Qeveria e Kosovës ka themeluar dy ndërmarrje të reja publike lokale në mbledhjen e sotme.
E para është në Komunën e Fushë Kosovës, “Fushë Kosova” Sh.A dhe tjetra në komunën e Drenasit, “EKO Drenasi” Sh.A, që do të ofrojë mirëmbajtjen e hapësirave dhe ndërtesave publike.
Të dyja këto i prezantoi ministrja e Ekonmisë, Artane Rizvanolli.
Kabineti qeveritar në mbledhjen e dytë të saj, miratoi Projekt-programin e projektligjeve për vitet 2026 – 2028, për të cilat kryeministri Albin Kurti tha se këto dy ligje do t’i kenë prioritet.
Në kuadër të kësaj ai tha do ta prioritizojnë Projektligjin për Byronë e Konfiskimit të Pasurisë së Pajustifikueshme, si dhe atë për çmimin tavan
“Në kuadër të agjendës legjislative do të prioritizojmë procedimin e Projektligjit për Byronë shtetërore për konfiskimin e pasurisë së pajustifikueshme dhe Projektligjin e ri për çmimet tavan”, tha Kurti.
Administrata e Presidentit amerikan, Donald Trump, dhe qeveria e Indonezisë kanë bërë të ditur se kanë finalizuar një marrëveshje për uljen e tarifave amerikane ndaj vendit të Azisë Juglindore në 19%, nga 32% sa ishin më parë.
Sipas Shtëpisë së Bardhë, në kuadër të marrëveshjes, Indonezia do të ulë barrierat tregtare për më shumë se 99% të importeve amerikane dhe do të lehtësojë blerje të mallrave amerikane në vlerë mbi 30 miliardë dollarë (22.3 miliardë paund), raporotn BBC, transmeton Sinjali.
Uashingtoni njoftoi se ka dhënë përjashtime nga tarifat për disa produkte indoneziane, përfshirë disa lloje veshjesh dhe tekstilesh që prodhohen me pambuk dhe materiale sintetike nga SHBA-ja.
Përfaqësuesi tregtar i SHBA-së, Jamieson Greer, tha se marrëveshja do të “rrëzojë barrierat tregtare” duke avancuar interesat e popullit amerikan.
Marrëveshja u arrit gjatë një vizite në Uashington nga presidenti i Indonezisë, Prabowo Subianto, për të marrë pjesë në mbledhjen e parë të “Bordit të Paqes” të udhëhequr nga Trump, ku u diskutua rindërtimi i Gazës.
Ministri koordinues për çështjet ekonomike i Indonezisë, Airlangga Hartarto, tha se marrëveshja e finalizuar është në dobi të të dyja palëve dhe do të tërheqë investime më të mëdha në Indonezi.
Sipas Airlangga-s, rreth 90% e kërkesave të Indonezisë lidhur me kushtet tarifore janë pranuar nga SHBA-ja.
“Vizioni i kësaj marrëveshjeje është prosperitet ekonomik i ndërsjellë, zinxhirë të fortë furnizimi dhe respekt për sovranitetin e secilit vend”, u tha ai gazetarëve në Uashington.
Ai shtoi se, si pjesë e marrëveshjes, Indonezia ka siguruar përjashtime nga tarifat për më shumë se 1,700 produkte, përfshirë kafenë, erëzat, çokollatën, gomën natyrale dhe, veçanërisht, produktin e saj kryesor të eksportit – vajin e palmës.
Në këmbim, Indonezia do të hapë tregun e saj për produktet amerikane, duke pranuar standardet e SHBA-së për sigurinë e makinave, emetimet, pajisjet mjekësore dhe farmaceutikët, njoftoi Shtëpia e Bardhë.
Indonezia do të heqë barrierat tregtare për importet amerikane në fusha si bujqësia, shëndetësia, produktet e detit, teknologjia dhe produktet që lidhen me industrinë automobilistike.
Ajo është zotuar gjithashtu të blejë mallra amerikane me vlerë miliarda dollarë, përfshirë pambuk, sojë, mish viçi, avionë Boeing dhe energji.
Indonezia do të lehtësojë gjithashtu kompanitë amerikane në zhvillimin e infrastrukturës së mineraleve të rralla në vend, gjë që do ta ndihmojë Uashingtonin të zgjerojë furnizimin me minerale kritike.
Marrëveshja do të hyjë në fuqi pas 90 ditësh dhe mund të bëhen ndryshime në kushtet e saj nëse të dy vendet bien dakord, tha Airlangga.
