ATV

Blog

  • Cucurella e mban premtimin pas triumfit në Botëror, bën tatuazh fytyrën e trajnerit De la Fuente

    Cucurella e mban premtimin pas triumfit në Botëror, bën tatuazh fytyrën e trajnerit De la Fuente

    Marc Cucurella e ka shndërruar në realitet një premtim që kishte bërë para finales së Kupës së Botës. Mbrojtësi i Kombëtares së Spanjës ka bërë tatuazh fytyrën e përzgjedhësit Luis de la Fuente, si shenjë falënderimi për njeriun që e udhëhoqi “La Rojan” drejt titullit botëror.

    Para finales, Cucurella kishte deklaruar se do ta përjetësonte trajnerin në trupin e tij nëse Spanja arrinte të fitonte trofeun.

    “Nëse fitojmë Kupën e Botës, do ta bëj tatuazh fytyrën e Luis de la Fuentes. Duhet të jetë në një vend të dukshëm, sepse njerëzit do të më pyesin për të”, kishte thënë ai.

    Premtimi mori jetë pasi Spanja triumfoi 1-0 ndaj Argjentinës në finalen e madhe, duke fituar për herë të parë në histori Kupën e Botës.

    Vetëm disa ditë pas suksesit historik, mbrojtësi publikoi tatuazhin e ri në rrjetet sociale, duke dëshmuar se nuk kishte ndërmend të tërhiqej nga fjala e dhënë.

    Cucurella ishte një prej lojtarëve kyç në rrugëtimin triumfues të Spanjës gjatë turneut, ndërsa raporti i tij me Luis de la Fuente është forcuar edhe më shumë gjatë viteve të fundit. Tani, si kujtim i përhershëm i këtij suksesi historik, fytyra e trajnerit kampion të botës do ta shoqërojë mbrojtësin spanjoll gjatë gjithë jetës.

  • Shaqir Lutvija dënohet me 10 vjet burgim për krime lufte në Prizren

    Shaqir Lutvija dënohet me 10 vjet burgim për krime lufte në Prizren

    Gjykata Themelore në Prishtinë edhe në rigjykim e ka shpallur fajtor dhe e ka dënuar me 10 vjet burgim të akuzuarin Shaqir Lutvija, lidhur me akuzën për krime lufte në Prizren.

    Aktgjykimi u shpall të martën nga kryetari i trupit gjykues, Kujtim Krasniqi, dhe anëtarët Violeta Namani-Hajra dhe Rrahman Beqiri, raporton “Betimi për Drejtësi”.

    Gjykatësi Krasniqi tha se në dënimin me burgim, të akuzuarit i llogaritet edhe koha e kaluar në paraburgim. Kjo masë i vazhdohet deri në plotfuqishmëri të aktgjykimit, por jo më shumë sesa dënimi i shqiptuar.

    I akuzuari obligohet të paguajë edhe shpenzimet e procedurës penale- 400 euro për paushallin gjyqësor dhe 100 euro për Fondin për Kompensimin e Viktimave të Krimit.

    Të dëmtuarit, për realizimin e kërkesës pasurore- juridike udhëzohen në kontest të rregullt juridiko-civil.

    Kundër këtij aktgjykimi, palët kanë të drejtë ankese brenda 30 ditësh përmes kësaj Gjykate në Gjykatën e Apelit.

    Prezent në sallë qenë prokurori Armend Zenelaj dhe i akuzuari Shaqir Lutvija me mbrojtësen e tij, avokaten Jovana Filipoviq.

    Themelorja më 11 nëntor 2025 kishte shpallur aktgjykim dënues ndaj të akuzuarit Lutvija, duke e dënuar me 10 vjet burgim. Por, Gjykata e Apelit me vendimin e 23 qershorit 2026 e ktheu lëndën në rigjykim.

    Në seancën fillestare të mbajtur më 17 shtator 2024, Lutvija u deklarua i pafajshëm për akuzën që i vihet në barrë.

    Prokuroria Speciale e Republikës së Kosovës më 4 shtator 2024 ka ngritur aktakuzë kundër Shaqir Lutvijës, i cili akuzohej se në cilësinë e inspektorit dhe policit në Stacionin Policor në Prizren, individualisht dhe në bashkëkryerje me persona të tjerë të forcave policore serbe, gjatë periudhës kohore 1998-1999, në Prizren, gjatë kohës së luftës në Kosovë, ka ushtruar masat represive të vrasjes, arrestimit, rrahjes, maltretimit dhe trajtimit çnjerëzor.

