Blog

Presidenti i Rusisë, Vladimir Putin, u ka kërkuar oligarkëve rusë të kontribuojnë financiarisht në buxhetin e shtetit, në një përpjekje për të stabilizuar ekonominë e vendit, e cila po përballet me vështirësi ndërsa lufta në Ukrainë hyn në vitin e pestë.

Lajmi bëhet i ditur nga media online The Bell, duke cituar burime anonime, ndërsa raportime të ngjashme janë publikuar edhe nga Financial Times, që i referohet personave të njohur me çështjen.

Sipas këtyre burimeve, Putin zhvilloi një takim me dyer të mbyllura me biznesmenët më të fuqishëm të Rusisë të enjten (26 mars), ku në fokus ishte financimi i operacioneve ushtarake dhe vijimi i luftës në Ukrainë, e cila nisi me pushtimin e plotë në shkurt të vitit 2022.

Raportimet theksojnë se Kremlini synon të vazhdojë operacionet ushtarake derisa të marrë kontrollin e plotë të rajonit lindor të Donbasit, pjesë të të cilit ende nuk janë nën kontrollin rus.

Gjatë takimit, miliarderi Suleiman Kerimov thuhet se është zotuar të dhurojë rreth 100 miliardë rubla, ose rreth 1.23 miliardë dollarë, për të mbështetur buxhetin shtetëror.

Presion ekonomik mbi Rusinë

Ndërkohë, ekonomia ruse po përballet me sfida të shumta. Rënia e të ardhurave nga eksportet e energjisë dhe ngadalësimi ekonomik kanë reduktuar ndjeshëm të ardhurat buxhetore.

Sipas burimeve të Reuters, qeveria ruse po shqyrton mundësinë e një uljeje prej 10% të shpenzimeve që nuk konsiderohen prioritare në buxhetin e këtij viti.

Megjithatë, vendimi përfundimtar pritet të varet edhe nga zhvillimet në tregjet globale të energjisë, veçanërisht nga ndikimi që mund të ketë konflikti me Iranin në rritjen e çmimit të naftës.

Në këtë kontekst, kërkesa e Putinit për mbështetje financiare nga elita ekonomike shihet si një përpjekje për të përballuar kostot në rritje të luftës dhe për të ruajtur stabilitetin ekonomik të vendit.

Erëra të forta me shpejtësi deri në 120 km/orë janë regjistruar në Zagreb këtë të premte. Për shkak të kushteve të motit, u pezullua mësimi në të gjitha shkollat fillore dhe të mesme.

Dëme të shumta materiale janë të dukshme në të gjithë qytetin, me pemë të rrëzuara, shtylla ndriçimi të dëmtuara, dhe po ashtu të dëmtuara kanë mbetur çatitë e ndërtesave si dhe automjetet e parkuara anash rrugëve.

Erërat e forta në kryeqytetin kroat dëmtuan edhe linjat e tramvajit.

Ka patur ndërprerje të transportit hekurudhor, me disa linja të mbyllura dhe me një tren që ka dalë nga shinat. Në bord kishte rreth 40 pasagjerë, dhe sipas informacionit fillestar, tre prej tyre u plagosën lehtë.

Për shkak të borës, janë në fuqi kufizime për lëvizjen në rrugë të kamionëve me rimorkio dhe traktorëve.

Erëra të forta po fryjnë gjithashtu përgjatë bregdetit kroat, ndërkohë që reshjet e mëdha të dëborës kanë sjellë bllokim të automjeteve nëpër autostrada.

Diplomati estonez, Aivo Orav, pak para se të përmbyllte angazhimin e tij si shef i Zyrës së BE’së në Kosovë, kishte thënë se mund të shfrytëzohej diplomacia për të gjetur mënyra që të shtyhej përpara themelimi i Asociacionit të Komunave me Shumicë Serbe, meqë pavarësisht insistimit të BE-së, Kosova nuk po e çon draft-statutin në Gjykatë Kushtetuese. Sipas Orav, nëse vazhdohet të insistohet në një qëndrim të tillë e ndërkohë s’ndërmerret asnjë veprim, atëherë nuk përfiton askush.

Por a ishte ky qëndrim i Orav si Shef i Zyrës së BE-së edhe qëndrim i shteteve anëtare të BE-së?

Zëdhënësja e Ambasadës Gjermane, Catalina Heine, ka thënë se për Gjermaninë është prioritet që të shoh hapa drejt themelimt të Asociacionit si një detyrim ndërkombëtar që Kosova e ka marrë që nga 2013-ta.