Të mërkurën, kompani indoneziane dhe amerikane nënshkruan një sërë marrëveshjesh me vlerë 38.4 miliardë dollarë për partneritete në miniera, teknologji, tekstile dhe industri të tjera.
Prabowo tha se këto marrëveshje erdhën si pjesë e marrëveshjes për tarifat dhe do ta ndihmojnë Indonezinë të ulë suficitin tregtar me SHBA-në.
“Jam shumë optimist për të ardhmen e marrëdhënieve tona”, tha ai gjatë një darke të organizuar nga Dhoma Amerikane e Tregtisë të mërkurën.
Në botën e çantave të luksit, pak modele kanë arritur statusin e një ikone globale si Louis Vuitton Neverfull. E njohur për dizajnin e saj praktik, elegancën e përjetshme dhe popullaritetin masiv, Neverfull është sot një nga çantat më të kërkuara dhe më të shitura të shtëpisë franceze.
Louis Vuitton Neverfull u prezantua për herë të parë në vitin 2007, si një tote bag e menduar për përdorim të përditshëm: e lehtë, e madhe, funksionale dhe me stil.
Në një kohë kur tregu dominohej nga çanta më të vogla, Neverfull solli një ide të re: luks që mund të përdoret realisht çdo ditë.
Emri i saj lidhet direkt me konceptin e një çante që nuk mbushet kurrë.
Ajo është projektuar të ketë kapacitet maksimal, pa humbur formën dhe elegancën, duke u kthyer në një nga çantat më praktike të Louis Vuitton.
Neverfull prodhohet në tre madhësi kryesore: PM (Petit Model) – më e vogla, perfekte për përdorim urban dhe dalje, MM (Medium Model) madhësia më popullore, ideale për përditshmëri, GM (Grand Model) – më e madhja, e përshtatshme për udhëtime apo punë. Kjo shumëllojshmëri e bën çantën të adaptueshme për stile dhe nevoja të ndryshme.
Neverfull vjen kryesisht në kanavacën klasike të Louis Vuitton: Monogram Canvas printi më i famshëm LV, Damier Ebene version më i errët dhe elegant, Damier Azur variant më veror, i hapur dhe i freskët. Ndërsa sa për materialin, kanavaca “coated canvas” është e njohur për qëndrueshmërinë e saj, rezistencën ndaj ujit dhe jetëgjatësinë.
Neverfull konsiderohet gjerësisht si një nga “best-seller”-at absolutë të markës dhe është gjithashtu një nga çantat që ruan vlerën më mirë në tregun e luksit.
Për shkak të kërkesës së lartë, ajo shitet shpejt në “second-hand” market dhe shpesh rritet në çmim me kalimin e viteve, duke e bërë jo vetëm një aksesor të preferuar, por edhe një copëz investimi në botën e modës.
Një zhvillim tronditës ka lënë fansat të shokuar. Sipas deklaratave të policisë, reperi Lil Poppa dyshohet se ka qëlluar veten pas një aksidenti me makinë.
Autoritetet bëjnë me dije se ngjarja ndodhi menjëherë pas përplasjes së automjetit, megjithatë detaje të plota rreth hetimit ende nuk janë bërë publike. Forcat e rendit po vazhdojnë të hetojnë rrethanat e sakta të aksidentit dhe të incidentit me armë.
Deri tani, zyrtarët nuk kanë bërë të ditur për përfshirjen e personave të tjerë dhe çështja mbetet nën hetim aktiv.
Lil Poppa ishte i njohur për tekstet e tij të ndjera dhe të sinqerta, ku shpesh trajtonte dhimbjen, sfidat personale dhe realitetin e jetës në rrugë. Lajmi është përhapur me shpejtësi në rrjetet sociale, ku fansat po shprehin trishtim dhe mosbesim.
Autoritetet u kanë bërë thirrje qytetarëve të shmangin spekulimet derisa hetimet të përfundojnë.
Nëse ju ose dikush që njihni po përballet me vështirësi emocionale, kërkoni ndihmë pranë shërbimeve lokale të emergjencës ose linjave të mbështetjes për shëndetin mendor si “Linja e Jetës”. Ndihma është gjithmonë e disponueshme.
Gemini i Google tani mund të krijojë këngë 30-sekondëshe bazuar në kërkesa të përdoruesve.
Për ta mundësuar këtë funksion, po përdoret Lyria 3, modeli më i fundit i muzikës gjeneruese nga Google DeepMind.
Krijimi i muzikës po lansohet në versionin beta në aplikacionin Gemini në gjuhët anglisht, gjermanisht, spanjisht, frëngjisht, hindisht, japonisht, koreanisht dhe portugalisht.