    Aktakuza thotë se sipas dëshmisë së dëshmitarëve: Murat Kabashi, Elmi Gashi, Sefer Ejupi, Vehbi Velija, Qemajl Kollari, Ukë Kolgeci, Haxhi Gashi, Safet Gashi, Hasan Shala dhe Arsim Zyba, i akuzuari Lutvija nga 28 shtatori 1998 deri më 7 tetor 1998, në bashkëkryerje me pjesëtarët e tjerë të forcave policore, kanë ndërmarr një fushatë për arrestimi e tyre në burgun e Prizrenit, në cilësinë e popullatës civile të nacionalitetit shqiptar, në mesin e të cilëve ishin: R.J., dhe të lartcekurit.

    Gjithnjë sipas aktakuzës, forcat serbe pas arrestimit i dërguan në Stacionin Policor në Prizren, me ç’rast i akuzuari Lutvija së bashku me të pandehurit e tjerë, në cilësinë e inspektorit të këtij stacioni, i morën në pyetje të dëmtuarit dhe gjatë procesit të marrjes në pyetje i kanë rrahur me boksa e shqelma, me mjete të tjera të forta dhe metoda të tjera të trajtimit çnjerëzor.

    Në aktakuzë thuhet se Lutvija dhe të pandehurit tjerë, kanë përdorë mjete të rrymës elektrike, të cilat ua vendosnin në pjesën e duarve dhe në organe gjenitale, me ç‘rast si pasojë e kësaj R.J., kishte vdekur, kurse Murat Kabashi, Elmi Gashi, Sefer Ejupi, Vehbi Velija, Qemajl Kollari, Ukë Kolgeci, Haxhi Gashi, Safet Gashi, Hasan Shala dhe Arsim Zyba pësuan lëndime serioze trupore.

    Me këtë, Lutvija akuzohej se në bashkëkryerje ka kryer veprën penale “Krime lufte kundër popullatës civile” nga neni 142 lidhur me nenin 22 të Ligjit Penal të RSFJ-së.

     

  • Dobësitë në zbatimin e ligjit po mundësojnë vazhdimin e shfrytëzimit ilegal të rërës dhe zhavorrit nga lumenjtë

    Dobësitë në zbatimin e ligjit po mundësojnë vazhdimin e shfrytëzimit ilegal të rërës dhe zhavorrit nga lumenjtë

    Demokraci Plus (D+) ka publikuar analizën “Shfrytëzimi ilegal i rërës dhe zhavorrit nga lumenjtë dhe degradimi i ekosistemeve lumore”, e cila analizon sfidat në parandalimin dhe trajtimin e kësaj dukurie në Kosovë. Analiza tregon se sfida kryesore nuk qëndron te mungesa e legjislacionit, por te zbatimi i tij në praktikë.

    Gjetjet identifikojnë tri probleme kryesore që kufizojnë reagimin institucional: kapacitetet e pamjaftueshme për inspektim dhe monitorim, koordinimin e dobët ndërinstitucional dhe sfidat në procedurat gjyqësore.

    Sipas analizës, sipërfaqja e degraduar përgjatë lumenjve është rritur nga 1,762.71 hektarë në vitin 2018 në 2,059.96 hektarë në vitin 2024, ndërsa Drini i Bardhë mbetet lumi më i prekur. Në të njëjtën kohë, disa nga masat kryesore të parapara në Strategjinë Shtetërore për Ujëra ende nuk janë zbatuar, përfshirë hartimin e planit për menaxhimin e shfrytëzimit të lumenjve dhe përcaktimin e segmenteve ku mund të lejohet nxjerrja e rërës dhe zhavorrit.

    Analiza evidenton gjithashtu se gjatë viteve 2023–2025, prokuroritë kanë regjistruar 184 kallëzime penale dhe kanë ngritur 137 aktakuza. Megjithatë, shqyrtimi i praktikës gjyqësore tregon se gjobat shpesh mbeten të ulëta në raport me dëmin e shkaktuar, konfiskimi i makinerive nuk zbatohet gjithmonë, ndërsa dëmi ekologjik nuk reflektohet në mënyrë të mjaftueshme gjatë caktimit të sanksioneve.

    Analiza vlerëson se institucionet kanë treguar se mund të arrijnë rezultate konkrete kur bashkëpunojnë. Gjatë funksionimit të Task Forcës së Gjelbër u realizuan mbi 30 aksione të përbashkëta, u shqiptuan 24 gjoba administrative, u referuan 23 raste për procedim penal dhe u sekuestruan 30 mjete, me vlerë të përafërt prej rreth 2 milionë eurosh. Megjithatë, pas përfundimit të mandatit të saj nuk është krijuar një mekanizëm i përhershëm koordinues.