Ajo ka thënë se Asociacioni duhet të themelohet në përputhje me Kushtetutën e Republikës së Kosovës prandaj duhet që Gjykata Kushtetuese të përfshihet në vlerësim para zbatimit.

“Për Gjermaninë, është prioritet që të shohë përparim në zhvillimin dhe zbatimin e Asociacionit të Komunave me Shumicë Serbe, që ka qenë një detyrim ndërkombëtar që nga viti 2013. Shpresojmë të shohim diskutimet e nevojshme dhe më pas përparim në krijimin e Asociacionit. Dhe sigurisht, çdo zbatim i Asociacionit duhet të jetë plotësisht në përputhje me Kushtetutën e Kosovës, për këtë arsye Gjykata Kushtetuese duhet të përfshihet për vlerësim para zbatimit”, ka thënë Heine për Gazetën Express.

Heine gjithashtu ka potencuar se tema e Asociacionit të Komunave me Shumicë Serbe diskutohet shpesh, sa herë që ka takime me Qeverinë e Kosovës e ku flitet për anëtarësimin e Kosovës në Këshill të Evropës, proces ky që Berlini zyrtar e përkrah.

“Duke qenë se rruga drejt anëtarësimit të Kosovës në Këshillin e Evropës, të cilën Gjermania e mbështet fuqimisht, është një pikë diskutimi e rregullt midis Ambasadës dhe Qeverisë së Kosovës, edhe Asociacioni i Komunave me Shumicë Serbe diskutohet shpesh”, ka thënë zëdhënësja e Ambasadës Gjermane..

Bashkëkombasi i kryediplomates së BE-së, Aivo Orav, i cili tashmë do të angazhohet si Shef i Delegacionit të BE-së në Ankara, në një intervistë për gazetarë të mediave serbe në Kosovë, ka deklaruar se BE-ja e ka mbajtur shumë gjatë qëndrimin e saj për çuarjen e Draftit të Asociacionit në Kushtetuese, megjithatë sipas tij s’ka pasur asnjë lëvizje. Ai ka thënë se një qëndrim i tillë mund të vazhdohet të mbahet, por nëse dihet se s’do të ndodh asgjë, atëherë një qasje e tillë s’i ndihmon askujt.

“Bashkimi Evropian e ka mbajtur këtë qëndrim për një kohë mjaft të gjatë që ky draft i Asociacionit së duhet t’i dërgohet Gjykatës Kushtetuese. Ai nuk është dërguar ende. Gjykata Kushtetuese tha gjithashtu se në fakt ata nuk kanë çfarë të bëjnë sepse nuk kanë autoritet ta vlerësojnë atë. Dhe ky qëndrim u mbajt për një kohë mjaft të gjatë. Përsëri, ne mund ta mbajmë këtë qëndrim për një kohë shumë, shumë, shumë të gjatë, por nëse e dimë se nuk do të ndodhë, atëherë mendoj se ky lloj qasjeje nuk i ndihmon askujt. Pra, në diplomaci, ne duhet të gjejmë mënyrat se si t’i trajtojmë këto çështje”, ka thënë Orav.

Trupi gjykues në rastin e vrasjes së Liridona Ademaj ka mbyllur seancën e së premtes, duke paralajmëruar se në vazhdim të procesit gjyqësor do të shtrohen pyetje personale për jetën e të akuzuarit tjetër Naim Murseli, përmes dëshmisë së Kushtrim Kokallës, raporton Ekonomia Online.

Mbyllja e seancës erdhi pas përfundimit të një pjese të dëshmisë së Kokallës, ndërsa trupi gjykues njoftoi se në seancat e ardhshme ai do të pyetet më në detaje lidhur me rrethanat personale dhe jetën e Murselit, në kuadër të ndriçimit të plotë të rastit.

Komuna e Prishtinës ka nxjerr vendim me të cilin ndalon qarkullimin e mjeteve bujqësore në kryeqytet, shkruan Reporteri.net.

Në njoftimin e Komunës thuhet se Policia dhe Inspektorati do të ushtrojnë kontrolle të vazhdueshme dhe do të ndërmarrin masa të menjëhershme ndaj çdo shkelësi.

“Informojmë të gjithë drejtuesit e motokultivatorëve/multikultivatorëve se qarkullimi i tyre në kryeqytet është i ndaluar! Policia e Kosovës dhe Inspektoriati Komunal do të ushtrojnë kontrolle të vazhdueshme dhe do të ndërmarrin masa të menjëhershme ndaj çdo shkelësi”, thuhet në njoftim.