Qasje kanë të gjithë përdoruesit mbi 18 vjeç, ndërsa abonentët e Google AI Plus, Pro dhe Ultra do të kenë kufizime më të larta përdorimi krahasuar me ata që nuk paguajnë.
Për ta përdorur funksionin, mjafton të përshkruani një ide ose të ngarkoni një foto apo video, në mënyrë që t’i kërkoni Gemini të frymëzohet prej saj. Arti i kopertinës gjenerohet automatikisht nga Nano Banana.
Google thekson se “qëllimi i këtyre këngëve nuk është të krijojë një kryevepër muzikore, por t’ju japë një mënyrë argëtuese dhe unike për të shprehur veten” dhe për të ndarë krijimet me miqtë.
Përdoruesit mund të përshkruajnë një zhanër, humor, shaka të brendshme apo një kujtim specifik për të krijuar këngë me tekst ose audio instrumentale që “i përshtatet atmosferës suaj”.
Sa i përket teksteve, ato gjenerohen automatikisht dhe nuk ka nevojë që përdoruesi t’i shkruajë vetë. Këngët e krijuara nga Gemini janë të integruara me SynthID, vegla e padukshme e Google për identifikimin e përmbajtjes së gjeneruar nga inteligjenca artificiale e kompanisë.
Google sqaron se gjenerimi i muzikës është projektuar për shprehje origjinale dhe jo për të imituar artistë ekzistues. Nëse në kërkesë përmendet emri i një artisti, Gemini do ta marrë si frymëzim të gjerë krijues dhe do të krijojë një këngë me stil ose humor të ngjashëm.
Kompania shton se ka vendosur filtra për të kontrolluar rezultatet kundrejt përmbajtjes ekzistuese, ndërsa përdoruesit mund të raportojnë çdo përmbajtje që mund të shkelë të drejtat e tyre ose të të tjerëve.
Ministri i Mbrojtjes, Ejup Maqedonci, ka deklaruar se Kosova nuk do të aplikojë shërbim të detyrueshëm ushtarak, por do të zhvillojë modelin e shërbimit vullnetar në kuadër të Forcës së Sigurisë së Kosovës (FSK).
Në “Përballje Podcast”, ai theksoi se koncepti i mbrojtjes gjithëpërfshirëse parasheh përfshirjen e qytetarëve në mënyrë vullnetare, duke rritur kapacitetet rezervë të vendit.
“Secili qytetar i Kosovës do të ketë mundësinë që të regjistrohet dhe të jetë vullnetar në Forcën e Sigurisë së Kosovës”, deklaroi Maqedonci
Ai sqaroi se kjo nuk nënkupton rikthimin e shërbimit të detyrueshëm ushtarak në të ardhmen.
“Bëhet fjalë për shërbim vullnetar, jo të detyruar”, deklaroi ministri.
Sipas tij, ideja është që Kosova të ndërtojë një sistem rezervë që mund të aktivizohet në rast nevoje, duke u bazuar në praktika të vendeve të NATO-s.
“Koncepti i mbrojtjes gjithëpërfshirëse nënkupton që të kemi kapacitete shtesë përveç personelit aktiv, në mënyrë që në rast nevoje të kemi qytetarë të trajnuar që mund të angazhohen”, u shpreh ai.
Maqedonci shtoi se FSK-ja aktualisht ka kapacitete materiale që e mbështesin këtë koncept.
“Ne sot kemi katërfish më shumë pushkë individuale sesa personel aktiv”, tha ai, duke nënvizuar se kjo është pjesë e planifikimit për mbrojtjen gjithëpërfshirëse.
Ministri theksoi se përfshirja e qytetarëve do të jetë e rregulluar me ligj dhe do të shoqërohet me trajnim të duhur.
“Qëllimi nuk është militarizimi i shoqërisë, por rritja e gatishmërisë dhe ndërgjegjësimit për mbrojtjen e vendit”, deklaroi ai.
Sipas Maqedoncit, FSK mbetet një forcë profesionale dhe standardet e saj janë të harmonizuara me praktikat e NATO-s, ndërsa modeli i rezervave do të shërbejë si shtesë për forcimin e kapaciteteve mbrojtëse të Kosovës./Telegrafi
Një ngjitës austriak është shpallur fajtor për vrasje nga pakujdesia e madhe, pasi e dashura e tij vdiq nga ngrica në malin më të lartë të Austrisë vitin e kaluar.