    Bazuar në këto gjetje, D+ rekomandon forcimin e kapaciteteve inspektuese dhe hetimore, funksionalizimin e Këshillit Ndërministror për Ujëra, përmirësimin e koordinimit ndërinstitucional, klasifikimin e rasteve të shfrytëzimit ilegal të rërës dhe zhavorrit si kategori e veçantë në Sistemin për Menaxhimin Informativ të Lëndëve (SMIL), si dhe zbatim më konsistent të masës së konfiskimit dhe vlerësim më të plotë të dëmit ekologjik gjatë procedurave gjyqësore.

    https://dplus.org/wp-content/uploads/2026/07/Analiza-rreth-shfrytezimit-ilegal-te-reres-dhe-zhavorrit-nga-lumenjte-23.07.2026.pdf

     

  • Gjykata shpall të pafajshëm Sami Lushtakun dhe shtatë të akuzuarit në rastin “Drenica 1”

    Gjykata shpall të pafajshëm Sami Lushtakun dhe shtatë të akuzuarit në rastin “Drenica 1”

    Gjykata Themelore ka liruar nga të gjitha pikat e aktakuzës Sami Lushtakun dhe shtatë të akuzuarit e tjerë në rastin e njohur si “Drenica 1”.

    Vendimi është shpallur të martën, duke i dhënë fund procesit gjyqësor ndaj Sami Lushtakut, Rrustem Rrukollit, Ismet Haxhajt, Fatmir Mjakut, Rexhep Xhotës, Skender Tahirit, Sheremet Jasharit dhe Bajram Dibranit.

    Ata akuzoheshin për vepra penale që lidhen me ndikimin ndaj dëshmitarëve, pengimin e procedurës penale dhe pjesëmarrjen në grup të organizuar kriminal.

    Gjatë gjithë procesit gjyqësor, të akuzuarit kanë mohuar përgjegjësinë për veprat që u viheshin në barrë.

    Me vendimin e Gjykatës Themelore, të gjithë të akuzuarit janë liruar nga të gjitha pikat e aktakuzës, duke u shpallur të pafajshëm në këtë rast.

     

  • Arijon Ibrahimovic flet për të ardhmen ndërkombëtare: Synimi i madh mbetet Gjermania

    Arijon Ibrahimovic flet për të ardhmen ndërkombëtare: Synimi i madh mbetet Gjermania

    Talenti me prejardhje nga Kosova, Arijon Ibrahimovic, ka folur për të ardhmen e tij në arenën ndërkombëtare, duke lënë të kuptohet se objektivi i tij është të veshë një ditë fanellën e Kombëtares A të Gjermanisë.

    Mesfushori ofensiv 20-vjeçar, i cili ka kaluar nëpër të gjitha grupmoshat e përfaqësueses gjermane, konsiderohet një nga futbollistët premtues që mund të hyjë në planet e përzgjedhësit Jurgen Klopp, nëse arrin të sigurojë një rol të rëndësishëm te Bayern Munich.

    Megjithatë, Ibrahimovic theksoi se për momentin nuk dëshiron të mendojë për kombëtaren, pasi i gjithë fokusi i tij është te skuadra bavareze, ku synon të fitojë besimin e stafit teknik dhe të sigurojë më shumë minuta në fushë.

    “Dua të afirmohem fillimisht këtu, të jap maksimumin dhe të luftoj për minuta loje. Çfarë do të ndodhë në të ardhmen, do ta shohim të gjithë. Fokusi im i plotë është te Bayerni”, u shpreh ai.

    E ardhmja e Ibrahimovicit te Bayern Munich ka qenë temë diskutimi edhe në mediat gjermane. Sipas Kicker, ky sezon mund të jetë vendimtar për talentin 20-vjeçar, i cili duhet të dëshmojë vlerat e tij nëse dëshiron të sigurojë një vend në planet afatgjata të klubit.

    Pas huazimit te Heidenheimi, ku sezonin e kaluar zhvilloi 32 ndeshje në Bundesliga, duke shënuar dy gola dhe dhuruar katër asistime, Ibrahimovic është rikthyer te Bayerni me synimin për të bindur drejtuesit dhe trajnerin se e meriton një rol në ekipin e parë. Paraqitjet e tij në “Allianz Arena” pritet të jenë vendimtare jo vetëm për të ardhmen në klub, por edhe për ambiciet e tij për të marrë një ftesë nga Kombëtarja A e Gjermanisë.

