ATV

Blog

  • Gen Z, brezi më i lodhur: Pse të rinjtë ndihen të rraskapitur që herët

    Gen Z, brezi më i lodhur: Pse të rinjtë ndihen të rraskapitur që herët

    Brezi Z, i njohur si brezi i lindur mes viteve 1997 dhe 2012, po cilësohet gjithnjë e më shpesh si brezi më i lodhur mendërisht dhe emocionalisht. Edhe pse janë të rinj në moshë, shumë prej tyre raportojnë ndjenja lodhjeje kronike, ankthi dhe mungesë motivimi.

    Sipas studimeve psikologjike dhe raporteve ndërkombëtare, një nga arsyet kryesore është presioni i vazhdueshëm digjital. Gen Z është brezi i parë që është rritur plotësisht me rrjete sociale, ku krahasimi konstant, pritshmëritë e larta dhe nevoja për të qenë gjithmonë “online” ndikojnë drejtpërdrejt në shëndetin mendor.

    Një tjetër faktor është pasiguria ekonomike dhe sociale. Krizat globale, rritja e kostos së jetesës, vështirësitë për punësim dhe e ardhmja e paqartë kanë krijuar një ndjenjë stresi të vazhdueshëm te ky brez. Ndryshe nga brezat e mëparshëm, Gen Z po përballet herët me përgjegjësi dhe pasiguri të mëdha.

    Ekspertët theksojnë edhe mungesën e gjumit si problem serioz. Përdorimi i gjatë i pajisjeve elektronike, sidomos para gjumit, ndikon në cilësinë e pushimit dhe çon në lodhje të vazhdueshme fizike dhe mendore.

    Po ashtu, Gen Z flet më hapur për shëndetin mendor, gjë që nuk do të thotë domosdoshmërisht se ndihen më keq se brezat e tjerë, por se janë më të vetëdijshëm dhe më të gatshëm të kërkojnë ndihmë. Kjo hapje ka bërë që lodhja dhe stresi të jenë më të dukshme në statistika.

    Në fund, lodhja e Gen Z nuk është shenjë dembelie, por pasqyrë e një bote që po ndryshon shpejt. Kuptimi i shkaqeve është hapi i parë për të ndërtuar një mjedis më të shëndetshëm për brezin që po formëson të ardhmen.

  • Si ndikojnë të ftohtit dhe kushtet atmosferike në venat dhe cilat simptoma kërkojnë reagim urgjent

    Si ndikojnë të ftohtit dhe kushtet atmosferike në venat dhe cilat simptoma kërkojnë reagim urgjent

    Lehtësimi dimëror shpesh i mashtron pacientët që ta shtyjnë trajtimin, ndërsa disa simptoma tregojnë qartë se është koha të reagoni menjëherë

    Shumë persona me vena të zgjeruara pikërisht gjatë dimrit ndjejnë lehtësim, sepse këmbët u ënjten më pak, dhimbjet janë më të lehta dhe shqetësimet e përditshme duket sikur tërhiqen. Në këtë periudhë shpesh krijohet përshtypja se problemi nuk është më aq serioz, ndaj vendimi për trajtim shtyhet. Megjithatë, me ardhjen e ditëve më të ngrohta simptomat rikthehen, shpesh edhe më të theksuara se më parë: ënjtjet janë më të mëdha, dhimbjet më intensive dhe komplikimet më të shpeshta. A do të thotë kjo se gjendja përkeqësohet pashmangshëm nga viti në vit? Sa ndikon realisht stina në ecurinë e sëmundjes dhe a paraqet vera pengesë për trajtim?

    Simptomat mund të jenë më pak të theksuara dhe pacientët shpesh mendojnë se nuk kanë më problem ose e shtyjnë trajtimin me justifikime të ndryshme. Gjatë verës ndodh zgjerimi i enëve të gjakut dhe atëherë shqetësimet janë më të forta. Në dimër, enët e gjakut tkurren, ndaj enjtjet, dhimbjet dhe shqetësimet janë më të lehta, prandaj krijohet përshtypja se gjendja është përmirësuar. Në verë, enët zgjerohen, ënjtjet rriten dhe komplikimet janë më të shpeshta, prandaj është e pritshme që problemet me venat të dyfishohen gjatë muajve të verës. Ky mekanizëm përputhet edhe me shpjegimet fiziologjike të përshkruara nga American College of Phlebology, sipas të cilave temperatura e lartë ndikon drejtpërdrejt në zgjerimin venoz dhe përkeqësimin e simptomave, transmeton Telegrafi.

