjes së iniciativës së tij “Bordi i Paqes”.
Në mesin e liderëve nga shumë vende të botës, është edhe presidentja Vjosa Osmani.
Trump aktualisht është duke e mbajtur fjalimin e tij hapës të takimit.
Instituti GAP, sot, gjatë një konference për media ka shpalosur premtimet që kryetarët e rinj të komunave, kanë dhënë për mandatin qeverisës 2025-2029. Në komunikatën e GAP bëhet e ditur se janë evidentuar 1,683 premtime të dhëna në 26 komuna, që paraqet 132 premtime më pak sesa në mandatin e kaluar.
Në komunikatë theksohet se, rritja më e madhe e numrit të premtimeve është shënuar në komunat si Lipjani, Deçani, Fushë Kosova, Drenasi, Obiliqi dhe Podujeva.
‘’Nga këto komuna, Lipjani ka shënuar rritjen më të theksuar, nga 61 premtime në mandatin 2021-2025, në 170 premtime në këtë mandat; Deçani nga 20 në 124 premtime; Fushë Kosova nga 35 në 110 premtime; Drenasi nga 37 në 88; Obiliqi nga 69 në 104; ndërsa Podujeva nga 61 në 88 premtime të dhëna’’, thuhet mes tjerash nga GAP’i.
Tutje, në komunikatë theksohet edhe se, kryetari fitues në Skenderaj, ai në Mamushë dhe dhjetë kryetarët në komunat me shumicë të komunitetit serb nuk kanë shpalosur asnjë premtim zgjedhor, dhe se, nga 26 kryetarë fitues, 17 kanë pasur program të shkruar zgjedhor, kurse nëntë të tjerë kanë prezantuar premtime gjatë aktiviteteve zgjedhore ose përmes paraqitjeve mediale.
Komunikata:
Premtimet e kryetarëve të komunave të Kosovës për mandatin e ri qeverisës 2025 – 2029
Sot, Instituti GAP ka mbajtur konferencë për media, ku përmes platformës elektronike “Letërnjoftimi i Komunave” ka shpalosur premtimet që kryetarët e komunave të Kosovës kanë dhënë në zgjedhjet lokale të mbajtura në tetor dhe nëntor të vitit 2025. Gjithsej, Instituti GAP ka evidentuar 1,683 premtime të dhëna në 26 komuna, që paraqet 132 premtime më pak sesa në mandatin e kaluar.
Rritja më e madhe e numrit të premtimeve të dhëna është shënuar në Lipjan, Deçan, Fushë Kosovë, Drenas, Obiliq, dhe Podujevë. Nga këto komuna, Lipjani ka shënuar rritjen më të theksuar, nga 61 premtime në mandatin 2021-2025, në 170 premtime në këtë mandat; Deçani nga 20 në 124 premtime; Fushë Kosova nga 35 në 110 premtime; Drenasi nga 37 në 88; Obiliqi nga 69 në 104; ndërsa Podujeva nga 61 në 88 premtime të dhëna. Në anën tjetër, rënien më të madhe e ka pësuar Prishtina, nga 206 në 115 premtime, e ndjekur nga Kaçaniku, Suhareka, Shtimja, Mitrovica e Jugut, Rahoveci, Hani i Elezit, Malisheva, Klina dhe Istogu.
Fusha me numrin më të madh të premtimeve në këtë mandat është infrastruktura, me gjithsej 382 premtime. Pas saj renditet arsimi me 322 premtime, shërbimet publike me 184 premtime dhe shëndetësia me 146 premtime. Në fushat e ekonomisë, bujqësisë, kulturës, sportit dhe çështjeve sociale numri i premtimeve të dhëna është i përafërt me mandatin e kaluar, përkatësisht rreth ose mbi 100 premtime secila. Më së paku premtime janë dhënë në fushën e urbanizimit (gjithsej 51 premtime) dhe në administratë (50 premtime). Këto të dhëna tregojnë se infrastruktura është rikthyer si prioriteti kryesor në mandatin e ri, duke zëvendësuar shërbimet publike që kishin zënë hapësirën më të madhe në mandatin e kaluar.