  • UEFA u beson sërish gjyqtarëve kosovarë të ndajnë drejtësinë në Ligën e Konferencës

    UEFA u beson sërish gjyqtarëve kosovarë të ndajnë drejtësinë në Ligën e Konferencës

    UEFA ka konfirmuar edhe një herë besimin ndaj arbitrave nga Kosova, duke deleguar dy ekipe gjyqtarësh për ndeshjet e raundit të dytë kualifikues të Ligës së Konferencës.

    Njëri nga delegimet i është besuar gjyqtarit me stemën e FIFA-s, Mervan Bejtullahu, i cili do të ndajë drejtësinë në përballjen mes Ilves dhe Stjarnan. Takimi do të zhvillohet më 30 korrik në stadiumin “Tammelan Stadion” në Tampere, me fillim nga ora 18:00.

    Bejtullahu do të ketë në krah asistentët Edmond Zeqiri dhe Bashkim Hyseni, ndërsa rolin e gjyqtarit të katërt do ta kryejë Alban Shala.

    Ndërkohë, një tjetër delegim i rëndësishëm i është besuar edhe gjyqtarit ndërkombëtar Genc Nuza, i cili do të drejtojë ndeshjen ndërmjet Gent dhe LNZ Cherkasy. Kjo sfidë do të luhet më 30 korrik në “KAA Gent Arena”, me fillim nga ora 20:30.

    Nuza do të ndihmohet nga asistentët Fatmir Sekiraqa dhe Pashtrik Burrniku, ndërsa gjyqtar i katërt do të jetë Erdall Zasella.

    Federata e Futbollit e Kosovës e ka cilësuar këtë si një tjetër vlerësim të rëndësishëm nga UEFA për arbitrat kosovarë. Sipas FFK-së, delegimet dëshmojnë besimin e vazhdueshëm të shtëpisë evropiane të futbollit në profesionalizmin, përgatitjen dhe standardin e lartë që gjyqtarët e Kosovës po shfaqin në arenën ndërkombëtare.

  • Zyrtare: LeBron James transferohet te Philadelphia 76ers

    Zyrtare: LeBron James transferohet te Philadelphia 76ers

    LeBron James do të jetë pjesë e Philadelphia 76ers nga sezoni i ardhshëm, në atë që konsiderohet si një nga transferimet më të mëdha në historinë e NBA-së.

    Klubi nga Filadelfia e konfirmoi zyrtarisht marrëveshjen përmes kanaleve të tij zyrtare, ndërsa presidenti i operacioneve të basketbollit, Mike Gansey, mirëpriti afrimin e një prej emrave më të mëdhenj që ka njohur ndonjëherë ky sport. Megjithatë, detajet financiare të kontratës nuk janë bërë publike.

    Me transferimin e katër herë kampionit të NBA-së dhe katër herë fituesit të çmimit MVP, Philadelphia 76ers forcon ndjeshëm skuadrën në synimin për t’u rikthyer në garën për titullin kampion.

    LeBron do të ndajë parketin me yje si Joel Embiid, Tyrese Maxey, Jaylen Brown dhe VJ Edgecombe, duke formuar një nga skuadrat më të forta në ligë.

    Në moshën 41-vjeçare, James vazhdon të mbetet një prej basketbollistëve më të mirë në botë. Ai është shënuesi më i mirë në historinë e NBA-së me 43,440 pikë, ndërsa gjatë karrierës ka fituar katër tituj kampion, katër çmime MVP të sezonit dhe është shpallur MVP i finaleve në secilin prej katër triumfeve të tij.

    Në 23 sezonet e zhvilluara në NBA me Cleveland Cavaliers, Miami Heat dhe Los Angeles Lakers, LeBron ka regjistruar mesatare prej 26.8 pikësh, 7.5 kërcimesh dhe 7.4 asistimesh për ndeshje.

    Edhe sezonin e fundit me Lakers ai tregoi se vazhdon të performojë në nivel të lartë, duke e mbyllur edicionin me mesatare prej 20.9 pikësh, 7.2 asistimesh dhe 6.1 kërcimesh për takim.

    Në aventurën e tij të re me Philadelphia 76ers, James do të mbajë fanellën me numrin 23, ndërsa klubi shpreson që përvoja dhe cilësitë e tij të jenë çelësi për rikthimin e trofeut të kampionit në Filadelfia.