    Edhe të ftohtit ekstrem mund të shkaktojë probleme te disa pacientë. Është interesante se një pjesë e tyre raportojnë shqetësime më të forta pikërisht gjatë muajve të dimrit.

    Për këtë dukuri nuk ekziston një shpjegim i qartë shkencor, por është shumë e rëndësishme të dëgjohet pacienti. Mjekësia është e bazuar në prova, por nuk është një shkencë plotësisht ekzakte. Nuk mund të “ndryshojmë” një pjesë të trupit për ta zgjidhur problemin menjëherë, prandaj duhet t’i kushtojmë vëmendje simptomave që përshkruan pacienti. Edhe World Health Organization thekson se menaxhimi i sëmundjeve kronike kërkon qasje individuale dhe vlerësim të vazhdueshëm të simptomave.

    Sezoni ndikon edhe në vendimin e pacientëve për t’u operuar. Më shumë ndërhyrje realizohen gjatë vjeshtës, dimrit dhe pranverës, ndërsa më rrallë gjatë verës. Arsyeja është e thjeshtë: njerëzit planifikojnë pushimet vjetore dhe nuk duan të prishin ritmin e përditshëm.

    Qëllimi i operacioneve me laser dhe procedurave minimalisht invazive është që të përshtaten me jetën e përditshme. Operacioni i venave nuk është ndërhyrje urgjente dhe shpesh shtyhet për arsye praktike, jo për shkak të miteve se “nuk duhet bërë gjatë verës”. Nëse dëshironi të shkoni me pushime, por trajtimin duhet ta planifikoni. Nuk duhet t’u nënshtrohemi miteve, por të udhëhiqemi nga nevojat reale shëndetësore.

    Simptomat që nuk duhen shtyrë
    Edhe pse shumë pacientë jetojnë me vite me simptomat e venave të zgjeruara dhe janë mësuar me shqetësimin e përditshëm, ekzistojnë situata që nuk duhet të injorohen.

    Shqetësimet e lehta nuk janë urgjente, por dhimbja e fortë, skuqja, fortësia e venës dhe enjtja kërkojnë reagim të shpejtë. Kur shfaqen ndryshime në lëkurë ose ënjtje të theksuara, bëhet fjalë për një fazë të avancuar të sëmundjes dhe trajtimi nuk duhet të shtyhet. Koha më e mirë për operacion është sa më shpejt që të jetë e mundur. Megjithatë, ndodh që pacientët edhe me plagë venoze të thonë se do të shkojnë në pushime dhe do të paraqiten pas kthimit. Kjo është zgjedhja e tyre, por nga ana mjekësore nuk rekomandohet.

    Si duket ndërhyrja?
    Nëse ekzistojnë sëmundje shoqëruese të lidhura me venat, kryhen konsultime shtesë dhe përcaktohen masat terapeutike.

    Rrallëherë ekzistojnë kundërindikacione për ndërhyrje, pasi ajo kryhet nën anestezi lokale. Numri i pacientëve që nuk e tolerojnë është shumë i vogël. Nëse mund të toleroni trajtimin te dentisti, mundeni edhe këtu. Mosha e pacientëve tanë varion nga 14 deri në 91 vjeç.

    Operacioni me laser i venave është një metodë minimalisht invazive që zgjat rreth 40 minuta deri në një orë për të dyja këmbët. Rikuperimi është i shpejtë dhe kthimi në aktivitetet e përditshme po ashtu. Kërkesa e vetme është që pacienti të ecë sa më shumë pas ndërhyrjes.

    Këshilla kryesore për pacientët është të mos i zgjidhin problemet vetë, por të kërkojnë ndihmë profesionale. Nëse rekomandohet operacioni me laser, nuk duhet të shtyhet gjatë dhe nuk duhet të ketë frikë. Ky nuk është një operacion që shpëton jetën, por një ndërhyrje që e përmirëson ndjeshëm cilësinë e jetës. Po aq e rëndësishme është edhe ndryshimi i zakoneve të këqija, sepse kjo ndihmon jo vetëm shëndetin e venave, por shëndetin e përgjithshëm.