Burri, i identifikuar vetëm si Thomas P në përputhje me ligjet austriake për privatësinë, ka marrë një dënim prej pesë muajsh me kusht dhe një gjobë prej 9,600 eurosh (8,400 paund).
E dashura e tij, Kerstin G, vdiq nga hipotermia gjatë një udhëtimi ngjitës në malin Grossglockner në janar të vitit 2025.
Në një deklaratë të dërguar për BBC-në, gjykata tha se kishte marrë parasysh “rekordin e pastër të mëparshëm të Thomas P dhe humbjen e një personi të afërt” si “faktorë lehtësues”. Gjykata shtoi se kishte marrë parasysh edhe “diskutimet publike në rrjetet sociale, të cilat ishin të dëmshme për të pandehurin”, raporton BBC, transmeton Sinjali.
Gjykatësi Norbert Hofer, vetë një ngjitës me përvojë që punon me skuadrat e shpëtimit malor dhe helikopterëve në Tirol, tha se Thomas P ishte një alpinist i shkëlqyer, por se e dashura e tij ishte shumë më pas në aftësitë ngjitëse.
Ai tha se çifti duhej të ishte kthyer, pasi Kerstin G nuk kishte përvojë të mjaftueshme në kushte dimërore.
Gjykata dëgjoi gjithashtu dëshminë e Andrea B, një ish-e dashur e Thomas P, e cila përshkroi se si ai e kishte lënë atë vetëm gjatë një turi të mëparshëm në Grossglockner në vitin 2023.
Ajo tha se ndjehej e rraskapitur, e marramendur dhe drita e saj kishte fikur. Ajo tregoi se po qante dhe bërtiste kur ai papritmas u zhduk, duke e lënë atë pas dhe duke ecur përpara.
Sipas raporteve në mediat austriake, gjykata dëgjoi se skuadra e shpëtimit malor gjeti trupin e Kerstin të varur përmbys nga një shkëmb.
“Na habit se ajo mbeti në atë pozicion,” tha një prej shpëtimtarëve në gjykatë. “Nëse era do të ishte më e fortë, ajo do të kishte rënë nga faqja jugore e malit.”
Prokuroria tha se kishte erëra të forta deri në 74 km/orë (45 mph) dhe temperaturë shumë të ulët. Ishte -8°C, me ndjesinë e erës që e bënte temperaturën të dukej si -20°C.
Ata argumentuan se, si ngjitësi më me përvojë, Thomas P ishte “udhëheqësi përgjegjës i turit”.
Prokuroria tha se ai nuk u kthye mbrapsht dhe nuk kërkoi ndihmë në kohë për të ndihmuar të dashurën e tij.
Thomas P nuk duhej kurrë të lejonte veten të hynte në këtë situatë, tha prokurori.
Thomas P u deklarua i pafajshëm. Ai i tha gjykatës se ishte shumë i penduar. Ai tha se e kishte dashur të dashurën e tij, e cila ishte shumë sportive dhe se udhëtimi ishte planifikuar së bashku.
Avokati i tij, Kurt Jelinek, tha se çifti ishte përfshirë në një situatë shumë të vështirë dhe stresuese.
Ai shtoi se Kerstin nuk ishte e papërvojë dhe e dinte se çfarë po përjetonte.
Prokuroria tha se çifti ngeci në mal dhe se burri nuk thirri policinë dhe nuk dërgoi sinjale emergjence kur një helikopter policor kaloi mbi ta rreth orës 22:30.
Pamjet nga helikopteri treguan çifti duke ngjitur ende malin. Gjykatësi vuri në dukje se nuk u dërguan sinjale emergjence.
Mbrojtja argumentoi se në atë moment Thomas P dhe e dashura e tij ndiheshin mirë dhe nuk kërkuan ndihmë pasi ishin afër majës.
Pamjet nga kamera e malit tregojnë dritat e dritave të tyre ndërsa ngjiteshin.
Por pak më vonë, mbrojtja tha se situata ndryshoi dramatikisht kur Kerstin u lodh afër majës.
Mbrojtja tha se ajo i tha Thomas P të shkonte të kërkonte ndihmë.
Në orën 00:35 më 19 janar, ai telefonoi policinë malore. Përmbajtja e bisedës është e diskutueshme. Shpëtimtarët thanë se nuk ishte një thirrje emergjence, por avokati tha se Thomas P mohon se i ka thënë policisë se gjithçka ishte në rregull.
Ai arriti majën dhe zbriti nga ana tjetër, duke e lënë Kerstin pas. Prokuroria tha se ai e la atë rreth orës 02:00 të mëngjesit.
