Blog

Instituti i Kosovës për Drejtësi ka dorëzuar zyrtarisht kërkesë te Kuvendi i Republikës së Kosovës dhe te kryetarët e grupeve parlamentare për inicimin e një debati parlamentar lidhur me moszbatimin e legjislacionit në fuqi për realizimin e të drejtës në pensionin e moshës krahas pensioneve dhe beneficioneve që u takojnë kategorive të dala nga lufta.

Sipas IKD-së, legjislacioni aktual ua njeh këtyre kategorive të drejtën për përfitimin e dy pensioneve, megjithatë kjo e drejtë, sipas institutit, vazhdon të mos zbatohet në praktikë nga institucionet përgjegjëse, pavarësisht se është konfirmuar edhe përmes praktikës gjyqësore deri në nivelin e Gjykata Supreme e Kosovës.

Përfaqësuesja e IKD-së, Arrita Rezniqi, tha se pas pranimit të shqetësimeve fillestare, instituti ka kryer analizë të detajuar juridike dhe ka konstatuar se legjislacioni në fuqi u lejon qytetarëve të këtyre kategorive përfitimin e dy pensioneve, duke shtuar se kjo e drejtë është konfirmuar edhe përmes praktikës gjyqësore deri në Gjykatën Supreme.

“Pas pranimit të informatave dhe shqetësimeve të para për këtë çështje, kemi kryer një analizë të detajuar juridike, përmes së cilës kemi konstatuar qartazi se legjislacioni në fuqi u lejon qytetarëve të këtyre kategorive të drejtën për përfitimin e dy pensioneve. Kjo e drejtë ishte konfirmuar dhe konsoliduar edhe përmes praktikës gjyqësore, deri në nivelin e Gjykatës Supreme. Që në fillim kemi sqaruar dhe vazhdojmë ta sqarojmë se Ligji Nr. 04/L-054 për statusin dhe të drejtat e Dëshmorëve, Invalidëve, Veteranëve, Pjesëtarëve të UÇK-së, Viktimave të dhunës seksuale gjatë luftës, Viktimave civile dhe Familjarëve të tyre, është ligj i veçantë në raport me Ligjin Nr. 04/L-131 për Skemat Pensionale të Financuara nga Shteti. Si ligj special, në nenin 23 paragrafi 2, ai përcakton se “shfrytëzuesit e pensionit bazë mund të realizojnë të gjitha të drejtat dhe beneficionet e përcaktuara me këtë ligj, nëse i përmbushin kushtet dhe kriteret sipas dispozitave të këtij ligji”, tha ajo.

Ajo shtoi se asnjë dispozitë e Ligjit për Skemat Pensionale të Financuara nga Shteti dhe as ndonjë akt tjetër normativ nuk e ka shfuqizuar këtë dispozitë, duke theksuar se për rrjedhojë përfituesit e pensionit të moshës kanë të drejtë edhe për pensionin nga ligji për kategoritë e dala nga lufta nëse i plotësojnë kushtet.

“Nga ana tjetër, me asnjë dispozitë të Ligjit për Skemat Pensionale të Financuara nga Shteti, ndonëse është ligj i mëvonshëm, dhe as me ndonjë akt tjetër normativ, nuk është shfuqizuar neni 23 i Ligjit 04/L-054. Për rrjedhojë, çdo përfitues i pensionit të moshës ka të drejtë ligjore edhe për pensionin që buron nga Ligji për statusin dhe të drejtat e kategorive të dala nga lufta, nëse i plotëson kriteret përkatëse. Kjo qasje është konfirmuar në mënyrë të përsëritur nga praktika gjyqësore e konsoliduar deri në Gjykatën Supreme. Rrjedhimisht, personat që arrijnë moshën e pensionimit nuk mund të detyrohen të zgjedhin ndërmjet njërit apo tjetrit pension dhe as nuk mund t’u mohohet e drejta për përfitimin e të dy pensioneve”, tha ajo.

Rezniqi tha se megjithatë kjo praktikë vazhdon të zbatohet në departamentet e pensioneve, ku shumë qytetarë marrin vendime refuzuese për një të drejtë që sipas saj u takon qartë me ligj.