Në zgjedhjet e fundit lokale për kryetarë/e komunash kanë garuar 185 kandidatë, prej të cilëve 165 kanë qenë të propozuar nga subjektet politike, ndërsa pjesa tjetër kanë garuar nga iniciativa qytetare ose si kandidatë të pavarur. Nga 185 kandidatë, vetëm 20 kanë qenë gra dhe prej tyre, vetëm një është zgjedhur kryetare, nga gjithsej 38 kryetarë të zgjedhur.
Këtë mandat, Lëvizja Vetëvendosje (VV), Partia Demokratike e Kosovës (PDK) dhe Lidhja Demokratike e Kosovës (LDK) do të udhëheqin me nga shtatë komuna secila; Lista Serbe (LS) me dhjetë komuna; Aleanca për Ardhmërinë e Kosovës (AAK) me pesë komuna; ndërsa Nisma Socialdemokrate dhe Partia Turke e Kosovës me nga një komunë. Për dallim nga mandati i kaluar, ku pushteti nga një parti në tjetrën kishte ndryshuar në 12 komuna, përkatësisht në Prishtinë, Shtime, Gjilan, Kamenicë, Mitrovicë e Jugut, Prizren, Han i Elezit, Vushtrri, Dragash, Junik, Mamushë dhe Skenderaj, në këtë mandat kjo ka ndodhur në tri komuna: Fushë Kosovë, Obiliq dhe Mitrovicë e Jugut.
Kryetari fitues në Skenderaj, ai në Mamushë dhe dhjetë kryetarët në komunat me shumicë të komunitetit serb nuk kanë shpalosur asnjë premtim zgjedhor. Nga 26 kryetarë fitues, 17 kanë pasur program të shkruar zgjedhor, ndërsa nëntë të tjerë kanë prezantuar premtime gjatë aktiviteteve zgjedhore ose përmes paraqitjeve mediale.
Instituti GAP do të vazhdojë, sikurse edhe në mandatet e kaluara, të vlerësojë në mënyrë periodike përmbushjen e premtimeve, me qëllim të rritjes së llogaridhënies së kryetarëve të komunave ndaj qytetarëve për premtimet dhe programet e tyre zgjedhore.
Platformën e premtimeve të dhëna nga kryetarët e komunave mund ta gjeni në këtë link: https://www.komunat.institutigap.org/Premtimet.
Infografikat mund t’i gjeni bashkangjitu në këtë email ose duke klikuar këtu.
Kryetari i OVL-UÇK’së, Hysni Gucati beson që ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi do të dalin të pafajshëm, duke theksuar se beson që drejtësia nuk do të jetë selektive e politike.
“Unë besoj më 16-17 do të jemi në Hagë, do t’i dëgjojmë katër bashkëluftëtar tanë. Besojmë që do të jemi atje, nëse na lejohet, i kemi bërë kërkesa para dy dite, besoj që do të na lejohet të marrim pjesë. Unë besoj dhe dua të besoj fuqishëm ata do të dalin të pafajshëm. Se besoj që drejtësia do të jetë drejtësi politike apo selektive, do të jetë një drejtësi e mirëfilltë evropiane”, tha Gucati, pasi bëri homazhe në Kompleksin Memorial “Adem Jashari” në Prekaz në 28-vjetorin e sulmit të dytë ndaj familjes së komandantit legjendar, Adem Jashari.
Gucati ka bërë të ditur edhe se do të marrin pjesë në protestën e 17 shkurtit që është thirrur nga platforma “Liria ka Emër”, e ku do të bëhet thirrje për drejtësi ndaj çlirimtarëve.
“Mua më vjen keq kjo pyetje që ma bërët, është me spec. Qysh nuk marr pjesë bre unë dhe gjithë shokët. Ne marrim pjesë në protesta. Ne nuk jemi këshill organizativ, kemi thënë me kohë, arsyet dihen pak a shumë, a në protestë do të marrim pjesë. Unë vetë kam vuajtur burgun edhe i kemi shokët, i kemi njerëzit që kanë luftuar”, tregoi Gucati.