  • FIFA zgjedh golin më të bukur të Botërorit 2026, Cabral hyn në histori

    FIFA zgjedh golin më të bukur të Botërorit 2026, Cabral hyn në histori

    FIFA ka zyrtarizuar golin më të bukur të Kupës së Botës 2026, ndërsa çmimi prestigjioz i ka takuar reprezentuesit të Kepit të Gjelbër, Sidny Lopes Cabral.

    Mbrojtësi i majtë shkroi historinë, pasi u bë futbollisti i parë nga një përfaqësuese afrikane që fiton këtë vlerësim në një Kampionat Botëror.

    Momenti që i siguroi këtë çmim erdhi në përballjen e 1/8 së finales ndaj Argjentinës. Gjatë kohës shtesë, Cabral zhvilloi një aksion të jashtëzakonshëm individual, duke kaluar fillimisht Alexis Mac Allister me një driblim elegant, përpara se të lëshonte një goditje të fuqishme dhe të saktë nga skaji i zonës, e cila përfundoi në rrjetë, pa i lënë asnjë mundësi reagimi portierit Emiliano Martínez.

    Edhe pse Kepi i Gjelbër u eliminua në fund të takimit pas një autogoli dramatik në minutat e fundit të vazhdimeve, kombëtarja afrikane la gjurmë në debutimin e saj historik në Kupën e Botës. Arritja deri në mesin e 16 ekipeve më të mira të turneut u konsiderua një nga surprizat më të mëdha të edicionit.

    Ndërkohë, supergoli i Cabral është përjetësuar tashmë në historinë e Kampionateve Botërore, pasi FIFA e shpalli zyrtarisht si golin më të bukur të Botërorit 2026, duke i dhënë mbrojtësit afrikan një vend të veçantë mes momenteve më të paharrueshme të turneut.

  • Arrestohen dy persona në Zubin Potok, dyshohen për krime lufte ndaj popullatës civile në vitin 1999

    Arrestohen dy persona në Zubin Potok, dyshohen për krime lufte ndaj popullatës civile në vitin 1999

    Dy persona janë arrestuar në Zubin Potok nën dyshimin për përfshirje në krime lufte kundër popullatës civile gjatë luftës në Kosovë.

    Sipas raportit 24-orësh të Policisë së Kosovës, të dyshuarit, meshkuj kosovarë, dyshohet se gjatë muajit prill të vitit 1999 kanë kryer krime ndaj popullatës civile, ku si pasojë janë vrarë 23 civilë shqiptarë.

    “Si rezultat i veprimeve policore, janë arrestuar dy të dyshuar meshkuj kosovarë, pasi që dyshohet se gjatë luftës në vitin 1999 kanë kryer krime ndaj popullatës civile, ku janë vrarë 23 civilë shqiptarë”, thuhet në njoftimin e Policisë.

    Me vendim të prokurorit të rastit, të dyshuarit janë dërguar në mbajtje, ndërsa hetimet lidhur me rastin janë në vazhdim. /Telegrafi/

  • I plagosuri nga të shtënat në Prishtinë jashtë rrezikut për jetë

    I plagosuri nga të shtënat në Prishtinë jashtë rrezikut për jetë

    Një person ka mbetur i plagosur pas të shtënave me armë zjarri që ndodhën në orët e para të mëngjesit në rrugën “Xheladin Hana” në Prishtinë.

    Rasti është konfirmuar nga Policia e Kosovës, e cila ka bërë të ditur se për incidentin dyshohen dy vëllezër, ndërsa hetimet për zbardhjen e plotë të ngjarjes janë ende në zhvillim.

    Lidhur me gjendjen e të plagosurit, drejtori i Emergjencës, Naser Syla, tha se ai fillimisht ka marrë trajtim në Qendrën Emergjente, e më pas është transferuar në Klinikën e Ortopedisë për vazhdimin e trajtimit.

    “Po, është trajtuar në Qendrën Emergjente dhe, pas trajtimit të marrë aty, është transferuar në Klinikën e Ortopedisë për vazhdim të tretmanit”, deklaroi Syla.

    Ai shtoi se, pas ndërhyrjeve të para mjekësore, gjendja shëndetësore e pacientit është stabile.

    Ndërkohë, Policia e Kosovës po vazhdon veprimet hetimore për të sqaruar rrethanat e plagosjes dhe për të ndërmarrë hapat e nevojshëm ligjorë ndaj të dyshuarve.