“Megjithatë, edhe sot kjo praktikë vazhdon të zbatohet në departamentet e pensioneve, ku një numër i konsiderueshëm qytetarësh vazhdojnë të pranojnë vendime refuzuese për një të drejtë që u takon në mënyrë të qartë sipas ligjit. Gjatë më shumë se dy viteve, IKD ka ndërmarrë aktivitete të shumta me synim arritjen e një zgjidhjeje të përgjithshme, kolektive dhe të përhershme. Për shkak të mungesës së vullnetit nga ana e ekzekutivit, jemi detyruar që paralelisht të ndjekim realizimin e të drejtave individuale përmes rrugës gjyqësore, nëpërmjet Qendrës për Ndihmë Juridike Falas. Vetëm gjatë kësaj periudhe kemi paraqitur rreth 700 padi të kësaj natyre”, tha ajo.

Hulumtuesi i lartë në IKD, Naim Jakaj, tha se duke qenë se bëhet fjalë për problem sistemik, institucionet nuk duhet ta shohin normën ligjore vetëm në mënyrë strikte për zbatim, por edhe në dimensionin social të saj.

Ai tha se kërkohet zhvillimi i një debati parlamentar brenda një periudhe të shkurtër kohore, në mënyrë që institucionet përgjegjëse, përfshirë Ministria e Financave e Kosovës, të sqarojnë arsyet pse nuk është nxjerrë akti nënligjor për realizimin e të drejtës për pension të dyfishtë dhe të adresohen pasojat juridike, sociale dhe financiare të kësaj situate.

“Dhe duke pasur parasysh që ky është një problem sistemik, duke pasur parasysh që Kuvendi i Kosovës, ekzekutivi, nuk duhet me e pa normën ligjore vetëm kështu abstrakte dhe strikte për zbatimin e asaj, por ta shohë edhe dimensionin social të kësaj norme, ne kërkojmë që të zhvillohet një debat parlamentar brenda dy, tre ose tre javëve, ose brenda një muaji, në mënyrë që Ministria e Financave, Punës dhe Transfereve — tashmë si Ministri vetëm e Financave — dhe Ministria e Punës, të nxirret një rezolutë përmes të cilës Kuvendi i Kosovës tregon për cilat arsye nuk është nxjerrë ky akt nënligjor që e realizon këtë të drejtë për përfitim të pensionit të dyfishtë, për pasojat juridike, sociale dhe financiare të këtij mosveprimi dhe për nevojën për veprim urgjent të Ministrisë së Financave, Punës dhe Transfereve, në këtë rast Ministrisë së Financave”.

“Pra, ne presim shumë shpejt që kryetarët e grupeve parlamentare… po kërkojmë edhe nga kryetarja e Kuvendit që ta ushtrojë autoritetin e vet — i lejohet me rregullore edhe me Kushtetutë që të thërrasë një seancë — duke pasur parasysh edhe prej partisë prej nga vjen, por edhe partitë e tjera të cilat kanë kontribuuar në miratimin e një ligji të tillë dhe në funksion të rritjes së kontrollit parlamentar, do të duhej që një seancë e tillë të thirret sa më shpejt”, tha ai. /eo

Një person ka rrahur nënën dhe vëllanë në Pejë.

Kështu njofton Policia e Kosovës përmes raportit ku thotë se i dyshuari ka qenë nën ndikim të alkoolit.

I njëjti, duke mos iu bindur urdhrave të policisë gjatë arrestimit, i ka sulmuar fizikisht edhe dy policë.

Me vendim të prokurorit i dyshuari është dërguar në mbajtje.

Policia e Kosovës ka bërë të ditur se gjatë 24 orëve të fundit janë regjistruar gjashtë raste të dhunës në familje në komuna të ndryshme të vendit.

Prishtinë

Në Prishtina janë raportuar dy raste.
Në njërin, një grua dyshohet se është sulmuar fizikisht nga i dashuri i saj.
Në rastin tjetër, një person dyshohet se ka ushtruar dhunë psikike ndaj nënës së tij dhe ka demoluar shtëpinë.

Pas intervistimit, në të dy rastet është iniciuar procedurë e rregullt.

Pejë

Në Peja, një nënë dhe djali i saj raportuan se djali, përkatësisht vëllai i tyre, ka ushtruar dhunë fizike ndaj tyre. I dyshuari, i cili sipas Policisë ishte nën ndikim të alkoolit, ka sulmuar fizikisht edhe dy zyrtarë policorë gjatë arrestimit. Me vendim të prokurorit, ai është dërguar në mbajtje.

Rahovec

Në Rahovec është arrestuar një grua, e cila dyshohet se ka dëbuar nga shtëpia bashkëshortin dhe e ka kanosur atë. Pas intervistimit, me vendim të prokurorit, e dyshuara është liruar në procedurë të rregullt.