  • Sheqeri është kudo: Ushqimet e përditshme që na mashtrojnë pa e kuptuar

    Sheqeri është kudo: Ushqimet e përditshme që na mashtrojnë pa e kuptuar

    Edhe pse shumica prej nesh mendojnë se e shmangin sheqerin, e vërteta është se ai është i pranishëm pothuajse kudo në ushqimet që konsumojmë çdo ditë. Jo gjithmonë vjen në formën e ëmbëlsirave apo pijeve të gazuara – shpesh fshihet aty ku nuk e presim fare.

    Sipas ekspertëve të ushqyerjes, shumë produkte të përditshme përmbajnë sheqer të shtuar, i cili përdoret për shije, ruajtje apo përmirësim teksture. Produkte si buka e bardhë, jogurtet e aromatizuara, salcat e gatshme, drithërat e mëngjesit dhe madje edhe disa ushqime “light” apo “dietike” përmbajnë sasi të konsiderueshme sheqeri.

    Trupi ynë shpesh “mashtrohet” nga këto ushqime, sepse sheqeri aktivizon qendrat e kënaqësisë në tru dhe na bën të dëshirojmë më shumë. Kjo mund të çojë në konsum të tepruar kalorish, rritje të nivelit të sheqerit në gjak dhe, në afatgjatë, në rrezik më të madh për obezitet, diabet të tipit 2 dhe probleme kardiovaskulare.

    Një tjetër problem është se sheqeri shpesh fshihet nën emra të ndryshëm në etiketat ushqimore, si shurup glukoze-fruktoze, maltodekstrinë apo dekstrozë, gjë që e bën më të vështirë identifikimin e tij nga konsumatorët.

    Ekspertët këshillojnë leximin e kujdesshëm të etiketave dhe zgjedhjen e ushqimeve sa më natyrale dhe të papërpunuara. Reduktimi i sheqerit nuk do të thotë heqje dorë nga shija, por marrje e vendimeve më të vetëdijshme për shëndetin.

    Në një botë ku sheqeri është pothuajse gjithkund, informimi mbetet mbrojtja më e mirë për trupin tonë.

  • Qyteti më i ftohtë në botë: Shtëpitë nuk kanë tualete, por kanë nga tre dyer – ja si jetohet në -71°C

    Qyteti më i ftohtë në botë: Shtëpitë nuk kanë tualete, por kanë nga tre dyer – ja si jetohet në -71°C

    Në Jakutsk, ajri të djeg si akulli, vetura nuk guxon të fiket natën dhe toka nuk shkrin kurrë. Megjithatë, mbi 350 mijë njerëz jetojnë aty çdo ditë

    Kur te ne temperaturat zbresin nën zero, shumëkush mezi del nga shtëpia. Por këto ditë duken pothuajse pranverore krahasuar me atë që përjetojnë banorët e Jakutskut, qytetit më të ftohtë në botë. Ky qytet rus, që ndodhet rreth 450 kilometra në jug të Rrethit Arktik, përjeton rregullisht temperatura prej -45°C, ndërsa mesatarja e janarit shkon rreth -50°C. Rekordi absolut i të ftohtit, -71°C, është matur në fshatin Ojmjakon, i cili konsiderohet vendi i banuar më i ftohtë në planet.

    Në këtë klimë ekstreme, ajri është aq i ftohtë sa të mpin lëkurën brenda pak minutash. Frymëmarrja bëhet e dhimbshme, qerpikët ngrijnë, ndërsa metali të “djeg” po ta prekësh me dorë të zhveshur. Ngrirjet janë rrezik i përditshëm dhe njerëzit dalin nga shtëpia vetëm të mbështjellë me disa shtresa rrobash speciale. Edhe pështyma ngrin para se të prekë tokën.

    Jakutsku është ndërtuar mbi permafrost, tokë që nuk shkrin kurrë, as në verë. Për këtë arsye, ndërtesat nuk ndërtohen drejtpërdrejt mbi tokë, por mbi shtylla, që nxehtësia e tyre të mos e shkrijë dhe destabilizojë bazamentin. Tubat e ujit dhe kanalizimit janë të izoluar në mënyrë ekstreme ose vendosen mbi tokë. Në disa zona, sidomos në fshatra si Ojmjakoni, nuk ka fare kanalizim, sepse tubat do të ngrinin, prandaj tualetet ndodhen jashtë shtëpisë edhe kur jashtë është -50°C.

