Blog

Një foto e kryeministrit izraelit Benjamin Netanyahu gjatë një telefonate është bërë shpejt një temë e nxehtë diskutimi në mediat sociale dhe në qarqet ndërkombëtare. Një detaj që nuk i ka shpëtuar askujt është shiriti mbi kamerën e telefonit të tij celular.

Edhe pse në shikim të parë duket e pazakontë për udhëheqësin e një vendi të përparuar teknologjikisht, ekspertët theksojnë se kjo është një masë e rreptë sigurie. Besohet se Netanyahu po e përdor shiritin për të parandaluar filmimin e paautorizuar në zona të ndjeshme, sulmet e hakerimit përmes të cilave kamera mund të aktivizohet nga distanca, si dhe mbikëqyrjen dixhitale dhe mbledhjen e të dhënave konfidenciale vizuale.

Ky veprim nuk është një rast i izoluar. Një numër në rritje i politikanëve të lartë dhe zyrtarëve të sigurisë në të gjithë botën po përdorin metoda të ngjashme “analoge” të mbrojtjes në epokën dixhitale. Në një kohë kur spiunazhi i sofistikuar si Pegasus është bërë një kërcënim real, edhe pengesa më e thjeshtë fizike, siç është një copë shiriti, konsiderohet një barrierë efektive.

Netanyahu's mobile phone camera covered with tape pic.twitter.com/Rvp2x4TKTF

— Globe Observer (@_GlobeObserver) January 26, 2026

“Në botën e politikës së lartë, privatësia e komunikimit është e paçmuar. Një kamera e mbyllur është një sinjal i qartë se askush, madje as kryeministri, nuk është imun ndaj ndërhyrjeve të mundshme dixhitale”, thonë analistët e sigurisë.
Ndërsa disa e lavdërojnë kujdesin dhe ndërgjegjësimin e kryeministrit për sigurinë kibernetike, të tjerë në mediat sociale po komentojnë ironinë që udhëheqësi i një prej fuqive kryesore të teknologjisë kibernetike në botë duhet të përdorë shirit ngjitës për t’u ndjerë i sigurt.

Kjo foto ka ringjallur një debat më të gjerë rreth cenueshmërisë së telefonave inteligjentë dhe rreziqeve për të dhënat personale të të gjithë përdoruesve, jo vetëm të zyrtarëve qeveritarë.

Bedri Hamza, kryetari i Partisë Demokratike të Kosovës, ka kujtuar viktima e Holokaustit në Ditën Ndërkombëtare të Përkujtimit të Holokaustit.

Hamza ka thënë se kjo ditë na ‘’kujton se urrejtja dhe përjashtimi sjell tragjedi’’.

Postimi:

Çdo 27 janar na kujton se urrejtja dhe përjashtimi sjellin tragjedi. Nderime për çdo jetë të pafajshme të humbur gjatë Holokaustit.

Kujtesa është përgjegjësi dhe çdo brez duhet të mbrojë dinjitetin, liritë dhe të drejtat e njeriut.

Tre zyrtarë të Komunës së Prishtinës janë arrestuar të martën, nën dyshimin për marrje ryshfeti.

Lajmin e ka konfirmuar Zejnullah Gashi, kryeprokurori i Prokurorisë Themelore në Prishtinës.

“Janë shoqëruar tre persona për marrje ryshfeti. Janë zyrtarë të Komunës së Prishtinës për marrje të ryshfetit, derisa njëri prej tyre është zënë në flagrancë”.

Presidenti francez Emmanuel Macron tërhoqi vëmendjen me syzet e tij blu të diellit që i mbante brenda në Forumin Ekonomik në Davos.

Një koment për këto syze e bëri presidenti amerikan Trump në një fjalim në këtë forum, ndërsa Macron pas disa deklaratave të ashpra për kërcënimin e Trump me tarifa s’kishte qëndruar në Davos.

Pa një shaka me këtë Macron s’shpëtoi as nga britanikët.

Kryeministri Keir Starmer në një shfaqje komedie vendosi një palë syze dielli, duke e imituar Macron dhe tha “Bonjour”.

Macron mbajti syzet për shkak të një skuqje që kishte në sy.

Në një ngjarje në Francë derisa iu drejtonte trupave ushtarake ai e minimizoi gjendjen e tij dhe tha se ishte “krejtësisht beninje” dhe “krejtësisht e parëndësishme”, duke shtuar: “Ju lutem më falni për pamjen e shëmtuar të syrit tim”.

Dy të rinj, 20 dhe 24 vjeç, janë arrestuar dhe janë lënë në paraburgim në lidhje me vrasjen e një shoferi taksie në qytetin Geel të Belgjikës, bëri të ditur Prokuroria e Antverpit.

Vendimi për masën e sigurisë u mor nga gjyqtari hetues, ndërsa hetimet vijojnë për zbardhjen e plotë të ngjarjes, raporton Euronewsalbania.