Gjakovë

Në Gjakova janë shënuar dy raste.
Në njërin, një burrë dyshohet se ka sulmuar fizikisht bashkëjetuesen e tij, duke i shkaktuar lëndime të lehta trupore. Ai është arrestuar dhe dërguar në mbajtje.

Në rastin tjetër, një çift (të dashur mes vete) janë përleshur pas një mosmarrëveshjeje. Të dy kanë refuzuar trajtimin mjekësor, ndërsa në vendin e ngjarjes është konfiskuar një thikë. Me vendim të prokurorit, i dyshuari mashkull është dërguar në mbajtje, ndërsa e dyshuara është liruar në procedurë të rregullt.

Ish-zëvendëskryeministrja e Kosovës, Edita Tahiri, ka komentuar fjalën përmbyllëse të Hashim Thaçit në Dhomat e Specializuara.

Ajo është shprehur e emocionuar me deklarimit e ish-presidentit të Kosovës.

Në profilin e saj në Facebook, Tahiri ka shkruar se fjalim i tij ishte fjalim i një lideri të UÇK-së.

“E degjova fjalimin perfundimtar te Hashim Thaçi ne Gjykate – ashtu sic ishte lider i UCK-se edhe fjalimi ishte i tille!”, ka shkruar ai.

Sot në rrugën B në Prishtinë është djegur një shtëpi, si pasojë e një zjarri që ka shpërthyer rreth orës 10:00 të paradites.

Zëdhënësi i Policisë për Rajonin e Prishtinës, Enis Pllana, ka bërë të ditur se policia ka pranuar informatën për incidentin dhe menjëherë ka dalë në vendin e ngjarjes.

“Sot rreth orës 10:00, kemi pranuar informatën për një incident zjarri në rrugën B, në Prishtinë, ku nga zjarri është përfshirë një shtëpi. Në vendngjarje kanë dalë zjarrfikësit dhe policia të cilët po merren me rastin. Nga informatat fillestare nuk është raportuar për ndonjë person të lënduar”, ka deklaruar Pllana.

Njësitë relevante po vazhdojnë hetimet për të sqaruar shkaqet e zjarrit, ndërsa rasti po trajtohet nga organet kompetente.

SHBA-të kanë vendosur të tërheqin trupat e tyre të mbetura në Siri, të cilat numërojnë rreth 1,000, pas tërheqjeve graduale gjatë muajve të fundit, thuhet në një raport.

Duke cituar zyrtarë amerikanë, The Wall Street Journal tha se tërheqja pritet të ndodhë gjatë dy muajve të ardhshëm. Raporti tha se Uashingtoni arriti në përfundimin se një prani ushtarake amerikane në Siri nuk është më e nevojshme, duke përmendur shpërbërjen pothuajse të plotë të YPG/SDF dhe integrimin e saj të mëvonshëm në strukturën shtetërore siriane, duke e bërë misionin origjinal të SHBA-së për të luftuar ISIS-in nëpërmjet partnerëve vendas praktikisht të përfunduar.

Ushtria amerikane tashmë ka finalizuar tërheqjen e saj nga garnizoni Al-Tanf, një postë kyçe pranë kufijve të Sirisë, Jordanisë dhe Irakut, si dhe nga baza Al-Shaddadi në Sirinë verilindore në fillim të këtij muaji, vuri në dukje deklarata

Raporti tha më tej se tërheqja nuk ishte e lidhur me vendosjet aktuale detare dhe ajrore të SHBA-së në Lindjen e Mesme, të cilat synojnë sulme të mundshme ndaj Iranit nëse bisedimet bërthamore dështojnë. Ai tha se Irani kishte paralajmëruar gjithashtu se do të synonte forcat amerikane në rajon në përgjigje të çdo sulmi ajror të SHBA-së.

Duke cituar një zyrtar të lartë amerikan, tha se tërheqja ishte duke u zhvilluar ndërsa qeveria siriane merr përsipër përpjekjet kundër terrorizmit, duke shtuar se forcat amerikane ende mund t’i përgjigjen çdo kërcënimi të ISIS-it.

Sipas The Wall Street Journal, disa zyrtarë amerikanë dhe të huaj paralajmëruan se një prani e reduktuar amerikane mund të rrezikonte një prishje të armëpushimit dhe t’i lejonte ISIS-it të riorganizohej, ndërsa të tjerë thanë se trupat e mbetura shërbyen kryesisht si një sinjal politik dhe jo si një forcë e konsiderueshme kundër terrorizmit.