    Për të mos lejuar që ajri polar të hyjë drejtpërdrejt brenda, shumë shtëpi dhe ndërtesa kanë dy ose edhe tre dyer njëra pas tjetrës, si një zonë tampon që ruan nxehtësinë. Shkallët e jashtme shpesh mbulohen me goma ose tapete, sepse gjithçka është vazhdimisht e ngrirë dhe rrëshqitëse.

    Edhe makinat këtu ‘jetojnë’ ndryshe. Ata që nuk kanë garazhe të ngrohura, i lënë motorët ndezur gjithë natën, sepse në të kundërt, në mëngjes nuk do të mund t’i ndezin më. Nafta dhe vaji i motorit ngurtësohen nga të ftohtit. Edhe telefonat dhe kamerat ngrijnë dhe fiken pas pak minutash jashtë.

    Në tregje, peshqit shiten të ngrirë, të drejtë si shkopinj druri. Prerja bëhet me sëpatë ose sharrë, jo me thikë. Ushqimi ruhet natyrshëm në të ftohtë, pa frigorifer. Paradoksi është se gjatë verës, kur temperaturat mund të ngjiten edhe mbi 30°C, qyteti përballet me shumë mushkonja, sepse ndodhet pranë lumit Lena ka shumë ujëra të ndenjura edhe pse toka poshtë mbetet gjithmonë e ngrirë.

    Jakutsku ka rreth 355 mijë banorë, të cilët merren kryesisht me blegtori, peshkim dhe industri minerare. Në reportazhe, shumë prej tyre thonë se trupi dhe mendja thjesht mësohen me këtë klimë. “Për ne, kjo është normale”, thonë. Fëmijët zakonisht shkojnë në shkollë edhe në -40°C; mësimi anulohet vetëm kur temperatura bie nën -50°C.

    Në këtë qytet, syzet mund të ngjiten në fytyrë po t’i prekësh me dorë të zhveshur, metali të djeg nga të ftohtit njësoj si zjarri, ndërsa në varreza hapja e një varri është pothuajse e pamundur, sepse toka është e fortë si betoni.

    Jakutsku nuk është thjesht qyteti më i ftohtë në botë. Ai është dëshmi e jashtëzakonshme se deri ku mund të shkojë përshtatja e njeriut dhe se edhe në kushtet më ekstreme të planetit, jeta gjen mënyrën për të vazhduar.

  • Emma Stone thyen rekord historik në Oscar, duke lënë pas Meryl Streep

    Emma Stone thyen rekord historik në Oscar, duke lënë pas Meryl Streep

    Aktorja e njohur Emma Stone ka hyrë në historinë e Çmimeve Oscar, duke thyer një rekord që për dekada ishte mbajtur nga Meryl Streep. Pas shpalljes së nominimeve për Oscar 2026, Stone, 37 vjeçe, u bë gruaja më e re që arrin shtatë nominime në total në historinë e Akademisë.

    Këtë vit, ajo është nominuar për çmimin Aktorja më e Mirë për rolin e saj në filmin “Bugonia”, me regji të Yorgos Lanthimos. Përveç kësaj, Stone ka marrë edhe një nominim si producente, pasi filmi konkurron edhe në kategorinë “Filmi më i Mirë”.

    Me këto dy nominime, Emma Stone ka kaluar rekordin e Meryl Streep, e cila kishte arritur nominimin e saj të shtatë në moshën 38-vjeçare në vitin 1988. Megjithatë, Streep mbetet aktorja më e nominuar në historinë e Oscars, me gjithsej 21 nominime dhe tre fitore.

    Deri më tani, Emma Stone ka fituar dy herë çmimin Oscar për Aktoren më të Mirë: në vitin 2017 për “La La Land” dhe në vitin 2024 për “Poor Things”. Ajo është nominuar gjithashtu për role në filma si “Birdman” dhe “The Favourite”, si dhe si producente për “Poor Things”.

    Pas shpalljes së nominimeve, Stone u shpreh mirënjohëse ndaj Akademisë dhe ekipit të filmit “Bugonia”, duke veçuar regjisorin Yorgos Lanthimos për bashkëpunimin dhe lidhjen e tyre krijuese, që tashmë po shënon histori në Oscar.

  • Rama për ligjëratën e Speciales në shkollë: Pa leje, pa koordinim, kjo nuk duhet të ndodhë kurrë!

    Rama për ligjëratën e Speciales në shkollë: Pa leje, pa koordinim, kjo nuk duhet të ndodhë kurrë!