Viktima është shtetasi shqiptar Marko Beka, 45 vjeç, banues në Geel dhe me profesion taksist.

Ai u qëllua për vdekje me armë zjarri mbrëmjen e së premtes, rreth orës 21:00, pranë një parku pas kishës në fshatin Larum, teksa ndodhej në bisedë me disa pasagjerë. Pavarësisht ndërhyrjes së shërbimeve të emergjencës, Beka nuk mundi t’u mbijetonte plagëve të marra. Ai la pas bashkëshorten dhe tre fëmijë.

Sipas autoriteteve belge, dyshohet se ngjarja ka nisur pas një debati që ka dalë jashtë kontrollit. Prokuroria ka bërë me dije se viktima “nuk ishte zgjedhur rastësisht”, por motivi i saktë i krimit mbetet ende i paqartë. Nuk është konfirmuar nëse bëhet fjalë për një përplasje spontane apo për një akt të paramenduar.

Zona e ngjarjes u rrethua për disa orë, ndërsa në vend mbërritën hetuesit, laboratori kriminalistik dhe mjeku ligjor. Prokuroria e Antverpit ka deklaruar se hetimet po vijojnë intensivisht për të sqaruar rolin e secilit të dyshuar dhe rrethanat e plota të vrasjes.

Këshilli i Qytetit të Sarajevës pritet që nesër të marrë vendim për dhënien e pëlqimit që Qyteti i Sarajevës t’i bashkohet si palë e dëmtuar një procedure penale që po zhvillohet në Milano, kundër personave të përfshirë në të shtënat me snajper ndaj civilëve të Sarajevës gjatë luftës.

Me këtë vendim, Qyteti i Sarajevës do t’i bashkohet zyrtarisht procedurës penale që po zhvillohet para organeve kompetente gjyqësore në Milano, e cila është iniciuar ndaj shtetasve italianë të dyshuar për pjesëmarrje në krime të kryera gjatë rrethimit të Sarajevës.

Vendimi parasheh gjithashtu autorizimin e kryetarit të Bashkisë së Sarajevës dhe Avokaturës së Qytetit që, brenda kompetencave të tyre, të ndërmarrin të gjitha veprimet ligjore, teknike dhe administrative për përfshirjen e Qytetit të Sarajevës në këtë procedurë penale në cilësinë e palës së dëmtuar.

Procedura në Milano është konfirmuar përmes një shkrese zyrtare të datës 18 dhjetor 2025, të dërguar nga Konsullata e Përgjithshme e Bosnjë e Hercegovinës në Milano, përmes Ministrisë së Punëve të Jashtme të BeH-së, e cila i është dorëzuar Qytetit të Sarajevës më 29 dhjetor 2025.

Në shkresë theksohet se para organeve kompetente në Milano është hapur një procedurë penale kundër shtetasve të Italisë, të dyshuar se kanë marrë pjesë në të shtënat me snajper ndaj civilëve në Sarajevë.

Hetimi është iniciuar nga gazetari investigativ italian Ezio Gavazzeni, në bashkëpunim me ish-gjykatësin penal Guido Salvani, ndërsa procedurën hetimore e udhëheq prokurori Alessandro Gobbis. Palën e dëmtuar e përfaqëson avokati Nicola Brigida, i cili po e ofron përfaqësimin pro bono.

Sipas Konsullatës së Bosnjë e Hercegovinës në Milano, avokati Brigida ka kërkuar zyrtarisht nëse Qyteti i Sarajevës dëshiron të përfshihet në këtë procedurë si palë e dëmtuar.

Në përputhje me legjislacionin penal, pala e dëmtuar ka kompetenca të kufizuara procedurale, por edhe një rol të rëndësishëm, veçanërisht në fazën e hetimit, ku mund të paraqesë kërkesa për dëmshpërblim, të veprojë si ndihmëse e prokurorisë, të propozojë prova dhe të kontribuojë në zbardhjen e plotë të rastit.

Po ashtu, gjatë shqyrtimit gjyqësor, pala e dëmtuar mund të thirret si dëshmitare, të paraqesë kërkesë pasurore-juridike, të mbajë fjalën përfundimtare dhe të ushtrojë të drejtën e ankesës ndaj vendimit.

Në dokumentacion theksohet se veprimet e snajperistëve gjatë luftës, të cilët qëllonin mbi civilë të paarmatosur në Sarajevë, përbëjnë një traumë të thellë individuale dhe kolektive për qytetin, duke lënë plagë të përhershme. Gjatë rrethimit të Sarajevës, mbi 11 mijë civilë humbën jetën, mes tyre një numër i madh fëmijësh.

Ndjekja penale dhe ndëshkimi i përgjegjësve konsiderohet si një hap i rëndësishëm për mbrojtjen e vlerave themelore shoqërore, ruajtjen e rendit juridik, si dhe për drejtësinë ndaj viktimave dhe familjeve të tyre. /Vijesti