Blog

Një ngjarje tragjike ka ndodhur në jug të Londrës, ku një i ri shqiptar është goditur me thikë dhe ka humbur jetën.

22-vjeçari, Lorik Abazi u gjet i plagosur në Hesterman Way, të dielën dhe, pavarësisht përpjekjeve mjekësore, ai vdiq në spital, shkruan BBC.

Familja e Lorikut ka shpërndarë një deklaratë të ndjerë, duke përshkruar të riun si “një person të kujdesshëm, të zgjuar, me një sens të bukur humori dhe me një të ardhme të ndritur përpara, por që iu pre në mes”.

Pas ngjarjes, dy vajza, të dyja 25 vjeçare, dhe një djalë 28 vjeçar u arrestuan si të dyshuar për vrasje. Njëra nga vajzat u lirua me kusht, ndërsa hetimet vazhdojnë.

Kryeinspektori Nick Blackburn ka shprehur ngushëllimet e tij për familjen e Lorikut, duke thënë: “Mendimet e mia janë me familjen dhe të dashurit e Lorikut, të cilët kanë pësuar një humbje të paimagjinueshme.”

Për nder të 18-vjetorit të shpalljes së Pavarësisë, është mbajtur ceremonia zyrtare e parakalimit të Forcës së Sigurisë së Kosovës (FSK) dhe Policisë, një ngjarje që simbolizon forcën dhe stabilitetin e shtetit të Kosovës.

Gjatë kësaj ceremonie, Presidentja e Kosovës, Vjosa Osmani, ka kujtuar sakrificat e brezave të tërë për lirinë dhe mëvetësinë e vendit.

Në fjalimin e saj, Presidentja Osmani theksoi se askush nuk mund ta njollosë luftën e Ushtrisë Çlirimtare të Kosovës (UÇK). Ajo e përshkroi luftën e UÇK-së si një luftë të drejtë dhe çlirimtare, që ishte e udhëhequr nga e drejta për liri dhe shtet. Osmani theksoi se pa kontributin dhe sakrificat e jashtëzakonshme të UÇK-së, pavarësia e Kosovës nuk do të ishte realiteti që shqiptarët e Kosovës po festojnë sot.

“Ajo ishte një luftë e drejtë, një luftë çlirimtare, një luftë mbrojtjeje e udhëhequr nga e drejta për liri dhe shtet. Pa këtë kontribut të jashtëzakonshëm të UÇK-së dhe pa këtë sakrificë, pavarësia e Kosovës nuk do të ishte realiteti që e festojmë sot,” tha Presidentja Osmani.

Brohoritje e duartrokitje, u dhanë teksa Rifat Jashari po kalonte rrugën nëpër të cilën do të kalojnë trupat e ushtrisë së Forcës së Sigurisë së Kosovës dhe policët e Kosovës në shënim të 18-vjetorit të pavarësisë së Kosovës, raporton EO.

Jashari si përfaqësues i familjes legjendar të komandantit Adem Jashari me duar lart përshëndeti qytetarët, të cilët sikur dhe çdo vit tjetër tradicionalisht, nga afër shohin parakalimin e FSK-së dhe Policisë, që jep ndjenjë krenarie.

Kryetari i Skenderajt, Sami Lushtaku, ka ndarë pamje të ku shihen autobusë e vetura të shumta që janë nisur drejt Prishtinës ku do të mbahet marshi në përkrahje të ish-krerëve të UÇK-së që po gjykohen në Hagë.

Sot në 18 vjetorin e pavarësisë, do të mbahet marshi “Drejtësi, jo politikë” , i cili është organizuar nga platforma “Liria ka Emër”.

Ky manifestim ka për qëllim të shprehë qëndrimin kundër procesit gjyqësor ndaj ish-krerëve të UÇK-së dhe do të jetë një tubim paqësor dhe gjithëpërfshirës, me kërkesën për drejtësi të paanshme.

Për mbarëvajtjen e tubimit janë angazhuar njësitë policore, zjarrfikësit dhe strukturat emergjente, ndërsa transporti i organizuar me autobusë nga të gjitha komunat pritet të lehtësojë ardhjen e qytetarëve në kryeqytet.

Presidentja e Kosovës, Vjosa Osmani bashkë me presidentin e Shqipërisë Bajram Begaj,me kryetaren e Kuvendit Albulena Haxhiu, dhe kryeministrin Albin Kurti kanë bërë homazhe te Monumenti Heroinat, raporton Ekonomia Online.

Kurora lulesh u vendosen në këtë monument në nder të  18-vjetorit të pavarësisë së Kosovës.

Kuvendi i Komunës së Gjilanit, nën udhëheqjen e Krenare Latifi-Kqikut, ka mbajtur seancë solemne me rastin e 18-vjetorit të shpalljes së pavarësisë së Kosovës, ku pos përfaqësuesve institucionalë, morën pjesë edhe përfaqësues nga organizatat e dala nga lufta e UÇK-së e familjarë të dëshmorëve.

Kryesuesja Latifi-Kqiku tha se sot jetojmë me dinjitet në shtetin e lirë për të cilin kontribuan dhe sakrifikuan breza të tërë me dekada e shekuj.

“Për këtë ditë u dha shumë mund, shumë sacrifice e u derdh shumë gjak, që Kosova të bëhej e lirë dhe e barabartë me shtetet tjera të botës”, ka thënë ajo.

Kryetari i Komunës së Gjilanit, Alban Hyseni, tha se 17 shkurti është dita kur u realizua ëndrra shekullore për një shtet të pavarur dhe sovran.
“Kjo ditë mishëron sakrificën, guximin dhe idealin e brezave për liri. 17 shkurti është dita kur u realizua ëndrra shekullore për një shtet të pavarur dhe sovran. Është dita ku përulemi me respekt para dëshmorëve të kombit, para familjeve që dhanë më të shtrenjten për lirinë tonë, para të gjithë atyre që kontribuan në rrugëtimin e Republikës së Kosovës drejt pavarësisë”, ka theksuar përveç tjerash, kryetari Hyseni.
Ndërkaq, ish-komandanti i Zonës Operative të Karadakut, Ahmet Isufi, tha se 17 shkurti është një përpjekje shekullore e popullit të Kosovës, ku gjenerata të tëra sakrifikuan për të ardhur deri te akti i shpalljes së pavarësisë së Kosovës.

“Lufta jonë çlirimtare i ka vu kurorën lirisë, në saje të angazhimit të njerëzve të devotshëm e patriotëve të vërtetë e luftëtarëve”, ka thënë Isufi.

Në këtë seancë solemne, kanë adresuar mesazhet e tyre edhe përfaqësuesit e partive politike në Kuvendin e Komunës, përkatësisht Muhadin Haziri (LDK), Riad Rashiti (PDK) dhe Nazim Gagica (AAK).