    Kryetari i Komunës së Prishtinës, Përparim Rama, ka reaguar lidhur me mbajtjen e një aktiviteti të Gjykatës Speciale në gjimnazin “Xhevdet Dodaj” pa, siç tha ai, leje apo koordinim me institucionet komunale, duke u shprehur i indinjuar e ku ka paralajmëruar masa ndaj përgjegjësve.

    Rama për media tha se aktiviteti është zhvilluar pa njoftimin e Drejtorisë së Arsimit apo kabinetit të tij dhe se tashmë janë ndërmarrë veprime për të sqaruar rrethanat dhe për të zbatuar rregulloret në fuqi.

    “Unë faktikisht kur e mora vesh isha shumë i indinjuar për arsye se nuk ka pasur as leje as koordinim me askënd, as prej drejtorisë as prej kabinetit tim. Kemi ndërmarrë masa të menjëhershme. Pra kush ka bërë një gjë të tillë pa marrë leje, pa koordinim normal që do të ketë edhe veprime të ndryshme. Jam tejet i indinjuar me atë çka kanë bërë, nuk duhet me ndodh kurrë ajo në institucionet tona në qytet e as kund tjetër pa një leje prej Drejtorisë së Arsimit. Ato do të jenë të ndërlidhura me rregulloret në fuqi, do t’i ndërmarrim masat”, tha ai.

  • Gjersa liderët botëror po takohen mes veti në Davos, Vuçiq “si influencerët” prezanton hotelin ku po qëndron

    Gjersa liderët botëror po takohen mes veti në Davos, Vuçiq “si influencerët” prezanton hotelin ku po qëndron

    Gjersa liderët botërorë po takohen mes veti në Forumin Botëror Ekonomik në Davos, presidenti serb po provon veten në një sferë të re – atë të influencerit.

    Aleksandar Vuçiq gjatë qëndrimit në Zvicër organizoi një “room tour” të detajuar të akomodimit ku po qëndron në Klosters.

    Ai shpjegoi se akomodimi i tij ndodhet rreth 20 kilometra larg aeroportit dhe se në Forumit Ekonomik Botëror është tashmë “njëmbëdhjetë ose dymbëdhjetë herë”, megjithëse, siç thotë ai, nuk ka qëndruar kurrë në Davos.

    “Kjo është një nga dhomat më të mira këtu. Do ta shihni, gjithçka është e thjeshtë, në përputhje me modestin zviceran. Mobiliet janë në stil IKEA, druri i thjeshtë, nuk ka asgjë të veçantë. Shtratet janë pak të shkurtra, fatmirësisht nuk ka kufizues, kështu që mund të shtrihem”, tha udhëheqësi, duke shtuar se “nuk e ka rregulluar gjithçka perfekt”.

    Ai veçoi veçanërisht edhe dollapin e improvizuar, ku, siç tregoi, këmishat janë vendosur në mënyrë të rregullt, dhe gjithashtu faktin që në “apartamentin special” ka mundësinë të bëjë vetë çaj.

    “Frigoriferi është i vogël. Interesant, këtu kanë vendosur një ujk”, tha Vuçiq, duke komentuar pamjen në mur, duke shpjeguar se ujku, sipas tij, është mysafir i zakonshëm në malet përreth, transmeton Telegrafi.

    Presidenti i Serbisë më pas tregoi dhomën e ndenjes ku pret mysafirët, materialet e punës dhe librat.

    Në fund ai zbuloi se do të kthehet mbrëmjen e sotme në Beograd.

    Ndryshe, Vuçiq ka pasur vetëm dy takime në Davos, atë me kryeministrin hungarez dhe me të Bosnje-Hercegovinës.

  • Kinezja tentoi të ikte nga Shqipëria me mbi 60 mijë euro të padeklaruara, kapet në Rinas

    Kinezja tentoi të ikte nga Shqipëria me mbi 60 mijë euro të padeklaruara, kapet në Rinas

    Një shtetase kineze ka tentuar të largohet nga Republika e Shqipërisë përmes Rinasit me një shumë të madhe parash të padeklaruara.

    Siç njofton Policia e Shtetit, e dyshuara me vete ka pasur mbi 60 mijë euro dhe 10 mijë dollarë, që nuk i kishte deklaruar.

    “Si rezultat i kontrolleve të imtësishme në hyrje/dalje të vendit, me objektiv parandalimin dhe konstatimin e paligjshmërive në kufi, shërbimet e Policisë Kufitare të Rinasit, në bashkëpunim me shërbimet doganore, kanë goditur një tjetër rast të mosdeklarimit në pikën e kalimit kufitar të shumave të konsiderueshme të parave”.