Pamjet nga kamera e malit tregojnë figurën e tij të ndriçuar nga drita e fenerit duke zbritur nga maja.
Procesi gjyqësor ngjalli interes dhe debat, jo vetëm në Austri, por edhe në komunitetet e ngjitësve të maleve jashtë kufijve të vendit, duke ngritur pyetje për momentin kur gjykimi personal dhe marrja e rreziqeve bëhen çështje përgjegjësie penale.
Rasti është i hapur për apel.
Në kuadër të veprimeve për mbrojtjen e të drejtave të pronësisë intelektuale dhe sigurisë së konsumatorëve, janë asgjësuar 146,886 copë sprej për higjienën e gojës të falsifikuara, të cilat mbanin në mënyrë të paautorizuar markat tregtare “Coca-Cola”, “Fanta” dhe “Sprite”.
Këto mallra janë sekuestruar nga Dogana pas identifikimit të dyshimeve për shkelje të të drejtave të pronësisë intelektuale dhe pas verifikimeve të kryera në bashkëpunim me autoritetet kompetente dhe bartësit e të drejtave. Pas përfundimit të procedurave ligjore, gjykata kompetente ka marrë vendim për asgjësimin e tyre.
Produktet e falsifikuara, veçanërisht ato që lidhen me higjienën dhe përdorimin personal, mund të paraqesin rrezik për shëndetin e qytetarëve, pasi nuk i nënshtrohen kontrolleve të standardeve të sigurisë dhe cilësisë. Për këtë arsye, asgjësimi është realizuar në përputhje me legjislacionin në fuqi dhe nën mbikëqyrje doganore, me qëllim parandalimin e vendosjes së tyre në treg.
Ky veprim dëshmon përkushtimin e Doganës së Kosovës në luftimin e tregtisë së paligjshme, mbrojtjen e konsumatorëve dhe garantimin e një tregu të drejtë dhe të sigurt.
Pë provosh kuzhinën vendase është po aq e rëndësishme sa të vizitosh atraksionet kryesore kur udhëton në një vend të ri, por skenat gastronomike të Europës ndryshojnë shumë sa i përket buxhetit që duhet të shpenzosh për një vakt për dy persona.
Platforma Ferry GoGo ka kryer një studim dhe ka përpiluar një listë të vendeve europiane, nga më luksozet te më të lirat, bazuar në çmimin mesatar të një darke me tre pjata për dy persona (pa përfshirë pijet) në atë që e përshkruan si një restorant “të kategorisë së mesme”.
Pra, ku do të shkojë më larg buxheti juaj?
Në Kosovë, ku një vakt me antipasta, pjata kryesore dhe ëmbëlsira kushton vetëm rreth 20 euro. Pas saj vijnë Maqedonia e Veriut (24.38 euro) dhe Moldavia (30.32 euro), çka tregon qartë se rajoni është vendi ideal për të ngrënë me kosto të përballueshme.
Por çfarë mund të gjeni në menu?
Pjata kombëtare e Kosovës është flija, byreku me shtresa petash që vendosen mbi njëra-tjetrën me një përzierje kremoze kosi, gjalpi dhe djathi, i cili shtypet dhe piqet nën saç.
Specat e mbushur, perimet turshi dhe, sigurisht, bakllavaja janë gjithashtu pjesë e menusë, ndaj nuk do të mungojnë pjatat e bollshme. Dhe sigurohuni të provoni një makiato të shijshme.
Në anën tjetër të spektrit, aty ku një darkë jashtë do t’ju kushtojë shumë më tepër, është Zvicra!
Një darkë mesatare me tre pjata për dy persona në një restorant zviceran të kategorisë së mesme pritet t’ju kushtojë 107.24 euro, më shumë se katër herë çmimi i një darke në Kosovë.
Danimarka u rendit e dyta dhe Luksemburgu i treti, por më poshtë janë pesë vendet kryesore në secilën kategori, me çmimet përkatëse.
Pesë vendet më të lira në Europë për të ngrënë jashtë”
Kosova: 20.00 euro
Maqedonia e Veriut: 24.38 euro
Moldavia: 30.32 euro
Bosnja dhe Hercegovina: 30.75 euro
Serbia: 38.34 euro
Pesë vendet më të shtrenjta në Europë për të ngrënë jashtë:
Zvicra: 107.24 euro
Danimarka: 93.69 euro
Luksemburgu: 90.00 euro
Norvegjia: 89.86 euro
Holanda, Irlanda, Finlanda, Belgjika: 80.00 euro