    “Për këtë rast u referuan materialet në Prokurori, ku nisi procedimi penal në gjendje të lirë për shtetasen A. W., 45 vjeçe, me shtetësi kineze, të cilës gjatë kontrollit në vijën e dytë iu gjetën 61 755 euro dhe 10 000 dollarë amerikanë, që synonte t’i nxirrte nga Republika e Shqipërisë, pa i deklaruar konform ligjit”, tha Policia.

  • Djali i Nait Hasanit raportohet se është arrestuar në aksionin për manipulim votash në Prizren

    Djali i Nait Hasanit raportohet se është arrestuar në aksionin për manipulim votash në Prizren

    Prokuroria Themelore në Prizren është duke e zhvilluar një aksion në lidhje me manipulimin me vota për zgjedhjet e 28 dhjetorit 2025.

    Nga kjo Prokurori kanë konfirmuar për gazetën online Reporteri.net se aksioni është duke vazhduar dhe detaje të tjera priten të bëhen të ditura më vonë.

    Sipas raportimeve, në këtë aksion ka edhe të arrestuar. Një nga ta raportohet të jetë, Art Hasani, djali i Nait Hasanit të PDK-së.

    Djali i Hasanit dyshohet se ka ushtruar funksionin e komisionerit në zgjedhjet e jashtëzakonshme parlamentare të 28 dhjetorit.

    Përpos tij, deri më tani është konfirmuar se është arrestuar edhe një komisioner i partisë së udhëhequr nga Emilja Rexhepi, Nova Demokratska Stranka shkuan Reporteri.net

    Lajmin e ka konfirmuar avokati i të dyshuarit, Blend Gjini, i cili përfaqëson atë në këtë çështje.

    Aksioni është duke vazhduar.

  • Jonuz Salihaj: Nxënësit e lazdruar janë fëmijë inteligjentë, fajin e ka sistemi arsimor

    Jonuz Salihaj: Nxënësit e lazdruar janë fëmijë inteligjentë, fajin e ka sistemi arsimor

    Njohësi i arsimit Jonuz Salihaj, ka ngritur shqetësimin se shumë nxënës që në shkolla etiketohen si “të lazdruar” apo problematikë, në të vërtetë janë fëmijë me inteligjencë dhe aftësi të veçanta, por që nuk gjejnë mbështetjen e duhur nga sistemi arsimor.

    Ai ka treguar një rast konkret nga përvoja e tij, ku një nxënës i klasës së tretë shqetësonte mësuesen gjatë orës mësimore duke u futur në dollap, por megjithatë i përgjigjej saktë çdo pyetjeje që i bëhej. Sipas Salihajt, ky ishte një shembull i qartë i një fëmije super inteligjent, i cili nuk stimulohej siç duhet nga mësimdhënësja.

    “…Kur mësuesja nuk është në nivelin e duhur profesional dhe nuk di si ta motivojë një nxënës të tillë, ai fëmijë nuk e duron ligjëratën dhe reagon. Këta nuk janë fëmijë të lazdruar, por fëmijë me prirje dhe aftësi të veçanta…”, ka deklaruar Salihaj.

    Ai theksoi se përveç fëmijëve me nevoja të veçanta, ekzistojnë edhe fëmijë me talent të jashtëzakonshëm, për të cilët në vende të zhvilluara dhe në Evropë ekzistojnë programe të veçanta, madje edhe institucione prestigjioze si Akademia e Shkencave e Britanisë së Madhe që merren me ta.

    Sipas Salihajt, shoqëria jonë ka shumë fëmijë inteligjentë, por shpesh ata “i humbim” për shkak të mungesës së qasjes së duhur në shkolla. Ai fajëson drejtpërdrejt sistemin arsimor dhe jo nxënësit, duke paralajmëruar se përjashtimi i tyre nga klasa i çon drejt dëshpërimit.

    “…Kemi humbur shumë fëmijë të mirë, i kemi nxjerrë në rrugë dhe i kemi bërë rebelë. Këtu fajin e ka sistemi arsimor. Duhet një sistem me psikologë dhe me mësues të përgatitur për t’i kuptuar këta fëmijë…”, përfundoi Salihaj.

    Për ta dëgjuar intervistën e plotë të Jonuz Salihajt, klikoni linkun e mëposhtëm: